੭. ਸਪ੍ਪਾਣਕਵਗ੍ਗੋ
੧. ਸਞ੍ਚਿਚ੍ਚਪਾਣਸਿਕ੍ਖਾਪਦਵਣ੍ਣਨਾ
੩੮੨. ਸਤ੍ਤਮਸ੍ਸ ਪਠਮੇ ਉਸੁਂ ਸਰਂ ਅਸਤਿ ਖਿਪਤੀਤਿ ਇਸ੍ਸਾਸੋ. ਨ ਹੇਤ੍ਥ ਕਿਞ੍ਚਿ ਜੀਵਿਤਂ ਨਾਮ ਵਿਸੁਂ ਤਿਟ੍ਠਤੀਤਿ ਸਮ੍ਬਨ੍ਧੋ. ਤਤ੍ਥ ਪਾਣੇਤਿ ਸਤ੍ਤੇ. ਅਪ੍ਪਮਤ੍ਤੇਨ ਵਤ੍ਤਂ ਕਾਤਬ੍ਬਨ੍ਤਿ ਯਥਾ ਪਾਣਕਾਨਂ ਵਿਹੇਸਾਪਿ ਨ ਹੋਤਿ, ਏਵਂ ਸਲ੍ਲਕ੍ਖੇਤ੍ਵਾ ਓਤਾਪਨਸਮ੍ਮਜ੍ਜਨਾਦਿਵਤ੍ਤਂ ਕਾਤਬ੍ਬਂ. ਸੇਸਂ ਵੁਤ੍ਤਨਯਮੇਵ.
ਸਞ੍ਚਿਚ੍ਚਪਾਣਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ
੩੮੭. ਦੁਤਿਯੇ ਉਦਕਸਣ੍ਠਾਨਕਪ੍ਪਦੇਸੇਤਿ ਕਦ੍ਦਮਪਾਸਾਣਾਦਿਭੂਮਿਯਂ. ਤਤ੍ਥਾਤਿ ਆਸਿਤ੍ਤੇ ਕਪ੍ਪਿਯਉਦਕੇ. ਸੇਸਂ ਵੁਤ੍ਤਨਯਮੇਵ.
ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਉਕ੍ਕੋਟਨਸਿਕ੍ਖਾਪਦਵਣ੍ਣਨਾ
੩੯੨. ਤਤਿਯੇ ‘‘ਤਸ੍ਸ ਭਿਕ੍ਖੁਨੋ ਸਨ੍ਤਿਕਂ ਗਨ੍ਤ੍ਵਾ’’ਤਿ ਵੁਤ੍ਤਤ੍ਤਾ ਯਸ੍ਸ ਅਧਿਕਰਣਂ ਸਙ੍ਘਕਮ੍ਮੇਨ ਨਿਹਤਂ, ਤਸ੍ਸ ਸਮ੍ਮੁਖੇ ਏਵ ਉਕ੍ਕੋਟੇਨ੍ਤਸ੍ਸ ਪਾਚਿਤ੍ਤਿਯਂ. ਪਰਮ੍ਮੁਖੇ ਪਨ ਦੁਕ੍ਕਟਮੇਵ.
੩੯੫. ‘‘ਧਮ੍ਮਕਮ੍ਮੇ ਅਧਮ੍ਮਕਮ੍ਮਸਞ੍ਞੀ ਉਕ੍ਕੋਟੇਤਿ, ਅਨਾਪਤ੍ਤੀ’’ਤਿ ਵੁਤ੍ਤਤ੍ਤਾ ਅਨਾਦਰਿਯਤਾਦਿ ਵਿਯ ਉਕ੍ਕੋਟਨਂ ਸਯਂ ਅਕੁਸਲਂ ਨ ਹੋਤਿ, ਧਮ੍ਮਕਮ੍ਮਸਞ੍ਞਾਯ, ਪਨ ਵਿਮਤਿਯਾ ਚ ਉਕ੍ਕੋਟਨੇਨੇਵ ਅਕੁਸਲਂ ਹੋਤਿ. ਯਥਾਧਮ੍ਮਂ ਨਿਹਤਤਾ, ਜਾਨਨਾ, ਉਕ੍ਕੋਟਨਾਤਿ ਤੀਣਿ ਅਙ੍ਗਾਨਿ.
ਉਕ੍ਕੋਟਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਦੁਟ੍ਠੁਲ੍ਲਸਿਕ੍ਖਾਪਦਵਣ੍ਣਨਾ
੩੯੯. ਚਤੁਤ੍ਥੇ ਆਪਤ੍ਤਿਂ ਆਪਜ੍ਜਤਿਯੇਵਾਤਿ ਧੁਰਨਿਕ੍ਖੇਪਪਕ੍ਖੇ ਵੁਤ੍ਤਂ. ਵਤ੍ਥੁਪੁਗ੍ਗਲੋਤਿ ਆਪਨ੍ਨਪੁਗ੍ਗਲੋ. ਛਾਦੇਤੁਕਾਮਤਾਯ ਹਿ ਸਤਿ ਏਵ ਅਵਸ੍ਸਂ ਅਞ੍ਞਸ੍ਸ ਆਰੋਚਨਂ ਵੁਤ੍ਤਂ, ਵਤ੍ਥੁਪੁਗ੍ਗਲਸ੍ਸ ਚ ਆਰੋਚਨਾ ਨਾਮ ਨ ਹੋਤੀਤਿ ਪਟਿਚ੍ਛਾਦਨਮੇਵਾਤਿ ਅਧਿਪ੍ਪਾਯੋ. ਕੋਟਿ ਛਿਨ੍ਨਾ ਹੋਤੀਤਿ ਛਾਦੇਸ੍ਸਾਮੀਤਿ ਧੁਰਨਿਕ੍ਖੇਪੇ ਸਤਿਪਿ ਪੁਗ੍ਗਲਪਰਮ੍ਪਰਾਯ ਗਚ੍ਛਨ੍ਤੀ ਆਪਤ੍ਤਿਕੋਟਿ ਛਿਜ੍ਜਤਿ.
੪੦੦. ‘‘ਅਨੁਪਸਮ੍ਪਨ੍ਨਸ੍ਸ ਸੁਕ੍ਕਵਿਸ੍ਸਟ੍ਠਿ ਚ ਕਾਯਸਂਸਗ੍ਗੋ ਚਾਤਿ ਅਯਂ ਦੁਟ੍ਠੁਲ੍ਲਅਜ੍ਝਾਚਾਰੋ ਨਾਮਾ’’ਤਿ ਇਦਂ ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਟ੍ਠਕਥਾਯਂ ‘‘ਅਨੁਪਸਮ੍ਪਨ੍ਨਸ੍ਸ…ਪੇ… ਆਦਿਤੋ ਪਞ੍ਚ ਸਿਕ੍ਖਾਪਦਾਨਿ ਦੁਟ੍ਠੁਲ੍ਲੋ ਨਾਮ ਅਜ੍ਝਾਚਾਰੋ, ਸੇਸਾਨਿ ਅਦੁਟ੍ਠੁਲ੍ਲੋ. ਸੁਕ੍ਕਵਿਸ੍ਸਟ੍ਠਿਕਾਯਸਂਸਗ੍ਗਦੁਟ੍ਠੁਲ੍ਲਅਤ੍ਤਕਾਮਾ ਪਨਸ੍ਸ ਅਜ੍ਝਾਚਾਰੋ ਨਾਮਾ’’ਤਿ (ਪਾਚਿ. ਅਟ੍ਠ. ੮੨) ਇਮਿਨਾ ਵਚਨੇਨ ਵਿਰੁਜ੍ਝਤੀਤਿ ਵੀਮਂਸਿਤਬ੍ਬਂ. ਪੁਗ੍ਗਲਪੇਮੇਨ ਛਾਦਯਤੋ ਚੇਤ੍ਥ ‘‘ਅਞ੍ਞੇ ਗਰਹਿਸ੍ਸਨ੍ਤੀ’’ਤਿ ਭਯਵਸੇਨ ਛਾਦਨਕ੍ਖਣੇ ਪਟਿਘੋਵ ਉਪ੍ਪਜ੍ਜਤੀਤਿ ‘‘ਦੁਕ੍ਖਵੇਦਨ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਉਪਸਮ੍ਪਨ੍ਨਸ੍ਸ ਦੁਟ੍ਠੁਲ੍ਲਾਪਤ੍ਤਿਜਾਨਨਂ, ਪਟਿਚ੍ਛਾਦੇਤੁਕਾਮਤਾਯ ਧੁਰਨਿਕ੍ਖੇਪੋਤਿ ਦ੍ਵੇ ਅਙ੍ਗਾਨਿ.
ਦੁਟ੍ਠੁਲ੍ਲਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ
੪੦੨. ਪਞ੍ਚਮੇ ਰੂਪਸਿਪ੍ਪਨ੍ਤਿ ਹੇਰਞ੍ਞਿਕਸਿਪ੍ਪਂ. ਗਬ੍ਭੇ ਸਯਿਤਕਾਲੇਨ ਸਦ੍ਧਿਂ ਵੀਸਤਿਮਂ ਵਸ੍ਸਂ ਪਰਿਪੁਣ੍ਣਮਸ੍ਸਾਤਿ ਗਬ੍ਭਵੀਸੋ.
੪੦੪. ਨਿਕ੍ਖਮਨੀਯਪੁਣ੍ਣਮਾਸੀਤਿ ਸਾਵਣਮਾਸਸ੍ਸ ਪੁਣ੍ਣਮਿਯਾ ਆਸਾਲ਼੍ਹੀਪੁਣ੍ਣਮਿਯਾ ਅਨਨ੍ਤਰਪੁਣ੍ਣਮੀ. ਪਾਟਿਪਦਦਿਵਸੇਤਿ ਪਚ੍ਛਿਮਿਕਾਯ ਵਸ੍ਸੂਪਨਾਯਿਕਾਯ. ਦ੍ਵਾਦਸ ਮਾਸੇ ਮਾਤੁ ਕੁਚ੍ਛਿਸ੍ਮਿਂ ਵਸਿਤ੍ਵਾ ਮਹਾਪਵਾਰਣਾਯ ਜਾਤਂ ਉਪਸਮ੍ਪਾਦੇਨ੍ਤੀਤਿ ਅਤ੍ਥੋ. ‘‘ਤਿਂਸ ਰਤ੍ਤਿਨ੍ਦਿਵੋ ਮਾਸੋ, ਦ੍ਵਾਦਸਮਾਸਿਕੋ ਸਂਵਚ੍ਛਰੋ’’ਤਿ (ਅ. ਨਿ. ੩.੭੧; ੮.੪੩; ਵਿਭ. ੧੦੨੩) ਵਚਨਤੋ ‘‘ਚਤ੍ਤਾਰੋ ਮਾਸਾ ਪਰਿਹਾਯਨ੍ਤੀ’’ਤਿ ਵੁਤ੍ਤਂ. ਵਸ੍ਸਂ ਉਕ੍ਕਡ੍ਢਨ੍ਤੀਤਿ ਵਸ੍ਸਂ ਉਦ੍ਧਂ ਕਡ੍ਢਨ੍ਤਿ, ‘‘ਏਕਮਾਸਂ ਅਧਿਕਮਾਸੋ’’ਤਿ ਛਡ੍ਡੇਤ੍ਵਾ ਵਸ੍ਸਂ ਉਪਗਚ੍ਛਨ੍ਤੀਤਿ ਅਤ੍ਥੋ. ਤਸ੍ਮਾ ਤਤਿਯੋ ਤਤਿਯੋ ਸਂਵਚ੍ਛਰੋ ਤੇਰਸਮਾਸਿਕੋ ਹੋਤਿ. ਤੇ ਦ੍ਵੇ ਮਾਸੇ ਗਹੇਤ੍ਵਾਤਿ ਨਿਕ੍ਖਮਨੀਯਪੁਣ੍ਣਮਾਸਤੋ ਯਾਵ ਜਾਤਦਿਵਸਭੂਤਾ ਮਹਾਪਵਾਰਣਾ. ਤਾਵ ਯੇ ਦ੍ਵੇ ਮਾਸਾ ਅਨਾਗਤਾ, ਤੇਸਂ ਅਤ੍ਥਾਯ ਅਧਿਕਮਾਸਤੋ ਲਦ੍ਧੇ ਦ੍ਵੇ ਮਾਸੇ ਗਹੇਤ੍ਵਾ. ਤੇਨਾਹ ‘‘ਯੋ ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤੀ’’ਤਿਆਦਿ. ‘‘ਨਿਕ੍ਕਙ੍ਖਾ ਹੁਤ੍ਵਾ’’ਤਿ ਇਦਂ ਅਟ੍ਠਾਰਸਨ੍ਨਂ ਵਸ੍ਸਾਨਂ ਏਕਅਧਿਕਮਾਸੇ ਗਹੇਤ੍ਵਾ ਤਤੋ ਵੀਸਤਿਯਾ ਵਸ੍ਸੇਸੁਪਿ ਚਾਤੁਦ੍ਦਸੀਅਤ੍ਥਾਯ ਚਤੁਨ੍ਨਂ ਮਾਸਾਨਂ ਪਰਿਹਾਪਨੇਨ ਸਬ੍ਬਦਾ ਪਰਿਪੁਣ੍ਣਵੀਸਤਿਵਸ੍ਸਤਂ ਸਨ੍ਧਾਯ ਵੁਤ੍ਤਂ. ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤੀਤਿ ਮਹਾਪਵਾਰਣਾਦਿਵਸੇ ਅਤਿਕ੍ਕਨ੍ਤੇ ਗਬ੍ਭਵਸ੍ਸੇਨ ਸਹ ਵੀਸਤਿਵਸ੍ਸੋ ਭਵਿਸ੍ਸਤੀਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਗਬ੍ਭਮਾਸਾਪਿ ਗਣਨੂਪਗਾ ਹੋਨ੍ਤਿ, ਤਸ੍ਮਾ. ਏਕਵੀਸਤਿਵਸ੍ਸੋਤਿ ਜਾਤਿਯਾ ਵੀਸਤਿਵਸ੍ਸਂ ਸਨ੍ਧਾਯ ਵੁਤ੍ਤਂ.
੪੦੬. ਅਞ੍ਞਂ ਉਪਸਮ੍ਪਾਦੇਤੀਤਿ ਉਪਜ੍ਝਾਯੋ, ਆਚਰਿਯੋ ਵਾ ਹੁਤ੍ਵਾ ਉਪਸਮ੍ਪਾਦੇਤਿ. ਸੋਪੀਤਿ ਉਪਸਮ੍ਪਾਦੇਨ੍ਤੋਪਿ ਅਨੁਪਸਮ੍ਪਨ੍ਨੋ. ਊਨਵੀਸਤਿਵਸ੍ਸਤਾ, ਤਂ ਞਤ੍ਵਾ ਉਪਜ੍ਝਾਯੇਨ ਹੁਤ੍ਵਾ ਉਪਸਮ੍ਪਾਦਨਨ੍ਤਿ ਦ੍ਵੇ ਅਙ੍ਗਾਨਿ.
ਊਨਵੀਸਤਿਵਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਥੇਯ੍ਯਸਤ੍ਥਸਿਕ੍ਖਾਪਦਵਣ੍ਣਨਾ
੪੦੯. ਛਟ੍ਠੇ ਥੇਯ੍ਯਸਤ੍ਥਭਾਵੋ, ਞਤ੍ਵਾ ਸਂਵਿਧਾਨਂ, ਅਵਿਸਙ੍ਕੇਤੇਨ ਗਮਨਨ੍ਤਿ ਤੀਣਿ ਅਙ੍ਗਾਨਿ.
ਥੇਯ੍ਯਸਤ੍ਥਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪੧੨. ਸਤ੍ਤਮਂ ਵੁਤ੍ਤਨਯਮੇਵ.
੮. ਅਰਿਟ੍ਠਸਿਕ੍ਖਾਪਦਵਣ੍ਣਨਾ
੪੧੭. ਅਟ੍ਠਮੇ ਅਨ੍ਤਰਾਯਨ੍ਤਿ ਅਨ੍ਤਰਾ ਵੇਮਜ੍ਝੇ ਏਤਿ ਆਗਚ੍ਛਤੀਤਿ ਅਨ੍ਤਰਾਯੋ, ਦਿਟ੍ਠਧਮ੍ਮਿਕਾਦਿਅਨਤ੍ਥੋ. ਆਨਨ੍ਤਰਿਯਧਮ੍ਮਾਤਿ ਅਨਨ੍ਤਰੇ ਭਵੇ ਫਲਨਿਬ੍ਬਤ੍ਤਨੇ ਨਿਯੁਤ੍ਤਾ ਚੇਤਨਾਦਿਧਮ੍ਮਾਤਿ ਅਤ੍ਥੋ. ‘‘ਨ ਸਗ੍ਗਸ੍ਸਾ’’ਤਿ ਇਦਂ ਭਿਕ੍ਖੁਨਿਦੂਸਨਕਮ੍ਮਸ੍ਸ ਆਨਨ੍ਤਰਿਯਤ੍ਤਾਭਾਵਤੋ ਵੁਤ੍ਤਂ. ਅਰਿਯਸਾਵਿਕਾਸੁ, ਪਨ ਕਲ੍ਯਾਣਪੁਥੁਜ੍ਜਨਭੂਤਾਯ ਚ ਬਲਕ੍ਕਾਰੇਨ ਦੂਸੇਨ੍ਤਸ੍ਸ ਆਨਨ੍ਤਰਿਯਸਅਸਮੇਵ. ਮੋਕ੍ਖਨ੍ਤਰਾਯਿਕਤਾ ਪਨ ਲੋਲਾਯਪਿ ਪਕਤਤ੍ਤਭਿਕ੍ਖੁਨਿਯਾ ਦੂਸਕਸ੍ਸ ਤਸ੍ਮਿਂ ਅਤ੍ਤਭਾਵੇ ਮਗ੍ਗੁਪ੍ਪਤ੍ਤਿਯਾ ਅਭਾਵਤੋ ਵੁਤ੍ਤਾ.
ਤਸ੍ਮਿਂ ਅਤ੍ਤਭਾਵੇ ਅਨਿਵਤ੍ਤਨਕਾ ਅਹੇਤੁਕਅਕਿਰਿਯਨਤ੍ਥਿਕਦਿਟ੍ਠਿਯੋਵ ਨਿਯਤਮਿਚ੍ਛਾਦਿਟ੍ਠਿਧਮ੍ਮਾ. ਪਣ੍ਡਕਾਦੀਨਂ ਗਹਣਂ ਨਿਦਸ੍ਸਨਮਤ੍ਤਂ. ਸਬ੍ਬਾਪਿ ਦੁਹੇਤੁਕਾਹੇਤੁਕਪਟਿਸਨ੍ਧਿਯੋ ਵਿਪਾਕਨ੍ਤਰਾਯਿਕਾਵ ਦੁਹੇਤੁਕਾਨਮ੍ਪਿ ਮਗ੍ਗਾਨੁਪ੍ਪਤ੍ਤਿਤੋ.
ਅਯਨ੍ਤਿ ਅਰਿਟ੍ਠੋ. ਰਸੇਨ ਰਸਨ੍ਤਿ ਅਨਵਜ੍ਜੇਨ ਪਚ੍ਚਯਪਰਿਭੁਞ੍ਜਨਰਸੇਨ ਪਞ੍ਚਕਾਮਗੁਣਪਅਭੋਗਰਸਂ ਸਮਾਨੇਤ੍ਵਾ. ਉਪਨੇਨ੍ਤੋ ਵਿਯਾਤਿ ਘਟੇਨ੍ਤੋ ਵਿਯ, ਸੋ ਏਵ ਵਾ ਪਾਠੋ.
ਅਟ੍ਠਿਕਙ੍ਕਲੂਪਮਾਤਿ ਏਤ੍ਥ ਅਟ੍ਠਿ ਏਵ ਨਿਮ੍ਮਂਸਤਾਯ ਕਙ੍ਕਲਨ੍ਤਿ ਚ ਵੁਚ੍ਚਤਿ. ਪਲਿਭਞ੍ਜਨਟ੍ਠੇਨਾਤਿ ਅਵਸ੍ਸਂ ਪਤਨਟ੍ਠੇਨ. ਅਧਿਕੁਟ੍ਟਨਟ੍ਠੇਨਾਤਿ ਅਤਿ ਵਿਯ ਕੁਟ੍ਟਨਟ੍ਠੇਨ. ਪਾਲ਼ਿਯਂ ‘‘ਤਥਾਹਂ ਭਗਵਤਾ…ਪੇ… ਨਾਲਂ ਅਨ੍ਤਰਾਯਾਯਾ’’ਤਿ ਇਦਂ ਵਤ੍ਥੁਅਨੁਰੂਪਤੋ ਵੁਤ੍ਤਂ. ਏਵਂ ਪਨ ਅਗ੍ਗਹੇਤ੍ਵਾ ਅਞ੍ਞੇਨਪਿ ਆਕਾਰੇਨ ਯਂ ਕਿਞ੍ਚਿ ਭਗਵਤਾ ਵੁਤ੍ਤਂ ਵਿਪਰੀਤਤੋ ਗਹੇਤ੍ਵਾ ਪਰੇਹਿ ਵੁਤ੍ਤੇਪਿ ਅਮੁਞ੍ਚਿਤ੍ਵਾ ਵੋਹਰਨ੍ਤਸ੍ਸਾਪਿ ਵੁਤ੍ਤਨਯਾਨੁਸਾਰੇਨ ਤਦਨੁਗੁਣਂ ਸਮਨੁਭਾਸਨਕਮ੍ਮਵਾਚਂ ਯੋਜੇਤ੍ਵਾ ਆਪਤ੍ਤਿਯਾ ਆਰੋਪੇਤੁਂ, ਆਪਤ੍ਤਿਯਾ ਅਦਸ੍ਸਨਾਦੀਸੁ ਤੀਸੁ ਯਂ ਕਿਞ੍ਚਿ ਅਭਿਰੁਚਿਤਂ ਨਿਮਿਤ੍ਤਂ ਕਤ੍ਵਾ ਉਕ੍ਖੇਪਨੀਯਕਮ੍ਮਂ ਕਾਤੁਞ੍ਚ ਲਬ੍ਭਤਿ. ਸਮਨੁਭਾਸਨਂ ਅਕਤ੍ਵਾਪਿ ‘‘ਮਾਯਸ੍ਮਾ ਏਵਂ ਅਵਚਾ’’ਤਿ ਭਿਕ੍ਖੂਹਿ ਵੁਤ੍ਤਮਤ੍ਤੇ ਲਦ੍ਧਿਯਾ ਅਪ੍ਪਟਿਨਿਸ੍ਸਜ੍ਜਨਪਚ੍ਚਯਾਯ ਦੁਕ੍ਕਟਾਪਤ੍ਤਿਯਾਪਿ ਉਕ੍ਖੇਪਨੀਯਕਮ੍ਮਂ ਕਾਤੁਮ੍ਪਿ ਵਟ੍ਟਤੇਵਾਤਿ ਦਟ੍ਠਬ੍ਬਂ. ਧਮ੍ਮਕਮ੍ਮਤਾ, ਸਮਨੁਭਾਸਨਾਯ ਅਪ੍ਪਟਿਨਿਸ੍ਸਜ੍ਜਨਨ੍ਤਿ ਦ੍ਵੇ ਅਙ੍ਗਾਨਿ.
ਅਰਿਟ੍ਠਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਵਣ੍ਣਨਾ
੪੨੪. ਨਵਮੇ ‘‘ਉਕ੍ਖਿਤ੍ਤੋ ਅਨੋਸਾਰਿਤੋ’’ਤਿ ਵੁਤ੍ਤਤ੍ਤਾ ਅਰਿਟ੍ਠਸ੍ਸ ਉਕ੍ਖੇਪਨੀਯਕਮ੍ਮਂ ਕਤਨ੍ਤਿ ਦਟ੍ਠਬ੍ਬਂ.
੪੨੫. ਪਾਲ਼ਿਯਂ ‘‘ਏਕਚ੍ਛਨ੍ਨੇ’’ਤਿ ਸਾਮਞ੍ਞਤੋ ਵੁਤ੍ਤਤ੍ਤਾ ਨਾਨੂਪਚਾਰੇਪਿ ਏਕਚ੍ਛਨ੍ਨੇ ਨਿਪਜ੍ਜਨੇ ਪਣ੍ਣਤ੍ਤਿਂ ਅਜਾਨਨ੍ਤਸ੍ਸ ਅਰਹਤੋਪਿ ਉਕ੍ਖਿਤ੍ਤਾਨੁਵਤ੍ਤਕਾਨਮ੍ਪਿ ਪਾਚਿਤ੍ਤਿਯਮੇਵ. ਅਕਤਾਨੁਧਮ੍ਮਤਾ, ਞਤ੍ਵਾ ਸਮ੍ਭੋਗਾਦਿਕਰਣਨ੍ਤਿ ਦ੍ਵੇ ਅਙ੍ਗਾਨਿ.
ਉਕ੍ਖਿਤ੍ਤਸਮ੍ਭੋਗਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਕਣ੍ਟਕਸਿਕ੍ਖਾਪਦਵਣ੍ਣਨਾ
੪੨੮. ਦਸਮੇ ਪਿਰੇਤਿ ਸਮ੍ਬੋਧਨਤ੍ਥੇ ਨਿਪਾਤਪਦਂ. ਸੇਸਂ ਅਨਨ੍ਤਰਸਿਕ੍ਖਾਪਦਦ੍ਵਯੇ ਵੁਤ੍ਤਨਯਮੇਵ.
ਕਣ੍ਟਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਸਪ੍ਪਾਣਕਵਗ੍ਗੋ ਸਤ੍ਤਮੋ.