੯. ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ

੧੩੫. ਨਵਮੇ ‘‘ਮਹਲ੍ਲਕੋ ਨਾਮ ਵਿਹਾਰੋ ਸਸ੍ਸਾਮਿਕੋ’’ਤਿ ਵੁਤ੍ਤਤ੍ਤਾ ਸਞ੍ਞਾਚਿਕਾਯ ਕੁਟਿਯਾ ਅਨਾਪਤ੍ਤੀਤਿ ਵਦਨ੍ਤਿ. ਯਸ੍ਸਾਤਿ ਵਿਹਾਰਸ੍ਸ. ਸਾ ਅਪਰਿਪੂਰੂਪਚਾਰਾਪਿ ਹੋਤੀਤਿ ਵਿਵਰਿਯਮਾਨਂ ਕਵਾਟਂ ਯਂ ਭਿਤ੍ਤਿਂ ਆਹਨਤਿ, ਸਾ ਸਾਮਨ੍ਤਾ ਕਵਾਟਵਿਤ੍ਥਾਰਪ੍ਪਮਾਣਾ ਉਪਚਾਰਰਹਿਤਾਪਿ ਹੋਤੀਤਿ ਅਤ੍ਥੋ. ਆਲੋਕਂ ਵਾਤਪਾਨਂ ਸਨ੍ਧੇਤਿ ਘਟਯਤੀਤਿ ਆਲੋਕਸਨ੍ਧੀਤਿ ਕਵਾਟਂ ਵੁਚ੍ਚਤਿ. ਦ੍ਵਾਰਵਾਤਪਾਨੂਪਚਾਰਤੋ ਅਞ੍ਞਤ੍ਥ ਪੁਨਪ੍ਪੁਨਂ ਲਿਮ੍ਪਨਾਦਿਂ ਕਰੋਨ੍ਤਸ੍ਸ ਪਿਣ੍ਡਗਣਨਾਯ ਪਾਚਿਤ੍ਤਿਯਂ.

ਕੇਚਿ ਪਨ ‘‘ਪਾਲ਼ਿਯਂ ਪਾਚਿਤ੍ਤਿਯਸ੍ਸ ਅਵੁਤ੍ਤਤ੍ਤਾ ਦੁਕ੍ਕਟ’’ਨ੍ਤਿ ਵਦਨ੍ਤਿ. ਅਧਿਟ੍ਠਾਤਬ੍ਬਨ੍ਤਿ ਸਂਵਿਧਾਤਬ੍ਬਂ. ਹਰਿਤੇ ਠਿਤੋ ਅਧਿਟ੍ਠਾਤਿ. ਆਪਤ੍ਤਿ ਦੁਕ੍ਕਟਸ੍ਸਾਤਿ ਹਰਿਤਯੁਤ੍ਤੇ ਖੇਤ੍ਤੇ ਠਤ੍ਵਾ ਛਾਦੇਨ੍ਤਸ੍ਸ ਦੁਕ੍ਕਟਨ੍ਤਿ ਅਤ੍ਥੋ. ਕੇਚਿ ਪਨ ‘‘ਤਾਦਿਸੇ ਖੇਤ੍ਤੇ ਵਿਹਾਰਂ ਕਰੋਨ੍ਤਸ੍ਸ ਦੁਕ੍ਕਟ’’ਨ੍ਤਿ ਵਦਨ੍ਤਿ, ਤਂ ਪਾਲ਼ਿਯਾ ਨ ਸਮੇਤਿ.

੧੩੬. ਉਜੁਕਮੇਵ ਛਾਦਨਨ੍ਤਿ ਛਾਦਨਮੁਖਵਟ੍ਟਿਤੋ ਪਟ੍ਠਾਯ ਯਾਵ ਪਿਟ੍ਠਿਵਂਸਕੂਟਾਗਾਰਕਣ੍ਣਿਕਾਦਿ, ਤਾਵ ਇਟ੍ਠਕਾਦੀਹਿ ਉਜੁਕਂ ਛਾਦਨਂ. ਇਮਿਨਾ ਪਨ ਯੇਨ ਸਬ੍ਬਸ੍ਮਿਂ ਵਿਹਾਰੇ ਏਕਵਾਰਂ ਛਾਦਿਤੇ ਤਂ ਛਾਦਨਂ ਏਕਮਗ੍ਗਨ੍ਤਿ ਗਹੇਤ੍ਵਾ ਪਾਲ਼ਿਯਂ ‘‘ਦ੍ਵੇ ਮਗ੍ਗੇ’’ਤਿਆਦਿ ਵੁਤ੍ਤਂ. ਪਰਿਯਾਯੇਨ ਛਾਦਨਮ੍ਪਿ ਇਮਿਨਾਵ ਨਯੇਨ ਯੋਜੇਤਬ੍ਬਨ੍ਤਿ ਵਦਨ੍ਤਿ, ਤਂ ‘‘ਪੁਨਪ੍ਪੁਨਂ ਛਾਦਾਪੇਸੀ’’ਤਿ ਇਮਾਯ ਪਾਲ਼ਿਯਾ ਚ ‘‘ਸਬ੍ਬਮ੍ਪਿ ਚੇਤਂ ਛਦਨਂ ਛਦਨੂਪਰਿ ਵੇਦਿਤਬ੍ਬ’’ਨ੍ਤਿ ਇਮਿਨਾ ਅਟ੍ਠਕਥਾਵਚਨੇਨ ਚ ਸਮੇਤਿ.

ਪਾਲ਼ਿਯਂ ‘‘ਮਗ੍ਗੇਨ ਛਾਦੇਨ੍ਤਸ੍ਸ ਪਰਿਯਾਯੇਨ ਛਾਦੇਨ੍ਤਸ੍ਸਾ’’ਤਿ ਇਦਞ੍ਚ ਇਟ੍ਠਕਾਦੀਹਿ, ਤਿਣਪਣ੍ਣੇਹਿ ਚ ਛਾਦਨਪ੍ਪਕਾਰਭੇਦਦਸ੍ਸਨਤ੍ਥਂ ਵੁਤ੍ਤਂ. ਕੇਚਿ ਪਨ ‘‘ਪਨ੍ਤਿਯਾ ਛਾਦਿਤਸ੍ਸ ਛਦਨਸ੍ਸ ਉਪਰਿ ਛਦਨਮੁਖਵਟ੍ਟਿਤੋ ਪਟ੍ਠਾਯ ਉਦ੍ਧਂ ਉਜੁਕਮੇਵ ਏਕਵਾਰਂ ਛਾਦਨਂ ਏਕਮਗ੍ਗਨ੍ਤਿ ਗਹੇਤ੍ਵਾ ‘ਦ੍ਵੇ ਮਗ੍ਗੇ’ਤਿਆਦਿ ਵੁਤ੍ਤਂ, ਨ ਪਨ ਸਕਲਵਿਹਾਰਛਾਦਨਂ. ਏਸ ਨਯੋ ਪਰਿਯਾਯੇਨ ਛਾਦਨੇਪੀ’’ਤਿ ਵਦਨ੍ਤਿ, ਤਂ ਪਾਲ਼ਿਅਟ੍ਠਕਥਾਹਿ ਨ ਸਮੇਤਿ.

ਤਤਿਯਾਯ ਮਗ੍ਗਨ੍ਤਿ ਏਤ੍ਥ ਤਤਿਯਾਯਾਤਿ ਉਪਯੋਗਤ੍ਥੇ ਸਮ੍ਪਦਾਨਵਚਨਂ, ਤਤਿਯਂ ਮਗ੍ਗਨ੍ਤਿ ਅਤ੍ਥੋ. ਅਯਮੇਵ ਵਾ ਪਾਠੋ. ਤਿਣਪਣ੍ਣੇਹਿ ਲਬ੍ਭਤੀਤਿ ਤਿਣਪਣ੍ਣੇਹਿ ਛਾਦੇਤ੍ਵਾ ਉਪਰਿ ਉਲ੍ਲਿਤ੍ਤਾਵਲਿਤ੍ਤਕਰਣਂ ਸਨ੍ਧਾਯ ਵੁਤ੍ਤਂ. ਕੇਵਲਂ ਤਿਣਕੁਟਿਯਾ ਹਿ ਅਨਾਪਤ੍ਤਿ ਵੁਤ੍ਤਾ. ਤਿਣ੍ਣਂ ਮਗ੍ਗਾਨਨ੍ਤਿ ਮਗ੍ਗਵਸੇਨ ਛਾਦਿਤਾਨਂ ਤਿਣ੍ਣਂ ਛਦਨਾਨਂ. ਤਿਣ੍ਣਂ ਪਰਿਯਾਯਾਨਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਮਹਲ੍ਲਕਵਿਹਾਰਤਾ, ਅਤ੍ਤਨੋ ਵਾਸਾਗਾਰਤਾ, ਉਤ੍ਤਰਿ ਅਧਿਟ੍ਠਾਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਮਹਲ੍ਲਕਵਿਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.