੧੦. ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ

੧੪੦. ਦਸਮੇ ਮਾਤਿਕਾਯਂ ਸਪ੍ਪਾਣਕਉਦਕਂ ਤਿਣੇਨ ਵਾ ਮਤ੍ਤਿਕਾਯ ਵਾ ਸਿਞ੍ਚੇਯ੍ਯ, ਛਡ੍ਡੇਯ੍ਯਾਤਿ ਅਤ੍ਥੋ. ਅਥ ਵਾ ਉਦਕਂ ਗਹੇਤ੍ਵਾ ਬਹਿ ਸਿਞ੍ਚੇਯ੍ਯ, ਤਸ੍ਮਿਞ੍ਚ ਉਦਕੇ ਤਿਣਂ ਵਾ ਮਤ੍ਤਿਕਂ ਵਾ ਆਹਰਿਤ੍ਵਾ ਪਕ੍ਖਿਪੇਯ੍ਯਾਤਿ ਅਜ੍ਝਾਹਰਿਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਤੇਨਾਹ ‘‘ਸਕਟਭਾਰਮਤ੍ਤਞ੍ਚੇਪੀ’’ਤਿਆਦਿ. ਇਦਨ੍ਤਿ ਤਿਣਮਤ੍ਤਿਕਪਕ੍ਖਿਪਨਵਿਧਾਨਂ. ਵੁਤ੍ਤਨ੍ਤਿ ਮਾਤਿਕਾਯਂ ‘‘ਤਿਣਂ ਵਾ ਮਤ੍ਤਿਕਂ ਵਾ’’ਤਿ ਏਵਂ ਵੁਤ੍ਤਂ, ਅਟ੍ਠਕਥਾਸੁ ਵਾ ਵੁਤ੍ਤਂ.

ਇਦਞ੍ਚ ਸਿਕ੍ਖਾਪਦਂ ਬਾਹਿਰਪਰਿਭੋਗਂ ਸਨ੍ਧਾਯ ਵਤ੍ਥੁਵਸੇਨ ਵੁਤ੍ਤਂ ਅਬ੍ਭਨ੍ਤਰਪਰਿਭੋਗਸ੍ਸ ਵਿਸੁਂ ਵਕ੍ਖਮਾਨਤ੍ਤਾ. ਤਦੁਭਯਮ੍ਪਿ ‘‘ਸਪ੍ਪਾਣਕ’’ਨ੍ਤਿ ਕਤ੍ਵਾ ਵਧਕਚਿਤ੍ਤਂ ਵਿਨਾਵ ਸਿਞ੍ਚਨੇ ਪਞ੍ਞਤ੍ਤਤ੍ਤਾ ‘‘ਪਣ੍ਣਤ੍ਤਿਵਜ੍ਜ’’ਨ੍ਤਿ ਵੁਤ੍ਤਂ. ਵਧਕਚਿਤ੍ਤੇ ਪਨ ਸਤਿ ਸਿਕ੍ਖਾਪਦਨ੍ਤਰੇਨੇਵ ਪਾਚਿਤ੍ਤਿਯਂ, ਨ ਇਮਿਨਾਤਿ ਦਟ੍ਠਬ੍ਬਂ. ਉਦਕਸ੍ਸ ਸਪ੍ਪਾਣਕਤਾ, ‘‘ਸਿਞ੍ਚਨੇਨ ਪਾਣਕਾ ਮਰਿਸ੍ਸਨ੍ਤੀ’’ਤਿ ਜਾਨਨਂ, ਤਾਦਿਸਮੇਵ ਚ ਉਦਕਂ ਵਿਨਾ ਵਧਕਚੇਤਨਾਯ ਕੇਨਚਿਦੇਵ ਕਰਣੀਯੇਨ ਤਿਣਾਦੀਨਂ ਸਿਞ੍ਚਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਸਪ੍ਪਾਣਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਸੇਨਾਸਨਵਗ੍ਗੋ ਦੁਤਿਯੋ.

‘‘ਭੂਤਗਾਮਵਗ੍ਗੋ’’ਤਿਪਿ ਏਤਸ੍ਸੇਵ ਨਾਮਂ.