੧. ਕੋਸਿਯਸਿਕ੍ਖਾਪਦਵਣ੍ਣਨਾ

੫੪੨. ਦੁਤਿਯਸ੍ਸ ਪਠਮੇ ਪਾਲ਼ਿਯਂ ਕੋਸਿਯਕਾਰਕੇਤਿ ਕੋਸਕਾਰਕਪਾਣਾਨਂ ਕੋਸਤੋ ਨਿਬ੍ਬਤ੍ਤਤ੍ਤਾ ਕੋਸਿਯੇਨ ਸੁਤ੍ਤੇਨ ਵਤ੍ਥਾਦਿਂ ਕਰੋਨ੍ਤੇ. ਸਙ੍ਘਾਤਨ੍ਤਿ ਵਿਨਾਸਂ.

੫੪੪. ‘‘ਅਵਾਯਿਮ’’ਨ੍ਤਿ ਵੁਤ੍ਤਤ੍ਤਾ ਵਾਯਿਤ੍ਵਾ ਕਰਣੇ ਅਨਾਪਤ੍ਤਿ. ਮਿਸ੍ਸੇਤ੍ਵਾਤਿ ਏਲ਼ਕਲੋਮੇਹਿ ਮਿਸ੍ਸੇਤ੍ਵਾ. ਪਟਿਲਾਭੇਨਾਤਿ ਪਰਿਨਿਟ੍ਠਾਨੇਨ ‘‘ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੪੫) ਵੁਤ੍ਤਤ੍ਤਾ, ਕੋਸਿਯਮਿਸ੍ਸਕਤਾ, ਅਤ੍ਤਨੋ ਅਤ੍ਥਾਯ ਸਨ੍ਥਤਸ੍ਸ ਕਰਣਕਾਰਾਪਨਂ, ਪਟਿਲਾਭੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਕੋਸਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੪੭-੫੫੨. ਦੁਤਿਯਞ੍ਚ ਤਤਿਯਞ੍ਚ ਉਤ੍ਤਾਨਮੇਵ. ਤਤ੍ਥ ਪਨ ਓਦਾਤਾਦਿਮਿਸ੍ਸਕਸਞ੍ਞਾਯ ਸੁਦ੍ਧਕਾਲ਼ਕਾਨਞ੍ਞੇਵ ਸਨ੍ਥਤਸ੍ਸ ਕਰਣਵਸੇਨ ਚੇਤ੍ਥ ਦ੍ਵੇਭਾਗਤੋ ਅਧਿਕੇਸੁ ਸੁਦ੍ਧਕਾਲ਼ਕੇਸੁ ਅਨਧਿਕਸਞ੍ਞਾਯ ਸਨ੍ਥਤਸ੍ਸ ਕਰਣਵਸੇਨ ਚ ਅਚਿਤ੍ਤਕਤਾ ਵੇਦਿਤਬ੍ਬਾ.