੨. ਕੋਸਿਯਵਗ੍ਗੋ

੧. ਕੋਸਿਯਸਿਕ੍ਖਾਪਦਵਣ੍ਣਨਾ

੫੪੨. ਦੁਤਿਯਸ੍ਸ ਪਠਮੇ ਪਾਲ਼ਿਯਂ ਕੋਸਿਯਕਾਰਕੇਤਿ ਕੋਸਕਾਰਕਪਾਣਾਨਂ ਕੋਸਤੋ ਨਿਬ੍ਬਤ੍ਤਤ੍ਤਾ ਕੋਸਿਯੇਨ ਸੁਤ੍ਤੇਨ ਵਤ੍ਥਾਦਿਂ ਕਰੋਨ੍ਤੇ. ਸਙ੍ਘਾਤਨ੍ਤਿ ਵਿਨਾਸਂ.

੫੪੪. ‘‘ਅਵਾਯਿਮ’’ਨ੍ਤਿ ਵੁਤ੍ਤਤ੍ਤਾ ਵਾਯਿਤ੍ਵਾ ਕਰਣੇ ਅਨਾਪਤ੍ਤਿ. ਮਿਸ੍ਸੇਤ੍ਵਾਤਿ ਏਲ਼ਕਲੋਮੇਹਿ ਮਿਸ੍ਸੇਤ੍ਵਾ. ਪਟਿਲਾਭੇਨਾਤਿ ਪਰਿਨਿਟ੍ਠਾਨੇਨ ‘‘ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯ’’ਨ੍ਤਿ (ਪਾਰਾ. ੫੪੫) ਵੁਤ੍ਤਤ੍ਤਾ, ਕੋਸਿਯਮਿਸ੍ਸਕਤਾ, ਅਤ੍ਤਨੋ ਅਤ੍ਥਾਯ ਸਨ੍ਥਤਸ੍ਸ ਕਰਣਕਾਰਾਪਨਂ, ਪਟਿਲਾਭੋ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਕੋਸਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫੪੭-੫੫੨. ਦੁਤਿਯਞ੍ਚ ਤਤਿਯਞ੍ਚ ਉਤ੍ਤਾਨਮੇਵ. ਤਤ੍ਥ ਪਨ ਓਦਾਤਾਦਿਮਿਸ੍ਸਕਸਞ੍ਞਾਯ ਸੁਦ੍ਧਕਾਲ਼ਕਾਨਞ੍ਞੇਵ ਸਨ੍ਥਤਸ੍ਸ ਕਰਣਵਸੇਨ ਚੇਤ੍ਥ ਦ੍ਵੇਭਾਗਤੋ ਅਧਿਕੇਸੁ ਸੁਦ੍ਧਕਾਲ਼ਕੇਸੁ ਅਨਧਿਕਸਞ੍ਞਾਯ ਸਨ੍ਥਤਸ੍ਸ ਕਰਣਵਸੇਨ ਚ ਅਚਿਤ੍ਤਕਤਾ ਵੇਦਿਤਬ੍ਬਾ.

੪. ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ

੫੫੭. ਚਤੁਤ੍ਥੇ ਹਦ ਕਰੀਸੁਸ੍ਸਗ੍ਗੇ, ਮਿਹ ਸੇਚਨੇਤਿ ਧਾਤੁਅਤ੍ਥਂ ਸਨ੍ਧਾਯਾਹ ‘‘ਵਚ੍ਚਮ੍ਪਿ ਪਸ੍ਸਾਵਮ੍ਪਿ ਕਰੋਨ੍ਤੀ’’ਤਿ. ਊਨਕਛਬ੍ਬਸ੍ਸੇਸੁ ਅਤਿਰੇਕਛਬ੍ਬਸ੍ਸਸਙ੍ਕਿਤਾਦਿਵਸੇਨੇਤ੍ਥ ਅਚਿਤ੍ਤਕਤਾ ਵੇਦਿਤਬ੍ਬਾ.

ਛਬ੍ਬਸ੍ਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ

੫੬੫. ਪਞ੍ਚਮੇ ਤਤ੍ਥ ਸਨ੍ਦਿਸ੍ਸਿਸ੍ਸਤੀਤਿ ਸਕਾਯ ਕਤਿਕਾਯ ਅਯੁਤ੍ਤਕਾਰਿਤਾਵਸੇਨ ਵਿਞ੍ਞੂਹਿ ਸਨ੍ਦਿਸ੍ਸਿਸ੍ਸਤੀਤਿ ਅਤ੍ਥੋ. ਅਰਞ੍ਞਕਙ੍ਗਾਦੀਨਿ ਤੀਣਿ ਪਾਲ਼ਿਯਂ ਸੇਨਾਸਨਾਦਿਪਚ੍ਚਯਤ੍ਤਯਸ੍ਸ ਆਦਿਅਙ੍ਗਵਸੇਨ ਵੁਤ੍ਤਾਨਿ, ਸੇਸਾਨਿਪਿ ਤੇ ਸਮਾਦਿਯਿਂਸੁ ਏਵਾਤਿ ਵੇਦਿਤਬ੍ਬਂ.

੫੬੬. ਪਿਹਯਨ੍ਤਾਤਿ ਪਤ੍ਥਯਨ੍ਤਾ. ਸਨ੍ਥਤਸ੍ਸ ਅਵਾਯਿਮਤ੍ਤਾ, ਸੇਨਾਸਨਪਰਿਕ੍ਖਾਰਤ੍ਤਾ ਚ ਚੀਵਰਤਾ, ਅਧਿਟ੍ਠਾਤਬ੍ਬਤਾ ਚ ਨਤ੍ਥੀਤਿ ਆਹ ‘‘ਚਤੁਤ੍ਥਚੀਵਰਸਞ੍ਞਿਤਾਯਾ’’ਤਿ, ਵਿਪਲ੍ਲਾਸਸਞ੍ਞਾਯਾਤਿ ਅਤ੍ਥੋ. ਕੇਚਿ ਪਨ ‘‘ਇਦਂ ਨਿਸੀਦਨਸਨ੍ਥਤਂ ਨਾਮ ਨਵਸੁ ਚੀਵਰੇਸੁ ਨਿਸੀਦਨਚੀਵਰਮੇਵ, ਨਾਞ੍ਞਂ. ਨਿਸੀਦਨਸਿਕ੍ਖਾਪਦੇਪਿ (ਪਾਚਿ. ੫੩੧ ਆਦਯੋ) ਇਮਸ੍ਮਿਂ ਸਿਕ੍ਖਾਪਦੇ ਵਿਯ ‘ਨਿਸੀਦਨਂ ਨਾਮ ਸਦਸਂ ਵੁਚ੍ਚਤੀ’ਤਿ ਚ ਅਟ੍ਠਕਥਾਯਞ੍ਚਸ੍ਸ ‘ਸਨ੍ਥਤਸਦਿਸਂ ਸਨ੍ਥਰਿਤ੍ਵਾ ਏਕਸ੍ਮਿਂ ਅਨ੍ਤੇ ਸੁਗਤਵਿਦਤ੍ਥਿਯਾ ਵਿਦਤ੍ਥਿਮਤ੍ਤੇ ਪਦੇਸੇ ਦ੍ਵੀਸੁ ਠਾਨੇਸੁ ਫਾਲੇਤ੍ਵਾ ਤਿਸ੍ਸੋ ਦਸਾ ਕਰੀਯਨ੍ਤਿ, ਤਾਹਿ ਦਸਾਹਿ ਸਦਸਂ ਨਾਮ ਵੁਚ੍ਚਤੀ’ਤਿ (ਪਾਚਿ. ਅਟ੍ਠ. ੫੩੧) ਚ ਵੁਤ੍ਤਤ੍ਤਾ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਇਧ ਪਮਾਣਨਿਯਮਸ੍ਸ ਅਵੁਤ੍ਤਤ੍ਤਾ, ਸਨ੍ਥਤਸ੍ਸ ਚ ਅਵਾਯਿਮਚੀਵਰਤ੍ਤਾ, ਅਧਿਟ੍ਠਾਨੁਪਗਤ੍ਤਾਭਾਵਾ ਅਟ੍ਠਕਥਾਯਂ ਅਵੁਤ੍ਤਤ੍ਤਾ ਚ. ਨਿਸੀਦਨਚੀਵਰਂ ਪਨ ਛਨ੍ਨਂ ਚੀਵਰਾਨਂ ਖਣ੍ਡਪਿਲੋਤਿਕਾਨਿ ਪਮਾਣਯੁਤ੍ਤਮੇਵ ਸਨ੍ਥਰਿਤ੍ਵਾ ਸਨ੍ਥਤਂ ਵਿਯ ਕਰੋਨ੍ਤਿ. ਤੇਨੇਵ ‘‘ਸਨ੍ਥਤਸਦਿਸ’’ਨ੍ਤਿ ਸਦਿਸਗ੍ਗਹਣਂ ਕਤਂ, ਤਸ੍ਮਾ ਤਦੇਵ ਚੀਵਰਂ ਅਧਿਟ੍ਠਾਨੁਪਗਞ੍ਚ, ਨ ਇਦਨ੍ਤਿ ਗਹੇਤਬ੍ਬਂ.

੫੬੭. ਸੁਗਤਵਿਦਤ੍ਥਿਕਂ ਅਨਾਦਾਯ ਆਦਿਯਨ੍ਤਿਸਞ੍ਞਾਯ, ਸੁਗਤਵਿਦਤ੍ਥਿਊਨੇ ਅਨੂਨਨ੍ਤਿਸਞ੍ਞਾਯ ਚ ਵਸੇਨੇਤ੍ਥ ਅਚਿਤ੍ਤਕਤਾ ਵੇਦਿਤਬ੍ਬਾ. ਵਿਤਾਨਾਦੀਨਞ੍ਞੇਵ ਅਤ੍ਥਾਯ ਕਰਣੇ ਅਨਾਪਤ੍ਤਿਵਚਨਤੋ ਨਿਪਜ੍ਜਨਤ੍ਥਾਯ ਕਰੋਤੋਪਿ ਆਪਤ੍ਤਿ ਏਵ. ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ ਕੋਸਿਯੇਸੁ ਸੁਦ੍ਧਕਾਲ਼ਕਾਨਞ੍ਚ ਵਤ੍ਥੂਨਂ ਅਕਪ੍ਪਿਯਤ੍ਤਾ ਵੁਤ੍ਤਂ. ਤੇਨੇਵ ਪਾਲ਼ਿਯਂ ‘‘ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੫੪੫, ੫੫੦) ਤਤ੍ਥ ਤਤ੍ਥ ਵੁਤ੍ਤਂ, ਇਤਰੇਸੁ ਪਨ ਦ੍ਵੀਸੁ ‘‘ਅਨਾਪਤ੍ਤੀ’’ਤਿ ਵੁਤ੍ਤਂ. ਤਤ੍ਥ ਚਤੁਤ੍ਥੇ ਅਞ੍ਞਸ੍ਸਤ੍ਥਾਯ ਕਰਣੇਪਿ ਅਨਾਪਤ੍ਤਿ, ਪਞ੍ਚਮੇ ਤਤ੍ਥ ਦੁਕ੍ਕਟਨ੍ਤਿ ਦਟ੍ਠਬ੍ਬਂ. ਨਿਸ੍ਸਟ੍ਠਦਾਨਵਚਨਤੋ ਪਨ ਗਹਣੇ ਦੋਸੋ ਨਤ੍ਥਿ, ਪਰਿਭੁਞ੍ਜਨੇ ਚ ਵਿਜਟੇਤ੍ਵਾ ਕਪ੍ਪਿਯਵਸੇਨ ਕਤੇ ਨ ਦੋਸੋ.

ਨਿਸੀਦਨਸਨ੍ਥਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ

੫੭੨. ਛਟ੍ਠੇ ਪਾਲ਼ਿਯਂ ‘‘ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾ’’ਤਿ ਇਦਂ ਵਤ੍ਥੁਵਸੇਨ ਵੁਤ੍ਤਂ. ਨਿਵਾਸਟ੍ਠਾਨੇ ਲਦ੍ਧਾਨਿਪਿ ਤਿਯੋਜਨਤੋ ਪਰਂ ਹਰਿਤੁਂ ਨ ਵਟ੍ਟਤਿ ਏਵ. ਅਸਨ੍ਤੇ ਹਾਰਕੇਤਿ ਅਨੁਰੂਪਤੋ ਵੁਤ੍ਤਂ. ਸਨ੍ਤੇਪਿ ਹਾਰਕੇ ਹਰਤੋ ਨਤ੍ਥਿ ਦੋਸੋ. ਆਪਤ੍ਤਿਯੇਵਾਤਿ ਅਨਾਣਤ੍ਤੇਨ ਹਟਤ੍ਤਾ. ਪਕ੍ਖਦ੍ਵਯਸ੍ਸਪਿ ਕਾਰਣਮਾਹ ‘‘ਸਉਸ੍ਸਾਹਤ੍ਤਾ’’ਤਿ, ਅਨੁਪਰਤਗਮਨਿਚ੍ਛਤ੍ਤਾਤਿ ਅਤ੍ਥੋ. ਸੁਦ੍ਧਚਿਤ੍ਤਪਕ੍ਖਸ੍ਸੇਵ ਕਾਰਣਮਾਹ ‘‘ਅਚਿਤ੍ਤਕਤ੍ਤਾ’’ਤਿ. ਨ ਸਮੇਤੀਤਿ ‘‘ਅਨਾਪਤ੍ਤਿ, ਅਞ੍ਞਂ ਹਰਾਪੇਤੀ’’ਤਿ ਏਤ੍ਤਕਸ੍ਸੇਵ ਪਰਿਹਰਣੇ ਵੁਤ੍ਤਤ੍ਤਾ. ਅਗਚ੍ਛਨ੍ਤੇਤਿ ਠਿਤੇ. ਹੇਟ੍ਠਾਤਿ ਭੂਮਿਯਾ.

੫੭੫. ਤਂ ਹਰਨ੍ਤਸ੍ਸਾਤਿ ਪਠਮਂ ਪਟਿਲਾਭਟ੍ਠਾਨਤੋ ਪਟ੍ਠਾਯ ਤਿਯੋਜਨਤੋ ਉਦ੍ਧਂ ਹਰਨ੍ਤਸ੍ਸਾਤਿ ਅਤ੍ਥੋ. ਤਥਾ ਹਰਨ੍ਤਸ੍ਸ ਹਿ ਚੋਰੇਹਿ ਅਚ੍ਛਿਨ੍ਦਿਤ੍ਵਾ ਪੁਨ ਦਿਨ੍ਨਟ੍ਠਾਨਤੋ ਤਿਯੋਜਨਂ ਹਰਿਤੁਂ ਵਟ੍ਟਤਿ. ਕੇਚਿ ਪਨ ‘‘ਮਾਤਿਕਾਟ੍ਠਕਥਾਯਂ ਅਙ੍ਗੇਸੁ ‘ਪਠਮਪ੍ਪਟਿਲਾਭੋ’ਤਿ ਵੁਤ੍ਤਤ੍ਤਾ ਦੁਤਿਯਪਟਿਲਾਭਟ੍ਠਾਨਤੋ ਤਿਯੋਜਨਾਤਿਕ੍ਕਮੇਪਿ ਅਨਾਪਤ੍ਤੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਦੁਤਿਯਪਟਿਲਾਭਸ੍ਸਾਪਿ ਪਟਿਲਾਭਟ੍ਠਾਨੇ ਪਵਿਸਨਤੋ ਵਾਸਤ੍ਥਾਯ ਗਮਨਟ੍ਠਾਨਤੋ ਪੁਨ ਗਮਨੇ ਵਿਯ. ਕਾਯਬਨ੍ਧਨਾਦੀਨਨ੍ਤਿ ਦ੍ਵਿਪਟਲਕਾਯਬਨ੍ਧਨਾਦੀਨਂ ਅਨ੍ਤਰੇ ਪਕ੍ਖਿਤ੍ਤਂ ਪਸਿਬ੍ਬਕੇ ਪਕ੍ਖਿਤ੍ਤਸਦਿਸਂ, ਨ ਕਤਭਣ੍ਡਨ੍ਤਿ ਵੁਤ੍ਤਂ, ਤਥਾ ਨਿਧਾਨਮੁਖਨ੍ਤਿ. ਅਕਤਭਣ੍ਡਤਾ, ਪਠਮਪ੍ਪਟਿਲਾਭੋ, ਤਿਯੋਜਨਾਤਿਕ੍ਕਮਨਂ, ਆਹਰਣਪਚ੍ਚਾਹਰਣਂ, ਅਵਾਸਾਧਿਪ੍ਪਾਯਤਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਏਲ਼ਕਲੋਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ

੫੮੧. ਸਤ੍ਤਮੇ ਪਾਲ਼ਿਯਂ ਅਨਾਪਤ੍ਤਿਵਾਰੇ ਅਪਰਿਭੁਤ੍ਤਂ ਕਤਭਣ੍ਡਂ ਧੋਵਾਪੇਤੀਤਿ ਏਤ੍ਥ ਪਰਿਭੁਤ੍ਤਸ੍ਸ ਕਮ੍ਬਲਾਦਿਕਤਭਣ੍ਡਸ੍ਸ ਧੋਵਾਪਨਂ ਪੁਰਾਣਚੀਵਰਧੋਵਾਪਨਸਿਕ੍ਖਾਪਦੇਨ ਆਪਤ੍ਤਿਕਰਨ੍ਤਿ ਤਨ੍ਨਿਵਤ੍ਤਨਤ੍ਥਂ ‘‘ਅਪਰਿਭੁਤ੍ਤਂ ਕਤਭਣ੍ਡ’’ਨ੍ਤਿ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ.

ਏਲ਼ਕਲੋਮਧੋਵਾਪਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੮. ਰੂਪਿਯਸਿਕ੍ਖਾਪਦਵਣ੍ਣਨਾ

੫੮੩-੪. ਅਟ੍ਠਮੇ ਸੁਵਣ੍ਣਮਯਕਹਾਪਣੇਨ ਕਹਾਪਣੋਪਿ ਰਜਤੇ ਏਵ ਸਙ੍ਗਯ੍ਹਤੀਤਿ ਆਹ ‘‘ਸੋਵਣ੍ਣਮਯੋ ਵਾ’’ਤਿ. ਰੂਪਿਯਮਯੋ ਵਾਤਿ ਰਜਤੇਨ ਰੂਪਂ ਸਮੁਟ੍ਠਪੇਤ੍ਵਾ ਕਤਕਹਾਪਣੋ. ਪਾਕਤਿਕੋ ਨਾਮ ਏਤਰਹਿ ਪਕਤਿਕਹਾਪਣੋ.

ਇਚ੍ਚੇਤਂ ਸਬ੍ਬਮ੍ਪੀਤਿ ਸਿਕ੍ਖਾਪਦੇਨ, ਵਿਭਙ੍ਗੇਨ ਚ ਵੁਤ੍ਤਂ ਸਬ੍ਬਮ੍ਪਿ ਨਿਦਸ੍ਸੇਤਿ. ਤਸ੍ਸ ਚਤੁਬ੍ਬਿਧਂ ਨਿਸ੍ਸਗ੍ਗਿਯਵਤ੍ਥੂਤਿ ਇਮਿਨਾਵ ਸਮ੍ਬਨ੍ਧੋ, ਨ ਪਨ ਅਨਨ੍ਤਰੇਨ ‘‘ਰਜਤ’’ਨ੍ਤਿ ਪਦੇਨ. ਇਦਾਨਿ ਤਂ ਚਤੁਬ੍ਬਿਧਂ ਨਿਸ੍ਸਗ੍ਗਿਯਵਤ੍ਥੁਂ ਸਰੂਪਤੋ ਦਸ੍ਸੇਨ੍ਤੋ ‘‘ਰਜਤ’’ਨ੍ਤਿਆਦਿਮਾਹ. ਤਤ੍ਥ ਕਿਞ੍ਚਾਪਿ ਹੇਟ੍ਠਾ ਰਜਤਮਾਸਕੋਵ ਵੁਤ੍ਤੋ, ਨ ਕੇਵਲਂ ਰਜਤਂ, ਤਥਾਪਿ ਸਿਕ੍ਖਾਪਦੇ ‘‘ਜਾਤਰੂਪਰਜਤ’’ਨ੍ਤਿ ਪਦੇਨੇਵ ਵੁਤ੍ਤਨ੍ਤਿ ਤਮ੍ਪਿ ਦਸ੍ਸੇਤੁਂ ‘‘ਰਜਤ’’ਨ੍ਤਿ ਇਦਂ ਵਿਸੁਂ ਵੁਤ੍ਤਂ. ਪਦਭਾਜਨੇ ਪਨ ਮਾਤਿਕਾਪਦੇਨੇਵ ਸਿਦ੍ਧਤ੍ਤਾ ਤਂ ਅਵਤ੍ਵਾ ਤੇਨ ਸਹ ਸਙ੍ਗਯ੍ਹਮਾਨਮੇਵ ਦਸ੍ਸੇਤੁਂ ‘‘ਰਜਤਂ ਨਾਮ ਕਹਾਪਣੋ’’ਤਿਆਦਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਜਾਤਰੂਪਮਾਸਕੋਤਿ ਸੁਵਣ੍ਣਮਯਕਹਾਪਣੋ. ਵੁਤ੍ਤਪ੍ਪਭੇਦੋਤਿ ‘‘ਰੂਪਿਯਮਯੋ ਵਾ ਪਾਕਤਿਕੋ ਵਾ’’ਤਿਆਦਿਨਾ ਵੁਤ੍ਤਪ੍ਪਭੇਦੋ. ਪਟੋਵ ਪਟਕੋ, ਵਤ੍ਥਂ. ਦੁਕ੍ਕਟਮੇਵਾਤਿ ਪਟਿਗ੍ਗਾਹਕਸ੍ਸੇਵ ਪਟਿਗ੍ਗਹਣਪਚ੍ਚਯਾ ਦੁਕ੍ਕਟਂ, ਪਰਿਭੋਗੇ ਪਨ ਪਞ੍ਚਸਹਧਮ੍ਮਿਕੇਹਿ ਪਟਿਗ੍ਗਹਿਤਾਨਂ ਧਞ੍ਞਵਿਰਹਿਤਮੁਤ੍ਤਾਦੀਨਂ ਕਾਰਣਾ ਉਪ੍ਪਨ੍ਨਪਚ੍ਚਯਂ ਪਰਿਭੁਞ੍ਜਨ੍ਤਾਨਂ ਸਬ੍ਬੇਸਮ੍ਪਿ ਦੁਕ੍ਕਟਮੇਵ. ਕੇਚਿ ਪਨ ‘‘ਧਞ੍ਞਮ੍ਪਿ ਪਞ੍ਚਸਹਧਮ੍ਮਿਕੇਹਿ ਪਟਿਗ੍ਗਹਿਤਂ ਮੁਤ੍ਤਾਦਿਖੇਤ੍ਤਾਦਿ ਵਿਯ ਸਬ੍ਬੇਸਮ੍ਪਿ ਪਰਿਭੁਞ੍ਜਿਤੁਂ ਨ ਵਟ੍ਟਤਿ, ਕੇਵਲਂ ਸਙ੍ਘਿਕਭੂਮਿਯਂ ਕਪ੍ਪਿਯਵੋਹਾਰੇਨ ਚ ਉਪ੍ਪਨ੍ਨਸ੍ਸ ਧਞ੍ਞਸ੍ਸ ਵਿਚਾਰਣਮੇਵ ਸਨ੍ਧਾਯ ‘ਤਸ੍ਸੇਵੇਤਂ ਅਕਪ੍ਪਿਯ’ਨ੍ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ.

ਏਕੋ ਸਤਂ ਵਾ ਸਹਸ੍ਸਂ ਵਾਤਿਆਦਿ ਰੂਪਿਯੇ ਹੇਟ੍ਠਿਮਕੋਟਿਯਾ ਪਵਤ੍ਤਨਾਕਾਰਂ ਦਸ੍ਸੇਤੁਂ ਵੁਤ੍ਤਂ, ਨ ਪਨ ‘‘ਏਵਂ ਪਟਿਪਜ੍ਜਿਤਬ੍ਬਮੇਵਾ’’ਤਿ ਦਸ੍ਸੇਤੁਂ. ‘‘ਇਧ ਨਿਕ੍ਖਿਪਾਹੀ’’ਤਿ ਵੁਤ੍ਤੇ ਉਗ੍ਗਣ੍ਹਾਪਨਂ ਹੋਤੀਤਿ ਆਹ ‘‘ਇਧ ਨਿਕ੍ਖਿਪਾਹੀਤਿ ਨ ਵਤ੍ਤਬ੍ਬ’’ਨ੍ਤਿ. ਕਪ੍ਪਿਯਞ੍ਚ…ਪੇ… ਹੋਤੀਤਿ ਯਸ੍ਮਾ ਅਸਾਦਿਤਤ੍ਤਾ ਤਤੋ ਉਪ੍ਪਨ੍ਨਪਚ੍ਚਯਾ ਵਟ੍ਟਨ੍ਤਿ, ਤਸ੍ਮਾ ਕਪ੍ਪਿਯਂ ਨਿਸ੍ਸਾਯ ਠਿਤਂ. ਯਸ੍ਮਾ ਪਨ ਦੁਬ੍ਬਿਚਾਰਣਾਯ ਸਤਿ ਤਤੋ ਉਪ੍ਪਨ੍ਨਮ੍ਪਿ ਨ ਕਪ੍ਪਤਿ, ਤਸ੍ਮਾ ਅਕਪ੍ਪਿਯਂ ਨਿਸ੍ਸਾਯ ਠਿਤਨ੍ਤਿ ਵੇਦਿਤਬ੍ਬਂ.

‘‘ਨ ਤੇਨ ਕਿਞ੍ਚਿ ਕਪ੍ਪਿਯਭਣ੍ਡਂ ਚੇਤਾਪਿਤ’’ਨ੍ਤਿ ਇਮਿਨਾ ਚੇਤਾਪਿਤਂ ਚੇ, ਨਤ੍ਥਿ ਪਰਿਭੋਗੂਪਾਯੋ ਉਗ੍ਗਹੇਤ੍ਵਾ ਅਨਿਸ੍ਸਟ੍ਠਰੂਪਿਯੇਨ ਚੇਤਾਪਿਤਤ੍ਤਾ. ਈਦਿਸਞ੍ਹਿ ਸਙ੍ਘਮਜ੍ਝੇ ਨਿਸ੍ਸਜ੍ਜਨਂ ਕਤ੍ਵਾਵ ਛਡ੍ਡੇਤ੍ਵਾ ਪਾਚਿਤ੍ਤਿਯਂ ਦੇਸੇਤਬ੍ਬਨ੍ਤਿ ਦਸ੍ਸੇਤਿ. ਕੇਚਿ ਪਨ ‘‘ਯਸ੍ਮਾ ਨਿਸ੍ਸਗ੍ਗਿਯਵਤ੍ਥੁਂ ਪਟਿਗ੍ਗਹੇਤ੍ਵਾਪਿ ਚੇਤਾਪਿਤਂ ਕਪ੍ਪਿਯਭਣ੍ਡਂ ਸਙ੍ਘੇ ਨਿਸ੍ਸਟ੍ਠਂ ਕਪ੍ਪਿਯਕਾਰਕੇਹਿ ਨਿਸ੍ਸਟ੍ਠਰੂਪਿਯਂ ਪਰਿਵਤ੍ਤੇਤ੍ਵਾ ਆਨੀਤਕਪ੍ਪਿਯਭਣ੍ਡਸਦਿਸਂ ਹੋਤਿ, ਤਸ੍ਮਾ ਵਿਨਾਵ ਉਪਾਯਂ ਭਾਜੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਪਤ੍ਤਚਤੁਕ੍ਕਾਦਿਕਥਾਯ (ਪਾਰਾ. ਅਟ੍ਠ. ੨.੫੮੯) ਨ ਸਮੇਤਿ. ਤਤ੍ਥ ਰੂਪਿਯੇਨ ਪਰਿਵਤ੍ਤਿਤਪਤ੍ਤਸ੍ਸ ਅਪਰਿਭੋਗੋਵ ਦਸ੍ਸਿਤੋ, ਨ ਨਿਸ੍ਸਜ੍ਜਨਵਿਧਾਨਨ੍ਤਿ. ਉਪਨਿਕ੍ਖੇਪਂ ਠਪੇਤ੍ਵਾਤਿ ਕਪ੍ਪਿਯਕਾਰਕੇਹਿ ਵਡ੍ਢਿਯਾ ਪਯੋਜਨਂ ਸਨ੍ਧਾਯ ਵੁਤ੍ਤਂ. ਅਕਪ੍ਪਿਯਨ੍ਤਿ ਤੇਨ ਵਤ੍ਥੁਨਾ ਗਹਿਤਤ੍ਤਾ ਵੁਤ੍ਤਂ.

੫੮੫. ‘‘ਪਤਿਤੋਕਾਸਂ ਅਸਮਨ੍ਨਾਹਰਨ੍ਤੇਨਾ’’ਤਿ ਇਦਂ ਨਿਰਪੇਕ੍ਖਭਾਵਦਸ੍ਸਨਪਰਨ੍ਤਿ ਵੇਦਿਤਬ੍ਬਂ. ਅਸਨ੍ਤਸਮ੍ਭਾਵਨਾਯਾਤਿ ਪਰਿਯਾਯਾਦਿਨਾ ਅਭੂਤਾਰੋਚਨਂ ਸਨ੍ਧਾਯ ਵੁਤ੍ਤਂ. ਥੇਯ੍ਯਪਰਿਭੋਗੋਤਿ ਪਚ੍ਚਯਸਾਮਿਨਾ ਭਗਵਤਾ ਅਨਨੁਞ੍ਞਾਤਤ੍ਤਾ ਵੁਤ੍ਤਂ. ਇਣਪਰਿਭੋਗੋਤਿ ਭਗਵਤਾ ਅਨੁਞ੍ਞਾਤਮ੍ਪਿ ਕਤ੍ਤਬ੍ਬਂ ਅਕਤ੍ਵਾ ਪਰਿਭੁਞ੍ਜਨਤੋ ਵੁਤ੍ਤਂ, ਤੇਨ ਚ ਪਚ੍ਚਯਸਨ੍ਨਿਸ੍ਸਿਤਸੀਲਂ ਵਿਪਜ੍ਜਤੀਤਿ ਦਸ੍ਸੇਤਿ. ਪਰਿਭੋਗੇ ਪਰਿਭੋਗੇਤਿ ਕਾਯਤੋ ਮੋਚੇਤ੍ਵਾ ਮੋਚੇਤ੍ਵਾ ਪਰਿਭੋਗੇ. ਪਚ੍ਛਿਮਯਾਮੇਸੁ ਪਚ੍ਚਵੇਕ੍ਖਿਤਬ੍ਬਨ੍ਤਿ ਯੋਜਨਾ. ਇਣਪਰਿਭੋਗਟ੍ਠਾਨੇ ਤਿਟ੍ਠਤੀਤਿ ਏਤ੍ਥ ‘‘ਹਿਯ੍ਯੋ ਯਂ ਮਯਾ ਚੀਵਰਂ ਪਰਿਭੁਤ੍ਤ’’ਨ੍ਤਿਆਦਿਨਾਪਿ ਅਤੀਤਪਚ੍ਚਵੇਕ੍ਖਣਾ ਵਟ੍ਟਤੀਤਿ ਵਦਨ੍ਤਿ. ਪਰਿਭੋਗੇ ਪਰਿਭੋਗੇਤਿ ਉਦਕਪਤਨਟ੍ਠਾਨਤੋ ਅਨ੍ਤੋਪਵੇਸਨੇਸੁ, ਨਿਸੀਦਨਸਯਨੇਸੁ ਚ. ਸਤਿਪਚ੍ਚਯਤਾ ਵਟ੍ਟਤੀਤਿ ਪਚ੍ਚਵੇਕ੍ਖਣਸਤਿਯਾ ਪਚ੍ਚਯਤ੍ਤਂ ਲਦ੍ਧੁਂ ਵਟ੍ਟਤਿ. ਪਟਿਗ੍ਗਹਣੇ ਚ ਪਰਿਭੋਗੇ ਚ ਪਚ੍ਚਵੇਕ੍ਖਣਾਸਤਿ ਅਵਸ੍ਸਂ ਲਦ੍ਧਬ੍ਬਾਤਿ ਦਸ੍ਸੇਤਿ. ਤੇਨਾਹ ‘‘ਸਤਿਂ ਕਤ੍ਵਾ’’ਤਿਆਦਿ. ਕੇਚਿ ਪਨ ‘‘ਸਤਿਪਚ੍ਚਯਤਾ ਪਚ੍ਚਯੇ ਸਤਿ ਭੇਸਜ੍ਜਪਰਿਭੋਗਸ੍ਸ ਕਾਰਣੇ ਸਤੀ’’ਤਿ ਏਵਮ੍ਪਿ ਅਤ੍ਥਂ ਵਦਨ੍ਤਿ, ਤੇਸਮ੍ਪਿ ਪਚ੍ਚਯੇ ਸਤੀਤਿ ਪਚ੍ਚਯਸਬ੍ਭਾਵਸਲ੍ਲਕ੍ਖਣੇ ਸਤੀਤਿ ਏਵਮਤ੍ਥੋ ਗਹੇਤਬ੍ਬੋ ਪਚ੍ਚਯਸਬ੍ਭਾਵਮਤ੍ਤੇਨ ਸੀਲਸ੍ਸ ਅਸੁਜ੍ਝਨਤੋ. ‘‘ਪਰਿਭੋਗੇ ਅਕਰੋਨ੍ਤਸ੍ਸੇਵ ਆਪਤ੍ਤੀ’’ਤਿ ਇਮਿਨਾ ਪਾਤਿਮੋਕ੍ਖਸਂਵਰਸੀਲਸ੍ਸ ਭੇਦੋ ਦਸ੍ਸਿਤੋ, ਨ ਪਚ੍ਚਯਸਨ੍ਨਿਸ੍ਸ੍ਸਿਸੀਲਸ੍ਸ, ਤਸ੍ਸ ਅਤੀਤਪਚ੍ਚਵੇਕ੍ਖਣਾਯ ਵਿਸੁਜ੍ਝਨਤੋ. ਏਤਸ੍ਮਿਂ, ਪਨ ਸੇਸਪਚ੍ਚਯੇਸੁ ਚ ਇਣਪਰਿਭੋਗਾਦਿਵਚਨੇਨ ਪਚ੍ਚਯਸਨ੍ਨਿਸ੍ਸਿਤਸੀਲਸ੍ਸੇਵ ਭੇਦੋਤਿ ਏਵਮਿਮੇਸਂ ਨਾਨਾਕਰਣਂ ਵੇਦਿਤਬ੍ਬਂ.

ਏਵਂ ਪਚ੍ਚਯਸਨ੍ਨਿਸ੍ਸਿਤਸੀਲਸ੍ਸ ਵਿਸੁਦ੍ਧਿਂ ਦਸ੍ਸੇਤ੍ਵਾ ਤੇਨੇਵ ਪਸਙ੍ਗੇਨ ਸਬ੍ਬਾਪਿ ਵਿਸੁਦ੍ਧਿਯੋ ਦਸ੍ਸੇਤੁਂ ‘‘ਚਤੁਬ੍ਬਿਧਾ ਹਿ ਸੁਦ੍ਧੀ’’ਤਿਆਦਿਮਾਹ. ਤਤ੍ਥ ਸੁਜ੍ਝਤਿ ਦੇਸਨਾਦੀਹਿ, ਸੋਧੀਯਤੀਤਿ ਵਾ ਸੁਦ੍ਧਿ, ਚਤੁਬ੍ਬਿਧਸੀਲਂ. ਤੇਨਾਹ ‘‘ਦੇਸਨਾਯ ਸੁਜ੍ਝਨਤੋ’’ਤਿਆਦਿ. ਏਤ੍ਥ ਦੇਸਨਾਗ੍ਗਹਣੇਨ ਵੁਟ੍ਠਾਨਮ੍ਪਿ ਛਿਨ੍ਨਮੂਲਾਨਂ ਅਭਿਕ੍ਖੁਤਾਪਟਿਞ੍ਞਾਪਿ ਸਙ੍ਗਹਿਤਾ. ਛਿਨ੍ਨਮੂਲਾਨਮ੍ਪਿ ਹਿ ਪਾਰਾਜਿਕਾਪਤ੍ਤਿਵੁਟ੍ਠਾਨੇਨ ਹੇਟ੍ਠਾ ਪਰਿਰਕ੍ਖਿਤਂ ਭਿਕ੍ਖੁਸੀਲਂ ਵਿਸੁਦ੍ਧਂ ਨਾਮ ਹੋਤਿ, ਤੇਨ ਤੇਸਂ ਮਗ੍ਗਪਟਿਲਾਭੋਪਿ ਸਮ੍ਪਜ੍ਜਤਿ.

ਦਾਤਬ੍ਬਟ੍ਠੇਨ ਦਾਯਂ, ਤਂ ਆਦਿਯਨ੍ਤੀਤਿ ਦਾਯਾਦਾ. ਸਤ੍ਤਨ੍ਨਂ ਸੇਕ੍ਖਾਨਨ੍ਤਿ ਏਤ੍ਥ ਕਲ੍ਯਾਣਪੁਥੁਜ੍ਜਨਾਪਿ ਸਙ੍ਗਹਿਤਾ ਤੇਸਂ ਆਣਣ੍ਯਪਰਿਭੋਗਸ੍ਸ ਦਾਯਜ੍ਜਪਰਿਭੋਗੇ ਸਙ੍ਗਹਿਤਤ੍ਤਾਤਿ ਵੇਦਿਤਬ੍ਬਂ. ਧਮ੍ਮਦਾਯਾਦਸੁਤ੍ਤਨ੍ਤਿ ‘‘ਧਮ੍ਮਦਾਯਾਦਾ ਮੇ, ਭਿਕ੍ਖਵੇ, ਭਵਥ, ਮਾ ਆਮਿਸਦਾਯਾਦਾ’’ਤਿਆਦਿਨਾ (ਮ. ਨਿ. ੧.੨੯) ਪਵਤ੍ਤਂ ਸੁਤ੍ਤਂ. ਤਤ੍ਥ ਮਾ ਮੇ ਆਮਿਸਦਾਯਾਦਾਤਿ ਏਵਂ ਮੇ-ਸਦ੍ਦਂ ਆਨੇਤ੍ਵਾ ਅਤ੍ਥੋ ਗਹੇਤਬ੍ਬੋ. ਏਵਞ੍ਹਿ ਤਥਾ ਵੁਤ੍ਤਤ੍ਥਸਾਧਕਂ ਹੋਤਿ.

ਲਜ੍ਜਿਨਾ ਸਦ੍ਧਿਂ ਪਰਿਭੋਗੋਤਿ ਧਮ੍ਮਾਮਿਸਵਸੇਨ ਮਿਸ੍ਸਭਾਵੋ. ਅਲਜ੍ਜਿਨਾ ਸਦ੍ਧਿਨ੍ਤਿ ਏਤ੍ਥਾਪਿ ਏਸੇਵ ਨਯੋ. ‘‘ਆਦਿਤੋ ਪਟ੍ਠਾਯ ਹਿ ਅਲਜ੍ਜੀ ਨਾਮ ਨਤ੍ਥੀ’’ਤਿ ਇਮਿਨਾ ਦਿਟ੍ਠਦਿਟ੍ਠੇਸੁ ਆਸਙ੍ਕਾ ਨਾਮ ਨ ਕਾਤਬ੍ਬਾ, ਦਿਟ੍ਠਸੁਤਾਦਿਕਾਰਣੇ ਸਤਿ ਏਵ ਕਾਤਬ੍ਬਾਤਿ ਦਸ੍ਸੇਤਿ. ਅਤ੍ਤਨੋ ਭਾਰਭੂਤਾ ਸਦ੍ਧਿਵਿਹਾਰਿਕਾਦਯੋ. ਸਚੇ ਨ ਓਰਮਤੀਤਿ ਅਗਤਿਗਮਨੇਨ ਧਮ੍ਮਾਮਿਸਪਰਿਭੋਗਤੋ ਨ ਓਰਮਤਿ. ‘‘ਆਪਤ੍ਤਿ ਨਾਮ ਨਤ੍ਥੀ’’ਤਿ ਇਦਂ ਅਲਜ੍ਜੀਨਂ ਧਮ੍ਮੇਨ ਉਪ੍ਪਨ੍ਨਪਚ੍ਚਯਂ, ਧਮ੍ਮਕਮ੍ਮਞ੍ਚ ਸਨ੍ਧਾਯ ਵੁਤ੍ਤਂ. ਤੇਸਮ੍ਪਿ ਹਿ ਕੁਲਦੂਸਨਾਦਿਸਮੁਪ੍ਪਨ੍ਨਪਚ੍ਚਯਂ ਪਰਿਭੁਞ੍ਜਨ੍ਤਾਨਂ, ਵਗ੍ਗਕਮ੍ਮਾਦਿਂ ਕਰੋਨ੍ਤਾਨਞ੍ਚ ਆਪਤ੍ਤਿ ਏਵ.

‘‘ਧਮ੍ਮਿਯਾਧਮ੍ਮਿਯਪਰਿਭੋਗੋ ਪਚ੍ਚਯਵਸੇਨ ਵੇਦਿਤਬ੍ਬੋ’’ਤਿ ਵੁਤ੍ਤਤ੍ਤਾ ਹੇਟ੍ਠਾ ਲਜ੍ਜਿਪਰਿਭੋਗੋ ਪਚ੍ਚਯਵਸੇਨ ਚ ਏਕਕਮ੍ਮਾਦਿਵਸੇਨ ਚ ਵੁਤ੍ਤੋ ਏਵਾਤਿ ਵੇਦਿਤਬ੍ਬਂ. ਤੇਨੇਵ ਦੁਟ੍ਠਦੋਸਸਿਕ੍ਖਾਪਦਟ੍ਠਕਥਾਯਂ ਚੋਦਕਚੁਦਿਤਕਭਾਵੇ ਠਿਤਾ ਦ੍ਵੇ ਅਲਜ੍ਜਿਨੋ ਧਮ੍ਮਪਰਿਭੋਗਮ੍ਪਿ ਸਨ੍ਧਾਯ ‘‘ਏਕਸਮ੍ਭੋਗਪਰਿਭੋਗਾ ਹੁਤ੍ਵਾ ਜੀਵਥਾ’’ਤਿ (ਪਾਰਾ. ਅਟ੍ਠ. ੨.੩੮੫-੩੮੬) ਵੁਤ੍ਤਾ ਤੇਸਂ ਅਞ੍ਞਮਞ੍ਞਂ ਧਮ੍ਮਾਮਿਸਪਰਿਭੋਗੇ ਵਿਰੋਧਾਭਾਵਾ. ਲਜ੍ਜੀਨਮੇਵ ਹਿ ਅਲਜ੍ਜਿਨਾ ਸਹ ਤਦੁਭਯਪਰਿਭੋਗਾ ਨ ਵਟ੍ਟਨ੍ਤੀਤਿ.

ਧਮ੍ਮਪਰਿਭੋਗੋਤਿ ‘‘ਏਕਕਮ੍ਮਂ ਏਕੁਦ੍ਦੇਸੋ’’ਤਿਆਦਿਨਾ (ਪਾਰਾ. ੫੫, ੯੨, ੧੭੨) ਵੁਤ੍ਤਸਂਵਾਸੋ ਚੇਵ ਨਿਸ੍ਸਯਗ੍ਗਹਣਦਾਨਾਦਿਕੋ ਸਬ੍ਬੋ ਨਿਰਾਮਿਸਪਰਿਭੋਗੋ ਚ ਵੇਦਿਤਬ੍ਬੋ. ‘‘ਨ ਸੋ ਆਪਤ੍ਤਿਯਾ ਕਾਰੇਤਬ੍ਬੋ’’ਤਿ ਵੁਤ੍ਤਤ੍ਤਾ ਲਜ੍ਜਿਨੋ ਅਲਜ੍ਜਿਪਗ੍ਗਹੇ ਆਪਤ੍ਤੀਤਿ ਵੇਦਿਤਬ੍ਬਂ. ਇਤਰੋਪੀਤਿ ਲਜ੍ਜੀਪਿ. ਤਸ੍ਸਾਪਿ ਅਤ੍ਤਾਨਂ ਪਗ੍ਗਣ੍ਹਨ੍ਤਸ੍ਸ ਅਲਜ੍ਜਿਨੋ, ਇਮਿਨਾ ਚ ਲਜ੍ਜਿਨੋ ਵਣ੍ਣਭਣਨਾਦਿਲਾਭਂ ਪਟਿਚ੍ਚ ਆਮਿਸਗਰੁਕਤਾਯ ਵਾ ਗੇਹਸਿਤਪੇਮੇਨ ਵਾ ਤਂ ਅਲਜ੍ਜਿਂ ਪਗ੍ਗਣ੍ਹਨ੍ਤੋ ਲਜ੍ਜੀ ਸਾਸਨਂ ਅਨ੍ਤਰਧਾਪੇਤਿ ਨਾਮਾਤਿ ਦਸ੍ਸੇਤਿ. ਏਵਂ ਗਹਟ੍ਠਾਦੀਸੁ ਉਪਤ੍ਥਮ੍ਭਿਤੋ ਅਲਜ੍ਜੀ ਬਲਂ ਲਭਿਤ੍ਵਾ ਪੇਸਲੇ ਅਭਿਭਵਿਤ੍ਵਾ ਨਚਿਰਸ੍ਸੇਵ ਸਾਸਨਂ ਉਦ੍ਧਮ੍ਮਂ ਉਬ੍ਬਿਨਯਂ ਕਰੋਤੀਤਿ.

‘‘ਧਮ੍ਮਪਰਿਭੋਗੋਪਿ ਤਤ੍ਥ ਵਟ੍ਟਤੀ’’ਤਿ ਇਮਿਨਾ ਆਮਿਸਪਰਿਭੋਗਤੋ ਧਮ੍ਮਪਰਿਭੋਗੋਵ ਗਰੁਕੋ, ਤਸ੍ਮਾ ਅਤਿਵਿਯ ਅਲਜ੍ਜਿਵਿਵੇਕੇਨ ਕਾਤਬ੍ਬੋਤਿ ਦਸ੍ਸੇਤਿ. ‘‘ਧਮ੍ਮਾਨੁਗ੍ਗਹੇਨ ਉਗ੍ਗਣ੍ਹਿਤੁਂ ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਅਲਜ੍ਜੁਸ੍ਸਨ੍ਨਤਾਯ ਸਾਸਨੇ ਓਸਕ੍ਕਨ੍ਤੇ, ਲਜ੍ਜੀਸੁ ਚ ਅਪ੍ਪਹੋਨ੍ਤੇਸੁ ਅਲਜ੍ਜਿਮ੍ਪਿ ਪਕਤਤ੍ਤਂ ਗਣਪੂਰਕਂ ਗਹੇਤ੍ਵਾ ਉਪਸਮ੍ਪਦਾਦਿਕਰਣੇਨ ਚੇਵ ਕੇਚਿ ਅਲਜ੍ਜਿਨੋ ਧਮ੍ਮਾਮਿਸਪਰਿਭੋਗੇਨ ਸਙ੍ਗਹੇਤ੍ਵਾ ਸੇਸਾਲਜ੍ਜਿਗਣਸ੍ਸ ਨਿਗ੍ਗਹੇਨ ਚ ਸਾਸਨਂ ਪਗ੍ਗਣ੍ਹਿਤੁਂ ਵਟ੍ਟਤਿ ਏਵ.

ਕੇਚਿ ਪਨ ‘‘ਕੋਟਿਯਂ ਠਿਤੋ ਗਨ੍ਥੋਤਿ ਵੁਤ੍ਤਤ੍ਤਾ ਗਨ੍ਥਪਰਿਯਾਪੁਣਨਮੇਵ ਧਮ੍ਮਪਰਿਭੋਗੋ, ਨ ਏਕਕਮ੍ਮਾਦਿ. ਤਸ੍ਮਾ ਅਲਜ੍ਜੀਹਿਪਿ ਸਦ੍ਧਿਂ ਉਪੋਸਥਾਦਿਕਂ ਕਮ੍ਮਂ ਕਾਤੁਂ ਵਟ੍ਟਤਿ, ਆਪਤ੍ਤਿ ਨਤ੍ਥੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਏਕਕਮ੍ਮਾਦੀਸੁ ਬਹੂਸੁ ਧਮ੍ਮਪਰਿਭੋਗੇਸੁ ਅਲਜ੍ਜਿਨਾਪਿ ਸਦ੍ਧਿਂ ਕਤ੍ਤਬ੍ਬਾਵਤ੍ਥਾਯੁਤ੍ਤਂ ਧਮ੍ਮਪਰਿਭੋਗਂ ਦਸ੍ਸੇਤੁਂ ਇਧ ਨਿਦਸ੍ਸਨਵਸੇਨ ਗਨ੍ਥਸ੍ਸੇਵ ਸਮੁਦ੍ਧਟਤ੍ਤਾ. ਨ ਹਿ ਏਕਕਮ੍ਮਾਦਿਕੋ ਵਿਧਿ ਧਮ੍ਮਪਰਿਭੋਗੋ ਨ ਹੋਤੀਤਿ ਸਕ੍ਕਾ ਵਤ੍ਤੁਂ ਅਨਾਮਿਸਤ੍ਤਾ ਧਮ੍ਮਾਮਿਸੇਸੁ ਅਪਰਿਯਾਪਨ੍ਨਸ੍ਸ ਕਸ੍ਸਚਿ ਅਭਾਵਾ. ਤੇਨੇਵ ਅਟ੍ਠਸਾਲਿਨਿਯਂ ਧਮ੍ਮਪਟਿਸਨ੍ਧਾਰਕਥਾਯਂ (ਧ. ਸ. ਅਟ੍ਠ. ੧੩੫੧)‘‘ਕਮ੍ਮਟ੍ਠਾਨਂ ਕਥੇਤਬ੍ਬਂ, ਧਮ੍ਮੋ ਵਾਚੇਤਬ੍ਬੋ…ਪੇ… ਅਬ੍ਭਾਨਵੁਟ੍ਠਾਨਮਾਨਤ੍ਤਪਰਿਵਾਸਾ ਦਾਤਬ੍ਬਾ, ਪਬ੍ਬਜ੍ਜਾਰਹੋ ਪਬ੍ਬਾਜੇਤਬ੍ਬੋ, ਉਪਸਮ੍ਪਦਾਰਹੋ ਉਪਸਮ੍ਪਾਦੇਤਬ੍ਬੋ…ਪੇ… ਅਯਂ ਧਮ੍ਮਪਟਿਸਨ੍ਧਾਰੋ ਨਾਮਾ’’ਤਿ ਏਵਂ ਸਙ੍ਘਕਮ੍ਮਾਦਿਪਿ ਧਮ੍ਮਕੋਟ੍ਠਾਸੇ ਦਸ੍ਸਿਤਂ. ਤੇਸੁ ਪਨ ਧਮ੍ਮਕੋਟ੍ਠਾਸੇਸੁ ਯਂ ਗਣਪੂਰਣਾਦਿਵਸੇਨ ਅਲਜ੍ਜਿਨੋ ਅਪੇਕ੍ਖਿਤ੍ਵਾ ਉਪੋਸਥਾਦਿ ਵਾ ਤੇਸਂ ਸਨ੍ਤਿਕਾ ਧਮ੍ਮੁਗ੍ਗਹਣਨਿਸ੍ਸਯਗ੍ਗਹਣਾਦਿ ਵਾ ਕਰੀਯਤਿ, ਤਂ ਧਮ੍ਮੋ ਚੇਵ ਪਰਿਭੋਗੋ ਚਾਤਿ ਧਮ੍ਮਪਰਿਭੋਗੋਤਿ ਵੁਚ੍ਚਤਿ, ਏਤਂ ਤਥਾਰੂਪਪਚ੍ਚਯਂ ਵਿਨਾ ਕਾਤੁਂ ਨ ਵਟ੍ਟਤਿ, ਕਰੋਨ੍ਤਸ੍ਸ ਅਲਜ੍ਜਿਪਰਿਭੋਗੋ ਚ ਹੋਤਿ ਦੁਕ੍ਕਟਞ੍ਚ. ਯਂ ਪਨ ਅਲਜ੍ਜਿਸਤਂ ਅਨਪੇਕ੍ਖਿਤ੍ਵਾ ਤਜ੍ਜਨੀਯਾਦਿਨਿਗ੍ਗਹਕਮ੍ਮਂ ਵਾ ਪਰਿਵਾਸਾਦਿਉਪਕਾਰਕਮ੍ਮਂ ਵਾ ਉਗ੍ਗਹਪਰਿਪੁਚ੍ਛਾਦਾਨਾਦਿ ਵਾ ਕਰੀਯਤਿ, ਤਂ ਧਮ੍ਮੋ ਏਵ, ਨੋ ਪਰਿਭੋਗੋ. ਏਤਂ ਅਨੁਰੂਪਾਨਂ ਕਾਤੁਂ ਵਟ੍ਟਤਿ, ਆਮਿਸਦਾਨਂ ਵਿਯ ਆਪਤ੍ਤਿ ਨਤ੍ਥਿ. ਨਿਸ੍ਸਯਦਾਨਮ੍ਪਿ ਤੇਰਸਸਮ੍ਮੁਤਿਦਾਨਾਦਿ ਚ ਵਤ੍ਤਪਟਿਵਤ੍ਤਸਾਦਿਯਨਾਦਿਪਰਿਭੋਗਸ੍ਸਾਪਿ ਹੇਤੁਤ੍ਤਾ ਨ ਵਟ੍ਟਤਿ.

ਯੋ ਪਨ ਮਹਾਅਲਜ੍ਜੀ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁ ਸਾਸਨਂ ਕਰੋਤਿ, ਤਸ੍ਸ ਸਦ੍ਧਿਵਿਹਾਰਿਕਾਦੀਨਂ ਉਪਸਮ੍ਪਦਾਦਿਉਪਕਾਰਕਮ੍ਮਮ੍ਪਿ ਉਗ੍ਗਹਪਰਿਪੁਚ੍ਛਾਦਾਨਾਦਿ ਚ ਕਾਤੁਂ ਨ ਵਟ੍ਟਤਿ, ਆਪਤ੍ਤਿ ਏਵ ਹੋਤਿ, ਨਿਗ੍ਗਹਕਮ੍ਮਮੇਵ ਕਾਤਬ੍ਬਂ. ਤੇਨੇਵ ਅਲਜ੍ਜਿਪਗ੍ਗਹੋਪਿ ਪਟਿਕ੍ਖਿਤ੍ਤੋ. ਧਮ੍ਮਾਮਿਸਪਰਿਭੋਗਵਿਵਜ੍ਜਨੇਨਾਪਿ ਹਿ ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹੋ ਅਧਿਪ੍ਪੇਤੋ, ਸੋ ਚ ਪੇਸਲਾਨਂ ਫਾਸੁਵਿਹਾਰਸਦ੍ਧਮ੍ਮਟ੍ਠਿਤਿਵਿਨਯਾਨੁਗ੍ਗਹਾਦਿਅਤ੍ਥਾਯ ਏਤਦਤ੍ਥਤ੍ਤਾ ਸਿਕ੍ਖਾਪਦਪਞ੍ਞਤ੍ਤਿਯਾ. ਤਸ੍ਮਾ ਯਂ ਯਂ ਦੁਮ੍ਮਙ੍ਕੂਨਂ ਉਪਤ੍ਥਮ੍ਭਾਯ ਪੇਸਲਾਨਂ ਅਫਾਸੁਵਿਹਾਰਾਯ ਸਦ੍ਧਮ੍ਮਪਰਿਹਾਨਾਦਿਅਤ੍ਥਾਯ ਹੋਤਿ, ਤਂ ਸਬ੍ਬਮ੍ਪਿ ਪਰਿਭੋਗੋ ਵਾ ਹੋਤੁ ਅਪਰਿਭੋਗੋ ਵਾ ਕਾਤੁਂ ਨ ਵਟ੍ਟਤਿ, ਏਵਂ ਕਰੋਨ੍ਤਾ ਸਾਸਨਂ ਅਨ੍ਤਰਧਾਪੇਨ੍ਤਿ, ਆਪਤ੍ਤਿਞ੍ਚ ਆਪਜ੍ਜਨ੍ਤਿ. ਧਮ੍ਮਾਮਿਸਪਰਿਭੋਗੇਸੁ ਚੇਤ੍ਥ ਅਲਜ੍ਜੀਹਿ ਏਕਕਮ੍ਮਾਦਿਧਮ੍ਮਪਰਿਭੋਗੋ ਏਵ ਪੇਸਲਾਨਂ ਅਫਾਸੁਵਿਹਾਰਸਦ੍ਧਮ੍ਮਪਰਿਹਾਨਾਦਿਅਤ੍ਥਾਯ ਹੋਤਿ, ਨ ਤਥਾ ਆਮਿਸਪਰਿਭੋਗੋ. ਨ ਹਿ ਅਲਜ੍ਜੀਨਂ ਪਚ੍ਚਯਪਰਿਭੋਗਮਤ੍ਤੇਨ ਪੇਸਲਾਨਂ ਅਫਾਸੁਵਿਹਾਰਾਦਿ ਹੋਤਿ, ਯਥਾਵੁਤ੍ਤਧਮ੍ਮਪਰਿਭੋਗੇਨ ਪਨ ਹੋਤਿ, ਤਪ੍ਪਰਿਵਜ੍ਜਨੇਨ ਚ ਫਾਸੁਵਿਹਾਰਾਦਯੋ. ਤਥਾ ਹਿ ਕਤਸਿਕ੍ਖਾਪਦਵੀਤਿਕ੍ਕਮਾ ਅਲਜ੍ਜਿਪੁਗ੍ਗਲਾ ਉਪੋਸਥਾਦੀਸੁ ਪਵਿਟ੍ਠਾ ‘‘ਤੁਮ੍ਹੇ ਕਾਯਦ੍ਵਾਰੇ, ਵਚੀਦ੍ਵਾਰੇ ਚ ਵੀਤਿਕ੍ਕਮਂ ਕਰੋਥਾ’’ਤਿਆਦਿਨਾ ਭਿਕ੍ਖੂਹਿ ਵਤ੍ਤਬ੍ਬਾ ਹੋਨ੍ਤਿ, ਯਥਾ ਵਿਨਯਞ੍ਚ ਅਤਿਟ੍ਠਨ੍ਤਾ ਸਙ੍ਘਤੋ ਬਹਿਕਰਣਾਦਿਵਸੇਨ ਸੁਟ੍ਠੁ ਨਿਗ੍ਗਹੇਤਬ੍ਬਾ, ਤਥਾ ਅਕਤ੍ਵਾ ਤੇਹਿ ਸਹ ਸਂਵਸਨ੍ਤਾਪਿ ਅਲਜ੍ਜਿਨੋਵ ਹੋਨ੍ਤਿ ‘‘ਏਕੋਪਿ ਅਲਜ੍ਜੀ ਅਲਜ੍ਜਿਸਤਮ੍ਪਿ ਕਰੋਤੀ’’ਤਿਆਦਿਵਚਨਤੋ (ਪਾਰਾ. ਅਟ੍ਠ. ੨.੫੮੫). ਯਦਿ ਹਿ ਤੇ ਏਵਂ ਨ ਨਿਗ੍ਗਹਿਤਾ ਸਿਯੁਂ, ਸਙ੍ਘੇ ਕਲਹਾਦਿਂ ਵਡ੍ਢੇਤ੍ਵਾ ਉਪੋਸਥਾਦਿਸਾਮਗ੍ਗੀਕਮ੍ਮਪਟਿਬਾਹਨਾਦਿਨਾ ਪੇਸਲਾਨਂ ਅਫਾਸੁਂ ਕਤ੍ਵਾ ਕਮੇਨ ਤੇ ਦੇਵਦਤ੍ਤਵਜ੍ਜਿਪੁਤ੍ਤਕਾਦਯੋ ਵਿਯ ਪਰਿਸਂ ਵਡ੍ਢੇਤ੍ਵਾ ਅਤ੍ਤਨੋ ਵਿਪ੍ਪਟਿਪਤ੍ਤਿਂ ਧਮ੍ਮਤੋ ਵਿਨਯਤੋ ਦੀਪੇਨ੍ਤਾ ਸਙ੍ਘਭੇਦਾਦਿਮ੍ਪਿ ਕਤ੍ਵਾ ਨਚਿਰਸ੍ਸੇਵ ਸਾਸਨਂ ਅਨ੍ਤਰਧਾਪੇਯ੍ਯੁਂ, ਤੇਸੁ ਪਨ ਸਙ੍ਘਤੋ ਬਹਿਕਰਣਾਦਿਵਸੇਨ ਨਿਗ੍ਗਹਿਤੇਸੁ ਸਬ੍ਬੋਪਾਯਂ ਉਪਦ੍ਦਵੋ ਨ ਹੋਤਿ. ਵੁਤ੍ਤਞ੍ਹਿ –

‘‘ਦੁਸ੍ਸੀਲਪੁਗ੍ਗਲੇ ਨਿਸ੍ਸਾਯ ਉਪੋਸਥੋ ਨ ਤਿਟ੍ਠਤਿ, ਪਵਾਰਣਾ ਨ ਤਿਟ੍ਠਤਿ, ਸਙ੍ਘਕਮ੍ਮਾਨਿ ਨਪ੍ਪਵਤ੍ਤਨ੍ਤਿ, ਸਾਮਗ੍ਗੀ ਨ ਹੋਤਿ…ਪੇ… ਦੁਸ੍ਸੀਲੇਸੁ ਪਨ ਨਿਗ੍ਗਹਿਤੇਸੁ ਸਬ੍ਬੋਪਿ ਅਯਂ ਉਪਦ੍ਦਵੋ ਨ ਹੋਤਿ, ਤਤੋ ਪੇਸਲਾ ਭਿਕ੍ਖੂ ਫਾਸੁ ਵਿਹਰਨ੍ਤੀ’’ਤਿ (ਪਾਰਾ. ਅਟ੍ਠ. ੧.੩੯).

ਤਸ੍ਮਾ ਏਕਕਮ੍ਮਾਦਿਧਮ੍ਮਪਰਿਭੋਗੋਵ ਆਮਿਸਪਰਿਭੋਗਤੋਪਿ ਅਤਿਵਿਯ ਅਲਜ੍ਜਿਵਿਵੇਕੇਨ ਕਾਤਬ੍ਬੋ, ਆਪਤ੍ਤਿਕਰੋ ਚ ਸਦ੍ਧਮ੍ਮਪਰਿਹਾਨਿਹੇਤੁਤ੍ਤਾਤਿ ਵੇਦਿਤਬ੍ਬਂ.

ਅਪਿਚ ਉਪੋਸਥੋ ਨ ਤਿਟ੍ਠਤਿ, ਪਵਾਰਣਾ ਨ ਤਿਟ੍ਠਤਿ, ਸਙ੍ਘਕਮ੍ਮਾਨਿ ਨਪ੍ਪਵਤ੍ਤਨ੍ਤੀਤਿ ਏਵਂ ਅਲਜ੍ਜੀਹਿ ਸਦ੍ਧਿਂ ਸਙ੍ਘਕਮ੍ਮਾਕਰਣਸ੍ਸ ਅਟ੍ਠਕਥਾਯਂ ਪਕਾਸਿਤਤ੍ਤਾਪਿ ਚੇਤਂ ਸਿਜ੍ਝਤਿ, ਤਥਾ ਪਰਿਵਤ੍ਤਲਿਙ੍ਗਸ੍ਸ ਭਿਕ੍ਖੁਨੋ ਭਿਕ੍ਖੁਨੁਪਸ੍ਸਯਂ ਗਚ੍ਛਨ੍ਤਸ੍ਸ ਪਟਿਪਤ੍ਤਿਕਥਾਯਂ ‘‘ਆਰਾਧਿਕਾ ਚ ਹੋਨ੍ਤਿ ਸਙ੍ਗਾਹਿਕਾ ਲਜ੍ਜਿਨਿਯੋ, ਤਾ ਕੋਪੇਤ੍ਵਾ ਅਞ੍ਞਤ੍ਥ ਨ ਗਨ੍ਤਬ੍ਬਂ. ਗਚ੍ਛਤਿ ਚੇ, ਗਾਮਨ੍ਤਰਨਦੀਪਾਰਰਤ੍ਤਿਵਿਪ੍ਪਵਾਸਗਣਓਹੀਯਨਾਪਤ੍ਤੀਹਿ ਨ ਮੁਚ੍ਚਤਿ…ਪੇ… ਅਲਜ੍ਜਿਨਿਯੋ ਹੋਨ੍ਤਿ, ਸਙ੍ਗਹਂ ਪਨ ਕਰੋਨ੍ਤਿ, ਤਾਪਿ ਪਰਿਚ੍ਚਜਿਤ੍ਵਾ ਅਞ੍ਞਤ੍ਥ ਗਨ੍ਤੁਂ ਲਬ੍ਭਤੀ’’ਤਿ ਏਵਂ ਅਲਜ੍ਜਿਨੀਸੁ ਦੁਤਿਯਿਕਾਗਹਣਾਦੀਸੁ ਸਂਵਾਸਾਪਤ੍ਤਿਪਰਿਹਾਰਾਯ ਨਦੀਪਾਰਗਮਨਾਦਿਗਰੁਕਾਪਤ੍ਤਿਟ੍ਠਾਨਾਨਂ ਅਨੁਞ੍ਞਾਤਤ੍ਤਾ ਤਤੋਪਿ ਅਲਜ੍ਜਿਸਂਵਾਸਾਪਤ੍ਤਿ ਏਵ ਸਦ੍ਧਮ੍ਮਪਰਿਹਾਨਿਹੇਤੁਤੋ ਗਰੁਕਤਰਾਤਿ ਵਿਞ੍ਞਾਯਤਿ. ਨ ਹਿ ਲਹੁਕਾਪਤ੍ਤਿਟ੍ਠਾਨਂ, ਅਨਾਪਤ੍ਤਿਟ੍ਠਾਨਂ ਵਾ ਪਰਿਹਰਿਤੁਂ ਗਰੁਕਾਪਤ੍ਤਿਟ੍ਠਾਨਵੀਤਿਕ੍ਕਮਂ ਆਚਰਿਯਾ ਅਨੁਜਾਨਨ੍ਤਿ, ਤਥਾ ਅਸਂਵਾਸਪਦਸ੍ਸ ਅਟ੍ਠਕਥਾਯਂ ‘‘ਸਬ੍ਬੇਹਿਪਿ ਲਜ੍ਜਿਪੁਗ੍ਗਲੇਹਿ ਸਮਂ ਸਿਕ੍ਖਿਤਬ੍ਬਭਾਵਤੋ ਸਮਸਿਕ੍ਖਾਤਾ ਨਾਮ. ਏਤ੍ਥ ਯਸ੍ਮਾ ਸਬ੍ਬੇਪਿ ਲਜ੍ਜਿਨੋ ਏਤੇਸੁ ਕਮ੍ਮਾਦੀਸੁ ਸਹ ਵਸਨ੍ਤਿ, ਨ ਏਕੋਪਿ ਤਤੋ ਬਹਿਦ੍ਧਾ ਸਨ੍ਦਿਸ੍ਸਤਿ, ਤਸ੍ਮਾ ਤਾਨਿ ਸਬ੍ਬਾਨਿਪਿ ਗਹੇਤ੍ਵਾ ਏਸੋ ਸਂਵਾਸੋ ਨਾਮਾ’’ਤਿ ਏਵਂ ਲਜ੍ਜੀਹੇਵ ਏਕਕਮ੍ਮਾਦਿਸਂਵਾਸੋ ਵਟ੍ਟਤੀਤਿ ਪਕਾਸਿਤੋ.

ਯਦਿ ਏਵਂ, ਕਸ੍ਮਾ ਅਸਂਵਾਸਿਕੇਸੁ ਅਲਜ੍ਜੀ ਨ ਗਣਿਤੋਤਿ? ਨਾਯਂ ਵਿਰੋਧੋ, ਯੇ ਗਣਪੂਰਕੇ ਕਤ੍ਵਾ ਕਤਂ ਕਮ੍ਮਂ ਕੁਪ੍ਪਤਿ, ਤੇਸਂ ਪਾਰਾਜਿਕਾਦਿਅਪਕਤਤ੍ਤਾਨਞ੍ਞੇਵ ਅਸਂਵਾਸਿਕਤ੍ਤੇ ਗਹਿਤਤ੍ਤਾ. ਅਲਜ੍ਜਿਨੋ ਪਨ ਪਕਤਤ੍ਤਭੂਤਾਪਿ ਸਨ੍ਤਿ, ਤੇ ਚੇ ਗਣਪੂਰਣਾ ਹੁਤ੍ਵਾ ਕਮ੍ਮਂ ਸਾਧੇਨ੍ਤਿ, ਕੇਵਲਂ ਕਤ੍ਵਾ ਅਗਤਿਗਮਨੇਨ ਕਰੋਨ੍ਤਾਨਂ ਆਪਤ੍ਤਿਕਰਾ ਹੋਨ੍ਤਿ ਸਭਾਗਾਪਤ੍ਤਿਆਪਨ੍ਨਾ ਵਿਯ ਅਞ੍ਞਮਞ੍ਞਂ. ਯਸ੍ਮਾ ਅਲਜ੍ਜਿਤਞ੍ਚ ਲਜ੍ਜਿਤਞ੍ਚ ਪੁਥੁਜ੍ਜਨਾਨਂ ਚਿਤ੍ਤਕ੍ਖਣਪਟਿਬਦ੍ਧਂ, ਨ ਸਬ੍ਬਕਾਲਿਕਂ. ਸਞ੍ਚਿਚ੍ਚ ਹਿ ਵੀਤਿਕ੍ਕਮਚਿਤ੍ਤੇ ਉਪ੍ਪਨ੍ਨੇ ਅਲਜ੍ਜਿਨੋ ‘‘ਨ ਪੁਨ ਈਦਿਸਂ ਕਰਿਸ੍ਸਾਮੀ’’ਤਿ ਚਿਤ੍ਤੇਨ ਲਜ੍ਜਿਨੋ ਚ ਹੋਨ੍ਤਿ, ਤੇਸੁ ਚ ਯੇ ਪੇਸਲੇਹਿ ਓਵਦਿਯਮਾਨਾਪਿ ਨ ਓਰਮਨ੍ਤਿ, ਪੁਨਪ੍ਪੁਨਂ ਵੀਤਿਕ੍ਕਮਨ੍ਤਿ, ਤੇ ਏਵ ਅਸਂਵਸਿਤਬ੍ਬਾ, ਨ ਇਤਰੇ ਲਜ੍ਜਿਧਮ੍ਮੇ ਓਕ੍ਕਨ੍ਤਤ੍ਤਾ. ਤਸ੍ਮਾਪਿ ਅਲਜ੍ਜਿਨੋ ਅਸਂਵਾਸਿਕੇਸੁ ਅਗਣੇਤ੍ਵਾ ਤਪ੍ਪਰਿਵਜ੍ਜਨਤ੍ਥਂ ਸੋਧੇਤ੍ਵਾਵ ਉਪੋਸਥਾਦਿਕਰਣਂ ਅਨੁਞ੍ਞਾਤਂ. ਤਥਾ ਹਿ ‘‘ਪਾਰਿਸੁਦ੍ਧਿਂ ਆਯਸ੍ਮਨ੍ਤੋ ਆਰੋਚੇਥ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਾਮੀ’’ਤਿਆਦਿਨਾ (ਮਹਾਵ. ੧੩੪) ਅਪਰਿਸੁਦ੍ਧਾਯ ਪਰਿਸਾਯ ਉਪੋਸਥਕਰਣਸ੍ਸ ਅਯੁਤ੍ਤਤਾ ਪਕਾਸਿਤਾ, ‘‘ਯਸ੍ਸ ਸਿਯਾ ਆਪਤ੍ਤਿ ਸੋ ਆਵਿਕਰੇਯ੍ਯ…ਪੇ… ਫਾਸੁ ਹੋਤੀ’’ਤਿ (ਮਹਾਵ. ੧੩੪) ਏਵਂ ਅਲਜ੍ਜਿਮ੍ਪਿ ਲਜ੍ਜਿਧਮ੍ਮੇ ਪਤਿਟ੍ਠਾਪੇਤ੍ਵਾ ਉਪੋਸਥਕਰਣਪ੍ਪਕਾਰੋ ਚ ਵੁਤ੍ਤੋ, ‘‘ਕਚ੍ਚਿਤ੍ਥ ਪਰਿਸੁਦ੍ਧਾ…ਪੇ… ਪਰਿਸੁਦ੍ਧੇਤ੍ਥਾਯਸ੍ਮਨ੍ਤੋ’’ਤਿ (ਪਾਰਾ. ੪੪੨, ੪੫੮, ੬੬੨; ਪਾਚਿ. ੫੫੧, ੫੭੫, ੬੫੫) ਚ ਪਾਰਿਸੁਦ੍ਧਿਉਪੋਸਥੇ ‘‘ਪਰਿਸੁਦ੍ਧੋ ਅਹਂ ਭਨ੍ਤੇ, ਪਰਿਸੁਦ੍ਧੋਤਿ ਮਂ ਧਾਰੇਥਾ’’ਤਿ (ਮਹਾਵ. ੧੬੮) ਚ ਏਵਂ ਉਪੋਸਥਂ ਕਰੋਨ੍ਤਾਨਂ ਪਰਿਸੁਦ੍ਧਤਾ ਚ ਪਕਾਸਿਤਾ, ਵਚਨਮਤ੍ਤੇਨ ਅਨੋਰਮਨ੍ਤਾਨਞ੍ਚ ਉਪੋਸਥਪਵਆਰਣਟ੍ਠਪਨਵਿਧਿ ਚ ਵੁਤ੍ਤਾ, ਸਬ੍ਬਥਾ ਲਜ੍ਜਿਧਮ੍ਮਂ ਅਨੋਕ੍ਕਮਨ੍ਤੇਹਿ ਸਂਵਾਸਸ੍ਸ ਅਯੁਤ੍ਤਤਾਯ ਨਿਸ੍ਸਯਦਾਨਗ੍ਗਹਣਪਟਿਕ੍ਖੇਪੋ, ਤਜ੍ਜਨੀਯਾਦਿਨਿਗ੍ਗਹਕਮ੍ਮਕਰਣਞ੍ਚ ਉਕ੍ਖੇਪਨੀਯਕਮ੍ਮਕਰਣੇਨ ਸਾਨੁਵਤ੍ਤਕਪਰਿਸਸ੍ਸ ਅਲਜ੍ਜਿਸ੍ਸ ਅਸਂਵਾਸਿਕਤ੍ਤਪਾਪਨਵਿਧਿ ਚ ਵੁਤ੍ਤਾ. ਤਸ੍ਮਾ ਯਥਾਵੁਤ੍ਤੇਹਿ ਸੁਤ੍ਤਨਯੇਹਿ, ਅਟ੍ਠਕਥਾਵਚਨੇਹਿ ਚ ਪਕਤਤ੍ਤੇਹਿਪਿ ਅਪਕਤਤ੍ਤੇਹਿਪਿ ਸਬ੍ਬੇਹਿ ਅਲਜ੍ਜੀਹਿ ਏਕਕਮ੍ਮਾਦਿਸਂਵਾਸੋ ਨ ਵਟ੍ਟਤਿ, ਕਰੋਨ੍ਤਾਨਂ ਆਪਤ੍ਤਿ ਏਵ ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਤ੍ਥਾਯੇਵ ਸਬ੍ਬਸਿਕ੍ਖਾਪਦਾਨਂ ਪਞ੍ਞਤ੍ਤਤ੍ਤਾਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਤੇਨੇਵ ਦੁਤਿਯਸਙ੍ਗੀਤਿਯਂ ਪਕਤਤ੍ਤਾਪਿ ਅਲਜ੍ਜਿਨੋ ਵਜ੍ਜਿਪੁਤ੍ਤਕਾ ਯਸਤ੍ਥੇਰਾਦੀਹਿ ਮਹਨ੍ਤੇਨ ਵਾਯਾਮੇਨ ਸਙ੍ਘਤੋ ਵਿਯੋਜਿਤਾ. ਨ ਹਿ ਤੇਸੁ ਪਾਰਾਜਿਕਾਦਿਅਸਂਵਾਸਿਕਾ ਅਤ੍ਥਿ ਤੇਹਿ ਦੀਪਿਤਾਨਂ ਦਸਨ੍ਨਂ ਵਤ੍ਥੂਨਂ (ਚੂਲ਼ਵ. ੪੫੨) ਲਹੁਕਾਪਤ੍ਤਿਵਿਸਯਤ੍ਤਾ.

ਤਸ੍ਸ ਪਨ ਸਨ੍ਤਿਕੇਤਿ ਮਹਾਰਕ੍ਖਿਤਤ੍ਥੇਰਸ੍ਸ ਸਨ੍ਤਿਕੇ. ਖਰਪਤ੍ਤਨ੍ਤਿ ਖਰਸਙ੍ਖਾਤਂ ਸੁਵਣ੍ਣਪਤਿਰੂਪਕਂ ਵਤ੍ਥੁ. ਦਾਯਕੇਹਿ ਅਸਤਿਯਾ ਦਿਨ੍ਨਂ ਰੂਪਿਯਂ ਤੇਹਿ ਪੁਨ ਸਕਸਞ੍ਞਾਯ ਗਣ੍ਹਨ੍ਤੇ ਅਦਾਤੁਂ, ਨਿਸ੍ਸਗ੍ਗਿਯਵਤ੍ਥੁਂ ਗਣ੍ਹਾਹੀਤਿ ਦਾਤੁਞ੍ਚ ਨ ਵਟ੍ਟਤੀਤਿ ਆਹ ‘‘ਤਵ ਚੋਲ਼ਕਂ ਪਸ੍ਸਾਹੀ’’ਤਿ. ਏਵਂ ਵਤ੍ਵਾਪਿ ਪਨ ਨਟ੍ਠਵਤ੍ਥੁਸ੍ਮਿਂ ਵਿਯ ਨਿਸ੍ਸਜ੍ਜਿਤਬ੍ਬਾਭਾਵੇਪਿ ਆਪਤ੍ਤਿ ਦੇਸੇਤਬ੍ਬਾਵ. ਅਸਤਿਯਾਪਿ ਹਿ ਤਂ ਵਤ੍ਥੁਂ ਵਤ੍ਥਾਦਿਨਾ ਸਹਤ੍ਥੇਨ ਗਹੇਤ੍ਵਾ ‘‘ਇਦਂ ਦੇਮੀ’’ਤਿ ਦਿਨ੍ਨਂ, ਤਦਾ ਪਰਿਚ੍ਚਾਗਸਬ੍ਭਾਵਤੋ ਦਾਨਮੇਵ ਹੋਤਿ ‘‘ਅਪ੍ਪਗ੍ਘਂ ਦਸ੍ਸਾਮੀ’’ਤਿ ਮਹਗ੍ਘਸ੍ਸ ਦਾਨੇ ਵਿਯ. ਪਟਿਗ੍ਗਣ੍ਹਨ੍ਤਸ੍ਸ ਚ ਅਸਤਿਯਾ ਦਿਯ੍ਯਮਾਨਤ੍ਤੇ ਞਾਤੇਪਿ ਅਦਿਨ੍ਨਾਦਾਨਂ ਨ ਹੋਤਿ ਦਾਯਕੇਹਿ ਦਿਨ੍ਨਤ੍ਤਾ, ਤਸ੍ਮਾ ਰੂਪਿਯਂ ਨਿਸ੍ਸਗ੍ਗਿਯਮੇਵ ਹੋਤਿ. ਕੇਚਿ ਪਨ ‘‘ਈਦਿਸਂ ਨਾਮ ਨ ਹੋਤਿ, ਤੇਨੇਵ ਚੇਤ੍ਥ ‘ਤਵ ਚੋਲ਼ਕਂ ਪਸ੍ਸਾ’ਤਿ ਵੁਤ੍ਤ’’ਨ੍ਤਿ ਵਦਨ੍ਤਿ, ਤਂ ਨੋ ਨਕ੍ਖਮਤਿ, ਵੀਮਂਸਿਤਬ੍ਬਂ.

੫੮੬. ਏਕਪਰਿਚ੍ਛੇਦਾਨੀਤਿ ਸਿਯਾ ਕਿਰਿਯਤ੍ਤਂ, ਸਿਯਾ ਅਕਿਰਿਯਤ੍ਤਞ੍ਚ ਸਨ੍ਧਾਯ ਵੁਤ੍ਤਂ. ਜਾਤਰੂਪਰਜਤਭਾਵੋ, ਅਤ੍ਤੁਦ੍ਦੇਸਿਕਤਾ, ਗਹਣਾਦੀਸੁ ਅਞ੍ਞਤਰਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਰੂਪਿਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੯. ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ

੫੮੭. ਨਵਮੇ ਜਾਤਰੂਪਾਦਿਚਤੁਬ੍ਬਿਧਨਿਸ੍ਸਗ੍ਗਿਯਵਤ੍ਥੁ ਇਧ ਰੂਪਿਯਗ੍ਗਹਣੇਨੇਵ ਗਹਿਤਨ੍ਤਿ ਆਹ ‘‘ਜਾਤਰੂਪਰਜਤਪਰਿਵਤ੍ਤਨ’’ਨ੍ਤਿ. ਪਟਿਗ੍ਗਹਿਤਪਰਿਵਤ੍ਤਨੇਤਿ ਕਪ੍ਪਿਯਵੋਹਾਰੇਨ, ਅਕਪ੍ਪਿਯਵੋਹਾਰੇਨ ਵਾ ਪਟਿਗ੍ਗਹਿਤਸ੍ਸ ਰੂਪਿਯਸ੍ਸ ਪਰਿਵਤ੍ਤਨੇ.

੫੮੯. ਪਾਲ਼ਿਯਂ ਘਨਕਤਨ੍ਤਿ ਇਟ੍ਠਕਾਦਿ. ਰੂਪਿਯਂ ਨਾਮ ਸਤ੍ਥੁਵਣ੍ਣੋਤਿਆਦੀਸੁ ਕਿਞ੍ਚਾਪਿ ਕੇਵਲਂ ਰਜਤਂ ਨ ਗਹਿਤਂ, ਤਥਾਪਿ ਰੂਪਿਯਪਦੇਨੇਵ ਤਂ ਗਹਿਤਨ੍ਤਿ ਦਟ੍ਠਬ੍ਬਂ. ਸੁਦ੍ਧੋ ਰੂਪਿਯਸਂਵੋਹਾਰੋ ਏਵ ਵੁਤ੍ਤੋਤਿ ਅਜ੍ਝਾਹਰਿਤਬ੍ਬਂ. ਰੂਪਿਯੇ ਰੂਪਿਯਸਞ੍ਞੀਤਿਆਦਿਮ੍ਹਿ ਵਿਨਿਚ੍ਛਯਂ ਵਕ੍ਖਾਮਾਤਿ ਪਾਠਸੇਸੋ.

੫੯੧. ਪਾਲ਼ਿਯਂ ਰੂਪਿਯੇ ਰੂਪਿਯਸਞ੍ਞੀਤਿ ਅਤ੍ਤਨਾ ਦਿਯ੍ਯਮਾਨਂ ਸਕਸਨ੍ਤਕਂ ਸਨ੍ਧਾਯ ਵੁਤ੍ਤਂ. ਰੂਪਿਯਂ ਚੇਤਾਪੇਤੀਤਿ ਪਰਸਨ੍ਤਕਂ. ਏਸ ਨਯੋ ਸੇਸੇਸੁਪਿ. ਤਤ੍ਥ ਅਰੂਪਿਯ-ਸਦ੍ਦੇਨ ਦੁਕ੍ਕਟਵਤ੍ਥੁਮ੍ਪਿ ਸਙ੍ਗਣ੍ਹਾਤਿ. ਪਚ੍ਛਿਮੇ ਪਨ ਤਿਕੇ ‘‘ਅਰੂਪਿਯੇ ਰੂਪਿਯਸਞ੍ਞੀ ਅਰੂਪਿਯਂ ਚੇਤਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਇਮਿਨਾ ਨਯੇਨ ਸਬ੍ਬਤ੍ਥ ਯੋਜਨਾ ਵੇਦਿਤਬ੍ਬਾ. ਇਮਸ੍ਮਿਞ੍ਚ ਤਿਕੇ ਅਰੂਪਿਯ-ਸਦ੍ਦੇਨ ਕਪ੍ਪਿਯਵਤ੍ਥੁਯੇਵ ਗਹਿਤਂ, ਨ ਮੁਤ੍ਤਾਦਿਦੁਕ੍ਕਟਵਤ੍ਥੁ ਅਨ੍ਤੇ ‘‘ਪਞ੍ਚਨ੍ਨਂ ਸਹ ਅਨਾਪਤ੍ਤੀ’’ਤਿ ਵੁਤ੍ਤਤ੍ਤਾ. ਕਿਞ੍ਚਾਪਿ ਦੁਕ੍ਕਟਵਤ੍ਥੁ ਨ ਗਹਿਤਂ, ਤਥਾਪਿ ਦੁਕ੍ਕਟਵਤ੍ਥੁਨਾ ਦੁਕ੍ਕਟਵਤ੍ਥੁਂ, ਕਪ੍ਪਿਯਵਤ੍ਥੁਨਾ ਦੁਕ੍ਕਟਵਤ੍ਥੁਞ੍ਚ ਪਰਿਵਤ੍ਤਯਤੋ ਦੁਕ੍ਕਟਂ, ਨਯਤੋ ਸਿਦ੍ਧਮੇਵ ਹੋਤਿ. ਤਞ੍ਚ ਦੁਕ੍ਕਟਵਤ੍ਥੁਮ੍ਹਿ ਤਥਸਞ੍ਞਾਯ ਵਾ ਅਤਥਸਞ੍ਞਾਯ ਵਾ ਵਿਮਤਿਯਾ ਵਾ ਪਰਿਵਤ੍ਤੇਨ੍ਤਸ੍ਸਪਿ ਹੋਤਿਯੇਵ ਅਚਿਤ੍ਤਕਤ੍ਤਾ ਇਮਸ੍ਸ ਸਿਕ੍ਖਾਪਦਸ੍ਸ. ਪਞ੍ਚਨ੍ਨਂ ਸਹਾਤਿ ਪਞ੍ਚਹਿ ਸਹਧਮ੍ਮਿਕੇਹਿ ਸਹ.

ਇਦਾਨਿ ‘‘ਨਿਸ੍ਸਗ੍ਗਿਯਵਤ੍ਥੁਨਾ ਦੁਕ੍ਕਟਵਤ੍ਥੁਂ ਵਾ’’ਤਿਆਦਿਨਾ ਵੁਤ੍ਤਸ੍ਸ ਅਤ੍ਥਸ੍ਸ ਪਾਲ਼ਿਯਂ ਸਰੂਪੇਨ ਅਨਾਗਤਤ੍ਤੇਪਿ ਨਯਤੋ ਲਬ੍ਭਮਾਨਤਂ ਦਸ੍ਸੇਤੁਂ ‘‘ਯੋ ਹਿ ਅਯ’’ਨ੍ਤਿਆਦਿ ਵੁਤ੍ਤਂ. ਏਤ੍ਥ ਚ ਯਸ੍ਮਾ ਰੂਪਿਯੇਨ ਪਰਿਵਤ੍ਤਿਤਂ ਅਰੂਪਿਯਂ ਨਿਸ੍ਸਟ੍ਠਮ੍ਪਿ ਸਬ੍ਬੇਸਮ੍ਪਿ ਅਕਪ੍ਪਿਯਤ੍ਤਾ ਨਿਸ੍ਸਗ੍ਗਿਯਮੇਵ ਨ ਹੋਤਿ ਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਿਤਬ੍ਬਸ੍ਸੇਵ ਨਿਸ੍ਸਜ੍ਜਿਤਬ੍ਬਤੋ, ਕੇਵਲਂ ਪਨ ਇਦਂ ਛਡ੍ਡੇਤ੍ਵਾ ਪਾਚਿਤ੍ਤਿਯਮੇਵ ਪਰਿਵਤ੍ਤਕੇਨ ਦੇਸੇਤਬ੍ਬਂ, ਤਸ੍ਮਾ ‘‘ਰੂਪਿਯੇ ਰੂਪਿਯਸਞ੍ਞੀ ਅਰੂਪਿਯਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿਆਦਿ ਤਿਕੋ ਭਗਵਤਾ ਨ ਵੁਤ੍ਤੋ, ਤੀਸੁਪਿ ਪਦੇਸੁ ਪਰਿਵਤ੍ਤਿਯਮਾਨਸ੍ਸ ਅਰੂਪਿਯਤ੍ਤੇਨ ਨਿਸ੍ਸਗ੍ਗਿਯਵਚਨਾਯੋਗਾ ਰੂਪਿਯਸ੍ਸੇਵ ਨਿਸ੍ਸਜ੍ਜਿਤਬ੍ਬਤੋ. ਰੂਪਿਯਸ੍ਸੇਵ ਹਿ ਨਿਸ੍ਸਟ੍ਠਸ੍ਸ ਆਰਾਮਿਕਾਦੀਹਿ ਪਟਿਪਜ੍ਜਨਵਿਧਿ ਪਾਲ਼ਿਯਂ ਦਸ੍ਸਿਤੋ, ਨ ਅਰੂਪਿਯਸ੍ਸ. ਤਸ੍ਮਾ ਪਾਚਿਤ੍ਤਿਯਮਤ੍ਤਸਮ੍ਭਵਦਸ੍ਸਨਤ੍ਥਮੇਵ ਪਨੇਤ੍ਥ ਅਟ੍ਠਕਥਾਯਂ ‘‘ਅਵੁਤ੍ਤੋਪਿ ਅਯਂ…ਪੇ… ਤਿਕੋ ਵੇਦਿਤਬ੍ਬੋ’’ਤਿ ਵੁਤ੍ਤਂ, ਨ ਪਨ ਤਸ੍ਸ ਵਤ੍ਥੁਨੋ ਨਿਸ੍ਸਗ੍ਗਿਯਤਾਦਸ੍ਸਨਤ੍ਥਂ. ਤੇਨੇਵ ਪਤ੍ਤਚਤੁਕ੍ਕੇ ‘‘ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯਂ ਕਾਤੁ’’ਨ੍ਤਿਆਦਿ ਵੁਤ੍ਤਂ. ਅਯਂ ਅਮ੍ਹਾਕਂ ਖਨ੍ਤਿ. ਅਤ੍ਤਨੋ ਵਾ ਹੀਤਿਆਦਿ ਦੁਤਿਯਤਿਕਾਨੁਲੋਮੇਨੇਵ ਤਤਿਯਤ੍ਤਿਕਸ੍ਸ ਸਿਜ੍ਝਨਪ੍ਪਕਾਰਂ ਸਮਤ੍ਥੇਤੁਂ ਵੁਤ੍ਤਂ. ਤਤ੍ਰਾਯਂ ਅਧਿਪ੍ਪਾਯੋ – ਯਸ੍ਮਾ ਹਿ ਯਥਾ ਅਤ੍ਤਨੋ ਅਰੂਪਿਯੇਨ ਪਰਸ੍ਸ ਰੂਪਿਯਂ ਚੇਤਾਪੇਨ੍ਤਸ੍ਸ ਏਕਸ੍ਮਿਂ ਅਨ੍ਤੇ ਰੂਪਿਯਸਮ੍ਭਵਤੋ ‘‘ਰੂਪਿਯਸਂਵੋਹਾਰੋ ਕਤੋ ਏਵ ਹੋਤੀ’’ਤਿ ਦੁਤਿਯਤ੍ਤਿਕੋ ਵੁਤ੍ਤੋ, ਏਵਂ ਅਤ੍ਤਨੋ ਰੂਪਿਯੇਨ ਪਰਸ੍ਸ ਅਰੂਪਿਯਂ ਚੇਤਾਪੇਨ੍ਤਸ੍ਸਾਪਿ ਹੋਤੀਤਿ ਤਤਿਯੋ ਤਿਕੋ ਵਤ੍ਤਬ੍ਬੋ ਭਵੇਯ੍ਯ, ਸੋ ਪਨ ਦੁਤਿਯਤ੍ਤਿਕੇਨੇਵ ਏਕਤੋ ਰੂਪਿਯਪਕ੍ਖਸਾਮਞ੍ਞੇਨ ਸਿਜ੍ਝਤੀਤਿ ਪਾਲ਼ਿਯਂ ਨ ਵੁਤ੍ਤੋਤਿ. ਤਤ੍ਥ ਏਕਨ੍ਤੇਨ ਰੂਪਿਯਪਕ੍ਖੇਤਿ ਏਕੇਨ ਅਨ੍ਤੇਨ ਰੂਪਿਯਪਕ੍ਖੇ, ‘‘ਏਕਤੋ ਰੂਪਿਯਪਕ੍ਖੇ’’ਤਿ ਵਾ ਪਾਠੋ.

ਇਦਾਨਿ ਦੁਤਿਯਤ੍ਤਿਕੇ ਅਰੂਪਿਯਪਦਸ੍ਸ ਅਤ੍ਥਭੂਤੇਸੁ ਦੁਕ੍ਕਟਵਤ੍ਥੁਕਪ੍ਪਿਯਵਤ੍ਥੂਸੁ ਦੁਕ੍ਕਟਵਤ੍ਥੁਨਾ ਰੂਪਿਯਾਦਿਪਰਿਵਤ੍ਤਨੇ ਆਪਤ੍ਤਿਭੇਦਂ ਦਸ੍ਸੇਤੁਂ ‘‘ਦੁਕ੍ਕਟਵਤ੍ਥੁਨਾ’’ਤਿਆਦਿ ਆਰਦ੍ਧਂ. ਦੁਕ੍ਕਟਵਤ੍ਥੁਨਾ ਦੁਕ੍ਕਟਵਤ੍ਥੁਨ੍ਤਿਆਦਿ ਪਨ ਦੁਕ੍ਕਟਵਤ੍ਥੁਨਾ ਪਰਿਵਤ੍ਤਨਪ੍ਪਸਙ੍ਗੇ ਪਾਲ਼ਿਯਂ ਅਵੁਤ੍ਤਸ੍ਸਾਪਿ ਅਤ੍ਥਸ੍ਸ ਨਯਤੋ ਲਬ੍ਭਮਾਨਤਂ ਦਸ੍ਸੇਤੁਂ ਵੁਤ੍ਤਂ. ਤਤ੍ਥ ਇਮਿਨਾਤਿ ਰੂਪਿਯਸਂਵੋਹਾਰਸਿਕ੍ਖਾਪਦੇਨ, ਤੇਨ ਚ ਦੁਕ੍ਕਟਸ੍ਸ ਅਚਿਤ੍ਤਕਤਮ੍ਪਿ ਦਸ੍ਸੇਤਿ. ਅਞ੍ਞਤ੍ਰ ਸਹਧਮ੍ਮਿਕੇਹੀਤਿ ‘‘ਪਞ੍ਚਨ੍ਨਂ ਸਹ ਅਨਾਪਤ੍ਤੀ’’ਤਿ ਵਚਨਤੋ ਵੁਤ੍ਤਂ, ਤੇਨਾਪਿ ਕਯਵਿਕ੍ਕਯਸਿਕ੍ਖਾਪਦਸ੍ਸ ਕਪ੍ਪਿਯਵਤ੍ਥੁਨਿਸ੍ਸਿਤਤਂ ਏਵ ਸਾਧੇਤਿ. ਇਮਂ…ਪੇ… ਰੂਪਿਯਚੇਤਾਪਨਞ੍ਚ ਸਨ੍ਧਾਯ ਵੁਤ੍ਤਨ੍ਤਿ ਪਕਤੇਨ ਸਮ੍ਬਨ੍ਧੋ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਤਤ੍ਥਾਤਿ ਕਯਵਿਕ੍ਕਯਸਿਕ੍ਖਾਪਦੇ (ਪਾਰਾ. ੫੯੩).

ਏਵਂ ਦੁਕ੍ਕਟਵਤ੍ਥੁਨਾ ਰੂਪਿਯਾਦਿਪਰਿਵਤ੍ਤਨੇ ਆਪਤ੍ਤਿਭੇਦਂ ਦਸ੍ਸੇਤ੍ਵਾ ਇਦਾਨਿ ਕਪ੍ਪਿਯਵਤ੍ਥੁਨਾਪਿ ਦਸ੍ਸੇਤੁਂ ‘‘ਕਪ੍ਪਿਯਵਤ੍ਥੁਨਾ ਪਨਾ’’ਤਿਆਦਿ ਆਰਦ੍ਧਂ. ਤਤ੍ਥ ਤੇਨੇਵਾਤਿ ਕਪ੍ਪਿਯਵਤ੍ਥੁਨਾ ਏਵ. ‘‘ਰੂਪਿਯਂ ਉਗ੍ਗਣ੍ਹਿਤ੍ਵਾ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ. ਮੁਤ੍ਤਾਦਿਦੁਕ੍ਕਟਵਤ੍ਥੁਮ੍ਪਿ ਉਗ੍ਗਹੇਤ੍ਵਾ ਕਾਰਿਤਮ੍ਪਿ ਪਞ੍ਚਨ੍ਨਮ੍ਪਿ ਨ ਵਟ੍ਟਤਿ ਏਵ. ਸਮੁਟ੍ਠਾਪੇਤੀਤਿ ਸਯਂ ਗਨ੍ਤ੍ਵਾ, ‘‘ਇਮਂ ਕਹਾਪਣਾਦਿਂ ਕਮ੍ਮਕਾਰਾਨਂ ਦਤ੍ਵਾ ਬੀਜਂ ਸਮੁਟ੍ਠਾਪੇਹੀ’’ਤਿ ਏਵਂ ਅਞ੍ਞਂ ਆਣਾਪੇਤ੍ਵਾ ਵਾ ਸਮੁਟ੍ਠਾਪੇਤਿ. ਮਹਾਅਕਪ੍ਪਿਯੋਤਿ ਅਤ੍ਤਨਾਵ ਬੀਜਤੋ ਪਟ੍ਠਾਯ ਦੂਸਿਤਤ੍ਤਾ ਅਞ੍ਞਸ੍ਸ ਮੂਲਸਾਮਿਕਸ੍ਸ ਅਭਾਵਤੋ ਵੁਤ੍ਤਂ. ਸੋ ਹਿ ਚੋਰੇਹਿ ਅਚ੍ਛਿਨ੍ਨੋਪਿ ਪੁਨ ਲਦ੍ਧੋ ਜਾਨਨ੍ਤਸ੍ਸ ਕਸ੍ਸਚਿਪਿ ਨ ਵਟ੍ਟਤਿ. ਯਦਿ ਹਿ ਵਟ੍ਟੇਯ੍ਯ, ਤਲ਼ਾਕਾਦੀਸੁ ਵਿਯ ਅਚ੍ਛਿਨ੍ਨੋ ਵਟ੍ਟਤੀਤਿ ਆਚਰਿਯਾ ਵਦੇਯ੍ਯੁਂ. ਨ ਸਕ੍ਕਾ ਕੇਨਚਿ ਉਪਾਯੇਨਾਤਿ ਸਙ੍ਘੇ ਨਿਸ੍ਸਜ੍ਜਨੇਨ, ਚੋਰਾਦਿਅਚ੍ਛਿਨ੍ਦਨਾਦਿਨਾ ਚ ਕਪ੍ਪਿਯਂ ਕਾਤੁਂ ਨ ਸਕ੍ਕਾ, ਇਦਞ੍ਚ ਤੇਨ ਰੂਪੇਨ ਠਿਤਂ, ਤਮ੍ਮੂਲਿਕੇਨ ਵਤ੍ਥੁਮੁਤ੍ਤਾਦਿਰੂਪੇਨ ਠਿਤਞ੍ਚ ਸਨ੍ਧਾਯ ਵੁਤ੍ਤਂ. ਦੁਕ੍ਕਟਵਤ੍ਥੁਮ੍ਪਿ ਹਿ ਤਮ੍ਮੂਲਿਕਕਪ੍ਪਿਯਵਤ੍ਥੁਞ੍ਚ ਨ ਸਕ੍ਕਾ ਕੇਨਚਿ ਉਪਾਯੇਨ ਤੇਨ ਰੂਪੇਨ ਕਪ੍ਪਿਯਂ ਕਾਤੁਂ. ਯਦਿ ਪਨ ਸੋ ਭਿਕ੍ਖੁ ਤੇਨ ਕਪ੍ਪਿਯਵਤ੍ਥੁਦੁਕ੍ਕਟਵਤ੍ਥੁਨਾ ਪੁਨ ਰੂਪਿਯਂ ਚੇਤਾਪੇਯ੍ਯ, ਤਂ ਰੂਪਿਯਂ ਨਿਸ੍ਸਜ੍ਜਾਪੇਤ੍ਵਾ ਅਞ੍ਞੇਸਂ ਕਪ੍ਪਿਯਂ ਕਾਤੁਮ੍ਪਿ ਸਕ੍ਕਾ ਭਵੇਯ੍ਯਾਤਿ ਦਟ੍ਠਬ੍ਬਂ.

ਪਤ੍ਤਂ ਕਿਣਾਤੀਤਿ ਏਤ੍ਥ ‘‘ਇਮਿਨਾ ਕਹਾਪਣਾਦਿਨਾ ਕਮ੍ਮਾਰਕੁਲਤੋ ਪਤ੍ਤਂ ਕਿਣਿਤ੍ਵਾ ਏਹੀ’’ਤਿ ਆਰਾਮਿਕਾਦੀਹਿ ਕਿਣਾਪਨਮ੍ਪਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ. ਤੇਨੇਵ ਰਾਜਸਿਕ੍ਖਾਪਦਟ੍ਠਕਥਾਯਂ ‘‘ਏਤ੍ਤਕੇਹਿ ਕਹਾਪਣੇਹਿ ਸਾਟਕੇ ਆਹਰ, ਏਤ੍ਤਕੇਹਿ ਯਾਗੁਆਦੀਨਿ ਸਮ੍ਪਾਦੇਹੀਤਿ ਵਦਤਿ, ਯਂ ਤੇ ਆਹਰਨ੍ਤਿ, ਸਬ੍ਬੇਸਂ ਅਕਪ੍ਪਿਯਂ. ਕਸ੍ਮਾ? ਕਹਾਪਣਾਨਂ ਵਿਚਾਰਿਤਤ੍ਤਾ’’ਤਿ (ਪਾਰਾ. ਅਟ੍ਠ. ੨.੫੩੮-੫੩੯) ਵੁਤ੍ਤਂ. ਇਮਿਨਾ ਪਨ ਵਚਨੇਨ ਯਂ ਮਾਤਿਕਾਟ੍ਠਕਥਾਯਂ ਰੂਪਿਯਸਂਵੋਹਾਰਸਿਕ੍ਖਾਪਦਂ ‘‘ਅਨਾਣਤ੍ਤਿਕ’’ਨ੍ਤਿ ਵੁਤ੍ਤਂ, ਤਂ ਨ ਸਮੇਤਿ. ਨ ਕੇਵਲਞ੍ਚ ਇਮਿਨਾ, ਪਾਲ਼ਿਯਾਪਿ ਤਂ ਨ ਸਮੇਤਿ. ਪਾਲ਼ਿਯਞ੍ਹਿ ਨਿਸ੍ਸਟ੍ਠਰੂਪਿਯੇਨ ਆਰਾਮਿਕਾਦੀਹਿ ਸਪ੍ਪਿਯਾਦਿਂ ਪਰਿਵਤ੍ਤਾਪੇਤੁਂ ‘‘ਸੋ ਵਤ੍ਤਬ੍ਬੋ ‘ਆਵੁਸੋ, ਇਮਂ ਜਾਨਾਹੀ’ਤਿ. ਸਚੇ ਸੋ ਭਣਤਿ ‘ਇਮਿਨਾ ਕਿਂ ਆਹਰੀਯਤੂ’ਤਿ, ਨ ਵਤ੍ਤਬ੍ਬੋ ‘ਇਮਂ ਵਾ ਇਮਂ ਵਾ ਆਹਰਾ’ਤਿ. ਕਪ੍ਪਿਯਂ ਆਚਿਕ੍ਖਿਤਬ੍ਬਂ ‘ਸਪ੍ਪਿ ਵਾ’’’ਤਿਆਦਿਨਾ ਰੂਪਿਯਸਂਵੋਹਾਰਂ ਪਰਿਮੋਚੇਤ੍ਵਾਵ ਵੁਤ੍ਤਂ. ‘‘ਇਮਿਨਾ ਰੂਪਿਯੇਨ ਕਿਂ ਆਹਰੀਯਤੂ’’ਤਿ ਪੁਚ੍ਛਨ੍ਤੋ ‘‘ਇਮਂ ਆਹਰਾ’’ਤਿ ਵੁਤ੍ਤੇਪਿ ਅਧਿਕਾਰਤੋ ‘‘ਇਮਿਨਾ ਰੂਪਿਯੇਨ ਇਮਂ ਆਹਰਾ’’ਤਿ ਭਿਕ੍ਖੂਹਿ ਆਣਤ੍ਤੋ ਏਵ ਹੋਤੀਤਿ ਤਂ ਰੂਪਿਯਸਂਵੋਹਾਰਂ ਪਰਿਵਜ੍ਜੇਤੁਂ ‘‘ਨ ਵਤ੍ਤਬ੍ਬੋ ‘ਇਮਂ ਵਾ ਇਮਂ ਵਾ ਆਹਰਾ’’’ਤਿ ਪਟਿਕ੍ਖੇਪੋ ਕਤੋ, ਅਨਾਪਤ੍ਤਿਵਾਰੇਪਿ ‘‘ਕਪ੍ਪਿਯਕਾਰਕਸ੍ਸ ਆਚਿਕ੍ਖਤੀ’’ਤਿ ਨ ਵੁਤ੍ਤਂ. ਕਯਵਿਕ੍ਕਯਸਿਕ੍ਖਾਪਦੇ (ਪਾਰਾ. ੫੯੫) ਪਨ ਤਥਾ ਵੁਤ੍ਤਂ, ਤਸ੍ਮਾ ਇਦਂ ਸਾਣਤ੍ਤਿਕਂ ਕਯਵਿਕ੍ਕਯਮੇਵ ਅਨਾਣਤ੍ਤਿਕਨ੍ਤਿ ਗਹੇਤਬ੍ਬਂ.

ਮੂਲਸ੍ਸ ਅਨਿਸ੍ਸਟ੍ਠਤ੍ਤਾਤਿ ਯੇਨ ਉਗ੍ਗਹਿਤਮੂਲੇਨ ਪਤ੍ਤੋ ਕੀਤੋ, ਤਸ੍ਸ ਮੂਲਸ੍ਸ ਸਙ੍ਘਮਜ੍ਝੇ ਅਨਿਸ੍ਸਟ੍ਠਤ੍ਤਾ, ਏਤੇਨ ਰੂਪਿਯਮੇਵ ਨਿਸ੍ਸਜ੍ਜਿਤਬ੍ਬਂ, ਨ ਤਮ੍ਮੂਲਿਕਂ ਅਰੂਪਿਯਨ੍ਤਿ ਦਸ੍ਸੇਤਿ. ਯਦਿ ਹਿ ਤੇਨ ਰੂਪਿਯੇਨ ਅਞ੍ਞਂ ਰੂਪਿਯਂ ਚੇਤਾਪੇਯ੍ਯ, ਤਂ ਰੂਪਿਯਸਂਵੋਹਾਰਸਿਕ੍ਖਾਪਦੇ ਆਗਤਨਯੇਨੇਵ ਨਿਸ੍ਸਜ੍ਜਾਪੇਤ੍ਵਾ ਸੇਸੇਹਿ ਪਰਿਭੁਞ੍ਜਿਤਬ੍ਬਂ ਭਵੇਯ੍ਯਾਤਿ. ‘‘ਮੂਲਸ੍ਸ ਅਸਮ੍ਪਟਿਚ੍ਛਿਤਤ੍ਤਾ’’ਤਿ ਇਮਿਨਾ ਮੂਲਸ੍ਸ ਗਿਹਿਸਨ੍ਤਕਤ੍ਤਂ, ਤੇਨੇਵ ਪਤ੍ਤਸ੍ਸ ਰੂਪਿਯਸਂਵੋਹਾਰਾਨੁਪ੍ਪਨ੍ਨਤਞ੍ਚ ਦਸ੍ਸੇਤਿ. ਪਞ੍ਚਸਹਧਮ੍ਮਿਕਸਨ੍ਤਕੇਨੇਵ ਹਿ ਰੂਪਿਯਸਂਵੋਹਾਰਦੋਸੋ. ਤਤ੍ਥ ਚ ਅਤ੍ਤਨੋ ਸਨ੍ਤਕੇ ਪਾਚਿਤ੍ਤਿਯਂ, ਇਤਰਤ੍ਥ ਦੁਕ੍ਕਟਂ.

ਨਿਸ੍ਸਜ੍ਜੀਤਿ ਦਾਨਵਸੇਨ ਵੁਤ੍ਤਂ, ਨ ਵਿਨਯਕਮ੍ਮਵਸੇਨ. ਤੇਨੇਵ ‘‘ਸਪ੍ਪਿਸ੍ਸ ਪੂਰੇਤ੍ਵਾ’’ਤਿ ਵੁਤ੍ਤਂ. ਯਂ ਅਤ੍ਤਨੋ ਧਨੇਨ ਪਰਿਵਤ੍ਤੇਤਿ, ਤਸ੍ਸ ਵਾ ਧਨਸ੍ਸ ਰੂਪਿਯਭਾਵੋ, ਪਰਿਵਤ੍ਤਨਪਰਿਵਤ੍ਤਾਪਨੇਸੁ ਅਞ੍ਞਤਰਭਾਵੋ ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ.

ਰੂਪਿਯਸਂਵੋਹਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੧੦. ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ

੫੯੩-੫. ਦਸਮੇ ਪਾਲ਼ਿਯਂ ਜਾਨਾਹੀਤਿ ਇਦਾਨੇਵ ਉਪਧਾਰੇਹਿ, ਇਦਂ ਪਚ੍ਛਾ ਛਡ੍ਡੇਤੁਂ ਨ ਸਕ੍ਕਾਤਿ ਅਧਿਪ੍ਪਾਯੋ. ਇਮਿਨਾਤਿ ਭਿਕ੍ਖੁਨਾ ਦਿਯ੍ਯਮਾਨਂ ਵੁਤ੍ਤਂ. ਇਮਨ੍ਤਿ ਪਰੇਨ ਪਟਿਦਿਯ੍ਯਮਾਨਂ. ਸੇਸਞਾਤਕੇਸੁ ਸਦ੍ਧਾਦੇਯ੍ਯਵਿਨਿਪਾਤਸਮ੍ਭਵਤੋ ਤਦਭਾਵਟ੍ਠਾਨਮ੍ਪਿ ਦਸ੍ਸੇਤੁਂ ‘‘ਮਾਤਰਂ ਪਨ ਪਿਤਰਂ ਵਾ’’ਤਿ ਵੁਤ੍ਤਂ. ਨ ਸਕ੍ਕਾ ਤਂ ਪਟਿਕ੍ਖਿਪਿਤੁਨ੍ਤਿ ਏਤ੍ਥ ਯਥਾ ਰੂਪਿਯਂ ਭਤਕਾਨਂ ਦਤ੍ਵਾ ਅਸ੍ਸਾਮਿਕਭੂਮਿਯਂ ਅਯੋਬੀਜਸਮੁਟ੍ਠਾਪਨੇ ਭਤਿਯਾ ਖਣਨ੍ਤਾਨਂ ਸਨ੍ਤਿਕਾ ਗਹਿਤਭਣ੍ਡਕਭਾਵੇਪਿ ਪਾਚਿਤ੍ਤਿਯਂ ਹੋਤਿ, ਏਵਮਿਧਾਪੀਤਿ ਕੇਚਿ ਵਦਨ੍ਤਿ, ਤਂ ਨ ਯੁਤ੍ਤਂ. ਯਞ੍ਹਿ ਅਸ੍ਸਾਮਿਕਭੂਮਿਂ ਖਣਿਤ੍ਵਾ ਸਮੁਟ੍ਠਾਪਿਤਂ ਅਯੋਬੀਜਂ, ਤਂ ਭਤਕਾਨਂ ਸਨ੍ਤਕਂ ਨਾਮ ਹੋਤਿ, ਤਦਤ੍ਥਞ੍ਚ ਤੇਸਂ ਰੂਪਿਯਂ ਦੇਨ੍ਤਸ੍ਸ ਰੂਪਿਯਸਂਵੋਹਾਰੋਵ ਹੋਤਿ ਅਕਪ੍ਪਿਯਵੋਹਾਰੇਨ ਰਜਨਚ੍ਛਲ੍ਲਿਆਦੀਨਂ ਆਹਰਾਪਨੇ ਕਯਵਿਕ੍ਕਯੋ ਵਿਯ, ਤਾਦਿਸਮ੍ਪਿ ਪਰਭਣ੍ਡਂ ਇਧ ਵਤ੍ਥਧੋਵਨਾਦੀਸੁ ਨਤ੍ਥਿ, ਤਸ੍ਮਾ ਅਟ੍ਠਕਥਾਪਮਾਣੇਨੇਵੇਤ੍ਥ ਪਾਚਿਤ੍ਤਿਯਂ ਗਹੇਤਬ੍ਬਂ.

੫੯੭. ਪੁਞ੍ਞਂ ਭਵਿਸ੍ਸਤੀਤਿ ਦੇਤੀਤਿ ਏਤ੍ਥ ਸਚੇ ਭਿਕ੍ਖੁ ਅਤ੍ਤਨੋ ਭਣ੍ਡਸ੍ਸ ਅਪ੍ਪਗ੍ਘਤਂ ਞਤ੍ਵਾਪਿ ਅਕਥੇਤ੍ਵਾ ‘‘ਇਦਾਨੇਵ ਉਪਪਰਿਕ੍ਖਿਤ੍ਵਾ ਗਣ੍ਹ, ਮਾ ਪਚ੍ਛਾ ਵਿਪ੍ਪਟਿਸਾਰੀ ਹੋਹੀ’’ਤਿ ਵਦਤਿ, ਇਤਰੋ ਚ ਅਤ੍ਤਨੋ ਦਿਯ੍ਯਮਾਨਸ੍ਸ ਮਹਗ੍ਘਤਂ ਅਜਾਨਨ੍ਤੋ ‘‘ਊਨਂ ਵਾ ਅਧਿਕਂ ਵਾ ਤੁਮ੍ਹਾਕਮੇਵਾ’’ਤਿ ਦਤ੍ਵਾ ਗਚ੍ਛਤਿ, ਭਿਕ੍ਖੁਸ੍ਸ ਅਨਾਪਤ੍ਤਿ ਉਪਨਨ੍ਦਸ੍ਸ ਵਿਯ ਪਰਿਬ੍ਬਾਜਕਵਤ੍ਥੁਗ੍ਗਹਣੇ. ਵਿਪ੍ਪਟਿਸਾਰਿਸ੍ਸ ਪੁਨ ਸਕਸਞ੍ਞਾਯ ਆਗਤਸ੍ਸ ਯਂ ਅਧਿਕਂ ਗਹਿਤਂ, ਤਂ ਦਾਤਬ੍ਬਂ. ਯੇਨ ਯਂ ਪਰਿਵਤ੍ਤੇਤਿ, ਤੇਸਂ ਉਭਿਨ੍ਨਂ ਕਪ੍ਪਿਯਵਤ੍ਥੁਤਾ, ਅਸਹਧਮ੍ਮਿਕਤਾ, ਕਯਵਿਕ੍ਕਯਾਪਜ੍ਜਨਞ੍ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.

ਕਯਵਿਕ੍ਕਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤੋ ਕੋਸਿਯਵਗ੍ਗੋ ਦੁਤਿਯੋ.