੩. ਪਤ੍ਤਵਗ੍ਗੋ
੧. ਪਤ੍ਤਸਿਕ੍ਖਾਪਦਵਣ੍ਣਨਾ
੬੦੨. ਤਤਿਯਵਗ੍ਗਸ੍ਸ ਪਠਮੇ ਅਡ੍ਢਤੇਰਸਪਲਾਤਿ ਮਾਗਧਿਕਾਯ ਮਾਨਤੁਲਾਯ ਅਡ੍ਢਤੇਰਸਪਲਪਰਿਮਿਤਂ ਉਦਕਂ ਗਣ੍ਹਨ੍ਤਂ ਸਨ੍ਧਾਯ ਵੁਤ੍ਤਂ, ਤਥਾ ਪਰਿਮਿਤਂ ਯਵਮਾਸਾਦਿਂ ਗਣ੍ਹਨ੍ਤਿਂ ਸਨ੍ਧਾਯਾਤਿ ਕੇਚਿ. ਆਚਰਿਯਧਮ੍ਮਪਾਲਤ੍ਥੇਰੇਨ ਪਨ ‘‘ਪਕਤਿਚਤੁਮੁਟ੍ਠਿਕਂ ਕੁਡੁਵਂ, ਚਤੁਕੁਡੁਵਂ ਨਾਲ਼ਿ, ਤਾਯ ਨਾਲ਼ਿਯਾ ਸੋਲ਼ਸ ਨਾਲ਼ਿਯੋ ਦੋਣਂ, ਤਂ ਪਨ ਮਗਧਨਾਲ਼ਿਯਾ ਦ੍ਵਾਦਸ ਨਾਲ਼ਿਯੋ ਹੋਨ੍ਤੀਤਿ ਵਦਨ੍ਤੀ’’ਤਿ ਵੁਤ੍ਤਂ. ਦਮਿਲ਼ਨਾਲ਼ੀਤਿ ਪੁਰਾਣਨਾਲ਼ਿਂ ਸਨ੍ਧਾਯ ਵੁਤ੍ਤਂ. ਸਾ ਚ ਚਤੁਮੁਟ੍ਠਿਕੇਹਿ ਕੁਡੁਵੇਹਿ ਅਟ੍ਠ ਕੁਡੁਵਾ, ਤਾਯ ਨਾਲ਼ਿਯਾ ਦ੍ਵੇ ਨਾਲ਼ਿਯੋ ਮਗਧਨਾਲ਼ਿਂ ਗਣ੍ਹਾਤਿ. ਪੁਰਾਣਾ ਪਨ ‘‘ਸੀਹਲ਼ਨਾਲ਼ਿ ਤਿਸ੍ਸੋ ਨਾਲ਼ਿਯੋ ਗਣ੍ਹਾਤੀ’’ਤਿ ਵਦਨ੍ਤਿ, ਤੇਸਂ ਮਤੇਨ ਮਗਧਨਾਲ਼ਿ ਇਦਾਨਿ ਪਵਤ੍ਤਮਾਨਾਯ ਚਤੁਕੁਡੁਵਾਯ ਦਮਿਲ਼ਨਾਲ਼ਿਯਾ ਚਤੁਨਾਲ਼ਿਕਾ ਹੋਤਿ, ਤਤੋ ਮਗਧਨਾਲ਼ਿਤੋ ਉਪਡ੍ਢਞ੍ਚ ਪੁਰਾਣਦਮਿਲ਼ਨਾਲ਼ਿਸਙ੍ਖਾਤਂ ਪਤ੍ਥਂ ਨਾਮ ਹੋਤਿ, ਏਤੇਨ ਚ ‘‘ਓਮਕੋ ਨਾਮ ਪਤ੍ਤੋ ਪਤ੍ਥੋਦਨਂ ਗਣ੍ਹਾਤੀ’’ਤਿ ਪਾਲ਼ਿਵਚਨਞ੍ਚ ਸਮੇਤਿ, ਲੋਕਿਯੇਹਿਪਿ –
‘‘ਲੋਕਿਯਂ ਮਗਧਞ੍ਚੇਤਿ, ਪਤ੍ਥਦ੍ਵਯਮੁਦਾਹਟਂ;
ਲੋਕਿਯਂ ਸੋਲ਼ਸਪਲਂ, ਮਾਗਧਂ ਦਿਗੁਣਂ ਮਤ’’ਨ੍ਤਿ. –
ਏਵਂ ਲੋਕੇ ਨਾਲ਼ਿਯਾ ਮਗਧਨਾਲ਼ਿ ਦਿਗੁਣਾਤਿ ਦਸ੍ਸਿਤਾ, ਏਵਞ੍ਚ ਗਯ੍ਹਮਾਨੇ ਓਮਕਪਤ੍ਤਸ੍ਸ ਚ ਯਾਪਨਮਤ੍ਤੋਦਨਗਾਹਿਕਾ ਚ ਸਿਦ੍ਧਾ ਹੋਤਿ. ਨ ਹਿ ਸਕ੍ਕਾ ਅਟ੍ਠਕੁਡੁਵਤੋ ਊਨੋਦਨਗਾਹਿਨਾ ਪਤ੍ਤੇਨ ਅਥੂਪੀਕਤਂ ਪਿਣ੍ਡਪਾਤਂ ਪਰਿਯੇਸਿਤ੍ਵਾ ਯਾਪੇਤੁਂ. ਤੇਨੇਵ ਵੇਰਞ੍ਜਕਣ੍ਡਟ੍ਠਕਥਾਯਂ ‘‘ਪਤ੍ਥੋ ਨਾਮ ਨਾਲ਼ਿਮਤ੍ਤਂ ਹੋਤਿ ਏਕਸ੍ਸ ਪੁਰਿਸਸ੍ਸ ਅਲਂ ਯਾਪਨਾਯ. ਵੁਤ੍ਤਮ੍ਪਿ ਹੇਤਂ ‘ਪਤ੍ਥੋਦਨੋ ਨਾਲਮਯਂ ਦੁਵਿਨ੍ਨ’’’ਨ੍ਤਿ (ਜਾ. ੨.੨੧.੧੯੨) ਵੁਤ੍ਤਂ, ‘‘ਏਕੇਕਸ੍ਸ ਦ੍ਵਿਨ੍ਨਂ ਤਿਣ੍ਣਂ ਪਹੋਤੀ’’ਤਿ ਚ ਆਗਹਂ, ਤਸ੍ਮਾ ਇਧ ਵੁਤ੍ਤਨਯਾਨੁਸਾਰੇਨੇਵ ਗਹੇਤਬ੍ਬਂ.
ਆਲੋਪਸ੍ਸ ਅਨੁਰੂਪਨ੍ਤਿ ਏਤ੍ਥ ‘‘ਬ੍ਯਞ੍ਜਨਸ੍ਸ ਮਤ੍ਤਾ ਨਾਮ ਓਦਨਤੋ ਚਤੁਤ੍ਥਭਾਗੋ’’ਤਿ (ਮ. ਨਿ. ਅਟ੍ਠ. ੨.੩੮੭) ਬ੍ਰਹ੍ਮਾਯੁਸੁਤ੍ਤਟ੍ਠਕਥਾਯਂ ਵੁਤ੍ਤਤ੍ਤਾ ਆਲੋਪਸ੍ਸ ਚਤੁਤ੍ਥਭਾਗਮੇਵ ਬ੍ਯਞ੍ਜਨਂ ਅਨੁਰੂਪਨ੍ਤਿ ਦਟ੍ਠਬ੍ਬਂ. ਓਦਨਗਤਿਕਾਨੇਵਾਤਿ ਓਦਨਸ੍ਸ ਅਨ੍ਤੋ ਏਵ ਪਵਿਸਨਸੀਲਾਨਿ ਸਿਯੁਂ, ਅਤ੍ਤਨੋ ਓਕਾਸਂ ਨ ਗਵੇਸਨ੍ਤੀਤਿ ਅਤ੍ਥੋ. ਨਾਮਮਤ੍ਤੇਤਿ ‘‘ਮਜ੍ਝਿਮੋ ਪਤ੍ਤੋ ਮਜ੍ਝਿਮੋਮਕੋ’’ਤਿਆਦਿਨਾਮਮਤ੍ਤੇ.
੬੦੭-੮. ਏਵਂ ਪਯੋਗੇ ਪਯੋਗੇਤਿ ਪਰਿਯੋਸਾਨਾਲੋਪਜ੍ਝੋਹਰਣਪਯੋਗੇ ਪਯੋਗੇ, ਆਲੋਪੇ ਆਲੋਪੇਤਿ ਅਤ੍ਥੋ. ਕਤ੍ਵਾਤਿ ਪਾਕਪਰਿਯੋਸਾਨਂ ਕਤ੍ਵਾ. ਪਚਿਤ੍ਵਾ ਠਪੇਸ੍ਸਾਮੀਤਿ ਕਾਲ਼ਵਣ੍ਣਪਾਕਂ ਸਨ੍ਧਾਯ ਵੁਤ੍ਤਂ. ਛਿਦ੍ਦਨ੍ਤਿ ਮੁਖਵਟ੍ਟਿਤੋ ਦ੍ਵਙ੍ਗੁਲਸ੍ਸ ਹੇਟ੍ਠਾਛਿਦ੍ਦਂ ਵੁਤ੍ਤਂ. ਸੇਸਂ ਪਠਮਕਥਿਨੇ ਵੁਤ੍ਤਨਯਮੇਵ.
ਪਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੨. ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ
੬੦੯-੬੧੩. ਦੁਤਿਯੇ ਪਾਲ਼ਿਯਂ ਅਹਂ ਪਤ੍ਤੇਨ ਤੇ ਭਿਕ੍ਖੂ ਸਨ੍ਤਪੇਸ੍ਸਾਮੀਤਿ ਸੇਸੋ. ‘‘ਅਪਤ੍ਤੋ’’ਤਿ ਇਮਿਨਾ ਅਧਿਟ੍ਠਾਨਵਿਜਹਨਮ੍ਪਿ ਦਸ੍ਸੇਤਿ. ਪਞ੍ਚਬਨ੍ਧਨੇਪਿ ਪਤ੍ਤੇ ਅਪਰਿਪੁਣ੍ਣਪਾਕੇ ਪਤ੍ਤੇ ਵਿਯ ਅਧਿਟ੍ਠਾਨਂ ਨ ਰੁਹਤਿ. ‘‘ਤਿਪੁਪਟ੍ਟਕੇਨ ਵਾ’’ਤਿ ਵੁਤ੍ਤਤ੍ਤਾ ਤਮ੍ਬਲੋਹਾਦੀਹਿ ਕਪ੍ਪਿਯਲੋਹੇਹਿ ਅਯੋਪਤ੍ਤਸ੍ਸ ਛਿਦ੍ਦਂ ਛਾਦੇਤੁਂ ਵਟ੍ਟਤਿ. ਤੇਨੇਵ ‘‘ਲੋਹਮਣ੍ਡਲਕੇਨਾ’’ਤਿ ਵੁਤ੍ਤਂ. ਇਮਸ੍ਮਿਂ ਸਿਕ੍ਖਾਪਦੇ ਅਕਾਲ਼ਵਣ੍ਣਮ੍ਪਿ ਕਪ੍ਪਿਯਪਤ੍ਤਂ ਵਿਞ੍ਞਾਪੇਨ੍ਤਸ੍ਸ ਆਪਤ੍ਤਿ ਏਵਾਤਿ ਦਟ੍ਠਬ੍ਬਂ. ਅਧਿਟ੍ਠਾਨੁਪਗਪਤ੍ਤਸ੍ਸ ਊਨਪਞ੍ਚਬਨ੍ਧਨਤਾ, ਅਤ੍ਤੁਦ੍ਦੇਸਿਕਤਾ, ਅਕਤਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.
ਊਨਪਞ੍ਚਬਨ੍ਧਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੩. ਭੇਸਜ੍ਜਸਿਕ੍ਖਾਪਦਵਣ੍ਣਨਾ
੬੧੮-੬੨੧. ਤਤਿਯੇ ਪਾਲ਼ਿਯਂ ਪਿਲਿਨ੍ਦਵਚ੍ਛਤ੍ਥੇਰੇਨ ‘‘ਨ ਖੋ, ਮਹਾਰਾਜ, ਭਗਵਤਾ ਆਰਾਮਿਕੋ ਅਨੁਞ੍ਞਾਤੋ’’ਤਿ ਪਠਮਂ ਪਟਿਕ੍ਖਿਪਿਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਆਰਾਮਿਕ’’ਨ੍ਤਿ ਪੁਗ੍ਗਲਾਨਮ੍ਪਿ ਆਰਾਮਿਕਨਾਮੇਨ ਦਾਸਗ੍ਗਹਣੇ ਅਨੁਞ੍ਞਾਤੇ ਏਵ ਆਰਾਮਿਕਾਨਂ ਗਹਿਤਤ੍ਤਾ ਖੇਤ੍ਤਵਤ੍ਥਾਦੀਨਿ ਕਪ੍ਪਿਯਵੋਹਾਰੇਨਪਿ ਪੁਗ੍ਗਲਾਨਂ ਗਹੇਤੁਂ ਨ ਵਟ੍ਟਤਿ, ਤਥਾ ਅਨਨੁਞ੍ਞਾਤਤ੍ਤਾਤਿ ਵਿਞ੍ਞਾਯਤਿ. ‘‘ਖੇਤ੍ਤਵਤ੍ਥੁਪਟਿਗ੍ਗਹਣਾ ਪਟਿਵਿਰਤੋ ਹੋਤੀ’’ਤਿਆਦਿਨਾ (ਦੀ. ਨਿ. ੧.੧੦, ੧੯੪) ਹਿ ਪਟਿਕ੍ਖਿਤ੍ਤੇਸੁ ਏਕਸ੍ਸੇਵ ਪੁਗ੍ਗਲਿਕਵਸੇਨ ਗਹਣੇ ਅਨੁਞ੍ਞਾਤੇ ਇਤਰੀਤਰਾਨਂ ਤਥਾ ਨ ਗਹੇਤਬ੍ਬਤਾ ਸਿਦ੍ਧਾਵ ਹੋਤਿ. ਯਞ੍ਚ ਪਿਲਿਨ੍ਦਵਚ੍ਛਤ੍ਥੇਰੇਨ ਦਾਯਕਕੁਲਸ੍ਸ ਦਾਰਿਕਾਯ ਸੁਵਣ੍ਣਮਾਲਾਵਸੇਨ ਤਿਣਣ੍ਡੁਪਕਸ੍ਸ ਨਿਮ੍ਮਾਨਂ, ਤਂ ‘‘ਅਨਾਪਤ੍ਤਿ, ਭਿਕ੍ਖਵੇ, ਇਦ੍ਧਿਮਸ੍ਸ ਇਦ੍ਧਿਵਿਸਯੇ’’ਤਿ (ਪਾਰਾ. ੧੫੯) ਵਚਨਤੋ ਕੁਲਸਙ੍ਗਹਾਦਿ ਨ ਹੋਤੀਤਿ ਕਤਨ੍ਤਿ ਦਟ੍ਠਬ੍ਬਂ, ਕੇਚਿ ਪਨ ‘‘ਖੀਣਾਸਵਾਨਂ ਲਾਭਿਚ੍ਛਾਯ ਅਭਾਵਤੋ ਕੁਲਸਙ੍ਗਹੇਪਿ ਆਜੀਵਕੋਪੋ ਨਤ੍ਥੀ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਖੀਣਾਸਵਾਨਮ੍ਪਿ ਆਜੀਵਵਿਪਤ੍ਤਿਹੇਤੂਨਂ ਪਿਣ੍ਡਪਾਤਾਦੀਨਂ ਪਰਿਵਜ੍ਜੇਤਬ੍ਬਤੋ. ਵੁਤ੍ਤਞ੍ਹਿ ਧਮ੍ਮਸੇਨਾਪਤਿਨਾ ‘‘ਨੇਵ ਭਿਨ੍ਦੇਯ੍ਯਮਾਜੀਵਂ, ਚਜਮਾਨੋਪਿ ਜੀਵਿਤ’’ਨ੍ਤਿ (ਮਿ. ਪ. ੬.੧.੫). ਭਗਵਤਾ ਚ ‘‘ਗਾਥਾਭਿਗੀਤਂ ਮੇ ਅਭੋਜਨੀਯ’’ਨ੍ਤਿਆਦਿ ਵੁਤ੍ਤਂ (ਸੁ. ਨਿ. ੮੧, ੪੮੪; ਮਿ. ਪ. ੪.੫.੯; ਸਂ. ਨਿ. ੧.੧੯੭).
੬੨੨. ਉਗ੍ਗਹਿਤਕਨ੍ਤਿ ਪਰਿਭੋਗਤ੍ਥਾਯ ਸਯਂ ਗਹਿਤਂ. ਸਯਂ ਕਰੋਤੀਤਿ ਪਚਿਤ੍ਵਾ ਕਰੋਤਿ. ਪੁਰੇਭਤ੍ਤਨ੍ਤਿ ਤਦਹੁਪੁਰੇਭਤ੍ਤਮੇਵ ਵਟ੍ਟਤਿ ਸਵਤ੍ਥੁਕਪਟਿਗ੍ਗਹਿਤਤ੍ਤਾ. ਸਯਂਕਤਨ੍ਤਿ ਖੀਰਨਵਨੀਤਂ ਪਚਿਤ੍ਵਾ ਕਤਂ. ਨਿਰਾਮਿਸਮੇਵਾਤਿ ਤਦਹੁਪੁਰੇਭਤ੍ਤਂ ਸਨ੍ਧਾਯ ਵੁਤ੍ਤਂ. ਅਜ੍ਜ ਸਯਂਕਤਂ ਨਿਰਾਮਿਸਮੇਵ ਭੁਞ੍ਜਨ੍ਤਸ੍ਸ ਕਸ੍ਮਾ ਸਾਮਪਾਕੋ ਨ ਹੋਤੀਤਿ ਆਹ ‘‘ਨਵਨੀਤਂ ਤਾਪੇਨ੍ਤਸ੍ਸਾ’’ਤਿਆਦਿ. ਪਟਿਗ੍ਗਹਿਤੇਹੀਤਿ ਖੀਰਦਧੀਨਿ ਸਨ੍ਧਾਯ ਵੁਤ੍ਤਂ. ਉਗ੍ਗਹਿਤਕੇਹਿ ਕਤਂ ਅਬ੍ਭਞ੍ਜਨਾਦੀਸੁ ਉਪਨੇਤਬ੍ਬਨ੍ਤਿ ਯੋਜਨਾ. ਏਸੇਵ ਨਯੋਤਿ ਨਿਸ੍ਸਗ੍ਗਿਯਾਪਤ੍ਤਿਂ ਸਨ੍ਧਾਯ ਵੁਤ੍ਤਂ. ਅਕਪ੍ਪਿਯਮਂਸਸਪ੍ਪਿਮ੍ਹੀਤਿ ਹਤ੍ਥਿਆਦੀਨਂ ਸਪ੍ਪਿਮ੍ਹਿ.
ਏਤ੍ਥ ਪਨਾਤਿ ਨਵਨੀਤੇ ਵਿਸੇਸੋ ਅਤ੍ਥੀਤਿ ਅਤ੍ਥੋ. ਧੋਤਂ ਵਟ੍ਟਤੀਤਿ ਧੋਤਮੇਵ ਪਟਿਗ੍ਗਹਿਤੁਮ੍ਪਿ ਨ ਵਟ੍ਟਤਿ, ਇਤਰਥਾ ਸਵਤ੍ਥੁਕਪਟਿਗ੍ਗਹਿਤਂ ਹੋਤੀਤਿ ਥੇਰਾਨਂ ਅਧਿਪ੍ਪਾਯੋ.
ਮਹਾਸਿਵਤ੍ਥੇਰਸ੍ਸ ਪਨ ਵਤ੍ਥੁਨੋ ਵਿਯੋਜਿਤਤ੍ਤਾ ਦਧਿਗੁਲ਼ਿਕਾਦੀਹਿ ਯੁਤ੍ਤਤਾਮਤ੍ਤੇਨ ਸਵਤ੍ਥੁਕਪਟਿਗ੍ਗਹਿਤਂ ਨਾਮ ਨ ਹੋਤਿ, ਤਸ੍ਮਾ ਤਕ੍ਕਤੋ ਉਦ੍ਧਟਮਤ੍ਤਮੇਵ ਪਟਿਗ੍ਗਹੇਤ੍ਵਾ ਧੋਵਿਤ੍ਵਾ, ਪਚਿਤ੍ਵਾ ਵਾ ਨਿਰਾਮਿਸਮੇਵ ਕਤ੍ਵਾ ਪਰਿਭੁਞ੍ਜਿਂਸੂਤਿ ਅਧਿਪ੍ਪਾਯੋ, ਨ ਪਨ ਦਧਿਗੁਲ਼ਿਕਾਦੀਹਿ ਸਹ ਵਿਕਾਲੇ ਭੁਞ੍ਜਿਂਸੁ. ਤੇਨਾਹ ‘‘ਤਸ੍ਮਾ ਨਵਨੀਤਂ ਪਰਿਭੁਞ੍ਜਨ੍ਤੇਨ…ਪੇ… ਸਵਤ੍ਥੁਕਪਟਿਗ੍ਗਹਿਤਂ ਨਾਮ ਨ ਹੋਤੀ’’ਤਿ. ਤਤ੍ਥ ਅਧੋਤਂ ਪਟਿਗ੍ਗਹੇਤ੍ਵਾਪਿ ਤਂ ਨਵਨੀਤਂ ਪਰਿਭੁਞ੍ਜਨ੍ਤੇਨ ਦਧਿਆਦੀਨਿ ਅਪਨੇਤ੍ਵਾ ਪਰਿਭੁਞ੍ਜਿਤਬ੍ਬਨ੍ਤਿ ਅਤ੍ਥੋ. ਖਯਂ ਗਮਿਸ੍ਸਤੀਤਿ ਨਿਰਾਮਿਸਂ ਹੋਤਿ, ਤਸ੍ਮਾ ਵਿਕਾਲੇਪਿ ਵਟ੍ਟਤੀਤਿ ਅਤ੍ਥੋ. ਏਤ੍ਤਾਵਤਾਤਿ ਨਵਨੀਤੇ ਲਗ੍ਗਮਤ੍ਤੇਨ ਵਿਸੁਂ ਦਧਿਆਦਿਵੋਹਾਰਂ ਅਲਦ੍ਧੇਨ ਅਪ੍ਪਮਤ੍ਤੇਨ ਦਧਿਆਦਿਨਾਤਿ ਅਤ੍ਥੋ, ਏਤੇਨ ਵਿਸੁਂ ਪਟਿਗ੍ਗਹਿਤਦਧਿਆਦੀਹਿ ਸਹ ਪਕ੍ਕਂ ਸਵਤ੍ਥੁਕਪਟਿਗ੍ਗਹਿਤਸਙ੍ਖ੍ਯਮੇਵ ਗਚ੍ਛਤੀਤਿ ਦਸ੍ਸੇਤਿ. ਤਸ੍ਮਿਮ੍ਪੀਤਿ ਨਿਰਾਮਿਸਭੂਤੇਪਿ. ਕੁਕ੍ਕੁਚ੍ਚਕਾਨਂ ਪਨ ਅਯਂ ਅਧਿਪ੍ਪਾਯੋ – ਪਟਿਗ੍ਗਹਣੇ ਤਾਵ ਦਧਿਆਦੀਹਿ ਅਸਮ੍ਭਿਨ੍ਨਰਸਤ੍ਤਾ ਭਤ੍ਤੇਨ ਸਹਿਤੇਨ ਗੁਲ਼ਪਿਣ੍ਡਾਦਿ ਵਿਯ ਸਵਤ੍ਥੁਕਪਟਿਗ੍ਗਹਿਤਂ ਨਾਮ ਨ ਹੋਤਿ, ਤਂ ਪਨ ਪਚਨ੍ਤੇਨ ਧੋਵਿਤ੍ਵਾਵ ਪਚਿਤਬ੍ਬਂ, ਇਤਰਥਾ ਪਚਨਕ੍ਖਣੇ ਪਚ੍ਚਮਾਨਦਧਿਗੁਲ਼ਿਕਾਦੀਹਿ ਸਮ੍ਭਿਨ੍ਨਰਸਤਾਯ ਸਾਮਂਪਕ੍ਕਂ ਜਾਤਂ, ਤੇਸੁ ਖੀਣੇਸੁ ਸਾਮਂਪਕ੍ਕਮੇਵ ਹੋਤਿ, ਤਸ੍ਮਾ ਨਿਰਾਮਿਸਮੇਵ ਪਚਿਤਬ੍ਬਨ੍ਤਿ. ਤੇਨੇਵ ‘‘ਆਮਿਸੇਨ ਸਹ ਪਕ੍ਕਤ੍ਤਾ’’ਤਿ ਕਾਰਣਂ ਵੁਤ੍ਤਂ.
ਏਤ੍ਥ ਚਾਯਂ ਵਿਚਾਰਣਾ – ਸਵਤ੍ਥੁਕਪਟਿਗ੍ਗਹਿਤਤ੍ਤਾਭਾਵੇ ਆਮਿਸੇਨ ਸਹ ਭਿਕ੍ਖੁਨਾ ਪਕ੍ਕਸ੍ਸ ਸਯਂਪਾਕਦੋਸੋ ਵਾ ਪਰਿਸਙ੍ਕੀਯਤਿ ਯਾਵਕਾਲਿਕਤਾ ਵਾ, ਤਤ੍ਥ ਨ ਤਾਵ ਸਯਂਪਾਕਦੋਸੋ ਏਤ੍ਥ ਸਮ੍ਭਵਤਿ ਸਤ੍ਤਾਹਕਾਲਿਕਤ੍ਤਾ. ਯਞ੍ਹਿ ਤਤ੍ਥ ਦਧਿਆਦਿ ਆਮਿਸਗਤਂ, ਤਂ ਪਰਿਕ੍ਖੀਣਨ੍ਤਿ. ਅਥ ਪਟਿਗ੍ਗਹਿਤਦਧਿਗੁਲ਼ਿਕਾਦਿਨਾ ਸਹ ਅਤ੍ਤਨਾ ਪਕ੍ਕਤ੍ਤਾ ਸਵਤ੍ਥੁਕਪਕ੍ਕਂ ਵਿਯ ਭਵੇਯ੍ਯਾਤਿ ਪਰਿਸਙ੍ਕੀਯਤਿ, ਤਦਾ ਆਮਿਸੇਨ ਸਹ ਪਟਿਗ੍ਗਹਿਤਤ੍ਤਾਤਿ ਕਾਰਣਂ ਵਤ੍ਤਬ੍ਬਂ, ਨ ਪਨ ਪਕ੍ਕਤ੍ਤਾਤਿ. ਤਥਾ ਚ ਉਪਡ੍ਢਤ੍ਥੇਰਾਨਂ ਮਤਮੇਵ ਅਙ੍ਗੀ ਕਤਂ ਸਿਯਾ. ਤਤ੍ਥ ਚ ਸਾਮਣੇਰਾਦੀਹਿ ਪਕ੍ਕਮ੍ਪਿ ਯਾਵਕਾਲਿਕਮੇਵ ਸਿਯਾ ਪਟਿਗ੍ਗਹਿਤਖੀਰਾਦਿਂ ਪਚਿਤ੍ਵਾ ਅਨੁਪਸਮ੍ਪਨ੍ਨੇਹਿ ਕਤਸਪ੍ਪਿਆਦਿ ਵਿਯ ਚ, ਨ ਚ ਤਂ ਯੁਤ੍ਤਂ, ਭਿਕ੍ਖਾਚਾਰੇਨ ਲਦ੍ਧਨਵਨੀਤਾਦੀਨਂ ਤਕ੍ਕਾਦਿਆਮਿਸਸਂਸਗ੍ਗਸਮ੍ਭਵੇਨ ਅਪਰਿਭੁਞ੍ਜਿਤਬ੍ਬਤਾਪਸਙ੍ਗਤੋ. ਨ ਹਿ ਗਹਟ੍ਠਾ ਧੋਵਿਤ੍ਵਾ, ਸੋਧੇਤ੍ਵਾ ਵਾ ਪਤ੍ਤੇ ਆਕਿਰਨ੍ਤੀਤਿ ਨਿਯਮੋ ਅਤ੍ਥਿ, ਅਟ੍ਠਕਥਾਯਞ੍ਚ ‘‘ਯਥਾ ਤਤ੍ਥ ਪਤਿਤਤਣ੍ਡੁਲਕਣਾਦਯੋ ਨ ਪਚ੍ਚਨ੍ਤਿ, ਏਵਂ…ਪੇ… ਪੁਨ ਪਚਿਤ੍ਵਾ ਦੇਤਿ, ਪੁਰਿਮਨਯੇਨੇਵ ਸਤ੍ਤਾਹਂ ਵਟ੍ਟਤੀ’’ਤਿ ਇਮਿਨਾ ਵਚਨੇਨਪੇਤਂ ਵਿਰੁਜ੍ਝਤਿ, ਤਸ੍ਮਾ ਇਧ ਕੁਕ੍ਕੁਚ੍ਚਕਾਨਂ ਕੁਕ੍ਕੁਚ੍ਚੁਪ੍ਪਤ੍ਤਿਯਾ ਨਿਮਿਤ੍ਤਮੇਵ ਨ ਦਿਸ੍ਸਤਿ. ਯਥਾ ਚੇਤ੍ਥ, ਏਵਂ ‘‘ਲਜ੍ਜੀ ਸਾਮਣੇਰੋ ਯਥਾ ਤਤ੍ਥ ਪਤਿਤਤਣ੍ਡੁਲਕਣਾਦਯੋ ਨ ਪਚ੍ਚਨ੍ਤਿ, ਏਵਂ ਸਾਮਿਸਪਾਕਂ ਮੋਚੇਨ੍ਤੋ ਅਗ੍ਗਿਮ੍ਹਿ ਵਿਲੀਯਾਪੇਤ੍ਵਾ…ਪੇ… ਵਟ੍ਟਤੀ’’ਤਿ ਵਚਨਸ੍ਸਾਪਿ ਨਿਮਿਤ੍ਤਂ ਨ ਦਿਸ੍ਸਤਿ. ਯਦਿ ਹਿ ਏਤਂ ਯਾਵਕਾਲਿਕਸਂਸਗ੍ਗਪਰਿਹਾਰਾਯ ਵੁਤ੍ਤਂ ਸਿਯਾ, ਅਤ੍ਤਨਾਪਿ ਤਥਾ ਕਾਤਬ੍ਬਂ ਭਵੇਯ੍ਯ. ਗਹਟ੍ਠੇਹਿ ਦਿਨ੍ਨਸਪ੍ਪਿਆਦੀਸੁ ਚ ਆਮਿਸਸਂਸਗ੍ਗਸਙ੍ਕਾ ਨ ਵਿਗਚ੍ਛੇਯ੍ਯ. ਨ ਹਿ ਗਹਟ੍ਠਾ ਏਵਂ ਵਿਲੀਯਾਪੇਤ੍ਵਾ ਪਨ ਤਣ੍ਡੁਲਾਦਿਂ ਅਪਨੇਤ੍ਵਾ ਪੁਨ ਪਚਨ੍ਤਿ, ਅਪਿਚ ਭੇਸਜ੍ਜੇਹਿ ਸਦ੍ਧਿਂ ਖੀਰਾਦਿਂ ਪਕ੍ਖਿਪਿਤ੍ਵਾ ਯਥਾ ਖੀਰਾਦਿ ਖਯਂ ਗਚ੍ਛਤਿ, ਏਵਂ ਪਰੇਹਿ ਪਕ੍ਕਭੇਸਜ੍ਜਤੇਲਾਦਿਪਿ ਯਾਵਕਾਲਿਕਮੇਵ ਸਿਯਾ, ਨ ਚ ਤਮ੍ਪਿ ਯੁਤ੍ਤਂ ਦਧਿਆਦਿਖਯਕਰਣਤ੍ਥਂ ‘‘ਪੁਨ ਪਚਿਤ੍ਵਾ ਦੇਤੀ’’ਤਿ ਵੁਤ੍ਤਤ੍ਤਾ. ਤਸ੍ਮਾ ਮਹਾਸਿਵਤ੍ਥੇਰਵਾਦੇ ਕੁਕ੍ਕੁਚ੍ਚਂ ਅਕਤ੍ਵਾ ਅਧੋਤਮ੍ਪਿ ਨਵਨੀਤਂ ਤਦਹੁਪਿ ਪੁਨਦਿਵਸਾਦੀਸੁਪਿ ਪਚਿਤੁਂ, ਤਣ੍ਡੁਲਾਦਿਮਿਸ੍ਸਂ ਸਪ੍ਪਿਆਦਿਂ ਅਤ੍ਤਨਾਪਿ ਅਗ੍ਗਿਮ੍ਹਿ ਵਿਲੀਯਾਪੇਤ੍ਵਾ ਪਰਿਸ੍ਸਾਵੇਤ੍ਵਾ ਪੁਨ ਤਕ੍ਕਾਦਿਖਯਤ੍ਥਂ ਪਚਿਤੁਞ੍ਚ ਵਟ੍ਟਤਿ.
ਤਤ੍ਥ ਵਿਜ੍ਜਮਾਨਸ੍ਸਪਿ ਪਚ੍ਚਮਾਨਕ੍ਖਣੇ ਸਮ੍ਭਿਨ੍ਨਰਸਸ੍ਸ ਯਾਵਕਾਲਿਕਸ੍ਸ ਅਬ੍ਬੋਹਾਰਿਕਤ੍ਤੇਨ ਸਵਤ੍ਥੁਕਪਟਿਗ੍ਗਹਿਤਪੁਰੇਪਟਿਗ੍ਗਹਿਤਾਨਮ੍ਪਿ ਅਬ੍ਬੋਹਾਰਿਕਤੋਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਨ੍ਤਿ. ਤੇਨੇਵ ‘‘ਏਤ੍ਤਾਵਤਾ ਸਵਤ੍ਥੁਕਪਟਿਗ੍ਗਹਿਤਂ ਨਾਮ ਨ ਹੋਤੀ’’ਤਿ ਵੁਤ੍ਤਂ. ਵਿਸੁਂ ਪਟਿਗ੍ਗਹਿਤੇਨ ਪਨ ਖੀਰਾਦਿਆਮਿਸੇਨ ਨਵਨੀਤਾਦਿਂ ਮਿਸ੍ਸੇਤ੍ਵਾ ਭਿਕ੍ਖੁਨਾ ਵਾ ਅਞ੍ਞੇਹਿ ਵਾ ਪਕ੍ਕਤੇਲਾਦਿਭੇਸਜ੍ਜਂ ਸਵਤ੍ਥੁਕਪਟਿਗ੍ਗਹਿਤਸਙ੍ਖ੍ਯਮੇਵ ਗਚ੍ਛਤਿ, ਤਤ੍ਥ ਪਵਿਟ੍ਠਯਾਵਕਾਲਿਕਸ੍ਸ ਅਬ੍ਬੋਹਾਰਿਕਤ੍ਤਾਭਾਵਾ. ਯਂ ਪਨ ਪੁਰੇਪਰਿਗ੍ਗਹਿਤਭੇਸਜ੍ਜੇਹਿ ਅਪ੍ਪਟਿਗ੍ਗਹਿਤਂ ਖੀਰਾਦਿਂ ਪਕ੍ਖਿਪਿਤ੍ਵਾ ਪਕ੍ਕਤੇਲਾਦਿਕਂ ਅਨੁਪਸਮ੍ਪਨ੍ਨੇਹੇਵ ਪਕ੍ਕਮ੍ਪਿ ਸਵਤ੍ਥੁਕਪਟਿਗ੍ਗਹਿਤਮ੍ਪਿ ਸਨ੍ਨਿਧਿਪਿ ਨ ਹੋਤਿ, ਤਤ੍ਥ ਪਕ੍ਖਿਤ੍ਤਖੀਰਾਦਿਕਸ੍ਸਪਿ ਤਸ੍ਮਿਂ ਖਣੇ ਸਮ੍ਭਿਨ੍ਨਰਸਤਾਯ ਪੁਰੇਪਟਿਗ੍ਗਹਿਤਤ੍ਤਾਪਤ੍ਤਿਤੋ. ਸਚੇ ਪਨ ਅਪ੍ਪਟਿਗ੍ਗਹਿਤੇਹੇਵ, ਅਞ੍ਞੇਹਿ ਵਾ ਪਕ੍ਕਤੇਲਾਦੀਸੁਪਿ ਸਚੇ ਆਮਿਸਰਸੋ ਪਞ੍ਞਾਯਤਿ, ਤਂ ਯਾਵਕਾਲਿਕਮੇਵ ਹੋਤੀਤਿ ਵੇਦਿਤਬ੍ਬਂ. ਉਗ੍ਗਹੇਤ੍ਵਾਤਿ ਸਯਮੇਵ ਗਹੇਤ੍ਵਾ.
ਪਰਿਸ੍ਸਾਵੇਤ੍ਵਾ ਗਹਿਤਨ੍ਤਿ ਤਣ੍ਡੁਲਾਦਿਵਿਗਮਤ੍ਥਂ ਪਰਿਸ੍ਸਾਵੇਤ੍ਵਾ, ਤਕ੍ਕਾਦਿਵਿਗਮਤ੍ਥਂ ਪੁਨ ਪਚਿਤ੍ਵਾ ਗਹਿਤਨ੍ਤਿ ਅਤ੍ਥੋ. ਪਟਿਗ੍ਗਹੇਤ੍ਵਾ ਠਪਿਤਭੇਸਜ੍ਜੇਹੀਤਿ ਅਤਿਰੇਕਸਤ੍ਤਾਹਪਟਿਗ੍ਗਹਿਤੇਹਿ, ਏਤੇਨ ਤੇਹਿ ਯੁਤ੍ਤਮ੍ਪਿ ਸਪ੍ਪਿਆਦਿ ਅਤਿਰੇਕਸਤ੍ਤਾਹਪਟਿਗ੍ਗਹਿਤਂ ਨ ਹੋਤੀਤਿ ਦਸ੍ਸੇਤਿ. ਵਦ੍ਦਲਿਸਮਯੇਤਿ ਵਸ੍ਸਕਾਲਸਮਯੇ, ਅਨਾਤਪਕਾਲੇਤਿ ਅਤ੍ਥੋ.
ਨਿਬ੍ਬਟ੍ਟਿਤਤ੍ਤਾਤਿ ਯਾਵਕਾਲਿਕਵਤ੍ਥੁਤੋ ਵਿਵੇਚਿਤਤ੍ਤਾ, ਏਤੇਨ ਤੇਲੇ ਸਭਾਵਤੋ ਯਾਵਕਾਲਿਕਤ੍ਤਾਭਾਵਂ, ਭਿਕ੍ਖੁਨੋ ਸਵਤ੍ਥੁਕਪਟਿਗ੍ਗਹਣੇਨ ਯਾਵਕਾਲਿਕਤ੍ਤੁਪਗਮਨਞ੍ਚ ਦਸ੍ਸੇਤਿ. ਉਭਯਮ੍ਪੀਤਿ ਅਤ੍ਤਨਾ, ਅਞ੍ਞੇਹਿ ਚ ਕਤਂ.
੬੨੩. ਅਚ੍ਛਵਸਨ੍ਤਿ ਦੁਕ੍ਕਟਵਤ੍ਥੂਨਞ੍ਞੇਵ ਉਪਲਕ੍ਖਣਨ੍ਤਿ ਆਹ ‘‘ਠਪੇਤ੍ਵਾ ਮਨੁਸ੍ਸਵਸ’’ਨ੍ਤਿ. ਸਂਸਟ੍ਠਨ੍ਤਿ ਪਰਿਸ੍ਸਾਵਿਤਂ. ਤਿਣ੍ਣਂ ਦੁਕ੍ਕਟਾਨਨ੍ਤਿ ਅਜ੍ਝੋਹਾਰੇ ਅਜ੍ਝੋਹਾਰੇ ਤੀਣਿ ਦੁਕ੍ਕਟਾਨਿ ਸਨ੍ਧਾਯ ਵੁਤ੍ਤਂ. ਕਿਞ੍ਚਾਪਿ ਪਰਿਭੋਗਤ੍ਥਾਯ ਵਿਕਾਲੇ ਪਟਿਗ੍ਗਹਣਪਚਨਪਰਿਸ੍ਸਾਵਨਾਦੀਸੁ ਪੁਬ੍ਬਪਯੋਗੇਸੁ ਪਾਲ਼ਿਯਂ, ਅਟ੍ਠਕਥਾਯਞ੍ਚ ਆਪਤ੍ਤਿ ਨ ਵੁਤ੍ਤਾ, ਤਥਾਪਿ ਏਤ੍ਥ ਆਪਤ੍ਤਿਯਾ ਏਵ ਭਵਿਤਬ੍ਬਂ ਪਟਿਕ੍ਖਿਤ੍ਤਸ੍ਸ ਕਰਣਤੋ ਆਹਾਰਤ੍ਥਾਯ ਵਿਕਾਲੇ ਯਾਮਕਾਲਿਕਾਦੀਨਂ ਪਟਿਗ੍ਗਹਣੇ ਵਿਯ. ਯਸ੍ਮਾ ਖੀਰਾਦਿਂ ਪਕ੍ਖਿਪਿਤ੍ਵਾ ਪਕ੍ਕਭੇਸਜ੍ਜਤੇਲੇ ਕਸਟਂ ਆਮਿਸਗਤਿਕਂ, ਤੇਨ ਸਹ ਤੇਲਂ ਪਟਿਗ੍ਗਹੇਤੁਂ, ਪਚਿਤੁਂ ਵਾ ਭਿਕ੍ਖੁਨੋ ਨ ਵਟ੍ਟਤਿ. ਤਸ੍ਮਾ ਵੁਤ੍ਤਂ ‘‘ਪਕ੍ਕਤੇਲਕਸਟੇ ਵਿਯ ਕੁਕ੍ਕੁਚ੍ਚਾਯਤੀ’’ਤਿ. ਸਚੇ ਵਸਾਯ ਸਹ ਪਕ੍ਕਤ੍ਤਾ ਨ ਵਟ੍ਟਤਿ, ਇਦਂ ਕਸ੍ਮਾ ਨ ਵਟ੍ਟਤੀਤਿ ਪੁਚ੍ਛਨ੍ਤਾ ‘‘ਭਨ੍ਤੇ …ਪੇ… ਵਟ੍ਟਤੀ’’ਤਿ ਆਹਂਸੁ. ਥੇਰੋ ਅਤਿਕੁਕ੍ਕੁਚ੍ਚਤਾਯ ਚ ‘‘ਏਤਮ੍ਪਿ, ਆਵੁਸੋ, ਨ ਵਟ੍ਟਤੀ’’ਤਿ ਆਹ. ਰੋਗਨਿਗ੍ਗਹਤ੍ਥਾਯ ਏਵ ਵਸਾਯ ਅਨੁਞ੍ਞਾਤਤ੍ਤਂ ਸਲ੍ਲਕ੍ਖੇਤ੍ਵਾ ਪਚ੍ਛਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ.
‘‘ਮਧੁਕਰੀਹਿ ਨਾਮ ਮਧੁਮਕ੍ਖਿਕਾਹੀ’’ਤਿ ਇਦਂ ਖੁਦ੍ਦਕਭਮਰਾਨਂ ਦ੍ਵਿਨ੍ਨਂ ਏਵ ਵਿਸੇਸਨਨ੍ਤਿ ਕੇਚਿ ਵਦਨ੍ਤਿ, ਅਞ੍ਞੇ ਪਨ ‘‘ਦਣ੍ਡਕੇਸੁ ਮਧੁਕਾਰਿਕਾ ਮਧੁਕਰੀਮਕ੍ਖਿਕਾ ਨਾਮ, ਤਾਹਿ ਸਹ ਤਿਸ੍ਸੋ ਮਧੁਮਕ੍ਖਿਕਾਜਾਤਿਯੋ’’ਤਿ ਵਦਨ੍ਤਿ. ਭਮਰਮਕ੍ਖਿਕਾਤਿ ਮਹਾਪਟਲਕਾਰਿਕਾ. ਸਿਲੇਸਸਦਿਸਨ੍ਤਿ ਸੁਕ੍ਖਤਾਯ ਵਾ ਪਕ੍ਕਤਾਯ ਵਾ ਘਨੀਭੂਤਂ. ਇਤਰਨ੍ਤਿ ਤਨੁਕਮਧੁ.
ਉਚ੍ਛੁਰਸਂ ਉਪਾਦਾਯਾਤਿ ਨਿਕ੍ਕਸਟਰਸਸ੍ਸਪਿ ਸਤ੍ਤਾਹਕਾਲਿਕਤਂ ਦਸ੍ਸੇਤਿ ‘‘ਉਚ੍ਛੁਮ੍ਹਾ ਨਿਬ੍ਬਤ੍ਤ’’ਨ੍ਤਿ ਪਾਲ਼ਿਯਂ ਸਾਮਞ੍ਞਤੋ ਵੁਤ੍ਤਤ੍ਤਾ. ਯਂ ਪਨ ਸੁਤ੍ਤਨ੍ਤਟ੍ਠਕਥਾਯਂ ‘‘ਉਚ੍ਛੁ ਚੇ, ਯਾਵਕਾਲਿਕੋ. ਉਚ੍ਛੁਰਸੋ ਚੇ, ਯਾਮਕਾਲਿਕੋ. ਫਾਣਿਤਂ ਚੇ, ਸਤ੍ਤਾਹਕਾਲਿਕਂ. ਤਚੋ ਚੇ, ਯਾਵਜੀਵਕੋ’’ਤਿ ਵੁਤ੍ਤਂ, ਤਂ ਅਮ੍ਬਫਲਰਸਾਦਿਮਿਸ੍ਸਤਾਯ ਯਾਮਕਾਲਿਕਤ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ, ਅਵਿਨਯਵਚਨਤ੍ਤਾ ਤਂ ਅਪ੍ਪਮਾਣਨ੍ਤਿ. ਤੇਨੇਵ ‘‘ਪੁਰੇਭਤ੍ਤਂ ਪਟਿਗ੍ਗਹਿਤੇਨ ਅਪਰਿਸ੍ਸਾਵਿਤਉਚ੍ਛੁਰਸੇਨਾ’’ਤਿਆਦਿ ਵੁਤ੍ਤਂ. ਨਿਰਾਮਿਸਮੇਵ ਵਟ੍ਟਤਿ ਤਤ੍ਥ ਪਵਿਟ੍ਠਯਾਵਕਾਲਿਕਸ੍ਸ ਅਬ੍ਬੋਹਾਰਿਕਤ੍ਤਾਤਿ ਇਦਂ ਗੁਲ਼ੇ ਕਤੇ ਤਤ੍ਥ ਵਿਜ੍ਜਮਾਨਮ੍ਪਿ ਕਸਟਂ ਪਾਕੇਨ ਸੁਕ੍ਖਤਾਯ ਯਾਵਜੀਵਿਕਤ੍ਤਂ ਭਜਤੀਤਿ ਵੁਤ੍ਤਂ. ਤਸ੍ਸ ਯਾਵਕਾਲਿਕਤ੍ਤੇ ਹਿ ਸਾਮਂਪਾਕੇਨ ਪੁਰੇਭਤ੍ਤੇਪਿ ਅਨਜ੍ਝੋਹਰਣੀਯਂ ਸਿਯਾਤਿ. ‘‘ਸਵਤ੍ਥੁਕਪਟਿਗ੍ਗਹਿਤਤ੍ਤਾ’’ਤਿ ਇਦਂ ਉਚ੍ਛੁਰਸੇ ਚੁਣ੍ਣਵਿਚੁਣ੍ਣਂ ਹੁਤ੍ਵਾ ਠਿਤਕਸਟਂ ਸਨ੍ਧਾਯ ਵੁਤ੍ਤਂ, ਤੇਨ ਚ ਅਪਰਿਸ੍ਸਾਵਿਤੇਨ ਅਪ੍ਪਟਿਗ੍ਗਹਿਤੇਨ ਅਨੁਪਸਮ੍ਪਨ੍ਨੇਹਿ ਕਤਂ ਸਤ੍ਤਾਹਂ ਵਟ੍ਟਤੀਤਿ ਦਸ੍ਸੇਤਿ. ਝਾਮਉਚ੍ਛੁਫਾਣਿਤਨ੍ਤਿ ਅਗ੍ਗਿਮ੍ਹਿ ਉਚ੍ਛੁਂ ਤਾਪੇਤ੍ਵਾ ਕਤਂ. ਕੋਟ੍ਟਿਤਉਚ੍ਛੁਫਾਣਿਤਨ੍ਤਿ ਖੁਦ੍ਦਾਨੁਖੁਦ੍ਦਕਂ ਛਿਨ੍ਦਿਤ੍ਵਾ ਕੋਟ੍ਟੇਤ੍ਵਾ ਨਿਪ੍ਪੀਲ਼ੇਤ੍ਵਾ ਪਕ੍ਕਂ.
ਤਂ ਤਤ੍ਥ ਵਿਜ੍ਜਮਾਨਮ੍ਪਿ ਕਸਟਂ ਪਕ੍ਕਕਾਲੇ ਯਾਵਕਾਲਿਕਤ੍ਤਂ ਵਿਜਹਤੀਤਿ ਆਹ ‘‘ਤਂ ਯੁਤ੍ਤ’’ਨ੍ਤਿ. ਸੀਤੋਦਕੇਨ ਕਤਨ੍ਤਿ ਮਧੁਕਪੁਪ੍ਫਾਨਿ ਸੀਤੋਦਕੇਨ ਮਦ੍ਦਿਤ੍ਵਾ ਪਰਿਸ੍ਸਾਵੇਤ੍ਵਾ ਪਚਿਤ੍ਵਾ ਕਤਂ, ਅਮਦ੍ਦਿਤ੍ਵਾ ਕਤਨ੍ਤਿ ਕੇਚਿ, ਤਤ੍ਥ ਕਾਰਣਂ ਨ ਦਿਸ੍ਸਤਿ. ਖੀਰਜਲ੍ਲਿਕਨ੍ਤਿ ਖੀਰਫੇਣਂ. ਮਧੁਕਪੁਪ੍ਫਂ ਪਨਾਤਿਆਦਿ ਯਾਵਕਾਲਿਕਰੂਪੇਨ ਠਿਤਸ੍ਸਪਿ ਅਵਟ੍ਟਨਕਮੇਰਯਬੀਜਵਤ੍ਥੁਂ ਦਸ੍ਸੇਤੁਂ ਆਰਦ੍ਧਂ.
ਸਬ੍ਬਾਨਿਪੀਤਿ ਸਪ੍ਪਿਆਦੀਨਿ ਪਞ੍ਚਪਿ. ਆਹਾਰਕਿਚ੍ਚਂ ਕਰੋਨ੍ਤਾਨਿ ਏਤਾਨਿ ਕਸ੍ਮਾ ਏਵਂ ਪਰਿਭੁਞ੍ਜਿਤਬ੍ਬਾਨੀਤਿ ਚੋਦਨਾਪਰਿਹਾਰਾਯ ਭੇਸਜ੍ਜੋਦਿਸ੍ਸਂ ਦਸ੍ਸੇਨ੍ਤੇਨ ਤਪ੍ਪਸਙ੍ਗੇਨ ਸਬ੍ਬਾਨਿਪਿ ਓਦਿਸ੍ਸਕਾਨਿ ਏਕਤੋ ਦਸ੍ਸੇਤੁਂ ‘‘ਸਤ੍ਤਵਿਧਂ ਹੀ’’ਤਿਆਦਿ ਵੁਤ੍ਤਂ. ਅਪਕਤਿਭੇਸਜ੍ਜਤ੍ਤਾ ਵਿਕਟਾਨਿ ਵਿਰੂਪਾਨਿ ਵਿਸਹਰਣਤੋ ਮਹਾਵਿਸਯਤ੍ਤਾ ਮਹਨ੍ਤਾਨਿ ਚਾਤਿ ਮਹਾਵਿਕਟਾਨਿ. ਉਪਸਮ੍ਪਦਾਦੀਨੀਤਿ ਆਦਿ-ਸਦ੍ਦੇਨ ਗਣਙ੍ਗਣੂਪਾਹਨਾਦਿਂ ਸਙ੍ਗਣ੍ਹਾਤਿ.
ਅਧਿਟ੍ਠੇਤੀਤਿ ਬਾਹਿਰਪਰਿਭੋਗਤ੍ਥਮੇਤਨ੍ਤਿ ਚਿਤ੍ਤਂ ਉਪ੍ਪਾਦੇਤਿ, ਏਵਂ ਪਰਿਭੋਗੇ ਅਨਪੇਕ੍ਖਤਾਯ ਪਟਿਗ੍ਗਹਣਂ ਵਿਜਹਤੀਤਿ ਅਧਿਪ੍ਪਾਯੋ. ਏਵਂ ਅਞ੍ਞੇਸੁਪਿ ਕਾਲਿਕੇਸੁ ਅਨਜ੍ਝੋਹਰਿਤੁਕਾਮਤਾਯ ਸੁਦ੍ਧਚਿਤ੍ਤੇਨ ਬਾਹਿਰਪਰਿਭੋਗਤ੍ਥਾਯ ਨਿਯਮੇਪਿ ਪਟਿਗ੍ਗਹਣਂ ਵਿਜਹਤੀਤਿ ਇਦਮ੍ਪਿ ਵਿਸੁਂ ਏਕਂ ਪਟਿਗ੍ਗਹਣਵਿਜਹਨਕਾਰਣਨ੍ਤਿ ਦਟ੍ਠਬ੍ਬਂ.
੬੨੫. ਸਚੇ ਦ੍ਵਿਨ੍ਨਂ…ਪੇ… ਨ ਵਟ੍ਟਤੀਤਿ ਏਤ੍ਥ ਪਾਠੋ ਗਲ਼ਿਤੋ, ਏਵਂ ਪਨੇਤ੍ਥ ਪਾਠੋ ਵੇਦਿਤਬ੍ਬੋ ‘‘ਸਚੇ ਦ੍ਵਿਨ੍ਨਂ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਅਵਿਭਤ੍ਤਂ ਹੋਤਿ, ਸਤ੍ਤਾਹਾਤਿਕ੍ਕਮੇ ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ, ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀ’’ਤਿ. ਅਞ੍ਞਥਾ ਹਿ ਸਦ੍ਦਪ੍ਪਯੋਗੋਪਿ ਨ ਸਙ੍ਗਹਂ ਗਚ੍ਛਤਿ. ‘‘ਗਣ੍ਠਿਪਦੇਪਿ ਚ ਅਯਮੇਵ ਪਾਠੋ ਦਸ੍ਸਿਤੋ’’ਤਿ (ਸਾਰਤ੍ਥ. ਟੀ. ੨.੬੨੫) ਸਾਰਤ੍ਥਦੀਪਨਿਯਂ ਵੁਤ੍ਤਂ. ਦ੍ਵਿਨ੍ਨਮ੍ਪਿ ਅਨਾਪਤ੍ਤੀਤਿ ਅਵਿਭਤ੍ਤਤ੍ਤਾ ਵੁਤ੍ਤਂ. ‘‘ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤੀ’’ਤਿ ਇਦਂ ‘‘ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬ’’ਨ੍ਤਿ ਵਚਨਤੋ ਵੁਤ੍ਤਂ. ‘‘ਯੇਨ ਪਟਿਗ੍ਗਹਿਤਂ, ਤੇਨ ਵਿਸ੍ਸਜ੍ਜਿਤਤ੍ਤਾ’’ਤਿ ਇਮਿਨਾ ਉਪਸਮ੍ਪਨ੍ਨਸ੍ਸ ਦਾਨਮ੍ਪਿ ਸਨ੍ਧਾਯ ‘‘ਵਿਸ੍ਸਜ੍ਜੇਤੀ’’ਤਿ ਇਦਂ ਵੁਤ੍ਤਨ੍ਤਿ ਦਸ੍ਸੇਤਿ. ਉਪਸਮ੍ਪਨ੍ਨਸ੍ਸ ਨਿਰਪੇਕ੍ਖਦਿਨ੍ਨਵਤ੍ਥੁਮ੍ਹਿ ਪਟਿਗ੍ਗਹਣਸ੍ਸ ਅਵਿਗਤਤ੍ਤੇਪਿ ਸਕਸਨ੍ਤਕਤਾ ਵਿਗਤਾਵ ਹੋਤਿ, ਤੇਨ ਨਿਸ੍ਸਗ੍ਗਿਯਂ ਨ ਹੋਤਿ. ਅਤ੍ਤਨਾਵ ਪਟਿਗ੍ਗਹਿਤਤ੍ਤਂ, ਸਕਸਨ੍ਤਕਤ੍ਤਞ੍ਚਾਤਿ ਇਮੇਹਿ ਦ੍ਵੀਹਿ ਕਾਰਣੇਹਿ ਨਿਸ੍ਸਗ੍ਗਿਯਂ ਹੋਤਿ, ਨ ਏਕੇਨ. ਅਨੁਪਸਮ੍ਪਨ੍ਨਸ੍ਸ ਨਿਰਪੇਕ੍ਖਦਾਨੇ ਪਨ ਤਦੁਭਯਮ੍ਪਿ ਵਿਜਹਤਿ, ਪਰਿਭੋਗੋਪੇਤ੍ਥ ਵਟ੍ਟਤਿ, ਨ ਸਾਪੇਕ੍ਖਦਾਨੇ ਦਾਨਲਕ੍ਖਣਾਭਾਵਤੋ. ‘‘ਵਿਸ੍ਸਜ੍ਜੇਤੀ’’ਤਿ ਏਤਸ੍ਮਿਞ੍ਚ ਪਾਲ਼ਿਪਦੇ ਕਸ੍ਸਚਿ ਅਦਤ੍ਵਾ ਅਨਪੇਕ੍ਖਤਾਯ ਛਡ੍ਡਨਮ੍ਪਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ. ‘‘ਅਨਪੇਕ੍ਖੋ ਦਤ੍ਵਾ’’ਤਿ ਇਦਞ੍ਚ ਪਟਿਗ੍ਗਹਣਵਿਜਹਨਵਿਧਿਦਸ੍ਸਨਤ੍ਥਮੇਵ ਵੁਤ੍ਤਂ. ਪਟਿਗ੍ਗਹਣੇ ਹਿ ਵਿਜਹਿਤੇ ਪੁਨ ਪਟਿਗ੍ਗਹੇਤ੍ਵਾ ਪਰਿਭੋਗੋ ਸਯਮੇਵ ਵਟ੍ਟਿਸ੍ਸਤਿ, ਤਬ੍ਬਿਜਹਨਞ੍ਚ ਵਤ੍ਥੁਨੋ ਸਕਸਨ੍ਤਕਤਾਪਰਿਚ੍ਚਾਗੇਨ ਹੋਤੀਤਿ, ਏਤੇਨ ਚ ਵਤ੍ਥੁਮ੍ਹਿ ਅਜ੍ਝੋਹਰਣਾਪੇਕ੍ਖਾਯ ਸਤਿ ਪਟਿਗ੍ਗਹਣਵਿਸ੍ਸਜ੍ਜਨਂ ਨਾਮ ਵਿਸੁਂ ਨ ਲਬ੍ਭਤੀਤਿ ਸਿਜ੍ਝਤਿ. ਇਤਰਥਾ ਹਿ ‘‘ਪਟਿਗ੍ਗਹਣੇ ਅਨਪੇਕ੍ਖੋਵ ਪਟਿਗ੍ਗਹਣਂ ਵਿਸ੍ਸਜ੍ਜੇਤ੍ਵਾ ਪੁਨ ਪਟਿਗ੍ਗਹੇਤ੍ਵਾ ਭੁਞ੍ਜਤੀ’’ਤਿ ਵਤ੍ਤਬ੍ਬਂ ਸਿਯਾ. ‘‘ਅਪ੍ਪਟਿਗ੍ਗਹਿਤਤ੍ਤਾ’’ਤਿ ਇਮਿਨਾ ਏਕਸ੍ਸ ਸਨ੍ਤਕਂ ਅਞ੍ਞੇਨ ਪਟਿਗ੍ਗਹਿਤਮ੍ਪਿ ਨਿਸ੍ਸਗ੍ਗਿਯਂ ਹੋਤੀਤਿ ਦਸ੍ਸੇਤਿ.
ਏਵਨ੍ਤਿ ‘‘ਪੁਨ ਗਹੇਸ੍ਸਾਮੀ’’ਤਿ ਅਪੇਕ੍ਖਂ ਅਕਤ੍ਵਾ ਸੁਦ੍ਧਚਿਤ੍ਤੇਨ ਪਰਿਚ੍ਚਤ੍ਤਤਂ ਪਰਾਮਸਤਿ. ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿਦਸ੍ਸਨਤ੍ਥਨ੍ਤਿ ਨਿਸ੍ਸਗ੍ਗਿਯਮੂਲਿਕਾਹਿ ਪਾਚਿਤ੍ਤਿਯਾਦਿਆਪਤ੍ਤੀਹਿ ਅਨਾਪਤ੍ਤਿਦਸ੍ਸਨਤ੍ਥਨ੍ਤਿ ਅਧਿਪ੍ਪਾਯੋ. ਪਰਿਭੋਗੇ ਅਨਾਪਤ੍ਤਿਦਸ੍ਸਨਤ੍ਥਨ੍ਤਿ ਏਤ੍ਥ ਪਨ ਨਿਸ੍ਸਟ੍ਠਪਟਿਲਦ੍ਧਸ੍ਸ ਕਾਯਿਕਪਰਿਭੋਗਾਦੀਸੁ ਯਾ ਦੁਕ੍ਕਟਾਪਤ੍ਤਿ ਵੁਤ੍ਤਾ, ਤਾਯ ਅਨਾਪਤ੍ਤਿਦਸ੍ਸਨਤ੍ਥਨ੍ਤਿ ਅਧਿਪ੍ਪਾਯੋ. ਸਪ੍ਪਿਆਦੀਨਂ ਪਟਿਗ੍ਗਹਿਤਭਾਵੋ, ਅਤ੍ਤਨੋ ਸਨ੍ਤਕਤਾ, ਸਤ੍ਤਾਹਾਤਿਕ੍ਕਮੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਭੇਸਜ੍ਜਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੪. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ
੬੨੮. ਚਤੁਤ੍ਥੇ ਜੇਟ੍ਠਮੂਲਪੁਣ੍ਣਮਾਸਿਯਾ…ਪੇ… ਕਰਣਕ੍ਖੇਤ੍ਤਞ੍ਚਾਤਿ ਪਠਮਦ੍ਧਮਾਸਮ੍ਪਿ ਕਰਣਕ੍ਖੇਤ੍ਤਂ ਵੁਤ੍ਤਂ. ਤਂ ‘‘ਕਤ੍ਵਾ ਨਿਵਾਸੇਤਬ੍ਬ’’ਨ੍ਤਿ ਇਮਸ੍ਸ ਪੁਰਿਮਦ੍ਧਮਾਸੇ ਵਾ ਪਚ੍ਛਿਮਦ੍ਧਮਾਸੇ ਵਾ ਕਤ੍ਵਾ ਪਚ੍ਛਿਮਮਾਸੇਵ ਨਿਵਾਸੇਤਬ੍ਬਨ੍ਤਿ ਏਵਮਤ੍ਥਂ ਗਹੇਤ੍ਵਾ ਵੁਤ੍ਤਂ ਨਿਵਾਸਨੇਯੇਵ ਆਪਤ੍ਤਿਯਾ ਵੁਤ੍ਤਤ੍ਤਾਤਿ. ਯਂ ਪਨ ਮਾਤਿਕਾਟ੍ਠਕਥਾਯਂ ‘‘ਗਿਮ੍ਹਾਨਂ ਪਚ੍ਛਿਮੋ ਮਾਸੋ ਪਰਿਯੇਸਨਕ੍ਖੇਤ੍ਤਂ, ਪਚ੍ਛਿਮੋ ਅਦ੍ਧਮਾਸੋ ਕਰਣਨਿਵਾਸਨਕ੍ਖੇਤ੍ਤਮ੍ਪੀ’’ਤਿ (ਕਙ੍ਖਾ. ਅਟ੍ਠ. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ, ਤਂ ਤਸ੍ਮਿਂਯੇਵ ਅਦ੍ਧਮਾਸੇ ਕਤ੍ਵਾ ਨਿਵਾਸੇਤਬ੍ਬਨ੍ਤਿ ਏਵਮਤ੍ਥਂ ਗਹੇਤ੍ਵਾ ਵੁਤ੍ਤਂ. ਇਧ ਵੁਤ੍ਤਨਯੇਨੇਵ ਅਤ੍ਥੇ ਗਹਿਤੇ ਵਿਰੋਧੋ ਨਤ੍ਥਿ.
‘‘ਵਤ੍ਤਭੇਦੇ ਦੁਕ੍ਕਟ’’ਨ੍ਤਿ ਇਦਂ ਵਸ੍ਸਿਕਸਾਟਿਕਅਦਿਨ੍ਨਪੁਬ੍ਬੇ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਯੇ ਮਨੁਸ੍ਸਾ’’ਤਿਆਦਿ. ਪਕਤਿਯਾ ਵਸ੍ਸਿਕਸਾਟਿਕਦਾਯਕਾ ਨਾਮ ਸਙ੍ਘਂ ਵਾ ਅਤ੍ਤਾਨਂ ਵਾ ਅਪ੍ਪਵਾਰੇਤ੍ਵਾਵ ਅਨੁਸਂਵਚ੍ਛਰਂ ਦਾਯਕਾ.
੬੩੦. ‘‘ਛ ਮਾਸੇ ਪਰਿਹਾਰਂ ਲਭਤੀ’’ਤਿ ਏਤੇਨ ਅਨ੍ਤੋਵਸ੍ਸੇਪਿ ਯਾਵ ਵਸ੍ਸਾਨਸ੍ਸ ਪਚ੍ਛਿਮਦਿਵਸਾ ਅਕਤਾ ਪਰਿਹਾਰਂ ਲਭਤੀਤਿ ਦੀਪਿਤਂ ਹੋਤਿ. ਏਕਮਾਸਨ੍ਤਿ ਹੇਮਨ੍ਤਸ੍ਸ ਪਚ੍ਛਿਮੁਪੋਸਥੇਨ ਸਹ ਗਣੇਤ੍ਵਾ ਵੁਤ੍ਤਂ. ਤਸ੍ਮਿਂ ਉਪੋਸਥਦਿਵਸੇ ਏਵ ਹਿ ਤਂ ਮੂਲਚੀਵਰਂ ਕਾਤਬ੍ਬਂ, ਇਤਰਥਾ ਹਿ ਨਿਸ੍ਸਗ੍ਗਿਯਤੋ. ਏਕਾਹਦ੍ਵੀਹਾਦਿਵਸੇਨ…ਪੇ… ਲਦ੍ਧਾ ਚੇਵ ਨਿਟ੍ਠਿਤਾ ਚਾਤਿ ਏਤ੍ਥ ਏਕਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚ ਦ੍ਵੀਹਾਨਾਗਤਾਯ…ਪੇ… ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚ, ਅਨ੍ਤੋਵਸ੍ਸੇ ਵਾ ਲਦ੍ਧਾ ਚੇਵ ਨਿਟ੍ਠਿਤਾ ਚਾਤਿ ਏਵਮਤ੍ਥੋ ਦਟ੍ਠਬ੍ਬੋ. ਤਤ੍ਥ ਆਸਲ਼੍ਹੀਮਾਸਸ੍ਸ ਜੁਣ੍ਹਪਕ੍ਖਪੁਣ੍ਣਮਿਯਂ ਲਦ੍ਧਾ, ਤਦਹੇਵ ਰਜਨਕਪ੍ਪਪਰਿਯੋਸਾਨੇਹਿ ਨਿਟ੍ਠਿਤਾ ਚ ਵਸ੍ਸਿਕਸਾਟਿਕਾ ‘‘ਏਕਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚਾ’’ਤਿ ਵੁਚ੍ਚਤਿ. ਏਤੇਨੇਵ ਨਯੇਨ ਜੁਣ੍ਹਪਕ੍ਖਸ੍ਸ ਛਟ੍ਠਿਯਂ ਲਦ੍ਧਾ, ਨਿਟ੍ਠਿਤਾ ਚ ‘‘ਦਸਾਹਾਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਚੇਵ ਨਿਟ੍ਠਿਤਾ ਚਾ’’ਤਿ ਵੁਚ੍ਚਤਿ. ਯਾਵ ਪਠਮਕਤ੍ਤਿਕਤੇਮਾਸਿਪੁਣ੍ਣਮਾ, ਤਾਵ ਲਦ੍ਧਾ, ਨਿਟ੍ਠਿਤਾ ਚ ‘‘ਅਨ੍ਤੋਵਸ੍ਸੇ ਲਦ੍ਧਾ ਚੇਵ ਨਿਟ੍ਠਿਤਾ ਚਾ’’ਤਿ ਵੁਚ੍ਚਤਿ. ਪਠਮਕਤ੍ਤਿਕਤੇਮਾਸਿਪੁਣ੍ਣਮਿਤੋ ਪਰਂ ਲਦ੍ਧਾ ਚੇਵ ਨਿਟ੍ਠਿਤਾ ਚ ਯਾਵ ਚੀਵਰਕਾਲੋ ਨਾਤਿਕ੍ਕਮਤਿ, ਤਾਵ ਅਨਧਿਟ੍ਠਹਿਤ੍ਵਾਪਿ ਠਪੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ.
ਏਤ੍ਥ ਚ ‘‘ਤਸ੍ਮਿਂਯੇਵ ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬਾ’’ਤਿ ਅਵਿਸੇਸੇਨ ਵੁਤ੍ਤੇਪਿ ਵਸ੍ਸਾਨਤੋ ਪੁਬ੍ਬੇ ਏਕਾਹਦ੍ਵੀਹਾਦਿਵਸੇਨ ਅਨਾਗਤਾਯ ਵਸ੍ਸੂਪਨਾਯਿਕਾਯ ਲਦ੍ਧਾ ਤੇਹਿ ਦਿਵਸੇਹਿ ਦਸਾਹਂ ਅਨਤਿਕ੍ਕਮਨ੍ਤੇਨ ਵਸ੍ਸੂਪਨਾਯਿਕਦਿਵਸਤੋ ਪਟ੍ਠਾਯ ਅਧਿਟ੍ਠਾਨਕ੍ਖੇਤ੍ਤਂ ਸਮ੍ਪਤ੍ਤਾ ਏਵ ਅਧਿਟ੍ਠਾਤਬ੍ਬਾ, ਤਤੋ ਪਨ ਪੁਬ੍ਬੇ ਦਸਾਹਾਤਿਕ੍ਕਮੇਨ ਨਿਟ੍ਠਿਤਾਪਿ ਨ ਅਧਿਟ੍ਠਾਤਬ੍ਬਾ ਅਧਿਟ੍ਠਾਨਸ੍ਸ ਅਖੇਤ੍ਤਤ੍ਤਾ. ਤਾਦਿਸਾ ਪਨ ਵਸ੍ਸੂਪਨਾਯਿਕਦਿਵਸੇ ਏਵ ਅਧਿਟ੍ਠਾਤਬ੍ਬਾ, ਅਨਧਿਟ੍ਠਹਤੋ ਅਰੁਣੁਗ੍ਗਮਨੇਨ ਨਿਸ੍ਸਗ੍ਗਿਯਂ ਹੋਤਿ. ਯਦਿ ਏਵਂ ‘‘ਦਸਾਹਾਨਾਗਤਾਯਾ’’ਤਿ ਇਮਿਨਾ ਕਿਂ ਪਯੋਜਨਨ੍ਤਿ ਚੇ? ਵਸ੍ਸਾਨਤੋ ਪੁਬ੍ਬੇ ਏਵ ਦਸਾਹੇ ਅਤਿਕ੍ਕਨ੍ਤੇ ਨਿਟ੍ਠਿਤਾ ਵਸ੍ਸੂਪਨਾਯਿਕਦਿਵਸੇ ਏਵ ਅਧਿਟ੍ਠਾਤਬ੍ਬਾਤਿ ਦਸ੍ਸਨਤ੍ਥਂ ਵੁਤ੍ਤਂ. ਤੇਨੇਵਾਹ ‘‘ਦਸਾਹਾਤਿਕ੍ਕਮੇ ਨਿਟ੍ਠਿਤਾ ਤਦਹੇਵ ਅਧਿਟ੍ਠਾਤਬ੍ਬਾ’’ਤਿ.
ਦਸਾਹੇ ਅਪ੍ਪਹੋਨ੍ਤੇ ਚੀਵਰਕਾਲਂ ਨਾਤਿਕ੍ਕਮੇਤਬ੍ਬਾਤਿ ਤੇਮਾਸਬ੍ਭਨ੍ਤਰੇ ਦਸਾਹੇ ਅਪ੍ਪਹੋਨ੍ਤੇ ਨਵਾਹਾਨਾਗਤਾਯ ਕਤ੍ਤਿਕਤੇਮਾਸਿਪੁਣ੍ਣਮਾਯ ਸਤ੍ਤਮਿਤੋ ਪਟ੍ਠਾਯ ਲਦ੍ਧਾ, ਨਿਟ੍ਠਿਤਾ ਚ ਚੀਵਰਕਾਲਂ ਨਾਤਿਕ੍ਕਮੇਤਬ੍ਬਾਤਿ ਅਤ੍ਥੋ. ਤਥਾ ਹਿ ‘‘ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਭਿਕ੍ਖੁਨਾ ਵਸ੍ਸਿਕਸਾਟਿਕਚੀਵਰਂ ਪਰਿਯੇਸਿਤਬ੍ਬ’’ਨ੍ਤਿ ਪਰਿਯੇਸਨਕ੍ਖੇਤ੍ਤਂ ਵਤ੍ਵਾ ‘‘ਵਸ੍ਸਿਕਸਾਟਿਕਂ ਵਸ੍ਸਾਨਂ ਚਾਤੁਮਾਸਂ ਅਧਿਟ੍ਠਾਤੁ’’ਨ੍ਤਿ (ਮਹਾਵ. ੩੫੮) ਵੁਤ੍ਤਤ੍ਤਾ ਕਤਾਯਪਿ ਅਕਤਾਯਪਿ ਮਾਸਮਤ੍ਤਂ ਅਨਧਿਟ੍ਠਾਤਬ੍ਬਤਾ ਸਿਦ੍ਧਾ. ਯਸ੍ਮਾ ਚ ਅਕਤਾ ਵਸ੍ਸਿਕਸਾਟਿਕਸਙ੍ਖ੍ਯਂ ਨ ਗਚ੍ਛਤਿ, ਅਕਰਣਞ੍ਚ ਕੇਨਚਿ ਵੇਕਲ੍ਲੇਨ, ਨ ਅਨਾਦਰੇਨ, ਤਸ੍ਮਾ ਚਾਤੁਮਾਸਂ ਅਕਤਤ੍ਤਾ ਏਵ ਪਰਿਹਾਰਂ ਲਭਤਿ, ਕਤਾ ਪਨ ਅਧਿਟ੍ਠਾਨਕ੍ਖੇਤ੍ਤੇ, ਅਕਤਾ ਚ ਚੀਵਰਕਾਲੇ ਦਸਾਹਪਰਮਸਿਕ੍ਖਾਪਦੇਨੇਵ ਪਰਿਹਾਰਂ ਲਭਤੀਤਿ ਅਯਮਤ੍ਥੋ ਲਬ੍ਭਤਿ. ਕਸ੍ਮਾਤਿ ਅਤ੍ਤਨੋ ਮਤਿਯਾ ਕਾਰਣਪੁਚ੍ਛਾ. ਤਸ੍ਮਾਤਿ ਵਸ੍ਸਾਨੇਯੇਵ ਵਸ੍ਸਿਕਸਾਟਿਕਾਯ ਅਧਿਟ੍ਠਾਤਬ੍ਬਤਾਵਚਨਤੋ. ‘‘ਤਿਚੀਵਰਂ ਅਧਿਟ੍ਠਾਤੁ’’ਨ੍ਤਿ ਸੁਤ੍ਤਂ ਪਨੇਤ੍ਥ ਸੇਸਚੀਵਰਾਨਂ ਏਵਂ ਕਾਲਨਿਯਮਾਭਾਵਂ ਸਾਧੇਤੁਂ ਉਦ੍ਧਟਂ. ਨ ਹਿ ਤੇਨੇਤ੍ਥ ਅਞ੍ਞਂ ਪਯੋਜਨਂ ਅਤ੍ਥਿ.
ਕਦਾ ਅਧਿਟ੍ਠਾਤਬ੍ਬਾਤਿਆਦਿਕੁਰੁਨ੍ਦਿਵਚਨੇਨਾਪਿ ‘‘ਯਦਾ ਵਾ ਤਦਾ ਵਾ ਅਧਿਟ੍ਠਾਤੁਂ ਵਟ੍ਟਤੀ’’ਤਿ ਇਦਂ ਪਟਿਕ੍ਖਿਪਿਤ੍ਵਾ ਦਸਾਹਬ੍ਭਨ੍ਤਰੇ ਏਵ ਕਤਾਯ ਅਧਿਟ੍ਠਾਤਬ੍ਬਤਂ ਦਸ੍ਸੇਤਿ.
ਪਾਲ਼ਿਯਂ ਅਚ੍ਛਿਨ੍ਨਚੀਵਰਸ੍ਸਾਤਿਆਦੀਸੁ ਅਚ੍ਛਿਨ੍ਨਸੇਸਚੀਵਰਸ੍ਸ ਨਟ੍ਠਸੇਸਚੀਵਰਸ੍ਸ. ਏਤੇਸਞ੍ਹਿ ਅਸਮਯੇ ਪਰਿਯੇਸਨਨਿਵਾਸਨਾਪਤ੍ਤਿਯਾ ਏਵ ਅਨਾਪਤ੍ਤਿ ਵੁਤ੍ਤਾ. ਤੇਨੇਵ ਮਾਤਿਕਾਟ੍ਠਕਥਾਯਂ ‘‘ਅਚ੍ਛਿਨ੍ਨਚੀਵਰਸ੍ਸ ਵਾ ਨਟ੍ਠਚੀਵਰਸ੍ਸ ਵਾ ਅਨਿਵਤ੍ਥਂ ਚੋਰਾ ਹਰਨ੍ਤੀਤਿ ਏਵਂ ਆਪਦਾਸੁ ਵਾ ਨਿਵਾਸਯਤੋ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤੀ’’ਤਿ (ਕਙ੍ਖਾ. ਅਟ੍ਠ. ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ, ਇਧ ਪਨ ਸਮਨ੍ਤਪਾਸਾਦਿਕਾਯਂ ਅਯਂ ਨਿਸ੍ਸਗ੍ਗਿਯਾ ਅਨਾਪਤ੍ਤਿ ਪਾਲ਼ਿਤੋ ਸਯਮੇਵ ਸਿਜ੍ਝਤੀਤਿ ਇਮਂ ਅਦਸ੍ਸੇਤ੍ਵਾ ਅਸਿਜ੍ਝਮਾਨਂ ਨਗ੍ਗਸ੍ਸ ਨ੍ਹਾਯਤੋ ਦੁਕ੍ਕਟਾਪਤ੍ਤਿਯਾ ਏਵ ਅਨਾਪਤ੍ਤਿਂ ਦਸ੍ਸੇਤੁਂ ‘‘ਅਚ੍ਛਿਨ੍ਨਚੀਵਰਸ੍ਸਾ’’ਤਿਆਦਿ ਵੁਤ੍ਤਨ੍ਤਿ ਗਹੇਤਬ੍ਬਂ. ਨ ਹਿ ਏਸਾ ਅਨਾਪਤ੍ਤਿ ਅਵੁਤ੍ਤੇ ਸਿਜ੍ਝਤੀਤਿ. ਵਸ੍ਸਿਕਸਾਟਿਕਾਯ ਅਤ੍ਤੁਦ੍ਦੇਸਿਕਤਾ, ਅਸਮਯੇ ਪਰਿਯੇਸਨਤਾ, ਤਾਯ ਚ ਪਟਿਲਾਭੋਤਿ ਇਮਾਨਿ ਤਾਵ ਪਰਿਯੇਸਨਾਪਤ੍ਤਿਯਾ ਤੀਣਿ ਅਙ੍ਗਾਨਿ. ਨਿਵਾਸਨਾਪਤ੍ਤਿਯਾ ਪਨ ਸਚੀਵਰਤਾ, ਆਪਦਾਭਾਵੋ, ਵਸ੍ਸਿਕਸਾਟਿਕਾਯ ਸਕਭਾਵੋ, ਅਸਮਯੇ ਨਿਵਾਸਨਨ੍ਤਿ ਚਤ੍ਤਾਰਿ ਅਙ੍ਗਾਨਿ.
ਵਸ੍ਸਿਕਸਾਟਿਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੫. ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ
੬੩੧. ਪਞ੍ਚਮੇ ਯਮ੍ਪਿ…ਪੇ… ਅਚ੍ਛਿਨ੍ਦੀਤਿ ਏਤ੍ਥ ਯਂ ਤੇ ਅਹਂ ਚੀਵਰਂ ਅਦਾਸਿਂ, ਤਂ ‘‘ਮਯਾ ਸਦ੍ਧਿਂ ਪਕ੍ਕਮਿਸ੍ਸਤੀ’’ਤਿ ਸਞ੍ਞਾਯ ਅਦਾਸਿਂ, ਨ ਅਞ੍ਞਥਾਤਿ ਕੁਪਿਤੋ ਅਚ੍ਛਿਨ੍ਦੀਤਿ ਏਵਂ ਅਜ੍ਝਾਹਰਿਤ੍ਵਾ ਯੋਜੇਤਬ੍ਬਂ.
੬੩੩. ਏਕਂ ਦੁਕ੍ਕਟਨ੍ਤਿ ਯਦਿ ਆਣਤ੍ਤੋ ਅਵਸ੍ਸਂ ਅਚ੍ਛਿਨ੍ਦਤਿ, ਆਣਤ੍ਤਿਕ੍ਖਣੇ ਪਾਚਿਤ੍ਤਿਯਮੇਵ. ਯਦਿ ਨ ਅਚ੍ਛਿਨ੍ਦਤਿ, ਤਦਾ ਏਵ ਦੁਕ੍ਕਟਨ੍ਤਿ ਦਟ੍ਠਬ੍ਬਂ. ਏਕਵਾਚਾਯ ਸਮ੍ਬਹੁਲਾ ਆਪਤ੍ਤਿਯੋਤਿ ਯਦਿ ਆਣਤ੍ਤੋ ਅਨਨ੍ਤਰਾਯੇਨ ਅਚ੍ਛਿਨ੍ਦਤਿ, ਆਣਤ੍ਤਿਕ੍ਖਣੇਯੇਵ ਵਤ੍ਥੁਗਣਨਾਯ ਪਾਚਿਤ੍ਤਿਯਆਪਤ੍ਤਿਯੋ ਪਯੋਗਕਰਣਕ੍ਖਣੇਯੇਵ ਆਪਤ੍ਤਿਯਾ ਆਪਜ੍ਜਿਤਬ੍ਬਤੋ, ਚੀਵਰਂ ਪਨ ਅਚ੍ਛਿਨ੍ਨੇਯੇਵ ਨਿਸ੍ਸਗ੍ਗਿਯਂ ਹੋਤਿ. ਯਦਿ ਸੋ ਨ ਅਚ੍ਛਿਨ੍ਦਤਿ, ਆਣਤ੍ਤਿਕ੍ਖਣੇ ਏਕਮੇਵ ਦੁਕ੍ਕਟਨ੍ਤਿ ਦਟ੍ਠਬ੍ਬਂ. ਏਵਂ ਅਞ੍ਞਤ੍ਥਾਪਿ ਈਦਿਸੇਸੁ ਨਯੋ ਞਾਤਬ੍ਬੋ.
੬੩੫. ਉਪਜ੍ਝਂ ਗਣ੍ਹਿਸ੍ਸਤੀਤਿ ਸਾਮਣੇਰਸ੍ਸ ਦਾਨਂ ਦੀਪੇਤਿ, ਤੇਨ ਚ ਸਾਮਣੇਰਕਾਲੇ ਦਤ੍ਵਾ ਉਪਸਮ੍ਪਨ੍ਨਕਾਲੇ ਅਚ੍ਛਿਨ੍ਦਤੋਪਿ ਪਾਚਿਤ੍ਤਿਯਂ ਦੀਪੇਤਿ. ‘‘ਭਿਕ੍ਖੁਸ੍ਸ ਸਾਮਂ ਚੀਵਰਂ ਦਤ੍ਵਾ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ. ਆਹਰਾਪੇਤੁਂ ਪਨ ਵਟ੍ਟਤੀਤਿ ਕਮ੍ਮੇ ਅਕਤੇ ਭਤਿਸਦਿਸਤ੍ਤਾ ਵੁਤ੍ਤਂ. ਵਿਕਪ੍ਪਨੁਪਗਪਚ੍ਛਿਮਚੀਵਰਤਾ, ਸਾਮਂ ਦਿਨ੍ਨਤਾ, ਸਕਸਞ੍ਞਿਤਾ, ਉਪਸਮ੍ਪਨ੍ਨਤਾ, ਕੋਧਵਸੇਨ ਅਚ੍ਛਿਨ੍ਦਨਂ ਵਾ ਅਚ੍ਛਿਨ੍ਦਾਪਨਂ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.
ਚੀਵਰਅਚ੍ਛਿਨ੍ਦਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੬. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ
੬੩੬. ਛਟ੍ਠੇ ਵੀਤਵੀਤਟ੍ਠਾਨਂ ਯਸ੍ਮਿਂ ਚਤੁਰਸ੍ਸਦਾਰੁਮ੍ਹਿ ਪਲਿਵੇਠੇਨ੍ਤਿ, ਤਸ੍ਸ ਤੁਰੀਤਿ ਨਾਮਂ. ਵਾਯਨ੍ਤਾ ਤਿਰਿਯਂ ਸੁਤ੍ਤਂ ਪਵੇਸੇਤ੍ਵਾ ਯੇਨ ਆਕੋਟੇਨ੍ਤਾ ਵਤ੍ਥੇ ਘਨਭਾਵਂ ਆਪਾਦੇਨ੍ਤਿ, ਤਂ ‘‘ਵੇਮ’’ਨ੍ਤਿ ਵੁਚ੍ਚਤਿ.
‘‘ਇਤਰਸ੍ਮਿਂ ਤਥੇਵ ਦੁਕ੍ਕਟ’’ਨ੍ਤਿ ਇਮਿਨਾ ਵਾਯਿਤੁਂ ਆਰਦ੍ਧਕਾਲਤੋ ਪਟ੍ਠਾਯ ਯਥਾਵੁਤ੍ਤਪਰਿਚ੍ਛੇਦਨਿਟ੍ਠਿਤੇਯੇਵ ਦੁਕ੍ਕਟਮ੍ਪਿ ਹੋਤਿ, ਨ ਤਤੋ ਪੁਬ੍ਬੇ ਵਾਯਨਪਯੋਗੇਸੂਤਿ ਦਸ੍ਸੇਤਿ.
ਤਨ੍ਤੇ ਠਿਤਂਯੇਵ ਅਧਿਟ੍ਠਾਤਬ੍ਬਨ੍ਤਿ ਏਤ੍ਥ ਏਕਵਾਰਂ ਅਧਿਟ੍ਠਿਤੇ ਪਚ੍ਛਾ ਵੀਤਂ ਅਧਿਟ੍ਠਿਤਗਤਿਕਮੇਵ ਹੋਤਿ, ਪੁਨ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਸਚੇ ਪਨ ਅਨ੍ਤਰਨ੍ਤਰਾ ਦਸਾ ਠਪੇਤ੍ਵਾ ਵਿਸੁਂ ਵਿਸੁਂ ਸਪਰਿਚ੍ਛੇਦਂ ਵੀਤਂ ਹੋਤਿ, ਪਚ੍ਚੇਕਂ ਅਧਿਟ੍ਠਾਤਬ੍ਬਮੇਵਾਤਿ ਦਟ੍ਠਬ੍ਬਂ. ਏਤ੍ਥ ਚ ਕਪ੍ਪਿਯਸੁਤ੍ਤਂ ਗਹੇਤ੍ਵਾ ਅਞ੍ਞਾਤਕਅਪ੍ਪਵਾਰਿਤੇਨਾਪਿ ਅਕਪ੍ਪਿਯਤਨ੍ਤਵਾਯੇਨ ‘‘ਸੁਤ੍ਤਮਤ੍ਥਿ, ਵਾਯਨ੍ਤੋ ਨਤ੍ਥੀ’’ਤਿਆਦਿਪਰਿਯਾਯਮੁਖੇਨ ਵਾਯਾਪੇਨ੍ਤਸ੍ਸ ਅਨਾਪਤ੍ਤਿ. ਤੇਨੇਵ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ) ‘‘ਵਾਯਾਪੇਯ੍ਯਾ’’ਤਿ ਪਦਸ੍ਸ ‘‘ਚੀਵਰਂ ਮੇ, ਆਵੁਸੋ, ਵਾਯਥਾਤਿ ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪੇਯ੍ਯਾ’’ਤਿ ਅਤ੍ਥੋ ਵੁਤ੍ਤੋ, ਏਵਂ ਵਦਨ੍ਤੋ ਅਕਪ੍ਪਿਯਤਨ੍ਤਵਾਯੇਨ ਵਾਯਾਪੇਤਿ ਨਾਮ, ਨਾਞ੍ਞਥਾ.
੬੪੦. ਅਨਾਪਤ੍ਤਿ ਚੀਵਰਂ ਸਿਬ੍ਬੇਤੁਨ੍ਤਿਆਦੀਸੁ ਇਮਿਨਾ ਸਿਕ੍ਖਾਪਦੇਨੇਵ ਅਨਾਪਤ੍ਤਿ, ਅਕਤਵਿਞ੍ਞਤ੍ਤਿਪਚ੍ਚਯਾ ਪਨ ਦੁਕ੍ਕਟਮੇਵਾਤਿ ਵਦਨ੍ਤਿ. ਅਕਪ੍ਪਿਯਸੁਤ੍ਤਤਾ, ਅਤ੍ਤੁਦ੍ਦੇਸਿਕਤਾ, ਅਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੭. ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ
੬੪੨. ਸਤ੍ਤਮੇ ‘‘ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯਾ’’ਤਿ ਇਦਂ ਪਯੋਗਭੇਦਦਸ੍ਸਨਂ, ਦਾਨਂ ਪਨੇਤ੍ਥ ਅਙ੍ਗਂ ਨ ਹੋਤਿ. ਤੇਨੇਵ ਤਸ੍ਸ ਵਿਭਙ੍ਗੇ ‘‘ਅਨ੍ਤਮਸੋ ਧਮ੍ਮਮ੍ਪਿ ਭਣਤੀ’’ਤਿ ਵੁਤ੍ਤਂ. ਸੇਸਮੇਤ੍ਥ ਉਤ੍ਤਾਨਮੇਵ. ਅਞ੍ਞਾਤਕਅਪ੍ਪਵਾਰਿਤਾਨਂ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਵਿਕਪ੍ਪਮਾਪਜ੍ਜਨਤਾ, ਚੀਵਰਸ੍ਸ ਅਤ੍ਤੁਦ੍ਦੇਸਿਕਤਾ, ਤਸ੍ਸ ਵਚਨੇਨ ਸੁਤ੍ਤਵਡ੍ਢਨਂ, ਚੀਵਰਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.
ਮਹਾਪੇਸਕਾਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੮. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ
੬੪੬. ਅਟ੍ਠਮੇ ਛਟ੍ਠਿਯਂ ਉਪ੍ਪਨ੍ਨਚੀਵਰਸ੍ਸ ਏਕਾਦਸਮਾਰੁਣੋ ਚੀਵਰਕਾਲੇ ਉਟ੍ਠਾਤੀਤਿ ਆਹ ‘‘ਛਟ੍ਠਿਤੋ ਪਟ੍ਠਾਯਾ’’ਤਿਆਦਿ, ਤੇਨ ਚ ‘‘ਦਸਾਹਾਨਾਗਤ’’ਨ੍ਤਿ ਵੁਤ੍ਤਤ੍ਤਾ ਪਞ੍ਚਮਿਤੋ ਪਟ੍ਠਾਯ ਪੁਣ੍ਣਮਿਤੋ ਪੁਬ੍ਬੇ ਦਸਸੁ ਅਰੁਣੇਸੁ ਉਟ੍ਠਿਤੇਸੁਪਿ ਚੀਵਰਂ ਨਿਸ੍ਸਗ੍ਗਿਯਂ ਨ ਹੋਤਿ. ਪੁਣ੍ਣਮਿਯਾ ਸਹ ਏਕਾਦਸ ਦਿਵਸਾ ਲਬ੍ਭਨ੍ਤੀਤਿ ਏਤ੍ਤਕਮੇਵ ਇਮਿਨਾ ਸਿਕ੍ਖਾਪਦੇਨ ਲਦ੍ਧਂ, ਛਟ੍ਠਿਤੋ ਪਟ੍ਠਾਯ ਉਪ੍ਪਨ੍ਨਂ ਸਬ੍ਬਚੀਵਰਂ ਪਠਮਕਥਿਨਸਿਕ੍ਖਾਪਦਵਸੇਨੇਵ ਯਾਵ ਚੀਵਰਕਾਲਂ ਨਿਸ੍ਸਗ੍ਗਿਯਂ ਨ ਹੋਤੀਤਿ ਦਸ੍ਸੇਤਿ.
੬੫੦. ਇਦਾਨਿ ਪਠਮਕਥਿਨਾਦਿਸਿਕ੍ਖਾਪਦੇਹਿ ਤਸ੍ਸ ਤਸ੍ਸ ਚੀਵਰਸ੍ਸ ਲਬ੍ਭਮਾਨਂ ਪਰਿਹਾਰਂ ਇਧੇਵ ਏਕਤੋ ਸਮ੍ਪਿਣ੍ਡੇਤ੍ਵਾ ਦਸ੍ਸੇਨ੍ਤੋ ‘‘ਅਤਿਰੇਕਚੀਵਰਸ੍ਸਾ’’ਤਿਆਦਿਮਾਹ. ‘‘ਅਨਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕੋ ਮਾਸੋ, ਅਤ੍ਥਤੇ ਕਥਿਨੇ ਏਕਾਦਸਦਿਵਸਾਧਿਕਾ ਪਞ੍ਚ ਮਾਸਾ’’ਤਿ ਅਯਮੇਵ ਪਾਠੋ ਪਾਲ਼ਿਯਾ ਸਮੇਤਿ. ਕੇਚਿ ਪਨ ‘‘ਦਸਦਿਵਸਾਧਿਕੋ ਮਾਸੋ, ਦਸਦਿਵਸਾਧਿਕਾ ਪਞ੍ਚ ਮਾਸਾਤਿ ਪਾਠੇਨ ਭਵਿਤਬ੍ਬ’’ਨ੍ਤਿ ਵਦਨ੍ਤਿ, ਤਂ ਨ ਯੁਤ੍ਤਂ, ਅਞ੍ਞਥਾ ‘‘ਨਵਾਹਾਨਾਗਤ’’ਨ੍ਤਿ ਵਤ੍ਤਬ੍ਬਤੋ. ਯਂ ਪਨੇਤ੍ਥ ਮਾਤਿਕਾਟ੍ਠਕਥਾਯਞ੍ਚ ‘‘ਕਾਮਞ੍ਚੇਸ ‘ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬ’ਨ੍ਤਿ ਇਮਿਨਾਵ ਸਿਦ੍ਧੋ, ਅਟ੍ਠੁਪ੍ਪਤ੍ਤਿਵਸੇਨ ਪਨ ਅਪੁਬ੍ਬਂ ਵਿਯ ਅਤ੍ਥਂ ਦਸ੍ਸੇਤ੍ਵਾ ਸਿਕ੍ਖਾਪਦਂ ਠਪਿਤ’’ਨ੍ਤਿ (ਕਙ੍ਖਾ. ਅਟ੍ਠ. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ) ਲਿਖਨ੍ਤਿ, ਤਂ ਪਮਾਦਲਿਖਿਤਂ ‘‘ਪਵਾਰਣਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯ ਉਪ੍ਪਨ੍ਨਸ੍ਸ ਚੀਵਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤੀ’’ਤਿ (ਕਙ੍ਖਾ. ਅਟ੍ਠ. ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ) ਵੁਤ੍ਤਤ੍ਤਾ. ਇਮਮੇਵ ਚ ਪਮਾਦਲਿਖਿਤਂ ਗਹੇਤ੍ਵਾ ਭਦਨ੍ਤਬੁਦ੍ਧਦਤ੍ਤਾਚਰਿਯੇਨ ਚ ‘‘ਪਰਿਹਾਰੇਕਮਾਸੋਵ, ਦਸਾਹਪਰਮੋ ਮਤੋ’’ਤਿਆਦਿ ਵੁਤ੍ਤਨ੍ਤਿ ਗਹੇਤਬ੍ਬਂ.
ਅਚ੍ਚੇਕਚੀਵਰਸਦਿਸੇ ਅਞ੍ਞਸ੍ਮਿਨ੍ਤਿ ਪੁਬ੍ਬੇ ਅਧਿਟ੍ਠਿਤੇ ਉਪ੍ਪਨ੍ਨਕਾਲਾਕਾਰਾਦਿ ਸਾਦਿਸੇਨ ਅਚ੍ਚੇਕਚੀਵਰਸਦਿਸੇ ਅਞ੍ਞਸ੍ਮਿਂ ਚੀਵਰੇ ਅਚ੍ਚੇਕਚੀਵਰਸਞ੍ਞਾਯ ਚੀਵਰਕਾਲਂ ਅਤਿਕ੍ਕਮੇਤੀਤਿ ਅਤ੍ਥੋ. ਤੇਨੇਵੇਤ੍ਥ ਦੁਕ੍ਕਟਂ, ਅਨਾਪਤ੍ਤਿ ਚ ਵੁਤ੍ਤਾ, ਇਤਰਥਾ ਤੀਸੁਪਿ ਪਦੇਸੁ ਪਾਚਿਤ੍ਤਿਯਸ੍ਸੇਵ ਵਤ੍ਤਬ੍ਬਤੋ. ਅਨਚ੍ਚੇਕਚੀਵਰਮ੍ਪਿ ਹਿ ਚੀਵਰਕਾਲਂ ਅਤਿਕ੍ਕਮਯਤੋ ਪਾਚਿਤ੍ਤਿਯਮੇਵ ਅਚ੍ਚੇਕਚੀਵਰਤ੍ਤਿਕੇ ਵਿਯਾਤਿ ਦਟ੍ਠਬ੍ਬਂ. ਵਿਕਪ੍ਪਨੁਪਗਪਚ੍ਛਿਮਪ੍ਪਮਾਣਸ੍ਸ ਅਚ੍ਚੇਕਚੀਵਰਸ੍ਸ ਅਤ੍ਤਨੋ ਸਨ੍ਤਕਤਾ, ਦਸਾਹਾਨਾਗਤਾਯ ਕਤ੍ਤਿਕਤੇਮਾਸਿਪੁਣ੍ਣਮਾਯ ਉਪ੍ਪਨ੍ਨਭਾਵੋ, ਅਨਧਿਟ੍ਠਿਤਅਵਿਕਪ੍ਪਿਤਤਾ, ਚੀਵਰਕਾਲਾਤਿਕ੍ਕਮੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.
ਅਚ੍ਚੇਕਚੀਵਰਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੯. ਸਾਸਙ੍ਕਸਿਕ੍ਖਾਪਦਵਣ੍ਣਨਾ
੬੫੨-੩. ਨਵਮੇ ਅਨ੍ਤਰਨ੍ਤਰਾ ਘਰਮੇਤ੍ਥਾਤਿ ਅਨ੍ਤਰਘਰਨ੍ਤਿ ਗਾਮੋ ਵੁਤ੍ਤੋਤਿ ਆਹ ‘‘ਅਨ੍ਤੋਗਾਮੇ’’ਤਿ. ‘‘ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ (ਵਿਭ. ੬੨੪) ਇਮਸ੍ਸ ਵਿਭਙ੍ਗੇ ‘‘ਉਪਸਮ੍ਪਜ੍ਜ’’ਨ੍ਤਿ ਸਾਨੁਸਾਰਂ ਉਦ੍ਧਟਂ. ਤਂ ਸਨ੍ਧਾਯਾਹ ‘‘ਉਪਸਮ੍ਪਜ੍ਜਨ੍ਤਿਆਦੀਸੁ ਵਿਯਾ’’ਤਿ. ਤਸ੍ਸਾਪੀਤਿ ‘‘ਵੁਤ੍ਥਵਸ੍ਸਾਨ’’ਨ੍ਤਿ ਵਿਭਙ੍ਗਪਦਸ੍ਸਪਿ. ਵੁਤ੍ਥਵਸ੍ਸਾਨਨ੍ਤਿ ਚ ਨਿਦ੍ਧਾਰਣੇ ਸਾਮਿਵਚਨਂ, ਏਤੇਨ ਚ ਪੁਰਿਮਸਿਕ੍ਖਾਪਦੇ ਅਨਤ੍ਥਤਕਥਿਨਾਨਂ ਕਥਿਨਮਾਸੇਪਿ ਅਸਮਾਦਾਨਚਾਰੋ ਨ ਲਬ੍ਭਤੀਤਿ ਸਿਦ੍ਧਂ ਹੋਤਿ, ਇਤਰਥਾ ਸਿਕ੍ਖਾਪਦਸ੍ਸੇਵ ਨਿਰਤ੍ਥਕਤ੍ਤਾਤਿ ਦਟ੍ਠਬ੍ਬਂ.
ਪਰਿਕ੍ਖੇਪਾਰਹਟ੍ਠਾਨਤੋਤਿ ਏਤ੍ਥ ਗਾਮਪਰਿਯਨ੍ਤੇ ਠਿਤਘਰੂਪਚਾਰਤੋ ਪਟ੍ਠਾਯ ਏਕੋ ਲੇਡ੍ਡੁਪਾਤੋ ਪਰਿਕ੍ਖੇਪਾਰਹਟ੍ਠਾਨਂ ਨਾਮ. ਵਿਸੁਦ੍ਧਿਮਗ੍ਗੇਪਿ ‘‘ਅਪਰਿਕ੍ਖਿਤ੍ਤਸ੍ਸ ਪਠਮਲੇਡ੍ਡੁਪਾਤਤੋ ਪਟ੍ਠਾਯਾ’’ਤਿ (ਵਿਸੁਦ੍ਧਿ. ੧.੩੧) ਵੁਤ੍ਤਂ. ਤਨ੍ਤਿ ਤਂ ਪਠਮਸੇਨਾਸਨਾਦਿਂ. ਮਜ੍ਝਿਮਨਿਕਾਯਟ੍ਠਕਥਾਯਂ ਪਨ ਵਿਹਾਰਸ੍ਸਪਿ ਗਾਮਸ੍ਸੇਵ ਉਪਚਾਰਂ ਨੀਹਰਿਤ੍ਵਾ ਉਭਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤਰਾ ਮਿਨਿਤਬ੍ਬਨ੍ਤਿ ਵੁਤ੍ਤਂ.
‘‘ਕੋਸਮ੍ਬਿਯਂ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤੀ’’ਤਿ ਆਗਤਤ੍ਤਾ ‘‘ਕੋਸਮ੍ਬਕਸਮ੍ਮੁਤਿ ਅਨੁਞ੍ਞਾਤਾ’’ਤਿ ਵੁਤ੍ਤਂ. ‘‘ਅਯਞ੍ਚ ਪਚ੍ਛਿਮਦਿਸਂ ਗਤੋ ਹੋਤੀ’’ਤਿ ਇਮਿਨਾ ਅਨ੍ਤਰਘਰੇ ਚੀਵਰਂ ਨਿਕ੍ਖਿਪਿਤ੍ਵਾ ਤਸ੍ਮਿਂ ਵਿਹਾਰੇ ਵਸਨ੍ਤਸ੍ਸ ਸਕਲਮ੍ਪਿ ਚੀਵਰਮਾਸਂ ਵਿਪ੍ਪਵਸਿਤੁਂ ਵਟ੍ਟਤਿ, ਤਤੋ ਅਞ੍ਞਤ੍ਥ ਗਮਨਕਿਚ੍ਚੇ ਸਤਿ ਵਿਹਾਰਤੋ ਬਹਿ ਛਾਰਤ੍ਤਂ ਵਿਪ੍ਪਵਾਸੋ ਅਨੁਞ੍ਞਾਤੋਤਿ ਦੀਪੇਤਿ. ਤੇਨਾਹ ‘‘ਸੇਨਾਸਨਂ ਆਗਨ੍ਤ੍ਵਾ ਸਤ੍ਤਮਂ ਅਰੁਣਂ ਉਟ੍ਠਾਪੇਤੁ’’ਨ੍ਤਿਆਦਿ. ਵਸਿਤ੍ਵਾਤਿ ਅਰੁਣਂ ਉਟ੍ਠਾਪੇਤ੍ਵਾ. ਤਤ੍ਥੇਵਾਤਿ ਤਸ੍ਮਿਞ੍ਞੇਵ ਗਤਟ੍ਠਾਨੇ. ਅਙ੍ਗਾਨਿ ਪਨੇਤ੍ਥ ਅਟ੍ਠਕਥਾਯਮੇਵ ਵੁਤ੍ਤਾਨਿ.
ਸਾਸਙ੍ਕਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
੧੦. ਪਰਿਣਤਸਿਕ੍ਖਾਪਦਵਣ੍ਣਨਾ
੬੬੦. ਦਸਮੇ ਰੋਪਿਤਮਾਲਵਚ੍ਛਤੋਤਿ ਕੇਨਚਿ ਨਿਯਮੇਤ੍ਵਾ ਰੋਪਿਤਂ ਸਨ੍ਧਾਯ ਵੁਤ੍ਤਂ. ਅਨੋਚਿਤਂ ਮਿਲਾਯਮਾਨਂ ਓਚਿਨਿਤ੍ਵਾ ਯਤ੍ਥ ਕਤ੍ਥਚਿ ਪੂਜੇਤੁਂ ਵਟ੍ਟਤਿ. ਠਿਤਂ ਦਿਸ੍ਵਾਤਿ ਸੇਸਕਂ ਗਹੇਤ੍ਵਾ ਠਿਤਂ ਦਿਸ੍ਵਾ. ਯਤ੍ਥ ਇਚ੍ਛਥ, ਤਤ੍ਥ ਦੇਥਾਤਿ ਏਤ੍ਥ ਨਿਯਮੇਤ੍ਵਾ ‘‘ਅਸੁਕਸ੍ਸ ਦੇਹੀ’’ਤਿ ਵੁਤ੍ਤੇਪਿ ਦੋਸੋ ਨਤ੍ਥਿ ‘‘ਤੁਮ੍ਹਾਕਂ ਰੁਚਿਯਾ’’ਤਿ ਵੁਤ੍ਤਤ੍ਤਾ. ਸਙ੍ਘੇ ਪਰਿਣਤਭਾਵੋ, ਤਂ ਞਤ੍ਵਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ.
ਪਰਿਣਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਨਿਟ੍ਠਿਤੋ ਪਤ੍ਤਵਗ੍ਗੋ ਤਤਿਯੋ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵਿਮਤਿਵਿਨੋਦਨਿਯਂ
ਤਿਂਸਕਵਣ੍ਣਨਾਨਯੋ ਨਿਟ੍ਠਿਤੋ.
ਪਠਮੋ ਭਾਗੋ ਨਿਟ੍ਠਿਤੋ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ