੧. ਪਠਮਕਥਿਨਸਿਕ੍ਖਾਪਦਵਣ੍ਣਨਾ

੪੫੯. ਸਮਿਤਾਵਿਨਾਤਿ ਸਮਿਤਪਾਪੇਨ. ਗੋਤਮਕਚੇਤਿਯਂ ਨਾਮ ਗੋਤਮਯਕ੍ਖਸ੍ਸ ਚੇਤਿਯਟ੍ਠਾਨੇ ਕਤਵਿਹਾਰੋ ਵੁਚ੍ਚਤਿ.

੪੬੧. ਨਵਮਂ ਵਾ ਦਸਮਂ ਵਾਤਿ ਭੁਮ੍ਮਤ੍ਥੇ ਉਪਯੋਗਵਚਨਂ. ਸਚੇ ਭਵੇਯ੍ਯਾਤਿ ਸਚੇ ਕਸ੍ਸਚਿ ਕਙ੍ਖਾ ਭਵੇਯ੍ਯ. ਵੁਤ੍ਤਸਦਿਸਨ੍ਤਿ ਦਸਮਂ ਵਾਤਿ ਵੁਤ੍ਤਸਦਿਸਂ ਪਰਿਚ੍ਛੇਦਸਦਿਸਂ, ‘‘ਵੁਤ੍ਤਸਦਿਸਮੇਵਾ’’ਤਿਪਿ ਲਿਖਨ੍ਤਿ. ਧਾਰੇਤੁਨ੍ਤਿ ਏਤ੍ਥ ਆਹਾਤਿ ਪਾਠਸੇਸੋ ਦਟ੍ਠਬ੍ਬੋ.

੪੬੩. ਸੂਚਿਯਾ ਪਟਿਸਾਮਨਨ੍ਤਿ ਸੂਚਿਘਰੇ ਸਂਗੋਪਨਂ, ਇਦਞ੍ਚ ਸੂਚਿਕਮ੍ਮਸ੍ਸ ਸਬ੍ਬਸ੍ਸ ਪਰਿਨਿਟ੍ਠਿਤਭਾਵਦਸ੍ਸਨਤ੍ਥਂ ਵੁਤ੍ਤਂ. ਏਤਨ੍ਤਿ ਨਟ੍ਠਚੀਵਰਂ. ਏਤੇਸਮ੍ਪੀਤਿ ਨਟ੍ਠਚੀਵਰਾਦੀਨਿ ਪਰਾਮਸਤਿ, ਤੇਨ ਚੀਵਰਪਲਿਬੋਧਾਭਾਵਂ ਦਸ੍ਸੇਤਿ. ਦੁਤਿਯਸ੍ਸ ਪਲਿਬੋਧਸ੍ਸਾਤਿ ਆਵਾਸਪਲਿਬੋਧਸ੍ਸ. ਏਤ੍ਥ ਚ ਨਿਟ੍ਠਿਤਚੀਵਰਸ੍ਮਿਂ, ਉਬ੍ਭਤਸ੍ਮਿਂ ਕਥਿਨੇਤਿ ਦ੍ਵੀਹਿ ਪਦੇਹਿ ਦ੍ਵਿਨ੍ਨਂ ਪਲਿਬੋਧਾਨਂ ਅਭਾਵਦਸ੍ਸਨੇਨ ਅਤ੍ਥਤਕਥਿਨਸ੍ਸ ਪਞ੍ਚਮਾਸਬ੍ਭਨ੍ਤਰੇ ਯਾਵ ਚੀਵਰਪਲਿਬੋਧਆਵਾਸਪਲਿਬੋਧੇਸੁ ਅਞ੍ਞਤਰਂ ਨ ਉਪਚ੍ਛਿਜ੍ਜਤਿ, ਤਾਵ ਅਤਿਰੇਕਚੀਵਰਂ ਧਾਰੇਤੁਂ ਵਟ੍ਟਤੀਤਿ ਦੀਪੇਤਿ. ਪਕ੍ਕਮਨਂ ਅਨ੍ਤੋ ਅਸ੍ਸਾਤਿ ਪਕ੍ਕਮਨਨ੍ਤਿਕਾ, ਏਵਂ ਸੇਸਾਪਿ ਵੇਦਿਤਬ੍ਬਾ. ਵਿਤ੍ਥਾਰੋ ਪਨੇਤ੍ਥ ਆਗਤਟ੍ਠਾਨੇ ਆਵਿ ਭਵਿਸ੍ਸਤਿ.

ਦਸਾਹਪਰਮਂ ਕਾਲਨ੍ਤਿ ਅਚ੍ਚਨ੍ਤਸਂਯੋਗਵਚਨਂ. ਇਦਞ੍ਹਿ ਵੁਤ੍ਤਂ ਹੋਤਿ…ਪੇ… ਦਸਾਹਪਰਮਭਾਵੋਤਿ ਇਦਂ ਦਸਾਹਪਰਮਤਾਪਦਸ੍ਸ ਅਤ੍ਥਮਤ੍ਤਦਸ੍ਸਨਂ, ਦਸਾਹਪਰਮਭਾਵੋਤਿ ਇਦਞ੍ਹਿ ਵੁਤ੍ਤਂ ਹੋਤੀਤਿ ਏਵਮੇਤ੍ਥ ਯੋਜਨਾ ਵੇਦਿਤਬ੍ਬਾ. ਅਯਮਤ੍ਥੋਤਿਆਦਿ ਦਸਾਹਪਰਮਪਦਸ੍ਸੇਵ ਅਧਿਪ੍ਪੇਤਤ੍ਥਦਸ੍ਸਨਵਸੇਨ ਵੁਤ੍ਤਂ. ਤਤ੍ਥ ਏਤ੍ਤਕੋ ਕਾਲੋਤਿ ‘‘ਦਸਾਹਪਰਮਤਾ’’ਤਿ ਵੁਤ੍ਤੋ ਯੋ ਕਾਲੋ, ਸੋ ਏਤ੍ਤਕੋ ਕਾਲੋਤਿ ਅਤ੍ਥੋ.

ਖੋਮਨ੍ਤਿ ਖੋਮਸੁਤ੍ਤੇਹਿ ਵਾਯਿਤਂ ਖੋਮਪਟਚੀਵਰਂ, ਤਂ ਵਾਕਮਯਨ੍ਤਿ ਵਦਨ੍ਤਿ. ਕਪ੍ਪਾਸਸੁਤ੍ਤੇਹਿ ਵਾਯਿਤਂ ਕਪ੍ਪਾਸਿਕਂ, ਏਵਂ ਸੇਸਾਨਿਪਿ. ਕਮ੍ਬਲਨ੍ਤਿ ਏਲ਼ਕਾਦੀਨਂ ਲੋਮਮਯਸੁਤ੍ਤੇਨ ਵਾਯਿਤਪਟਂ. ਭਙ੍ਗਨ੍ਤਿ ਖੋਮਸੁਤ੍ਤਾਦੀਨਿ ਸਬ੍ਬਾਨਿ, ਏਕਚ੍ਚਾਨਿ ਵਾ ਮਿਸ੍ਸੇਤ੍ਵਾ ਵਾਯਿਤਂ ਚੀਵਰਂ. ਭਙ੍ਗਮ੍ਪਿ ਵਾਕਮਯਮੇਵਾਤਿ ਕੇਚਿ. ਦੁਕੂਲਂ ਪਤ੍ਤੁਣ੍ਣਂ ਸੋਮਾਰਪਟਂ ਚੀਨਪਟਂ ਇਦ੍ਧਿਜਂ ਦੇਵਦਿਨ੍ਨਨ੍ਤਿ ਇਮਾਨਿ ਪਨ ਛ ਚੀਵਰਾਨਿ ਏਤੇਸਞ੍ਞੇਵ ਅਨੁਲੋਮਾਨੀਤਿ ਵਿਸੁਂ ਨ ਵੁਤ੍ਤਾਨਿ. ਦੁਕੂਲਞ੍ਹਿ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ. ‘‘ਪਤ੍ਤੁਣ੍ਣਂ ਕੋਸੇਯ੍ਯਵਿਸੇਸੋ’’ਤਿ ਅਭਿਧਾਨਕੋਸੇ ਵੁਤ੍ਤਂ. ਸੋਮਾਰਦੇਸੇ, ਚੀਨਦੇਸੇ ਚ ਜਾਤਵਤ੍ਥਾਨਿ ਸੋਮਾਰਚੀਨਪਟਾਨਿ. ਪਤ੍ਤੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਜਨ੍ਤਿ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਚੀਵਰਂ. ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ, ਦੇਵਦਿਨ੍ਨਞ੍ਚ ਖੋਮਾਦੀਨਂ ਅਞ੍ਞਤਰਂ ਹੋਤੀਤਿ ਤੇਸਂ ਸਬ੍ਬੇਸਂ ਅਨੁਲੋਮਾਨਿ. ਮਨੁਸ੍ਸਾਨਂ ਪਕਤਿਵਿਦਤ੍ਥਿਂ ਸਨ੍ਧਾਯ ‘‘ਦ੍ਵੇ ਵਿਦਤ੍ਥਿਯੋ’’ਤਿਆਦਿ ਵੁਤ੍ਤਂ. ਇਮਿਨਾ ਦੀਘਤੋ ਵਡ੍ਢਕੀਹਤ੍ਥਪ੍ਪਮਾਣਂ ਵਿਤ੍ਥਾਰਤੋ ਤਤੋ ਉਪਡ੍ਢਪ੍ਪਮਾਣਂ ਵਿਕਪ੍ਪਨੁਪਗਨ੍ਤਿ ਦਸ੍ਸੇਤਿ. ਤਥਾ ਹਿ ‘‘ਸੁਗਤਵਿਦਤ੍ਥਿ ਨਾਮ ਇਦਾਨਿ ਮਜ੍ਝਿਮਸ੍ਸ ਪੁਰਿਸਸ੍ਸ ਤਿਸ੍ਸੋ ਵਿਦਤ੍ਥਿਯੋ, ਵਡ੍ਢਕੀਹਤ੍ਥੇਨ ਦਿਯਡ੍ਢੋ ਹਤ੍ਥੋ ਹੋਤੀ’’ਤਿ (ਪਾਰਾ. ਅਟ੍ਠ. ੨.੩੪੮-੩੪੯) ਕੁਟਿਕਾਰਸਿਕ੍ਖਾਪਦਟ੍ਠਕਥਾਯਂ ਵੁਤ੍ਤਂ, ਤਸ੍ਮਾ ਸੁਗਤਙ੍ਗੁਲੇਨ ਦ੍ਵਾਦਸਙ੍ਗੁਲਾ ਸੁਗਤਵਿਦਤ੍ਥਿ ਵਡ੍ਢਕੀਹਤ੍ਥੇਨ ਦਿਯਡ੍ਢੋ ਹਤ੍ਥੋਤਿ ਸਿਦ੍ਧਂ. ਏਵਞ੍ਚ ਕਤ੍ਵਾ ‘‘ਸੁਗਤਙ੍ਗੁਲੇਨ ਅਟ੍ਠਙ੍ਗੁਲਂ ਵਡ੍ਢਕੀਹਤ੍ਥਪ੍ਪਮਾਣ’’ਨ੍ਤਿ ਆਗਤਟ੍ਠਾਨੇਹਿ ਚ ਸਮੇਤਿ.

ਤਂ ਅਤਿਕ੍ਕਾਮਯਤੋਤਿ ਏਤ੍ਥ ਤਨ੍ਤਿ ਚੀਵਰਂ, ਕਾਲਂ ਵਾ ਪਰਾਮਸਤਿ. ਤਸ੍ਸ ਯੋ ਅਰੁਣੋਤਿ ਚੀਵਰੁਪ੍ਪਾਦਦਿਵਸਸ੍ਸ ਯੋ ਅਤਿਕ੍ਕਨ੍ਤੋ ਅਰੁਣੋ. ਚੀਵਰੁਪ੍ਪਾਦਦਿਵਸੇਨ ਸਦ੍ਧਿਨ੍ਤਿ ਚੀਵਰੁਪ੍ਪਾਦਦਿਵਸਸ੍ਸ ਆਦਿਭੂਤੇਨ ਅਤਿਕ੍ਕਨ੍ਤਅਰੁਣੇਨ ਸਦ੍ਧਿਨ੍ਤਿ ਅਤ੍ਥੋ, ਇਦਞ੍ਚ ਭਗਵਤਾ ‘‘ਦਸਾਹਪਰਮ’’ਨ੍ਤਿ ਵਤ੍ਵਾ ਪੁਨ ‘‘ਏਕਾਦਸੇ ਅਰੁਣੁਗ੍ਗਮਨੇ’’ਤਿ ਵੁਤ੍ਤਤ੍ਤਾ ਪੁਬ੍ਬਾਪਰਸਂਸਨ੍ਦਨਤ੍ਥਂ ਸਦ੍ਦਤੋ ਗਮ੍ਮਮਾਨਮ੍ਪਿ ‘‘ਚੀਵਰੁਪ੍ਪਾਦਦਿਵਸੇਨ ਸਦ੍ਧਿ’’ਨ੍ਤਿ ਏਵਂ ਵੁਤ੍ਤਂ. ‘‘ਦਸਮੇ ਅਰੁਣੇ’’ਤਿ ਵੁਤ੍ਤੇ ਏਵ ਹਿ ਦਸਾਹਪਰਮੇਨ ਸਦ੍ਧਿਂ ਸਮੇਤਿ. ਦਿਵਸਪਰਿਯੋਸਾਨਸ੍ਸ ਅਵਧਿਭੂਤਅਨਾਗਤਾਰੁਣਵਸੇਨ ਹਿ ਦਿਵਸਂ ਅਤਿਕ੍ਕਨ੍ਤਂ ਨਾਮ ਹੋਤਿ, ਨ ਪਨ ਦਿਵਸਸ੍ਸ ਆਦਿਭੂਤਾਰੁਣਵਸੇਨ ਪਰਿਵਾਸਾਦੀਸੁ ਤਥਾ ਅਗ੍ਗਹਣਤੋ, ਇਧ ਪਨ ਭਗਵਤਾ ਦਿਵਸਸ੍ਸ ਆਦਿਅਨ੍ਤਪਰਿਚ੍ਛੇਦਦਸ੍ਸਨਵਸੇਨ ‘‘ਏਕਾਦਸੇ ਅਰੁਣੁਗ੍ਗਮਨੇ’’ਤਿ ਵੁਤ੍ਤਂ, ਤਸ੍ਮਾ ਅਟ੍ਠਕਥਾਯਂ ਦਿਵਸਸ੍ਸ ਆਦਿਭੂਤਂ ਤਂਦਿਵਸਨਿਸ੍ਸਿਤਮ੍ਪਿ ਅਰੁਣਂ ਗਹੇਤ੍ਵਾ ‘‘ਏਕਾਦਸੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤੀ’’ਤਿ ਵੁਤ੍ਤਂ. ਅਰੁਣੋਤਿ ਚੇਤ੍ਥ ਸੂਰਿਯੁਗ੍ਗਮਨਸ੍ਸ ਪੁਰੇਚਰੋ ਵਡ੍ਢਨਘਨਰਤ੍ਤੋ ਪਭਾਵਿਸੇਸੋਤਿ ਦਟ੍ਠਬ੍ਬੋ.

ਵਚਨੀਯੋਤਿ ਸਙ੍ਘਾਪੇਕ੍ਖੋ. ਵਚਨਭੇਦੋਤਿ ‘‘ਞਤ੍ਤਿਯਂ ਦ੍ਵੇ ਆਪਤ੍ਤਿਯੋ ਸਰਤੀ’’ਤਿਆਦਿਨਾ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋ.

੪੬੮. ‘‘ਨ ਇਧ ਸਞ੍ਞਾ ਰਕ੍ਖਤੀ’’ਤਿ ਇਦਂ ਵੇਮਤਿਕਞ੍ਚ ਅਨਤਿਕ੍ਕਨ੍ਤਸਞ੍ਞਞ੍ਚ ਸਨ੍ਧਾਯ ਵੁਤ੍ਤਂ. ਯੋਪਿ ਏਵਂਸਞ੍ਞੀ ਤਸ੍ਸਪੀਤਿ ਯੋ ਅਨਤਿਕ੍ਕਨ੍ਤਸਞ੍ਞੀ, ਵੇਮਤਿਕੋ ਵਾ, ਤਸ੍ਸਪੀਤਿ ਅਤ੍ਥੋ. ਅਨਟ੍ਠਤੋ ਅਵਿਲੁਤ੍ਤਸ੍ਸ ਵਿਸੇਸਮਾਹ ‘‘ਪਸਯ੍ਹਾਵਹਾਰਵਸੇਨਾ’’ਤਿ. ਥੇਯ੍ਯਾਵਹਾਰਵਸੇਨ ਗਹਿਤਮ੍ਪਿ ਇਧ ਨਟ੍ਠਂ.

ਅਨਾਪਤ੍ਤਿ ਅਞ੍ਞੇਨ ਕਤਂ ਪਟਿਲਭਿਤ੍ਵਾਤਿਆਦਿ ਨਿਸੀਦਨਸਨ੍ਥਤਂ ਸਨ੍ਧਾਯ ਵੁਤ੍ਤਂ. ਯੇਨ ਹਿ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਂ ਅਨਾਦਿਯਿਤ੍ਵਾ ਨਵਂ ਨਿਸੀਦਨਸਨ੍ਥਤਂ ਕਤਂ, ਤਸ੍ਸ ਤਂ ਨਿਸ੍ਸਗ੍ਗਿਯਮ੍ਪਿ ਤਤੋ ਅਞ੍ਞਸ੍ਸ ਪਟਿਲਭਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿਕਰਨ੍ਤਿ ਸਿਜ੍ਝਨਤੋ ਅਯਮਤ੍ਥੋ ਸਬ੍ਬਨਿਸ੍ਸਗ੍ਗਿਯੇਸੁਪਿ ਸਿਜ੍ਝਤਿ.

੪੬੯. ਤਿਚੀਵਰਂ ਅਧਿਟ੍ਠਾਤੁਨ੍ਤਿ ਸਙ੍ਘਾਟਿਆਦਿਨਾਮੇਨ ਅਧਿਟ੍ਠਾਤੁਂ. ‘‘ਨ ਵਿਕਪ੍ਪੇਤੁ’’ਨ੍ਤਿ ਇਮਿਨਾ ਨਾਮੇਨ ਨ ਵਿਕਪ੍ਪੇਤੁਂ, ਏਤੇਨ ਵਿਕਪ੍ਪਿਤਤਿਚੀਵਰੋ ਤੇਚੀਵਰਿਕੋ ਨ ਹੋਤਿ. ਤਸ੍ਸ ਤਸ੍ਮਿਂ ਅਧਿਟ੍ਠਿਤਤਿਚੀਵਰੇ ਵਿਯ ਅਵਿਪ੍ਪਵਾਸਾਦਿਨਾ ਕਤ੍ਤਬ੍ਬਵਿਧਿ ਨ ਕਾਤਬ੍ਬੋਤਿ ਦਸ੍ਸੇਤਿ, ਨ ਪਨ ਵਿਕਪ੍ਪਨੇ ਦੋਸੋਤਿ. ਤਤੋ ਪਰਨ੍ਤਿ ਚਤੁਮਾਸਤੋ ਪਰਂ ਵਿਕਪ੍ਪੇਤ੍ਵਾ ਪਰਿਭੁਞ੍ਜਿਤੁਂ ਅਨੁਞ੍ਞਾਤਨ੍ਤਿ ਕੇਚਿ ਵਦਨ੍ਤਿ, ਅਞ੍ਞੇ ਪਨ ‘‘ਵਿਕਪ੍ਪੇਤ੍ਵਾ ਯਾਵ ਆਗਾਮਿਵਸ੍ਸਾਨਂ, ਤਾਵ ਠਪੇਤੁਮੇਵ ਵਟ੍ਟਤੀ’’ਤਿ ਵਦਨ੍ਤਿ, ਅਪਰੇ ਪਨ ‘‘ਵਿਕਪ੍ਪਨੇ ਨ ਦੋਸੋ, ਤਥਾ ਵਿਕਪ੍ਪਿਤਂ ਪਰਿਕ੍ਖਾਰਾਦਿਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬ’’ਨ੍ਤਿ ਵਦਨ੍ਤਿ.

ਮੁਟ੍ਠਿਪਞ੍ਚਕਨ੍ਤਿ ਮੁਟ੍ਠਿਯਾ ਉਪਲਕ੍ਖਿਤਂ ਪਞ੍ਚਕਂ, ਚਤੁਹਤ੍ਥੇ ਮਿਨਿਤ੍ਵਾ ਪਞ੍ਚਮਂ ਹਤ੍ਥਂ ਮੁਟ੍ਠਿਂ ਕਤ੍ਵਾ ਮਿਨਿਤਬ੍ਬਨ੍ਤਿ ਅਧਿਪ੍ਪਾਯੋ. ਕੇਚਿ ਪਨ ‘‘ਮੁਟ੍ਠਿਹਤ੍ਥਾਨਂ ਪਞ੍ਚਕਂ ਮੁਟ੍ਠਿਪਞ੍ਚਕਂ, ਤਸ੍ਮਾ ਪਞ੍ਚਪਿ ਹਤ੍ਥੇ ਮੁਟ੍ਠਿਂ ਕਤ੍ਵਾਵ ਮਿਨਿਤਬ੍ਬਾ’’ਤਿ ਵਦਨ੍ਤਿ. ਮੁਟ੍ਠਿਤ੍ਤਿਕਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਦ੍ਵਿਹਤ੍ਥੇਨ ਅਨ੍ਤਰਵਾਸਕੇਨ ਤਿਮਣ੍ਡਲਂ ਪਟਿਚ੍ਛਾਦੇਤੁਂ ਸਕ੍ਕਾਤਿ ਆਹ ‘‘ਪਾਰੁਪਨੇਨਾ’’ਤਿਆਦਿ. ਅਤਿਰੇਕਨ੍ਤਿ ਸੁਗਤਚੀਵਰਪ੍ਪਮਾਣਤੋ ਅਧਿਕਂ. ਊਨਕਨ੍ਤਿ ਮੁਟ੍ਠਿਪਞ੍ਚਕਾਦਿਤੋ ਊਨਕਂ, ਤੇਨ ਚ ਤੇਸੁ ਤਿਚੀਵਰਾਧਿਟ੍ਠਾਨਂ ਨ ਰੁਹਤੀਤਿ ਦਸ੍ਸੇਤਿ.

ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀਤਿ ਇਮਂ ਸਙ੍ਘਾਟਿਅਧਿਟ੍ਠਾਨਂ ਉਕ੍ਖਿਪਾਮਿ ਪਰਿਚ੍ਚਜਾਮੀਤਿ ਅਤ੍ਥੋ. ਕਾਯਵਿਕਾਰਂ ਕਰੋਨ੍ਤੇਨਾਤਿ ਹਤ੍ਥੇਨ ਚੀਵਰਂ ਪਰਾਮਸਨ੍ਤੇਨ, ਚਾਲੇਨ੍ਤੇਨ ਵਾ. ਵਾਚਾਯ ਅਧਿਟ੍ਠਾਤਬ੍ਬਾਤਿ ਏਤ੍ਥ ਕਾਯੇਨਪਿ ਚਾਲੇਤ੍ਵਾ ਵਾਚਮ੍ਪਿ ਭਿਨ੍ਦਿਤ੍ਵਾ ਕਾਯਵਾਚਾਹਿ ਅਧਿਟ੍ਠਾਨਮ੍ਪਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ ‘‘ਕਾਯੇਨ ਅਫੁਸਿਤ੍ਵਾ’’ਤਿ ਵੁਤ੍ਤਤ੍ਤਾ. ਦੁਵਿਧਨ੍ਤਿ ਅਹਤ੍ਥਪਾਸਹਤ੍ਥਪਾਸਵਸੇਨ ਦੁਵਿਧਂ. ਤਤ੍ਥ ਹਤ੍ਥਪਾਸੋ ਨਾਮ ਅਡ੍ਢਤੇਯ੍ਯਹਤ੍ਥੋ ਵੁਚ੍ਚਤਿ. ਦ੍ਵਾਦਸਹਤ੍ਥਨ੍ਤਿ ਕੇਚਿ ਵਦਨ੍ਤਿ, ਤਂ ਇਧ ਨ ਸਮੇਤਿ. ‘‘ਸਾਮਨ੍ਤਵਿਹਾਰੇ’’ਤਿ ਇਦਂ ਠਪਿਤਟ੍ਠਾਨਸਲ੍ਲਕ੍ਖਣਯੋਗ੍ਗੇ ਠਿਤਂ ਸਨ੍ਧਾਯ ਵੁਤ੍ਤਂ. ਤਤੋ ਦੂਰੇ ਠਿਤਮ੍ਪਿ ਠਪਿਤਟ੍ਠਾਨਂ ਸਲ੍ਲਕ੍ਖੇਨ੍ਤੇਨ ਅਧਿਟ੍ਠਾਤਬ੍ਬਮੇਵ. ਤਤ੍ਥਪਿ ਚੀਵਰਸ੍ਸ ਠਪਿਤਭਾਵਸਲ੍ਲਕ੍ਖਣਮੇਵ ਪਮਾਣਂ. ਨ ਹਿ ਸਕ੍ਕਾ ਸਬ੍ਬਥਾ ਠਾਨਂ ਸਲ੍ਲਕ੍ਖੇਤੁਂ. ਏਕਸ੍ਮਿਂ ਵਿਹਾਰੇ ਠਪੇਤ੍ਵਾ ਤਤੋ ਅਞ੍ਞਸ੍ਮਿਂ ਠਪਿਤਨ੍ਤਿ ਅਧਿਟ੍ਠਾਤੁਂ ਨ ਵਟ੍ਟਤਿ. ਕੇਚਿ ਪਨ ‘‘ਤਥਾਪਿ ਅਧਿਟ੍ਠਿਤੇ ਨ ਦੋਸੋ’’ਤਿ ਵਦਨ੍ਤਿ, ਤਂ ਅਟ੍ਠਕਥਾਯ ਨ ਸਮੇਤਿ, ਵੀਮਂਸਿਤਬ੍ਬਂ. ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹੀਤਿ ਪਰਿਕ੍ਖਾਰਚੋਲ਼ਨਾਮੇਨ ਅਧਿਟ੍ਠਹਿਤ੍ਵਾ ਠਪਿਤਵਤ੍ਥੇਹਿ, ਤੇਨੇਵ ‘‘ਇਮਂ ਪਚ੍ਚੁਦ੍ਧਰਾਮੀ’’ਤਿ ਪਰਿਕ੍ਖਾਰਚੋਲ਼ਸ੍ਸ ਪਚ੍ਚੁਦ੍ਧਾਰਂ ਦਸ੍ਸੇਤਿ. ਏਤੇਨ ਚ ਤੇਚੀਵਰਧੁਤਙ੍ਗਂ ਪਰਿਹਰਨ੍ਤੇਨ ਪਂਸੁਕੂਲਾਦਿਵਸੇਨ ਲਦ੍ਧਂ ਵਤ੍ਥਂ ਦਸਾਹਬ੍ਭਨ੍ਤਰੇ ਕਤ੍ਵਾ ਰਜਿਤ੍ਵਾ ਪਾਰੁਪਿਤੁਂ ਅਸਕ੍ਕੋਨ੍ਤੇਨ ਪਰਿਕ੍ਖਾਰਚੋਲ਼ਵਸੇਨ ਅਧਿਟ੍ਠਹਿਤ੍ਵਾਵ ਦਸਾਹਂ ਅਤਿਕ੍ਕਮੇਤਬ੍ਬਂ, ਇਤਰਥਾ ਨਿਸ੍ਸਗ੍ਗਿਯਂ ਹੋਤੀਤਿ ਦਸ੍ਸੇਤਿ. ਤੇਨੇਵ ‘‘ਰਜਿਤਕਾਲਤੋ ਪਨ ਪਟ੍ਠਾਯ ਨਿਕ੍ਖਿਪਿਤੁਂ ਨ ਵਟ੍ਟਤਿ, ਧੁਤਙ੍ਗਚੋਰੋ ਨਾਮ ਹੋਤੀ’’ਤਿ (ਵਿਸੁਦ੍ਧਿ. ੧.੨੫) ਵਿਸੁਦ੍ਧਿਮਗ੍ਗੇ ਵੁਤ੍ਤਂ. ‘‘ਪੁਨ ਅਧਿਟ੍ਠਾਤਬ੍ਬਾਨੀ’’ਤਿ ਇਦਞ੍ਚ ਸਙ੍ਘਾਟਿਆਦਿਤਿਚੀਵਰਨਾਮੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤੁਕਾਮਸ੍ਸ ਵਸੇਨ ਵੁਤ੍ਤਂ, ਇਤਰਸ੍ਸ ਪਨ ਪੁਰਿਮਾਧਿਟ੍ਠਾਨਮੇਵ ਅਲਨ੍ਤਿ ਵੇਦਿਤਬ੍ਬਂ. ‘‘ਪੁਨ ਅਧਿਟ੍ਠਾਤਬ੍ਬ’’ਨ੍ਤਿ ਇਮਿਨਾ ਕਪ੍ਪਬਿਨ੍ਦੁਪਿ ਦਾਤਬ੍ਬਨ੍ਤਿ ਦਸ੍ਸੇਤਿ.

ਬਦ੍ਧਸੀਮਾਯਂ ਅਵਿਪ੍ਪਵਾਸਸੀਮਾਸਮ੍ਮੁਤਿਸਮ੍ਭਵਤੋ ਨ ਤਤ੍ਥ ਦੁਪ੍ਪਰਿਹਾਰਤਾਤਿ ਆਹ ‘‘ਅਬਦ੍ਧਸੀਮਾਯਂ ਦੁਪ੍ਪਰਿਹਾਰ’’ਨ੍ਤਿ.

ਅਤਿਰਿਤ੍ਤਪ੍ਪਮਾਣਾਯ ਛੇਦਨਕਂ ਪਾਚਿਤ੍ਤਿਯਨ੍ਤਿ ਆਹ ‘‘ਅਨਤਿਰਿਤ੍ਤਪ੍ਪਮਾਣਾ’’ਤਿ. ਤਤੋ ਪਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾਤਿ ਵਸ੍ਸਿਕਮਾਸਤੋ ਪਰਂ ਅਧਿਟ੍ਠਾਨਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਾ, ਇਮਿਨਾ ਚਤੁਨ੍ਨਂ ਵਸ੍ਸਿਕਮਾਸਾਨਂ ਉਪਰਿ ਅਧਿਟ੍ਠਾਨਂ ਤਿਟ੍ਠਤੀਤਿ ਵਿਞ੍ਞਾਯਤਿ ਤਤੋ ਪਚ੍ਚੁਦ੍ਧਰਾਯੋਗਾ. ਯਞ੍ਚ ਮਾਤਿਕਾਟ੍ਠਕਥਾਯਂ ‘‘ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਨਾਪਿ, ਕਣ੍ਡੁਪਟਿਚ੍ਛਾਦਿ ਆਬਾਧਵੂਪਸਮੇਨਾਪਿ ਅਧਿਟ੍ਠਾਨਂ ਵਿਜਹਤੀ’’ਤਿ (ਕਙ੍ਖਾ. ਅਟ੍ਠ. ਕਥਿਨਸਿਕ੍ਖਾਪਦਵਣ੍ਣਨਾ) ਵੁਤ੍ਤਂ, ਤਂ ਸਮਨ੍ਤਪਾਸਾਦਿਕਾਯਂ ਨਤ੍ਥਿ. ਪਰਿਵਾਰਟ੍ਠਕਥਾਯਞ੍ਚ ‘‘ਅਤ੍ਥਾਪਤ੍ਤਿ ਹੇਮਨ੍ਤੇ ਆਪਜ੍ਜਤਿ, ਨੋ ਗਿਮ੍ਹੇ’’ਤਿ ਏਤ੍ਥ ਇਦਂ ਵੁਤ੍ਤਂ ‘‘ਕਤ੍ਤਿਕਪੁਣ੍ਣਮਾਸਿਯਾ ਪਚ੍ਛਿਮੇ ਪਾਟਿਪਦਦਿਵਸੇ ਵਿਕਪ੍ਪੇਤ੍ਵਾ ਠਪਿਤਂ ਵਸ੍ਸਿਕਸਾਟਿਕਂ ਨਿਵਾਸੇਨ੍ਤੋ ਹੇਮਨ੍ਤੇ ਆਪਜ੍ਜਤਿ, ਕੁਰੁਨ੍ਦਿਯਂ ਪਨ ‘ਕਤ੍ਤਿਕਪੁਣ੍ਣਮਦਿਵਸੇ ਅਪਚ੍ਚੁਦ੍ਧਰਿਤ੍ਵਾ ਹੇਮਨ੍ਤੇ ਆਪਜ੍ਜਤੀ’ਤਿ ਵੁਤ੍ਤਂ, ਤਮ੍ਪਿ ਸੁਵੁਤ੍ਤਂ, ‘ਚਤੁਮਾਸਂ ਅਧਿਟ੍ਠਾਤੁਂ ਤਤੋ ਪਰਂ ਵਿਕਪ੍ਪੇਤੁ’ਨ੍ਤਿ ਹਿ ਵੁਤ੍ਤ’’ਨ੍ਤਿ (ਪਰਿ. ਅਟ੍ਠ. ੩੨੩). ਤਤ੍ਥ ਮਹਾਅਟ੍ਠਕਥਾਯਂ ਨਿਵਾਸਨਪਚ੍ਚਯਾ ਦੁਕ੍ਕਟਂ ਵੁਤ੍ਤਂ, ਕੁਰੁਨ੍ਦਟ੍ਠਕਥਾਯਂ ਪਨ ਅਪਚ੍ਚੁਦ੍ਧਾਰਪਚ੍ਚਯਾ, ਤਸ੍ਮਾ ਕੁਰੁਨ੍ਦਿਯਂ ਵੁਤ੍ਤਨਯੇਨਾਪਿ ਵਸ੍ਸਿਕਸਾਟਿਕਾ ਵਸ੍ਸਾਨਮਾਸਾਤਿਕ੍ਕਮੇਪਿ ਅਧਿਟ੍ਠਾਨਂ ਨ ਵਿਜਹਤੀਤਿ ਪਞ੍ਞਾਯਤਿ. ਅਧਿਟ੍ਠਾਨਵਿਜਹਨੇਸੁ ਚ ਵਸ੍ਸਾਨਮਾਸਆਬਾਧਾਨਂ ਵਿਗਮੇਨ ਵਿਜਹਨਂ ਮਾਤਿਕਾਟ੍ਠਕਥਾਯਮ੍ਪਿ ਨ ਉਦ੍ਧਟਂ, ਤਸ੍ਮਾ ਸਮਨ੍ਤਪਾਸਾਦਿਕਾਯਂ ਆਗਤਨਯੇਨ ਯਾਵ ਪਚ੍ਚੁਦ੍ਧਾਰਾ ਅਧਿਟ੍ਠਾਨਂ ਤਿਟ੍ਠਤੀਤਿ ਗਹੇਤਬ੍ਬਂ. ਨਹਾਨਤ੍ਥਾਯ ਅਨੁਞ੍ਞਾਤਤ੍ਤਾ ‘‘ਵਣ੍ਣਭੇਦਮਤ੍ਤਰਤ੍ਤਾਪਿ ਚੇਸਾ ਵਟ੍ਟਤੀ’’ਤਿ ਵੁਤ੍ਤਂ. ‘‘ਦ੍ਵੇ ਪਨ ਨ ਵਟ੍ਟਨ੍ਤੀ’’ਤਿ ਇਮਿਨਾ ਸਙ੍ਘਾਟਿਆਦੀਸੁ ਵਿਯ ਦੁਤਿਯੇ ਅਧਿਟ੍ਠਾਨਂ ਨ ਰੁਹਤਿ, ਅਤਿਰੇਕਚੀਵਰਂ ਹੋਤੀਤਿ ਦਸ੍ਸੇਤਿ. ਮਹਾਪਚ੍ਚਰਿਯਂ ਚੀਵਰਵਸੇਨ ਪਰਿਭੋਗਕਿਚ੍ਚਸ੍ਸ ਅਭਾਵਂ ਸਨ੍ਧਾਯ ਅਨਾਪਤ੍ਤਿ ਵੁਤ੍ਤਾ ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣੇ ਵਿਯ. ਯਂ ਪਨ ‘‘ਪਚ੍ਚਤ੍ਥਰਣਮ੍ਪਿ ਅਧਿਟ੍ਠਾਤਬ੍ਬ’’ਨ੍ਤਿ ਵੁਤ੍ਤਂ, ਤਂ ਸੇਨਾਸਨਤ੍ਥਾਯੇਵਾਤਿ ਨਿਯਮਿਤਂ ਨ ਹੋਤਿ ਨਵਸੁ ਚੀਵਰੇਸੁ ਗਹਿਤਤ੍ਤਾ, ਤਸ੍ਮਾ ਅਤ੍ਤਨੋ ਨਾਮੇਨ ਅਧਿਟ੍ਠਹਿਤ੍ਵਾ ਨਿਦਹਿਤ੍ਵਾ ਪਰਿਕ੍ਖਾਰਚੋਲ਼ਂ ਵਿਯ ਯਥਾ ਤਥਾ ਵਿਨਿਯੁਜ੍ਜਿਤਬ੍ਬਮੇਵਾਤਿ ਗਹੇਤਬ੍ਬਂ. ਪਾਵਾਰੋ ਕੋਜਵੋਤਿ ਇਮੇਸਮ੍ਪਿ ਪਚ੍ਚਤ੍ਥਰਣਾਦੀਨਂ ਲੋਕੇਪਿ ਵੋਹਰਣਤੋ ਸੇਨਾਸਨਪਰਿਕ੍ਖਾਰਤ੍ਥਾਯ ਦਿਨ੍ਨਪਚ੍ਚਤ੍ਥਰਣਤੋ ਵਿਸੁਂ ਗਹਣਂ ਕਤਂ.

‘‘ਹੀਨਾਯਾਵਤ੍ਤਨੇਨਾ’’ਤਿ ਇਦਂ ਅਨ੍ਤਿਮਵਤ੍ਥੁਂ ਅਜ੍ਝਾਪਜ੍ਜਿਤ੍ਵਾ ਭਿਕ੍ਖੁਪਟਿਞ੍ਞਾਯ ਠਿਤਸ੍ਸ ਚੇਵ ਤਿਤ੍ਥਿਯਪਕ੍ਕਨ੍ਤਸ੍ਸ ਚ ਭਿਕ੍ਖੁਨਿਯਾ ਚ ਭਿਕ੍ਖੁਨਿਭਾਵੇ ਨਿਰਪੇਕ੍ਖਤਾਯ ਗਿਹਿਲਿਙ੍ਗਤਿਤ੍ਥਿਯਲਿਙ੍ਗਗ੍ਗਹਣਂ ਸਨ੍ਧਾਯ ਵੁਤ੍ਤਂ. ਸਿਕ੍ਖਂ ਅਪਚ੍ਚਕ੍ਖਾਯ ਗਿਹਿਭਾਵੂਪਗਮਨਂ ਸਨ੍ਧਾਯ ਵੁਤ੍ਤਨ੍ਤਿ ਕੇਚਿ ਵਦਨ੍ਤਿ, ਤਂ ਨ ਯੁਤ੍ਤਂ ਤਦਾਪਿਸ੍ਸ ਉਪਸਮ੍ਪਨ੍ਨਤ੍ਤਾ, ਚੀਵਰਸ੍ਸ ਚ ਤਸ੍ਸ ਸਨ੍ਤਕਤ੍ਤਾਵਿਜਹਨਤੋ. ਪਮਾਣਚੀਵਰਸ੍ਸਾਤਿ ਪਚ੍ਛਿਮਪ੍ਪਮਾਣਂ ਸਨ੍ਧਾਯ ਵੁਤ੍ਤਂ. ਦ੍ਵੇ ਚੀਵਰਾਨਿ ਪਾਰੁਪਨ੍ਤਸ੍ਸਾਤਿ ਗਾਮਪ੍ਪਵੇਸੇ ਦਿਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਨਂ ਸਨ੍ਧਾਯ ਵੁਤ੍ਤਂ. ‘‘ਏਸ ਨਯੋ’’ਤਿ ਇਮਿਨਾ ਪਮਾਣਯੁਤ੍ਤੇਸੁ ਯਤ੍ਥ ਕਤ੍ਥਚਿ ਛਿਦ੍ਦਂ ਅਧਿਟ੍ਠਾਨਂ ਵਿਜਹਤੀਤਿਆਦਿਅਤ੍ਥਂ ਸਙ੍ਗਣ੍ਹਾਤਿ.

ਅਞ੍ਞਂ ਪਚ੍ਛਿਮਪ੍ਪਮਾਣਂ ਨਾਮ ਨਤ੍ਥੀਤਿ ਸੁਤ੍ਤੇ ਆਗਤਂ ਨਤ੍ਥੀਤਿ ਅਧਿਪ੍ਪਾਯੋ. ਇਦਾਨਿ ਤਮੇਵ ਵਿਭਾਵੇਤੁਂ ‘‘ਯਞ੍ਹੀ’’ਤਿਆਦਿ ਵੁਤ੍ਤਂ, ਤਂ ਨ ਸਮੇਤਿ, ਸਙ੍ਘਾਟਿਆਦੀਨਂ ਮੁਟ੍ਠਿਪਞ੍ਚਕਾਦਿਹੇਟ੍ਠਿਮਪ੍ਪਮਾਣਸ੍ਸ ਸੁਤ੍ਤੇ ਅਨਾਗਤਤ੍ਤਾਤਿ ਅਧਿਪ੍ਪਾਯੋ.

ਮਹਨ੍ਤਂ ਵਾ ਖੁਦ੍ਦਕਂ ਕਰੋਤੀਤਿ ਏਤ੍ਥ ਅਤਿਮਹਨ੍ਤਂ ਚੀਵਰਂ ਮੁਟ੍ਠਿਪਞ੍ਚਕਾਦਿਪਚ੍ਛਿਮਪ੍ਪਮਾਣਯੁਤ੍ਤਂ ਕਤ੍ਵਾ ਸਮਨ੍ਤਤੋ ਛਿਨ੍ਦਨੇਨਾਪਿ ਵਿਚ੍ਛਿਨ੍ਦਨਕਾਲੇ ਛਿਜ੍ਜਮਾਨਟ੍ਠਾਨਂ ਛਿਦ੍ਦਸਙ੍ਖ੍ਯਂ ਨ ਗਚ੍ਛਤਿ ਅਧਿਟ੍ਠਾਨਂ ਨ ਵਿਜਹਤਿ ਏਵਾਤਿ ਸਿਜ੍ਝਤਿ, ‘‘ਘਟੇਤ੍ਵਾ ਛਿਨ੍ਦਤਿ, ਨ ਭਿਜ੍ਜਤੀ’’ਤਿ ਵਚਨੇਨ ਚ ਸਮੇਤਿ. ਪਰਿਕ੍ਖਾਰਚੋਲ਼ਂ ਪਨ ਵਿਕਪ੍ਪਨੁਪਗਪਚ੍ਛਿਮਪ੍ਪਮਾਣਤੋ ਊਨਂ ਕਤ੍ਵਾ ਛਿਨ੍ਨਂ ਅਧਿਟ੍ਠਾਨਂ ਵਿਜਹਤਿ ਅਧਿਟ੍ਠਾਨਸ੍ਸ ਅਨਿਸ੍ਸਯਤ੍ਤਾ. ਤਾਨਿ ਪੁਨ ਬਦ੍ਧਾਨਿ ਘਟਿਤਾਨਿ ਅਧਿਟ੍ਠਾਤਬ੍ਬਮੇਵਾਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਵਸ੍ਸਿਕਸਾਟਿਕਚੀਵਰੇ ਦ੍ਵਿਧਾ ਛਿਨ੍ਨੇ ਯਦਿਪਿ ਏਕੇਕਂ ਖਣ੍ਡਂ ਪਚ੍ਛਿਮਪਚ੍ਛਿਮਪ੍ਪਮਾਣਂ ਪਹੋਤਿ, ਏਕਸ੍ਮਿਂਯੇਵ ਖਣ੍ਡੇ ਅਧਿਟ੍ਠਾਨਂ ਤਿਟ੍ਠਤਿ, ਨ ਇਤਰੇ, ‘‘ਦ੍ਵੇ ਪਨ ਨ ਵਟ੍ਟਨ੍ਤੀ’’ਤਿ ਵੁਤ੍ਤਤ੍ਤਾ. ਨਿਸੀਦਨਕਣ੍ਡੁਪ੍ਪਟਿਚ੍ਛਾਦੀਸੁਪਿ ਏਸੇਵ ਨਯੋਤਿ ਵਦਨ੍ਤਿ.

ਸਮ੍ਮੁਖੇ ਪਵਤ੍ਤਾ ਸਮ੍ਮੁਖਾਤਿ ਪਚ੍ਚਤ੍ਤਵਚਨਂ, ਤਞ੍ਚ ਵਿਕਪ੍ਪਨਵਿਸੇਸਨਂ, ਤਸ੍ਮਾ ‘‘ਸਮ੍ਮੁਖੇ’’ਤਿ ਭੁਮ੍ਮਤ੍ਥੇ ਨਿਸ੍ਸਕ੍ਕਵਚਨਂ ਕਤ੍ਵਾਪਿ ਅਤ੍ਥਂ ਵਦਨ੍ਤਿ, ਅਭਿਮੁਖੇਤਿ ਅਤ੍ਥੋ. ਅਥ ਵਾ ਸਮ੍ਮੁਖੇਨ ਅਤ੍ਤਨੋ ਵਾਚਾਯ ਏਵ ਵਿਕਪ੍ਪਨਾ ਸਮ੍ਮੁਖਾਵਿਕਪ੍ਪਨਾ. ਪਰਮ੍ਮੁਖੇਨ ਵਿਕਪ੍ਪਨਾ ਪਰਮ੍ਮੁਖਾਵਿਕਪ੍ਪਨਾਤਿ ਕਰਣਤ੍ਥੇਨਾਪਿ ਅਤ੍ਥੋ ਦਟ੍ਠਬ੍ਬੋ, ਅਯਮੇਵ ਪਾਲ਼ਿਯਾ ਸਮੇਤਿ. ਸਨ੍ਨਿਹਿਤਾਸਨ੍ਨਿਹਿਤਭਾਵਨ੍ਤਿ ਆਸਨ੍ਨਦੂਰਭਾਵਂ. ਏਤ੍ਤਾਵਤਾ ਨਿਧੇਤੁਂ ਵਟ੍ਟਤੀਤਿ ਏਤ੍ਤਕੇਨੇਵ ਵਿਕਪ੍ਪਨਾਕਿਚ੍ਚਸ੍ਸ ਨਿਟ੍ਠਿਤਤ੍ਤਾ, ਅਤਿਰੇਕਚੀਵਰਂ ਨ ਹੋਤੀਤਿ ਦਸਾਹਾਤਿਕ੍ਕਮੇ ਨ ਨਿਸ੍ਸਗ੍ਗਿਯਂ ਜਨੇਤੀਤਿ ਅਧਿਪ੍ਪਾਯੋ. ਪਰਿਭੁਞ੍ਜਿਤੁਂ…ਪੇ… ਨ ਵਟ੍ਟਤੀਤਿ ਸਯਂ ਅਪਚ੍ਚੁਦ੍ਧਰਣਂ ਪਰਿਭੁਞ੍ਜਨੇ ਪਾਚਿਤ੍ਤਿਯਂ, ਅਧਿਟ੍ਠਾਨੇ ਪਰੇਸਂ ਵਿਸ੍ਸਜ੍ਜਨੇ ਦੁਕ੍ਕਟਞ੍ਚ ਸਨ੍ਧਾਯ ਵੁਤ੍ਤਂ.

ਪਰਿਭੋਗਾਦਯੋਪਿ ਵਟ੍ਟਨ੍ਤੀਤਿ ਪਰਿਭੋਗਵਿਸ੍ਸਜ੍ਜਨਅਧਿਟ੍ਠਾਨਾਨਿਪਿ. ਅਪਿ-ਸਦ੍ਦੇਨ ਨਿਧੇਤੁਮ੍ਪਿ ਵਟ੍ਟਤੀਤਿ ਅਤ੍ਥੋ, ਏਤੇਨ ਚ ਪਚ੍ਚੁਦ੍ਧਾਰੇਪਿ ਕਤੇ ਚੀਵਰਮ੍ਪਿ ਵਿਕਪ੍ਪਿਤਚੀਵਰਮੇਵ ਹੋਤਿ, ਨ ਅਤਿਰੇਕਚੀਵਰਂ. ਤਂ ਪਨ ਤਿਚੀਵਰਾਦਿਨਾਮੇਨ ਅਧਿਟ੍ਠਾਤੁਕਾਮੇਨ ਅਧਿਟ੍ਠਹਿਤਬ੍ਬਂ, ਇਤਰੇਨ ਵਿਕਪ੍ਪਿਤਚੀਵਰਮੇਵ ਕਤ੍ਵਾ ਪਰਿਭੁਞ੍ਜਿਤਬ੍ਬਨ੍ਤਿ ਦਸ੍ਸੇਤਿ. ਕੇਚਿ ਪਨ ‘‘ਯਂ ਵਿਕਪ੍ਪਿਤਚੀਵਰਂ, ਤਂ ਯਾਵ ਅਪਰਿਭੋਗਕਾਲਾ ਅਪਚ੍ਚੁਦ੍ਧਰਾਪੇਤ੍ਵਾਵ ਨਿਦਹਿਤਬ੍ਬਂ, ਪਰਿਭੋਗਕਾਲੇ ਪਨ ਸਮ੍ਪਤ੍ਤੇ ਪਚ੍ਚੁਦ੍ਧਰਾਪੇਤ੍ਵਾ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ. ਯਦਿ ਹਿ ਤਤੋ ਪੁਰੇਪਿ ਪਚ੍ਚੁਦ੍ਧਰਾਪੇਯ੍ਯ, ਪਚ੍ਚੁਦ੍ਧਾਰੇਨੇਵ ਵਿਕਪ੍ਪਨਾਯ ਵਿਗਤਤ੍ਤਾ ਅਤਿਰੇਕਚੀਵਰਂ ਨਾਮ ਹੋਤਿ, ਦਸਾਹਾਤਿਕ੍ਕਮੇ ਚ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤਸ੍ਮਾ ਯਂ ਅਪਰਿਭੁਞ੍ਜਿਤ੍ਵਾਵ ਠਪੇਤਬ੍ਬਂ, ਤਦੇਵ ਵਿਕਪ੍ਪੇਤਬ੍ਬਂ, ਪਚ੍ਚੁਦ੍ਧਾਰੇ ਚ ਕਤੇ ਅਨ੍ਤੋਦਸਾਹੇਯੇਵ ਅਧਿਟ੍ਠਾਤਬ੍ਬਂ. ਯਞ੍ਚ ਅਟ੍ਠਕਥਾਯਂ ‘ਤਤੋ ਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤੀ’ਤਿਆਦਿ ਵੁਤ੍ਤਂ, ਤਂ ਪਾਲ਼ਿਯਾ ਵਿਰੁਜ੍ਝਤੀ’’ਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਮੇਵ. ਪਾਲ਼ਿਯਞ੍ਹਿ ‘‘ਅਨ੍ਤੋਦਸਾਹਂ ਅਧਿਟ੍ਠੇਤਿ, ਵਿਕਪ੍ਪੇਤੀ’’ਤਿ (ਪਾਰਾ. ੪੬੯) ਚ ‘‘ਸਾਮਂ ਚੀਵਰਂ ਵਿਕਪ੍ਪੇਤ੍ਵਾ ਅਪਚ੍ਚੁਦ੍ਧਾਰਣਂ ਪਰਿਭੁਞ੍ਜੇਯ੍ਯ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੩੭੩) ਚ ‘‘ਅਨਾਪਤ੍ਤਿ ਸੋ ਵਾ ਦੇਤਿ, ਤਸ੍ਸ ਵਾ ਵਿਸ੍ਸਾਸਨ੍ਤੋ ਪਰਿਭੁਞ੍ਜਤੀ’’ਤਿ (ਪਾਚਿ. ੩੭੪) ਚ ਸਾਮਞ੍ਞਤੋ ਵੁਤ੍ਤਤ੍ਤਾ, ਅਟ੍ਠਕਥਾਯਞ੍ਚ ‘‘ਇਮਂ ਚੀਵਰਂ ਵਾ ਵਿਕਪ੍ਪਨਂ ਵਾ ਪਚ੍ਚੁਦ੍ਧਰਾਮੀ’’ਤਿਆਦਿਨਾ ਪਚ੍ਚੁਦ੍ਧਾਰਂ ਅਦਸ੍ਸੇਤ੍ਵਾ ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ’’ਤਿ ਏਵਂ ਅਤ੍ਤਨੋ ਸਨ੍ਤਕਤ੍ਤਂ ਅਮੋਚੇਤ੍ਵਾਵ ਪਰਿਭੋਗਾਦਿਵਸੇਨੇਵ ਪਚ੍ਚੁਦ੍ਧਾਰਸ੍ਸ ਵੁਤ੍ਤਤ੍ਤਾ, ‘‘ਤਤੋ ਪਭੁਤਿ ਪਰਿਭੋਗਾਦਯੋਪਿ ਵਟ੍ਟਨ੍ਤੀ’’ਤਿ ਅਧਿਟ੍ਠਾਨਂ ਵਿਨਾਪਿ ਵਿਸੁਂ ਪਰਿਭੋਗਸ੍ਸ, ਨਿਦਹਨਸ੍ਸ ਚ ਵੁਤ੍ਤਤ੍ਤਾ ਵਿਕਪ੍ਪਨਾਨਨ੍ਤਰਮੇਵ ਪਚ੍ਚੁਦ੍ਧਰਾਪੇਤ੍ਵਾ ਅਨਧਿਟ੍ਠਹਿਤ੍ਵਾ ਏਵ ਤਿਚੀਵਰਵਿਰਹਿਤਂ ਵਿਕਪ੍ਪਨਾਰਹਂ ਚੀਵਰਂ ਪਰਿਭੁਞ੍ਜਿਤੁਂ, ਨਿਦਹਿਤੁਞ੍ਚ ਇਦਂ ਪਾਟੇਕ੍ਕਂ ਵਿਨਯਕਮ੍ਮਨ੍ਤਿ ਖਾਯਤਿ. ਅਪਿਚ ਬਹੂਨਂ ਪਤ੍ਤਾਨਂ ਵਿਕਪ੍ਪੇਤੁਂ, ਪਚ੍ਚੁਦ੍ਧਾਰੇਤੁਞ੍ਚ ਵੁਤ੍ਤਤ੍ਤਾ ਪਚ੍ਚੁਦ੍ਧਾਰੇਨ ਤੇਸਂ ਅਤਿਰੇਕਪਤ੍ਤਤਾ ਦਸ੍ਸਿਤਾਤਿ ਸਿਜ੍ਝਤਿ ਤੇਸੁ ਏਕਸ੍ਸੇਵ ਅਧਿਟ੍ਠਾਤਬ੍ਬਤੋ. ਤਸ੍ਮਾ ਅਟ੍ਠਕਥਾਯਂ ਆਗਤਨਯੇਨੇਵ ਗਹੇਤਬ੍ਬਂ.

ਪਞ੍ਞਤ੍ਤਿਕੋਵਿਦੋ ਨ ਹੋਤੀਤਿ ਏਵਂ ਵਿਕਪ੍ਪਿਤੇ ‘‘ਅਨਨ੍ਤਰਮੇਵ ਏਵਂ ਪਚ੍ਚੁਦ੍ਧਰਿਤਬ੍ਬ’’ਨ੍ਤਿ ਵਿਨਯਕਮ੍ਮਂ ਨ ਜਾਨਾਤਿ. ਤੇਨਾਹ ‘‘ਨ ਜਾਨਾਤਿ ਪਚ੍ਚੁਦ੍ਧਰਿਤੁ’’ਨ੍ਤਿ, ਇਮਿਨਾਪਿ ਚੇਤਂ ਵੇਦਿਤਬ੍ਬਂ ‘‘ਵਿਕਪ੍ਪਨਾਨਨ੍ਤਰਮੇਵ ਪਚ੍ਚੁਦ੍ਧਾਰੋ ਕਾਤਬ੍ਬੋ’’ਤਿ.

ਅਵਿਸੇਸੇਨ ਵੁਤ੍ਤਵਚਨਨ੍ਤਿ ਤਿਚੀਵਰਾਦੀਨਂ ਸਾਧਾਰਣਵਚਨੇਨ ਵੁਤ੍ਤਵਚਨਂ. ਯਂ ਪਨੇਤ੍ਥ ‘‘ਵਿਰੁਦ੍ਧਂ ਵਿਯ ਦਿਸ੍ਸਤੀ’’ਤਿ ਵਤ੍ਵਾ ਤਂ ਵਿਰੋਧਾਸਙ੍ਕਂ ਨਿਵਤ੍ਤੇਤੁਂ ‘‘ਤਿਚੀਵਰਸਙ੍ਖੇਪੇਨ…ਪੇ… ਵਿਕਪ੍ਪਨਾਯ ਓਕਾਸੋ ਦਿਨ੍ਨੋ ਹੋਤੀ’’ਤਿ ਵੁਤ੍ਤਂ, ਤਂ ‘‘ਅਧਿਟ੍ਠੇਤਿ ਵਿਕਪ੍ਪੇਤੀ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਤਿਚੀਵਰਮ੍ਪਿ ਵਿਕਪ੍ਪੇਤੀਤਿ ਅਯਮਤ੍ਥੋ ਨ ਸਿਜ੍ਝਤਿ, ‘‘ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਵਿਸੇਸੇਤ੍ਵਾ ਵੁਤ੍ਤਤ੍ਤਾ. ਯਂ ਪਨ ਅਧਿਟ੍ਠਾਤਬ੍ਬਂ, ਤਂ ਅਧਿਟ੍ਠਾਤਿ. ਯਂ ਤਿਚੀਵਰਵਿਰਹਿਤਂ, ਤਂ ਵਿਕਪ੍ਪੇਤਬ੍ਬਂ, ਤਂ ਵਿਕਪ੍ਪੇਤੀਤਿ ਏਵਮਤ੍ਥੋ ਸਿਜ੍ਝਤੀਤਿ. ਤਸ੍ਮਾ ਏਤ੍ਥ ਪੁਬ੍ਬਾਪਰਵਿਰੋਧੋ ਨ ਦਿਸ੍ਸਤਿ ਸਾਮਞ੍ਞਵਚਨਸ੍ਸ ਵੁਤ੍ਤਾਵਸੇਸੇਯੇਵ ਅਵਤਿਟ੍ਠਨਤੋ. ਯਂ ਪਨੇਤ੍ਥ ਤਿਚੀਵਰਸ੍ਸਾਪਿ ਵਿਕਪ੍ਪਨਵਿਧਿਂ ਦਸ੍ਸੇਤੁਂ ‘‘ਤਿਚੀਵਰਂ ਤਿਚੀਵਰਸਙ੍ਖੇਪੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਿਚੀਵਰਸਙ੍ਖੇਪੇਨ ਪਰਿਹਰਿਯਮਾਨੇਸੁ ਏਕਮ੍ਪਿ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤੁਂ ਨ ਵਟ੍ਟਤਿ, ਤਿਚੀਵਰਤੋ ਪਨ ਏਕਂ ਵਾ ਸਕਲਮੇਵ ਵਾ ਅਪਨੇਤ੍ਵਾ ਅਪਰਂ ਤਿਚੀਵਰਂ ਤਿਚੀਵਰਸਙ੍ਖੇਪੇਨ ਪਰਿਹਰਿਤੁਕਾਮਸ੍ਸ ਵਾ ਤਿਚੀਵਰਾਧਿਟ੍ਠਾਨਂ ਮੁਞ੍ਚਿਤ੍ਵਾ ਪਰਿਕ੍ਖਾਰਚੋਲ਼ਵਸੇਨੇਵ ਸਬ੍ਬਚੀਵਰਂ ਪਰਿਭੁਞ੍ਜਿਤੁਕਾਮਸ੍ਸ ਵਾ ਪੁਰਿਮਂ ਅਧਿਟ੍ਠਿਤਚੀਵਰਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤੁਂ ਵਟ੍ਟਤੀਤਿ ਏਵਮਧਿਪ੍ਪਾਯੇਨ ‘‘ਤਿਚੀਵਰੇ ਏਕੇਨ ਚੀਵਰੇਨ ਵਿਪ੍ਪਵਸਿਤੁਕਾਮੋ ਹੋਤੀ’’ਤਿਆਦਿ ਵੁਤ੍ਤਂ ਸਿਯਾ, ਇਚ੍ਚੇਤਂ ਪਾਲ਼ਿਯਾ ਸਦ੍ਧਿਂ ਸਮੇਤਿ. ਅਥ ਪੁਨਪਿ ਤਦੇਵ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਾਤੁਕਾਮੋ ਹੁਤ੍ਵਾ ਵਿਪ੍ਪਵਾਸਸੁਖਤ੍ਥਂ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤੀਤਿ ਇਮਿਨਾ ਅਧਿਪ੍ਪਾਯੇਨ ਵੁਤ੍ਤਂ ਸਿਯਾ, ਤਂ ‘‘ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮) ਇਮਿਨਾ ਵਚਨੇਨ ਨ ਸਮੇਤਿ. ਯਦਿ ਹਿ ਸੇਸਚੀਵਰਾਨਿ ਵਿਯ ਤਿਚੀਵਰਮ੍ਪਿ ਪਚ੍ਚੁਦ੍ਧਰਿਤ੍ਵਾ ਵਿਕਪ੍ਪੇਤਬ੍ਬਂ ਸਿਯਾ, ‘‘ਤਿਚੀਵਰਂ ਅਧਿਟ੍ਠਾਤੁਂ ਨ ਵਿਕਪ੍ਪੇਤੁ’’ਨ੍ਤਿ ਇਦਂ ਵਚਨਮੇਵ ਨਿਰਤ੍ਥਕਂ ਸਿਯਾ ਸੇਸਚੀਵਰੇਹਿ ਤਿਚੀਵਰਸ੍ਸ ਵਿਸੇਸਾਭਾਵਾ. ਤਸ੍ਮਾ ‘‘ਵਿਕਪ੍ਪੇਤੀ’’ਤਿ ਇਦਂ ਤਿਚੀਵਰਵਿਰਹਿਤਮੇਵ ਸਨ੍ਧਾਯ ਵੁਤ੍ਤਂ. ਤਿਚੀਵਰਂ ਪਨ ਵਿਕਪ੍ਪੇਤੁਂ ਨ ਵਟ੍ਟਤੀਤਿ ਵਿਞ੍ਞਾਯਤਿ, ਤੇਨੇਵ ਦੁਤਿਯਕਥਿਨਸਿਕ੍ਖਾਪਦਸ੍ਸ ਅਨਾਪਤ੍ਤਿਵਾਰੇ ‘‘ਵਿਕਪ੍ਪੇਤੀ’’ਤਿ ਇਦਂ ਨ ਵੁਤ੍ਤਂ, ਵੀਮਂਸਿਤ੍ਵਾ ਯਥਾ ਪਾਲ਼ਿਯਾ ਸਦ੍ਧਿਂ ਨ ਵਿਰੁਜ੍ਝਤਿ, ਤਥਾ ਏਤ੍ਥ ਅਧਿਪ੍ਪਾਯੋ ਗਹੇਤਬ੍ਬੋ.

ਤੁਯ੍ਹਂ ਦੇਮੀਤਿਆਦੀਸੁ ਪਰਿਚ੍ਚਤ੍ਤਤ੍ਤਾ ਮਨਸਾ ਅਸਮ੍ਪਟਿਚ੍ਛਨ੍ਤੇਪਿ ਸਮ੍ਪਦਾਨਭੂਤਸ੍ਸੇਵ ਸਨ੍ਤਕਂ ਹੋਤਿ, ਸੋ ਇਚ੍ਛਿਤਕ੍ਖਣੇ ਗਹੇਤੁਂ ਲਭਤਿ. ਇਤ੍ਥਨ੍ਨਾਮਸ੍ਸਾਤਿ ਪਰਮ੍ਮੁਖੇ ਠਿਤਂ ਸਨ੍ਧਾਯ ਵਦਤਿ. ਯਸ੍ਸ ਪਨ ਰੁਚ੍ਚਤੀਤਿਆਦਿ ਉਭੋਹਿਪਿ ਪਰਿਚ੍ਚਤ੍ਤਤਾਯ ਅਸ੍ਸਾਮਿਕਤਂ ਸਨ੍ਧਾਯ ਵੁਤ੍ਤਂ.

‘‘ਤਂ ਨ ਯੁਜ੍ਜਤੀ’’ਤਿ ਇਦਂ ਅਨ੍ਤੋਦਸਾਹੇ ਏਵ ਵਿਸ੍ਸਾਸਗ੍ਗਹਣਂ ਸਨ੍ਧਾਯ ਅਨਾਪਤ੍ਤਿਵਾਰਸ੍ਸ ਆਗਤਤ੍ਤਾ, ਇਧ ਨਿਸ੍ਸਗ੍ਗਿਯਚੀਵਰਸ੍ਸ ਕਪ੍ਪਿਯਭਾਵਕਰਣਤ੍ਥਂ ਲੇਸੇਨ ਗਹਿਤਤ੍ਤਾ ਚ ਵੁਤ੍ਤਂ, ਕੇਚਿ ਪਨ ‘‘ਪਰੇਹਿ ਸਭਾਗੇਨ ਅਚ੍ਛਿਨ੍ਨੇ, ਵਿਸ੍ਸਾਸਗ੍ਗਹਿਤੇ ਚ ਪੁਨ ਲਦ੍ਧੇ ਦੋਸੋ ਨ ਦਿਸ੍ਸਤੀ’’ਤਿ ਵਦਨ੍ਤਿ. ਅਨਧਿਟ੍ਠਾਨੇਨਾਤਿ ਕਾਯਵਾਚਾਹਿ ਕਤ੍ਤਬ੍ਬਸ੍ਸ ਅਕਰਣੇਨਾਤਿ ਅਧਿਪ੍ਪਾਯੋ. ਚੀਵਰਸ੍ਸ ਅਤ੍ਤਨੋ ਸਨ੍ਤਕਤਾ, ਜਾਤਿਪਮਾਣਯੁਤ੍ਤਤਾ, ਛਿਨ੍ਨਪਲਿਬੋਧਭਾਵੋ, ਅਤਿਰੇਕਚੀਵਰਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਪਠਮਕਥਿਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.