੨. ਉਦੋਸਿਤਸਿਕ੍ਖਾਪਦਵਣ੍ਣਨਾ

੪੭੩. ਦੁਤਿਯੇ ਅਵਿਪ੍ਪਵਾਸੇਤਿ ਅਵਿਪ੍ਪਵਾਸੇ ਨਿਪ੍ਫਾਦੇਤਬ੍ਬੇ, ਵਿਪ੍ਪਵਾਸਦੋਸਾਭਾਵੇ ਸਾਧੇਤਬ੍ਬੇ ਕਤ੍ਤਬ੍ਬਾ ਸਮ੍ਮੁਤੀਤਿ ਅਤ੍ਥੋ.

੪੭੫. ਪਟਿਸਿਦ੍ਧਪਰਿਯਾਪਨ੍ਨੇਨਾਤਿ ਵਿਪ੍ਪਵਸਿਤੁਂ ਪਟਿਸਿਦ੍ਧੇਸੁ ਤੀਸੁ ਚੀਵਰੇਸੁ ਅਨ੍ਤੋਗਧੇਨ, ਏਕੇਨ ਚ ਅਵਯਵੇ ਸਮੁਦਾਯੋਪਚਾਰਂ ਦਸ੍ਸੇਤਿ.

੪੭੮-੯. ਏਤ੍ਤਾਵਤਾਤਿ ‘‘ਪਰਿਕ੍ਖਿਤ੍ਤੋ’’ਤਿ ਇਮਿਨਾ. ‘‘ਸਭਾਯੇਤਿ ਲਿਙ੍ਗਬ੍ਯਤ੍ਤਯੇਨ ਸਭਾ ਵੁਤ੍ਤਾ’’ਤਿ ਵਤ੍ਵਾ ਪੁਨ ਸਯਮ੍ਪਿ ‘‘ਸਭਾਯੇ’’ਤਿ ਇਮਿਨਾ ਵੋਹਰਨ੍ਤੋ ਸਭਾ-ਸਦ੍ਦਸ੍ਸ ਪਰਿਯਾਯੋ ਸਭਾਯ-ਸਦ੍ਦੋ ਨਪੁਂਸਕਲਿਙ੍ਗਯੁਤ੍ਤੋ ਅਤ੍ਥੀਤਿ ਦਸ੍ਸੇਤਿ. ‘‘ਸਭਾਯਨ੍ਤਿ ਲਿਙ੍ਗਬ੍ਯਤ੍ਤਯੇਨ ਸਭਾ ਵੁਤ੍ਤਾ’’ਤਿ ਵਾ ਪਾਠੋ. ਲਿਙ੍ਗਬ੍ਯਤ੍ਤਯੇਨ ਸਭਾਤਿ ਚ ਲਿਙ੍ਗਨ੍ਤਰਯੁਤ੍ਤੋ ਸਭਾਸਦ੍ਦਪਰਿਯਾਯੋ ਸਭਾਯਸਦ੍ਦੋਤਿ ਅਤ੍ਥੋ.

ਸਭਾਯਂ ਗਚ੍ਛਤੀਤਿ ਸਭਂ ਗਚ੍ਛਤਿ. ਵਸਿਤਬ੍ਬਂ ਨਤ੍ਥੀਤਿ ਚੀਵਰਹਤ੍ਥਪਾਸੇਯੇਵ ਵਸਿਤਬ੍ਬਂ ਨਤ੍ਥੀਤਿ ਅਤ੍ਥੋ. ਤਸ੍ਸਾਤਿ ਵੀਥਿਯਾ. ਸਭਾਯਸ੍ਸ ਚ ਦ੍ਵਾਰਸ੍ਸ ਚ ਹਤ੍ਥਪਾਸਾ ਨ ਵਿਜਹਿਤਬ੍ਬਨ੍ਤਿ ਏਤ੍ਥ ਸਭਾਯਦ੍ਵਾਰਾਨਮਨ੍ਤਰੇ ਵੀਥਿ ਗੇਹਾਪਿ ਗਹਿਤਾ ਏਵ ਹੋਨ੍ਤਿ ਆਦਿਪਰਿਯੋਸਾਨਾਨਂ ਗਹਿਤਤ੍ਤਾ. ਏਤ੍ਥ ਚ ਦ੍ਵਾਰਵੀਥਿਘਰੇਸੁ ਵਸਨ੍ਤੇਨ ਗਾਮਪ੍ਪਵੇਸਨਸਹਸੇਯ੍ਯਾਦਿਦੋਸਂ ਪਰਿਹਰਿਤ੍ਵਾ ਸੁਪਟਿਚ੍ਛਨ੍ਨਤਾਦਿਯੁਤ੍ਤੇਨੇਵ ਭਵਿਤਬ੍ਬਂ, ਸਭਾ ਪਨ ਯਦਿ ਸਬ੍ਬੇਸਂ ਵਸਨਤ੍ਥਾਯ ਸਾਲਾਸਦਿਸਾ ਕਤਾ, ਅਨ੍ਤਰਾਰਾਮੇ ਵਿਯ ਯਥਾਸੁਖਂ ਵਸਿਤੁਂ ਵਟ੍ਟਤੀਤਿ ਵੇਦਿਤਬ੍ਬਂ. ਪਰਿਕ੍ਖਿਤ੍ਤਤਾਯ ਚ ਏਕੂਪਚਾਰਤਂ, ਅਪਰਿਕ੍ਖਿਤ੍ਤਤਾਯ ਨਾਨੂਪਚਾਰਤਞ੍ਚ ਨਿਵੇਸਨਾਦੀਸੁਪਿ ਅਤਿਦਿਸਨ੍ਤੋ ਆਹ ‘‘ਏਤੇਨੇਵੂਪਾਯੇਨਾ’’ਤਿਆਦਿ. ਨਿਵੇਸਨਾਦੀਨਿ ਬਹਿਗਾਮਤੋ ਸਨ੍ਨਿਵਿਟ੍ਠਾਨਿ ਗਹਿਤਾਨਿ ਅਨ੍ਤੋਗਾਮੇ ਠਿਤਾਨਂ ਗਾਮਗ੍ਗਹਣੇਨੇਵ ਗਹਿਤਤ੍ਤਾ. ਸਬ੍ਬਤ੍ਥਾਤਿ ਗਾਮਨਿਗਮਨਿਵੇਸਨਾਦੀਸੁ ਪਨ੍ਨਰਸਸੁ. ਪਰਿਕ੍ਖੇਪਾਦੀਤਿ ਆਦਿ-ਸਦ੍ਦੇਨ ਅਪਰਿਕ੍ਖੇਪਸ੍ਸੇਵ ਗਹਣਂ, ਨ ਏਕਕੁਲਾਦੀਨਮ੍ਪਿ ਤੇਸਂ ਏਕੂਪਚਾਰਤਾਨਾਨੂਪਚਾਰਤਾਨਿਮਿਤ੍ਤਤਾਭਾਵਾ. ਏਤ੍ਥ ਚ ਸਤ੍ਥਸ੍ਸ ਕਤਿਪਾਹਂ ਕਤ੍ਥਚਿ ਨਿਵਿਟ੍ਠਸ੍ਸੇਵ ਪਰਿਕ੍ਖੇਪੋ ਹੋਤਿ, ਨ ਗਚ੍ਛਨ੍ਤਸ੍ਸ.

੪੮੨-੭. ਗਾਮਤੋ ਬਹਿ ਇਸ੍ਸਰਾਨਂ ਸਮੁਦ੍ਦਤੀਰਾਦੀਸੁ ਕਤਭਣ੍ਡਸਾਲਾ ਉਦੋਸਿਤੋਤਿ ਆਹ ‘‘ਯਾਨਾਦੀਨ’’ਨ੍ਤਿਆਦਿ. ਮੁਣ੍ਡਚ੍ਛਦਨਪਾਸਾਦੋਤਿ ਨਾਤਿਉਚ੍ਚੋ ਚਨ੍ਦਿਕਙ੍ਗਣਯੁਤ੍ਤੋ ਸਿਖਰਕੂਟਮਾਲਾਦਿਵਿਰਹਿਤੋ ਪਾਸਾਦੋ.

੪੮੯. ਪਰਿਯਾਦਿਯਿਤ੍ਵਾਤਿ ਅਜ੍ਝੋਤ੍ਥਰਿਤ੍ਵਾ. ਨਦੀਪਰਿਹਾਰੋਤਿ ਵਿਸੁਂਗਾਮਾਦੀਨਂ ਵਿਯ ਨਦੀਪਰਿਹਾਰਸ੍ਸ ਅਵੁਤ੍ਤਤ੍ਤਾ ਚੀਵਰਹਤ੍ਥਪਾਸੋ ਏਵਾਤਿ ਵਦਨ੍ਤਿ, ਅਞ੍ਞੇ ਪਨ ‘‘ਇਮਿਨਾ ਅਟ੍ਠਕਥਾਵਚਨੇਨ ਨਦੀਪਰਿਹਾਰੋਪਿ ਵਿਸੁਂ ਸਿਦ੍ਧੋ, ਨਦਿਯਾ ਹਤ੍ਥਪਾਸੋ ਨ ਵਿਜਹਿਤਬ੍ਬੋ’’ਤਿ ਵਦਨ੍ਤਿ. ਵਿਹਾਰਸੀਮਨ੍ਤਿ ਅਵਿਪ੍ਪਵਾਸਸੀਮਂ ਸਨ੍ਧਾਯਾਹ. ਏਤ੍ਥ ਚ ਵਿਹਾਰਸ੍ਸ ਨਾਨਾਕੁਲਸਨ੍ਤਕਭਾਵੇਪਿ ਅਵਿਪ੍ਪਵਾਸਸੀਮਾਪਰਿਚ੍ਛੇਦਬ੍ਭਨ੍ਤਰੇ ਸਬ੍ਬਤ੍ਥ ਚੀਵਰਅਵਿਪ੍ਪਵਾਸਸਮ੍ਭਵਤੋ ਤਸ੍ਸਾ ਪਧਾਨਤ੍ਤਾ ਤਤ੍ਥ ਸਤ੍ਥਪਰਿਹਾਰੋ ਨ ਲਬ੍ਭਤੀਤਿ ‘‘ਵਿਹਾਰਂ ਗਨ੍ਤ੍ਵਾ ਵਸਿਤਬ੍ਬ’’ਨ੍ਤਿ ਵੁਤ੍ਤਂ. ‘‘ਸਤ੍ਥਸਮੀਪੇ’’ਤਿ ਇਦਂ ਯਥਾਵੁਤ੍ਤਂ ਅਬ੍ਭਨ੍ਤਰਪਰਿਚ੍ਛੇਦਵਸੇਨ ਵੁਤ੍ਤਂ. ਪਾਲ਼ਿਯਂ ਨਾਨਾਕੁਲਸ੍ਸ ਸਤ੍ਥੋ ਹੋਤਿ, ਸਤ੍ਥੇ ਚੀਵਰਂ ਨਿਕ੍ਖਿਪਿਤ੍ਵਾ ਹਤ੍ਥਪਾਸਾ ਨ ਵਿਜਹਿਤਬ੍ਬਨ੍ਤਿ ਏਤ੍ਥ ਸਤ੍ਥਹਤ੍ਥਪਾਸੋ ਗਹਿਤੋ.

੪੯੦. ਏਕਕੁਲਸ੍ਸ ਖੇਤ੍ਤੇਤਿ ਅਪਰਿਕ੍ਖਿਤ੍ਤਂ ਸਨ੍ਧਾਯ ਵਦਤਿ.

੪੯੧-੪. ਵਿਹਾਰੋ ਨਾਮ ਉਪਚਾਰਸੀਮਾ. ਤਤ੍ਥ ਯਸ੍ਮਿਂ ਵਿਹਾਰੇਤਿ ਤਸ੍ਸ ਅਨ੍ਤੋਪਰਿਵੇਣਾਦਿਂ ਸਨ੍ਧਾਯ ਵੁਤ੍ਤਂ, ਏਕਕੁਲਾਦਿਸਨ੍ਤਕਤਾ ਚੇਤ੍ਥ ਕਾਰਾਪਕਾਨਂ ਵਸੇਨ. ਛਾਯਾਯ ਫੁਟ੍ਠੋਕਾਸਸ੍ਸਾਤਿ ਉਜੁਕਂ ਅਵਕ੍ਖਿਤ੍ਤਲੇਡ੍ਡੁਪਾਤਬ੍ਭਨ੍ਤਰਂ ਸਨ੍ਧਾਯ ਵਦਤਿ.

ਅਗਮਨਪਥੇਤਿ ਤਦਹੇਵ ਗਨ੍ਤ੍ਵਾ ਨਿਵਤ੍ਤੇਤੁਂ ਨ ਸਕ੍ਕੁਣੇਯ੍ਯਕੇ ਸਮੁਦ੍ਦਮਜ੍ਝੇ ਯੇ ਦੀਪਕਾ, ਤੇਸੂਤਿ ਯੋਜਨਾ. ਇਤਰਸ੍ਮਿਨ੍ਤਿ ਪੁਰਤ੍ਥਿਮਦਿਸਾਯ ਚੀਵਰੇ. ‘‘ਉਪੋਸਥਕਾਲੇ…ਪੇ… ਵਡ੍ਢਤੀ’’ਤਿ ਇਮਿਨਾ ਚੀਵਰਵਿਪ੍ਪਵਾਸਸਤ੍ਤਬ੍ਭਨ੍ਤਰਤੋ ਸਮਾਨਸਂਵਾਸਾਯ ਸਤ੍ਤਬ੍ਭਨ੍ਤਰਸੀਮਾਯ ਅਚ੍ਚਨ੍ਤਵਿਸਦਿਸਤਂ ਦਸ੍ਸੇਤਿ. ਤਥਾ ਹਿ ਬਹੂਸੁ ਭਿਕ੍ਖੂਸੁ ਏਕਤੋ ਨਿਸੀਦਿਤ੍ਵਾ ਸਮਨ੍ਤਾ ਸਤ੍ਤਬ੍ਭਨ੍ਤਰਪਰਿਚ੍ਛੇਦੇਸੁ ਯਥਾਸਕਂ ਚੀਵਰਂ ਠਪੇਤ੍ਵਾ ਪਰਿਹਰਨ੍ਤੇਸੁ ਏਕੇਕਸ੍ਸ ਭਿਕ੍ਖੁਨੋ ਨਿਸਿਨ੍ਨੋਕਾਸਤੋ ਪਟ੍ਠਾਯ ਪਚ੍ਚੇਕਂ ਸਤ੍ਤਬ੍ਭਨ੍ਤਰਸ੍ਸ ਪਰਿਚ੍ਛੇਦੋ ਅਞ੍ਞਮਞ੍ਞਵਿਸਦਿਸੋ ਅਨੇਕਵਿਧੋ ਹੋਤਿ, ਨ ਏਕੋ ਪਰਿਸਪਰਿਯਨ੍ਤਤੋ ਪਟ੍ਠਾਯ ਅਨਿਮਿਤਬ੍ਬਤ੍ਤਾ. ਤੇਨੇਵ ਤਤ੍ਥ ਪਰਿਸਵਸੇਨ ਵੁਡ੍ਢਿ, ਹਾਨਿ ਵਾ ਨ ਹੋਤਿ, ਨ ਏਵਂ ਸਤ੍ਤਬ੍ਭਨ੍ਤਰਸੀਮਾਯ. ਸਾ ਹਿ ਯੋਜਨਿਕਾਯਪਿ ਪਰਿਸਪਰਿਯਨ੍ਤਤੋਵ ਪਟ੍ਠਾਯ ਸਮਨ੍ਤਾ ਸਤ੍ਤਬ੍ਭਨ੍ਤਰਪਅਚ੍ਛਿਨ੍ਨਾ ਏਕਾਵ ਹੋਤਿ. ਤੇਨੇਵ ਸਾ ਪਰਿਸਵਸੇਨ ਵਡ੍ਢਤਿ, ਹਾਯਤਿ ਚ, ਤਸ੍ਮਾ ਅਞ੍ਞਾਵ ਸਤ੍ਤਬ੍ਭਨ੍ਤਰਸੀਮਾ ਅਞ੍ਞੋ ਸਤ੍ਤਬ੍ਭਨ੍ਤਰਤੋ ਪਰਿਚ੍ਛਿਨ੍ਨੋ ਚੀਵਰਵਿਪ੍ਪਵਾਸਪਰਿਹਾਰੋ ਅਬ੍ਭੋਕਾਸੋਤਿ ਵੇਦਿਤਬ੍ਬਂ. ਯਞ੍ਚੇਤ੍ਥ ਵਤ੍ਤਬ੍ਬਂ, ਤਂ ਖਨ੍ਧਕੇ ਸੀਮਾਕਥਾਯਮੇਵ (ਮਹਾਵ. ੧੪੩) ਵਕ੍ਖਾਮ.

੪੯੫. ਨਦਿਂ ਓਤਰਤੀਤਿ ਹਤ੍ਥਪਾਸਂ ਮੁਞ੍ਚਿਤ੍ਵਾ ਓਤਰਤਿ. ਬਹਿਗਾਮੇ ਠਪੇਤ੍ਵਾਤਿ ਅਪਾਰੁਪਿਤਬ੍ਬਤਾਯ ਵੁਤ੍ਤਂ. ਵਿਨਯਕਮ੍ਮਂ ਕਾਤਬ੍ਬਨ੍ਤਿ ਉਤ੍ਤਰਾਸਙ੍ਗੇ ਚ ਬਹਿਗਾਮੇ ਠਪਿਤਸਙ੍ਘਾਟਿਯਞ੍ਚ ਪਠਮਂ ਵਿਨਯਕਮ੍ਮਂ ਕਤ੍ਵਾ ਪਚ੍ਛਾ ਉਤ੍ਤਰਾਸਙ੍ਗਂ ਨਿਵਾਸੇਤ੍ਵਾ ਅਨ੍ਤਰਵਾਸਕੇ ਕਾਤਬ੍ਬਂ. ਏਤ੍ਥ ਚ ਬਹਿਗਾਮੇ ਠਪਿਤਸ੍ਸਾਪਿ ਵਿਨਯਕਮ੍ਮਵਚਨਤੋ ਪਰਮ੍ਮੁਖਾਪਿ ਠਿਤਂ ਵਿਸ੍ਸਜ੍ਜਿਤੁਂ, ਨਿਸ੍ਸਟ੍ਠਂ ਦਾਤੁਞ੍ਚ ਵਟ੍ਟਤੀਤਿ ਵੇਦਿਤਬ੍ਬਂ. ਦਹਰਾਨਂ ਗਮਨੇ ਸਉਸ੍ਸਾਹਤ੍ਤਾ ‘‘ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤੀ’’ਤਿ ਵੁਤ੍ਤਂ. ਮੁਹੁਤ੍ਤਂ…ਪੇ… ਪਟਿਪ੍ਪਸ੍ਸਮ੍ਭਤੀਤਿ ਸਉਸ੍ਸਾਹਤ੍ਤੇ ਗਮਨਸ੍ਸ ਉਪਚ੍ਛਿਨ੍ਨਤ੍ਤਾ ਵੁਤ੍ਤਂ. ਤੇਸਂ ਪਨ ਪੁਰਾਰੁਣਾਵ ਉਟ੍ਠਹਿਤ੍ਵਾ ਸਉਸ੍ਸਾਹੇਨ ਗਚ੍ਛਨ੍ਤਾਨਂ ਅਰੁਣੇ ਅਨ੍ਤਰਾ ਉਟ੍ਠਿਤੇਪਿ ਨ ਪਟਿਪ੍ਪਸ੍ਸਮ੍ਭਤਿ ‘‘ਯਾਵ ਅਰੁਣੁਗ੍ਗਮਨਾ ਸਯਨ੍ਤੀ’’ਤਿ ਵੁਤ੍ਤਤ੍ਤਾ. ਤੇਨੇਵ ‘‘ਗਾਮਂ ਪਵਿਸਿਤ੍ਵਾ…ਪੇ… ਨ ਪਟਿਪ੍ਪਸ੍ਸਮ੍ਭਤੀ’’ਤਿ ਵੁਤ੍ਤਂ. ਅਞ੍ਞਮਞ੍ਞਸ੍ਸ ਵਚਨਂ ਅਗ੍ਗਹੇਤ੍ਵਾਤਿਆਦਿਮ੍ਹਿ ਸਉਸ੍ਸਾਹਤ੍ਤਾ ਗਮਨਕ੍ਖਣੇ ਪਟਿਪ੍ਪਸ੍ਸਦ੍ਧਿ ਨ ਵੁਤ੍ਤਾ. ਧੇਨੁਭਯੇਨਾਤਿ ਤਰੁਣਵਚ੍ਛਗਾਵੀਨਂ ਅਭਿਧਾਵਿਤ੍ਵਾ ਸਿਙ੍ਗੇਨ ਪਹਰਣਭਯੇਨ. ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤੀਤਿ ਏਤ੍ਥ ਧੇਨੁਭਯਾਦੀਹਿ ਠਿਤਾਨਂ ਯਾਵ ਭਯਵੂਪਸਮਾ ਠਾਤਬ੍ਬਤੋ ‘‘ਅਨ੍ਤੋਅਰੁਣੇਯੇਵ ਗਮਿਸ੍ਸਾਮੀ’’ਤਿ ਨਿਯਮੇਤੁਂ ਅਸਕ੍ਕੁਣੇਯ੍ਯਤ੍ਤਾ ਵੁਤ੍ਤਂ. ਯਤ੍ਥ ਪਨ ਏਵਂ ਨਿਯਮੇਤੁਂ ਸਕ੍ਕਾ, ਤਤ੍ਥ ਅਨ੍ਤਰਾਰੁਣੇ ਉਗ੍ਗਤੇਪਿ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤਿ ਭੇਸਜ੍ਜਤ੍ਥਾਯ ਗਾਮਪ੍ਪਵਿਟ੍ਠਦਹਰਾਨਂ ਵਿਯ. ਅਨ੍ਤੋਸੀਮਾਯਂ ਗਾਮਨ੍ਤਿ ਅਵਿਪ੍ਪਵਾਸਸੀਮਾਸਮ੍ਮੁਤਿਤੋ ਪਚ੍ਛਾ ਪਤਿਟ੍ਠਾਪਿਤਗਾਮਂ ਸਨ੍ਧਾਯ ਵਦਤਿ ਗਾਮਞ੍ਚ ਗਾਮੂਪਚਾਰਞ੍ਚ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਤੋ. ਪਵਿਟ੍ਠਾਨਨ੍ਤਿ ਆਚਰਿਯਨ੍ਤੇਵਾਸਿਕਾਨਂ ਵਿਸੁਂ ਵਿਸੁਂ ਗਤਾਨਂ ਅਵਿਪ੍ਪਵਾਸਸੀਮਤ੍ਤਾ ਨੇਵ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਸਉਸ੍ਸਾਹਤਾਯ ਨਿਸ੍ਸਯੋ ਨ ਪਟਿਪ੍ਪਸ੍ਸਮ੍ਭਤਿ. ਅਨ੍ਤਰਾਮਗ੍ਗੇਤਿ ਧਮ੍ਮਂ ਸੁਤ੍ਵਾ ਆਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ.

‘‘ਇਧ ਅਪਚ੍ਚੁਦ੍ਧਰਣ’’ਨ੍ਤਿ ਇਮਿਨਾ ਅਧਿਟ੍ਠਾਨਵਿਕਪ੍ਪਨਾਨਿ ਵਿਯ ਪਚ੍ਚੁਦ੍ਧਰਣਮ੍ਪਿ ਕਾਯੇਨ ਵਾ ਵਾਚਾਯ ਵਾ ਕਤ੍ਤਬ੍ਬਨ੍ਤਿ ਦਸ੍ਸੇਤਿ. ਕਾਯਵਾਚਾਹਿ ਕਤ੍ਤਬ੍ਬਸ੍ਸ ਅਕਰਣਤੋਤਿ ਇਦਂ ਕਾਯਵਾਚਾਸਮੁਟ੍ਠਾਨਂ ਵੁਤ੍ਤਂ. ਅਧਿਟ੍ਠਿਤਤਿਚੀਵਰਤਾ, ਅਨਤ੍ਥਤਕਥਿਨਤਾ, ਅਲਦ੍ਧਸਮ੍ਮੁਤਿਤਾ, ਰਤ੍ਤਿਵਿਪ੍ਪਵਾਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਉਦੋਸਿਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.