੮. ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ

੩੮੦. ਅਟ੍ਠਮੇ ਪਾਕਾਰੇਨ ਚ ਪਰਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਗੋਪੁਰਟ੍ਟਾਲਕਯੁਤ੍ਤਨ੍ਤਿ ਏਤ੍ਥ ਪਾਕਾਰੇਸੁ ਯੁਦ੍ਧਤ੍ਥਾਯ ਕਤੋ ਵਙ੍ਕਸਣ੍ਠਾਨੋ ਸਰਕ੍ਖੇਪਛਿਦ੍ਦਸਹਿਤੋ ਪਤਿਸ੍ਸਯਵਿਸੇਸੋ ਅਟ੍ਟਾਲਕੋ ਨਾਮ.

ਸੋਲ਼ਸਵਿਧਸ੍ਸਾਤਿ ਚਤੂਹਿ ਮਗ੍ਗੇਹਿ ਪਚ੍ਚੇਕਂ ਚਤੂਸੁ ਸਚ੍ਚੇਸੁ ਕਤ੍ਤਬ੍ਬਸ੍ਸ ਪਰਿਞ੍ਞਾਪਹਾਨਸਚ੍ਛਿਕਿਰਿਯਾਭਾਵਨਾਸਙ੍ਖਾਤਸ੍ਸ ਸੋਲ਼ਸਵਿਧਸ੍ਸ. ਤੇ ਗਾਰਵੇਨਾਤਿ ਤੇ ਕਿਲਨ੍ਤਰੂਪਾ ਭਿਕ੍ਖੂ ਭਤ੍ਤੁਦ੍ਦੇਸਕਟ੍ਠਾਨੇ ਸਨ੍ਨਿਪਤਿਤਾਨਂ ਭਿਕ੍ਖੂਨਂ ਪੁਰਤੋ ਅਤ੍ਤਨੋ ਕਿਲਨ੍ਤਸਰੀਰਂ ਦਸ੍ਸੇਤ੍ਵਾ ਉਦ੍ਦਿਸਾਪਨੇ ਗਾਰਵੇਨ, ਲਜ੍ਜਾਯਾਤਿ ਅਤ੍ਥੋ. ਤੇਰਸਪੀਤਿ ਭਤ੍ਤੁਦ੍ਦੇਸਕਸੇਨਾਸਨਗਾਹਾਪਕਭਣ੍ਡਾਗਾਰਿਕਚੀਵਰਪਟਿਗ੍ਗਾਹਕਚੀਵਰਭਾਜਕਯਾਗੁਭਾਜਕਫਲਭਾਜਕਖਜ੍ਜਭਾਜਕਅਪ੍ਪਮਤ੍ਤਕਵਿਸ੍ਸਜ੍ਜਕਸਾਟਿਯਗਾਹਾਪਕਪਤ੍ਤਗਾਹਾਪਕਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤੀਨਂ ਵਸੇਨ ਤੇਰਸਪਿ.

ਪਾਲ਼ਿਯਂ ‘‘ਅਪਿਸੂ’’ਤਿ ਇਦਂ ‘‘ਅਪਿਚਾ’’ਤਿ ਇਮਿਨਾ ਸਮਾਨਤ੍ਥੋ ਨਿਪਾਤੋ. ਏਵਂ ਸਬ੍ਬਪਦੇਸੂਤਿ ਪੀਠਾਦੀਸੁ ਸੇਨਾਸਨਸਾਧਾਰਣੇਸੁ, ਕਤਿਕਸਣ੍ਠਾਨਪਵੇਸਨਿਕ੍ਖਮਨਕਾਲਾਦੀਸੁ ਪਨ ਵਿਸੁਂ ਵਿਸੁਂ ਅਧਿਟ੍ਠਹਿਤ੍ਵਾ ਕਥਾਪੇਤੀਤਿ ਵੇਦਿਤਬ੍ਬਂ. ਅਯਞ੍ਹਿ ਨਿਮ੍ਮਿਤਾਨਂ ਧਮ੍ਮਤਾਤਿ ਅਨਿਯਮੇਤ੍ਵਾ ਨਿਮ੍ਮਿਤਾਨਂ ਵਸੇਨ ਵੁਤ੍ਤਂ, ਨਿਯਮੇਤ੍ਵਾ ਪਨ ‘‘ਏਤ੍ਤਕਾ ਇਦਞ੍ਚਿਦਞ੍ਚ ਕਥੇਨ੍ਤੁ, ਏਤ੍ਤਕਾ ਤੁਣ੍ਹੀ ਭਵਨ੍ਤੁ, ਨਾਨਾਪ੍ਪਕਾਰਂ ਇਰਿਯਾਪਥਂ, ਕਿਰਿਯਞ੍ਚ ਕਪ੍ਪੇਨ੍ਤੁ, ਨਾਨਾਵਣ੍ਣਸਣ੍ਠਾਨਵਯੋਨਿਯਮਾ ਚ ਹੋਨ੍ਤੂ’’ਤਿ ਪਰਿਕਮ੍ਮਂ ਕਤ੍ਵਾ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਿਤੇ ਇਚ੍ਛਿਤਿਚ੍ਛਿਤਪ੍ਪਕਾਰਾ ਅਞ੍ਞਮਞ੍ਞਮ੍ਪਿ ਵਿਸਦਿਸਾਵ ਹੋਨ੍ਤਿ. ਅਵਤ੍ਥੁਕਵਚਨਨ੍ਤਿ ਨਿਰਤ੍ਥਕਵਚਨਂ.

੩੮੩. ਏਕਚਾਰਿਕਭਤ੍ਤਨ੍ਤਿ ਅਤਿਮਨਾਪਤ੍ਤਾ ਸਬ੍ਬੇਸਮ੍ਪਿ ਪਟਿਲਾਭਤ੍ਥਾਯ ਵਿਸੁਂ ਠਿਤਿਕਾਯ ਪਾਪੇਤਬ੍ਬਭਤ੍ਤਂ. ਤਦ੍ਧਿਤਵੋਹਾਰੇਨਾਤਿ ਚਤ੍ਤਾਰਿ ਪਮਾਣਮਸ੍ਸ ਚਤੁਕ੍ਕਨ੍ਤਿ ਏਵਂ ਤਦ੍ਧਿਤਵੋਹਾਰੇਨ. ਭਵੋਤਿ ਭਵਿਤਬ੍ਬੋ. ਅਤੀਤਂ ਦਿਵਸਭਾਗਨ੍ਤਿ ਤਸ੍ਮਿਞ੍ਞੇਵ ਦਿਵਸੇ ਸਲਾਕਦਾਨਕ੍ਖਣਂ ਸਨ੍ਧਾਯ ਵੁਤ੍ਤਂ. ਹਿਯ੍ਯੋਤਿ ਇਮਸ੍ਸ ਅਜ੍ਜ ਇਚ੍ਚੇਵ ਅਤ੍ਥੋ. ਤੇਨੇਵਾਹਂਸੁ ‘‘ਸ੍ਵੇ ਅਮ੍ਹੇ’’ਤਿਆਦਿ. ਪਧੂਪਾਯਨ੍ਤਾਤਿ ਪੁਨਪ੍ਪੁਨਂ ਉਪ੍ਪਜ੍ਜਨਕੋਧਵਸੇਨ ਪਧੂਪਾਯਨ੍ਤਾ. ਪਾਲ਼ਿਯਂ ਕਿਸ੍ਸ ਮਨ੍ਤਿ ਕੇਨ ਕਾਰਣੇਨ ਮਯਾਤਿ ਅਤ੍ਥੋ.

੩੮੪. ‘‘ਸਰਸਿ ਤ੍ਵ’’ਨ੍ਤਿ ਇਦਂ ਏਕਂ ਵਾਕ੍ਯਂ ਕਤ੍ਵਾ, ‘‘ਕਤ੍ਤਾ’’ਤਿ ਇਦਞ੍ਚ ਕਤ੍ਤਰਿ ਰਿਤੁਪਚ੍ਚਯਨ੍ਤਂ ਕਤ੍ਵਾ, ‘‘ਅਸੀ’’ਤਿ ਅਜ੍ਝਾਹਾਰਪਦੇਨ ਸਹ ਏਕਵਾਕ੍ਯਂ ਕਤ੍ਵਾ, ‘‘ਏਵਰੂਪ’’ਨ੍ਤਿ ਇਦਂ, ‘‘ਯਥਾਯਂ ਭਿਕ੍ਖੁਨੀ ਆਹਾ’’ਤਿ ਇਦਞ੍ਚ ਦ੍ਵੀਸੁ ਵਾਕ੍ਯੇਸੁ ਪਚ੍ਚੇਕਂ ਯੋਜੇਤਬ੍ਬਨ੍ਤਿ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿਮਾਹ. ਉਜੁਕਮੇਵਾਤਿ ਤ੍ਵਾ-ਪਚ੍ਚਯਨ੍ਤਵਸੇਨ ਪਠਮਂ ਅਤ੍ਥਗ੍ਗਹਣਂ ਉਜੁਕਨ੍ਤਿ ਅਧਿਪ੍ਪਾਯੋ.

ਦੁਤਿਯੋ ਦਬ੍ਬ-ਸਦ੍ਦੋ ਪਣ੍ਡਿਤਾਦਿਵਚਨੋਤਿ ਆਹ ‘‘ਨ ਖੋ ਦਬ੍ਬ ਦਬ੍ਬਾ ਪਣ੍ਡਿਤਾ’’ਤਿ. ਨਿਬ੍ਬੇਠੇਨ੍ਤੀਤਿ ਦੋਸਤੋ ਮੋਚੇਨ੍ਤਿ. ਵਿਨਯਲਕ੍ਖਣੇ ਤਨ੍ਤਿਨ੍ਤਿ ਵਿਨਯਵਿਨਿਚ੍ਛਯਲਕ੍ਖਣਵਿਸਯੇ ਆਗਮਂ ਠਪੇਨ੍ਤੋ. ਪਾਲ਼ਿਯਂ ਯਤੋ ਅਹਨ੍ਤਿਆਦੀਸੁ ਯਸ੍ਮਿਂ ਕਾਲੇ ਅਹਂ ਜਾਤੋ, ਤਤੋ ਪਭੁਤਿ ਸੁਪਿਨਨ੍ਤੇਨਪਿ ਮੇਥੁਨਂ ਧਮ੍ਮਂ ਨਾਭਿਜਾਨਾਮਿ, ਨ ਚ ਤਸ੍ਸ ਮੇਥੁਨਧਮ੍ਮਸ੍ਸ ਪਟਿਸੇਵਿਤਾ ਅਹੋਸਿਨ੍ਤਿ ਅਤ੍ਥੋ ਦਟ੍ਠਬ੍ਬੋ. ਤੇਨਾਹ ‘‘ਸੁਪਿਨਨ੍ਤੇਨਪੀ’’ਤਿਆਦਿ. ਇਦਾਨਿ ਏਕਵਾਕ੍ਯਵਸੇਨ ਯੋਜਨਂ ਦਸ੍ਸੇਤੁਂ ‘‘ਅਥ ਵਾ’’ਤਿਆਦਿ ਵੁਤ੍ਤਂ. ਨ ਘਟਤੀਤਿ ਯਸ੍ਮਾ ਖੀਣਾਸਵਸ੍ਸ ਵਚਨੇਨ ਏਤਿਸ੍ਸਾ ਵਚਨਂ ਨ ਸਮੇਤਿ, ਤਞ੍ਚ ਨ ਘਟਨਂ ਯਸ੍ਮਾ ਪੁਬ੍ਬੇ ਭਿਕ੍ਖੂਸੁ ਪਸਿਦ੍ਧਾਯ ਏਵ ਅਚ੍ਚਨ੍ਤਦੁਸ੍ਸੀਲਤਾਯ ਏਵ ਅਹੋਸਿ, ਤਸ੍ਮਾ ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾਤਿ ਅਧਿਪ੍ਪਾਯੋ.

ਚਰ ਪਿਰੇਤਿ ਚਰ ਗਚ੍ਛ ਪਿਰੇ ਪਰ ਅਮਾਮਕ ਤ੍ਵਂ. ਵਿਨਸ੍ਸਾਤਿ ਅਦਸ੍ਸਨਂ ਗਚ੍ਛ. ਅਕਾਰਿਕਾਤਿ ਅਮੂਲਕੇਨ ਚੋਦਨਾਯ ਨ ਕਾਰਿਕਾ. ਕਾਰਕੋ ਹੋਤੀਤਿ ‘‘ਅਯ੍ਯੇਨਮ੍ਹਿ ਦੂਸਿਤਾ’’ਤਿ ਇਮਾਯ ਪਟਿਞ੍ਞਾਯ ਯਦਿ ਨਾਸਿਤਾ, ਤਦਾ ਥੇਰੋ ਭਿਕ੍ਖੁਨੀਦੂਸਕਤ੍ਤਸਿਦ੍ਧਿਤੋ ਤਸ੍ਸ ਦੋਸਸ੍ਸ ਕਾਰਕੋ ਹੋਤਿ. ਅਕਾਰਕੋ ਹੋਤੀਤਿ ਤਾਯ ਕਤਪਟਿਞ੍ਞਂ ਅਨਪੇਕ੍ਖਿਤ੍ਵਾ ਸਾਮਞ੍ਞਤੋ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ ਭਗਵਤਾ ਵੁਤ੍ਤਤ੍ਤਾ ਅਕਾਰਕੋ ਹੋਤਿ. ਯਦਿ ਹਿ ਥੇਰੋ ਕਾਰਕੋ ਭਵੇਯ੍ਯ, ਅਵਸ੍ਸਂ ਤਮੇਵ ਦੋਸਂ ਅਪਦਿਸਿਤ੍ਵਾ ਇਮਿਨਾ ਨਾਮ ਕਾਰਣੇਨ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ ਵਤ੍ਤਬ੍ਬਂ ਸਿਯਾ, ਤਥਾ ਅਵੁਤ੍ਤਤ੍ਤਾ, ‘‘ਦਬ੍ਬਞ੍ਚ ਅਨੁਯੁਞ੍ਜਥਾ’’ਤਿ ਅਵਤ੍ਵਾ ‘‘ਇਮੇ ਚ ਭਿਕ੍ਖੂ ਅਨੁਯੁਞ੍ਜਥਾ’’ਤਿ ਵੁਤ੍ਤਤ੍ਤਾ ਚ ਸਾਮਤ੍ਥਿਯਤੋ ਮੇਤ੍ਤਿਯਾਯ ਭਿਕ੍ਖੁਨਿਯਾ ਅਞ੍ਞੇਨ ਦੋਸੇਨ ਨਾਸਨਾਰਹਤਾ, ਵਤ੍ਥੁਸ੍ਸ ਚ ਅਮੂਲਕਭਾਵੋ, ਥੇਰਸ੍ਸ ਅਕਾਰਕਭਾਵੋ ਚ ਸਿਦ੍ਧੋ ਹੋਤੀਤਿ ਅਧਿਪ੍ਪਾਯੋ.

ਅਤ੍ਤਨੋ ਸੁਤ੍ਤਨ੍ਤਿ ‘‘ਸਕਾਯ ਪਟਿਞ੍ਞਾਯਾ’’ਤਿ ਇਮਿਨਾ ਪਕ੍ਖੇਪਵਚਨੇਨ ਸਹਿਤਂ ਕੂਟਸੁਤ੍ਤਂ. ਥੇਰੋ ਕਾਰਕੋ ਹੋਤੀਤਿ ਏਤ੍ਥ ਅਯਮਧਿਪ੍ਪਾਯੋ – ‘‘ਸਕਾਯ ਪਟਿਞ੍ਞਾਯਾ’’ਤਿ ਅਵਤ੍ਵਾ ਸਾਮਞ੍ਞਤੋ ‘‘ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ ਓਤਿਣ੍ਣਵਤ੍ਥੁਸ੍ਮਿਂਯੇਵ ਤਸ੍ਸਾ ਨਾਸਨਾ ਵਿਹਿਤਾਤਿ ਤੁਮ੍ਹਾਕਂ ਵਾਦੇ ਥੇਰੋ ਕਾਰਕੋ ਹੋਤਿ, ‘‘ਸਕਾਯ ਪਟਿਞ੍ਞਾਯਾ’’ਤਿ ਪਨ ਵੁਤ੍ਤੇ ਪੁਬ੍ਬੇਯੇਵ ਸਿਦ੍ਧਸ੍ਸ ਪਾਰਾਜਿਕਸ੍ਸ ਸੁਚਿਕਾਯ ਅਸ੍ਸਾ ਸਕਾਯ ਪਟਿਞ੍ਞਾਯ ਨਾਸੇਥਾਤਿ ਸਿਜ੍ਝਨਤੋ ਅਮ੍ਹਾਕਂ ਵਾਦੇ ਥੇਰੋ ਅਕਾਰਕੋ ਹੋਤੀਤਿ. ਮਹਾਵਿਹਾਰਵਾਸੀਨਮ੍ਪਿ ਪਨ ‘‘ਸਕਾਯ ਪਟਿਞ੍ਞਾਯਾ’’ਤਿ ਵੁਤ੍ਤੇ ਓਤਿਣ੍ਣਵਤ੍ਥੁਸ੍ਮਿਂਯੇਵ ਤਸ੍ਸਾ ਨਾਸਨਾ ਵਿਹਿਤਾ ਹੋਤਿ, ਨ ਸਾਮਞ੍ਞਤੋਤਿ ਅਧਿਪ੍ਪਾਯੋ. ਏਤ੍ਥਾਤਿ ਇਮੇਸੁ ਦ੍ਵੀਸੁ ਵਾਦੇਸੁ, ਸੁਤ੍ਤੇਸੁ ਵਾ. ਯਂ ਪਚ੍ਛਾ ਵੁਤ੍ਤਨ੍ਤਿ ਮਹਾਵਿਹਾਰਵਾਸੀਹਿ ਯਂ ਵੁਤ੍ਤਂ, ਤਂ ਯੁਤ੍ਤਨ੍ਤਿ ਅਤ੍ਥੋ. ਵਿਚਾਰਿਤਂ ਹੇਤਨ੍ਤਿ ਏਤਂ ਪਚ੍ਛਿਮਸ੍ਸ ਯੁਤ੍ਤਤ੍ਤਂ ਵਿਚਾਰਿਤਂ, ‘‘ਤਤ੍ਰ ਸਙ੍ਘਾਦਿਸੇਸੋ ਵੁਟ੍ਠਾਨਗਾਮਿਨੀ…ਪੇ… ਅਸੁਦ੍ਧਤਾਯੇਵ ਨਾਸੇਸੀ’’ਤਿ ਵਕ੍ਖਮਾਨਨਯੇਨ ਵਿਨਿਚ੍ਛਿਤਨ੍ਤਿ ਅਤ੍ਥੋ. ‘‘ਭਿਕ੍ਖੁਨਿਂ ਅਨੁਦ੍ਧਂਸੇਤਿ ਦੁਕ੍ਕਟ’’ਨ੍ਤਿ ਇਮਿਨਾ ਮਹਾਅਟ੍ਠਕਥਾਵਾਦੋ ਦਸ੍ਸਿਤੋ.

ਤਤ੍ਰਾਤਿ ਤੇਸੁ ਦੁਕ੍ਕਟਪਾਚਿਤ੍ਤਿਯੇਸੁ. ਦੁਕ੍ਕਟਨ੍ਤਿ ਵੁਤ੍ਤਮਹਾਅਟ੍ਠਕਥਾਵਾਦਸ੍ਸ ਅਧਿਪ੍ਪਾਯਂ ਦਸ੍ਸੇਤ੍ਵਾ ‘‘ਪਾਚਿਤ੍ਤਿਯ’’ਨ੍ਤਿ ਪਵਤ੍ਤਸ੍ਸ ਕੁਰੁਨ੍ਦਿਵਾਦਸ੍ਸ ਅਧਿਪ੍ਪਾਯਂ ਦਸ੍ਸੇਤੁਂ ‘‘ਪਚ੍ਛਿਮਨਯੇਪੀ’’ਤਿਆਦਿ ਵੁਤ੍ਤਂ. ਵਚਨਪ੍ਪਮਾਣਤੋਤਿ ਵਿਸਂਵਾਦਨਾਧਿਪ੍ਪਾਯੇ ਸਮਾਨੇਪਿ ਅਨੁਦ੍ਧਂਸਨਾਦਿਵਿਸੇਸੇ ਸਙ੍ਘਾਦਿਸੇਸਾਦਿਨੋ ਵਿਧਾਯਕਵਚਨਬਲੇਨਾਤਿ ਅਤ੍ਥੋ. ਭਿਕ੍ਖੁਸ੍ਸ ਪਨ ਭਿਕ੍ਖੁਨਿਯਾ ਦੁਕ੍ਕਟਨ੍ਤਿ ਭਿਕ੍ਖੁਨਿਂ ਅਨੁਦ੍ਧਂਸੇਨ੍ਤਸ੍ਸ ਭਿਕ੍ਖੁਸ੍ਸ ਦੁਕ੍ਕਟਂ.

ਏਵਂ ਦ੍ਵੀਸੁਪਿ ਅਟ੍ਠਕਥਾਵਚਨੇਸੁ ਅਧਿਪ੍ਪਾਯਂ ਵਿਭਾਵੇਤ੍ਵਾ ਇਦਾਨਿ ਪਚ੍ਛਿਮੇ ਪਾਚਿਤ੍ਤਿਯਵਾਦੇ ਦੋਸਂ ਦਸ੍ਸੇਤ੍ਵਾ ਪੁਰਿਮਦੁਕ੍ਕਟਵਾਦਮੇਵ ਪਤਿਟ੍ਠਾਪੇਤੁਂ ‘‘ਤਤ੍ਰ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਵਿਸੁਨ੍ਤਿ ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਤੋ (ਪਾਚਿ. ੧) ਵਿਸੁਂ ਪਾਚਿਤ੍ਤਿਯਂ ਵੁਤ੍ਤਂ, ਤਤ੍ਥ ਅਨਨ੍ਤੋਗਧਭਾਵਾਤਿ ਅਧਿਪ੍ਪਾਯੋ. ਤਸ੍ਮਾਤਿ ਯਸ੍ਮਾ ਅਮੂਲਕਾਨੁਦ੍ਧਂਸਨੇ ਵਿਸੁਞ੍ਞੇਵ ਪਾਚਿਤ੍ਤਿਯਂ ਪਞ੍ਞਤ੍ਤਂ, ਤਸ੍ਮਾ ਪੁਰਿਮਨਯੋਤਿ ਦੁਕ੍ਕਟਵਾਦੋ. ਏਵਂ ਅਨ੍ਤਰਾ ਪਵਿਟ੍ਠਂ ਦੁਕ੍ਕਟਪਾਚਿਤ੍ਤਿਯਵਾਦਂ ਦਸ੍ਸੇਤ੍ਵਾ ਇਦਾਨਿ ਪਾਕਟਮੇਵ ਅਤ੍ਥਂ ਵਿਭਾਵੇਤੁਂ ‘‘ਤਥਾ ਭਿਕ੍ਖੁਨੀ’’ਤਿਆਦਿ ਆਰਦ੍ਧਂ. ਤਤ੍ਥ ਤਥਾਤਿ ਯਥਾ ਭਿਕ੍ਖੁਸ੍ਸ ਭਿਕ੍ਖੁਂ, ਭਿਕ੍ਖੁਨਿਞ੍ਚ ਅਨੁਦ੍ਧਂਸੇਨ੍ਤਸ੍ਸ ਸਙ੍ਘਾਦਿਸੇਸਦੁਕ੍ਕਟਾਨਿ ਵੁਤ੍ਤਾਨਿ, ਤਥਾਤਿ ਅਤ੍ਥੋ. ਏਤੇਹਿ ਨਾਸਨਾ ਨਤ੍ਥੀਤਿ ਸਾਮਞ੍ਞਤੋ ਵੁਤ੍ਤਂ, ਦੁਕ੍ਕਟੇਨ ਇਮਿਸ੍ਸਾ ਪਨ ਨਾਸਨਾ ਨਤ੍ਥੀਤਿ ਅਧਿਪ੍ਪਾਯੋ. ਦੁਸ੍ਸੀਲਾਤਿ ਪਾਰਾਜਿਕਾ.

੩੮੬. ਆਕਾਰਨਾਨਤ੍ਤੇਨਾਤਿ ਦੂਸਿਤਾਕਾਰਸ੍ਸ, ਦੂਸਕਾਕਾਰਸ੍ਸ ਚ ਨਾਨਤ੍ਤੇਨ. ਅਨਭਿਰਦ੍ਧੋਤਿ ਅਤੁਟ੍ਠੋ. ਤੇਨਾਹ ‘‘ਨ ਸੁਖਿਤੋ’’ਤਿ. ਨ ਪਸਾਦਿਤੋਤਿ ਅਨੁਪ੍ਪਾਦਿਤਪ੍ਪਸਾਦੋ. ਖੀਲ-ਸਦ੍ਦੋ ਥਦ੍ਧਭਾਵਵਚਨੋ, ਕਚਵਰਪਰਿਯਾਯੋ ਚ ਹੋਤੀਤਿ ਆਹ ‘‘ਚਿਤ੍ਤ…ਪੇ… ਖੀਲ’’ਨ੍ਤਿ. ਨਪ੍ਪਤੀਤੋਤਿ ਪੀਤਿਸੁਖਾਦੀਹਿ ਨ ਅਭਿਗਤੋ ਨ ਉਪਗਤੋ. ਤੇਨਾਹ ‘‘ਨ ਅਭਿਸਟੋ’’ਤਿ.

ਯੇਨ ਦੁਟ੍ਠੋਤਿ ਚ ਕੁਪਿਤੋਤਿ ਚ ਵੁਤ੍ਤੋਤਿ ਏਤ੍ਥ ਯੇਨ ਦੁਟ੍ਠੋਤਿ ਚ ਵੁਤ੍ਤੋ ਯੇਨ ਕੁਪਿਤੋਤਿ ਚ ਵੁਤ੍ਤੋ, ਤਂ ਮਾਤਿਕਾਯਞ੍ਚ ਪਦਭਾਜਨੇ (ਪਾਰਾ. ੩੮੬) ਚ ਵੁਤ੍ਤਂ ਉਭਯਮ੍ਪੇਤਨ੍ਤਿ ਯੋਜੇਤਬ੍ਬਂ. ਦ੍ਵੀਹੀਤਿ ‘‘ਤੇਨ ਚ ਕੋਪੇਨ, ਤੇਨ ਚ ਦੋਸੇਨਾ’’ਤਿ ਵੁਤ੍ਤਕੋਪਦੋਸਪਦੇਹਿ ਦ੍ਵੀਹਿ, ਅਤ੍ਥਤੋ ਪਨ ਦ੍ਵੀਹਿਪਿ ਦੋਸੋਵ ਦਸ੍ਸਿਤੋਤਿ ਆਹ ‘‘ਸਙ੍ਖਾਰਕ੍ਖਨ੍ਧਮੇਵ ਦਸ੍ਸੇਤੀ’’ਤਿ. ਯਾਯਾਤਿ ਅਨਤ੍ਤਮਨਤਾਯ.

ਨ ਚੁਦਿਤਕਵਸੇਨਾਤਿ ਯਦਿ ਚੁਦਿਤਕਵਸੇਨਾਪਿ ਅਮੂਲਕਂ ਅਧਿਪ੍ਪੇਤਂ ਸਿਯਾ, ਅਮੂਲਕਂ ਨਾਮ ਅਨਜ੍ਝਾਪਨ੍ਨਨ੍ਤਿ ਪਦਭਾਜਨਂ ਵਦੇਯ੍ਯਾਤਿ ਅਧਿਪ੍ਪਾਯੋ. ਯਂ ਪਾਰਾਜਿਕਨ੍ਤਿ ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਪਾਰਾਜਿਕੇਸੁ ਅਞ੍ਞਤਰਂ. ਪਦਭਾਜਨੇ (ਪਾਰਾ. ੩੮੬) ਪਨ ਭਿਕ੍ਖੁਵਿਭਙ੍ਗੇ ਆਗਤਾਨੇਵ ਗਹੇਤ੍ਵਾ ‘‘ਚਤੁਨ੍ਨਂ ਅਞ੍ਞਤਰੇਨਾ’’ਤਿ ਵੁਤ੍ਤਂ. ਏਤਂ ਇਧ ਅਪ੍ਪਮਾਣਨ੍ਤਿ ਏਤਂ ਆਪਨ੍ਨਾਨਾਪਨ੍ਨਤਂ ਇਧਾਨੁਦ੍ਧਂਸਨੇ ਆਪਤ੍ਤਿਯਾ ਅਨਙ੍ਗਂ, ਆਪਤ੍ਤਿਂ ਪਨ ਆਪਨ੍ਨੇ ਵਾ ਅਨਾਪਨ੍ਨੇ ਵਾ ਪੁਗ੍ਗਲੇ ‘‘ਅਨਾਪਨ੍ਨੋ ਏਸੋ ਸੁਦ੍ਧੋ’’ਤਿ ਸੁਦ੍ਧਸਞ੍ਞਾਯ ਵਾ ਵਿਮਤਿਯਾ ਵਾ ਚਾਵਨਾਧਿਪ੍ਪਾਯੋਵ ਇਧ ਅਙ੍ਗਨ੍ਤਿ ਅਧਿਪ੍ਪਾਯੋ.

ਤਥੇਵਾਤਿ ਪਸਾਦਸੋਤੇਨ, ਦਿਬ੍ਬਸੋਤੇਨ ਵਾਤਿ ਇਮਮਤ੍ਥਂ ਅਤਿਦਿਸਤਿ. ਦਿਟ੍ਠਾਨੁਸਾਰੇਨੇਵ ਸਮੁਪ੍ਪਨ੍ਨਾ ਪਰਿਸਙ੍ਕਾਵ ਦਿਟ੍ਠਪਰਿਸਙ੍ਕਿਤਂ ਨਾਮ. ਏਵਂ ਸੇਸੇਸੁਪਿ. ‘‘ਅਦਿਸ੍ਵਾ ਵਾ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ, ਦਿਸ੍ਵਾ ਪਕ੍ਕਨ੍ਤੇਸੁਪਿ ਦੋਸੋ ਨਤ੍ਥਿਯੇਵ. ਇਮੇਸਨ੍ਤਿ ਇਮੇਹਿ. ਕਰਿਸ੍ਸਨ੍ਤੀਤਿ ਤਸ੍ਮਿਂ ਖਣੇ ਉਪ੍ਪਜ੍ਜਨਾਕਾਰਦਸ੍ਸਨਂ, ਪਚ੍ਛਾ ਪਨ ਏਤ੍ਤਕੇਨ ਕਾਲੇਨ ਕਤਂ ਵਾਤਿ ਸਙ੍ਕਾਯ ਚੋਦੇਤਿ. ਨ ਹਿ ਕਰਿਸ੍ਸਨ੍ਤੀਤਿ ਚੋਦਨਾ ਅਤ੍ਥਿ. ‘‘ਅਰਿਟ੍ਠਂ ਪੀਤ’’ਨ੍ਤਿ ਇਦਂ ਮੁਖੇ ਸੁਰਾਗਨ੍ਧਵਾਯਨਨਿਮਿਤ੍ਤਦਸ੍ਸਨਂ. ਅਰਿਟ੍ਠਞ੍ਹਿ ਸੁਰਾਸਦਿਸਵਣ੍ਣਗਨ੍ਧਂ ਕਪ੍ਪਿਯਭੇਸਜ੍ਜਂ.

ਦਿਟ੍ਠਂ ਅਤ੍ਥਿ ਸਮੂਲਕਨ੍ਤਿਆਦੀਸੁ ਅਜ੍ਝਾਚਾਰਸ੍ਸ ਸਮ੍ਭਵਾਸਮ੍ਭਵਾਨਂ ਮੂਲਾਮੂਲਭਾਵਦਸ੍ਸਨਂ. ਅਤ੍ਥਿ ਸਞ੍ਞਾਸਮੂਲਕਨ੍ਤਿਆਦਿ ਪਨ ਦਿਟ੍ਠਸਞ੍ਞਾਯ ਸਮ੍ਭਵਾਸਮ੍ਭਵਾਨਂ ਮੂਲਾਮੂਲਭਾਵਦਸ੍ਸਨਂ. ਦਿਸ੍ਵਾਵ ਦਿਟ੍ਠਸਞ੍ਞੀ ਹੁਤ੍ਵਾ ਚੋਦੇਤੀਤਿ ਏਤ੍ਥ ਯਂ ਚੋਦੇਤਿ, ਤਤੋ ਅਞ੍ਞਂ ਪੁਗ੍ਗਲਂ ਵੀਤਿਕ੍ਕਮਨ੍ਤਂ, ਪਟਿਚ੍ਛਨ੍ਨੋਕਾਸਤੋ ਨਿਕ੍ਖਮਨ੍ਤਂ ਵਾ ਦਿਸ੍ਵਾ ‘‘ਅਯਂ ਸੋ’’ਤਿ ਸਞ੍ਞਾਯ ਚੋਦੇਨ੍ਤੋਪਿ ਸਙ੍ਗਯ੍ਹਤਿ. ਏਸ ਨਯੋ ਸੁਤਾਦੀਸੁਪਿ. ਸਮੂਲਕੇਨ ਵਾ ਸਞ੍ਞਾਸਮੂਲਕੇਨ ਵਾਤਿ ਏਤ੍ਥ ਪਾਰਾਜਿਕਮਾਪਨ੍ਨਂ ਦਿਟ੍ਠਾਦਿਮੂਲਕੇਨ ਚ ‘‘ਅਯਂ ਆਪਨ੍ਨੋ’’ਤਿ ਅਸੁਦ੍ਧਸਞ੍ਞਾਯ ਚੋਦੇਨ੍ਤੋ ਸਮੂਲਕੇਨ ਚੋਦੇਤਿ ਨਾਮ. ਸਞ੍ਞਾਸਮੂਲਕਤ੍ਤੇ ਏਵ ਅਨਾਪਤ੍ਤਿਸਮ੍ਭਵਤੋ ਆਪਨ੍ਨੇ ਵਾ ਅਨਾਪਨ੍ਨੇ ਵਾ ਪੁਗ੍ਗਲੇ ਆਪਨ੍ਨਸਞ੍ਞੀ ਦਿਟ੍ਠਾਦੀਸੁ, ਅਦਿਟ੍ਠਾਦੀਸੁ ਵਾ ਮੂਲੇਸੁ ਦਿਟ੍ਠਸੁਤਾਦਿਸਞ੍ਞੀ ਤੇਨ ਦਿਟ੍ਠਾਦਿਮੂਲਕੇਨ ਤਂ ਪੁਗ੍ਗਲਂ ਚੋਦੇਨ੍ਤੋ ਸਞ੍ਞਾਸਮੂਲਕੇਨ ਚੋਦੇਤਿ ਨਾਮ. ਇਮੇਸਂ ਅਨਾਪਤ੍ਤਿ, ਵੁਤ੍ਤਵਿਪਰਿਯਾਯੇਨ ਆਪਤ੍ਤਿਵਾਰੇ ਅਤ੍ਥੋ ਵੇਦਿਤਬ੍ਬੋ.

ਸਮੀਪੇ ਠਤ੍ਵਾਤਿ ਹਤ੍ਥਵਿਕਾਰਵਚੀਘੋਸਾਨਂ ਚੋਦਨਾਵਸੇਨ ਪਵਤ੍ਤਿਯਮਾਨਾਨਂ ਦਸ੍ਸਨਸਵਨੂਪਚਾਰੇ ਠਤ੍ਵਾਤਿ ਅਤ੍ਥੋ. ਕੇਚਿ ਪਨ ‘‘ਦ੍ਵਾਦਸਹਤ੍ਥਬ੍ਭਨ੍ਤਰੇ ਠਤ੍ਵਾ’’ਤਿ (ਸਾਰਤ੍ਥ. ਟੀ. ੨.੩੮੫-੩੮੬) ਵਦਨ੍ਤਿ, ਤਂ ਨ ਯੁਤ੍ਤਂ. ਪਰਤੋ ਬ੍ਯਤਿਰੇਕਤੋ ਅਨਾਪਤ੍ਤਿਂ ਦਸ੍ਸੇਨ੍ਤੇਨ ‘‘ਦੂਤਂ ਵਾ ਪਣ੍ਣਂ ਵਾ ਸਾਸਨਂ ਵਾ ਪੇਸੇਤ੍ਵਾ’’ਤਿ ਏਤ੍ਤਕਮੇਵ ਵੁਤ੍ਤਂ, ਨ ਪਨ ‘‘ਦ੍ਵਾਦਸਹਤ੍ਥਂ ਮੁਞ੍ਚਿਤ੍ਵਾ ਚੋਦੇਨ੍ਤਸ੍ਸ ਸੀਸਂ ਨ ਏਤੀ’’ਤਿ ਵੁਤ੍ਤਂ. ਵਾਚਾਯ ਵਾਚਾਯਾਤਿ ਸਕਿਂ ਆਣਤ੍ਤਸ੍ਸ ਸਕਲਮ੍ਪਿ ਦਿਵਸਂ ਵਦਤੋ ਵਾਚਾਯ ਵਾਚਾਯ ਚੋਦਾਪਕਸ੍ਸੇਵ ਆਪਤ੍ਤਿ. ਸੋਪੀਤਿ ਆਣਤ੍ਤੋਪਿ. ਤਸ੍ਸ ਚ ‘‘ਮਯਾਪਿ ਦਿਟ੍ਠ’’ਨ੍ਤਿਆਦਿਂ ਅਵਤ੍ਵਾਪਿ ‘‘ਅਮੂਲਕ’’ਨ੍ਤਿ ਸਞ੍ਞਾਯ ਚਾਵਨਾਧਿਪ੍ਪਾਯੇਨ ‘‘ਤ੍ਵਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ਤਿ ਇਦਮੇਵ ਵਾਚਂ ਪਰਸ੍ਸ ਵਚਨਂ ਵਿਯ ਅਕਤ੍ਵਾ ਸਾਮਞ੍ਞਤੋ ਵਦਨ੍ਤਸ੍ਸਾਪਿ ਸਙ੍ਘਾਦਿਸੇਸੋ ਏਵ. ਸਤਿਪਿ ਪਨ ਅਨੁਦ੍ਧਂਸਨਾਧਿਪ੍ਪਾਯੇ ‘‘ਅਸੁਕੇਨ ਏਵਂ ਵੁਤ੍ਤ’’ਨ੍ਤਿ ਪਰੇਨ ਵੁਤ੍ਤਮੇਵ ਵਦਨ੍ਤਸ੍ਸ ਨਤ੍ਥਿ ਸਙ੍ਘਾਦਿਸੇਸੋ. ਸਚੇ ਪਨ ਪਰੇਨ ਅਵੁਤ੍ਤਮ੍ਪਿ ਵੁਤ੍ਤਨ੍ਤਿ ਵਦਤਿ, ਆਪਤ੍ਤਿ ਏਵ.

ਸਮ੍ਬਹੁਲਾ ਸਮ੍ਬਹੁਲੇ ਸਮ੍ਬਹੁਲੇਹਿ ਵਤ੍ਥੂਹੀਤਿ ਏਤ੍ਥ ਸਮ੍ਬਹੁਲੇਤਿ ਚੁਦਿਤਕਬਹੁਤ੍ਤਨਿਦ੍ਦੇਸੇਨ ਪੁਰਿਮੇਸੁ ਤੀਸੁ ਵਾਰੇਸੁ ਚੁਦਿਤਕਬਹੁਤ੍ਤੇਨਾਪਿ ਵਾਰਭੇਦਸਬ੍ਭਾਵਂ ਞਾਪੇਤਿ. ਏਕਸ੍ਮਿਞ੍ਹਿ ਚੁਦਿਤਕਵਤ੍ਥੁਚੋਦਕਭੇਦੇਨ ਇਦਂ ਚਤੁਕ੍ਕਂ ਵੁਤ੍ਤਂ, ਚੁਦਿਤਕਬਹੁਤ੍ਤੇਨਾਪਿ ਚਤੁਕ੍ਕਨ੍ਤਰਂ ਲਬ੍ਭਤੀਤਿ ਅਟ੍ਠਕਂ ਹੋਤਿ ਏਵ.

ਅਮੂਲਕਚੋਦਨਾਪਸਙ੍ਗੇਨ ਸਮੂਲਕਚੋਦਨਾਲਕ੍ਖਣਾਦਿਂ ਦਸ੍ਸੇਤੁਂ ‘‘ਚੋਦੇਤੁਂ ਪਨ ਕੋ ਲਭਤੀ’’ਤਿਆਦਿ ਆਰਦ੍ਧਂ. ਭਿਕ੍ਖੁਸ੍ਸ ਸੁਤ੍ਵਾ ਚੋਦੇਤੀਤਿਆਦਿ ਸੁਤ੍ਤਂ ਯਸ੍ਮਾ ਯੇ ਚੋਦਕਸ੍ਸ ਅਞ੍ਞੇਸਂ ਵਿਪਤ੍ਤਿਂ ਪਕਾਸੇਨ੍ਤਿ, ਤੇਪਿ ਤਸ੍ਮਿਂ ਖਣੇ ਚੋਦਕਭਾਵੇ ਠਤ੍ਵਾਵ ਪਕਾਸੇਨ੍ਤਿ, ਤੇਸਞ੍ਚ ਵਚਨਂ ਗਹੇਤ੍ਵਾ ਇਤਰੋਪਿ ਯਸ੍ਮਾ ਚੋਦੇਤੁਞ੍ਚ ਅਸਮ੍ਪਟਿਚ੍ਛਨ੍ਤਂ ਤੇਹਿ ਤਿਤ੍ਥਿਯਸਾਵਕਪਰਿਯੋਸਾਨੇਹਿ ਪਠਮਚੋਦਕੇਹਿ ਸਮ੍ਪਟਿਚ੍ਛਾਪੇਤੁਞ੍ਚ ਲਭਤਿ, ਤਸ੍ਮਾ ਇਧ ਸਾਵਕਭਾਵੇਨ ਉਦ੍ਧਟਨ੍ਤਿ ਵੇਦਿਤਬ੍ਬਂ.

ਦੂਤਂ ਵਾਤਿਆਦੀਸੁ ‘‘ਤ੍ਵਂ ਏਵਂ ਗਨ੍ਤ੍ਵਾ ਚੋਦੇਹੀ’’ਤਿ ਦੂਤਂ ਵਾ ਪੇਸੇਤ੍ਵਾ ਯੋ ਚੋਦੇਤੁਂ ਸਕ੍ਕੋਤਿ, ਤਸ੍ਸ ਪਣ੍ਣਂ, ਮੂਲਸਾਸਨਂ ਵਾ ਪੇਸੇਤ੍ਵਾ. ਸਮਯੇਨਾਤਿ ਪਕਤਿਯਾ ਜਾਨਨਕ੍ਖਣੇ.

ਗਰੁਕਾਨਂ ਦ੍ਵਿਨ੍ਨਨ੍ਤਿ ਪਾਰਾਜਿਕਸਙ੍ਘਾਦਿਸੇਸਾਨਂ. ਮਿਚ੍ਛਾਦਿਟ੍ਠਿ ਨਾਮ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾ (ਮ. ਨਿ. ੧.੪੪੫; ੨.੯੪, ੯੫, ੨੨੫; ੩.੯੧, ੧੧੬, ੧੩੬; ਸਂ. ਨਿ. ੩.੨੧੦) ਦਸਵਤ੍ਥੁਕਾ ਦਿਟ੍ਠਿ, ਸਸ੍ਸਤੁਚ੍ਛੇਦਸਙ੍ਖਾਤਂ ਅਨ੍ਤਂ ਗਣ੍ਹਾਪਕਦਿਟ੍ਠਿ ਅਨ੍ਤਗ੍ਗਾਹਿਕਾ ਨਾਮ. ਆਜੀਵਹੇਤੁ ਪਞ੍ਞਤ੍ਤਾਨਂ ਛਨ੍ਨਨ੍ਤਿ ਆਜੀਵਹੇਤੁਪਿ ਆਪਜ੍ਜਿਤਬ੍ਬਾਨਂ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਂ (ਪਾਰਾ. ੧੯੫), ਸਞ੍ਚਰਿਤ੍ਤੇ (ਪਾਰਾ. ੩੦੧, ੩੦੨) ਸਙ੍ਘਾਦਿਸੇਸੋ, ‘‘ਯੋ ਤੇ ਵਿਹਾਰੇ ਵਸਤਿ, ਸੋ ਅਰਹਾ’’ਤਿ (ਪਾਰਾ. ੨੨੦) ਪਰਿਯਾਯੇਨ ਥੁਲ੍ਲਚ੍ਚਯਂ, ਭਿਕ੍ਖੁਸ੍ਸ ਪਣੀਤਭੋਜਨਵਿਞ੍ਞਤ੍ਤਿਯਾ ਪਾਚਿਤ੍ਤਿਯਂ (ਪਾਚਿ. ੨੫੭), ਭਿਕ੍ਖੁਨਿਯਾਪਣੀਤਭੋਜਨਵਿਞ੍ਞਤ੍ਤਿਯਾ ਪਾਟਿਦੇਸਨੀਯਂ (ਪਾਚਿ. ੧੨੩੬), ਸੂਪੋਦਨਵਿਞ੍ਞਤ੍ਤਿਯਾ (ਪਾਚਿ. ੬੧੨-੬੧੩) ਦੁਕ੍ਕਟਨ੍ਤਿ ਇਮੇਸਂ ਪਰਿਵਾਰੇ (ਪਰਿ. ੨੮੭) ਵੁਤ੍ਤਾਨਂ ਛਨ੍ਨਂ. ਨ ਹੇਤਾ ਆਪਤ੍ਤਿਯੋ ਆਜੀਵਹੇਤੁ ਏਵ ਪਞ੍ਞਤ੍ਤਾ ਸਞ੍ਚਰਿਤ੍ਤਾਦੀਨਂ ਅਞ੍ਞਥਾਪਿ ਆਪਜ੍ਜਿਤਬ੍ਬਤੋ. ਆਜੀਵਹੇਤੁਪਿ ਏਤਾਸਂ ਆਪਜ੍ਜਨਂ ਸਨ੍ਧਾਯ ਏਵਂ ਵੁਤ੍ਤਂ, ਆਜੀਵਹੇਤੁਪਿ ਪਞ੍ਞਤ੍ਤਾਨਨ੍ਤਿ ਅਤ੍ਥੋ. ਨ ਕੇਵਲਞ੍ਚ ਏਤਾ ਏਵ, ਅਞ੍ਞਾਪਿ ਅਦਿਨ੍ਨਾਦਾਨਕੁਲਦੂਸਨਪਾਣਵਧਵੇਜ੍ਜਕਮ੍ਮਾਦਿਵਸੇਨ ਆਜੀਵਹੇਤੁ ਆਪਜ੍ਜਿਤਬ੍ਬਾਪਿ ਸਨ੍ਤਿ, ਤਾ ਪਨ ਆਪਤ੍ਤਿਸਭਆਗਤਾਯ ਪਾਰਾਜਿਕਾਦੀਸੁ ਛਸੁ ਏਵ ਸਙ੍ਗਯ੍ਹਨ੍ਤੀਤਿ ਵਿਸੁਂ ਨ ਵੁਤ੍ਤਾਤਿ ਵੇਦਿਤਬ੍ਬਾ.

ਏਤ੍ਤਾਵਤਾ ਪਨ ਸੀਸਂ ਨ ਏਤੀਤਿ ਸਙ੍ਘਾਦਿਸੇਸਂ ਸਨ੍ਧਾਯ ਵੁਤ੍ਤਂ, ਚੋਦਨਾ ਪਨ ਕਤਾ ਏਵ ਹੋਤਿ. ਤਿਂਸਾਨੀਤਿ ਤਿਂਸਂ ਏਤੇਸਮਤ੍ਥੀਤਿ ਤਿਂਸਾਨਿ, ਤਿਂਸਾਧਿਕਾਨੀਤਿ ਵੁਤ੍ਤਂ ਹੋਤਿ. ਨਵੁਤਾਨੀਤਿ ਏਤ੍ਥਾਪਿ ਏਸੇਵ ਨਯੋ.

ਅਤ੍ਤਾਦਾਨਂ ਆਦਾਤੁਕਾਮੇਨਾਤਿ ਏਤ੍ਥ ਅਤ੍ਤਨਾ ਆਦਾਤਬ੍ਬਤੋ ਦਿਟ੍ਠਾਦਿਮੂਲਕੇਹਿ ਗਹੇਤਬ੍ਬਤੋ ਪਰਸ੍ਸ ਵਿਪ੍ਫਨ੍ਦਿਤੁਂ ਅਦਤ੍ਵਾ ਪਗ੍ਗਣ੍ਹਨਤੋ ਅਤ੍ਤਾਦਾਨਨ੍ਤਿ ਚੋਦਨਾ ਵੁਚ੍ਚਤਿ, ਤਂ ਆਦਾਤੁਕਾਮੇਨ, ਚੋਦਨਂ ਕਤ੍ਤੁਕਾਮੇਨਾਤਿ ਅਤ੍ਥੋ.

ਉਬ੍ਬਾਹਿਕਾਯਾਤਿ ਉਬ੍ਬਹਨ੍ਤਿ ਵਿਯੋਜੇਨ੍ਤਿ ਏਤਾਯ ਅਲਜ੍ਜੀਨਂ ਤਜ੍ਜਨਿਂ ਵਾ ਕਲਹਂ ਵਾਤਿ ਉਬ੍ਬਾਹਿਕਾ, ਸਙ੍ਘਸਮ੍ਮੁਤਿ, ਤਾਯ. ਵਿਨਿਚ੍ਛਿਨਨਂ ਨਾਮ ਤਾਯ ਸਮ੍ਮਤਭਿਕ੍ਖੂਹਿ ਵਿਨਿਚ੍ਛਨਨਮੇਵ. ਅਲਜ੍ਜੁਸ੍ਸਨ੍ਨਾਯ ਹਿ ਪਰਿਸਾਯ ਸਮਥਕ੍ਖਨ੍ਧਕੇ (ਚੂਲ਼ਵ. ੨੨੭) ਆਗਤੇਹਿ ਦਸਙ੍ਗੇਹਿ ਸਮਨ੍ਨਾਗਤਾ ਦ੍ਵੇ ਤਯੋ ਭਿਕ੍ਖੂ ਤਤ੍ਥੇਵ ਵੁਤ੍ਤਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਨ੍ਨਿਤਬ੍ਬਾ, ਤੇਹਿ ਚ ਸਮ੍ਮਤੇਹਿ ਵਿਸੁਂ ਵਾ ਨਿਸੀਦਿਤ੍ਵਾ, ਤਸ੍ਸਾ ਏਵ ਵਾ ਪਰਿਸਾਯ ‘‘ਅਞ੍ਞੇਹਿ ਨ ਕਿਞ੍ਚਿ ਕਥੇਤਬ੍ਬ’’ਨ੍ਤਿ ਸਾਵੇਤ੍ਵਾ ਤਂ ਅਧਿਕਰਣਂ ਵਿਨਿਚ੍ਛਿਤਬ੍ਬਂ.

ਕਿਮ੍ਹੀਤਿ ਕਿਸ੍ਮਿਂ ਵਤ੍ਥੁਸ੍ਮਿਂ, ਕਤਰਵਿਪਤ੍ਤਿਯਨ੍ਤਿ ਅਤ੍ਥੋ. ‘‘ਕਿਮ੍ਹਿ ਨਂ ਨਾਮਾ’’ਤਿ ਇਦਂ ‘‘ਕਤਰਾਯ ਵਿਪਤ੍ਤਿਯਾ ਏਤਂ ਚੋਦੇਸੀ’’ਤਿ ਯਾਯ ਕਾਯਚਿ ਵਿਞ੍ਞਾਯਮਾਨਾਯ ਭਾਸਾਯ ਵੁਤ੍ਤੇਪਿ ਚੋਦਕਸ੍ਸ ਵਿਨਯੇ ਅਪਕਤਞ੍ਞੁਤਾਯ ‘‘ਸੀਲਾਚਾਰਦਿਟ੍ਠਿਆਜੀਵਵਿਪਤ੍ਤੀਸੁ ਕਤਰਾਯਾਤਿ ਮਂ ਪੁਚ੍ਛਤੀ’’ਤਿ ਞਾਤੁਂ ਅਸਕ੍ਕੋਨ੍ਤਸ੍ਸ ਪੁਚ੍ਛਾ, ਨ ਪਨ ਕਿਮ੍ਹੀਤਿਆਦਿਪਦਤ੍ਥਮਤ੍ਤਂ ਅਜਾਨਨ੍ਤਸ੍ਸ. ਨ ਹਿ ਅਨੁਵਿਜ੍ਜਕੋ ਚੋਦਕਂ ਬਾਲਂ ਅਪਰਿਚਿਤਭਾਸਾਯ ‘‘ਕਿਮ੍ਹਿ ਨ’’ਨ੍ਤਿ ਪੁਚ੍ਛਤਿ. ‘‘ਕਿਮ੍ਹਿ ਨਮ੍ਪਿ ਨ ਜਾਨਾਸੀ’’ਤਿ ਇਦਮ੍ਪਿ ਵਚਨਮਤ੍ਤਂ ਸਨ੍ਧਾਯ ਵੁਤ੍ਤਂ ਨ ਹੋਤਿ, ‘‘ਕਤਰਵਿਪਤ੍ਤਿਯਾ’’ਤਿ ਵੁਤ੍ਤੇ ‘‘ਅਸੁਕਾਯ ਵਿਪਤ੍ਤਿਯਾ’’ਤਿ ਵਤ੍ਤੁਮ੍ਪਿ ਨ ਜਾਨਾਸੀਤਿ ਵਚਨਸ੍ਸ ਅਧਿਪ੍ਪਾਯਮੇਵ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ. ਤੇਨੇਵ ਵਕ੍ਖਤਿ ‘‘ਬਾਲਸ੍ਸ ਲਜ੍ਜਿਸ੍ਸ ਨਯੋ ਦਾਤਬ੍ਬੋ’’ਤਿ ਵਤ੍ਵਾ ਚ ‘‘ਕਿਮ੍ਹਿ ਨਂ ਚੋਦੇਸੀਤਿ ਸੀਲਵਿਪਤ੍ਤਿਯਾ’’ਤਿਆਦਿ ਅਧਿਪ੍ਪਾਯਪ੍ਪਕਾਸਨਮੇਵ ਨਯਦਾਨਂ ਵੁਤ੍ਤਂ, ਨ ਪਨ ਕਿਮ੍ਹਿ-ਨਂ-ਪਦਾਨਂ ਪਰਿਯਾਯਮਤ੍ਤਦਸ੍ਸਨਂ. ਨ ਹਿ ਬਾਲੋ ‘‘ਕਤਰਵਿਪਤ੍ਤਿਯਂ ਨਂ ਚੋਦੇਸੀ’’ਤਿ ਇਮਸ੍ਸ ਵਚਨਸ੍ਸ ਅਤ੍ਥੇ ਞਾਤੇਪਿ ਵਿਪਤ੍ਤਿਪ੍ਪਭੇਦਨਂ, ਅਤ੍ਤਨਾ ਚੋਦਿਯਮਾਨਂ ਵਿਪਤ੍ਤਿਸਰੂਪਞ੍ਚ ਜਾਨਿਤੁਂ ਸਕ੍ਕੋਤਿ, ਤਸ੍ਮਾ ਤੇਨੇਵ ਅਜਾਨਨੇਨ ਅਲਜ੍ਜੀ ਅਪਸਾਦੇਤਬ੍ਬੋ. ‘‘ਕਿਮ੍ਹਿ ਨ’’ਨ੍ਤਿ ਇਦਮ੍ਪਿ ਉਪਲਕ੍ਖਣਮਤ੍ਤਂ, ਅਞ੍ਞੇਨ ਵਾ ਯੇਨ ਕੇਨਚਿ ਆਕਾਰੇਨ ਅਵਿਞ੍ਞੁਤਂ ਪਕਾਸੇਤ੍ਵਾ ਵਿਸ੍ਸਜ੍ਜੇਤਬ੍ਬੋਵ.

‘‘ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯਾ’’ਤਿਆਦਿਵਚਨਤੋ (ਪਾਰਾ. ੩੯; ਪਰਿ. ੨) ‘‘ਅਲਜ੍ਜੀਨਿਗ੍ਗਹਤ੍ਥਾਯ…ਪੇ… ਪਞ੍ਞਤ੍ਤ’’ਨ੍ਤਿ ਵੁਤ੍ਤਂ. ਏਹਿਤੀਤਿ ਹਿ-ਕਾਰੋ ਏਤ੍ਥ ਆਗਮੋ ਦਟ੍ਠਬ੍ਬੋ, ਆਗਮਿਸ੍ਸਤੀਤਿ ਅਤ੍ਥੋ. ਦਿਟ੍ਠਸਨ੍ਤਾਨੇਨਾਤਿ ਦਿਟ੍ਠਨਿਯਾਮੇਨ. ਅਲਜ੍ਜਿਸ੍ਸ ਪਟਿਞ੍ਞਾਯ ਏਵ ਕਾਤਬ੍ਬਨ੍ਤਿ ਵਚਨਪਟਿਵਚਨਕ੍ਕਮੇਨੇਵ ਦੋਸੇ ਆਵਿਭੂਤੇਪਿ ਅਲਜ੍ਜਿਸ੍ਸ ‘‘ਅਸੁਦ੍ਧੋਹ’’ਨ੍ਤਿ ਦੋਸਸਮ੍ਪਟਿਚ੍ਛਨਪਅਞ੍ਞਾਯ ਏਵ ਆਪਤ੍ਤਿਯਾ ਕਾਤਬ੍ਬਨ੍ਤਿ ਅਤ੍ਥੋ. ਕੇਚਿ ਪਨ ‘‘ਅਲਜ੍ਜਿਸ੍ਸ ਏਤਂ ਨਤ੍ਥੀਤਿ ਸੁਦ੍ਧਪਟਿਞ੍ਞਾਯ ਏਵ ਅਨਾਪਤ੍ਤਿਯਾ ਕਾਤਬ੍ਬਨ੍ਤਿ ਅਯਮੇਤ੍ਥ ਅਤ੍ਥੋ ਸਙ੍ਗਹਿਤੋ’’ਤਿ ਵਦਨ੍ਤਿ, ਤਂ ਨ ਯੁਤ੍ਤਂ ਅਨੁਵਿਜ੍ਜਕਸ੍ਸੇਵ ਨਿਰਤ੍ਥਕਤ੍ਤਾਪਤ੍ਤਿਤੋ ਚੋਦਕੇਨੇਵ ਅਲਜ੍ਜਿਪਟਿਞ੍ਞਾਯ ਠਾਤਬ੍ਬਤੋ. ਦੋਸਾਪਗਮਪਟਿਞ੍ਞਾ ਏਵ ਹਿ ਇਧ ਪਟਿਞ੍ਞਾਤਿ ਅਧਿਪ੍ਪੇਤਾ. ਤੇਨੇਵ ਵਕ੍ਖਤਿ ‘‘ਏਤਮ੍ਪਿ ਨਤ੍ਥੀਤਿ ਪਟਿਞ੍ਞਂ ਨ ਦੇਤੀ’’ਤਿਆਦਿ (ਪਾਰਾ. ਅਟ੍ਠ. ੨.੩੮੫-੩੮੬).

ਤਦਤ੍ਥਦੀਪਨਤ੍ਥਨ੍ਤਿ ਅਲਜ੍ਜਿਸ੍ਸ ਦੋਸੇ ਆਵਿਭੂਤੇਪਿ ਤਸ੍ਸ ਦੋਸਾਪਗਮਪਟਿਞ੍ਞਾਯ ਏਵ ਕਾਤਬ੍ਬਤਾਦੀਪਨਤ੍ਥਂ. ਵਿਵਾਦਵਤ੍ਥੁਸਙ੍ਖਾਤੇ ਅਤ੍ਥੇ ਪਚ੍ਚਤ੍ਥਿਕਾ ਅਤ੍ਥਪਚ੍ਚਤ੍ਥਿਕਾ. ਸਞ੍ਞਂ ਦਤ੍ਵਾਤਿ ਨੇਸਂ ਕਥਾਪਚ੍ਛੇਦਤ੍ਥਂ, ਅਭਿਮੁਖਕਰਣਤ੍ਥਞ੍ਚ ਸਦ੍ਦਂ ਕਤ੍ਵਾ. ਵਿਨਿਚ੍ਛਿਨਿਤੁਂ ਅਨਨੁਚ੍ਛਵਿਕੋਤਿ ‘‘ਅਸੁਦ੍ਧੋ’’ਤਿ ਸਞ੍ਞਾਯ ਚੋਦਕਪਕ੍ਖੇ ਪਵਿਟ੍ਠਤ੍ਤਾ ਅਨੁਵਿਜ੍ਜਕਭਾਵਤੋ ਬਹਿਭੂਤਤ੍ਤਾ ਅਨੁਵਿਜ੍ਜਿਤੁਂ ਅਸਕ੍ਕੁਣੇਯ੍ਯਤਂ ਸਨ੍ਧਾਯ ਵੁਤ੍ਤਂ. ਸਨ੍ਦੇਹੇ ਏਵ ਹਿ ਸਤਿ ਅਨੁਵਿਜ੍ਜਿਤੁਂ ਸਕ੍ਕਾ, ਅਸੁਦ੍ਧਦਿਟ੍ਠਿਯਾ ਪਨ ਸਤਿ ਚੁਦਿਤਕੇਨ ਵੁਤ੍ਤਂ ਸਬ੍ਬਂ ਅਸਚ੍ਚਤੋਪਿ ਪਟਿਭਾਤਿ, ਕਥਂ ਤਤ੍ਥ ਅਨੁਵਿਜ੍ਜਨਾ ਸਿਯਾਤਿ.

‘‘ਤਥਾ ਨਾਸਿਤਕੋਵ ਭਵਿਸ੍ਸਤੀ’’ਤਿ ਇਮਿਨਾ ਵਿਨਿਚ੍ਛਯਂ ਅਦਤ੍ਵਾ ਸਙ੍ਘਤੋ ਵਿਯੋਜਨਂ ਨਾਮ ਲਿਙ੍ਗਨਾਸਨਾ ਵਿਯ ਅਯਮ੍ਪਿ ਏਕੋ ਨਾਸਨਪ੍ਪਕਾਰੋਤਿ ਦਸ੍ਸੇਤਿ. ਵਿਰਦ੍ਧਂ ਹੋਤੀਤਿ ਸਞ੍ਚਿਚ੍ਚ ਆਪਤ੍ਤਿਂ ਸਹਸਾ ਆਪਨ੍ਨੋ ਹੋਤਿ. ‘‘ਆਦਿਤੋ ਪਟ੍ਠਾਯ ਅਲਜ੍ਜੀ ਨਾਮ ਨਤ੍ਥੀ’’ਤਿ ਇਦਂ ‘‘ਪਕ੍ਖਾਨੁਰਕ੍ਖਣਤ੍ਥਾਯ ਪਟਿਞ੍ਞਂ ਨ ਦੇਤੀ’’ਤਿ ਇਮਸ੍ਸ ਅਲਜ੍ਜਿਲਕ੍ਖਣਸਮ੍ਭਵਸ੍ਸ ਕਾਰਣਵਚਨਂ. ਪਟਿਚ੍ਛਾਦਿਤਕਾਲਤੋ ਪਟ੍ਠਾਯ ਅਲਜ੍ਜੀ ਨਾਮ ਏਵ, ਪੁਰਿਮੋ ਲਜ੍ਜਿਭਾਵੋ ਨ ਰਕ੍ਖਤੀਤਿ ਅਤ੍ਥੋ. ਪਟਿਞ੍ਞਂ ਨ ਦੇਤੀਤਿ ਸਚੇ ਮਯਾ ਕਤਦੋਸਂ ਵਕ੍ਖਾਮਿ, ਮਯ੍ਹਂ ਅਨੁਵਤ੍ਤਕਾ ਭਿਜ੍ਜਿਸ੍ਸਨ੍ਤੀਤਿ ਪਟਿਞ੍ਞਂ ਨ ਦੇਤਿ. ਠਾਨੇ ਨ ਤਿਟ੍ਠਤੀਤਿ ਲਜ੍ਜਿਟ੍ਠਾਨੇ ਨ ਤਿਟ੍ਠਤਿ, ਕਾਯਵਾਚਾਸੁ ਵੀਤਿਕ੍ਕਮੋ ਹੋਤਿ ਏਵਾਤਿ ਅਧਿਪ੍ਪਾਯੋ. ਤੇਨਾਹ ‘‘ਵਿਨਿਚ੍ਛਯੋ ਨ ਦਾਤਬ੍ਬੋ’’ਤਿ, ਪੁਬ੍ਬੇ ਪਕ੍ਖਿਕਾਨਂ ਪਟਿਞ੍ਞਾਯ ਵੂਪਸਮਿਤਸ੍ਸਾਪਿ ਅਧਿਕਰਣਸ੍ਸ ਦੁਵੂਪਸਨ੍ਤਤਾਯ ਅਯਮ੍ਪਿ ਤਥਾ ਨਾਸਿਤਕੋਵ ਭਵਿਸ੍ਸਤੀਤਿ ਅਧਿਪ੍ਪਾਯੋ.

ਚੁਦਿਤਕਚੋਦਕੇਸੁ ਪਟਿਪਤ੍ਤਿਂ ਞਤ੍ਵਾਤਿ ‘‘ਤੁਮ੍ਹੇ ਅਮ੍ਹਾਕਂ ਵਿਨਿਚ੍ਛਯੇਨ ਤੁਟ੍ਠਾ ਭਵਿਸ੍ਸਥਾ’’ਤਿਆਦਿਨਾ ਵੁਤ੍ਤਂ ਚੁਦਿਤਕਚੋਦਕੇਸੁ ਅਨੁਵਿਜ੍ਜਕੇਨ ਪਟਿਪਜ੍ਜਿਤਬ੍ਬਕਮ੍ਮਂ ਞਤ੍ਵਾ. ਵਿਨਿਚ੍ਛਯੋ ਮਜ੍ਝੇਤਿ ਆਪਤ੍ਤੀਤਿ ਵਾ ਅਨਾਪਤ੍ਤੀਤਿ ਵਾ ਵਿਨਿਚ੍ਛਯਪਰਿਯੋਸਾਨਅਨੁਵਿਜ੍ਜਨਾਨਂ ਮਜ੍ਝਂ ਨਾਮਾਤਿ ਅਤ੍ਥੋ.

ਅਮੂਲਕਮ੍ਪਿ ਸਮੂਲਕਂ ਕਤ੍ਵਾ ਵਦਨ੍ਤੀਤਿ ਆਹ ‘‘ਦ੍ਵੇ ਮੂਲਾਨੀ’’ਤਿ. ਕਾਲੇਨ ਵਕ੍ਖਾਮੀਤਿਆਦੀਸੁ ਓਕਾਸਂ ਕਾਰਾਪੇਤ੍ਵਾ ਵਦਨ੍ਤੋ ਕਾਲੇਨ ਵਦਤਿ ਨਾਮ. ਸਲਾਕਗ੍ਗਯਾਗੁਅਗ੍ਗਭਿਕ੍ਖਾਚਾਰਟ੍ਠਾਨਾਦੀਸੁ ਚੋਦੇਨ੍ਤੋ ਅਕਾਲੇਨ ਵਦਤਿ ਨਾਮ. ਦੋਸਤੋ ਵੁਟ੍ਠਾਪੇਤੁਕਾਮਤਾਯ ਵਦਨ੍ਤੋ ਅਤ੍ਥਸਂਹਿਤੇਨ ਵਦਤਿ ਨਾਮ. ਦੋਸਨ੍ਤਰੋਤਿ ਦੋਸਚਿਤ੍ਤੋ. ਪਨ੍ਨਰਸਸੁ ਧਮ੍ਮੇਸੂਤਿ ‘‘ਪਰਿਸੁਦ੍ਧਕਾਯਸਮਆਚਾਰਤਾ, ਤਥਾ ਵਚੀਸਮਾਚਾਰਤਾ, ਸਬ੍ਰਹ੍ਮਚਾਰੀਸੁ ਮੇਤ੍ਤਚਿਤ੍ਤਤਾ, ਬਹੁਸ੍ਸੁਤਤਾ, ਉਭਿਨ੍ਨਂ ਪਾਤਿਮੋਕ੍ਖਾਨਂ ਸ੍ਵਾਗਤਾਦਿਤਾ, ਕਾਲੇਨ ਵਕ੍ਖਾਮੀ’’ਤਿਆਦਿਨਾ (ਪਰਿ. ੩੬੨) ਵੁਤ੍ਤਪਞ੍ਚਧਮ੍ਮਾ ਚ ਕਾਰੁਞ੍ਞਤਾ, ਹਿਤੇਸਿਤਾ, ਅਨੁਕਮ੍ਪਤਾ, ਆਪਤ੍ਤਿਵੁਟ੍ਠਾਨਤਾ, ਵਿਨਯਪੁਰੇਕ੍ਖਾਰਤਾਤਿ (ਚੂਲ਼ਵ. ੪੦੧) ਇਮੇਸੁ ਪਨ੍ਨਰਸਸੁ. ਤਤ੍ਥ ‘‘ਕਾਰੁਞ੍ਞਤਾ’’ਤਿ ਇਮਿਨਾ ਕਰੁਣਾ ਦਸ੍ਸਿਤਾ. ਹਿਤੇਸਿਤਾਤਿ ਹਿਤਗਵੇਸਨਤਾ. ਅਨੁਕਮ੍ਪਤਾਤਿ ਤੇਨ ਹਿਤੇਨ ਸਂਯੋਜਨਤਾ, ਇਮੇਹਿ ਦ੍ਵੀਹਿਪਿ ਮੇਤ੍ਤਾ ਦਸ੍ਸਿਤਾ. ਆਪਤ੍ਤਿਵੁਟ੍ਠਾਨਤਾਤਿ ਸੁਦ੍ਧਨ੍ਤੇ ਪਤਿਟ੍ਠਾਪਨਤਾ. ਵਤ੍ਥੁਂ ਚੋਦੇਤ੍ਵਾ ਸਾਰੇਤ੍ਵਾ ਪਟਿਞ੍ਞਂ ਆਰੋਪੇਤ੍ਵਾ ਯਥਾਪਟਿਞ੍ਞਾਯ ਕਮ੍ਮਕਰਣਂ ਵਿਨਯਪੁਰੇਕ੍ਖਾਰਤਾ ਨਾਮ.

ਅਧਿਕਰਣਟ੍ਠੇਨਾਤਿ ਅਧਿਕਾਤਬ੍ਬਟ੍ਠੇਨ, ਸਮਥੇਹਿ ਵੂਪਸਮੇਤਬ੍ਬਟ੍ਠੇਨਾਤਿ ਅਤ੍ਥੋ. ਤਂ ਨਾਨਤ੍ਤਂ ਦਸ੍ਸੇਤੁਨ੍ਤਿ ਇਧ ਅਨਧਿਪ੍ਪੇਤਮ੍ਪਿ ਅਤ੍ਥੁਦ੍ਧਾਰਵਸੇਨ ਤਂ ਨਾਨਤ੍ਤਂ ਦਸ੍ਸੇਤੁਨ੍ਤਿ ਅਧਿਪ੍ਪਾਯੋ. ਤੇਨੇਵ ਵਕ੍ਖਤਿ ‘‘ਸੇਸਾਨਿ ਅਤ੍ਥੁਦ੍ਧਾਰਵਸੇਨ ਵੁਤ੍ਤਾਨੀ’’ਤਿ (ਪਾਰਾ. ਅਟ੍ਠ. ੨.੩੮੫-੩੮੬). ਯਂ ਅਧਿਕਿਚ੍ਚਾਤਿਆਦਿਨਾ ਅਧਿਕਰਣਸਦ੍ਦਸ੍ਸ ਕਮ੍ਮਸਾਧਨਤਾ ਵੁਤ੍ਤਾ.

ਗਾਹਨ੍ਤਿ ‘‘ਅਸੁਕਂ ਚੋਦੇਸ੍ਸਾਮੀ’’ਤਿ ਮਨਸਾ ਚੋਦਨਾਕਾਰਸ੍ਸ ਗਹਣਂ. ਚੇਤਨਨ੍ਤਿ ‘‘ਚੋਦੇਸ੍ਸਾਮੀ’’ਤਿ ਉਪ੍ਪਨ੍ਨਚਿਤ੍ਤਬ੍ਯਾਪਾਰਸਙ੍ਖਾਤਂ ਚਿਤ੍ਤਕਮ੍ਮਂ. ਅਕ੍ਖਨ੍ਤਿਨ੍ਤਿ ਚੁਦਿਤਕਸ੍ਸ ਵਿਪਤ੍ਤਿਂ ਦਿਸ੍ਵਾ ਉਪ੍ਪਨ੍ਨਂ ਕੋਧਂ ਅਸਹਨਂ, ਤਥਾ ਪਵਤ੍ਤਂ ਵਾ ਯਂ ਕਿਞ੍ਚਿ ਚਿਤ੍ਤਚੇਤਸਿਕਰਾਸਿਂ. ਵੋਹਾਰਨ੍ਤਿ ਚੋਦਨਾਵਸਪ੍ਪਵਤ੍ਤਵਚਨਂ. ਪਣ੍ਣਤ੍ਤਿਨ੍ਤਿ ਚੋਦਨਾਵਸਪ੍ਪਵਤ੍ਤਂ ਮਨਸਾ ਪਰਿਕਪ੍ਪਿਤਂ ਨਾਮਪਣ੍ਣਤ੍ਤਿਂ. ਅਤ੍ਤਾਦਾਨਂ ਗਹੇਤ੍ਵਾਤਿ ਚੋਦਨਂ ਮਨਸਾ ਗਹੇਤ੍ਵਾ. ਤਂ ਅਧਿਕਰਣਨ੍ਤਿ ਤਂ ਗਾਹਲਕ੍ਖਣਂ ਅਧਿਕਰਣਂ. ਨਿਰੁਜ੍ਝਤਿ ਚੇਤਨਾਯ ਖਣਿਕਤ੍ਤਾ, ਸਾ ਚ ਸਮਥਪ੍ਪਤ੍ਤਾ ਹੋਤੀਤਿ ਏਵਮੇਤ੍ਥ ਅਨਿਟ੍ਠਪ੍ਪਸਙ੍ਗੋ ਵੇਦਿਤਬ੍ਬੋ. ਏਵਂ ਉਪਰਿਪਿ ‘‘ਤੁਣ੍ਹੀ ਹੋਤੀ’’ਤਿ ਇਮਿਨਾ ਵੋਹਾਰਵਚਨਸ੍ਸ ਨਿਰੋਧਂ ਦਸ੍ਸੇਤਿ. ਤੇਨਾਹ ‘‘ਤਂ ਅਧਿਕਰਣਂ ਸਮਥਪ੍ਪਤ੍ਤਂ ਭਵਿਸ੍ਸਤੀ’’ਤਿ. ‘‘ਤਸ੍ਮਾ ਪਣ੍ਣਤ੍ਤਿ ਅਧਿਕਰਣ’’ਨ੍ਤਿ ਅਟ੍ਠਕਥਾਸੁ ਕਤਸਨ੍ਨਿਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸਾਪਿ ਏਕਚ੍ਚੇਹਿ ਪਟਿਕ੍ਖਿਤ੍ਤਭਾਵਂ ਦਸ੍ਸੇਤ੍ਵਾ ਪੁਨ ਤਮ੍ਪਿ ਪਟਿਸੇਧੇਤ੍ਵਾ ਅਟ੍ਠਕਥਾਸੁ ਵੁਤ੍ਤਪਣ੍ਣਤ੍ਤਿਯਾ ਏਵ ਅਧਿਕਰਣਤਂ ਸਮਤ੍ਥੇਤੁਂ ‘‘ਤਂ ਪਨੇਤ’’ਨ੍ਤਿਆਦਿਮਾਹ. ਤਤ੍ਥ ਤਂ ਪਨੇਤਨ੍ਤਿ ਪਣ੍ਣਤ੍ਤਿ ਅਧਿਕਰਣਨ੍ਤਿ ਏਤਂ ਗਹਣਂ ਵਿਰੁਜ੍ਝਤੀਤਿ ਸਮ੍ਬਨ੍ਧੋ. ਪਾਰਾਜਿਕਾਦਿਆਪਤ੍ਤਿ ਏਕਨ੍ਤਅਕੁਸਲਸਭਾਵਾ ਵਾ ਅਬ੍ਯਾਕਤਸਭਾਵਾ ਵਾ ਹੋਤੀਤਿ ਸਞ੍ਞਾਯ ‘‘ਮੇਥੁਨਧਮ੍ਮਪਾਰਾਜਿਕਾਪਤ੍ਤੀ’’ਤਿਆਦਿਕਂ ਸੁਤ੍ਤਂ ਪਣ੍ਣਤ੍ਤਿਅਧਿਕਰਣਵਾਦੇਨ ਵਿਰੁਜ੍ਝਤੀਤਿ ਦਸ੍ਸੇਤੁਂ ਉਦ੍ਧਟਂ. ਤੇਨਾਹ ‘‘ਨ ਹਿ ਤੇ…ਪੇ… ਅਚ੍ਚਨ੍ਤਅਕੁਸਲਤ੍ਤਾ’’ਤਿਆਦਿ. ਤੇਤਿ ਅਟ੍ਠਕਥਾਚਰਿਯਾ.

ਅਮੂਲਕਞ੍ਚੇਵ ਤਂ ਅਧਿਕਰਣਨ੍ਤਿ ਏਤ੍ਥ ਅਮੂਲਕਪਾਰਾਜਿਕਮੇਵ ਅਧਿਕਰਣ-ਸਦ੍ਦੇਨ ਅਧਿਪ੍ਪੇਤਨ੍ਤਿ ਦਸ੍ਸੇਤੁਂ ‘‘ਯਞ੍ਚੇਤ’’ਨ੍ਤਿਆਦਿ ਵੁਤ੍ਤਂ. ਯਸ੍ਮਾ ਪਨਾਤਿਆਦਿ ਪਨ ਇਧਾਧਿਪ੍ਪੇਤਾਯ ਅਮੂਲਕਪਾਰਾਜਿਕਾਪਤ੍ਤਿਯਾ ਏਵ ਪਣ੍ਣਤ੍ਤਿਭਾਵੋ ਯੁਜ੍ਜਤੀਤਿ ਦਸ੍ਸੇਤੁਂ ਆਰਦ੍ਧਂ. ਤਤ੍ਥ ਯਾਯ ਪਣ੍ਣਤ੍ਤਿਯਾਤਿ ਸਭਾਵਤੋ ਪਰਿਸੁਦ੍ਧੇਪਿ ਪੁਗ੍ਗਲੇ ‘‘ਪਾਰਾਜਿਕੋ’’ਤਿਆਦਿਨਾ ਚੋਦਕੇਨ ਪਵਤ੍ਤਿਤਂ ਨਾਮਪਣ੍ਣਤ੍ਤਿਂ ਸਨ੍ਧਾਯ ਵਦਤਿ. ਪਞ੍ਞਤ੍ਤੋਤਿ ਕਥਿਤੋ. ਅਧਿਕਰਣੇ ਪਵਤ੍ਤਤ੍ਤਾਤਿ ਅਵਿਜ੍ਜਮਾਨੇਪਿ ਮਨਸਾ ਆਰੋਪਿਤਮਤ੍ਤੇ ਆਪਤ੍ਤਾਧਿਕਰਣੇ ਵਾਚਕਭਾਵੇਨ ਪਵਤ੍ਤਤ੍ਤਾ.

ਏਵਂ ਨਾਮਪਣ੍ਣਤ੍ਤਿਵਸੇਨ ਇਮਸ੍ਮਿਂ ਸਿਕ੍ਖਾਪਦੇ ਆਪਤ੍ਤਾਧਿਕਰਣਸ੍ਸ ਪਞ੍ਞਤ੍ਤਿਭਾਵਂ ਦਸ੍ਸੇਤ੍ਵਾ ਇਦਾਨਿ ਅਤ੍ਥਪਣ੍ਣਤ੍ਤਿਵਸੇਨਾਪਿ ਦਸ੍ਸੇਤੁਂ ‘‘ਯਸ੍ਮਾ ਵਾਯ’’ਨ੍ਤਿਆਦਿ ਵੁਤ੍ਤਂ. ਪਞ੍ਞਤ੍ਤਿਮਤ੍ਤਮੇਵਾਤਿ ਅਵਿਜ੍ਜਮਾਨਸ੍ਸ ਵਿਜ੍ਜਮਾਨਾਕਾਰੇਨ ਮਨਸਾ ਆਰੋਪਿਤਅਤ੍ਥਪਣ੍ਣਤ੍ਤਿਮਤ੍ਤਮੇਵਾਤਿ ਅਤ੍ਥੋ. ਤਞ੍ਚ ਖੋ ਇਧੇਵਾਤਿ ਤਞ੍ਚ ਯਥਾਵੁਤ੍ਤਪਰਿਯਾਯੇਨ ਪਣ੍ਣਤ੍ਤਿਯਾ ਅਧਿਕਰਣਤ੍ਤਂ ਇਧੇਵ ਇਮਸ੍ਮਿਂ ਏਵ ਸਿਕ੍ਖਾਪਦੇ. ਏਕੇਤਿ ਕੇਚਿ. ਤਂ ਨ ਯੁਤ੍ਤਨ੍ਤਿ ਯਂ ਏਕਚ੍ਚੇਹਿ ਅਟ੍ਠਕਥਾਸੁ ਵੁਤ੍ਤਂ, ਅਧਿਕਰਣਸ੍ਸ ਪਣ੍ਣਤ੍ਤਿਭਾਵਂ ਨਿਸੇਧੇਤ੍ਵਾ ਕੁਸਲਾਦਿਪਰਮਤ੍ਥਭਾਵਂ ਸਾਧੇਤੁਂ ‘‘ਤਂ ਪਨੇਤਂ ਮੇਥੁਨਧਮ੍ਮਪਾਰਾਜਿਕਾਪਤ੍ਤੀ’’ਤਿਆਦਿਨਾ ਪਪਞ੍ਚਤੋ ਦਸ੍ਸਿਤੋ, ਤਂ ਨ ਯੁਤ੍ਤਨ੍ਤਿ ਅਤ੍ਥੋ. ਤਤ੍ਥ ਕਾਰਣਮਾਹ ‘‘ਆਦਿਕਮ੍ਮਿਕਸ੍ਸਾ’’ਤਿਆਦਿਨਾ, ਤੇਨ ਚ ਤਸ੍ਮਿਂ ਵਾਦੇ ਯਦਿ ਆਪਤ੍ਤਿ ਨਾਮ ਅਕੁਸਲਾ ਵਾ ਅਬ੍ਯਾਕਤਾ ਵਾ ਭਵੇਯ੍ਯ, ਕਥਂ ਆਦਿਕਮ੍ਮਿਕਸ੍ਸ ਅਨਾਪਤ੍ਤਿ ਭਵੇਯ੍ਯ? ਤਸ੍ਸਾਪਿ ਅਕੁਸਲਾਦੀਨਂ ਉਪ੍ਪਨ੍ਨਤ੍ਤਾ ਭਗਵਤੋ ਸਿਕ੍ਖਾਪਦਪਞ੍ਞਤ੍ਤਿਤੋ ਪਟ੍ਠਾਯ ਯਾਵ ਆਪਤ੍ਤੀਤਿਪਿ ਨ ਸਕ੍ਕਾ ਵਤ੍ਤੁਂ, ਮੇਥੁਨਾਦੀਸੁ ਅਕੁਸਲਾਦੀਨਂ ਸਿਕ੍ਖਾਪਦਪਞ੍ਞਤ੍ਤਿਤੋ ਪੁਬ੍ਬੇਪਿ ਸਮੁਪ੍ਪਤ੍ਤਿਤੋ. ਤਤੋ ਏਵ ਅਨੁਪਸਮ੍ਪਨ੍ਨਾਨਮ੍ਪਿ ਆਪਤ੍ਤਿਪ੍ਪਸਙ੍ਗੋ, ਗਿਲਾਨਾਦੀਨਂ ਉਪ੍ਪਨ੍ਨਤ੍ਤਾ ਅਨੁਪਞ੍ਞਤ੍ਤਿਯਾਪਿ ਅਨਾਪਤ੍ਤਿਅਭਾਵਪ੍ਪਸਙ੍ਗੋ ਚ ਸਿਯਾ. ਅਥ ਮਤਂ ‘‘ਨ ਕੇਵਲਂ ਅਕੁਸਲਾਦਿ ਏਵ, ਅਥ ਖੋ ਭਗਵਤਾ ਪਟਿਕ੍ਖਿਤ੍ਤਭਾਵਂ ਜਾਨਨ੍ਤਸ੍ਸ ਸਮੁਪ੍ਪਜ੍ਜਮਾਨਾ ਏਵ ਅਕੁਸਲਾਦਯੋ ਆਪਤ੍ਤੀ’’ਤਿ, ਤਮ੍ਪਿ ਅਸਾਰਂ, ਸਿਕ੍ਖਾਪਦਪਞ੍ਞਤ੍ਤਿਂ ਅਜਾਨਿਤ੍ਵਾ ਵੀਤਿਕ੍ਕਮਨ੍ਤਸ੍ਸ ਮੇਥੁਨਾਦੀਸੁ ਅਨਾਪਤ੍ਤਿਪ੍ਪਸਙ੍ਗਤੋ, ਅਕੁਸਲਾਦਿਸਭਾਵਾਯ ਚ ਆਪਤ੍ਤਿਯਾ ਏਕਪਯੋਗਾਦੀਸੁ ਏਕਤ੍ਤਾਦਿਪਿ ਨ ਸਿਯਾ. ਨ ਹਿ ਸਕਲਮ੍ਪਿ ਦਿਵਸਂ ਇਤ੍ਥਿਂ ਕਾਯਤੋ ਅਮੋਚੇਤ੍ਵਾ ਫੁਸਨ੍ਤਸ੍ਸ ਏਕਮੇਵਾਕੁਸਲਂ ਉਪ੍ਪਜ੍ਜਤਿ, ਬਹੂ ਵਾ ਇਤ੍ਥਿਯੋ ਫੁਸਿਤ੍ਵਾ ਅਪਗਚ੍ਛਨ੍ਤਸ੍ਸ ਬਹੂਨਿ, ਯੇਨਾਪਤ੍ਤਿਯਾ ਏਕਤ੍ਤਂ, ਬਹੁਤ੍ਤਂ ਵਾ ਸਿਯਾਤਿ ਏਵਮਾਦਿਕਂ ਅਯੁਤ੍ਤਿਂ ਸਙ੍ਗਹੇਤ੍ਵਾ ਦਸ੍ਸਿਤਨ੍ਤਿ ਵੇਦਿਤਬ੍ਬਂ.

ਤਤ੍ਥ ਵਤ੍ਥੁਞ੍ਚਾਤਿ ਵੀਤਿਕ੍ਕਮੋ. ਤਞ੍ਹਿ ਆਪਤ੍ਤਿਸਮ੍ਮੁਤਿਪਞ੍ਞਾਪਨਸ੍ਸ ਓਕਾਸਟ੍ਠੇਨ ‘‘ਵਤ੍ਥੂ’’ਤਿ ਵੁਚ੍ਚਤਿ. ਗੋਤ੍ਤਨ੍ਤਿ ਅਦਿਨ੍ਨਾਦਾਨਾਦਿਤੋ ਬੁਦ੍ਧਿਸਦ੍ਦਨਿਵਤ੍ਤਨਟ੍ਠੇਨ ਪਰਿਕਪ੍ਪਿਤਸਾਮਞ੍ਞਾਕਾਰੋ ਗੋਤ੍ਤਂ. ਨਾਮਨ੍ਤਿ ਅਵਿਜ੍ਜਮਾਨਨਾਮਪਞ੍ਞਤ੍ਤਿ. ਤਸ੍ਸ ਪਨ ਪਾਰਾਜਿਕਨ੍ਤਿ ਨਾਮਸ੍ਸ ਅਤ੍ਥਭੂਤਾ ਆਪਤ੍ਤਿ ਅਤ੍ਥਪਞ੍ਞਤ੍ਤਿ ਏਵਾਤਿ ਦਟ੍ਠਬ੍ਬਂ. ਯਂ ਪਨ ‘‘ਵਿਵਾਦਾਧਿਕਰਣਂ ਸਿਯਾ ਕੁਸਲ’’ਨ੍ਤਿਆਦਿ (ਚੂਲ਼ਵ. ੨੨੦; ਪਰਿ. ੩੦੩), ‘‘ਆਪਤ੍ਤਾਧਿਕਰਣਂ ਸਿਯਾ ਅਕੁਸਲ’’ਨ੍ਤਿਆਦਿ (ਚੂਲ਼ਵ. ੨੨੨) ਚ ਸੁਤ੍ਤਂ ਤੇਹਿ ਸਮੁਦ੍ਧਟਂ, ਤਮ੍ਪਿ ਨ ਵਿਵਾਦਾਦੀਨਂ ਕੁਸਲਾਦਿਭਾਵਸ੍ਸ ਪਰਿਯਾਯਦੇਸਿਤਤ੍ਤਾਤਿ ਯਂ ਏਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਪਠਮਪਾਰਾਜਿਕਸਮੁਟ੍ਠਾਨਾਦਿਵਣ੍ਣਨਾਯ ਸਾਰਤ੍ਥਦੀਪਨਿਯਂ ਵਿਰਦ੍ਧਟ੍ਠਾਨਸੋਧਨਤ੍ਥਂ ਵਿਤ੍ਥਾਰਤੋ ਵੁਤ੍ਤਨ੍ਤਿ ਤਤ੍ਥੇਵ ਤਂ ਗਹੇਤਬ੍ਬਂ, ਸਾਰਤ੍ਥਦੀਪਨੀਕਾਰਕਸ੍ਸ ਅਕੁਸਲਾਦਿਰੂਪਾਵ ਆਪਤ੍ਤੀਤਿ ਲਦ੍ਧਿ, ਤੇਨੇਵ ਸੋ ਇਧਾਪਿ ‘‘ਤਸ੍ਮਾ ਪਣ੍ਣਤ੍ਤਿਅਧਿਕਰਣਨ੍ਤਿ ਅਟ੍ਠਕਥਾਸੁ ਕਤਸਨ੍ਨਿਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਤਮ੍ਪਿ ਨ ਯੁਤ੍ਤਨ੍ਤਿ ਦਸ੍ਸੇਤੁਂ ‘ਤਂ ਪਨੇਤ’ਨ੍ਤਿਆਦਿਮਾਹਾ’’ਤਿ (ਸਾਰਤ੍ਥ. ਟੀ. ੨.੩੮੫-੩੮੬) ਏਵਂ ਅਤ੍ਤਨੋ ਲਦ੍ਧਿਂ ਅਟ੍ਠਕਥਾਚਰਿਯਸ੍ਸਪਿ ਲਦ੍ਧਿਂ ਕਤ੍ਵਾ ਗਨ੍ਥਵਿਰੋਧਮ੍ਪਿ ਅਨੋਲੋਕੇਤ੍ਵਾ ਦਸ੍ਸੇਸਿ. ਨ ਹੇਤ੍ਥ ਬੁਦ੍ਧਘੋਸਾਚਰਿਯੋ ਅਟ੍ਠਕਥਾਵਾਦਂ ਅਯੁਤ੍ਤਨ੍ਤਿ ਦਸ੍ਸੇਤੁਂ ‘‘ਤਂ ਪਨੇਤ’’ਨ੍ਤਿਆਦਿਮਾਰਭਿ ‘‘ਪਣ੍ਣਤ੍ਤਿਮਤ੍ਤਮੇਵ ਆਪਤ੍ਤਾਧਿਕਰਣਨ੍ਤਿ ਵੇਦਿਤਬ੍ਬ’’ਨ੍ਤਿ ਸਯਮੇਵ ਉਪਰਿ ਕਥਨਤੋ, ਅਥ ਖੋ ਦੁਲ੍ਲਦ੍ਧਿਕਾਨਂ ਏਕਚ੍ਚਾਨਂ ਤਤ੍ਥ ਵਿਪ੍ਪਟਿਪਤ੍ਤਿਂ ਦਸ੍ਸੇਤ੍ਵਾ ਪੁਨ ਤਂ ਪਟਿਸੇਧੇਤੁਕਾਮੋ ਆਰਭਿ, ਤੇਨੇਵ ਅਨ੍ਤੇ ‘‘ਏਕੇ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਵਿਵਾਦਾਦੀਨਂ ਕੁਸਲਾਦਿਕਤ੍ਤੇ ਤਂਸਮਥਾਨਮ੍ਪਿ ਤਬ੍ਭਾਵੋ ਆਪਜ੍ਜਤਿ ਪਰਮਤ੍ਥੇਸੁ ਪਣ੍ਣਤ੍ਤਿਯਾ ਸਮਥਾਯੋਗਾਤਿ ਆਹ ‘‘ਕੁਸਲਾਦਿਸਮਥੇਹੀ’’ਤਿ. ਪਞ੍ਞਤ੍ਤਿਸਭਾਵਾਨਮੇਵ ਚਤੁਨ੍ਨਂ ਅਧਿਕਰਣਾਨਂ ਸਮਥੇਹਿ ਅਧਿਕਰਣੀਯਤਾ, ਨ ਪਨ ਕੁਸਲਾਦਿਪਰਮਤ੍ਥਰੂਪਾਨਂ ਤੇਸਂ ਤੇਸਂ ਖਣਿਕਤਾਯ ਸਯਮੇਵ ਸਮਥਪ੍ਪਤ੍ਤਿਤੋਤਿ ਹੇਟ੍ਠਾ ਸਮਤ੍ਥਿਤਮਤ੍ਥਂ ਨਿਗਮਨਵਸੇਨ ਦਸ੍ਸੇਨ੍ਤੇਨ ‘‘ਇਤਿ ਇਮਿਨਾ ਅਧਿਕਰਣਟ੍ਠੇਨਾ’’ਤਿ ਵੁਤ੍ਤਂ, ਤਸ੍ਸ ਯਥਾਵੁਤ੍ਤਨਯੇਨ ਸਮਥੇਹਿ ਅਧਿਕਰਣੀਯਤਾਯਾਤਿ ਅਤ੍ਥੋ. ‘‘ਇਧੇਕਚ੍ਚੋ’’ਤਿ ਇਮਿਨਾ ਇਧਾਧਿਪ੍ਪੇਤਂ ਵਿਵਾਦਂ ਨਿਵਤ੍ਤੇਤਿ.

ਅਨੁਵਾਦੋਤਿ ਵਿਪਤ੍ਤੀਹਿ ਉਪਵਦਨਾ ਚੇਵ ਚੋਦਨਾ ਚ. ਤਤ੍ਥ ਉਪਵਦਨਾ ਨਾਮ ਗਰਹਾ, ਅਕ੍ਕੋਸੋ ਚ. ਪਞ੍ਚਪੀਤਿ ਮਾਤਿਕਾਪਰਿਯਾਪਨ੍ਨਾਪਤ੍ਤਿਯੋ ਸਨ੍ਧਾਯ ਵੁਤ੍ਤਂ. ਕਿਚ੍ਚਯਤਾਤਿ ਕਤ੍ਤਬ੍ਬਤਾ. ਸਪਦਾਨੁਕ੍ਕਮਨਿਦ੍ਦੇਸਸ੍ਸਾਤਿ ਏਤ੍ਥ ਪਦਾਨੁਕ੍ਕਮਨਿਦ੍ਦੇਸੋਤਿ ਪਦਭਾਜਨਂ ਵੁਚ੍ਚਤਿ, ਤੇਨ ਸਹਿਤਸ੍ਸ ਸਿਕ੍ਖਾਪਦਸ੍ਸਾਤਿ ਅਤ੍ਥੋ.

੩੮੭. ਅਸ੍ਸਾਤਿ ਕਤ੍ਤੁਅਤ੍ਥੇ ਸਾਮਿਵਚਨਨ੍ਤਿ ਆਹ ‘‘ਏਤੇਨ ਚੋਦਕੇਨਾ’’ਤਿਆਦਿ. ਦਿਟ੍ਠਮੂਲਕੇ ਪਨਾਤਿ ‘‘ਦਿਟ੍ਠਸ੍ਸ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ’’ਤਿਆਦਿ (ਪਾਰਾ. ੩੮੭) ਪਾਲ਼ਿਵਾਰਂ ਸਨ੍ਧਾਯ ਵੁਤ੍ਤਂ. ਤਤ੍ਥ ਇਤ੍ਥਿਯਾ ਸਦ੍ਧਿਂ ਰਹੋਨਿਸਜ੍ਜਾਦਿਦਸ੍ਸਨਮਤ੍ਤਵਸੇਨ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ ਪੁਗ੍ਗਲੋ ਤੇਨ ਦਿਟ੍ਠੋ, ਨ ਪਨ ਮਗ੍ਗੇਨ ਮਗ੍ਗਪ੍ਪਟਿਪਾਦਨਾਦਿਦਸ੍ਸਨਵਸੇਨ. ਯਦਿ ਹਿ ਤੇਨ ਸੋ ਤਥਾ ਦਿਟ੍ਠੋ ਭਵੇਯ੍ਯ, ਅਸੁਦ੍ਧਸਞ੍ਞੀ ਏਵਾਯਂ ਤਸ੍ਮਿਂ ਪੁਗ੍ਗਲੇ ਸਿਯਾ, ਅਸੁਦ੍ਧਸਞ੍ਞਾਯ ਚ ਸੁਦ੍ਧਂ ਵਾ ਅਸੁਦ੍ਧਂ ਵਾ ਚੋਦੇਨ੍ਤਸ੍ਸ ਸਙ੍ਘਾਦਿਸੇਸੋ ਨ ਸਿਯਾ ‘‘ਅਨਾਪਤ੍ਤਿ ਸੁਦ੍ਧੇ ਅਸੁਦ੍ਧਦਿਟ੍ਠਿਸ੍ਸ, ਅਸੁਦ੍ਧੇ ਅਸੁਦ੍ਧਦਿਟ੍ਠਿਸ੍ਸਾ’’ਤਿਆਦਿਵਚਨਤੋ (ਪਾਰਾ. ੩੯੦). ਤਸ੍ਮਾ ਇਤ੍ਥਿਯਾ ਸਦ੍ਧਿਂ ਰਹੋਨਿਸਜ੍ਜਾਦਿਮਤ੍ਤਮੇਵ ਦਿਸ੍ਵਾਪਿ ‘‘ਸਦ੍ਧੋ ਕੁਲਪੁਤ੍ਤੋ, ਨਾਯਂ ਪਾਰਾਜਿਕਂ ਆਪਜ੍ਜਤੀ’’ਤਿ ਤਸ੍ਮਿਂ ਸੁਦ੍ਧਸਞ੍ਞਿਸ੍ਸ ਵਾ ਵੇਮਤਿਕਸ੍ਸ ਵਾ ‘‘ਸੁਤੋ ਮਯਾ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ’’ਤਿਆਦਿਨਾ ਨਿਯਮੇਤ੍ਵਾ ਚੋਦੇਨ੍ਤਸ੍ਸੇਵ ਸਙ੍ਘਾਦਿਸੇਸੋ, ਨ ਅਸੁਦ੍ਧਸਞ੍ਞਿਸ੍ਸ, ਤਸ੍ਸ ਪਨ ਦਿਟ੍ਠਂ ਸੁਤਨ੍ਤਿ ਮੁਸਾਵਾਦਾਦਿਪਚ੍ਚਯਾ ਲਹੁਕਾਪਤ੍ਤਿ ਏਵਾਤਿ ਵੇਦਿਤਬ੍ਬਂ. ਯਦਿ ਪਨ ਸੋ ਤਸ੍ਮਿਂ ਸੁਦ੍ਧਦਿਟ੍ਠਿਚਾਵਨਾਧਿਪ੍ਪਾਯੋਪਿ ਦਿਟ੍ਠਂ ਰਹੋਨਿਸਜ੍ਜਾਦਿਮਤ੍ਤਮੇਵ ਵਦਤਿ, ਅਦਿਟ੍ਠਂ ਪਨ ਮਗ੍ਗੇਨਮਗ੍ਗਪ੍ਪਟਿਪਾਦਨਾਦਿਪਾਰਾਜਿਕਵਤ੍ਥੁਂ ਵਾ ‘‘ਅਸ੍ਸਮਣੋਸੀ’’ਤਿਆਦਿਕਂ ਵਾ ਨ ਵਦਤਿ, ਤਸ੍ਸ ਅਨਾਪਤ੍ਤਿ. ਅਧਿਕਂ ਵਦਨ੍ਤਸ੍ਸ ਪਨ ਆਪਤ੍ਤਿਯੇਵ ‘‘ਅਦਿਟ੍ਠਂ ਦਿਟ੍ਠ’’ਨ੍ਤਿ (ਪਾਰਾ. ੩੮੬-੩੮੭) ਵੁਤ੍ਤਤ੍ਤਾ. ਯੋ ਪਨ ਦਿਟ੍ਠੇਨ ਰਹੋਨਿਸਜ੍ਜਾਦਿਨਾ ਪਠਮਪਾਰਾਜਿਕੇਨ ਅਸੁਦ੍ਧਸਞ੍ਞੀ ਹੁਤ੍ਵਾ ਚਾਵਨਾਧਿਪ੍ਪਾਯੋ ਅਦਿਨ੍ਨਾਦਾਨਂ ਅਜ੍ਝਾਪਜ੍ਜਨ੍ਤੋ ‘‘ਦਿਟ੍ਠੋ’’ਤਿ ਵਾ ‘‘ਸੁਤੋ’’ਤਿ ਵਾ ਆਦਿਂ ਵਦਤਿ, ਤਸ੍ਸਾਪਿ ਨ ਸਙ੍ਘਾਦਿਸੇਸੋ ਅਸੁਦ੍ਧੇ ਅਸੁਦ੍ਧਦਿਟ੍ਠਿਤਾਯਾਤਿ ਕੇਚਿ ਵਦਨ੍ਤਿ. ਅਞ੍ਞੇ ਪਨ ‘‘ਯੇਨ ਪਾਰਾਜਿਕੇਨ ਚੋਦੇਤਿ, ਤੇਨ ਸੁਦ੍ਧਸਞ੍ਞਾਭਾਵਾ ਆਪਤ੍ਤਿਯੇਵਾ’’ਤਿ ਵਦਨ੍ਤਿ, ਇਦਂ ਯੁਤ੍ਤਂ. ਤਥਾ ਹਿ ਵੁਤ੍ਤਂ ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ) ‘‘ਯੇਨ ਪਾਰਾਜਿਕੇਨ ਚੋਦੇਤਿ, ਤਂ ‘ਅਯਂ ਅਨਜ੍ਝਾਪਨ੍ਨੋ’ਤਿ ਞਤ੍ਵਾ ਚਾਵਨਾਧਿਪ੍ਪਾਯੇਨ…ਪੇ… ਸਙ੍ਘਾਦਿਸੇਸੋ’’ਤਿ. ਇਮਿਨਾ ਨਯੇਨ ਸੁਤਾਦਿਮੂਲਕੇਸੁਪਿ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਞ੍ਞਤ੍ਰ ਆਗਤੇਸੂਤਿ ਓਮਸਵਾਦਾਦੀਸੁ ਆਗਤੇਸੁ. ਅਵਸ੍ਸੁਤੋਤਿ ਤੀਹਿਪਿ ਦ੍ਵਾਰੇਹਿ ਪਾਰਾਜਿਕਵਤ੍ਥੁਭੂਤਦੁਚ੍ਚਰਿਤਾਨੁਵਸ੍ਸਨੇਨ ਤਿਨ੍ਤੋ. ਕਸਮ੍ਬੁਜਾਤੋਤਿ ਕਚਵਰਭੂਤੋ, ਨਿਸ੍ਸਾਰੋਤਿ ਅਤ੍ਥੋ.

ਕੋਣ੍ਠੋਤਿ ਚੋਰੋ, ਦੁਸ੍ਸੀਲੋਤਿ ਅਤ੍ਥੋ. ਜੇਟ੍ਠਬ੍ਬਤਿਕੋਤਿ ਕਾਲ਼ਕਣ੍ਣਿਦੇਵੀਵਤੇ ਨਿਯੁਤ੍ਤੋ ਤਿਤ੍ਥਿਯੋਤਿ ਵਦਤਿ, ਸਾ ਕਿਰ ਕਾਲ਼ਕਣ੍ਣਿਸਿਰਿਦੇਵਿਯਾ ਜੇਟ੍ਠਾਤਿ ਵੁਤ੍ਤਾ. ਯਦਗ੍ਗੇਨਾਤਿ ਯੇਨ ਕਾਰਣੇਨ, ਯਤ੍ਤਕੇਨਾਤਿ ਅਤ੍ਥੋ. ਤਦਗ੍ਗੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਨੋ ਕਪ੍ਪੇਤੀਤਿਆਦਿ ਵੇਮਤਿਕਭਾਵਦੀਪਨਤ੍ਥਮੇਵ ਵੁਤ੍ਤਨ੍ਤਿ ਮਹਾਪਦੁਮਤ੍ਥੇਰਸ੍ਸ ਅਧਿਪ੍ਪਾਯੋ.

੩੮੯. ਏਤ੍ਥਾਤਿ ਚੋਦਨਾਯਂ. ਤਜ੍ਜਨੀਯਾਦਿਕਮ੍ਮਂ ਕਰਿਸ੍ਸਾਮੀਤਿਆਪਤ੍ਤਿਯਾ ਚੋਦੇਨ੍ਤਸ੍ਸ ਅਧਿਪ੍ਪਾਯੋ ਕਮ੍ਮਾਧਿਪ੍ਪਾਯੋ ਨਾਮ. ਪਰਿਵਾਸਦਾਨਾਦਿਕ੍ਕਮੇਨ ਆਪਤ੍ਤਿਤੋ ਵੁਟ੍ਠਾਪੇਤੁਂ ਆਪਤ੍ਤਿਯਾ ਚੋਦੇਨ੍ਤਸ੍ਸ ਅਧਿਪ੍ਪਾਯੋ ਵੁਟ੍ਠਾਨਾਧਿਪ੍ਪਾਯੋ. ਉਪੋਸਥਂ, ਪਵਾਰਣਂ ਵਾ ਸਙ੍ਘੇ ਕਾਤੁਂ ਅਦਾਨਤ੍ਥਾਯ ਆਪਤ੍ਤਿਯਾ ਚੋਦਯਤੋ ਅਧਿਪ੍ਪਾਯੋ ਉਪੋਸਥਪਵਾਰਣਟ੍ਠਪਨਾਧਿਪ੍ਪਾਯੋ. ਅਸਮ੍ਮੁਖਾ…ਪੇ… ਦੁਕ੍ਕਟਨ੍ਤਿ ਅਨੁਦ੍ਧਂਸੇਨ੍ਤਸ੍ਸਪਿ ਅਕ੍ਕੋਸਨ੍ਤਸ੍ਸਪਿ ਦੁਕ੍ਕਟਂ.

ਸਬ੍ਬਤ੍ਥੇਵਾਤਿ ਸਬ੍ਬਾਸੁ ਅਟ੍ਠਕਥਾਸੁ. ਉਪੋਸਥਪਵਾਰਣਾਨਂ ਞਤ੍ਤਿਕਮ੍ਮਭਾਵਤੋ ਞਤ੍ਤਿਯਾ ਵਤ੍ਤਮਾਨਾਯ ਏਵ ਉਪੋਸਥਪਵਾਰਣਟ੍ਠਪਨਂ ਹੋਤਿ, ਨ ਨਿਟ੍ਠਿਤਾਯ, ਸਾ ਚ ਯ੍ਯ-ਕਾਰੇ ਪਤ੍ਤੇ ਨਿਟ੍ਠਿਤਾ ਨਾਮ ਹੋਤੀਤਿ ਆਹ ‘‘ਯ੍ਯ-ਕਾਰੇ ਪਤ੍ਤੇ ਨ ਲਬ੍ਭਤੀ’’ਤਿ.

ਅਨੁਪਾਸਕੋਤਿ ਉਪਾਸਕੋਪਿ ਸੋ ਭਿਕ੍ਖੁ ਨ ਹੋਤਿ ਸਰਣਗਮਨਸ੍ਸਾਪਿ ਪਟਿਪ੍ਪਸ੍ਸਦ੍ਧਤ੍ਤਾਤਿ ਵਦਨ੍ਤਿ. ‘‘ਅਨੋਦਿਸ੍ਸ ਧਮ੍ਮਂ ਕਥੇਨ੍ਤਸ੍ਸਾ’’ਤਿ ਇਮਿਨਾ ਓਦਿਸ੍ਸ ਕਥੇਨ੍ਤੇਨ ਓਕਾਸਂ ਕਾਰੇਤਬ੍ਬਨ੍ਤਿ ਦਸ੍ਸੇਤਿ. ਆਪਤ੍ਤਿਂ ਦੇਸੇਤ੍ਵਾਤਿ ਓਕਾਸਾਕਾਰਾਪਨਾਪਤ੍ਤਿਂ ਦੇਸੇਤ੍ਵਾ. ਯਂ ਚੋਦੇਤਿ, ਤਸ੍ਸ ਉਪਸਮ੍ਪਨ੍ਨੋਤਿ ਸਙ੍ਖ੍ਯੁਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ ਵੇਮਤਿਕਤਾ ਵਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿਵਸੇਨ ਅਮੂਲਕਤਾ, ਚਾਵਨਾਧਿਪ੍ਪਾਯੇਨ ‘‘ਤ੍ਵਂ ਪਾਰਾਜਿਕੋ’’ਤਿਆਦਿਨਾ ਨਿਯਮੇਤ੍ਵਾ ਸਮ੍ਮੁਖਾ ਚੋਦਨਾ ਚੋਦਾਪਨਾ, ਤਸ੍ਸ ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਪਠਮਦੁਟ੍ਠਦੋਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.