੫. ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ

੨੯੬. ਪਞ੍ਚਮੇ ਪਣ੍ਡਿਚ੍ਚੇਨਾਤਿ ਸਭਾਵਞਾਣੇਨ. ਗਤਿਮਨ੍ਤਾਤਿ ਸਭਾਵਞਾਣਗਤਿਯੁਤ੍ਤਾ. ਵੇਯ੍ਯਤ੍ਤਿਯੇਨਾਤਿ ਇਤ੍ਥਿਕਤ੍ਤਬ੍ਬੇਸੁ ਸਿਕ੍ਖਿਤਞਾਣੇਨ. ਮੇਧਾਯਾਤਿ ਅਸਿਕ੍ਖਿਤੇਸੁਪਿ ਤਂਇਤ੍ਥਿਕਤ੍ਤਬ੍ਬੇਸੁ ਠਾਨੁਪ੍ਪਤ੍ਤਿਯਾ ਪਞ੍ਞਾਯ. ਛੇਕਾਤਿ ਕਾਯੇਨ ਪਚਨਾਦਿਕੁਸਲਾ.

ਆਵਹਨਂ ਆਵਾਹੋ, ਦਾਰਿਕਾਯ ਗਹਣਂ. ਵਿਧਿਨਾ ਪਰਕੁਲੇ ਵਹਨਂ ਪੇਸਨਂ ਵਿਵਾਹੋ, ਦਾਰਿਕਾਯ ਦਾਨਂ.

੨੯੭. ਰਨ੍ਧਾਪਨਂ ਭਤ੍ਤਪਚਾਪਨਂ. ਬ੍ਯਞ੍ਜਨਾਦਿਸਮ੍ਪਾਦਨਂ ਪਚਾਪਨਂ. ਨ ਉਪਾਹਟਨ੍ਤਿ ਨ ਦਿਨ੍ਨਂ. ਕਯੋ ਨਾਮ ਗਹਣਂ. ਵਿਕ੍ਕਯੋ ਨਾਮ ਦਾਨਂ. ਤਦੁਭਯਂ ਸਙ੍ਗਹੇਤ੍ਵਾ ‘‘ਵੋਹਾਰੋ’’ਤਿ ਵੁਤ੍ਤਂ.

੩੦੦. ‘‘ਅਬ੍ਭੁਤਂ ਕਾਤੁਂ ਨ ਵਟ੍ਟਤੀ’’ਤਿ ਇਮਿਨਾ ਦੁਕ੍ਕਟਂ ਹੋਤੀਤਿ ਦੀਪੇਤਿ. ‘‘ਪਰਾਜਿਤੇਨ ਦਾਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਅਦੇਨ੍ਤੋ ਧੁਰਨਿਕ੍ਖੇਪੇਨ ਕਾਰੇਤਬ੍ਬੋ. ਅਚਿਰਕਾਲੇ ਅਧਿਕਾਰੋ ਏਤਸ੍ਸ ਅਤ੍ਥੀਤਿ ਅਚਿਰਕਾਲਾਧਿਕਾਰਿਕਂ, ਸਞ੍ਚਰਿਤ੍ਤਂ. ‘‘ਅਚਿਰਕਾਲਾਚਾਰਿਕ’’ਨ੍ਤਿ ਵਾ ਪਾਠੋ. ਅਚਿਰਕਾਲੇ ਆਚਾਰੋ ਅਜ੍ਝਾਚਾਰੋ ਏਤਸ੍ਸਾਤਿ ਯੋਜਨਾ.

੩੦੧. ਕਿਞ੍ਚਾਪਿ ਏਹਿਭਿਕ੍ਖੁਆਦਿਕਾਪਿ ਸਞ੍ਚਰਿਤ੍ਤਾਦਿਪਣ੍ਣਤ੍ਤਿਵਜ੍ਜਂ ਆਪਤ੍ਤਿਂ ਆਪਜ੍ਜਨ੍ਤਿ, ਤੇਸਂ ਪਨ ਅਸਬ੍ਬਕਾਲਿਕਤ੍ਤਾ, ਅਪ੍ਪਕਤ੍ਤਾ ਚ ਇਧਾਪਿ ਞਤ੍ਤਿਚਤੁਤ੍ਥੇਨੇਵ ਕਮ੍ਮੇਨ ਉਪਸਮ੍ਪਨ੍ਨਂ ਸਨ੍ਧਾਯ ‘‘ਯ੍ਵਾਯ’’ਨ੍ਤਿਆਦਿਪਦਭਾਜਨਮਾਹ. ਸਞ੍ਚਰਣਂ ਸਞ੍ਚਰੋ, ਸੋ ਏਤਸ੍ਸ ਅਤ੍ਥੀਤਿ ਸਞ੍ਚਰੀ, ਤਸ੍ਸ ਭਾਵੋ ਸਞ੍ਚਰਿਤ੍ਤਂ. ਤੇਨਾਹ ‘‘ਸਞ੍ਚਰਣਭਾਵ’’ਨ੍ਤਿ. ਸਞ੍ਚਰਤੀਤਿ ਸਞ੍ਚਰਣੋ, ਪੁਗ੍ਗਲੋ, ਤਸ੍ਸ ਭਾਵੋ ਸਞ੍ਚਰਣਭਾਵੋ, ਤਂ ਇਤ੍ਥਿਪੁਰਿਸਾਨਂ ਅਨ੍ਤਰੇ ਸਞ੍ਚਰਣਭਾਵਨ੍ਤਿ ਅਤ੍ਥੋ.

ਜਾਯਾਭਾਵੇਤਿ ਭਰਿਯਭਾਵਾਯ. ਜਾਰਭਾਵੇਤਿ ਸਾਮਿਭਾਵਾਯ, ਤਂਨਿਮਿਤ੍ਤਨ੍ਤਿ ਅਤ੍ਥੋ. ਨਿਮਿਤ੍ਤਤ੍ਥੇ ਹਿ ਏਤਂ ਭੁਮ੍ਮਵਚਨਂ. ਕਿਞ੍ਚਾਪਿ ‘‘ਜਾਰਤ੍ਤਨੇ’’ਤਿ ਪਦਸ੍ਸ ਪਦਭਾਜਨੇ ‘‘ਜਾਰੀ ਭਵਿਸ੍ਸਸੀ’’ਤਿ (ਪਾਰਾ. ੩੦੨) ਇਤ੍ਥਿਲਿਙ੍ਗਵਸੇਨ ਪਦਭਾਜਨਂ ਵੁਤ੍ਤਂ, ‘‘ਸਞ੍ਚਰਿਤ੍ਤਂ ਸਮਾਪਜ੍ਜੇਯ੍ਯਾ’’ਤਿ ਪਦਸ੍ਸ ਪਨ ਨਿਦ੍ਦੇਸੇ ‘‘ਇਤ੍ਥਿਯਾ ਵਾ ਪਹਿਤੋ ਪੁਰਿਸਸ੍ਸ ਸਨ੍ਤਿਕੇ ਗਚ੍ਛਤਿ, ਪੁਰਿਸੇਨ ਵਾ ਪਹਿਤੋ ਇਤ੍ਥਿਯਾ ਸਨ੍ਤਿਕੇ ਗਚ੍ਛਤੀ’’ਤਿ ਵੁਤ੍ਤਤ੍ਤਾ ਪੁਰਿਸਸ੍ਸਾਪਿ ਸਨ੍ਤਿਕੇ ਵਤ੍ਤਬ੍ਬਾਕਾਰਂ ਦਸ੍ਸੇਤੁਂ ‘‘ਜਾਰਤ੍ਤਨੇ’’ਤਿ ਨਿਦ੍ਦੇਸਸ੍ਸ ਇਤ੍ਥਿਪੁਰਿਸਸਾਧਾਰਣਤ੍ਤਾ ‘‘ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚੇਨ੍ਤੋ ਜਾਰਤ੍ਤਨੇ ਆਰੋਚੇਤੀ’’ਤਿ ਵੁਤ੍ਤਂ. ਪਾਲ਼ਿਯਂ ਪਨ ਪੁਰਿਸਸ੍ਸ ਮਤਿਂ ਇਤ੍ਥਿਯਾ ਆਰੋਚਨਵਸੇਨੇਵ ਪਦਦ੍ਵਯੇਪਿ ਯੋਜਨਾ ਕਤਾ, ਤਦਨੁਸਾਰੇਨ ਇਤ੍ਥਿਯਾ ਮਤਿਂ ਪੁਰਿਸਸ੍ਸ ਆਰੋਚਨਾਕਾਰੋਪਿ ਸਕ੍ਕਾ ਵਿਞ੍ਞਾਤੁਨ੍ਤਿ.

ਇਦਾਨਿ ਪਾਲ਼ਿਯਂ ਵੁਤ੍ਤਨਯੇਨਾਪਿ ਅਤ੍ਥਂ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ. ‘‘ਪਤਿ ਭਵਿਸ੍ਸਸੀ’’ਤਿ ਇਦਂ ਜਾਯਾਸਦ੍ਦਸ੍ਸ ਇਤ੍ਥਿਲਿਙ੍ਗਨਿਯਮਤੋ ਪੁਰਿਸਪਰਿਯਾਯੇਨ ਵੁਤ੍ਤਂ, ਨਿਬਦ੍ਧਸਾਮਿਕੋ ਭਵਿਸ੍ਸਸੀਤਿ ਅਤ੍ਥੋ. ਜਾਰੋ ਭਵਿਸ੍ਸਸੀਤਿ ਮਿਚ੍ਛਾਚਾਰਭਾਵੇਨ ਉਪਗਚ੍ਛਨਕੋ ਭਵਿਸ੍ਸਸੀਤਿ ਅਧਿਪ੍ਪਾਯੋ.

੩੦੩. ਸੇਰਿਵਿਹਾਰਨ੍ਤਿ ਸਚ੍ਛਨ੍ਦਚਾਰਂ. ਅਤ੍ਤਨੋ ਵਸਨ੍ਤਿ ਅਤ੍ਤਨੋ ਆਣਂ. ਗੋਤ੍ਤਵਨ੍ਤੇਸੁ ਗੋਤ੍ਤ-ਸਦ੍ਦੋ, ਧਮ੍ਮਚਾਰੀਸੁ ਚ ਧਮ੍ਮ-ਸਦ੍ਦੋ ਵਤ੍ਤਤੀਤਿ ਆਹ ‘‘ਸਗੋਤ੍ਤੇਹੀ’’ਤਿਆਦਿ. ਤਤ੍ਥ ਸਗੋਤ੍ਤੇਹੀਤਿ ਸਮਾਨਗੋਤ੍ਤੇਹਿ. ਸਹਧਮ੍ਮਿਕੇਹੀਤਿ ਏਕਸ੍ਸ ਸਤ੍ਥੁ ਸਾਸਨੇ ਸਹਚਰਿਤਬ੍ਬਧਮ੍ਮੇਹਿ, ਸਮਾਨਕੁਲਧਮ੍ਮੇਹਿ ਵਾ. ਤੇਨੇਵਾਹ ‘‘ਏਕਂ ਸਤ੍ਥਾਰ’’ਨ੍ਤਿਆਦਿ. ਏਕਗਣਪਰਿਯਾਪਨ੍ਨੇਹੀਤਿ ਮਾਲਾਕਾਰਾਦਿਏਕਗਣਪਰਿਯਾਪਨ੍ਨੇਹਿ.

ਸਸ੍ਸਾਮਿਕਾ ਸਾਰਕ੍ਖਾ. ਯਸ੍ਸਾ ਗਮਨੇ ਰਞ੍ਞਾ ਦਣ੍ਡੋ ਠਪਿਤੋ, ਸਾ ਸਪਰਿਦਣ੍ਡਾ. ਪਚ੍ਛਿਮਾਨਂ ਦ੍ਵਿਨ੍ਨਨ੍ਤਿ ਸਾਰਕ੍ਖਸਪਰਿਦਣ੍ਡਾਨਂ. ਮਿਚ੍ਛਾਚਾਰੋ ਹੋਤੀਤਿ ਤਾਸੁ ਗਤਪੁਰਿਸਾਨਂ ਵਿਯ ਤਾਸਮ੍ਪਿ ਮਿਚ੍ਛਾਚਾਰੋ ਹੋਤਿ ਸਸ੍ਸਾਮਿਕਭਾਵਤੋ. ਨ ਇਤਰਾਸਨ੍ਤਿ ਮਾਤੁਰਕ੍ਖਿਤਾਦੀਨਂ ਅਟ੍ਠਨ੍ਨਂ ਮਿਚ੍ਛਾਚਾਰੋ ਨਤ੍ਥਿ ਅਸ੍ਸਾਮਿਕਤ੍ਤਾ, ਤਾਸੁ ਗਤਾਨਂ ਪੁਰਿਸਾਨਮੇਵ ਮਿਚ੍ਛਾਚਾਰੋ ਹੋਤਿ ਮਾਤਾਦੀਹਿ ਰਕ੍ਖਿਤਤ੍ਤਾ. ਪੁਰਿਸਾ ਹਿ ਪਰੇਹਿ ਯੇਹਿ ਕੇਹਿਚਿ ਗੋਪਿਤਂ ਇਤ੍ਥਿਂ ਗਨ੍ਤੁਂ ਨ ਲਭਨ੍ਤਿ, ਇਤ੍ਥਿਯੋ ਪਨ ਕੇਨਚਿ ਪੁਰਿਸੇਨ ਭਰਿਯਾਭਾਵੇਨ ਗਹਿਤਾਵ ਪੁਰਿਸਨ੍ਤਰਂ ਗਨ੍ਤੁਂ ਨ ਲਭਨ੍ਤਿ, ਨ ਇਤਰਾ ਅਤ੍ਤਨੋ ਫਸ੍ਸਸ੍ਸ ਸਯਂ ਸਾਮਿਕਤ੍ਤਾ. ਨ ਹਿ ਮਾਤਾਦਯੋ ਸਯਂ ਤਾਸਂ ਫਸ੍ਸਾਨੁਭਵਨਤ੍ਥਂ ਤਾ ਰਕ੍ਖਨ੍ਤਿ, ਕੇਵਲਂ ਪੁਰਿਸਗਮਨਮੇਵ ਤਾਸਂ ਵਾਰੇਨ੍ਤਿ. ਤਸ੍ਮਾ ਕੇਨਚਿ ਅਪਰਿਗ੍ਗਹਿਤਫਸ੍ਸਤ੍ਤਾ, ਅਤ੍ਤਨੋ ਫਸ੍ਸਤ੍ਤਾ ਚ ਇਤ੍ਥੀਨਂ ਨ ਮਿਚ੍ਛਾਚਾਰੋ, ਪੁਰਿਸਾਨਂ ਪਨ ਪਰੇਹਿ ਵਾਰਿਤੇ ਅਤ੍ਤਨੋ ਅਸਨ੍ਤਕਟ੍ਠਾਨੇ ਪਵਿਟ੍ਠਤ੍ਤਾ ਮਿਚ੍ਛਾਚਾਰੋਤਿ ਵੇਦਿਤਬ੍ਬੋ.

ਭੋਗੇਨਾਤਿ ਭੋਗਹੇਤੁ. ਉਦਪਤ੍ਤਂ ਆਮਸਿਤ੍ਵਾ ਗਹਿਤਾ ਓਦਪਤ੍ਤਕਿਨੀ. ਧਜ-ਸਦ੍ਦੇਨ ਸੇਨਾ ਏਵ ਉਪਲਕ੍ਖਿਤਾਤਿ ਆਹ ‘‘ਉਸ੍ਸਿਤਦ੍ਧਜਾਯਾ’’ਤਿਆਦਿ.

੩੦੫. ਬਹਿਦ੍ਧਾ ਵਿਮਟ੍ਠਨ੍ਤਿ ਅਞ੍ਞਤ੍ਥ ਆਰੋਚਿਤਂ. ਤਂ ਕਿਰਿਯਂ ਸਮ੍ਪਾਦੇਸ੍ਸਤੀਤਿ ਤਸ੍ਸਾ ਆਰੋਚੇਤ੍ਵਾ ਤਂ ਕਿਚ੍ਚਂ ਸਮ੍ਪਾਦੇਤੁ ਵਾ ਮਾ ਵਾ, ਤਂ ਕਿਰਿਯਂ ਸਮ੍ਪਾਦਨੇ ਸਾਮਤ੍ਥਿਯਂ ਸਨ੍ਧਾਯ ਵੁਤ੍ਤਂ. ਦਾਰਕਂ, ਦਾਰਿਕਞ੍ਚ ਅਜਾਨਾਪੇਤ੍ਵਾ ਮਾਤਾਪਿਤੁਆਦੀਹਿ ਮਾਤਾਪਿਤੁਆਦੀਨਞ੍ਞੇਵ ਸਨ੍ਤਿਕਂ ਸਾਸਨੇ ਪੇਸਿਤੇਪਿ ਪਟਿਗ੍ਗਣ੍ਹਨਵੀਮਂਸਨਪਚ੍ਚਾਹਰਣਸਙ੍ਖਾਤਾਯ ਤਿਵਙ੍ਗਸਮ੍ਪਤ੍ਤਿਯਾ ਸਙ੍ਘਾਦਿਸੇਸੋ ਹੋਤਿ ਏਵਾਤਿ ਦਟ੍ਠਬ੍ਬਂ.

ਯਂ ਉਦ੍ਦਿਸ੍ਸ ਸਾਸਨਂ ਪੇਸਿਤਂ, ਤਂ ਏਵ ਸਨ੍ਧਾਯ ਤਸ੍ਸਾ ਮਾਤੁਆਦੀਨਂ ਆਰੋਚਿਤੇਪਿ ਖੇਤ੍ਤਮੇਵ ਓਤਿਣ੍ਣਭਾਵਂ ਦਸ੍ਸੇਤੁਂ ‘‘ਬੁਦ੍ਧਂ ਪਚ੍ਚਕ੍ਖਾਮੀ’’ਤਿਆਦਿ ਉਦਾਹਟਂ, ਇਦਞ੍ਚ ਵਚਨਬ੍ਯਤ੍ਤਯਹੇਤੁਬ੍ਯਤ੍ਤਯਾਨਂ ਭੇਦੇਪਿ ਬ੍ਯਤ੍ਤਯਸਾਮਞ੍ਞਤੋ ਉਦਾਹਟਨ੍ਤਿ ਦਟ੍ਠਬ੍ਬਂ. ਤਮ੍ਪਿ ਉਦਾਹਰਣਦੋਸਂ ਪਰਿਹਰਿਤ੍ਵਾ ਸੁਤ੍ਤਾਨੁਲੋਮਤਂ ਦਸ੍ਸੇਤੁਂ ‘‘ਤਂ ਪਨਾ’’ਤਿਆਦਿ ਵੁਤ੍ਤਂ. ਇਮਿਨਾ ਸਮੇਤੀਤਿ ਏਤ੍ਥਾਯਮਧਿਪ੍ਪਾਯੋ – ਯਥਾ ਸਯਂ ਅਨਾਰੋਚੇਤ੍ਵਾ ਅਞ੍ਞੇਸਂ ਅਨ੍ਤੇਵਾਸਿਕਾਦੀਨਂ ਵਤ੍ਵਾ ਵੀਮਂਸਾਪੇਤ੍ਵਾ ਪਚ੍ਚਾਹਰਨ੍ਤਸ੍ਸ ਨਤ੍ਥਿ ਵਿਸਙ੍ਕੇਤੋ, ਏਵਂ ਤਸ੍ਸਾ ਸਯਂ ਅਨਾਰੋਚੇਤ੍ਵਾ ਆਰੋਚਨਤ੍ਥਂ ਮਾਤੁਆਦੀਨਂ ਵਦਨ੍ਤਸ੍ਸਾਪਿ ਮਾਤੁਆਦਯੋ ਤਂ ਕਿਰਿਯਂ ਸਮ੍ਪਾਦੇਨ੍ਤੁ ਵਾ ਮਾ ਵਾ. ਯਦਿ ਹਿ ਤੇਸਂ ਮਾਤੁਆਦੀਨਂ ਤੁਣ੍ਹੀਭੂਤਭਾਵਮ੍ਪਿ ਪਚ੍ਚਾਹਰਤਿ, ਵਿਸਙ੍ਕੇਤੋ ਨਤ੍ਥੀਤਿ.

ਘਰਕਿਚ੍ਚਂ ਨੇਤੀਤਿ ਘਰਣੀ. ਅਞ੍ਞਤਰਂ ਵਦਨ੍ਤਸ੍ਸ ਵਿਸਙ੍ਕੇਤਂ ਅਦਿਨ੍ਨਾਦਾਨਾਦੀਸੁ ਆਣਤ੍ਤਿਯਂ ਵਤ੍ਥੁਸਙ੍ਕੇਤੋ ਵਿਯਾਤਿ ਅਧਿਪ੍ਪਾਯੋ. ਮੂਲਟ੍ਠਾਨਞ੍ਚ ਵਸੇਨਾਤਿ ਏਤ੍ਥ ਪੁਰਿਸਸ੍ਸ ਮਾਤੁਆਦਯੋ ਸਾਸਨਪੇਸਨੇ ਮੂਲਭੂਤਤ੍ਤਾ ‘‘ਮੂਲਟ੍ਠਾ’’ਤਿ ਵੁਤ੍ਤਾ.

੩੨੨. ਪਾਲ਼ਿਯਂ ਮਾਤੁਰਕ੍ਖਿਤਾਯ ਮਾਤਾ ਭਿਕ੍ਖੁਂ ਪਹਿਣਤੀਤਿ ਏਤ੍ਥ ਅਤ੍ਤਨੋ ਵਾ ਧੀਤੁ ਸਨ੍ਤਿਕਂ ‘‘ਇਤ੍ਥਨ੍ਨਾਮਸ੍ਸ ਭਰਿਯਾ ਹੋਤੂ’’ਤਿ ਭਿਕ੍ਖੁਂ ਪਹਿਣਤਿ, ਪੁਰਿਸਸ੍ਸ ਵਾ ਤਸ੍ਸ ਞਾਤਕਾਨਂ ਵਾ ਸਨ੍ਤਿਕਂ ‘‘ਮਮ ਧੀਤਾ ਇਤ੍ਥਨ੍ਨਾਮਸ੍ਸ ਭਰਿਯਾ ਹੋਤੂ’’ਤਿ ਪਹਿਣਤੀਤਿ ਗਹੇਤਬ੍ਬਂ. ਏਸੇਵ ਨਯੋ ਸੇਸੇਸੁਪਿ. ਪੁਬ੍ਬੇ ਵੁਤ੍ਤਨਯਤ੍ਤਾਤਿ ਪਠਮਸਙ੍ਘਾਦਿਸੇਸੇ ਵੁਤ੍ਤਨਯਤ੍ਤਾ.

੩੩੮. ਅਨ੍ਤੇ ਏਕੇਨਾਤਿ ਏਕੇਨ ਪਦੇਨ. ਏਤ੍ਤੋਵ ਪਕ੍ਕਮਤੀਤਿ ਅਪਚ੍ਚਾਹਰਿਤ੍ਵਾ ਤਤੋਵ ਪਕ੍ਕਮਤਿ. ‘‘ਅਨਭਿਨਨ੍ਦਿਤ੍ਵਾ’’ਤਿ ਇਦਂ ਤਥਾ ਪਟਿਪਜ੍ਜਮਾਨਂ ਸਨ੍ਧਾਯ ਵੁਤ੍ਤਂ. ਸਤਿਪਿ ਅਭਿਨਨ੍ਦਨੇ ਸਾਸਨਂ ਅਨਾਰੋਚੇਨ੍ਤੋ ਪਨ ਨ ਵੀਮਂਸਤਿ ਨਾਮ. ਤਤਿਯਪਦੇ ਵੁਤ੍ਤਨਯੇਨਾਤਿ ‘‘ਸੋ ਤਸ੍ਸਾ ਵਚਨਂ ਅਨਭਿਨਨ੍ਦਿਤ੍ਵਾ’’ਤਿਆਦਿਨਾ ਵੁਤ੍ਤਨਯੇਨ. ਪਾਲ਼ਿਯਂ ਅਨ੍ਤੇਵਾਸਿਂ ਵੀਮਂਸਾਪੇਤ੍ਵਾਤਿ ‘‘ਅਯਂ ਤੇਸਂ ਵਤ੍ਤੁਂ ਸਮਤ੍ਥੋ’’ਤਿ ਅਨ੍ਤੇਵਾਸਿਨਾ ਵੀਮਂਸਾਪੇਤ੍ਵਾ. ਸਚੇ ਪਨ ਸੋ ਅਨ੍ਤੇਵਾਸਿਕੋ ਤਂ ਵਚਨਂ ਆਦਿਯਿਤ੍ਵਾ ਤੁਣ੍ਹੀ ਹੋਤਿ, ਤਸ੍ਸਾਪਿ ਤਂ ਪਵਤ੍ਤਿਂ ਪਚ੍ਚਾਹਰਨ੍ਤਸ੍ਸ ਆਚਰਿਯਸ੍ਸ ਸਙ੍ਘਾਦਿਸੇਸੋਵ ਮਾਤੁਆਦੀਸੁ ਤੁਣ੍ਹੀਭੂਤੇਸੁ ਤੇਸਂ ਤੁਣ੍ਹਿਭਾਵਂ ਪਚ੍ਚਾਹਰਨ੍ਤਸ੍ਸ ਵਿਯਾਤਿ ਦਟ੍ਠਬ੍ਬਂ.

ਪਾਲ਼ਿਯਂ ਚਤੁਤ੍ਥਵਾਰੇ ਅਸਤਿਪਿ ਗਚ੍ਛਨ੍ਤੋ ਸਮ੍ਪਾਦੇਤਿ, ਆਗਚ੍ਛਨ੍ਤੋ ਵਿਸਂਵਾਦੇਤਿ ਅਨਾਪਤ੍ਤੀਤਿ ਅਤ੍ਥਤੋ ਆਪਨ੍ਨਮੇਵਾਤਿਕਤ੍ਵਾ ਵੁਤ੍ਤਂ ‘‘ਚਤੁਤ੍ਥੇ ਅਨਾਪਤ੍ਤੀ’’ਤਿ.

੩੪੦. ਕਾਰੁਕਾਨਨ੍ਤਿ ਵਡ੍ਢਕੀਆਦੀਨਂ ਤਚ੍ਛਕਅਯੋਕਾਰਤਨ੍ਤਵਾਯਰਜਕਨ੍ਹਾਪਿਤਕਾ ਪਞ੍ਚ ਕਾਰਵੋ ‘‘ਕਾਰੁਕਾ’’ਤਿ ਵੁਚ੍ਚਨ੍ਤਿ. ਏਵਰੂਪੇਨ…ਪੇ… ਅਨਾਪਤ੍ਤੀਤਿ ਤਾਦਿਸਂ ਗਿਹਿਵੇਯ੍ਯਾਵਚ੍ਚਮ੍ਪਿ ਨ ਹੋਤੀਤਿ ਕਤ੍ਵਾ ਵੁਤ੍ਤਂ.

ਕਾਯਤੋ ਸਮੁਟ੍ਠਾਤੀਤਿ ਪਣ੍ਣਤ੍ਤਿਂ ਵਾ ਅਲਂਵਚਨੀਯਭਾਵਂ ਵਾ ਤਦੁਭਯਂ ਵਾ ਅਜਾਨਨ੍ਤਸ੍ਸ ਕਾਯਤੋ ਸਮੁਟ੍ਠਾਤਿ. ਏਸ ਨਯੋ ਇਤਰਦ੍ਵਯੇਪਿ. ਅਲਂਵਚਨੀਯਾ ਹੋਨ੍ਤੀਤਿ ਇਤ੍ਥੀ ਵਾ ਪੁਰਿਸੋ ਵਾ ਉਭੋਪਿ ਵਾ ਜਾਯਾਭਾਵੇ, ਸਾਮਿਕਭਾਵੇ ਚ ਨਿਕ੍ਖਿਤ੍ਤਛਨ੍ਦਤਾਯ ਅਚ੍ਚਨ੍ਤਵਿਯੁਤ੍ਤਤ੍ਤਾ ਪੁਨ ਅਞ੍ਞਮਞ੍ਞਂ ਸਮਾਗਮਤ੍ਥਂ ‘‘ਮਾ ਏਵਂ ਅਕਰਿਤ੍ਥਾ’’ਤਿਆਦਿਨਾ ਵਚਨੀਯਤਾਯ ਵਤ੍ਤਬ੍ਬਤਾਯ ਅਲਂ ਅਰਹਾਤਿ ਅਲਂਵਚਨੀਯਾ, ਅਲਂ ਵਾ ਕਤ੍ਤੁਂ ਅਰਹਂ ਸਨ੍ਧਾਨਵਚਨਮੇਤੇਸੁ ਇਤ੍ਥਿਪੁਰਿਸੇਸੂਤਿ ਅਲਂਵਚਨੀਯਾ, ਸਨ੍ਧਾਨਕਾਰਸ੍ਸ ਵਚਨਂ ਵਿਨਾ ਅਸਙ੍ਗਚ੍ਛਨਕਾ ਪਰਿਚ੍ਚਤ੍ਤਾਯੇਵਾਤਿ ਅਧਿਪ੍ਪਾਯੋ.

ਪਣ੍ਣਤ੍ਤਿਂ ਪਨ ਜਾਨਿਤ੍ਵਾਤਿ ਏਤ੍ਥ ਅਲਂਵਚਨੀਯਭਾਵਂ ਵਾਤਿ ਵਤ੍ਤਬ੍ਬਂ. ਤੇਨੇਵ ਮਾਤਿਕਾਟ੍ਠਕਥਾਯਞ੍ਚ ‘‘ਤਦੁਭਯਂ ਪਨ ਜਾਨਿਤ੍ਵਾ’’ਤਿਆਦਿ ਵੁਤ੍ਤਂ. ਭਿਕ੍ਖੁਂ ਅਜਾਨਾਪੇਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਣ੍ਣੇ ਲਿਖਿਤ੍ਵਾ ‘‘ਇਮਂ ਪਣ੍ਣਂ ਅਸੁਕਸ੍ਸ ਦੇਹੀ’’ਤਿ ਦਿਨ੍ਨਂ ਹਰਨ੍ਤਸ੍ਸ ਸਞ੍ਚਰਿਤ੍ਤਂ ਨ ਹੋਤਿ. ਪਣ੍ਣਤ੍ਤਿਅਲਂਵਚਨੀਯਭਾਵਅਜਾਨਨਵਸੇਨੇਵ ਹਿ ਇਮਂ ਸਿਕ੍ਖਾਪਦਂ ਅਚਿਤ੍ਤਕਂ, ਨ ਸਬ੍ਬੇਨ ਸਬ੍ਬਂ ਸਞ੍ਚਰਣਭਾਵਮ੍ਪਿ ਅਜਾਨਨਵਸੇਨ, ਪਾਲ਼ਿਯਞ੍ਚ ਅਟ੍ਠਕਥਾਯਞ੍ਚ ਆਰੋਚਨਮੇਵ ਦਸ੍ਸਿਤਂ. ਤਸ੍ਮਾ ਸਨ੍ਦਸ੍ਸਨਤ੍ਥਂ ਞਤ੍ਵਾ ਪਣ੍ਣਸਨ੍ਦਸ੍ਸਨਵਸੇਨਾਪਿ ਕਾਯੇਨ ਵਾ ਵਾਚਾਯ ਵਾ ਆਰੋਚੇਨ੍ਤਸ੍ਸੇਵ ਆਪਤ੍ਤਿ ਹੋਤੀਤਿ ਗਹੇਤਬ੍ਬਂ.

੩੪੧. ਯਥਾ ਯਥਾ ਯੇਸੁ ਯੇਸੁ ਜਨਪਦੇਸੂਤਿ ਪਰਿਚ੍ਚਤ੍ਤਭਾਵਪ੍ਪਕਾਸਨਤ੍ਥਂ ਕਤ੍ਤਬ੍ਬਂ ਪਣ੍ਣਦਾਨਞਾਤਿਜਨਿਸ੍ਸਰਾਦਿਜਾਨਾਪਨਾਦਿਤਂਤਂਦੇਸਨਿਯਤਂ ਪਕਾਰਂ ਦਸ੍ਸੇਤਿ, ਇਦਞ੍ਚ ਨਿਬਦ੍ਧਭਰਿਯਾਭਾਵੇਨ ਗਹਿਤਂ ਸਨ੍ਧਾਯ ਵੁਤ੍ਤਂ. ਅਤ੍ਤਨੋ ਰੁਚਿਯਾ ਸਙ੍ਗਤਾਨਂ ਪਨ ਇਤ੍ਥੀਨਂ, ਮੁਹੁਤ੍ਤਿਕਾਯ ਚ ਪੁਰਿਸੇ ਚਿਤ੍ਤਸ੍ਸ ਵਿਰਜ੍ਜਨਮੇਵ ਅਲਂਵਚਨੀਯਭਾਵੇ ਕਾਰਣਨ੍ਤਿ ਦਟ੍ਠਬ੍ਬਂ. ਦੁਟ੍ਠੁਲ੍ਲਾਦੀਸੁਪੀਤਿ ਆਦਿ-ਸਦ੍ਦੇਨ ਅਤ੍ਤਕਾਮਸਞ੍ਚਰਿਤ੍ਤਾਨਿ ਸਙ੍ਗਣ੍ਹਾਤਿ, ਏਤ੍ਥ ਪਨ ਪਾਲ਼ਿਯਂ ਕਿਞ੍ਚਾਪਿ ‘‘ਇਤ੍ਥੀ ਨਾਮ ਮਨੁਸ੍ਸਿਤ੍ਥੀ ਨ ਯਕ੍ਖੀ’’ਤਿਆਦਿਨਾ ਮਨੁਸ੍ਸਿਤ੍ਥਿਪੁਰਿਸਾ ਨ ਦਸ੍ਸਿਤਾ, ਤਥਾਪਿ ‘‘ਦਸ ਇਤ੍ਥਿਯੋ ਮਾਤੁਰਕ੍ਖਿਤਾ’’ਤਿਆਦਿਨਾ ਮਨੁਸ੍ਸਿਤ੍ਥੀਨਞ੍ਞੇਵ ਦਸ੍ਸਿਤਤ੍ਤਾ ਪੁਰਿਸਾਨਮ੍ਪਿ ਤਦਨੁਗੁਣਾਨਮੇਵ ਗਹੇਤਬ੍ਬਤੋ ਮਨੁਸ੍ਸਜਾਤਿਕਾਵ ਇਤ੍ਥਿਪੁਰਿਸਾ ਇਧਾਧਿਪ੍ਪੇਤਾ. ਤਸ੍ਮਾ ਯੇਸੁ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਤੇਸਂ ਮਨੁਸ੍ਸਜਾਤਿਕਤਾ, ਨ ਨਾਲਂਵਚਨੀਯਤਾ, ਪਟਿਗ੍ਗਣ੍ਹਨ, ਵੀਮਂਸਨ, ਪਚ੍ਚਾਹਰਣਾਨੀਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ.

ਸਞ੍ਚਰਿਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.