੧੦. ਪਠਮਸਙ੍ਘਭੇਦਸਿਕ੍ਖਾਪਦਵਣ੍ਣਨਾ

੪੧੦. ਦਸਮੇ ਬਹੂਨਨ੍ਤਿ ਦੁਬ੍ਬਲਤਾਯ ਅਰਞ੍ਞਾਦਿਸੇਵਾਯ ਚਿਤ੍ਤਂ ਸਮਾਹਿਤਂ ਕਾਤੁਂ ਅਸਕ੍ਕੋਨ੍ਤਾਨਂ. ਦੁਕ੍ਖਸ੍ਸਨ੍ਤਕਿਰਿਯਾਯ ਤਸ੍ਮਿਂ ਅਤ੍ਤਭਾਵੇ ਬੁਦ੍ਧਵਚਨਗ੍ਗਹਣਧਾਰਣਾਦਿਸਙ੍ਖਾਤਂ ਬ੍ਯਞ੍ਜਨਪਦਮੇਵ ਪਰਮਂ ਅਸ੍ਸ, ਨ ਮਗ੍ਗਲਾਭੋਤਿ ਪਦਪਰਮੋ. ਅਭਿਸਮ੍ਭੁਣਿਤ੍ਵਾਤਿ ਨਿਪ੍ਫਾਦੇਤ੍ਵਾ. ਧਮ੍ਮਤੋ ਅਪੇਤਂ ਉਦ੍ਧਮ੍ਮਂ. ਪਟਿਕ੍ਖਿਤ੍ਤਮੇਵਾਤਿ ‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬ’’ਨ੍ਤਿ (ਮਹਾਵ. ੨੦੪) ਵਚਨਤੋ ਵੁਤ੍ਤਂ, ਇਦਮੇਵ ਵਚਨਂ ਸਨ੍ਧਾਯ ਪਾਲ਼ਿਯਮ੍ਪਿ ‘‘ਅਟ੍ਠ ਮਾਸੇ’’ਤਿਆਦਿ (ਪਾਰਾ. ੪੦੯) ਵੁਤ੍ਤਂ.

ਤੀਹਿ ਕੋਟੀਹੀਤਿ ਅਸੁਦ੍ਧਮੂਲੇਹਿ. ਏਤ੍ਥ ਚ ਭਿਕ੍ਖੂਨਂ ਚਤੂਸੁ ਕੁਲੇਸੁ ਪਕ੍ਕਪਿਣ੍ਡਿਯਾਲੋਪਭੋਜਨਨਿਸ੍ਸਿਤਤਾਯ, ਮਚ੍ਛਮਂਸਭੋਜਨਵਿਰਹਿਤਸ੍ਸ ਚ ਕੁਲਸ੍ਸ ਦੁਲ੍ਲਭਤਾਯ ਤਤ੍ਥ ਲਦ੍ਧੇਸੁ ਭਤ੍ਤਬ੍ਯਞ੍ਜਨੇਸੁ ਮਚ੍ਛਮਂਸਸਂਸਗ੍ਗਸਙ੍ਕਾਯ, ਦੁਨ੍ਨਿਵਾਰਣਤਾਯ ਚ ਭਿਕ੍ਖੂਨਂ ਸਰੀਰਯਾਪਨਮ੍ਪਿ ਨ ਸਿਯਾਤਿ ਭਗਵਤਾ ਮਚ੍ਛਮਂਸਂ ਸਬ੍ਬਥਾ ਅਪ੍ਪਟਿਕ੍ਖਿਪਿਤ੍ਵਾ ਤੀਹਿ ਕੋਟੀਹਿ ਅਪਰਿਸੁਦ੍ਧਮੇਵ ਪਟਿਕ੍ਖਿਤ੍ਤਂ. ਯਦਿ ਹਿ ਤਂ ਭਗਵਾ ਸਬ੍ਬਥਾ ਪਟਿਕ੍ਖਿਪੇਯ੍ਯ, ਭਿਕ੍ਖੂ ਮਰਮਾਨਾਪਿ ਮਚ੍ਛਾਦਿਸਂਸਗ੍ਗਸਙ੍ਕਿਤਂ ਭਤ੍ਤਂ ਨ ਭੁਞ੍ਜੇਯ੍ਯੁਂ, ਤਤੋ ਤਣ੍ਡੁਲਧਞ੍ਞਾਦਿਂ ਪਟਿਗ੍ਗਹੇਤ੍ਵਾ ਨਿਦਹਿਤ੍ਵਾ ਸਯਂ ਪਚਿਤ੍ਵਾ ਭੁਞ੍ਜਿਤੁਂ ਤਦੁਪਕਰਣਭੂਤਂ ਦਾਸਿਦਾਸਂ, ਉਦੁਕ੍ਖਲਮੁਸਲਾਦਿਕਞ੍ਚ ਭਿਕ੍ਖੂਨਂ ਪਤ੍ਤਾਦਿ ਵਿਯ ਅਵਸ੍ਸਂ ਗਹੇਤੁਂ ਅਨੁਜਾਨਿਤਬ੍ਬਂ ਸਿਯਾਤਿ ਤਿਤ੍ਥਿਯਾਨਂ ਵਿਯ ਗਹਟ੍ਠਾਵਾਸੋ ਏਵ ਸਿਯਾ, ਨ ਭਿਕ੍ਖੁਆਵਾਸੋਤਿ ਵੇਦਿਤਬ੍ਬਂ. ਜਾਲਂ ਮਚ੍ਛਬਨ੍ਧਨਂ. ਵਾਗੁਰਾ ਮਿਗਬਨ੍ਧਨੀ. ਕਪ੍ਪਤੀਤਿ ਯਦਿ ਤੇਸਂ ਵਚਨੇਨ ਸਙ੍ਕਾ ਨ ਵਤ੍ਤਤਿ, ਵਟ੍ਟਤਿ, ਨ ਤਂ ਵਚਨਂ ਲੇਸਕਪ੍ਪਂ ਕਾਤੁਂ ਵਟ੍ਟਤਿ. ਤੇਨੇਵ ਵਕ੍ਖਤਿ ‘‘ਯਤ੍ਥ ਚ ਨਿਬ੍ਬੇਮਤਿਕੋ ਹੋਤਿ, ਤਂ ਸਬ੍ਬਂ ਕਪ੍ਪਤੀ’’ਤਿ.

ਪਵਤ੍ਤਮਂਸਨ੍ਤਿ ਆਪਣਾਦੀਸੁ ਪਵਤ੍ਤਂ ਵਿਕ੍ਕਾਯਿਕਂ ਮਤਮਂਸਂ. ਭਿਕ੍ਖੂਨਂਯੇਵ ਅਤ੍ਥਾਯ ਅਕਤਨ੍ਤਿ ਏਤ੍ਥ ਅਟ੍ਠਾਨਪ੍ਪਯੁਤ੍ਤੋ ਏਵ-ਸਦ੍ਦੋ, ਭਿਕ੍ਖੂਨਂ ਅਤ੍ਥਾਯ ਅਕਤਮੇਵਾਤਿ ਸਮ੍ਬਨ੍ਧਿਤਬ੍ਬਂ, ਤਸ੍ਮਾ ਭਿਕ੍ਖੂਨਞ੍ਚ ਮਙ੍ਗਲਾਦੀਨਞ੍ਚਾਤਿ ਮਿਸ੍ਸੇਤ੍ਵਾ ਕਤਮ੍ਪਿ ਨ ਵਟ੍ਟਤੀਤਿ ਵੇਦਿਤਬ੍ਬਂ. ਕੇਚਿ ਪਨ ਯਥਾਠਿਤਵਸੇਨ ਅਵਧਾਰਣਂ ਗਹੇਤ੍ਵਾ ‘‘ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ. ‘‘ਵਤ੍ਤ’’ਨ੍ਤਿ ਇਮਿਨਾ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ.

ਕਪ੍ਪਨ੍ਤਿ ਅਸਙ੍ਖੇਯ੍ਯਕਪ੍ਪਂ, ‘‘ਆਯੁਕਪ੍ਪ’’ਨ੍ਤਿਪਿ (ਸਾਰਤ੍ਥ. ਟੀ. ੨.੪੧੦) ਕੇਚਿ. ਮਹਾਕਪ੍ਪਸ੍ਸ ਹਿ ਚਤੁਤ੍ਥਭਾਗੋ ਅਸਙ੍ਖੇਯ੍ਯਕਪ੍ਪੋ, ਤਤੋ ਵੀਸਤਿਮੋ ਭਾਗੋ ਸਙ੍ਘਭੇਦਕਸ੍ਸ ਆਯੁਕਪ੍ਪਨ੍ਤਿ ਵਦਨ੍ਤਿ, ਤਂ ਅਟ੍ਠਕਥਾਸੁ ਕਪ੍ਪਟ੍ਠਕਥਾਯ ਨ ਸਮੇਤਿ ‘‘ਕਪ੍ਪਵਿਨਾਸੇ ਏਵ ਮੁਚ੍ਚਤੀ’’ਤਿਆਦਿ (ਵਿਭ. ਅਟ੍ਠ. ੮੦੯) ਵਚਨਤੋ. ਬ੍ਰਹ੍ਮਂ ਪੁਞ੍ਞਨ੍ਤਿ ਸੇਟ੍ਠਂ ਪੁਞ੍ਞਂ. ਕਪ੍ਪਂ ਸਗ੍ਗਮ੍ਹੀਤਿ ਏਤ੍ਥ ਪਟਿਸਨ੍ਧਿਪਰਮ੍ਪਰਾਯ ਕਪ੍ਪਟ੍ਠਤਾ ਵੇਦਿਤਬ੍ਬਾ.

੪੧੧. ਲਦ੍ਧਿਨਾਨਾਸਂਵਾਸਕੇਨਾਤਿ ਉਕ੍ਖਿਤ੍ਤਾਨੁਵਤ੍ਤਕਭਾਵੇਨ ਭਾਵਪ੍ਪਧਾਨਤ੍ਤਾ ਨਿਦ੍ਦੇਸਸ੍ਸ. ਕਮ੍ਮਨਾਨਾਸਂਵਾਸਕੇਨਾਤਿ ਉਕ੍ਖਿਤ੍ਤਭਾਵੇਨ. ‘‘ਭੇਦਾਯ ਪਰਕ੍ਕਮੇਯ੍ਯਾ’’ਤਿ ਵਿਸੁਂ ਵੁਤ੍ਤਤ੍ਤਾ ਭੇਦਨਸਂਵਤ੍ਤਨਿਕਸ੍ਸ ਅਧਿਕਰਣਸ੍ਸ ਸਮਾਦਾਯ ਪਗ੍ਗਣ੍ਹਨਤੋ ਪੁਬ੍ਬੇਪਿ ਪਕ੍ਖਪਰਿਯੇਸਨਾਦਿਵਸੇਨ ਸਙ੍ਘਭੇਦਾਯ ਪਰਕ੍ਕਮਨ੍ਤਸ੍ਸ ਸਮਨੁਭਾਸਨਕਮ੍ਮਂ ਕਾਤੁਂ ਵਟ੍ਟਤੀਤਿ ਵੇਦਿਤਬ੍ਬਂ. ਯੋਪਿ ਚਾਯਂ ਸਙ੍ਘਭੇਦੋ ਹੋਤੀਤਿ ਸਮ੍ਬਨ੍ਧੋ.

ਕਮ੍ਮੇਨਾਤਿ ਅਪਲੋਕਨਾਦਿਨਾ. ਉਦ੍ਦੇਸੇਨਾਤਿ ਪਾਤਿਮੋਕ੍ਖੁਦ੍ਦੇਸੇਨ. ਵੋਹਾਰੇਨਾਤਿ ਤਾਹਿ ਤਾਹਿ ਉਪਪਤ੍ਤੀਹਿ ‘‘ਅਧਮ੍ਮਂ ਧਮ੍ਮੋ’’ਤਿਆਦਿਨਾ (ਅ. ਨਿ. ੩.੧੦-੩੯, ੪੨; ਚੂਲ਼ਵ. ੩੫੨) ਵੋਹਾਰੇਨ, ਪਰੇਸਂ ਪਞ੍ਞਾਪਨੇਨਾਤਿ ਅਤ੍ਥੋ. ਅਨੁਸਾਵਨਾਯਾਤਿ ਅਤ੍ਤਨੋ ਲਦ੍ਧਿਯਾ ਗਹਣਤ੍ਥਮੇਵ ਅਨੁ ਪੁਨਪ੍ਪੁਨਂ ਕਣ੍ਣਮੂਲੇ ਮਨ੍ਤਸਾਵਨਾਯ, ਕਥਨੇਨਾਤਿ ਅਤ੍ਥੋ. ਸਲਾਕਗ੍ਗਾਹੇਨਾਤਿ ਏਵਂ ਅਨੁਸਾਵਨਾਯ ਤੇਸਂ ਚਿਤ੍ਤਂ ਉਪਤ੍ਥਮ੍ਭੇਤ੍ਵਾ ਅਤ੍ਤਨੋ ਪਕ੍ਖੇ ਪਵਿਟ੍ਠਭਾਵਸ੍ਸ ਸਞ੍ਞਾਣਤ੍ਥਂ ‘‘ਗਣ੍ਹਥ ਇਮਂ ਸਲਾਕ’’ਨ੍ਤਿ ਸਲਾਕਗ੍ਗਾਹੇਨ. ਏਤ੍ਥ ਚ ਕਮ੍ਮਮੇਵ, ਉਦ੍ਦੇਸੋ ਵਾ ਸਙ੍ਘਭੇਦੇ ਪਧਾਨਂ ਕਾਰਣਂ, ਵੋਹਾਰਾਦਯੋ ਪਨ ਸਙ੍ਘਭੇਦਸ੍ਸ ਪੁਬ੍ਬਭਾਗਾਤਿ ਵੇਦਿਤਬ੍ਬਾ. ਅਬ੍ਭੁਸ੍ਸਿਤਨ੍ਤਿ ਅਬ੍ਭੁਗ੍ਗਤਂ. ਅਚ੍ਛੇਯ੍ਯਾਤਿ ਵਿਹਰੇਯ੍ਯ.

‘‘ਲਜ੍ਜੀ ਰਕ੍ਖਿਸ੍ਸਤੀ’’ਤਿ (ਵਿਸੁਦ੍ਧਿ. ੧.੪੨; ਪਾਰਾ. ਅਟ੍ਠ. ੧.੪੫) ਵਚਨਤੋ ਆਪਤ੍ਤਿਭਯੇਨ ਆਰੋਚਨਂ ਲਜ੍ਜੀਨਂ ਏਵ ਭਾਰੋਤਿ ਆਹ ‘‘ਲਜ੍ਜੀਹਿ ਭਿਕ੍ਖੂਹੀ’’ਤਿ, ਅਲਜ੍ਜਿਸ੍ਸਪਿ ਅਨਾਰੋਚੇਨ੍ਤਸ੍ਸ ਆਪਤ੍ਤਿਯੇਵ. ਅਪ੍ਪਟਿਨਿਸ੍ਸਜ੍ਜਤੋ ਦੁਕ੍ਕਟਨ੍ਤਿ ਵਿਸੁਂ ਵਿਸੁਂ ਵਦਨ੍ਤਾਨਂ ਗਣਨਾਯ ਦੁਕ੍ਕਟਂ. ਪਹੋਨ੍ਤੇਨਾਤਿ ਗਨ੍ਤੁਂ ਸਮਤ੍ਥੇਨ, ਇਚ੍ਛਨ੍ਤੇਨਾਤਿ ਅਤ੍ਥੋ. ਆਪਤ੍ਤਿ ਪਨ ਅਡ੍ਢਯੋਜਨਬ੍ਭਨ੍ਤਰੇਨੇਵ ਅਗਿਲਾਨਸ੍ਸ ਵਸੇਨ ਵੇਦਿਤਬ੍ਬਾ.

੪੧੬. ਞਤ੍ਤਿਯਾਦੀਹਿ ਦੁਕ੍ਕਟਾਦਿਸਬ੍ਭਾਵਂ ਸਨ੍ਧਾਯ ‘‘ਸਙ੍ਘਾਦਿਸੇਸੇਨ ਅਨਾਪਤ੍ਤੀ’’ਤਿ ਵੁਤ੍ਤਂ. ਅਸ੍ਸਾਤਿ ਦੇਵਦਤ੍ਤਸ੍ਸ. ਅਪਞ੍ਞਤ੍ਤੇ ਸਿਕ੍ਖਾਪਦੇ ਸਮਨੁਭਾਸਨਕਮ੍ਮਸ੍ਸੇਵ ਅਭਾਵਤੋ ‘‘ਨ ਹਿ ਪਞ੍ਞਤ੍ਤਂ ਸਿਕ੍ਖਾਪਦਂ ਵੀਤਿਕ੍ਕਮਨ੍ਤਸ੍ਸਾ’’ਤਿ ਵੁਤ੍ਤਂ. ਸਿਕ੍ਖਾਪਦਂ ਪਞ੍ਞਪੇਨ੍ਤੇਨੇਵ ਹਿ ਸਮਨੁਭਾਸਨਕਮ੍ਮਂ ਅਨੁਞ੍ਞਾਤਂ. ਉਦ੍ਦਿਸ੍ਸ ਅਨੁਞ੍ਞਾਤਤੋਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਰੋਮਨ੍ਥਕਸ੍ਸ ਰੋਮਨ੍ਥਨ’’ਨ੍ਤਿਆਦਿਂ (ਚੂਲ਼ਵ. ੨੭੩) ਉਦ੍ਦਿਸ੍ਸਾਨੁਞ੍ਞਾਤਂ ਸਨ੍ਧਾਯ ਵਦਤਿ. ਅਨਾਪਤ੍ਤਿਯਨ੍ਤਿ ਅਨਾਪਤ੍ਤਿਵਾਰੇ. ਆਪਤ੍ਤਿਂ ਰੋਪੇਤਬ੍ਬੋਤਿ ਸਮਨੁਭਾਸਨਾਯ ਪਾਚਿਤ੍ਤਿਯਆਪਤ੍ਤਿਂ ਰੋਪੇਤਬ੍ਬੋ. ਆਪਤ੍ਤਿਯੇਵ ਨ ਜਾਤਾਤਿ ਸਙ੍ਘਾਦਿਸੇਸਾਪਤ੍ਤਿ ਨ ਜਾਤਾ ਏਵ.

‘‘ਨ ਪਟਿਨਿਸ੍ਸਜ੍ਜਾਮੀ’’ਤਿ ਸਞ੍ਞਾਯ ਅਭਾਵੇਨ ਮੁਚ੍ਚਨਤੋ ਸਞ੍ਞਾਵਿਮੋਕ੍ਖਂ. ਸਚਿਤ੍ਤਕਨ੍ਤਿ ‘‘ਨ ਪਟਿਨਿਸ੍ਸਜ੍ਜਾਮੀ’’ਤਿ ਜਾਨਨਚਿਤ੍ਤੇਨ ਸਚਿਤ੍ਤਕਂ. ਯੋ ਵਿਸਞ੍ਞੀ ਵਾ ਭੀਤੋ ਵਾ ਵਿਕ੍ਖਿਤ੍ਤੋ ਵਾ ‘‘ਪਟਿਨਿਸ੍ਸਜ੍ਜਿਤਬ੍ਬ’’ਨ੍ਤਿਪਿ, ‘‘ਕਮ੍ਮਂ ਕਰਿਸ੍ਸਤੀ’’ਤਿ ਵਾ ਨ ਜਾਨਾਤਿ, ਤਸ੍ਸ ਅਨਾਪਤ੍ਤਿ. ਭੇਦਾਯ ਪਰਕ੍ਕਮਨਂ, ਧਮ੍ਮਕਮ੍ਮੇਨ ਸਮਨੁਭਾਸਨਂ, ਕਮ੍ਮਵਾਚਾਪਰਿਯੋਸਾਨਂ, ਨ ਪਟਿਨਿਸ੍ਸਜ੍ਜਾਮੀਤਿ ਚਿਤ੍ਤੇਨ ਅਪ੍ਪਟਿਨਿਸ੍ਸਜ੍ਜਨਨ੍ਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਪਠਮਸਙ੍ਘਭੇਦਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.