ਅਨ੍ਤਰਪੇਯ੍ਯਾਲਂ

ਕਤਿਪੁਚ੍ਛਾਵਾਰਵਣ੍ਣਨਾ

੨੭੧. ਪਟਿਨਿਦ੍ਦੇਸਨ੍ਤਿ ਪੁਨਪ੍ਪੁਨਂ ਨਿਦ੍ਦਿਸਨਂ. ਆਪਤ੍ਤਿਕ੍ਖਨ੍ਧੇਹਿ ਵਿਨੀਤਾਨਿ ਸਂਵਰਾਨੀਤਿ ਅਤ੍ਥੋ. ਏਤੇਹਿ ਆਪਤ੍ਤਿਕ੍ਖਨ੍ਧੇਹਿ. ‘‘ਆਰਕਾ’’ਤਿ ਨਿਵਤ੍ਤਿਅਤ੍ਥੇਨ ਵੁਤ੍ਤਤ੍ਤਾ ਤਂ ਪੁਨ ਸਰੂਪੇਨ ਵਤ੍ਤੁਕਾਮੋ ‘‘ਭੁਸਾ ਵਾ’’ਤਿ ਆਹ. ‘‘ਗੇਹਂ ਧੂਮੇਨ ਪੁਣ੍ਣਂ ਆਧੂਮਿਤ’’ਨ੍ਤਿਆਦੀਸੁ ਵਿਯ ਰਾਗਾਦਿਵੇਰਂ ਮਣਤਿ ਵਿਨਾਸੇਤਿ. ਏਤਾਯਾਤਿ ਵਿਰਤਿਯਾ. ਵੇਲ ਚਲਨੇ. ਨਿਯ੍ਯਾਨਂ ਮਗ੍ਗਂ ਸਿਨੋਤਿ ਬਨ੍ਧਤੀਤਿ ਸੇਤੁ. ‘‘ਸੇਤੁਘਾਤੋਤਿ ਵੀਤਿਕ੍ਕਮਪਟਿਪਕ੍ਖਭੂਤਾ ਵਿਰਤਿ, ਤਦਤ੍ਥਨਿਬ੍ਬਤ੍ਤਿਕਰਚਿਤ੍ਤੁਪ੍ਪਾਦੋ ਵਾ’’ਤਿ ਵੁਤ੍ਤਂ. ‘‘ਧਮ੍ਮਸ੍ਸਵਨਗ੍ਗਨ੍ਤਿ ਧਮ੍ਮਂ ਸੁਣਨ੍ਤਾਨਂ ਸਮੂਹ’’ਨ੍ਤਿ ਲਿਖਿਤਂ. ਸਚੇ ਨ ਗਚ੍ਛਤਿ, ਵਿਕ੍ਖਿਤ੍ਤੋ ਵਾ ਨਿਸੀਦਤਿ. ਕਾਯਪ੍ਪਾਗਬ੍ਭਿਯਂ ਕਾਯਦੁਚ੍ਚਰਿਤਂ. ‘‘ਪਮਾਦੇ’’ਤਿ ਵਤ੍ਵਾ ਤਦਤ੍ਥਂ ਦਸ੍ਸੇਤੁਂ ‘‘ਸਤਿਵਿਪ੍ਪਵਾਸੇ’’ਤਿ ਵੁਤ੍ਤਂ.

੨੭੨-੩. ਸਪਰਸਨ੍ਤਾਨੇ ਵਾਤਿ ਸਸਨ੍ਤਾਨੇ ਵਾ ਪਰਸਨ੍ਤਾਨੇ ਵਾ. ਤਥਾ ਵਿਵਦਨ੍ਤਾ ਪਨਾਤਿ ਭੇਦਕਰਵਤ੍ਥੂਨਿ ਨਿਸ੍ਸਾਯ ਵਿਵਦਨ੍ਤਾ. ਉਭਯੇਹਿਪੀਤਿ ਥੇਰਨਵੇਹਿ. ਨਨ੍ਤਿ ਮੇਤ੍ਤਂ ਕਾਯਕਮ੍ਮਂ. ਯੇਸਂ ਪੁਗ੍ਗਲਾਨਂ ਪਿਯਂ ਕਰੋਤਿ, ਤੇਸਂ ਮੇਤ੍ਤਾਕਾਯਕਮ੍ਮਸਙ੍ਖਾਤੋ ਧਮ੍ਮੋ. ਏਤ੍ਤਕਨ੍ਤਿ ਆਮਿਸਵਿਭਤ੍ਤਿਦਸ੍ਸਨਂ. ਅਸੁਕਸ੍ਸ ਚਾਤਿ ਪੁਗ੍ਗਲਵਿਭਤ੍ਤਿਦਸ੍ਸਨਂ. ‘‘ਦੁਸ੍ਸੀਲਸ੍ਸ ਅਦਾਤੁਮ੍ਪਿ ਵਟ੍ਟਤੀ’’ਤਿ ਵੁਤ੍ਤਤ੍ਤਾ ਏਵ ਅਲਜ੍ਜਿਪਰਿਭੋਗੋ ਵਾਰਿਤੋ. ਸਬ੍ਬੇਸਂ ਦਾਤਬ੍ਬਮੇਵਾਤਿ ਸਨ੍ਨਿਟ੍ਠਾਨੇਨ ਅਜਾਨਨ੍ਤੇਨ ਵਿਭਾਗਂ ਅਕਤ੍ਵਾ ਦਾਤਬ੍ਬਭਾਵਂ ਦੀਪੇਤੀਤਿ ਏਕੇ. ‘‘ਸਬ੍ਬੇਸਂ ਦਾਤਬ੍ਬਮੇਵਾ’’ਤਿ ਵੁਤ੍ਤਂ ਅਟ੍ਠਕਥਾਸੁ. ਤਤ੍ਥ ‘‘ਅਲਜ੍ਜਿਉਕ੍ਖਿਤ੍ਤਕਾਨਂ ਪਰਿਭੋਗਸੀਸੇਨ ਸਹਤ੍ਥਾ ਨ ਦਾਤਬ੍ਬਂ, ਦਾਪੇਤਬ੍ਬਨ੍ਤਿ ਅਪਰੇ’’ਤਿ ਵੁਤ੍ਤਂ. ਵਿਚਿਨਿਤ੍ਵਾ ਦਾਨਂ ਵਿਚੇਯ੍ਯ ਦਾਨਂ. ਯਸ੍ਮਾ ਅਯਂ ਵਿਸੇਸੋ ਕਾਤਬ੍ਬੋਯੇਵਾਤਿ ਅਯਂ ਕਰੋਤਿ, ਤਸ੍ਮਾ ਪੁਗ੍ਗਲਵਿਭਾਗੋ ਨ ਕਤੋਤਿ ਸਮ੍ਬਨ੍ਧੋ. ਪਕਤਿਵਣ੍ਣੇਨ ਵਿਸਭਾਗਵਣ੍ਣੇਨ. ‘‘ਇਦਂ ਨਾਮ ਆਪਨ੍ਨੋ’’ਤਿ ਪਰੇਹਿ ਅਪਰਾਮਸਿਤਬ੍ਬਤੋ ਅਪਰਾਮਟ੍ਠਾਨਿ. ਅਨੁਲੋਮੇਹਿ ਗਹਿਤਸਙ੍ਖਾਰਾਰਮ੍ਮਣੇਹਿ ਨਿਬ੍ਬਾਨਾਰਮ੍ਮਣਂ ਕਤ੍ਵਾ ਨਿਯ੍ਯਾਤਿ.

ਛਆਪਤ੍ਤਿਸਮੁਟ੍ਠਾਨਵਾਰਾਦਿਵਣ੍ਣਨਾ

੨੭੬. ‘‘ਪਠਮੇਨ ਆਪਤ੍ਤਿਸਮੁਟ੍ਠਾਨੇਨ ਦੁਬ੍ਭਾਸਿਤਂ ਆਪਜ੍ਜੇਯ੍ਯਾਤਿ ਨ ਹੀਤਿ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ ਵਾਚਾਚਿਤ੍ਤਵਸੇਨੇਵਾਪਜ੍ਜਿਤਬ੍ਬਤੋ.

੨੭੭. ਕੁਟਿਂ ਕਰੋਤੀਤਿ ਏਤ੍ਥ ਸਞ੍ਚਰਿਤ੍ਤਮਵਤ੍ਵਾ ਦੁਕ੍ਕਟਥੁਲ੍ਲਚ੍ਚਯਸਙ੍ਘਾਦਿਸੇਸਾਨਂ ਏਕਸ੍ਮਿਂ ਵਤ੍ਥੁਸ੍ਮਿਂ ਪਟਿਪਾਟਿਯਾ ਉਪ੍ਪਤ੍ਤਿਦਸ੍ਸਨਤ੍ਥਮਿਦਂ ਵੁਤ੍ਤਂ. ਨ ਹਿ ਸਞ੍ਚਰਿਤ੍ਤੇ ਏਵ ਆਪਜ੍ਜਤਿ. ‘‘ਇਮਿਨਾ ਪਨ ਨਯੇਨ ਸਬ੍ਬਤ੍ਥ ਪਟਿਪਾਟਿਯਾ ਅਗ੍ਗਹਣੇ ਕਾਰਣਂ ਵੇਦਿਤਬ੍ਬ’’ਨ੍ਤਿ ਵੁਤ੍ਤਂ.

੨੮੩. ਵਿਵੇਕਦਸ੍ਸਿਨਾਤਿ ਤਦਙ੍ਗਵਿਵੇਕਾਦਿਪਞ੍ਚਵਿਧਵਿਵੇਕਦਸ੍ਸਿਨਾ.

੨੮੪. ਅਤ੍ਤਨੋ ਦੁਟ੍ਠੁਲ੍ਲਨ੍ਤਿ ਸਙ੍ਘਾਦਿਸੇਸਂ.

੨੮੮. ਵਿਵਾਦਾਧਿਕਰਣਪਚ੍ਚਯਾਤਿ ਅਞ੍ਞੇਹਿ, ਅਤ੍ਤਨਾ ਵਾ ਪੁਬ੍ਬਭਾਗੇ ਆਪਨ੍ਨਪਚ੍ਚਯਾਤਿ ਅਤ੍ਥੋ. ਓਮਸਤੀਤਿ ‘‘ਅਯਂ ਧਮ੍ਮੋ, ਅਯਂ ਵਿਨਯੋ’’ਤਿ ਵਿਵਦਨ੍ਤੋ ‘‘ਤ੍ਵਂ ਕਿਂ ਜਾਨਾਸੀ’’ਤਿਆਦਿਨਾ ਓਮਸਤਿ. ਤੀਹਿ ਸਮਥੇਹਿ ਸਮ੍ਮੁਖਾਵਿਨਯਪਟਿਞ੍ਞਾਤਕਰਣਤਿਣਵਤ੍ਥਾਰਕੇਹਿ. ‘‘ਸਮ੍ਮੁਖਾਵਿਨਯਞ੍ਚੇਤ੍ਥ ਸਬ੍ਬਤ੍ਥ ਇਚ੍ਛਿਤਬ੍ਬਤੋ ‘ਸਮ੍ਮੁਖਾਵਿਨਯੇਨ ਚੇਵ ਪਟਿਞ੍ਞਾਤਕਰਣੇਨ ਚਾ’ਤਿਆਦਿਨਾ ਦ੍ਵੀਹਿਪਿ ਯੋਜਿਤਂ. ਏਸ ਨਯੋ ਸਬ੍ਬਤ੍ਥਾ’’ਤਿ ਵੁਤ੍ਤਂ.

੨੯੧. ਠਪੇਤ੍ਵਾ ਸਤ੍ਤ ਆਪਤ੍ਤਿਯੋਤਿ ਏਤ੍ਥ ‘‘ਕਿਞ੍ਚਾਪਿ ਅਵਸੇਸਾ ਨਤ੍ਥਿ, ਤਥਾਪਿ ਪਟਿਪਾਟਿਯਾ ਪਾਟਵਜਨਨਤ੍ਥਂ ਪੁਚ੍ਛਾ ਕਤਾ’’ਤਿ ਵੁਤ੍ਤਂ.

ਅਨ੍ਤਰਪੇਯ੍ਯਾਲਂ ਨਿਟ੍ਠਿਤਂ.