ਕਥਿਨਭੇਦਵਣ੍ਣਨਾ

ਕਥਿਨਅਤ੍ਥਤਾਦਿਵਣ੍ਣਨਾ

੪੦੩-੪. ਕਿਨ੍ਤਿ ਕਥਂ. ਅਨਾਦਿਯਦਾਨਂ ਤਾਵਕਾਲਿਕਵਤ੍ਥੁ. ‘‘ਅਨਾਗਤਵਸੇਨ ਅਨਨ੍ਤਰਾ ਹੁਤ੍ਵਾ’’ਤਿ ਉਦਕਾਹਰਣਾਦਿਪਯੋਗਸ੍ਸ ਧੋਵਨਾਦਿਪੁਬ੍ਬਕਰਣਸ੍ਸ ਪਚ੍ਛਾ ਉਪ੍ਪਜ੍ਜਨਤੋ, ਧੋਵਨਾਦਿਕਿਰਿਯਞ੍ਚ ਸਨ੍ਧਾਯ ਪਯੋਗਕਰਣਤੋ ਵੁਤ੍ਤਂ. ਪੁਰੇਜਾਤਪਚ੍ਚਯੇ ਪਨੇਸ ਪਯੋਗੋਤਿ ਅਤ੍ਥੋ. ਏਕਂ ਧਮ੍ਮਮ੍ਪਿ ਨ ਲਭਤਿ ਅਤ੍ਤਨੋ ਪੁਰੇਜਾਤਸ੍ਸ ਨਤ੍ਥਿਤਾਯ.

ਕਥਿਨਾਦਿਜਾਨਿਤਬ੍ਬਵਿਭਾਗਵਣ੍ਣਨਾ

੪੧੨. ਰੂਪਾਦਿਧਮ੍ਮੇਸੂਤਿ ਵਣ੍ਣਗਨ੍ਧਾਦਿਅਟ੍ਠਕੇਸੁ. ‘‘ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ’’ਤਿ (ਪਾਰਾ. ੨੧੮) ਵੁਤ੍ਤਤ੍ਤਾ ਪਚ੍ਛਿਮੇ ਮਾਸੇ ਯਸ੍ਮਿਂ ਵਾ ਤਸ੍ਮਿਂ ਵਾ ਦਿਵਸੇ ਅਤ੍ਥਰਿਤੁਂ ਵਟ੍ਟਤੀਤਿ ਸਿਦ੍ਧਂ.

੪੧੫. ‘‘ਆਦਿਚ੍ਚਬਨ੍ਧੁਨਾਤਿ ਵੁਤ੍ਤਤ੍ਤਾ ਥੇਰਵਚਨ’’ਨ੍ਤਿ ਵਦਨ੍ਤਿ.

ਪਲਿਬੋਧਪਞ੍ਹਾਬ੍ਯਾਕਰਣਕਥਾਵਣ੍ਣਨਾ

੪੧੫-੬. ਸਨ੍ਨਿਟ੍ਠਾਨਨ੍ਤਿਕੋ ਕਥਂ ਬਹਿਸੀਮਾਯ ਉਦ੍ਧਰੀਯਤਿ? ਭਿਕ੍ਖੁ ਅਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ, ਤਸ੍ਸ ਬਹਿਸੀਮਾਗਤਸ੍ਸ ਏਵਂ ਹੋਤਿ ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ, ਏਵਮੇਤਸ੍ਸ ਬਹਿਸੀਮਾਗਤਸ੍ਸ ਉਦ੍ਧਰੀਯਤਿ. ਕਥਂ ਅਨ੍ਤੋਸੀਮਾਯ? ਅਕਤਚੀਵਰਂ ਸਮਾਦਾਯ ਪਕ੍ਕਮਤਿ ‘‘ਨ ਪਚ੍ਚੇਸ੍ਸ’’ਨ੍ਤਿ, ਤਤੋ ਤਤ੍ਥ ਫਾਸੁਵਿਹਾਰਂ ਅਲਭਨ੍ਤੋ ਤਮੇਵ ਵਿਹਾਰਂ ਆਗਚ੍ਛਤਿ, ਤਸ੍ਸ ਚੀਵਰਪਲਿਬੋਧੋਯੇਵ ਠਿਤੋ, ਸੋ ਚ ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ ਚਿਤ੍ਤੇ ਉਪ੍ਪਨ੍ਨੇ ਛਿਜ੍ਜਤਿ, ਤਸ੍ਮਾ ‘‘ਅਨ੍ਤੋਸੀਮਾਯ ਉਦ੍ਧਰੀਯਤੀ’’ਤਿ ਵੁਤ੍ਤਂ. ਸਨ੍ਨਿਟ੍ਠਾਨਨ੍ਤਿਕਂ ਦੁਵਿਧਂ ‘‘ਨ ਪਚ੍ਚੇਸ੍ਸ’’ਨ੍ਤਿ ਆਵਾਸਪਲਿਬੋਧਂ ਛਿਨ੍ਦਿਤ੍ਵਾ ਤਤੋ ਪੁਨਪਿ ਤਮੇਵ ਵਿਹਾਰਂ ਆਗਨ੍ਤ੍ਵਾ ‘‘ਨੇਵਿਮਂ ਚੀਵਰਂ ਕਾਰੇਸ੍ਸ’’ਨ੍ਤਿ ਸਨ੍ਨਿਟ੍ਠਾਨਂ ਕਰੋਤਿ, ਬਹਿਸੀਮਾਯ ਠਤ੍ਵਾ ‘‘ਨੇਵਿਮਂ ਚੀਵਰਂ ਕਾਰੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ ਚਿਤ੍ਤੁਪ੍ਪਾਦੇਨ ਸਨ੍ਨਿਟ੍ਠਾਨਨ੍ਤਿਕਂ ਹੋਤਿ. ਗਾਥਾਯਮ੍ਪਿ ‘‘ਦ੍ਵੇ ਪਲਿਬੋਧਾ ਅਪੁਬ੍ਬਂ ਅਚਰਿਮ’’ਨ੍ਤਿ ਇਦਂ ਇਮਮੇਵ ਸਨ੍ਧਾਯ. ‘‘ਆਸਾਵਚ੍ਛੇਦਿਕੋ ਕਥਂ ਅਨ੍ਤੋਸੀਮਾਯ? ਆਸੀਸਿਤੇਨ ‘ਤੁਮ੍ਹੇ ਵਿਹਾਰਮੇਵ ਪਤ੍ਥੇਥ, ਅਹਂ ਪਹਿਣਿਸ੍ਸਾਮੀ’ਤਿ ਵੁਤ੍ਤੋ ਪੁਬ੍ਬੇ ‘ਨ ਪਚ੍ਚੇਸ੍ਸ’ਨ੍ਤਿ ਆਵਾਸਪਲਿਬੋਧਂ ਛਿਨ੍ਦਿਤ੍ਵਾ ਗਤੋ ਪੁਨ ਤਂ ਵਿਹਾਰਂ ਗਨ੍ਤ੍ਵਾ ਤੇਨ ‘ਨਾਹਂ ਸਕ੍ਕੋਮਿ ਦਾਤੁ’ਨ੍ਤਿ ਪਹਿਤੋ ਹੋਤੀ’’ਤਿ ਲਿਖਿਤਂ. ‘‘ਅਤ੍ਥਾਰੇ ਹਿ ਸਤਿ ਉਦ੍ਧਾਰੋ ਨਾਮਾ’’ਤਿ ਅਤ੍ਥਾਰਂ ਵਿਨਾ ਉਦ੍ਧਾਰਂ ਨ ਲਭਨ੍ਤਿ, ਤਸ੍ਮਾ ਵੁਤ੍ਤਂ. ਪੁਰਿਮਾ ਦ੍ਵੇਤਿ ‘‘ਦ੍ਵੇ ਕਥਿਨੁਦ੍ਧਾਰਾ ਏਕੁਪ੍ਪਾਦਾ ਏਕਨਿਰੋਧਾ’’ਤਿ ਵੁਤ੍ਤਾਧਿਕਾਰੇ ਪਠਮਂ ਵੁਤ੍ਤਾ ਅਨ੍ਤਰਬ੍ਭਾਰਸਹੁਬ੍ਭਾਰਾ. ਨ ਪਕ੍ਕਮਨਨ੍ਤਿਕਾਦਯੋ ਦ੍ਵੇ. ਏਕਤੋ ਨਿਰੁਜ੍ਝਨ੍ਤੀਤਿ ਉਦ੍ਧਾਰਭਾਵਂ ਪਾਪੁਣਨ੍ਤੀਤਿ ਅਤ੍ਥੋ.

ਕਥਿਨਭੇਦਵਣ੍ਣਨਾ ਨਿਟ੍ਠਿਤਾ.

ਪਞ੍ਞਤ੍ਤਿਵਗ੍ਗਵਣ੍ਣਨਾ ਨਿਟ੍ਠਿਤਾ.