੭. ਸਂਵਿਧਾਨਸਿਕ੍ਖਾਪਦਵਣ੍ਣਨਾ

੧੮੧. ਤਾ ਭਿਕ੍ਖੁਨਿਯੋ ਦੂਸਯਿਂਸੂਤਿ ਵਿਪਰਿਣਾਮੋ ਕਾਤਬ੍ਬੋ.

੧੮੨-੪. ਸਮ੍ਪਦਨ੍ਤੀਤਿ ਪਦਸਾ ਗਚ੍ਛਨ੍ਤਿ. ਵੁਤ੍ਤਨਯੇਨੇਵਾਤਿ ‘‘ਸਮ੍ਪਤਨ੍ਤਿ ਏਤ੍ਥਾਤਿ ਸਮ੍ਪਾਤੋ’’ਤਿਆਦਿਨਾ. ਪਦਗਤੇ ਉਪਚਾਰੋ ਨ ਲਬ੍ਭਤਿ, ਅਚ੍ਚਾਸਨ੍ਨਤ੍ਤਾ ਮਿਸ੍ਸਂ ਵਿਯ ਹੋਤੀਤਿ. ਕੁਕ੍ਕੁਟਵਸ੍ਸਿਤਪਰਿਚ੍ਛਿਨ੍ਨੋ ਮਹਾਅਟ੍ਠਕਥਾਯਂ. ‘‘ਤਮ੍ਪਿ ਵੋਹਾਰੇਨਾ’’ਤਿ ਲਿਖਿਤਂ. ‘‘ਯੇਭੁਯ੍ਯੇਨ ਤਥਾ ਸਨ੍ਨਿਵੇਸੋ ਹੋਤੀਤਿ ਕਤ੍ਵਾ ਅਟ੍ਠਕਥਾਯਂ ਵੁਤ੍ਤਂ, ਤਸ੍ਮਾ ਨ ਪਮਾਦਲੇਖੋ’’ਤਿ ਚ, ‘‘ਉਕ੍ਕਟ੍ਠਪਰਿਚ੍ਛੇਦੇਨ ਵੁਤ੍ਤਂ ਅਟ੍ਠਕਥਾਯਂ, ਤਤੋ ਉਦ੍ਧਂ ਅਦ੍ਧਯੋਜਨਲਕ੍ਖਣਸਮ੍ਪਤ੍ਤਂ ਨਾਮ ਹੋਤੀਤਿ ਗਹੇਤਬ੍ਬ’’ਨ੍ਤਿ ਚ ਵੁਤ੍ਤਂ. ‘‘ਕਪ੍ਪਿਯਭੂਮਿ ਕਿਰਾਯਂ…ਪੇ… ਨ ਵਦਨ੍ਤੀ’’ਤਿ ਵੁਤ੍ਤਂ. ਦੁਦ੍ਦਸਞ੍ਹੇਤ੍ਥ ਕਾਰਣਂ. ਕਤਰਂ ਪਨ ਤਨ੍ਤਿ? ‘‘ਗਚ੍ਛਾਮਾਤਿ ਸਂਵਿਦਹਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਂ. ਤਤ੍ਥ ‘‘ਗਚ੍ਛਾਮਾ’’ਤਿ ਵਤ੍ਤਮਾਨਵਚਨਨ੍ਤਞ੍ਚ, ਅਮਗ੍ਗੇ ਭਿਕ੍ਖੁਨੁਪਸ੍ਸਯਾਦਿਮ੍ਹਿ ਨ ਸਮ੍ਭਵਤਿਯੇਵ ਮਨੁਸ੍ਸਾਨਂ ਅਨ੍ਤਰਘਰਾਦਿਮ੍ਹਿ ਮਗ੍ਗਸਙ੍ਖੇਪਗਮਨਤੋ, ਉਚ੍ਚਾਸਯਨਾਦਿਉਪ੍ਪਤ੍ਤਿਟ੍ਠਾਨਤ੍ਤਾ ਚ. ਨ ਤਿਤ੍ਥਿਯਸੇਯ੍ਯਾਯ ਵਾ ਪਬ੍ਬਜਿਤਾਵਾਸਤ੍ਤਾ. ਦ੍ਵਾਰੇਤਿ ਸਮੀਪਤ੍ਥੇ ਭੁਮ੍ਮਂ, ਤਸ੍ਮਾ ਤਂ ਦਸ੍ਸੇਤੁਂ ਪੁਨ ‘‘ਰਥਿਕਾਯਾ’’ਤਿ ਆਹ. ਸੇਸਅਟ੍ਠਕਥਾਯਂ ‘‘ਏਤ੍ਥਨ੍ਤਰੇ ਸਂਵਿਦਹਿਤੇਪਿ ਭਿਕ੍ਖੁਨੋ ਦੁਕ੍ਕਟ’’ਨ੍ਤਿ ਆਗਤਤ੍ਤਾ ਨ ਸਮੇਤਿ. ‘‘ਗਾਮਨ੍ਤਰੇ’’ਤਿ ਵਚਨਤੋ ਅਞ੍ਞਗਾਮਸ੍ਸ ਉਪਚਾਰੋਕ੍ਕਮਨੇ ਏਵ ਆਪਤ੍ਤਿ. ‘‘ਅਦ੍ਧਯੋਜਨੇ’’ਤਿ ਵਚਨਤੋ ਅਤਿਕ੍ਕਮਨੇਯੇਵ ਯੁਤ੍ਤਂ.

੧੮੫. ਰਟ੍ਠਭੇਦੇਤਿ ਵਿਲੋਪੇ. ਪੋਰਾਣਗਣ੍ਠਿਪਦੇ ‘‘ਤਯੋਪਿ ਸਙ੍ਕੇਤਾ ਕਾਲਦਿਵਸਮਗ੍ਗਵਸੇਨ, ਤਤ੍ਥ ਪਚ੍ਛਿਮੇਨੇਵ ਆਪਤ੍ਤੀ’’ਤਿ ਵੁਤ੍ਤਂ. ‘‘ਇਮਿਨਾ ਮਗ੍ਗੇਨਾ’’ਤਿ ਵਿਸ੍ਸਜ੍ਜੇਤ੍ਵਾ ਅਞ੍ਞੇਨ ਗਚ੍ਛਨ੍ਤਿ ਚੇ, ਆਪਤ੍ਤਿਯੇਵਾਤਿ ਅਤ੍ਥੋ.

ਸਂਵਿਧਾਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.