੩. ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਵਣ੍ਣਨਾ

੧੬੨. ‘‘ਏਕਰਤ੍ਤਮ੍ਪਿ ਵਸਨ੍ਤੀ’’ਤਿ (ਪਾਚਿ. ੧੬੧) ਵਚਨਤੋ ਯਤ੍ਥ ਰਤ੍ਤਿਯਂ ਨ ਵਸਨ੍ਤਿ, ਤਤ੍ਥ ਗਨ੍ਤ੍ਵਾ ਓਵਦਿਤੁਂ ਵਟ੍ਟਤੀਤਿ ਏਕੇ. ਯਦਿ ਏਵਂ ਸਙ੍ਕੇਤਟ੍ਠਾਨਂ ਗਨ੍ਤ੍ਵਾ ਓਵਦਿਤੁਂ ਵਟ੍ਟਤੀਤਿ ਸਿਦ੍ਧਂ. ‘‘ਤਤੋ ਅਦ੍ਧਯੋਜਨੇਯੇਵ ਸਭਿਕ੍ਖੁਕੋ ਆਵਾਸੋ ਇਚ੍ਛਿਤਬ੍ਬੋ’’ਤਿ ਨ ਵਤ੍ਤਬ੍ਬਂ. ਭਿਕ੍ਖੁਨੋਵਾਦਕੋ ਚੇ ਅਦ੍ਧਯੋਜਨਂ ਗਨ੍ਤ੍ਵਾ ਓਵਦਿਤੁਕਾਮੋ ਹੋਤਿ, ਭਿਕ੍ਖੁਨਿਸਙ੍ਘੋ ਚ ਅਦ੍ਧਯੋਜਨਂ ਗਨ੍ਤ੍ਵਾ ਸੋਤੁਕਾਮੋ, ‘‘ਵਟ੍ਟਤੀ’’ਤਿ ਵਤ੍ਤਬ੍ਬਂ ਸਿਯਾ, ਤਞ੍ਚ ਨ ਵੁਤ੍ਤਂ, ਤਸ੍ਮਾ ਨ ਵਟ੍ਟਤਿ. ਹੇਟ੍ਠਿਮਪਰਿਚ੍ਛੇਦੇਨ ਪਨ ‘‘ਏਕਰਤ੍ਤਮ੍ਪੀ’’ਤਿ ਵੁਤ੍ਤਂ. ਤਤੋ ਪਟ੍ਠਾਯ ਉਪਸ੍ਸਯਂ ਹੋਤਿ, ਨ ਉਪਸ੍ਸਯਸਙ੍ਖੇਪੇਨ ਕਤਮਤ੍ਤੇਨਾਤਿ ਵੁਤ੍ਤਂ ਹੋਤਿ. ਯਤ੍ਥ ਵਾਸੂਪਗਤਾ ਭਿਕ੍ਖੁਨਿਯੋ, ਸੋ ਉਪਸ੍ਸਯਸਙ੍ਖ੍ਯਂ ਗਚ੍ਛਤਿ, ਤਤ੍ਥ ਨ ਗਨ੍ਤ੍ਵਾ ਓਵਾਦੋ ਦਾਤਬ੍ਬੋ. ਏਕਾਵਾਸੇ ਦਿਵਾ ਵਟ੍ਟਤੀਤਿ ਏਕੇ, ਵਿਚਾਰੇਤ੍ਵਾ ਯੁਤ੍ਤਤਰਂ ਗਹੇਤਬ੍ਬਂ.

ਭਿਕ੍ਖੁਨੁਪਸ੍ਸਯਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.