੫. ਅਮਤਵਗ੍ਗੋ

੨. ਸਮੁਦਯਸੁਤ੍ਤਵਣ੍ਣਨਾ

੪੦੮. ਸਾਰਮ੍ਮਣਸਤਿਪਟ੍ਠਾਨਾਤਿ ਆਰਮ੍ਮਣਲਕ੍ਖਿਤਾ ਸਤਿਪਟ੍ਠਾਨਾ ਕਥਿਤਾ, ਨ ਸਤਿਲਕ੍ਖਣਾ.

੪. ਸਤਿਸੁਤ੍ਤਵਣ੍ਣਨਾ

੪੧੦. ਸੁਦ੍ਧਿਕਂ ਕਤ੍ਵਾ ਵਿਸੁਂ ਵਿਸੁਂ ਕਤ੍ਵਾ. ਤਥਾ ਚ ਵੁਤ੍ਤਂ ਪਾਲ਼ਿਯਂ ‘‘ਕਾਯੇ ਵਾ ਭਿਕ੍ਖੂ’’ਤਿ.

੬. ਪਾਤਿਮੋਕ੍ਖਸਂਵਰਸੁਤ੍ਤਵਣ੍ਣਨਾ

੪੧੨. ਜੇਟ੍ਠਕਸੀਲਨ੍ਤਿ ਪਧਾਨਕਸੀਲਂ. ਸੀਲਗ੍ਗਹਣਞ੍ਹਿ ਪਾਲ਼ਿਯਂ ਪਾਤਿਮੋਕ੍ਖਸਂਵਰਵਸੇਨੇਵ ਆਗਤਂ. ਤੇਨਾਹ ‘‘ਤਿਪਿਟਕਚੂਲ਼ਨਾਗਤ੍ਥੇਰੋ ਪਨਾ’’ਤਿਆਦਿ. ਤਤ੍ਥ ਪਾਤਿਮੋਕ੍ਖਸਂਵਰੋਵ ਸੀਲਨ੍ਤਿ ਅਵਧਾਰਣਂ ਇਤਰੇਸਂ ਤਿਣ੍ਣਂ ਏਕਦੇਸੇਨ ਪਾਤਿਮੋਕ੍ਖਨ੍ਤੋਗਧਭਾਵਂ ਦੀਪੇਤਿ. ਤਥਾ ਹਿ ਅਨੋਲੋਕਿਯੋਲੋਕਨੇ ਆਜੀਵਹੇਤੁ ਚ ਛਸਿਕ੍ਖਾਪਦਵੀਤਿਕ੍ਕਮਨੇ ਗਿਲਾਨਪਚ੍ਚਯਸ੍ਸ ਅਪ੍ਪਚ੍ਚਵੇਕ੍ਖਿਤਪਰਿਭੋਗੇ ਚ ਆਪਤ੍ਤਿ ਵਿਹਿਤਾਤਿ. ਤੀਣੀਤਿ ਇਨ੍ਦ੍ਰਿਯਸਂਵਰਾਦੀਨਿ. ਸੀਲਨ੍ਤਿ ਵੁਤ੍ਤਟ੍ਠਾਨਂ ਨਾਮ ਨਤ੍ਥੀਤਿ ਸੀਲਪਰਿਯਾਯੇਨ ਤੇਸਂ ਕਤ੍ਥਚਿ ਸੁਤ੍ਤੇ ਗਹਿਤਟ੍ਠਾਨਂ ਨਾਮ ਨਤ੍ਥੀਤਿ ਨਿਪ੍ਪਰਿਯਾਯਸੀਲਤਂ ਤੇਸਂ ਪਟਿਕ੍ਖਿਪਤਿ. ਛਦ੍ਵਾਰਰਕ੍ਖਣਮਤ੍ਤਮੇਵਾਤਿ ਤਸ੍ਸ ਸਲ੍ਲਹੁਕਤਮਾਹ ਚਿਤ੍ਤਾਧਿਟ੍ਠਾਨਮਤ੍ਤੇਨ ਪਟਿਪਾਕਤਿਕਭਾਵਪ੍ਪਤ੍ਤਿਤੋ. ਇਤਰਦ੍ਵਯੇਪਿ ਏਸੇਵ ਨਯੋ. ਪਚ੍ਚਯੁਪ੍ਪਤ੍ਤਿਮਤ੍ਤਕਨ੍ਤਿ ਫਲੇਨ ਹੇਤੁਂ ਦਸ੍ਸੇਤਿ. ਉਪ੍ਪਾਦਨਹੇਤੁਕਾ ਹਿ ਪਚ੍ਚਯਾਨਂ ਉਪ੍ਪਤ੍ਤਿ. ਇਦਮਤ੍ਥਨ੍ਤਿ ਇਦਂ ਪਯੋਜਨਂ ਇਮਸ੍ਸ ਪਚ੍ਚਯਸ੍ਸ ਪਰਿਭੁਞ੍ਜਨੇਤਿ ਅਧਿਪ੍ਪਾਯੋ. ਨਿਪ੍ਪਰਿਯਾਯੇਨਾਤਿ ਇਮਿਨਾ ਇਨ੍ਦ੍ਰਿਯਸਂਵਰਾਦੀਨਿ ਤੀਣਿ ਪਧਾਨਸੀਲਸ੍ਸ ਪਰਿਪਾਲਨਪਰਿਸੋਧਨਵਸੇਨ ਪਵਤ੍ਤਿਯਾ ਪਰਿਯਾਯਸੀਲਾਨਿ ਨਾਮਾਤਿ ਦਸ੍ਸੇਤਿ. ਇਦਾਨਿ ਪਾਤਿਮੋਕ੍ਖਸੀਲਸ੍ਸੇਵ ਪਧਾਨਭਾਵਂ ਬ੍ਯਤਿਰੇਕਤੋ ਅਨ੍ਵਯਤੋ ਚ ਉਪਮਾਯ ਵਿਭਾਵੇਤੁਂ ‘‘ਯਸ੍ਸਾ’’ਤਿਆਦਿਮਾਹ. ਤਤ੍ਥ ਸੋਤਿ ਪਾਤਿਮੋਕ੍ਖਸਂਵਰੋ. ਸੇਸਾਨਿ ਇਨ੍ਦ੍ਰਿਯਸਂਵਰਾਦੀਨਿ. ਪਾਤਿਮੋਕ੍ਖਸਦ੍ਦਸ੍ਸ ਅਤ੍ਥੋ ਪਨ ਵਿਸੁਦ੍ਧਿਮਗ੍ਗਸਂਵਣ੍ਣਨਾਦੀਸੁ ਵਿਤ੍ਥਾਰਿਤੋ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਆਚਾਰੇਨ ਚ ਗੋਚਰੇਨ ਚ ਸਮ੍ਪਨ੍ਨੋਤਿ ਕਾਯਿਕਚੇਤਸਿਕਅਵੀਤਿਕ੍ਕਮਸਙ੍ਖਾਤੇਨ ਆਚਾਰੇਨ ਚ ਨਵੇਸਿਯਾਦਿਗੋਚਰਤਾਦਿਸਙ੍ਖਾਤੇਨ ਗੋਚਰੇਨ ਚ ਸਮ੍ਪਨ੍ਨੋ, ਸਮ੍ਪਨ੍ਨਆਚਾਰਗੋਚਰੋਤਿ ਅਤ੍ਥੋ. ਅਪ੍ਪਮਤ੍ਤਕੇਸੂਤਿ ਅਤਿਪਰਿਤ੍ਤਕੇਸੁ ਅਨਾਪਤ੍ਤਿਗਮਨੀਯੇਸੁ. ‘‘ਦੁਕ੍ਕਟਦੁਬ੍ਭਾਸਿਤਮਤ੍ਤੇਸੂ’’ਤਿ ਅਪਰੇ. ਵਜ੍ਜੇਸੂਤਿ ਅਕਰਣੀਯੇਸੁ ਗਾਰਯ੍ਹੇਸੁ. ਤੇ ਪਨ ਏਕਨ੍ਤਤੋ ਅਕੁਸਲਾ ਹੋਨ੍ਤੀਤਿ ਆਹ – ‘‘ਅਕੁਸਲਧਮ੍ਮੇਸੂ’’ਤਿ. ਭਯਦਸ੍ਸਾਵੀਤਿ ਭਯਤੋ ਦਸ੍ਸਨਸੀਲੋ, ਪਰਮਾਣੁਮਤ੍ਤਮ੍ਪਿ ਵਜ੍ਜਂ ਸਿਨੇਰੁਪ੍ਪਮਾਣਂ ਵਿਯ ਕਤ੍ਵਾ ਦਸ੍ਸਨਸੀਲੋ. ਸਮ੍ਮਾ ਆਦਿਯਿਤ੍ਵਾਤਿ ਸਮ੍ਮਦੇਵ ਸਕ੍ਕਚ੍ਚਂ ਸਬ੍ਬਸੋ ਚ ਆਦਿਯਿਤ੍ਵਾ. ਸਿਕ੍ਖਾਪਦੇਸੂਤਿ ਨਿਦ੍ਧਾਰਣੇ ਭੁਮ੍ਮਨ੍ਤਿ ਸਮੁਦਾਯਤੋ ਅਵਯਵਨਿਦ੍ਧਾਰਣਂ ਦਸ੍ਸੇਨ੍ਤੋ ‘‘ਸਿਕ੍ਖਾਪਦੇਸੁ ਤਂ ਤਂ ਸਿਕ੍ਖਾਪਦ’’ਨ੍ਤਿਆਦਿਮਾਹ. ਸਿਕ੍ਖਾਪਦਂ ਸਮਾਦਾਤਬ੍ਬਂ ਸਿਕ੍ਖਿਤਬ੍ਬਞ੍ਚਾਤਿ ਅਧਿਪ੍ਪਾਯੋ. ਸਿਕ੍ਖਾਤਿ ਅਧਿਸੀਲਸਿਕ੍ਖਾ. ਪੁਬ੍ਬੇ ਪਦ-ਸਦ੍ਦੋ ਅਧਿਟ੍ਠਾਨਟ੍ਠੋ, ਇਧ ਭਾਗਤ੍ਥੋਤਿ ਦਟ੍ਠਬ੍ਬਨ੍ਤਿ ਆਹ – ‘‘ਸਿਕ੍ਖਾਕੋਟ੍ਠਾਸੇਸੂ’’ਤਿ. ਮੂਲਪਞ੍ਞਤ੍ਤਿਅਨੁਪਞ੍ਞਤ੍ਤਿਆਦਿਭੇਦਂ ਯਂਕਿਞ੍ਚਿ ਸਿਕ੍ਖਿਤਬ੍ਬਂ ਪੂਰੇਤਬ੍ਬਂ ਸੀਲਂ, ਤਂ ਪਨ ਦ੍ਵਾਰਵਸੇਨ ਦੁਵਿਧਮੇਵਾਤਿ ਆਹ – ‘‘ਕਾਯਿਕਂ ਵਾ ਵਾਚਸਿਕਂ ਵਾ’’ਤਿ. ਇਮਸ੍ਮਿਂ ਅਤ੍ਥਵਿਕਪ੍ਪੇ ਸਿਕ੍ਖਾਪਦੇਸੂਤਿ ਆਧਾਰੇ ਭੁਮ੍ਮਂ ਸਿਕ੍ਖਾਭਾਗੇਸੁ ਕਸ੍ਸਚਿ ਵਿਸੁਂ ਅਗ੍ਗਹਣਤੋ. ਤੇਨਾਹ – ‘‘ਤਂ ਤਂ ਸਬ੍ਬ’’ਨ੍ਤਿ. ‘‘ਤਤੋ ਤ੍ਵਂ ਭਿਕ੍ਖੁ ਸੀਲਂ ਨਿਸ੍ਸਾਯਾ’’ਤਿ ਵਚਨਤੋ ਅਨਭਿਜ੍ਝਾ ਅਬ੍ਯਾਪਾਦਸਮ੍ਮਾਦਿਟ੍ਠਿਯੋਪਿ ਸੀਲਨ੍ਤਿ ਵੁਤ੍ਤਾ, ਤਸ੍ਮਾ ਇਮਸ੍ਮਿਂ ਸੁਤ੍ਤੇ ‘‘ਪਾਤਿਮੋਕ੍ਖਸਂਵਰਸੀਲਮੇਵ ਕਥਿਤ’’ਨ੍ਤਿ ਵੁਤ੍ਤਂ.

੭. ਦੁਚ੍ਚਰਿਤਸੁਤ੍ਤਵਣ੍ਣਨਾ

੪੧੩. ਏਤ੍ਥਾਪਿ ਮਨੋਸੁਚਰਿਤਂ ਸੀਲਂ ਨਾਮਾਤਿ ਦਸ੍ਸੇਤੀਤਿ ਕਤ੍ਵਾ ਵੁਤ੍ਤਂ ‘‘ਪਚ੍ਛਿਮਾਪਿ ਤਯੋ’’ਤਿ. ਅਨਭਿਜ੍ਝਾਅਬ੍ਯਾਪਾਦਸਮ੍ਮਾਦਿਟ੍ਠਿਧਮ੍ਮਾ ਸੀਲਂ ਹੋਤੀਤਿ ਵੇਦਿਤਬ੍ਬਾ ਕਾਯਵਚੀਸੁਚਰਿਤੇਹਿ ਸਦ੍ਧਿਂ ਮਨੋਸੁਚਰਿਤਮ੍ਪਿ ਵਤ੍ਵਾ ‘‘ਤਤੋ ਤ੍ਵਂ ਭਿਕ੍ਖੁ ਸੀਲਂ ਨਿਸ੍ਸਾਯ ਸੀਲੇ ਪਤਿਟ੍ਠਾਯਾ’’ਤਿ ਵੁਤ੍ਤਤ੍ਤਾ. ਸੇਸਂ ਵੁਤ੍ਤਨਯਮੇਵ. ਛਟ੍ਠਸਤ੍ਤਮੇਸੂਤਿ ਛਟ੍ਠਸਤ੍ਤਮਵਗ੍ਗੇਸੁ ਅਪੁਬ੍ਬਂ ਨਤ੍ਥਿ. ਤੇਨ ਵੁਤ੍ਤਂ ‘‘ਹੇਟ੍ਠਾ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ’’ਤਿ. ਵਗ੍ਗਪੇਯ੍ਯਾਲਤੋ ਪਨ ਇਮਸ੍ਮਿਂ ਸਤਿਪਟ੍ਠਾਨਸਂਯੁਤ੍ਤੇ ਕਤਿਪਯਵਗ੍ਗਾ ਸਙ੍ਗਹਂ ਆਰੂਲ਼੍ਹਾ, ਤਥਾਪਿ ਤੇਸਂ ਅਤ੍ਥਵਿਸੇਸਾਭਾਵਤੋ ਏਕਚ੍ਚੇਸੁ ਪੋਤ੍ਥਕੇਸੁ ਮੁਖਮਤ੍ਤਂ ਦਸ੍ਸੇਤ੍ਵਾ ਸਂਖਿਤ੍ਤਾ, ਏਕਚ੍ਚੇਸੁ ਅਤਿਸਂਖਿਤ੍ਤਾਵ, ਤੇ ਸਙ੍ਖੇਪਵਸੇਨ ਦ੍ਵੇ ਕਤ੍ਵਾ ‘‘ਛਟ੍ਠਸਤ੍ਤਮੇਸੂ’’ਤਿ ਵੁਤ੍ਤਂ.

ਅਮਤਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਤਿਪਟ੍ਠਾਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.