੬. ਸਕੁਣਗ੍ਘਿਸੁਤ੍ਤਵਣ੍ਣਨਾ

੩੭੨. ਪਾਕਤਿਕਸਕੁਣਕੁਲੇਸੁ ਬਲਵਭਾਵਤੋ ਤੇਸਂ ਹਨਨਤੋ ਸਕੁਣਗ੍ਘਿ. ਸੇਨੋਤਿ ਵੁਤ੍ਤਂ ‘‘ਸੇਨਸ੍ਸੇਤਂ ਅਧਿਵਚਨ’’ਨ੍ਤਿ, ਸੇਨਵਿਸੇਸੋ ਪਨ ਸੋ ਵੇਦਿਤਬ੍ਬੋ. ਆਮਿਸਤ੍ਥਾਯ ਪਤ੍ਤਤ੍ਤਾ ‘‘ਲੋਭਸਾਹਸੇਨ ਪਤ੍ਤਾ’’ਤਿ ਵੁਤ੍ਤਂ, ਲੋਭਨਿਮਿਤ੍ਤੇਨ ਸਾਹਸਾਕਾਰੇਨ ਪਤ੍ਤਾਤਿ ਅਤ੍ਥੋ. ਨਙ੍ਗਲੇਨ ਕਟ੍ਠਂ ਕਸਿਤਂ ਨਙ੍ਗਲਕਟ੍ਠਂ, ਤਂ ਕਰੀਯਤਿ ਏਤ੍ਥਾਤਿ ਨਙ੍ਗਲਕਟ੍ਠਕਰਣਨ੍ਤਿ ਆਹ – ‘‘ਅਧੁਨਾ ਕਟ੍ਠਂ ਖੇਤ੍ਤਟ੍ਠਾਨ’’ਨ੍ਤਿ. ਲੇਡ੍ਡੁਯੋ ਤਿਟ੍ਠਨ੍ਤਿ ਏਤ੍ਥਾਤਿ ਲੇਡ੍ਡੁਟ੍ਠਾਨਂ, ਲੇਡ੍ਡੁਨਿਮਿਤ੍ਤਂ ਕਸਿਤਟ੍ਠਾਨਂ. ਵਜ੍ਜਤੀਤਿ ਵਦਂ, ਵਚਨਂ. ਕੁਚ੍ਛਿਤਂ ਵਦਂ ਅਵਦਂ. ਗਰਹਨੇ ਹਿ ਅਯਂ ਅ-ਕਾਰੋ ਯਥਾ – ‘‘ਅਪੁਤ੍ਤੋ ਅਭਰਿਯਾ’’ਤਿ. ਅਵਦਂ ਮਾਨੇਤੀਤਿ ਅਵਦਮਾਨਾ, ਅਤ੍ਤਨੋ ਬਲਮਦੇਨ ਲਾਪਂ ਅਤਿਮਞ੍ਞਿਤ੍ਵਾ ਵਦਨ੍ਤੀਤਿ ਅਤ੍ਥੋ. ਤੇਨੇਵਾਹ ‘‘ਗਚ੍ਛ ਖੋ, ਤ੍ਵਂ ਲਾਪ, ਤਤ੍ਰਪਿ ਮੇ ਗਨ੍ਤ੍ਵਾ ਨ ਮੋਕ੍ਖਸੀ’’ਤਿ. ਯਂ ਪਨ ਅਟ੍ਠਕਥਾਯਂ ਵੁਤ੍ਤਂ ‘‘ਅਤ੍ਤਨੋ ਬਲਸ੍ਸ ਸੁਟ੍ਠੁ ਵਣ੍ਣਂ ਵਦਮਾਨਾ’’ਤਿ, ਤਤ੍ਥ ਅਤ੍ਤਤੋ ਆਪਨ੍ਨਂ ਗਹੇਤ੍ਵਾ ਵੁਤ੍ਤਂ. ‘‘ਵਦਮਾਨੋ’’ਤਿ ਵਾ ਪਾਠੋ, ਸਾਰਮ੍ਭਵਸੇਨ ਅਵ੍ਹਾਯਨ੍ਤੋਤਿ ਅਤ੍ਥੋ. ਤੇਨਾਹ ‘‘ਏਹਿ ਖੋ ਦਾਨਿ ਸਕੁਣਗ੍ਘੀ’’ਤਿ. ਸੁਟ੍ਠੁ ਠਪੇਤ੍ਵਾਤਿ ਜਿਯਾਮੁਤ੍ਤਸਰਸ੍ਸ ਵਿਯ ਸੀਘਪਾਤਯੋਗ੍ਯਤਾਕਰਣੇਨ ਉਭੋ ਪਕ੍ਖੇ ਸਮ੍ਮਾ ਠਪੇਤ੍ਵਾ. ਅਯਨ੍ਤਿ ਸਕੁਣਗ੍ਘਿ. ਞਤ੍ਵਾਤਿ ਯਥਾਭੂਤਦਸ੍ਸਨੇਨ ਅਤ੍ਤਨੋ ਞਾਣੇਨ ਜਾਨਿਤ੍ਵਾ. ਫਾਲੀਯਿਤ੍ਥਾਤਿ ਫਾਲਚ੍ਛੇਦਤਿਖਿਣਸਿਖਰੇ ਸੁਕ੍ਖਲੇਡ੍ਡੁਸ੍ਮਿਂ ਭਿਜ੍ਜਿਤ੍ਥ.