੮. ਆਵਰਣਨੀਵਰਣਸੁਤ੍ਤਵਣ੍ਣਨਾ

੨੧੯. ਪਞ੍ਞਾ ਦੁਬ੍ਬਲਾ ਹੋਤਿ, ਨ ਬਲਵਤੀ ਪਟਿਪਕ੍ਖੇਨ ਉਪਕ੍ਕਿਲਿਟ੍ਠਭਾਵਤੋ. ਤੇਨਾਹ ‘‘ਮਨ੍ਦਾ ਅਵਿਸਦਾ’’ਤਿ.

ਪਞ੍ਚ ਨੀਵਰਣਾ ਦੂਰੇ ਹੋਨ੍ਤਿ ਆਵਰਣਾਭਾਵਤੋ. ਤਮੇਵ ਪੀਤਿਨ੍ਤਿ ਸਪ੍ਪਾਯਧਮ੍ਮਸਵਨੇ ਉਪ੍ਪਨ੍ਨਂ ਪੀਤਿਂ. ਤਸ੍ਸਾ ਤਦਾ ਉਪ੍ਪਨ੍ਨਾਕਾਰਸਲ੍ਲਕ੍ਖਣੇਨ ਅਵਿਜਹਨ੍ਤੋ ਪੁਨਪ੍ਪੁਨਂ ਤਸ੍ਸਾ ਨਿਬ੍ਬਤ੍ਤਨੇਨ. ਤੇਨਾਹ ‘‘ਪਞ੍ਚ ਨੀਵਰਣੇ ਵਿਕ੍ਖਮ੍ਭੇਤ੍ਵਾ’’ਤਿ. ਇਦਂ ਸਨ੍ਧਾਯਾਤਿ ਏਤ੍ਤਕੇ ਦਿਵਸੇਪਿ ਨ ਵਿਨਸ੍ਸਨ੍ਤਿ, ਸਾ ਧਮ੍ਮਪੀਤਿ ਲਦ੍ਧਪਚ੍ਚਯਾ ਹੁਤ੍ਵਾ ਵਿਸੇਸਾਵਹਾਤਿ ਇਮਮਤ੍ਥਂ ਸਨ੍ਧਾਯ ਏਤਂ ‘‘ਇਮਸ੍ਸ ਪਞ੍ਚ ਨੀਵਰਣਾ ਤਸ੍ਮਿਂ ਸਮਯੇ ਨ ਹੋਨ੍ਤੀ’’ਤਿਆਦਿ ਵੁਤ੍ਤਂ. ਪੀਤਿਪਾਮੋਜ੍ਜਪਕ੍ਖਿਯਾਤਿ ਪੀਤਿਪਾਮੋਜ੍ਜਪਚ੍ਚਯਾ. ਨਸ੍ਸਨ੍ਤੀਤਿ ਨਿਰੋਧਪਚ੍ਚਯਵਸੇਨ ਪਵਤ੍ਤਨਤੋ ਨਸ੍ਸਨ੍ਤਿ. ਸਭਾਗਪਚ੍ਚਯਵਸੇਨ ਪੁਨ ਉਪ੍ਪਜ੍ਜਨ੍ਤਾਪਿ…ਪੇ… ਵੁਚ੍ਚਤਿ ਕਿਚ੍ਚਸਾਧਨਵਸੇਨ ਪਵਤ੍ਤਨਤੋ.