੨. ਬ੍ਰਹ੍ਮਚਰਿਯੋਗਧਸੁਤ੍ਤਵਣ੍ਣਨਾ

੯੯੮. ਯੇਸਨ੍ਤਿ ਅਨਿਯਮਤੋ ਸਦ੍ਧਾਦੀਨਮਾਧਾਰਭੂਤਪੁਗ੍ਗਲਦਸ੍ਸਨਂ. ਬੁਦ੍ਧੇ ਪਸਾਦੋ ਗਹਿਤੋ. ਸੋ ਹਿ ਇਤਰੇਹਿ ਪਠਮਂ ਗਹੇਤਬ੍ਬੋਤਿ. ਅਰਿਯਕਨ੍ਤਾਨਿ ਸੀਲਾਨਿ ਗਹਿਤਾਨਿ ਸੋਤਾਪਨ੍ਨਸ੍ਸ ਸੀਲਾਨਂ ਅਧਿਪ੍ਪੇਤਤ੍ਤਾ. ਸਙ੍ਘੇ ਪਸਾਦੋ ਗਹਿਤੋ ਧਮ੍ਮਪ੍ਪਸਾਦਸ੍ਸ ਅਨਨ੍ਤਰਂ ਵੁਚ੍ਚਮਾਨਤ੍ਤਾ. ਧਮ੍ਮੇ ਪਸਾਦੋ ਗਹਿਤੋ ਅਵੇਚ੍ਚਪ੍ਪਸਾਦਭਾਵਤੋ. ਸੋਤਂ ਅਰਿਯਮਗ੍ਗਂ ਆਦਿਤੋ ਪਤ੍ਤਿ ਸੋਤਾਪਤ੍ਤਿ, ਤਸ੍ਸਾ ਅਙ੍ਗਾਨਿ ਸੋਤਾਪਤ੍ਤਿਯਙ੍ਗਾਨਿ. ਪਚ੍ਚੇਨ੍ਤੀਤਿ ਪਜਾਯਨ੍ਤਿ ਅਧਿਗਚ੍ਛਨ੍ਤਿ. ਤੇਨਾਹ ‘‘ਪਾਪੁਣਨ੍ਤੀ’’ਤਿ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਕਤਰਪਸਾਦੋ ਵਤ੍ਤਮਾਨੋਤਿ ਅਧਿਪ੍ਪਾਯੋ. ਮਗ੍ਗਪ੍ਪਸਾਦੋਤਿ ਮਗ੍ਗਸਮ੍ਪਯੁਤ੍ਤੋ ਪਸਾਦੋ. ਆਗਤਮਗ੍ਗਸ੍ਸਾਤਿ ਅਧਿਗਤਮਗ੍ਗਸ੍ਸ. ਮਿਸ੍ਸਕਪ੍ਪਸਾਦੋ ਏਸੋਤਿ ਤਸ੍ਮਾ ਉਭੋਪਿ ਥੇਰਾ ਪਣ੍ਡਿਤਾ ਬਹੁਸ੍ਸੁਤਾ.