੧੧. ਸੋਤਾਪਤ੍ਤਿਸਂਯੁਤ੍ਤਂ
੧. ਵੇਲ਼ੁਦ੍ਵਾਰਵਗ੍ਗੋ
੧. ਚਕ੍ਕਵਤ੍ਤਿਰਾਜਸੁਤ੍ਤਵਣ੍ਣਨਾ
੯੯੭. ਅਨੁਗ੍ਗਹਗਰਹਣੇਸੁ ਨਿਪਾਤੋਤਿ ਅਨੁਗ੍ਗਣ੍ਹਨਗਰਹਤ੍ਥਜੋਤਕੋ ਨਿਪਾਤੋ. ਕਿਮੇਤ੍ਥ ਅਨੁਗ੍ਗਣ੍ਹਾਤਿ, ਕਿਂ ਵਾ ਗਰਹਤੀਤਿ ਆਹ ‘‘ਚਤੁਨ੍ਨ’’ਨ੍ਤਿਆਦਿ. ਤਤ੍ਥ ਅਨੁਗ੍ਗਣ੍ਹਨ੍ਤੋ ਅਨੁਚ੍ਛਵਿਕਂ ਕਤ੍ਵਾ ਗਣ੍ਹਨ੍ਤੋ. ਗਰਹਨ੍ਤੋ ਨਿਨ੍ਦਨ੍ਤੋ. ਇਸ੍ਸਰਸੀਲੋ ਇਸ੍ਸਰੋ, ਤਸ੍ਸ ਭਾਵੋ ਇਸ੍ਸਰਿਯਂ, ਪਭੁਤਾ. ਅਧੀਨਂ ਪਤਿ ਅਧਿਪਤਿ, ਤਸ੍ਸ ਭਾਵੋ ਆਧਿਪਚ੍ਚਂ, ਸਾਮਿਭਾਵੋਤਿ ਆਹ – ‘‘ਇਸ੍ਸਰਿਯਾਧਿਪਚ੍ਚ’’ਨ੍ਤਿਆਦਿ. ਅਨਨ੍ਤਕਾਨੀਤਿ ਅਨ੍ਤਰਹਿਤਾਨਿ.
ਅਵੇਚ੍ਚਪ੍ਪਸਾਦੇਨਾਤਿ ਵਤ੍ਥੁਤ੍ਤਯਸ੍ਸ ਗੁਣੇ ਯਾਥਾਵਤੋ ਅਵੇਚ੍ਚ ਪਵਿਸਿਤ੍ਵਾ ਪਸਾਦੋ. ਸੋ ਪਨ ਕੇਨਚਿ ਚਲਨਰਹਿਤੋਤਿ ਆਹ ‘‘ਅਚਲਪ੍ਪਸਾਦੇਨਾ’’ਤਿ. ਮਗ੍ਗੇਨਾਤਿ ਅਰਿਯਮਗ੍ਗੇਨ. ਆਗਤਪ੍ਪਸਾਦੋ ਤਸ੍ਸ ਅਧਿਗਮੇਨ ਲਦ੍ਧਪ੍ਪਸਾਦੋ. ਅਪੁਬ੍ਬਂ ਅਚਰਿਮਨ੍ਤਿ ਏਕਜ੍ਝਂ. ਅਰਿਯਸਾਵਕਾਨਞ੍ਹਿ ਅਰਿਯਮਗ੍ਗੋ ਉਪ੍ਪਜ੍ਜਨ੍ਤੋਵ ਤੀਸੁ ਵਤ੍ਥੂਸੁ ਅਵੇਚ੍ਚਪ੍ਪਸਾਦਂ ਆਵਹਨ੍ਤੋ ਏਵ ਉਪ੍ਪਜ੍ਜਤਿ. ਤੇਸਨ੍ਤਿ ਵਿਸਯਭੂਤਾਨਂ ਤਿਣ੍ਣਂ ਵਤ੍ਥੂਨਂ ਵਸੇਨ ਤਿਧਾ ਵੁਤ੍ਤੋ. ਯਸ੍ਮਾ ਚ ਅਤ੍ਥਤੋ ਏਕੋ, ਤਸ੍ਮਾਵ ਨਿਨ੍ਨਾਨਾਕਰਣੋ ਹੋਤਿ ਪਵਤ੍ਤਟ੍ਠਾਨਭੇਦੇ ਸਤਿਪਿ. ਅਰਿਯਸਾਵਕਸ੍ਸ ਹੀਤਿਆਦਿਨਾ ਨਯੇਨ ਤਮਤ੍ਥਂ ਵਿਵਰਤਿ. ਪਸਾਦੋ ਓਕਪ੍ਪਨਾ. ਪੇਮਂ ਭਤ੍ਤਿ. ਗਾਰਵਂ ਗਰੁਕਰਣਂ. ਮਹਨ੍ਤਂ ਉਲ਼ਾਰਂ. ਏਤਂ ਵਿਭਾਗੇਨ ਨਤ੍ਥਿ ਸਬ੍ਬਤ੍ਥ ਸਮਾਨਤ੍ਤਾ.
ਏਵਨ੍ਤਿ ਭਵਨ੍ਤਰੇਪਿ ਅਕੋਪਨੀਯਤਾਯ. ਸਦਿਸਵਸੇਨਾਤਿ ਅਞ੍ਞੇਹਿ ਅਖਣ੍ਡਾਦੀਹਿ ਸਦਿਸਵਸੇਨ. ਤੇਨਾਹ ‘‘ਮੁਖਵਟ੍ਟਿ ਯਞ੍ਹਿ ਛਿਨ੍ਨੇ’’ਤਿਆਦਿ. ਖਣ੍ਡਾ ਏਤਿਸ੍ਸਾ ਅਤ੍ਥੀਤਿ ਖਣ੍ਡਾ. ਏਸ ਨਯੋ ਸੇਸੇਸੁਪਿ. ਪਾਤਿਮੋਕ੍ਖੇ ਆਗਤਾਨੁਕ੍ਕਮੇਨ ਸੀਲਸ੍ਸ ਆਦਿਮਜ੍ਝਵਿਭਾਗੋ ਵੇਦਿਤਬ੍ਬੋ. ਦ੍ਵਿਨ੍ਨਂ ਵਾ ਤਿਣ੍ਣਂ ਵਾਤਿ ਸੀਲਕੋਟ੍ਠਾਸਾਨਂ. ਏਕਨ੍ਤਰਂ ਭਿਨ੍ਨਨ੍ਤਿ ਅਭਿਨ੍ਨੇਨ ਏਕਨ੍ਤਰਂ ਹੁਤ੍ਵਾ ਭਿਨ੍ਨਂ. ਤੇਸਂ ਖਣ੍ਡਾਦੀਨਂ. ‘‘ਭੁਜਿਸ੍ਸੇਹੀ’’ਤਿ ਉਤ੍ਤਰਪਦਲੋਪੇਨ ਨਿਦ੍ਦੇਸੋਤਿ ਆਹ ‘‘ਭੁਜਿਸ੍ਸਭਾਵਕਰੇਹੀ’’ਤਿ. ਇਦਂ ਵੀਤਿਕ੍ਕਨ੍ਤਨ੍ਤਿ ਇਦਮ੍ਪਿ ਸੀਲਂ ਵੀਤਿਕ੍ਕਨ੍ਤਂ. ‘‘ਅਯਂ ਸੀਲਸ੍ਸ ਵੀਤਿਕ੍ਕਮੋ’’ਤਿ ਏਵਂ ਪਰਾਮਸਿਤੁਂ ਅਸਕ੍ਕੁਣੇਯ੍ਯੇਹਿ.
੨. ਬ੍ਰਹ੍ਮਚਰਿਯੋਗਧਸੁਤ੍ਤਵਣ੍ਣਨਾ
੯੯੮. ਯੇਸਨ੍ਤਿ ਅਨਿਯਮਤੋ ਸਦ੍ਧਾਦੀਨਮਾਧਾਰਭੂਤਪੁਗ੍ਗਲਦਸ੍ਸਨਂ. ਬੁਦ੍ਧੇ ਪਸਾਦੋ ਗਹਿਤੋ. ਸੋ ਹਿ ਇਤਰੇਹਿ ਪਠਮਂ ਗਹੇਤਬ੍ਬੋਤਿ. ਅਰਿਯਕਨ੍ਤਾਨਿ ਸੀਲਾਨਿ ਗਹਿਤਾਨਿ ਸੋਤਾਪਨ੍ਨਸ੍ਸ ਸੀਲਾਨਂ ਅਧਿਪ੍ਪੇਤਤ੍ਤਾ. ਸਙ੍ਘੇ ਪਸਾਦੋ ਗਹਿਤੋ ਧਮ੍ਮਪ੍ਪਸਾਦਸ੍ਸ ਅਨਨ੍ਤਰਂ ਵੁਚ੍ਚਮਾਨਤ੍ਤਾ. ਧਮ੍ਮੇ ਪਸਾਦੋ ਗਹਿਤੋ ਅਵੇਚ੍ਚਪ੍ਪਸਾਦਭਾਵਤੋ. ਸੋਤਂ ਅਰਿਯਮਗ੍ਗਂ ਆਦਿਤੋ ਪਤ੍ਤਿ ਸੋਤਾਪਤ੍ਤਿ, ਤਸ੍ਸਾ ਅਙ੍ਗਾਨਿ ਸੋਤਾਪਤ੍ਤਿਯਙ੍ਗਾਨਿ. ਪਚ੍ਚੇਨ੍ਤੀਤਿ ਪਜਾਯਨ੍ਤਿ ਅਧਿਗਚ੍ਛਨ੍ਤਿ. ਤੇਨਾਹ ‘‘ਪਾਪੁਣਨ੍ਤੀ’’ਤਿ. ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ. ਕਤਰਪਸਾਦੋ ਵਤ੍ਤਮਾਨੋਤਿ ਅਧਿਪ੍ਪਾਯੋ. ਮਗ੍ਗਪ੍ਪਸਾਦੋਤਿ ਮਗ੍ਗਸਮ੍ਪਯੁਤ੍ਤੋ ਪਸਾਦੋ. ਆਗਤਮਗ੍ਗਸ੍ਸਾਤਿ ਅਧਿਗਤਮਗ੍ਗਸ੍ਸ. ਮਿਸ੍ਸਕਪ੍ਪਸਾਦੋ ਏਸੋਤਿ ਤਸ੍ਮਾ ਉਭੋਪਿ ਥੇਰਾ ਪਣ੍ਡਿਤਾ ਬਹੁਸ੍ਸੁਤਾ.
੩. ਦੀਘਾਵੁਉਪਾਸਕਸੁਤ੍ਤਵਣ੍ਣਨਾ
੯੯੯. ਯਦਗ੍ਗੇਨ ਤਸ੍ਮਿਂ ਉਪਾਸਕੇ ਯਥਾਵੁਤ੍ਤਾਨਿ ਸੋਤਾਪਤ੍ਤਿਯਙ੍ਗਾਨਿ ਸਂਵਿਜ੍ਜਨ੍ਤਿ, ਤਦਗ੍ਗੇਨ ਸੋ ਤੇਸੁ ਵਤ੍ਤਿਸ੍ਸਤੀਤਿ ਆਹ ‘‘ਚਤੂਸੁ ਸੋਤਾਪਤ੍ਤਿਯਙ੍ਗੇਸੁ ਸਨ੍ਦਿਸ੍ਸਸੀ’’ਤਿ. ਵਿਜ੍ਜਂ ਭਜਨ੍ਤੀਤਿ ਵਿਜ੍ਜਾਭਾਗਿਯਾ, ਤੇਸੁ ਕੋਟ੍ਠਾਸੇਸੁ ਪਰਿਯਾਪਨ੍ਨਾਤਿ ਵੁਤ੍ਤਂ ‘‘ਵਿਜ੍ਜਾਭਾਗਿਯੇਤਿ ਵਿਜ੍ਜਾਕੋਟ੍ਠਾਸਿਕੇ’’ਤਿ.
੪-੫. ਪਠਮਸਾਰਿਪੁਤ੍ਤਸੁਤ੍ਤਾਦਿਵਣ੍ਣਨਾ
੧੦੦੦-੧੦੦੧. ‘‘ਸੋਤਾਪਤ੍ਤੀ’’ਤਿ ਪਠਮਮਗ੍ਗੋ ਅਧਿਪ੍ਪੇਤੋ, ਤਸ੍ਸ ਅਧਿਗਮੂਪਾਯੋ ਸੋਤਾਪਤ੍ਤਿਯਙ੍ਗਂ. ਤੇਨਾਹ ‘‘ਸੋਤਾਪਤ੍ਤਿਯਾ ਪੁਬ੍ਬਭਾਗਪਟਿਲਾਭਙ੍ਗ’’ਨ੍ਤਿ. ਸੋਤਾਪਤ੍ਤਿਅਤ੍ਥਾਯਾਤਿ ਸੋਤਾਪਤ੍ਤਿਮਗ੍ਗਤ੍ਥਾਯ. ਅਙ੍ਗਨ੍ਤਿ ਕਾਰਣਂ. ਇਤਰੇ ਰਤਨਤ੍ਤਯਪ੍ਪਸਾਦਾਦਯੋ. ਪੁਬ੍ਬਭਾਗਿਯਾਯ ਸੋਤਾਪਤ੍ਤਿਯਾ ਅਙ੍ਗਂ ਕਾਰਣਨ੍ਤਿ.
੬. ਥਪਤਿਸੁਤ੍ਤਵਣ੍ਣਨਾ
੧੦੦੨. (ਵਿਤਾਨਂ ਕਾਯਾਨਂ ਕਾਲਨਕਾਯ, ਕਾਰਣਸ੍ਸ ਉਪਗਤਾਨਂ ਸਾਤਪਰਿਯਾ ਸਿਜ੍ਝਤਿ. ਤਤ੍ਥ ਕਾਯਪਰਿਪਜ੍ਝਾਯਮੁਖੇਨ ਤਨ੍ਤਿਂ ਠਪੇਸਿ ਭਗਵਾ. ਨ ਹਿ ਪਸ੍ਸਥ ਨਮਤ੍ਥੇਹਿ ਕਰਣੇ ਨਿਰਤ੍ਥਕੋ ਪਿਤਿ ਵਤ੍ਤਤਿ. ‘‘ਨਿਯਤਤ੍ਤਾ’’ਤਿ ਵੁਤ੍ਤਂ. ਤਮੇਵ ਨਿਯਮਂ ‘‘ਮਜ੍ਝਿਮਪਦੇਸੇਯੇਵਾ’’ਤਿ ਅਵਧਾਰਣੇਨ ਵਿਭਾਵੇਤਿ. ਮਹਾਮਣ੍ਡਲਚਾਰਿਕਂ ਚਰਨ੍ਤੋਪਿ ਮਜ੍ਝਿਮਪਦੇਸਸ੍ਸ ਅਨ੍ਤਨ੍ਤੇਨੇਵ ਚਰਤਿ. ਤਤ੍ਥ ਚ ਵਿਨੇਯ੍ਯਜਨਸ੍ਸ ਸਮੋਸਰਣਤਾ ਮਤ੍ਤਪਨਵਾਚਮਹਤ੍ਥਸੁਪਨਨ੍ਤਿ.) [ਏਤ੍ਥਨ੍ਤਰੇ ਪਾਠੋ ਅਸੁਦ੍ਧੋ ਦੁਸ੍ਸੋਧਨੀਯੋ ਚ, ਸੁਦ੍ਧਪਾਠੋ ਗਵੇਸਿਤਬ੍ਬੋ.] ਅਰੁਣੁਟ੍ਠਾਪਨਮ੍ਪਿ ਤਤ੍ਥੇਵ ਹੋਤਿ. ਪਚ੍ਚਨ੍ਤਪਦੇਸੇ ਪਨ ਦੂਰੇ ਵਿਨੇਯ੍ਯਜਨਾ ਹੋਨ੍ਤਿ, ਤਤ੍ਥ ਗਨ੍ਤ੍ਵਾ ਮਗ੍ਗਫਲੇਸੁ ਪਤਿਟ੍ਠਾਪੇਤ੍ਵਾ ਤਤੋ ਪਚ੍ਚਾਗਨ੍ਤ੍ਵਾ ਮਜ੍ਝਿਮਪਦੇਸੇ ਏਵ ਵਾਸਂ ਉਪਗਚ੍ਛਤਿ, ਤਤ੍ਥ ਮਨੁਸ੍ਸੇਹਿ ਕਤਾਨਂ ਕਾਰਾਨਂ ਮਹਪ੍ਫਲਭਾਵਨਿਯਮਨਤ੍ਥਨ੍ਤਿ ਦਟ੍ਠਬ੍ਬਂ. ‘‘ਆਸਨ੍ਨੇ ਨੋ ਭਗਵਾ’’ਤਿ ਇਦਂ ਨਿਦਸ੍ਸਨਮਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਨ ਕੇਵਲ’’ਨ੍ਤਿ ਆਦਿਮਾਹ.
ਸਕਿਞ੍ਚਨਸਪਲਿਬੋਧਨਟ੍ਠੇਨਾਤਿ ਏਤ੍ਥ ਕਿਞ੍ਚਨਂ ਪਲਿਬੋਧੋ ਅਸਮਾਪਿਤਕਿਚ੍ਚਤਾ, ਤਦੁਭਯਸ੍ਸ ਅਤ੍ਥਿਭਾਵੇਨਾਤਿ ਅਤ੍ਥੋ. ਮਹਾਵਾਸੇਤਿ ਮਹਾਗੇਹੇ.
ਦ੍ਵੇਪਿ ਜਨਾਤਿ ਇਸਿਦਤ੍ਤਪੁਰਾਣਾ. ਸਿਤਂ ਨਾਮ ਮਨ੍ਦਹਸਿਤਂ. ਹਸਿਤਂ ਨਾਮ ਵਿਸ੍ਸਟ੍ਠਹਸਿਤਂ. ਮੁਤ੍ਤਚਾਗੋਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗਟੀਕਾਯਂ (ਵਿਸੁਦ੍ਧਿ. ਮਹਾਟੀ. ੧.੧੬੦) ਵੁਤ੍ਤਨਯੇਨ ਵੇਦਿਤਬ੍ਬਂ. ਸਂਵਿਭਾਗੇਤਿ ਪਰਸ੍ਸ ਦਾਨਵਸੇਨ ਸਂਵਿਭਜਨੇ. ਅਕਤਵਿਭਾਗਨ੍ਤਿ ਦੇਯ੍ਯਧਮ੍ਮਵਸੇਨ ਨ ਕਤਵਿਭਾਗਂ. ਪੁਗ੍ਗਲਵਸੇਨ ਪਨ ‘‘ਸੀਲਵਨ੍ਤੇਹੀ’’ਤਿ ਵੁਤ੍ਤਤ੍ਤਾ ਕਤਵਿਭਾਗਮੇਵ ਮਹਪ੍ਫਲਤਾਕਰਣੇਨ. ਤੇਨਾਹ ‘‘ਸਬ੍ਬਂ ਦਾਤਬ੍ਬਮੇਵ ਹੁਤ੍ਵਾ ਠਿਤ’’ਨ੍ਤਿ.
(ਏਤ੍ਥਨ੍ਤਰੇ ਪਾਠੋ ਅਸੁਦ੍ਧੋ ਦੁਸ੍ਸੋਧਨੀਯੋ ਚ, ਸੁਦ੍ਧਪਾਠੋ ਗਵੇਸਿਤਬ੍ਬੋ.)
੭. ਵੇਲ਼ੁਦ੍ਵਾਰੇਯ੍ਯਸੁਤ੍ਤਵਣ੍ਣਨਾ
੧੦੦੩. ਪਵੇਣਿਆਗਤਸ੍ਸਾਤਿ ਅਨੇਕਪੁਰਿਸਯੁਗਵਸੇਨ ਪਰਮ੍ਪਰਾਗਤਸ੍ਸ. ਅਤ੍ਤਨਿ ਉਪਨੇਤਬ੍ਬਨ੍ਤਿ ਅਤ੍ਤਨਿ ਨੇਤ੍ਵਾ ਪਰਸ੍ਮਿਂ ਉਪਨੇਤਬ੍ਬਂ. ਤੇਨਾਹ ‘‘ਯੋ ਖੋ ਮ੍ਯਾਯਂ ਧਮ੍ਮੋ ਅਪ੍ਪਿਯੋ ਅਮਨਾਪੋ, ਪਰਸ੍ਸਪੇਸੋ ਧਮ੍ਮੋ ਅਪ੍ਪਿਯੋ ਅਮਨਾਪੋ’’ਤਿਆਦਿ. ਅਮਨ੍ਤਭਾਸੇਨਾਤਿ ਸਮ੍ਫਸ੍ਸ ਸਮ੍ਫਪ੍ਪਲਾਪਸ੍ਸ ਅਮਨ੍ਤਾਯ ਮਨ੍ਤਾਰਹਿਤਭਾਸਨੇਨ.
੮-੯. ਪਠਮਗਿਞ੍ਜਕਾਵਸਥਸੁਤ੍ਤਾਦਿਵਣ੍ਣਨਾ
੧੦੦੪-੫. ਦ੍ਵੇ ਗਾਮਾ ਦ੍ਵਿਨ੍ਨਂ ਞਾਤੀਨਂ ਗਾਮਾਤਿ ਕਤ੍ਵਾ. ਞਾਤਿਕੇਤਿ ਏਵਂਲਦ੍ਧਨਾਮੇ ਏਕਸ੍ਮਿਂ ਗਾਮਕੇ. ਗਿਞ੍ਜਕਾਵਸਥੇਤਿ ਗਿਞ੍ਜਕਾ ਵੁਚ੍ਚਨ੍ਤਿ ਇਟ੍ਠਕਾ, ਗਿਞ੍ਜਕਾਹਿ ਏਵ ਕਤੋ ਆਵਸਥੋ, ਤਸ੍ਮਿਂ. ਸੋ ਕਿਰ ਆਵਾਸੋ ਯਥਾ ਸੁਧਾਹਿ ਪਰਿਕਮ੍ਮੇਨ ਪਯੋਜਨਂ ਨਤ੍ਥਿ, ਏਵਂ ਇਟ੍ਠਕਾਹਿ ਏਵ ਚਿਨਿਤ੍ਵਾ ਕਤੋ. ਤੇਨ ਵੁਤ੍ਤਂ ‘‘ਇਟ੍ਠਕਾਮਯੇ ਆਵਸਥੇ’’ਤਿ. ਤੁਲਾਥਮ੍ਭਦ੍ਵਾਰਬਨ੍ਧਕਵਾਟਫਲਕਾਨਿ ਪਨ ਦਾਰੁਮਯਾ ਏਵ. ਓਰਂ ਵੁਚ੍ਚਤਿ ਕਾਮਧਾਤੁ, ਪਚ੍ਚਯਭਾਵੇਨ ਤਂ ਓਰਂ ਭਜਨ੍ਤੀਤਿ ਓਰਮ੍ਭਾਗਿਯਾਨਿ, ਓਰਮ੍ਭਾਗਸ੍ਸ ਵਾ ਹਿਤਾਨਿ ਓਰਮ੍ਭਾਗਿਯਾਨਿ. ਤੇਨਾਹ ‘‘ਹੇਟ੍ਠਾਭਾਗਿਯਾਨ’’ਨ੍ਤਿਆਦਿ. ਤੀਹਿ ਮਗ੍ਗੇਹੀਤਿ ਹੇਟ੍ਠਿਮੇਹਿ ਤੀਹਿ ਮਗ੍ਗੇਹਿ. ਤੇਹਿ ਪਹਾਤਬ੍ਬਤਾਯ ਹਿ ਤੇਸਂ ਸਞ੍ਞੋਜਨਾਨਂ ਓਰਮ੍ਭਾਗਿਯਤਾ, ਓਰਂ ਭਞ੍ਜਿਯਾਨਿ ਵਾ ਓਰਮ੍ਭਾਗਿਯਾਨਿ ਵੁਤ੍ਤਾਨਿ ਨਿਰੁਤ੍ਤਿਨਯੇਨ. ਇਦਾਨਿ ਬ੍ਯਤਿਰੇਕਮੁਖੇਨ ਨੇਸਂ ਓਰਮ੍ਭਾਗਿਯਭਾਵਂ ਵਿਭਾਵੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਵਿਕ੍ਖਮ੍ਭਿਤਾਨਿ ਸਮਤ੍ਥਤਾਵਿਘਾਤੇਨ ਪੁਥੁਜ੍ਜਨਾਨਂ, ਸਮੁਚ੍ਛਿਨ੍ਨਾਨਿ ਸਬ੍ਬਸੋ ਅਭਾਵੇਨ ਅਰਿਯਾਨਂ ਰੂਪਾਰੂਪਭਵੂਪਪਤ੍ਤਿਯਾ ਵਿਬਨ੍ਧਨਾਯ ਨ ਹੋਨ੍ਤੀਤਿ ਵੁਤ੍ਤਂ ‘‘ਅਵਿਕ੍ਖਮ੍ਭਿਤਾਨਿ ਮਗ੍ਗੇਨ ਵਾ ਅਸਮੁਚ੍ਛਿਨ੍ਨਾਨੀ’’ਤਿ. ਨਿਬ੍ਬਤ੍ਤਿਵਸੇਨਾਤਿ ਪਟਿਸਨ੍ਧਿਗ੍ਗਹਣਵਸੇਨ ਗਨ੍ਤੁਂ ਨ ਦੇਨ੍ਤਿ. ਮਹਗ੍ਗਤਭਵਗਾਮਿਕਮ੍ਮਾਯੂਹਨਸ੍ਸ ਵਿਬਨ੍ਧਨਤੋ ਸਕ੍ਕਾਯਦਿਟ੍ਠਿਆਦੀਨਿ ਤੀਣਿ ਸਞ੍ਞੋਜਨਾਨਿ ਕਾਮਚ੍ਛਨ੍ਦਬ੍ਯਾਪਾਦਾ ਵਿਯ ਮਹਗ੍ਗਤਭਵੂਪਪਤ੍ਤਿਯਾ ਵਿਸੇਸਪਚ੍ਚਯਤ੍ਤਾ ਤਤ੍ਥ ਮਹਗ੍ਗਤਭਵੇ ਨਿਬ੍ਬਤ੍ਤਮ੍ਪਿ ਤਨ੍ਨਿਬ੍ਬਤ੍ਤਿਹੇਤੁਕਮ੍ਮਪਰਿਕ੍ਖਯੇ ਕਾਮਭਵੂਪਪਤ੍ਤਿਪਚ੍ਚਯਤਾਯ ਮਹਗ੍ਗਤਭਵਤੋ ਆਨੇਤ੍ਵਾ ਇਧੇਵ ਕਾਮਭਵੇ ਏਵ ਨਿਬ੍ਬਤ੍ਤਾਪੇਨ੍ਤਿ. ਤਸ੍ਮਾ ਸਬ੍ਬਾਨਿਪਿ ਪਞ੍ਚਪਿ ਸਂਯੋਜਨਾਨਿ ਓਰਮ੍ਭਾਗਿਯਾਨੇਵ. ਪਟਿਸਨ੍ਧਿਵਸੇਨ ਅਨਾਗਮਨਸਭਾਵੋਤਿ ਪਟਿਸਨ੍ਧਿਗ੍ਗਹਣਵਸੇਨ ਤਸ੍ਮਾ ਲੋਕਾ ਇਧ ਨ ਆਗਮਨਸਭਾਵੋ. ਬੁਦ੍ਧਦਸ੍ਸਨ-ਥੇਰਦਸ੍ਸਨ-ਧਮ੍ਮਸ੍ਸਵਨਾਨਂ ਪਨ ਅਤ੍ਥਾਯ ਅਸ੍ਸ ਆਗਮਨਂ ਅਨਿਵਾਰਿਤਂ.
ਕਦਾਚਿ ਉਪ੍ਪਤ੍ਤਿਯਾ ਵਿਰਲ਼ਾਕਾਰਤਾ, ਪਰਿਯੁਟ੍ਠਾਨਮਨ੍ਦਤਾਯ ਅਬਹਲਤਾਤਿ ਦ੍ਵੇਧਾਪਿ ਤਨੁਭਾਵੋ. ਅਭਿਣ੍ਹਨ੍ਤਿ ਬਹੁਸੋ. ਬਹਲਬਹਲਾਤਿ ਤਿਬ੍ਬਤਿਬ੍ਬਾ. ਯਤ੍ਥ ਉਪ੍ਪਜ੍ਜਨ੍ਤਿ, ਤਂ ਸਨ੍ਤਾਨਂ ਮਦ੍ਦਨ੍ਤਾ ਫਰਨ੍ਤਾ ਸਾਧੇਨ੍ਤਾ ਅਨ੍ਧਕਾਰਂ ਕਰੋਨ੍ਤਾ ਉਪ੍ਪਜ੍ਜਨ੍ਤਿ, ਦ੍ਵੀਹਿ ਪਨ ਮਗ੍ਗੇਹਿ ਪਹੀਨਤ੍ਤਾ ਤਨੁਕਤਨੁਕਾ ਮਨ੍ਦਮਨ੍ਦਾ ਉਪ੍ਪਜ੍ਜਨ੍ਤਿ. ਪੁਤ੍ਤਧੀਤਰੋ ਹੋਨ੍ਤੀਤਿ ਇਦਂ ਅਕਾਰਣਂ. ਤਥਾ ਹਿ ਅਙ੍ਗਪਚ੍ਚਙ੍ਗਪਰਾਮਸਨਮਤ੍ਤੇਨਪਿ ਤੇ ਹੋਨ੍ਤਿ. ਇਦਨ੍ਤਿ ‘‘ਰਾਗਦੋਸਮੋਹਾਨਂ ਤਨੁਤ੍ਤਾ’’ਤਿ ਇਦਂ ਵਚਨਂ. ਭਵਤਨੁਕਵਸੇਨਾਤਿ ਅਪ੍ਪਕਭਵਵਸੇਨ. ਤਨ੍ਤਿ ਮਹਾਸੀਵਤ੍ਥੇਰਸ੍ਸ ਵਚਨਂ ਪਟਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਯੇ ਭਵਾ ਅਰਿਯਾਨਂ ਲਬ੍ਭਨ੍ਤਿ, ਤੇ ਪਰਿਪੁਣ੍ਣਲਕ੍ਖਣਭਵਾ ਏਵ. ਯੇ ਨ ਲਬ੍ਭਨ੍ਤਿ, ਤਤ੍ਥ ਕੀਦਿਸਂ ਤਂ ਭਵਤਨੁਕਂ. ਤਸ੍ਮਾ ਉਭਯਥਾਪਿ ਭਵਤਨੁਕਸ੍ਸ ਅਸਮ੍ਭਵੋ ਏਵਾਤਿ ਦਸ੍ਸੇਤੁਂ ‘‘ਸੋਤਾਪਨ੍ਨਸ੍ਸਾ’’ਤਿਆਦਿ ਵੁਤ੍ਤਂ. ਅਟ੍ਠਮੇ ਭਵੇ ਭਵਤਨੁਕਂ ਨਤ੍ਥਿ ਅਟ੍ਠਮਸ੍ਸੇਵ ਭਵਸ੍ਸ ਸਬ੍ਬਸ੍ਸੇਵ ਅਭਾਵਤੋ. ਸੇਸੇਸੁਪਿ ਏਸੇਵ ਨਯੋ.
ਕਾਮਾਵਚਰਲੋਕਂ ਸਨ੍ਧਾਯ ਵੁਤ੍ਤਂ ਇਤਰਸ੍ਸ ਲੋਕਸ੍ਸ ਵਸੇਨ ਤਥਾ ਵਤ੍ਤੁਂ ਅਸਕ੍ਕੁਣੇਯ੍ਯਤ੍ਤਾ. ਯੋ ਹਿ ਸਕਦਾਗਾਮੀ ਦੇਵਮਨੁਸ੍ਸਲੋਕੇਸੁ ਵੋਮਿਸ੍ਸਕਵਸੇਨ ਨਿਬ੍ਬਤ੍ਤਤਿ, ਸੋਪਿ ਕਾਮਭਵਵਸੇਨੇਵ ਪਰਿਚ੍ਛਿਨ੍ਦਿਤਬ੍ਬੋ. ਭਗਵਤਾ ਚ ਕਾਮਲੋਕੇ ਠਤ੍ਵਾ – ‘‘ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ’’ਤਿ ਵੁਤ੍ਤਂ. ਇਮਂ ਲੋਕਂ ਆਗਨ੍ਤ੍ਵਾਤਿ ਚ ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਹਿ ਇਧ ਸਕਦਾਗਾਮਿਫਲਂ ਪਤ੍ਵਾ ਇਧੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤਿ, ਇਮੇ ਚਤ੍ਤਾਰੋ ਇਧ ਨ ਲਬ੍ਭਨ੍ਤਿ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਯਾਵਤਾਯੁਕਂ ਵਸਿਤ੍ਵਾ ਪੁਨ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਯਤਿ, ਅਯਮਿਧ ਅਧਿਪ੍ਪੇਤੋ. ਅਟ੍ਠਕਥਾਯਂ ਪਨ ‘‘ਇਮਂ ਲੋਕਨ੍ਤਿ ਕਾਮਭਵੋ ਅਧਿਪ੍ਪੇਤੋ’’ਤਿ ਇਮਮਤ੍ਥਂ ਵਿਭਾਵੇਤੁਂ ‘‘ਸਚੇ ਹੀ’’ਤਿਆਦਿਨਾ ਅਞ੍ਞਂਯੇਵ ਚਤੁਕ੍ਕਂ ਦਸ੍ਸਿਤਂ.
ਚਤੂਸੁ…ਪੇ… ਸਭਾਵੋਤਿ ਅਤ੍ਥੋ ਅਪਾਯਗਮਨੀਯਾਨਂ ਪਾਪਧਮ੍ਮਾਨਂ ਸਬ੍ਬਸੋ ਪਹੀਨਤ੍ਤਾ. ਧਮ੍ਮਨਿਯਾਮੇਨਾਤਿ ਮਗ੍ਗਧਮ੍ਮਨਿਯਾਮੇਨ ਨਿਯਤੋ ਉਪਰਿਮਗ੍ਗਾਧਿਗਮਸ੍ਸ ਅਵਸ੍ਸਂਭਾਵਿਭਾਵਤੋ. ਤੇਨਾਹ ‘‘ਸਮ੍ਬੋਧਿਪਰਾਯਣੋ’’ਤਿ. ਤੇਸਂ ਤੇਸਂ ਞਾਣਗਤਿਨ੍ਤਿ ਤੇਸਂ ਤੇਸਂ ਸਤ੍ਤਾਨਂ ‘‘ਅਸੁਕੋ ਸੋਤਾਪਨ੍ਨੋ, ਅਸੁਕੋ ਸਕਦਾਗਾਮੀ’’ਤਿਆਦਿਨਾ ਤਂਤਂਞਾਣਾਧਿਗਮਨਂ ਞਾਣੂਪਪਤ੍ਤਿਂ. ਞਾਣਾਭਿਸਮ੍ਪਰਾਯਨ੍ਤਿ ਤਤੋ ਪਰਮ੍ਪਿ – ‘‘ਨਿਯਤੋ ਸਮ੍ਬੋਧਿਪਰਾਯਣੋ ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀ’’ਤਿਆਦਿਨਾ ਞਾਣਸਹਿਤਂ ਉਪਪਤ੍ਤਿਪਚ੍ਚਯਭਵਂ. ਓਲੋਕੇਨ੍ਤਸ੍ਸ ਞਾਣਚਕ੍ਖੁਨਾ ਅਪੇਕ੍ਖਨ੍ਤਸ੍ਸ. ਕੇਵਲਂ ਕਾਯਕਿਲਮਥੋਵ, ਨ ਤੇਨ ਕਾਚਿ ਪਰੇਸਂ ਅਤ੍ਥਸਿਦ੍ਧੀਤਿ ਅਧਿਪ੍ਪਾਯੋ. ਚਿਤ੍ਤਵਿਹੇਸਾ ਚਿਤ੍ਤਖੇਦੋ, ਸਾ ਕਿਲੇਸੂਪਸਂਹਿਤਤ੍ਤਾ ਬੁਦ੍ਧਾਨਂ ਨਤ੍ਥਿ.
ਆਦਿਸ੍ਸਤਿ ਆਲੋਕੀਯਤਿ ਅਤ੍ਤਾ ਏਤੇਨਾਤਿ ਆਦਾਸਂ, ਧਮ੍ਮਭੂਤਂ ਆਦਾਸਂ ਧਮ੍ਮਾਦਾਸਂ, ਅਰਿਯਮਗ੍ਗਞਾਣਸ੍ਸੇਤਂ ਅਧਿਵਚਨਂ. ਤੇਨ ਹਿ ਅਰਿਯਸਾਵਕੋ ਚਤੂਸੁ ਅਰਿਯਸਚ੍ਚੇਸੁ ਵਿਦ੍ਧਸ੍ਤਸਮ੍ਮੋਹਤ੍ਤਾ ਅਤ੍ਤਾਨਂ ਯਾਥਾਵਤੋ ਞਤ੍ਵਾ ਯਾਥਾਵਤੋ ਬ੍ਯਾਕਰੇਯ੍ਯ, ਤਪ੍ਪਕਾਸਨਤੋ ਪਨ ਧਮ੍ਮਪਰਿਯਾਯਸ੍ਸ ਸੁਤ੍ਤਸ੍ਸ ਧਮ੍ਮਾਦਾਸਤਾ ਵੇਦਿਤਬ੍ਬਾਤਿ. ਯੇਨ ਧਮ੍ਮਾਦਾਸੇਨਾਤਿ ਇਧ ਪਨ ਮਗ੍ਗਧਮ੍ਮਮੇਵ ਵਦਤਿ. ਸੇਸਂ ਉਤ੍ਤਾਨਤ੍ਥਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ.
ਵੇਲ਼ੁਦ੍ਵਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਰਾਜਕਾਰਾਮਵਗ੍ਗੋ
੧. ਸਹਸ੍ਸਭਿਕ੍ਖੁਨਿਸਙ੍ਘਸੁਤ੍ਤਵਣ੍ਣਨਾ
੧੦੦੭. ਧਮ੍ਮਿਕਤ੍ਤਾ ਦੇਸਵਾਸੀਹਿ ਅਨੁਕਮ੍ਪਿਤੋ ਰਾਜਾਤਿ ਰਾਜਕੋ, ਤਸ੍ਸ ਆਰਾਮੋ ਰਾਜਕਾਰਾਮੋ, ਤਸ੍ਮਿਂ. ਭੂਮਿਸੀਸਂ ਸੇਟ੍ਠਪ੍ਪਦੇਸੋ, ਯਤ੍ਥ ਵਸਨ੍ਤੋ ਲਾਭਗ੍ਗਯਸਗ੍ਗਪ੍ਪਤ੍ਤੋ ਹੋਤੀਤਿ ਤੇਸਂ ਅਧਿਪ੍ਪਾਯੋ.
ਵਾਰਾਪੇਹੀਤਿ ਪਟਿਸੇਧੇਹਿ. ਯੁਜ੍ਝਾਪੇਤੁਨ੍ਤਿ ਕਲਹਂ ਕਾਰਾਪੇਤੁਂ. ਪੁਨ ਆਗਚ੍ਛਨ੍ਤਾਤਿ ਅਪਰਸ੍ਮਿਂ ਸਂਵਚ੍ਛਰੇ ਆਗਚ੍ਛਨ੍ਤਾ. ਉਬ੍ਬਟ੍ਟੇਤ੍ਵਾਤਿ ਮਹਤੀ ਵੀਚਿਯੋ ਉਬ੍ਬਟ੍ਟੇਤ੍ਵਾ. ਯਥਾ ਤਸ੍ਸ ਸਕਲਮੇਵ ਰਟ੍ਠਂ ਏਕੋਦਕੀਭੂਤਂ ਹੋਤਿ, ਏਵਂ ਕਤ੍ਵਾ ਸਮੁਦ੍ਦਮੇਵ ਜਾਤਂ. ਤੇਨ ਵੁਤ੍ਤਂ ‘‘ਸਮੁਦ੍ਦਮੇਵ ਅਕਂਸੂ’’ਤਿ.
ਇਸੀਨਮਨ੍ਤਰਂ ਕਤ੍ਵਾਤਿ ਇਸੀਨਂ ਕਾਰਣਂ ਕਤ੍ਵਾ, ਇਸੀਨਂ ਹੇਤੂਤਿ ਅਤ੍ਥੋ, ਇਸੀਨਂ ਵਾ ਅਨ੍ਤਰਭੇਦਂ ਕਤ੍ਵਾ. ਤਥਾ ਲੋਕੇ ਕੋਲਾਹਲਸ੍ਸ ਪਤ੍ਥਟਤਂ ਵਿਭਾਵੇਨ੍ਤੋ ਭਗਵਾ ‘‘ਮੇ ਸੁਤ’’ਨ੍ਤਿ ਆਹ ਪਚ੍ਚਕ੍ਖਤੋ ਜਾਨਮ੍ਪਿ. ਉਚ੍ਛਿਨ੍ਨੋਤਿ ਕੁਲਚ੍ਛੇਦੇਨ ਉਚ੍ਛਿਨ੍ਨੋ. ਨ ਕੇਵਲਂ ਸਯਮੇਵ, ਅਥ ਖੋ ਸਹ ਰਟ੍ਠੇਹਿ. ਵਿਭਵਨ੍ਤਿ ਵਿਨਾਸਂ ਉਪਗਤੋ.
ਤਂ ਸਨ੍ਧਾਯੇਤਂ ਵੁਤ੍ਤਨ੍ਤਿ ਤਂ ਯਥਾਵੁਤ੍ਤਂ ਪਸੇਨਦਿਨਾ ਕੋਸਲਰਾਜੇਨ ਕਾਰਿਤਂ ਵਿਹਾਰਂ ਸਨ੍ਧਾਯ ਏਤਂ ‘‘ਰਾਜਕਾਰਾਮੇ’’ਤਿ ਵੁਤ੍ਤਂ.
੨-੩. ਬ੍ਰਾਹ੍ਮਣਸੁਤ੍ਤਾਦਿਵਣ੍ਣਨਾ
੧੦੦੮-੯. ਉਦਯਗਾਮਿਨਿਨ੍ਤਿ ਆਰਮ੍ਭਤੋ ਪਟ੍ਠਾਯ ਸਮ੍ਪਤ੍ਤਿਆਵਹਂ.
੪. ਦੁਗ੍ਗਤਿਭਯਸੁਤ੍ਤਵਣ੍ਣਨਾ
੧੦੧੦. ਦੁਟ੍ਠਾ ਗਤਿ ਨਿਪ੍ਫਤ੍ਤਿ ਦੁਗ੍ਗਤਿ, ਦੁਗ੍ਗਤਭਾਵੋ ਦਾਲਿਦ੍ਦਿਯਂ, ਤਦੇਵ ਭਯਂ, ਤਂ ਸਬ੍ਬਂ ਅਨਵਸੇਸਂ ਵਾ ਦੁਗ੍ਗਤਿਭਯਂ ਦਲਿਦ੍ਦਭਯਂ. ਸਮ੍ਮਦੇਵ ਅਤਿਕ੍ਕਨ੍ਤੋਤਿ ਸਮਤਿਕ੍ਕਨ੍ਤੋ.
੬. ਪਠਮਮਿਤ੍ਤਾਮਚ੍ਚਸੁਤ੍ਤਵਣ੍ਣਨਾ
੧੦੧੨. ਵੋਹਾਰਮਿਤ੍ਤਾਤਿ ਤਂਤਂਦਾਨਗ੍ਗਹਣਵਸੇਨ ਵੋਹਾਰਕਾ ਮਿਤ੍ਤਾ. ਆਮਨ੍ਤਨਪਟਿਮਨ੍ਤਨਇਰਿਯਾਪਥਾਦੀਸੁਪੀਤਿ ਆਲਾਪਸਲ੍ਲਾਪਗਮਨਨਿਸਜ੍ਜਾਦਿਅਤ੍ਥਸਂਵਿਧਾਨਾਦੀਸੁ. ਏਕਤੋ ਪਵਤ੍ਤਕਿਚ੍ਚਾਤਿ ਸਹ ਪਵਤ੍ਤਕਤ੍ਤਬ੍ਬਾ. ਅਮਾ ਸਹ ਭਵਨ੍ਤੀਤਿ ਅਮਚ੍ਚਾ. ‘‘ਅਮ੍ਹਾਕਂ ਇਮੇ’’ਤਿ ਞਾਯਨ੍ਤੀਤਿ ਞਾਤੀ, ਆਵਾਹਵਿਵਾਹਸਮ੍ਬਦ੍ਧਾ. ਤੇਨਾਹ ‘‘ਸਸ੍ਸੁਸਸੁਰਪਕ੍ਖਿਕਾ’’ਤਿ. ਯੋਨਿਸਮ੍ਬਨ੍ਧਾ ਵਾ ਸਾਲੋਹਿਤਾ. ਤੇਨਾਹ ‘‘ਭਾਤਿਭਗਿਨਿਮਾਤੁਲਾਦਯੋ’’ਤਿ.
੭. ਦੁਤਿਯਮਿਤ੍ਤਾਮਚ੍ਚਸੁਤ੍ਤਵਣ੍ਣਨਾ
੧੦੧੩. ਕਿਸ੍ਮਿਞ੍ਚਿ ਕਸ੍ਸਚਿ ਚ ਤਥਾ ਤਥਾ ਉਪ੍ਪਨ੍ਨਸ੍ਸ ਪਸਾਦਸ੍ਸ ਅਞ੍ਞਥਾਭਾਵੋ ਪਸਾਦਞ੍ਞਥਤ੍ਤਂ. ਭੂਤਸਙ੍ਘਾਤਸ੍ਸ ਘਨਆਦਿਕਸ੍ਸ ਅਞ੍ਞਥਾਭਾਵੋ ਭਾਵਞ੍ਞਥਤ੍ਤਂ. ਨਿਰਯਾਦਿਗਤਿਅਨ੍ਤਰਉਪਪਤ੍ਤਿ ਗਤਿਅਞ੍ਞਥਤ੍ਤਂ. ਸਭਾਵਧਮ੍ਮਾਨਂ ਕਕ੍ਖਲ਼ਫੁਸਨਾਦਿਲਕ੍ਖਣਸ੍ਸ ਅਞ੍ਞਥਾਭਾਵੋ ਲਕ੍ਖਣਞ੍ਞਥਤ੍ਤਂ. ‘‘ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤੀ’’ਤਿ ਏਵਂ ਵੁਤ੍ਤਂ ਅਞ੍ਞਥਤ੍ਤਂ ਵਿਪਰਿਣਾਮਞ੍ਞਥਤ੍ਤਂ. ਲਕ੍ਖਣਞ੍ਞਥਤ੍ਤਂ ਨ ਲਬ੍ਭਤਿ. ਤੇਨਾਹ ‘‘ਲਕ੍ਖਣਂ ਪਨ ਨ ਵਿਗਚ੍ਛਤੀ’’ਤਿ, ਸੇਸਂ ਲਬ੍ਭਤੀਤਿ. ਪਥਵੀਧਾਤੁਯਾਤਿ ਸਸਮ੍ਭਾਰਪਥਵੀਧਾਤੁਯਾ. ਆਪੋਧਾਤੁਯਾਤਿ ਏਤ੍ਥਾਪਿ ਏਸੇਵ ਨਯੋ. ਪੁਰਿਮਭਾਵੋਤਿ ਘਨਕਠਿਨਭਾਵੋ. ਭਾਵਞ੍ਞਥਤ੍ਤਂ ਰਸਞ੍ਞਥਤ੍ਤਸਭਾਵੋ. ਗਤਿਅਞ੍ਞਥਤ੍ਤਂ ਉਗ੍ਗਤੂਪਪਤ੍ਤਿ. ਤੇਨਾਹ ‘‘ਤਞ੍ਹਿ ਅਰਿਯਸਾਵਕਸ੍ਸ ਨਤ੍ਥੀ’’ਤਿ. ਪਸਾਦਞ੍ਞਥਤ੍ਤਮ੍ਪਿ ਨਤ੍ਥਿਯੇਵ ਅਰਿਯਸਾਵਕਸ੍ਸ.
ਰਾਜਕਾਰਾਮਵਗ੍ਗਵਣ੍ਣਨਾ ਨਿਟ੍ਠਿਤਾ.
੩. ਸਰਣਾਨਿਵਗ੍ਗੋ
੧-੨. ਪਠਮਮਹਾਨਾਮਸੁਤ੍ਤਾਦਿਵਣ੍ਣਨਾ
੧੦੧੭-੧੮. ਸਮਿਦ੍ਧਨ੍ਤਿ ਸਮ੍ਪੁਣ੍ਣਂ. ਸੁਪੁਪ੍ਫਿਤਨ੍ਤਿ ਉਪਸੋਭਿਤਤਾਯ ਸੁਪੁਪ੍ਫਿਤਸਦਿਸਤ੍ਤਾ. ਬ੍ਯੂਹਾ ਨਾਮ ਯੇਹਿ ਏਵ ਪਵਿਸਨ੍ਤਿ, ਤੇਹਿ ਏਵ ਨਿਕ੍ਖਮਨ੍ਤਿ. ਤੇਨਾਹ ‘‘ਬ੍ਯੂਹਾ ਵੁਚ੍ਚਨ੍ਤਿ ਅਵਿਨਿਬ੍ਬਿਦ੍ਧਰਚ੍ਛਾਯੋ’’ਤਿ. ਉਦ੍ਧਤਚਾਰਿਨਾਤਿ ਯਟ੍ਠਨ੍ਤਰਾ.
੩. ਗੋਧਸਕ੍ਕਸੁਤ੍ਤਵਣ੍ਣਨਾ
੧੦੧੯. ਤੀਹੀਤਿ ਰਤਨਤ੍ਤਯੇ ਉਪ੍ਪਨ੍ਨੇਹਿ ਤੀਹਿ ਪਸਾਦਧਮ੍ਮੇਹਿ. ਚਤੂਹੀਤਿ ਤੇਹਿ ਏਵ ਸਦ੍ਧਿਂ ਸੀਲੇਨ. ਕੋਚਿਦੇਵਾਤਿਆਦਿ ਪਰਿਕਪ੍ਪਵਸੇਨ ਵੁਤ੍ਤਂ ਭਗਵਤਿ ਅਤ੍ਤਨੋ ਸਦ੍ਧਾਯ ਉਲ਼ਾਰਤਮਭਾਵਦਸ੍ਸਨਤ੍ਥਂ. ਤੇਨਾਹ ‘‘ਭਗਵਤੋ ਸਬ੍ਬਞ੍ਞੁਤਾਯਾ’’ਤਿਆਦਿ. ਧਮ੍ਮੋ ਸਮੁਪ੍ਪਾਦੋਤਿ ਵਿਵਾਦਧਮ੍ਮਉਪ੍ਪਤ੍ਤਿਹੇਤੁ. ਤਦੇਵ ਹਿ ਸਨ੍ਧਾਯਾਹ ‘‘ਕਿਞ੍ਚਿਦੇਵ ਕਾਰਣ’’ਨ੍ਤਿ. ਕਾਰਣਨ੍ਤਿ ਨਾਨਾਕਾਰਣਂ. ਕਲ੍ਯਾਣਕੁਸਲਵਿਮੁਤ੍ਤਨ੍ਤਿ ਅਕਲ੍ਯਾਣਂ ਅਕੁਸਲਂ, ਤਦਿਦਂ ਯਥਾਵੁਤ੍ਤਅਪ੍ਪਸਾਦਨੇਨ ਅਪਨੀਤਅਤ੍ਥਦਸ੍ਸਨਤ੍ਥਂ. ਅਸ੍ਸਾਤਿ ਮਹਾਨਾਮਸਕ੍ਕਸ੍ਸ. ਅਨਵਜ੍ਜਨਦੋਸੋ ਏਸੋਤਿ ਚਤੂਸੁ ਧਮ੍ਮੇਸੁ ਏਕੇਨਪਿ ਸਮਨ੍ਨਾਗਤੋ ਸੋਤਾਪਨ੍ਨੋ ਹੋਤੀਤਿ ਅਨੁਜਾਨਿਤ੍ਵਾ ਚਤੂਹਿਪਿ ਸਮਨ੍ਨਾਗਤੇਨ ਆਚਿਕ੍ਖਿਤਬ੍ਬਨ੍ਤਿ ਯਾਥਾਵਤੋ ਅਨਵਜ੍ਜਨਦੋਸੋਤਿ ਅਤ੍ਥੋ.
੪. ਪਠਮਸਰਣਾਨਿਸਕ੍ਕਸੁਤ੍ਤਵਣ੍ਣਨਾ
੧੦੨੦. ਪਮਾਣੇਨਾਤਿ ਏਕੇਨ ਪਮਾਣੇਨ, ਨ ਸਬ੍ਬਸੋ. ਓਲੋਕਨਂ ਖਮਨ੍ਤੀਤਿ ਦਸ੍ਸਨਮਗ੍ਗੇਨ ਚਤੁਸਚ੍ਚਧਮ੍ਮਾ ਪਚ੍ਚਤ੍ਤਂ ਪਸ੍ਸਿਤਬ੍ਬਾ ਪਟਿਵਿਜ੍ਝਿਤਬ੍ਬਾ. ਪਠਮਮਗ੍ਗਕ੍ਖਣੇ ਹਿ ਚਤੁਸਚ੍ਚਧਮ੍ਮਾ ਏਕਦੇਸਤੋਵ ਦਿਟ੍ਠਾ ਨਾਮ ਹੋਨ੍ਤਿ. ‘‘ਪਰਿਮੁਚ੍ਚਤੀ’’ਤਿ ਪਨ ਵਤ੍ਤੁਂ ਵਟ੍ਟਤਿ ਪਟਿਵਿਜ੍ਝਨਕਿਰਿਯਾਯ ਵਤ੍ਤਮਾਨਤ੍ਤਾ. ਅਗਨ੍ਤ੍ਵਾ ਅਪਾਯੇਸੁ ਅਨੁਪ੍ਪਤ੍ਤਿਰਹਤ੍ਤਾ. ਤੇਨਾਹ ‘‘ਨ ਗਚ੍ਛਤੀ’’ਤਿ, ਨ ਉਪ੍ਪਜ੍ਜਤੀਤਿ ਅਤ੍ਥੋ. ਮਹਾਸਾਰਰੁਕ੍ਖੇ ਦਸ੍ਸੇਨ੍ਤੋ ਆਹ – ‘‘ਯੋ ਕੋਚਿ ਵਿਞ੍ਞੁਜਾਤਿਕੋ ਮਮ ਚੇ ਗੋਚਰਂ ਗਚ੍ਛਤਿ, ਏਕਸ੍ਸ ਆਗਮਨਂ ਅਵਞ੍ਝਂ ਅਮੋਘ’’ਨ੍ਤਿ ਦਸ੍ਸੇਤੁਂ.
੫. ਦੁਤਿਯਸਰਣਾਨਿਸਕ੍ਕਸੁਤ੍ਤਵਣ੍ਣਨਾ
੧੦੨੧. ਦੁਕ੍ਖੇਤ੍ਤਂ ਨਿਰੋਜਕਂ, ਤਾਯ ਏਵ ਦੁਕ੍ਖੇਤ੍ਤਤਾਯ ਵਿਸਮਂ ਹੋਤੀਤਿ ਆਹ ‘‘ਵਿਸਮਖੇਤ੍ਤ’’ਨ੍ਤਿ. ਲੋਣੂਪਹਤਨ੍ਤਿ ਜਾਤਸਭਾਵੇਨ ਲੋਣੇਨ ਊਸਰੇਨ ਉਪਹਤਂ. ਖਣ੍ਡਾਨੀਤਿ ਖਣ੍ਡਿਤਾਨਿ. ਤੇਮੇਤ੍ਵਾਤਿ ਤੇਮਿਤਤ੍ਤਾ. ਵਾਤਾਤਪਹਤਾਨੀਤਿ ਚਿਰਕਾਲਂ ਵਾਤੇਨ ਚੇਵ ਆਤਪੇਨ ਚ ਉਪਹਤਾਨਿ ਆਬਾਧਿਤਾਨਿ.
੬. ਪਠਮਅਨਾਥਪਿਣ੍ਡਿਕਸੁਤ੍ਤਵਣ੍ਣਨਾ
੧੦੨੨. ਠਾਨਨ੍ਤਿ ਠਾਨਸੋ. ਤੇਨਾਹ ‘‘ਖਣੇਨਾ’’ਤਿ. ਨਿਯ੍ਯਾਨਿਕਨ੍ਤਿ ਪਵਤ੍ਤਂ ਞਾਣਪਟਿਰੂਪਕਂ ਪਕਤਿਪੁਰਿਸਨ੍ਤਰਜਾਨਨਾਦਿਮਿਚ੍ਛਾਞਾਣਂ. ਤਂ ਪਨ ਅਨਿਯ੍ਯਾਨਿਕਂ ‘‘ਨਿਯ੍ਯਾਨਿਕ’’ਨ੍ਤਿ ਪਚ੍ਚਵੇਕ੍ਖਣਵਸੇਨ ਪਵਤ੍ਤੇਯ੍ਯਾਤਿ ਆਹ ‘‘ਮਿਚ੍ਛਾਪਚ੍ਚਵੇਕ੍ਖਣੇਨਾ’’ਤਿ. ਗੁਣਵਿਯੁਤ੍ਤਸ੍ਸ ਅਤ੍ਤਨੋ ਸਕਤ੍ਤਨਿ ਅਵਟ੍ਠਾਨਸਙ੍ਖਾਤਾ ਵਿਮੁਤ੍ਤਿ ਮਿਚ੍ਛਾਵਿਮੁਤ੍ਤਿ.
੭. ਦੁਤਿਯਅਨਾਥਪਿਣ੍ਡਿਕਸੁਤ੍ਤਵਣ੍ਣਨਾ
੧੦੨੩. ਯਥਾਕਮ੍ਮਂ ਸਮ੍ਪਰੇਤਬ੍ਬਤੋ ਸਮ੍ਪਰਾਯੋ, ਪੇਚ੍ਚਭਵੋ, ਸਮ੍ਪਰਾਯਹੇਤੁਕਂ ਸਮ੍ਪਰਾਯਿਕਂ, ਮਰਣਭਯਂ.
ਸਰਣਾਨਿਵਗ੍ਗਵਣ੍ਣਨਾ ਨਿਟ੍ਠਿਤਾ.
੪. ਪੁਞ੍ਞਾਭਿਸਨ੍ਦਵਗ੍ਗੋ
੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤਵਣ੍ਣਨਾ
੧੦੨੭. ਅਵਿਚ੍ਛੇਦੇਨ ਨਿਚ੍ਚਪ੍ਪਵਤ੍ਤਿਯਮਾਨਾਨਿ ਪੁਞ੍ਞਾਨਿ ਅਭਿਸਨ੍ਦਨਟ੍ਠੇਨ ‘‘ਪੁਞ੍ਞਾਭਿਸਨ੍ਦਾ’’ਤਿ ਵੁਤ੍ਤਾ, ਤੇਨ ਪੁਞ੍ਞਨਦਿਯੋਤਿ ਅਤ੍ਥੋ ਵੁਤ੍ਤੋ. ਸੁਖਸ੍ਸ ਆਹਰਣਤੋ ਆਨਯਨਤੋ ਸੁਖਸ੍ਸਾਹਾਰੋ.
੪. ਪਠਮਦੇਵਪਦਸੁਤ੍ਤਵਣ੍ਣਨਾ
੧੦੩੦. ਦੇਵਾਨਨ੍ਤਿ ਵਿਸੁਦ੍ਧਿਦੇਵਾਨਂ. ਦੇਵਪਦਾਨੀਤਿ ਤੇਸਂ ਪਦਾਨਿ ਦੇਵਪਦਾਨਿ, ਦੇਵੋਤਿ ਵਾ ਸਮ੍ਮਾਸਮ੍ਬੁਦ੍ਧੋ. ਦੇਵਸ੍ਸ ਞਾਣੇਨ ਅਕ੍ਕਨ੍ਤਪਦਾਨੀਤਿ ਪਟਿਵੇਧਞਾਣੇਨ ਚੇਵ ਦੇਸਨਾਞਾਣੇਨ ਚ ਅਕ੍ਕਨ੍ਤਪਦਾਨਿ. ਦੇਵਾ ਨਾਮ ਜਾਤਿਦੇਵਾ. ਤੇਸਮ੍ਪਿ ਦੇਵਟ੍ਠੇਨ ਦੇਵੋਤਿ ਦੇਵਦੇਵੋ, ਸਮ੍ਬੁਦ੍ਧੋ.
੮. ਵਸ੍ਸਸੁਤ੍ਤਵਣ੍ਣਨਾ
੧੦੩੪. ਪਾਰਂ ਵੁਚ੍ਚਤਿ ਨਿਬ੍ਬਾਨਂ ਸਂਸਾਰਮਹੋਘਸ੍ਸ ਪਰਤੀਰਭਾਵਤੋ. ਤੇਨਾਹ – ‘‘ਤਿਣ੍ਣੋ ਪਾਰਙ੍ਗਤੋ, ਥਲੇ ਤਿਟ੍ਠਤਿ ਬ੍ਰਾਹ੍ਮਣੋ (ਸਂ. ਨਿ. ੪.੨੩੮; ਇਤਿਵੁ. ੬੯; ਪੁ. ਪ. ੧੮੮), ਯੇ ਜਨਾ ਪਾਰਗਾਮਿਨੋ’’ਤਿ (ਧ. ਪ. ੮੫) ਚ. ਅਥ ਵਾ ਪਾਤਿ ਰਕ੍ਖਤੀਤਿ ਪਾਰਂ, ਨਿਬ੍ਬਾਨਂ. ਯੋ ਪਟਿਵਿਜ੍ਝਤਿ, ਤਂ ਵਟ੍ਟਦੁਕ੍ਖਤੋ ਪਾਤਿ ਰਕ੍ਖਤਿ, ਅਚ੍ਚਨ੍ਤਹਿਤੇਨ ਚ ਵਿਮੁਤ੍ਤਿਸੁਖੇਨ ਚ ਰਮੇਤਿ, ਤਸ੍ਮਾ ਪਾਰਨ੍ਤਿ ਵੁਚ੍ਚਤਿ. ਗਚ੍ਛਮਾਨਾ ਏਵਾਤਿ ਪਾਰਂ ਨਿਬ੍ਬਾਨਂ ਗਚ੍ਛਮਾਨਾ ਏਵ. ਤੇ ਧਮ੍ਮਾ ਆਸਵਾਨਂ ਖਯਾਯ ਸਂਵਤ੍ਤਨ੍ਤਿ ਸਚ੍ਛਿਕਿਰਿਯਾਪਹਾਨਪਟਿਵੇਧਾਨਂ ਸਮਕਾਲਤ੍ਤਾ.
੧੦. ਨਨ੍ਦਿਯਸਕ੍ਕਸੁਤ੍ਤਵਣ੍ਣਨਾ
੧੦੩੬. ਪਵਿਵੇਕਤ੍ਥਾਯਾਤਿ ਪਵਿਵੇਕਸੁਖਤ੍ਥਾਯ. ਪਟਿਸਲ੍ਲਾਨਤ੍ਥਾਯਾਤਿ ਬਹਿਦ੍ਧਾ ਨਾਨਾਰਮ੍ਮਣਤੋ ਚਿਤ੍ਤਂ ਪਟਿਨਿਵਤ੍ਤੇਤ੍ਵਾ ਕਮ੍ਮਟ੍ਠਾਨੇ ਸਮ੍ਮਦੇਵ ਲੀਨਤ੍ਥਾਯ.
ਪੁਞ੍ਞਾਭਿਸਨ੍ਦਵਗ੍ਗਵਣ੍ਣਨਾ ਨਿਟ੍ਠਿਤਾ.
੫. ਸਗਾਥਕਪੁਞ੍ਞਾਭਿਸਨ੍ਦਵਗ੍ਗੋ
੧. ਪਠਮਅਭਿਸਨ੍ਦਸੁਤ੍ਤਵਣ੍ਣਨਾ
੧੦੩੭. ਸਙ੍ਖ੍ਯਾ ਅਤ੍ਥਿ ਹੇਟ੍ਠਾ ਮਹਾਪਥਵਿਯਾ, ਉਪਰਿ ਆਕਾਸੇਨ, ਪਰਿਤੋ ਚਕ੍ਕਵਾਲ਼ਪਬ੍ਬਤੇਨ, ਮਜ੍ਝੇ ਤਤ੍ਥ ਤਤ੍ਥ ਠਿਤੇਹਿ ਦੀਪਪਬ੍ਬਤਪਰਿਯਨ੍ਤੇਹਿ ਪਰਿਚ੍ਛਿਨ੍ਨਤ੍ਤਾ. ਜਾਨਨ੍ਤੇਨ ਯੋਜਨਤੋ ਸਙ੍ਖਾਤੁਂ ਸਕ੍ਕਾਤਿ ਅਧਿਪ੍ਪਾਯੋ. ਮਹਾਸਰੀਰਮਚ੍ਛ-ਕੁਮ੍ਭੀਲ-ਯਕ੍ਖ-ਰਕ੍ਖਸ-ਮਹਾਨਾਗਦਾਨਵਾਦੀਨਂ ਸਵਿਞ੍ਞਾਣਕਾਨਂ, ਬਲ਼ਵਾਮੁਖਪਾਤਾਲਾਦੀਨਂ ਅਵਿਞ੍ਞਾਣਕਾਨਂ ਭੇਰਵਾਰਮ੍ਮਣਾਨਂ ਵਸੇਨ ਬਹੁਭੇਰਵਂ.
੨. ਦੁਤਿਯਅਭਿਸਨ੍ਦਸੁਤ੍ਤਵਣ੍ਣਨਾ
੧੦੩੮. ਸਮ੍ਭੇਦੇਤਿ ਸਮ੍ਭੇਦਂ ਸਮੋਧਾਨਂ ਗਤਟ੍ਠਾਨੇ. ਯਤ੍ਥਿਮਾ ਮਹਾਨਦਿਯੋ ਸਂਸਨ੍ਦਨ੍ਤਿ ਸਮੇਨ੍ਤੀਤਿ ਪਰਿਕਪ੍ਪਵਚਨਮੇਤਂ. ਤਾਦਿਸਾਸੁ ਹਿ ਮਹਾਨਦੀਸੁ ਕਾਚਿ ਪੁਰਤ੍ਥਿਮਸਮੁਦ੍ਦਂ ਪਵਿਟ੍ਠਾ, ਕਾਚਿ ਪਚ੍ਛਿਮਂ.
੩. ਤਤਿਯਅਭਿਸਨ੍ਦਸੁਤ੍ਤਵਣ੍ਣਨਾ
੧੦੩੯. ‘‘ਕੁਸਲੇ ਪਤਿਟ੍ਠਿਤੋ’’ਤਿ ਏਤ੍ਥ ਯਂ ਅਚ੍ਚਨ੍ਤਿਕਂ ਕੁਸਲੇ ਪਤਿਟ੍ਠਾਨਂ. ਤਂ ਦਸ੍ਸੇਨ੍ਤੋ ‘‘ਮਗ੍ਗਕੁਸਲੇ ਪਤਿਟ੍ਠਿਤੋ’’ਤਿ ਆਹ, ਹੇਟ੍ਠਿਮਮਗ੍ਗਕੁਸਲੇਤਿ ਅਧਿਪ੍ਪਾਯੋ. ਤੇਨਾਹ ‘‘ਭਾਵੇਤਿ ਮਗ੍ਗ’’ਨ੍ਤਿ. ਅਰਿਯਫਲਂਯੇਵ ਧਮ੍ਮਸਾਰੋ. ਕਿਲੇਸਾ ਖੀਯਨ੍ਤਿ ਏਤ੍ਥਾਤਿ ਕਿਲੇਸਕ੍ਖਯੋ, ਨਿਬ੍ਬਾਨਂ, ਤਸ੍ਮਿਂ ਕਿਲੇਸਕ੍ਖਯੇ ਰਤੋ.
੪. ਪਠਮਮਹਦ੍ਧਨਸੁਤ੍ਤਵਣ੍ਣਨਾ
੧੦੪੦. ਅਰਿਯਾਨਂ ਬੁਦ੍ਧਾਨਂ ਧਨਨ੍ਤਿਪਿ ਅਰਿਯਧਨਂ, ਨਿਬ੍ਬਾਨਨ੍ਤਿ ਕੇਚਿ. ਅਨਯਤੋਪਿ ਵਿਸੁਦ੍ਧਟ੍ਠੇਨ ਅਰਿਯਞ੍ਚ ਤਂ ਧਨਞ੍ਚ ਧਨਾਯਿਤਟ੍ਠੇਨਾਤਿ ਅਰਿਯਧਨਂ, ਤੇਨ ਅਰਿਯਧਨੇਨ. ਤੇਨੇਵ ਭੋਗੇਨਾਤਿ ਅਰਿਯਧਨਭੋਗੇਨ.
ਸਗਾਥਕਪੁਞ੍ਞਾਭਿਸਨ੍ਦਵਗ੍ਗਵਣ੍ਣਨਾ ਨਿਟ੍ਠਿਤਾ.
੬. ਸਪ੍ਪਞ੍ਞਵਗ੍ਗੋ
੨. ਵਸ੍ਸਂਵੁਤ੍ਥਸੁਤ੍ਤਵਣ੍ਣਨਾ
੧੦੪੮. ਸਮੋਧਾਨੇਤ੍ਵਾਤਿ ਯੇਹਿ ਇਨ੍ਦ੍ਰਿਯਾਦੀਹਿ ਭਾਵਿਯਮਾਨੇਹਿ ਸੋਤਾਪਤ੍ਤਿਮਗ੍ਗੋ ਅਨੁਪ੍ਪਤ੍ਤੋ, ਤਾਨੇਵ. ਧਮ੍ਮਸਮਾਨਤਾਯ ਚੇਤਂ ਵੁਤ੍ਤਂ. ਅਞ੍ਞਾਨੇਵ ਹਿ ਅਤ੍ਥਤੋ ਤਂ ਤਂ ਮਗ੍ਗਂ ਸਾਧਕਾਨਿ ਇਨ੍ਦ੍ਰਿਯਾਦੀਨਿ. ਤਨ੍ਤਿ ਪਵੇਣੀ ਕਥਿਤਾਤਿ ਯਂ ਕਞ੍ਚਿ ਵਿਨੇਯ੍ਯਪੁਗ੍ਗਲਂ ਅਨਪੇਕ੍ਖਿਤ੍ਵਾ ਕੇਵਲਂ ਤਨ੍ਤਿਵਸੇਨ ਠਿਤਿ ਕਥਿਤਾ.
੩. ਧਮ੍ਮਦਿਨ੍ਨਸੁਤ੍ਤਵਣ੍ਣਨਾ
੧੦੪੯. ਸਤ੍ਤਸੁ ਜਨੇਸੂਤਿ ਸਤ੍ਤਸੁ ਕਿਤ੍ਤਿਯਮਾਨੇਸੁ ਉਪਾਸਕਜਨੇਸੁ. ਗਮ੍ਭੀਰਾਤਿਆਦੀਸੁ ਧਮ੍ਮਗਮ੍ਭੀਰਾਤਿ ਪਾਲ਼ਿਗਤਿਯਾ ਗਮ੍ਭੀਰਾ, ਤਥਾ ਚ ਸਲ੍ਲਸੁਤ੍ਤਂ ਹੇਟ੍ਠਾ ਪਕਾਸਿਤਮੇਵ. ‘‘ਚੇਤਨਾਹਂ, ਭਿਕ੍ਖਵੇ, ਕਮ੍ਮਂ ਵਦਾਮੀ’’ਤਿਆਦਿਨਾ (ਅ. ਨਿ. ੬.੬੩; ਕਥਾ. ੫੩੯) ਆਗਤਂ ਚੇਤਨਾਸੁਤ੍ਤਂ. ਤਤ੍ਥ ‘‘ਚੇਤਨਾਸਹਜਾਤਂ ਨਾਨਾਕ੍ਖਣਿਕ’’ਨ੍ਤਿਆਦਿਨਾ ਪਟ੍ਠਾਨੇ ਆਗਤਨਯੇਨ, ਸੁਤ੍ਤੇਸੁ (ਅ. ਨਿ. ੩.੧੦੧) ਚ ‘‘ਦਿਟ੍ਠਧਮ੍ਮਵੇਦਨੀਯ’’ਨ੍ਤਿਆਦਿਨਾ ਆਗਤਨਯੇਨ ਗਮ੍ਭੀਰਭਾਵੋ ਵੇਦਿਤਬ੍ਬੋ, ਨਿਬ੍ਬਾਨਸ੍ਸ ਚੇਵ ਅਰਿਯਮਗ੍ਗਸ੍ਸ ਚ ਪਕਾਸਨਤੋ ਅਸਙ੍ਖਤਸਂਯੁਤ੍ਤਸ੍ਸ ਲੋਕੁਤ੍ਤਰਤ੍ਥਦੀਪਕਤਾ. ‘‘ਅਤੀਤਂਪਾਹਂ ਰੂਪੇਨ ਖਜ੍ਜਿਂ, ਏਤਰਹਿ ਖਜ੍ਜਾਮੀ’’ਤਿਆਦਿਨਾ ਪਞ੍ਚਨ੍ਨਂ ਖਨ੍ਧਾਨਂ ਖਾਦਕਭਾਵਸ੍ਸ, ਪੁਗ੍ਗਲਸ੍ਸ ਖਾਦਿਤਬ੍ਬਤਾਯ ਵਿਭਾਵਨੇਨ ਖਜ੍ਜਨੀਯਪਰਿਯਾਯੇ (ਸਂ. ਨਿ. ੩.੭੯) ਵਿਸੇਸਤੋ ਨਿਸ੍ਸਤ੍ਤਨਿਜ੍ਜੀਵਤਾ ਦੀਪਿਤਾਤਿ ਵੁਤ੍ਤਂ ‘‘ਸਤ੍ਤਸੁਞ੍ਞਤਾਦੀਪਕਾ ਖਜ੍ਜਨਿਕਸੁਤ੍ਤਨ੍ਤਾਦਯੋ’’ਤਿ. ਉਪਸਮ੍ਪਜ੍ਜ ਵਿਹਰਿਸ੍ਸਾਮਾਤਿ ਯੇ ਤੇਸੁ ਸੁਤ੍ਤੇਸੁ ਵੁਤ੍ਤਪਟਿਪਦਂ ਸਮ੍ਮਦੇਵ ਪਰਿਪੂਰੇਨ੍ਤਿ, ਤੇ ਤੇਸੁ ਉਪਸਮ੍ਪਜ੍ਜ ਵਿਹਰਨ੍ਤਿ ਨਾਮ. ਏਤ੍ਥਾਤਿ ‘‘ਨ ਖੋ ਨੇਤ’’ਨ੍ਤਿ ਏਤ੍ਥ ਨ-ਕਾਰੋ ‘‘ਅਞ੍ਞਮਞ੍ਞ’’ਨ੍ਤਿ ਏਤ੍ਥ ਮ-ਕਾਰੋ ਵਿਯ ਬ੍ਯਞ੍ਜਨਸਨ੍ਧਿਮਤ੍ਤਮੇਵ, ਨਾਸ੍ਸ ਕੋਚਿ ਅਤ੍ਥੋ.
੪. ਗਿਲਾਨਸੁਤ੍ਤਵਣ੍ਣਨਾ
੧੦੫੦. ਨ ਖੋ ਪਨੇਤਨ੍ਤਿ ਨ ਖੋ ਏਤਂ, ਨੋਤਿ ਚ ਅਮ੍ਹੇਹੀਤਿ ਅਤ੍ਥੋਤਿ ਆਹ ‘‘ਨ ਖੋ ਅਮ੍ਹੇਹੀ’’ਤਿਆਦਿ. ਅਸ੍ਸਸਨ੍ਤੀਤਿ ਅਸ੍ਸਾਸਨੀਯਾਤਿ ਆਹ ‘‘ਅਸ੍ਸਾਸਕਰੇਹੀ’’ਤਿ. ਮਰਿਸ੍ਸਤੀਤਿ ਮਾਰਿਸੋ, ਏਕਨ੍ਤਭਾਵਿਮਰਣੋ, ਸੋ ਪਨ ਮਰਣਾਧੀਨਵੁਤ੍ਤਿਕੋਤਿ ਵੁਤ੍ਤਂ ‘‘ਮਰਣਪਟਿਬਦ੍ਧੋ’’ਤਿ. ਅਧਿਮੁਚ੍ਚੇਹੀਤਿ ਅਧਿਮੁਤ੍ਤਿਂ ਉਪ੍ਪਾਦੇਹਿ. ਤਂ ਪਨ ਤਥਾ ਚਿਤ੍ਤਸ੍ਸ ਪਣਿਧਾਨਂ ਠਪਨਨ੍ਤਿ ਆਹ ‘‘ਠਪੇਹੀ’’ਤਿ. ਆਗਮਨੀਯਗੁਣੇਸੂਤਿ ਪੁਬ੍ਬਭਾਗਗੁਣੇਸੁ. ਪਮਾਣਂ ਨਾਮ ਨਤ੍ਥਿ ਅਨਨ੍ਤਾਪਰਿਮਾਣਤ੍ਤਾ. ਨਾਨਾਕਰਣਂ ਨਤ੍ਥਿ ਵਿਮੁਤ੍ਤਿਯਾ ਨਿਨ੍ਨਾਨਤ੍ਤਾ.
੯. ਪਞ੍ਞਾਪਟਿਲਾਭਸੁਤ੍ਤਵਣ੍ਣਨਾ
੧੦੫੫. ਪਞ੍ਞਾਪਟਿਲਾਭਾਯਾਤਿ ਮਗ੍ਗਫਲਪਞ੍ਞਾਯ ਪਟਿਲਾਭਤ੍ਥਂ. ਤੇਨਾਹ ‘‘ਸਤ੍ਤ ਸੇਕ੍ਖਾ’’ਤਿਆਦਿ.
ਸਪ੍ਪਞ੍ਞਵਗ੍ਗਵਣ੍ਣਨਾ ਨਿਟ੍ਠਿਤਾ.
੭. ਮਹਾਪਞ੍ਞਵਗ੍ਗੋ
੧. ਮਹਾਪਞ੍ਞਸੁਤ੍ਤਵਣ੍ਣਨਾ
੧੦੫੮. ਮਹਨ੍ਤੇ ਅਤ੍ਥੇ ਪਰਿਗ੍ਗਣ੍ਹਾਤੀਤਿ ਸਚ੍ਚਪਟਿਚ੍ਚਸਮੁਪ੍ਪਾਦਾਦਿਕੇ ਮਹਾਵਿਤ੍ਥਾਰੇ ਅਤ੍ਥੇ ਪਰਿਚ੍ਛਿਜ੍ਜ ਅਸੇਸੇਤ੍ਵਾ ਮੁਟ੍ਠਿਗਤੇ ਵਿਯ ਕਤ੍ਵਾ ਗਣ੍ਹਾਤਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.
ਮਹਾਪਞ੍ਞਵਗ੍ਗਵਣ੍ਣਨਾ ਨਿਟ੍ਠਿਤਾ.
ਸੋਤਾਪਤ੍ਤਿਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.