੨. ਵਿਹਾਰਵਗ੍ਗੋ

੧. ਪਠਮਵਿਹਾਰਸੁਤ੍ਤਵਣ੍ਣਨਾ

੧੧. ਅਡ੍ਢਮਾਸਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਪਟਿਸਲ੍ਲੀਯਿਤੁਨ੍ਤਿ ਯਥਾਵੁਤ੍ਤਂ ਕਾਲਂ ਪਟਿ ਦਿਵਸੇ ਦਿਵਸੇ ਸਮਾਪਤ੍ਤਿਯਂ ਧਮ੍ਮਚਿਨ੍ਤਾਯਂ ਚਿਤ੍ਤਂ ਨਿਲੀਯਿਤੁਂ. ਵਿਨੇਤਬ੍ਬੋਤਿ ਸਮੁਚ੍ਛੇਦਵਿਨਯੇਨ ਵਿਨੇਤਬ੍ਬੋ ਅਰਿਯਮਗ੍ਗਾਧਿਗਨ੍ਤਬ੍ਬੋ. ਤਨ੍ਤਿ ਦਿਟ੍ਠਾਨੁਗਤਿਆਪਜ੍ਜਨਂ. ਅਸ੍ਸਾਤਿ ਜਨਤਾਯ. ਅਪਗਚ੍ਛਤੀਤਿ ਸਤ੍ਥੁ ਸਨ੍ਤਿਕਤੋ ਅਪੇਤਿ. ਸੂਤਿ ਨਿਪਾਤਮਤ੍ਤਂ.

ਪਦੇਸੇਨਾਤਿ ਏਕਦੇਸੇਨ. ਸਹ ਪਦੇਸੇਨਾਤਿ ਸਪਦੇਸੋ. ਸ੍ਵਾਯਂ ਸਪਦੇਸੋ ਯਸ੍ਮਾ ਵੇਦਨਾਵਸੇਨੇਵ ਪਾਲ਼ਿਯਂ ਆਗਤੋ, ਤਸ੍ਮਾ ਪਰਮਤ੍ਥਧਮ੍ਮਕੋਟ੍ਠਾਸੇ ਵੇਦਨਾ ਅਨਵਸੇਸਤੋ ਲਬ੍ਭਤਿ, ਤੇ ਗਣ੍ਹਨ੍ਤੋ ‘‘ਖਨ੍ਧਪਦੇਸੋ’’ਤਿਆਦਿਮਾਹ. ਤਂ ਸਬ੍ਬਨ੍ਤਿ ਖਨ੍ਧਪਦੇਸਾਦਿਕਂ ਸਬ੍ਬਮ੍ਪਿ. ‘‘ਸਮ੍ਮਸਨ੍ਤੋ’’ਤਿ ਪਦਸ੍ਸ ਅਤ੍ਥਦਸ੍ਸਨਵਸੇਨ ‘‘ਪਚ੍ਚਵੇਕ੍ਖਨ੍ਤੋ’’ਤਿ ਆਹ. ਪਚ੍ਚਵੇਕ੍ਖਣਾ ਇਧ ਸਮ੍ਮਸਨਂ ਨਾਮ, ਨ ਵਿਪਸ੍ਸਨਾ. ਵਿਪਸ੍ਸਨਾਸਮ੍ਮਸਨਂ ਪਨ ਭਗਵਤੋ ਵਿਸਾਖਪੁਣ੍ਣਮਾਯਂ ਏਵ ਨਿਪ੍ਫਨ੍ਨਂ, ਤਸ੍ਮਾ ਭਗਵਤੋ ਅਞ੍ਞਭੂਮਿਕਾਪਿ ਵੇਦਨਾ ਅਞ੍ਞਭੂਮਿਕਾਨਂ ਸਤ੍ਤਾਨਂ ਵਿਰੁਦ੍ਧਾ ਉਪ੍ਪਜ੍ਜਤੇਵਾਤਿ ਵੁਤ੍ਤਂ ‘‘ਯਾਵ ਭਵਗ੍ਗਾ ਪਵਤ੍ਤਾ ਸੁਖਾ ਵੇਦਨਾ’’ਤਿ. ਸਬ੍ਬਾਕਾਰੇਨਾਤਿ ਸਰੂਪਤੋ ਸਮੁਦਯਤੋ ਅਤ੍ਥਙ੍ਗਮਤੋ ਅਸ੍ਸਾਦਾਦਿਤੋਤਿ ਸਬ੍ਬਾਕਾਰੇਨ. ਪਰਿਗ੍ਗਣ੍ਹਨ੍ਤੋ ਉਪਪਰਿਕ੍ਖਨ੍ਤੋ.

ਨਿਪ੍ਪਦੇਸਾਨੇਵ ਅਨਵਸੇਸਾਨੇਵ. ਇਨ੍ਦ੍ਰਿਯਸਤਿਪਟ੍ਠਾਨਪਦੇਸੋ ਸੁਵਿਞ੍ਞੇਯ੍ਯੋਤਿ ਅਨੁਦ੍ਧਤੋ. ਅਸ੍ਸਾਤਿ ਭਗਵਤੋ. ਠਾਨੇਤਿ ਤਸ੍ਮਿਂ ਤਸ੍ਮਿਂ ਪਚ੍ਚਵੇਕ੍ਖਿਤਬ੍ਬਸਙ੍ਖਾਤੇ ਓਕਾਸੇ. ਸਾ ਸਾ ਚ ਵਿਹਾਰਸਮਾਪਤ੍ਤੀਤਿ ਖਨ੍ਧਵਸੇਨ ਆਯਤਨਾਦਿਵਸੇਨ ਚ ਪਵਤ੍ਤਿਤ੍ਵਾ ਤੇਸਂ ਏਕਦੇਸਭੂਤਂ ਵੇਦਨਂਯੇਵ ਪਰਿਗ੍ਗਹੇਤ੍ਵਾ ਤਂ ਸਮ੍ਮਸਿਤ੍ਵਾ ਅਨੁਕ੍ਕਮੇਨ ਸਮਾਪਨ੍ਨਾ ਝਾਨਸਮਾਪਤ੍ਤਿ ਫਲਸਮਾਪਤ੍ਤਿ ਚ. ਫਲਸਮਾਪਤ੍ਤਿ ਹਿ ਤਥਾ ਸਮ੍ਮਸਿਤ੍ਵਾ ਪੁਨਪ੍ਪੁਨਂ ਸਮਾਪਜ੍ਜਨਵਸੇਨ ਅਤ੍ਥਤੋ ਅਭਿਨ੍ਨਾਪਿ ਅਧਿਟ੍ਠਾਨਭੂਤਧਮ੍ਮਭੇਦੇਨ ਭਿਨ੍ਨਾ ਵਿਯ ਵੁਚ੍ਚਤਿ, ਯਤੋ ਚਤੁਵੀਸਤਿਕੋਟਿਸਤਸਹਸ੍ਸਭੇਦਾ ਦੇਵਸਿਕਂ ਵਲ਼ਞ੍ਜਨਸਮਾਪਤ੍ਤਿਯੋ ਅਟ੍ਠਕਥਾਯਂ ਵੁਤ੍ਤਾ. ਕਾਮਂ ਅਞ੍ਞਧਮ੍ਮਵਸੇਨਪਿ ਜਾਤਾ ਏਵ, ਵੇਦਨਾਵਸੇਨ ਪਨੇਤ੍ਥ ਅਭਿਨਿਵੇਸੋ ਕਤੋ ਵੇਦਨਾਨੁਭਾਵੇਨ ਜਾਤਾ. ਕਸ੍ਮਾ ਏਵਂ ਜਾਤਾਤਿ? ਬੁਦ੍ਧਾਨਂ ਞਾਣਪਦਸ੍ਸ ਅਨ੍ਤਰਵਿਭਾਗਤ੍ਤਾ. ਤਥਾ ਹਿ ਭਗਵਾ ਸਕਲਮ੍ਪਿ ਅਡ੍ਢਮਾਸਂ ਵੇਦਨਾਵਸੇਨੇਵ ਸਮ੍ਮਸਨਂ ਪਵਤ੍ਤੇਤਿ, ਤਦਨੁਸਾਰੇਨ ਚ ਤਾ ਵਿਹਾਰਸਮਾਪਤ੍ਤਿਯੋ ਸਮਾਪਜ੍ਜਿ. ਤਯਿਦਂ ਅਚ੍ਛਰਿਯਂ ਅਨਞ੍ਞਸਾਧਾਰਣਂ ਭਿਕ੍ਖੂ ਪਵੇਦੇਨ੍ਤੋ ਸਤ੍ਥਾ – ‘‘ਯੇਨ ਸ੍ਵਾਹ’’ਨ੍ਤਿਆਦਿਮਵੋਚ.

ਅਕੁਸਲਾਵਾਤਿ ਪਾਣਾਤਿਪਾਤ-ਅਦਿਨ੍ਨਾਦਾਨ-ਕਾਮੇਸੁਮਿਚ੍ਛਾਚਾਰ-ਮੁਸਾਵਾਦ-ਪਿਸੁਣਵਾਚਾਸਮ੍ਫਪ੍ਪਲਾਪ-ਅਭਿਜ੍ਝਾ-ਬ੍ਯਾਪਾਦਵਸੇਨ ਤਂਤਂਮਿਚ੍ਛਾਦਸ੍ਸਨਵਸੇਨ ਚ ਅਕੁਸਲਾ ਵੇਦਨਾ ਏਵ ਹੋਤਿ. ਬ੍ਰਹ੍ਮਲੋਕਾਦੀਸੁ ਉਪ੍ਪਜ੍ਜਿਤ੍ਵਾ ਤਤ੍ਥ ਨਿਚ੍ਚਾ ਧੁਵਾ ਭਵਿਸ੍ਸਾਮਾਤਿ ਏਵਂ ਦਿਟ੍ਠਿਂ ਉਪਨਿਸ੍ਸਾਯਾਤਿ ਯੋਜੇਤਬ੍ਬਂ. ਦੇਵਕੁਲਾਦੀਸੁ ਦੇਵਪੂਜਤ੍ਥਂ, ਸਬ੍ਬਜਨਪਰਿਭੋਗਤ੍ਥਂ ਵਾ ਮਾਲਾਵਚ੍ਛਂ ਰੋਪੇਨ੍ਤਿ. ਵਧਬਨ੍ਧਨਾਦੀਨੀਤਿ ਆਦਿ-ਸਦ੍ਦੇਨ ਅਦਿਨ੍ਨਾਦਾਨ-ਮਿਚ੍ਛਾਚਾਰ-ਮੁਸਾਵਾਦ-ਪਿਸੁਣਵਾਚਾ-ਸਮ੍ਫਪ੍ਪਲਾਪਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਦਿਟ੍ਠਧਮ੍ਮਵਿਪਾਕਸ੍ਸ ਅਪਚੁਰਤ੍ਤਾ ਅਪਾਕਟਤ੍ਤਾ ਚ ‘‘ਭਵਨ੍ਤਰਗਤਾਨ’’ਨ੍ਤਿ ਵੁਤ੍ਤਂ.

ਇਤਿ ਨੇਸਨ੍ਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਪਕਾਰਤ੍ਥੋ ਵਾ. ਤੇਨ ਯਥਾ ਫਰੁਸਵਾਚਾਵਸੇਨ, ਏਵਂ ਤਦਞ੍ਞੇਸਮ੍ਪਿ ਅਕੁਸਲਕਮ੍ਮਾਨਂ ਵਸੇਨ ਸਮ੍ਮਾਦਿਟ੍ਠਿਪਚ੍ਚਯਾ ਅਕੁਸਲਵੇਦਨਾਪ੍ਪਵਤ੍ਤਿ ਯਥਾਰਹਂ ਨੀਹਰਿਤ੍ਵਾ ਵਤ੍ਤਬ੍ਬਾ. ਏਸੇਵ ਨਯੋਤਿ ਇਮਿਨਾ ਯਥਾ ਮਿਚ੍ਛਾਦਿਟ੍ਠਿਪਚ੍ਚਯਾ ਸਮ੍ਮਾਦਿਟ੍ਠਿਪਚ੍ਚਯਾ ਚ ਕੁਸਲਾਕੁਸਲਵਿਪਾਕਵੇਦਨਾ ਸਹਜਾਤਕੋਟਿਯਾ ਉਪਨਿਸ੍ਸਯਕੋਟਿਯਾ ਚ ਵਸੇਨ ਯਥਾਰਹਂ ਯੋਜੇਤ੍ਵਾ ਦਸ੍ਸਿਤਾ, ਏਵਂ ਮਿਚ੍ਛਾਸਙ੍ਕਪ੍ਪਪਚ੍ਚਯਾਦੀਸੁਪਿ ਯਥਾਰਹਂ ਯੋਜੇਤ੍ਵਾ ਦਸ੍ਸੇਤਬ੍ਬਾਤਿ ਇਮਮਤ੍ਥਂ ਅਤਿਦਿਸਤਿ. ਛਨ੍ਦਪਚ੍ਚਯਾਤਿ ਏਤ੍ਥ ਤਣ੍ਹਾਛਨ੍ਦਸਹਿਤੋ ਕਤ੍ਤੁਕਾਮਤਾਛਨ੍ਦੋ ਅਧਿਪ੍ਪੇਤੋਤਿ ਆਹ ‘‘ਛਨ੍ਦਪਚ੍ਚਯਾਤਿਆਦੀਸੁ ਪਨ ਛਨ੍ਦਪਚ੍ਚਯਾ ਅਟ੍ਠਲੋਭਸਹਗਤਚਿਤ੍ਤਸਮ੍ਪਯੁਤ੍ਤਾ ਵੇਦਨਾ ਵੇਦਿਤਬ੍ਬਾ’’ਤਿ. ਵਿਤਕ੍ਕਪਚ੍ਚਯਾਤਿ ਏਤ੍ਥ ਅਪ੍ਪਨਾਪ੍ਪਤ੍ਤੋਵ ਵਿਤਕ੍ਕੋ ਅਧਿਪ੍ਪੇਤੋਤਿ ਵੁਤ੍ਤਂ ‘‘ਵਿਤਕ੍ਕਪਚ੍ਚਯਾ ਪਠਮਜ੍ਝਾਨਵੇਦਨਾਵਾ’’ਤਿ. ਵਿਤਕ੍ਕਪਚ੍ਚਯਾ ਪਠਮਜ੍ਝਾਨਵੇਦਨਾਯ ਗਹਿਤਤ੍ਤਾ ‘‘ਠਪੇਤ੍ਵਾ ਪਠਮਜ੍ਝਾਨ’’ਨ੍ਤਿ. ਉਪਰਿ ਤਿਸ੍ਸੋ ਰੂਪਾਵਚਰਾ, ਹੇਟ੍ਠਾ ਤਿਸ੍ਸੋ ਅਰੂਪਾਵਚਰਾ ਏਵਂ ਸੇਸਾ ਛ ਸਞ੍ਞਾਸਮਾਪਤ੍ਤਿਵੇਦਨਾ.

ਤਿਣ੍ਣਨ੍ਤਿ ਛਨ੍ਦਵਿਤਕ੍ਕਸਞ੍ਞਾਨਂ. ਅਵੂਪਸਮੇਤਿ ਪਟਿਪਕ੍ਖੇਨ ਅਵੂਪਸਮਿਤੇ. ਤਿਣ੍ਣਞ੍ਹਿ ਤੇਸਂ ਸਹਭਾਵੇਨ ਪਚ੍ਚਯਤਾ ਅਟ੍ਠਲੋਭਸਹਗਤਚਿਤ੍ਤੇਸੁ ਏਵ. ਤਤ੍ਥ ਯਂ ਵਤ੍ਤਬ੍ਬਂ ਤਂ ਵੁਤ੍ਤਮੇਵ. ਛਨ੍ਦਮਤ੍ਤਸ੍ਸਾਤਿ ਤੇਸੁ ਤੀਸੁ ਛਨ੍ਦਮਤ੍ਤਸ੍ਸ. ਵੂਪਸਮੇ ਪਠਮਜ੍ਝਾਨਵੇਦਨਾਵ ਅਪ੍ਪਨਾਪ੍ਪਤ੍ਤਸ੍ਸ ਅਧਿਪ੍ਪੇਤਤ੍ਤਾ. ਛਨ੍ਦਵਿਤਕ੍ਕਾਨਂ ਵੂਪਸਮੇ ਦੁਤਿਯਜ੍ਝਾਨਾਦਿਵੇਦਨਾ ਅਧਿਪ੍ਪੇਤਾ ਸਞ੍ਞਾਯ ਅਵੂਪਸਨ੍ਤਤ੍ਤਾ. ਦੁਤਿਯਜ੍ਝਾਨਾਦਿਵੇਦਨਾਗਹਣੇਨ ਹਿ ਸਬ੍ਬਾ ਸਞ੍ਞਾਸਮਾਪਤ੍ਤਿਯੋ ਚ ਗਹਿਤਾਵ ਹੋਨ੍ਤਿ. ਤਿਣ੍ਣਮ੍ਪਿ ਵੂਪਸਮੇਤਿ ਛਨ੍ਦਵਿਤਕ੍ਕਸਞ੍ਞਾਨਂ ਵੂਪਸਮੇ ਨੇਵਸਞ੍ਞਾਨਾਸਞ੍ਞਾਯਤਨਵੇਦਨਾ ਅਧਿਪ੍ਪੇਤਾ. ਭਵਗ੍ਗਪ੍ਪਤ੍ਤਸਞ੍ਞਾ ਹਿ ਵੂਪਸਮਨ੍ਤਿ ਛਨ੍ਦਸਙ੍ਕਪ੍ਪਾਨਂ ਅਚ੍ਚਨ੍ਤਸੁਖੁਮਭਾਵਪ੍ਪਤ੍ਤਿਯਾ. ਹੇਟ੍ਠਾ ‘‘ਸਮ੍ਮਾਦਿਟ੍ਠਿਪਚ੍ਚਯਾ’’ਤਿ ਏਤ੍ਥ ਸਮ੍ਮਾਦਿਟ੍ਠਿਗ੍ਗਹਣੇਨ ਹੇਟ੍ਠਿਮਮਗ੍ਗਸਮ੍ਮਾਦਿਟ੍ਠਿਪਿ ਗਹਿਤਾਵ ਹੋਤੀਤਿ ਆਹ – ‘‘ਅਪ੍ਪਤ੍ਤਸ੍ਸ ਪਤ੍ਤਿਯਾਤਿ ਅਰਹਤ੍ਤਫਲਸ੍ਸ ਪਤ੍ਤਤ੍ਥਾਯਾ’’ਤਿ. ਅਥ ਵਾ ਹੇਟ੍ਠਿਮਮਗ੍ਗਾਧਿਗਮੇਨ ਵਿਨਾ ਅਗ੍ਗਮਗ੍ਗੋ ਨਤ੍ਥੀਤਿ ਹੇਟ੍ਠਿਮਮਗ੍ਗਾਧਿਗਮਂ ਅਤ੍ਥਾਪਨ੍ਨਂ ਕਤ੍ਵਾ ‘‘ਅਰਹਤ੍ਤਫਲਸ੍ਸ ਪਤ੍ਤਤ੍ਥਾਯਾ’’ਤਿ ਵੁਤ੍ਤਂ. ਆਯਮੇਤਿ ਫਲੇਨ ਮਿਸ੍ਸਿਤੋ ਹੋਤਿ ਏਤੇਨਾਤਿ ਆਯਾਮੋ, ਸਮ੍ਮਾਵਾਯਾਮੋਤਿ ਆਹ ‘‘ਅਤ੍ਥਿ ਆਯਾਮਨ੍ਤਿ ਅਤ੍ਥਿ ਵੀਰਿਯ’’ਨ੍ਤਿ. ਤਸ੍ਸ ਵੀਰਿਯਾਰਮ੍ਭਸ੍ਸਾਤਿ ਅਞ੍ਞਾਧਿਗਮਕਾਰਣਸ੍ਸ ਸਮ੍ਮਾਵਾਯਾਮਸ੍ਸ ਵਸੇਨ. ਪਾਲ਼ਿਯਂ ਠਾਨ-ਸਦ੍ਦੋ ਕਾਰਣਪਰਿਯਾਯੋਤਿ ਆਹ – ‘‘ਅਰਹਤ੍ਤਫਲਸ੍ਸ ਕਾਰਣੇ’’ਤਿ. ਤਪ੍ਪਚ੍ਚਯਾਤਿ ਏਤ੍ਥ ਤਂ-ਸਦ੍ਦੇਨ ‘‘ਠਾਨੇ’’ਤਿ ਵੁਤ੍ਤਕਾਰਣਮੇਵ ਪਚ੍ਚਾਮਟ੍ਠਨ੍ਤਿ ਆਹ – ‘‘ਅਰਹਤ੍ਤਸ੍ਸ ਠਾਨਪਚ੍ਚਯਾ’’ਤਿ. ਚਤੁਮਗ੍ਗਸਹਜਾਤਾਤਿ ਏਤੇਨ ‘‘ਅਰਹਤ੍ਤਫਲਸ੍ਸ ਪਤ੍ਤਤ੍ਥਾਯਾ’’ਤਿ ਏਤ੍ਥ ਹੇਟ੍ਠਿਮਮਗ੍ਗਾਨਂ ਅਤ੍ਥਾਪਤ੍ਤਿਵਸੇਨ ਗਹਿਤਭਾਵਮੇਵ ਜੋਤੇਤਿ. ਕੇਚਿ ਪਨ ‘‘ਚਤੁਮਗ੍ਗਸਹਜਾਤਾਤਿ ਵਤ੍ਵਾ ਨਿਬ੍ਬਤ੍ਤਿਤਲੋਕੁਤ੍ਤਰਵੇਦਨਾਤਿ ਭੂਤਕਥਨਂ ਵਿਸੇਸਨਂ. ਨਿਬ੍ਬਤ੍ਤਿਤਲੋਕੁਤ੍ਤਰਵੇਦਨਾਤਿ ਪਠਮਂ ਅਪੇਕ੍ਖਿਤਬ੍ਬਂ, ਪਚ੍ਛਾ ਚਤੁਮਗ੍ਗਸਹਜਾਤਾ’’ਤਿ ਵਦਨ੍ਤਿ.

ਪਠਮਵਿਹਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਵਿਹਾਰਸੁਤ੍ਤਵਣ੍ਣਨਾ

੧੨. ਮਿਚ੍ਛਾਦਿਟ੍ਠਿ ਵੂਪਸਮਤਿ ਸਬ੍ਬਸੋ ਪਹੀਯਤਿ ਏਤੇਨਾਤਿ ਮਿਚ੍ਛਾਦਿਟ੍ਠਿਵੂਪਸਮੋ. ‘‘ਮਿਚ੍ਛਾਦਿਟ੍ਠਿਵੂਪਸਮੋ ਨਾਮ ਸਮ੍ਮਾਦਿਟ੍ਠਿ. ਭਵਨ੍ਤਰੇ ਉਪ੍ਪਜ੍ਜਨ੍ਤੋ ਅਤਿਦੂਰੇਤਿ ਮਞ੍ਞਮਾਨੋ ਵਿਪਾਕਵੇਦਨਂ ਨ ਗਣ੍ਹਾਤੀ’’ਤਿ ਅਟ੍ਠਕਥਾਯਂ ਵੁਤ੍ਤਂ. ‘‘ਇਮਿਨਾ ਨਯੇਨਾ’’ਤਿ ਅਤਿਦਿਸਿਤ੍ਵਾਪਿ ਤਮਤ੍ਥਂ ਪਾਕਟਤਰਂ ਕਾਤੁਂ ‘‘ਯਸ੍ਸ ਯਸ੍ਸਾ’’ਤਿਆਦਿਂ ਵਤ੍ਵਾ ਏਵ ਸਾਮਞ੍ਞਵਸੇਨ ਵੁਤ੍ਤਮਤ੍ਥਂ ਪਚ੍ਛਿਮੇਸੁ ਤੀਸੁ ਪਦੇਸੁ ਸਰੂਪਤੋਵ ਦਸ੍ਸੇਤੁਂ ‘‘ਛਨ੍ਦਵੂਪਸਮਪਚ੍ਚਯਾ’’ਤਿਆਦਿਮਾਹ, ਤਂ ਸੁਵਿਞ੍ਞੇਯ੍ਯਮੇਵ. ਵੁਤ੍ਤਤ੍ਥਾਨੇਵ ਅਨਨ੍ਤਰਸੁਤ੍ਤੇ.

ਦੁਤਿਯਵਿਹਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੭. ਸੇਕ੍ਖਸੁਤ੍ਤਾਦਿਵਣ੍ਣਨਾ

੧੩-੧੭. ਤਿਸ੍ਸਨ੍ਨਮ੍ਪਿ ਸਿਕ੍ਖਾਨਂ ਸਿਕ੍ਖਨਂ ਸੀਲਂ ਏਤਸ੍ਸਾਤਿ ਸਿਕ੍ਖਨਸੀਲੋ. ਸਿਕ੍ਖਤੀਤਿਪਿ ਵਾ ਸੇਕ੍ਖੋ. ਵੁਤ੍ਤਞ੍ਹੇਤਂ ‘‘ਸਿਕ੍ਖਤੀਤਿ ਖੋ, ਭਿਕ੍ਖਵੇ, ਤਸ੍ਮਾ ਸੇਕ੍ਖੋਤਿ ਵੁਚ੍ਚਤਿ. ਕਿਞ੍ਚ ਸਿਕ੍ਖਤਿ? ਅਧਿਸੀਲਮ੍ਪਿ ਸਿਕ੍ਖਤੀ’’ਤਿਆਦਿ (ਅ. ਨਿ. ੩.੮੬). ਤੀਹਿ ਫਲੇਹਿ ਹੇਟ੍ਠਾ. ਸਾਪਿ ਚਤੁਤ੍ਥਮਗ੍ਗੇਨ ਸਦ੍ਧਿਂ ਉਪ੍ਪਨ੍ਨਸਿਕ੍ਖਾਪਿ. ਮਗ੍ਗਕ੍ਖਣੇ ਹਿ ਸਿਕ੍ਖਾਕਿਚ੍ਚਂ ਨ ਨਿਟ੍ਠਿਤਂ ਵਿਪ੍ਪਕਤਭਾਵਤੋ, ਫਲਕ੍ਖਣੇ ਪਨ ਨਿਟ੍ਠਿਤਂ ਨਾਮ. ਉਤ੍ਤਾਨਤ੍ਥਾਨੇਵ ਹੇਟ੍ਠਾ ਵੁਤ੍ਤਨਯਤ੍ਤਾ.

ਸੇਕ੍ਖਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਵਿਹਾਰਵਗ੍ਗਵਣ੍ਣਨਾ ਨਿਟ੍ਠਿਤਾ.