੩. ਮਿਚ੍ਛਤ੍ਤਵਗ੍ਗਵਣ੍ਣਨਾ

੨੧-੩੦. ਮਿਚ੍ਛਾਸਭਾਵਨ੍ਤਿ ਅਯਾਥਾਵਸਭਾਵਂ ਅਨਿਯ੍ਯਾਨਿਕਸਭਾਵਂ. ਸਮ੍ਮਾਸਭਾਵਨ੍ਤਿ ਯਾਥਾਵਸਭਾਵਂ ਨਿਯ੍ਯਾਨਿਕਸਭਾਵਂ. ਮਿਚ੍ਛਾਪਟਿਪਤ੍ਤਾਧਿਕਰਣਹੇਤੂਤਿ ਏਤ੍ਥ ਅਧਿ-ਸਦ੍ਦੋ ਅਨਤ੍ਥਕੋਤਿ ਆਹ – ‘‘ਮਿਚ੍ਛਾਪਟਿਪਤ੍ਤਿਕਰਣਹੇਤੂ’’ਤਿ. ਞਾਯਤਿ ਪਟਿਵਿਦ੍ਧਵਸੇਨ ਨਿਬ੍ਬਾਨਂ ਗਚ੍ਛਤੀਤਿ ਞਾਯੋ. ਸੋ ਏਵ ਤਂਸਮਙ੍ਗੀਨਂ ਵਟ੍ਟਦੁਕ੍ਖਪਾਤਤੋ ਧਾਰਣਟ੍ਠੇਨ ਧਮ੍ਮੋਤਿ ਆਹ – ‘‘ਞਾਯਂ ਧਮ੍ਮਨ੍ਤਿ ਅਰਿਯਮਗ੍ਗਧਮ੍ਮ’’ਨ੍ਤਿ. ਞਾਣਸ੍ਸ ਮਿਚ੍ਛਾਸਭਾਵੋ ਨਾਮ ਨਤ੍ਥੀਤਿ ਵਿਞ੍ਞਾਣਮੇਵੇਤ੍ਥ ਪਚ੍ਚਵੇਕ੍ਖਣਵਸੇਨ ਪਵਤ੍ਤਂ ਞਾਣ-ਸਦ੍ਦੇਨ ਵੁਚ੍ਚਤੀਤਿ ਆਹ ‘‘ਮਿਚ੍ਛਾਵਿਞ੍ਞਾਣੋ’’ਤਿ. ਮਿਚ੍ਛਾਪਚ੍ਚਵੇਕ੍ਖਣੋਤਿ ਕਿਞ੍ਚਿ ਪਾਪਂ ਕਤ੍ਵਾ ‘‘ਅਹੋ ਮਯਾ ਕਤਂ ਸੁਕਤ’’ਨ੍ਤਿ ਏਵਂ ਪਵਤ੍ਤੋ ਮਿਚ੍ਛਾਪਚ੍ਚਵੇਕ੍ਖਣੋ. ਗੋਸੀਲਗੋਵਤਾਦਿਪੂਰਣਂ ਮੁਤ੍ਤੀਤਿ ਏਵਂ ਗਣ੍ਹਤੋ ਮਿਚ੍ਛਾਵਿਮੁਤ੍ਤਿ ਨਾਮ. ਮਿਚ੍ਛਾਪਟਿਪਦਾਦੀਹਿ ਵਿਵਟ੍ਟਨ੍ਤਿ ਏਵਂ ਵਟ੍ਟਵਿਵਟ੍ਟਂ ਕਥਿਤਂ. ਪੁਗ੍ਗਲੋ ਪੁਚ੍ਛਿਤੋਤਿ ਨਿਗਮਿਤੋ ਚ ‘‘ਅਯਂ ਵੁਚ੍ਚਤਿ, ਭਿਕ੍ਖਵੇ, ਅਸਪ੍ਪੁਰਿਸੋ’’ਤਿਆਦਿਨਾ. ਕਿਞ੍ਚਾਪਿ ‘‘ਮਿਚ੍ਛਾਦਿਟ੍ਠਿਕੋ ਹੋਤੀ’’ਤਿਆਦਿਨਾ ਪੁਗ੍ਗਲੋਵ ਨਿਦ੍ਦਿਟ੍ਠੋ, ਤਥਾਪਿ ਪੁਗ੍ਗਲਸੀਸੇਨਾਯਂ ਧਮ੍ਮਦੇਸਨਾਤਿ ਆਹ ‘‘ਧਮ੍ਮੋ ਵਿਭਤ੍ਤੋ’’ਤਿ. ਤੇਨੇਵਾਹ ‘‘ਧਮ੍ਮੇਨ ਪੁਗ੍ਗਲੋ ਦਸ੍ਸਿਤੋ’’ਤਿ. ਧਮ੍ਮੇਨਾਤਿ ਮਿਚ੍ਛਾਦਿਟ੍ਠਿਆਦਿਕੇਨ ਧਮ੍ਮੇਨ. ਕਲ੍ਯਾਣਪੁਥੁਜ੍ਜਨਤੋ ਪਟ੍ਠਾਯ ਸਬ੍ਬਸੋ ਸਪ੍ਪੁਰਿਸਾ ਨਾਮ, ਖੀਣਾਸਵੋ ਸਪ੍ਪੁਰਿਸਤਰੋ. ਸੁਪ੍ਪਵਤ੍ਤਨਿਯੋਤਿ ਸੁਖੇਨ ਪਵਤ੍ਤੇਤੁਂ ਸਕ੍ਕੁਣੇਯ੍ਯੋ. ਧਾਵਤੀਤਿ ਗਚ੍ਛਤਿ. ਪਚ੍ਚਯੁਪ੍ਪਨ੍ਨੇਨ ਉਪੇਚ੍ਚ ਨਿਸ੍ਸਿਤਬ੍ਬਤੋ ਉਪਨਿਸਾ, ਪਚ੍ਚਯੋ, ਏਕਸ੍ਸ ਸ-ਕਾਰਸ੍ਸ ਲੋਪਂ ਕਤ੍ਵਾ ਵਾਤਿ ਆਹ – ‘‘ਸਉਪਨਿਸਂ ਸਪਚ੍ਚਯ’’ਨ੍ਤਿ. ਪਰਿਕਰਣਤੋ ਪਰਿਕ੍ਖਾਰੋ, ਪਰਿਵਾਰੋਤਿ ਆਹ – ‘‘ਸਪਰਿਕ੍ਖਾਰਂ ਸਪਰਿਵਾਰ’’ਨ੍ਤਿ. ਸਹਜਾਤਵਸੇਨ ਉਪਨਿਸ੍ਸਯਵਸੇਨ ਚ ਸਪਚ੍ਚਯਤਾ ਕਿਚ੍ਚਸਾਧਨੇ ਨਿਪ੍ਫਾਦਨੇ ਸਹਾਯਭਾਵੂਪਗਮਨੇ ਚ ਸਪਰਿਵਾਰਤਾ ਦਟ੍ਠਬ੍ਬਾ.

ਮਿਚ੍ਛਤ੍ਤਵਗ੍ਗਵਣ੍ਣਨਾ ਨਿਟ੍ਠਿਤਾ.