੧. ਅਵਿਜ੍ਜਾਵਗ੍ਗੋ
੧-੨. ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ
੧-੨. ਪੁਬ੍ਬਙ੍ਗਮਾਤਿ ਪੁਬ੍ਬੇਚਰਾ. ਅਵਿਜ੍ਜਾ ਹਿ ਅਞ੍ਞਾਣਲਕ੍ਖਣਾ ਸਮ੍ਮੁਯ੍ਹਨਾਕਾਰੇਨ ਆਰਮ੍ਮਣੇ ਪਵਤ੍ਤਤੀਤਿ ਸਮ੍ਪਯੁਤ੍ਤਧਮ੍ਮਾਨਮ੍ਪਿ ਤਦਾਕਾਰਾਨੁਵਿਧਾਨਤਾਯ ਪਚ੍ਚਯੋ ਹੋਤਿ. ਤਥਾ ਹਿ ਤੇ ਅਨਿਚ੍ਚਾਸੁਭਦੁਕ੍ਖਾਨਤ੍ਤਸਭਾਵੇਪਿ ਧਮ੍ਮੇ ਨਿਚ੍ਚਾਦਿਤੋ ਗਣ੍ਹਨ੍ਤਿ, ਅਯਮਸ੍ਸਾ ਤੇਸਂ ਸਹਜਾਤਵਸੇਨ ਪੁਬ੍ਬਙ੍ਗਮਤਾ. ਯਂ ਪਨ ਮੋਹੇਨ ਅਭਿਭੂਤੋ ਪਾਪਕਿਰਿਯਾਯ ਆਦੀਨਵਂ ਅਪਸ੍ਸਨ੍ਤੋ ਪਾਣਂ ਹਨਤਿ, ਅਦਿਨ੍ਨਂ ਆਦਿਯਤਿ, ਕਾਮੇਸੁ ਮਿਚ੍ਛਾ ਚਰਤਿ, ਮੁਸਾ ਭਣਤਿ, ਅਞ੍ਞਮ੍ਪਿ ਵਿਵਿਧਂ ਦੁਸ੍ਸੀਲ੍ਯਂ ਆਚਰਤਿ, ਅਯਮਸ੍ਸ ਸਹਜਾਤਵਸੇਨ ਚ ਉਪਨਿਸ੍ਸਯਵਸੇਨ ਚ ਪੁਬ੍ਬਙ੍ਗਮਤਾ. ਸਮਾਪਜ੍ਜਨਾਯਾਤਿ ਤਬ੍ਭਾਵਾਪਜ੍ਜਨਾਯ ਅਕੁਸਲਪ੍ਪਤ੍ਤਿਯਾ. ਸਭਾਵਪਟਿਲਾਭਾਯਾਤਿ ਅਤ੍ਤਲਾਭਾਯ. ਤੇਨਾਹ ‘‘ਉਪ੍ਪਤ੍ਤਿਯਾ’’ਤਿ. ਸਾ ਪਨੇਸਾ ਵੁਤ੍ਤਾਕਾਰੇਨ ਅਕੁਸਲਾਨਂ ਪੁਬ੍ਬਙ੍ਗਮਭੂਤਾ ਅਵਿਜ੍ਜਾ ਉਪ੍ਪਜ੍ਜਤੀਤਿ ਸਮ੍ਬਨ੍ਧੋ. ਯਦੇਤਨ੍ਤਿ ਯਂ ਏਤਂ ਪਾਪਾਜਿਗੁਚ੍ਛਨਤਾਯ ਪਾਪਤੋ ਅਲਜ੍ਜਨਾਕਾਰਸਣ੍ਠਿਤਂ ਅਹਿਰਿਕਂ, ਪਾਪਾਨੁਤ੍ਰਾਸਤਾਯ ਪਾਪਤੋ ਅਭਾਯਨਾਕਾਰਸਣ੍ਠਿਤਞ੍ਚ ਅਨੋਤ੍ਤਪ੍ਪਂ, ਏਤਂ ਦ੍ਵਯਂ ਅਨੁਦੇਵ ਅਨ੍ਵਾਗਤਮੇਵ. ਅਨੁ-ਸਦ੍ਦੇਨ ਚੇਤ੍ਥ ਏਤਨ੍ਤਿ ਉਪਯੋਗਵਚਨਂ. ਅਨੁਦੇਵਾਤਿ ਏਤਸ੍ਸ ਅਤ੍ਥੋ ਸਹੇਵ ਏਕਤੋਤਿ. ਏਤ੍ਥ ਅਵਿਜ੍ਜਾਯ ਵੁਤ੍ਤਨਯਾਨੁਸਾਰੇਨ ਤਪ੍ਪਟਿਪਕ੍ਖਤੋ ਚ ਅਤ੍ਥੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਤਤ੍ਥ ਯਥਾ ਅਕੁਸਲਕਮ੍ਮਪਥਵਸੇਨ ਪਵਤ੍ਤਿਯਂ ਪੁਬ੍ਬਙ੍ਗਮਤਾ ਅਵਿਜ੍ਜਾਯ, ਏਵਂ ਕੁਸਲਕਮ੍ਮਪਥਵਸੇਨ ਪੁਞ੍ਞਕਿਰਿਯਵਤ੍ਥੁਵਸੇਨ ਚ ਪਵਤ੍ਤਿਯਂ ਵਿਜ੍ਜਾਯ ਪੁਬ੍ਬਙ੍ਗਮਤਾ ਵਤ੍ਤਬ੍ਬਾ. ਵੀਮਂਸਾਧਿਪਤਿਵਸੇਨ ਪਵਤ੍ਤਿਯਂ ਆਧਿਪਚ੍ਚਾਕਾਰਵਸੇਨ ਚ ਪੁਬ੍ਬਙ੍ਗਮਤਾ ਵੇਦਿਤਬ੍ਬਾ. ਦ੍ਵੀਹੇਵਾਤਿ ਚ ਅਵਧਾਰਣਂ ਆਧਿਪਚ੍ਚਾਕਾਰਸ੍ਸ ਸਹਜਾਤੇਨੇਵ ਸਙ੍ਗਹੇਤਬ੍ਬਤੋ.
ਲਜ੍ਜਨਾਕਾਰਸਣ੍ਠਿਤਾਤਿ ਪਾਪਤੋ ਜਿਗੁਚ੍ਛਨਾਕਾਰਸਣ੍ਠਿਤਾ. ਭਾਯਨਾਕਾਰਸਣ੍ਠਿਤਨ੍ਤਿ ਉਤ੍ਤਸਨਾਕਾਰਸਣ੍ਠਿਤਂ. ਏਤ੍ਥਾਤਿ ਹਿਰਿਓਤ੍ਤਪ੍ਪੇ. ਵਿਦਤਿ, ਵਿਨ੍ਦਤੀਤਿ ਵਾ ਵਿਜ੍ਜਾ. ਵਿਦ੍ਦਸੂਤਿ ਚ ਸਪ੍ਪਞ੍ਞਪਰਿਯਾਯੋਤਿ ਆਹ ‘‘ਵਿਦ੍ਦਸੁਨੋਤਿ ਵਿਦੁਨੋ’’ਤਿ. ਯਾਥਾਵਦਿਟ੍ਠੀਤਿ ਅਵਿਪਰੀਤਾ ਦਿਟ੍ਠਿ, ਸਂਕਿਲੇਸਤੋ ਨਿਯ੍ਯਾਨਿਕਦਿਟ੍ਠਿ. ਸਮ੍ਮਾਦਿਟ੍ਠਿ ਪਹੋਤੀਤਿ ਏਤ੍ਥ ਸਾ ਵਿਜ੍ਜਾ ਸਮ੍ਮਾਦਿਟ੍ਠਿ ਵੇਦਿਤਬ੍ਬਾ. ਨ ਏਕਤੋ ਸਬ੍ਬਾਨਿ ਲਬ੍ਭਨ੍ਤਿ ਸਮ੍ਮਾਵਾਚਾਕਮ੍ਮਨ੍ਤਾਜੀਵਾਨਂ ਪੁਬ੍ਬਾਭਿਸਙ੍ਖਾਰਸ੍ਸ ਅਨੇਕਰੂਪਤ੍ਤਾ. ਲੋਕੁਤ੍ਤਰਮਗ੍ਗਕ੍ਖਣੇ ਏਕਤੋ ਲਬ੍ਭਨ੍ਤਿ ਕਿਚ੍ਚਤੋ ਭਿਨ੍ਨਾਨਮ੍ਪਿ ਤਾਸਂ ਤਤ੍ਥ ਸਰੂਪਤੋ ਅਭਿਨ੍ਨਤ੍ਤਾ. ਏਕਾ ਏਵ ਹਿ ਵਿਰਤਿ ਮਗ੍ਗਕ੍ਖਣੇ ਤਿਸ੍ਸਨ੍ਨਮ੍ਪਿ ਵਿਰਤੀਨਂ ਕਿਚ੍ਚਂ ਸਾਧੇਨ੍ਤੀ ਪਵਤ੍ਤਤਿ, ਯਥਾ ਏਕਾ ਏਵ ਸਮ੍ਮਾਦਿਟ੍ਠਿ ਪਰਿਜਾਨਨਾਦਿਵਸੇਨ ਚਤੁਬ੍ਬਿਧਕਿਚ੍ਚਂ ਸਾਧੇਨ੍ਤੀ ਪਵਤ੍ਤਤਿ. ਤਾਨਿ ਚ ਖੋ ਸਬ੍ਬਾਨਿ ਅਟ੍ਠਪਿ ਪਠਮਜ੍ਝਾਨਿਕੇ ਮਗ੍ਗੇ ਲਬ੍ਭਨ੍ਤੀਤਿ ਯੋਜਨਾ. ਪਠਮਜ੍ਝਾਨਿਕੇਤਿ ਪਠਮਝਾਨਵਨ੍ਤੇ.
ਤਥਾਭੂਤਸ੍ਸਾਤਿ ਅਰਿਯਮਗ੍ਗਸਮਙ੍ਗਿਨੋ. ਯਸ੍ਮਾ ਮਹਾਸਲ਼ਾਯਤਨਸੁਤ੍ਤੇ ਵੁਤ੍ਤਂ ‘‘ਸਮ੍ਮਾਦਿਟ੍ਠਿਆਦੀਨਂ ਪਞ੍ਚਨ੍ਨਂ ਏਵ ਅਙ੍ਗਾਨਂ ਵਸੇਨਾ’’ਤਿ, ਤਸ੍ਮਾ ਪਞ੍ਚਙ੍ਗਿਕੋ ਲੋਕੁਤ੍ਤਰਮਗ੍ਗੋ ਹੋਤਿ. ‘‘ਪੁਬ੍ਬੇਵ ਖੋ ਪਨਾ’’ਤਿ ਹਿ ਵਚਨਂ ਤਦਾ ਮਗ੍ਗਕ੍ਖਣੇ ਵਿਰਤੀਨਂ ਅਭਾਵਂ ਞਾਪੇਤਿ, ਤਸ੍ਮਾ ਕਾਮਾਵਚਰਚਿਤ੍ਤੇਸੁ ਵਿਯ ਲੋਕੁਤ੍ਤਰਚਿਤ੍ਤੇਸੁ ਵਿਰਤਿ ਅਨਿਯਤਾਤਿ ਅਧਿਪ੍ਪਾਯੋ. ਪਰਿਸੁਦ੍ਧਭਾਵਦਸ੍ਸਨਨ੍ਤਿ ਪਰਿਸੁਦ੍ਧਸੀਲਭਾਵਦਸ੍ਸਨਤ੍ਥਂ. ਅਯਮਤ੍ਥੋ ਦੀਪਿਤੋ, ਨ ਅਰਿਯਮਗ੍ਗੇ ਵਿਰਤੀਨਂ ਅਭਾਵੋ.
ਯਦਿ ਏਵਂ ਕਸ੍ਮਾ ਅਭਿਧਮ੍ਮੇ ਮਗ੍ਗਵਿਭਙ੍ਗੇ ਪਞ੍ਚਙ੍ਗਿਕਵਾਰੋ ਆਗਤੋਤਿ ਆਹ ‘‘ਯਮ੍ਪਿ ਅਭਿਧਮ੍ਮੇ’’ਤਿਆਦਿ. ਤਨ੍ਤਿ ‘‘ਪਞ੍ਚਙ੍ਗਿਕੋ ਮਗ੍ਗੋ ਹੋਤੀ’’ਤਿ ਵਚਨਂ. ‘‘ਏਕਂ ਕਿਚ੍ਚਨ੍ਤਰਂ ਦਸ੍ਸੇਤੁਂ ਵੁਤ੍ਤ’’ਨ੍ਤਿ ਵਤ੍ਵਾ ਤਂ ਦਸ੍ਸੇਤੁਂ ‘‘ਯਸ੍ਮਿਞ੍ਹਿ ਕਾਲੇ’’ਤਿਆਦਿ ਵੁਤ੍ਤਂ. ਯਸ੍ਮਿਞ੍ਹਿ ਕਾਲੇਤਿ ਲੋਕਿਯਕਾਲੇ. ਤੇਨ ‘‘ਏਕਂ ਕਿਚ੍ਚਨ੍ਤਰ’’ਨ੍ਤਿ ਵੁਤ੍ਤਂ ਅਟ੍ਠਙ੍ਗਿਕਕਿਚ੍ਚਂ ਦਸ੍ਸੇਤਿ. ਵਿਰਤਿਉਪ੍ਪਾਦਨੇਨ ਮਿਚ੍ਛਾਵਾਚਾਦੀਨਿ ਪੁਗ੍ਗਲੇਨ ਮਗ੍ਗਸਮਯੇ ਪਜਹਾਪੇਨ੍ਤੀਤਿ ਸਮ੍ਮਾਦਿਟ੍ਠਿਆਦੀਨਿ ‘‘ਪਞ੍ਚ ਕਾਰਕਙ੍ਗਾਨੀ’’ਤਿ ਵੁਤ੍ਤਾਨਿ. ਸਮ੍ਮਾਵਾਚਾਦਿਕਿਰਿਯਾ ਹਿ ਵਿਰਤਿ, ਤਞ੍ਚ ਏਤਾਨਿ ਕਾਰਾਪੇਨ੍ਤੀਤਿ. ਵਿਰਤਿਵਸੇਨਾਤਿ ਵਿਰਮਣਕਿਰਿਯਾਵਸੇਨ ਕਾਰਾਪਕਭਾਵੇਨ, ਕਤ੍ਤੁਭਾਵੇਨ ਵਾਤਿ ਅਤ੍ਥੋ. ‘‘ਵਿਰਤਿਤ੍ਤਯਵਸੇਨਾ’’ਤਿ ਵਾ ਪਾਠੋ.
ਸਮ੍ਮਾਕਮ੍ਮਨ੍ਤੋ ਪੂਰਤੀਤਿ ਇਮੇਹਿ ਸਮ੍ਮਾਦਿਟ੍ਠਿਆਦੀਹਿ ਸਮ੍ਮਾਕਮ੍ਮਨ੍ਤਕਿਚ੍ਚਂ ਪੂਰਤਿ ਨਾਮ ਤੇਹਿ ਵੀਰਿਯਾਦਿਕੇਹਿ ਤਦਤ੍ਥਸਿਦ੍ਧਿਤੋ. ਤਮ੍ਪਿ ਸਨ੍ਧਾਯ ‘‘ਏਕਂ ਕਿਚ੍ਚਨ੍ਤਰਂ ਦਸ੍ਸੇਤੁ’’ਨ੍ਤਿ ਵੁਤ੍ਤਂ. ਇਮਂ ਕਿਚ੍ਚਨ੍ਤਰਂ ਦਸ੍ਸੇਤੁਨ੍ਤਿ ਲੋਕੁਤ੍ਤਰਮਗ੍ਗਕ੍ਖਣੇਪਿ ਇਮਾਨੇਵ ਪਞ੍ਚ ਸਮ੍ਮਾਵਾਚਾਦਿਵਿਰਤਿਤ੍ਤਯਸ੍ਸ ਏਕਕ੍ਖਣੇ ਕਾਰਾਪਕਙ੍ਗਾਨੀਤਿ ਦਸ੍ਸੇਤੁਂ. ਏਵਂ ਵੁਤ੍ਤਨ੍ਤਿ ‘‘ਤਸ੍ਮਿਂ ਸਮਯੇ ਪਞ੍ਚਙ੍ਗਿਕੋ ਮਗ੍ਗੋ ਹੋਤੀ’’ਤਿ (ਵਿਭ. ੪੯੪) ਏਵਂ ਵੁਤ੍ਤਂ. ਲੋਕਿਯਮਗ੍ਗਕ੍ਖਣੇ ਪਞ੍ਚੇਵ ਹੋਨ੍ਤਿ, ਵਿਰਤਿ ਪਨ ਅਨਿਯਤਾ, ਤਸ੍ਮਾ ‘‘ਛਅਙ੍ਗਿਕੋ’’ਤਿ ਅਵਤ੍ਵਾ ‘‘ਪਞ੍ਚਙ੍ਗਿਕੋ’’ਇਚ੍ਚੇਵ ਵੁਤ੍ਤਂ. ਤਯਿਦਂ ਅਭਿਧਮ੍ਮੇ ਪਞ੍ਚਙ੍ਗਿਕਵਾਰਦੇਸਨਾਯ ਕਾਰਣਕਿਤ੍ਤਨਮਗ੍ਗੋ, ਅਰਿਯਮਗ੍ਗੋ ਪਨ ਅਟ੍ਠਙ੍ਗਿਕੋਵਾਤਿ ਦਸ੍ਸੇਤੁਂ, ‘‘ਯਾ ਚ, ਭਿਕ੍ਖਵੇ’’ਤਿਆਦਿਮਾਹ, ਤਂ ਸੁਵਿਞ੍ਞੇਯ੍ਯਮੇਵ. ਮਿਚ੍ਛਾਦਿਟ੍ਠਿਆਦਿਕਾ ਦਸ, ਤਪ੍ਪਚ੍ਚਯਾ ਅਕੁਸਲਾ ਚ ਦਸਾਤਿ ਵੀਸਤਿ ਅਕੁਸਲਪਕ੍ਖਿਯਾ, ਸਮ੍ਮਾਦਿਟ੍ਠਿਆਦਿਕਾ ਦਸ, ਤਪ੍ਪਚ੍ਚਯਾ ਕੁਸਲਾ ਚ ਦਸਾਤਿ ਵੀਸਤਿ ਕੁਸਲਪਕ੍ਖਿਯਾ ਮਹਾਚਤ੍ਤਾਰੀਸਕਸੁਤ੍ਤੇ ਵੁਤ੍ਤਾ. ਮਹਾਚਤ੍ਤਾਰੀਸਕਨ੍ਤਿ ਤਸ੍ਸੇਤਂ ਨਾਮਂ. ਮਿਸ੍ਸਕੋਵ ਕਥਿਤੋ ਲੋਕੁਤ੍ਤਰਸ੍ਸਪਿ ਇਧ ਲਬ੍ਭਮਾਨਤ੍ਤਾ.
ਯਸ੍ਮਾ ਕੋਸਲਸਂਯੁਤ੍ਤੇਪਿ ਇਧ ਚ ਥੇਰੇਨ ‘‘ਉਪਡ੍ਢਮਿਦਂ, ਭਨ੍ਤੇ, ਬ੍ਰਹ੍ਮਚਰਿਯਸ੍ਸਾ’’ਤਿਆਦਿਨਾ ਵੁਤ੍ਤਂ ‘‘ਮਾ ਹੇਵਂ ਆਨਨ੍ਦਾ’’ਤਿਆਦਿਨਾ ਪਟਿਕ੍ਖਿਪਿਤ੍ਵਾ ‘‘ਸਕਲਮੇਵਿਦਂ ਆਨਨ੍ਦਾ’’ਤਿਆਦਿਨਾ ਭਗਵਤਾ ਦੇਸਿਤਂ ਸੁਤ੍ਤਂ ਆਗਤਂ. ਤਸ੍ਸਤ੍ਥੋ ਕੋਸਲਸਂਯੁਤ੍ਤਵਣ੍ਣਨਾਯਂ ਵੁਤ੍ਤੋ, ਤਸ੍ਮਾ ਵੁਤ੍ਤਂ ‘‘ਕੋਸਲਸਂਯੁਤ੍ਤੇ ਵੁਤ੍ਤਤ੍ਥਮੇਵਾ’’ਤਿ.
ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੩. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੩. ਸਾਵਕਬੋਧਿ ਸਾਵਕਪਾਰਮਿਯੋ, ਤਪ੍ਪਰਿਯਾਪਨ੍ਨਂ ਞਾਣਂ ਸਾਵਕਪਾਰਮਿਞਾਣਂ, ਤਂ ਪਨ ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਤਤ੍ਥਪਿ ਧਮ੍ਮਸੇਨਾਪਤਿਨੋ ਏਵ ਸਵਿਸੇਸਂ ਮਤ੍ਥਕਂ ਪਤ੍ਤਂ, ਨ ਇਤਰੇਸਨ੍ਤਿ ਆਹ – ‘‘ਸਾਵਕ…ਪੇ… ਅਪ੍ਪਤ੍ਤਤਾਯਾ’’ਤਿ. ਤਸ੍ਮਾ ਤਸ੍ਸ ਮਤ੍ਥਕਪ੍ਪਤ੍ਤਿਯਾ ਮਗ੍ਗਬ੍ਰਹ੍ਮਚਰਿਯੇ ਇਜ੍ਝਨ੍ਤੇ ਤਸ੍ਸ ਏਕਦੇਸੋ ਇਧ ਇਜ੍ਝਤਿ, ਨ ਸਕਲਨ੍ਤਿ. ਨ ਹਿ ਅਦ੍ਧਬ੍ਰਹ੍ਮਚਰਿਯਂ ਨਾਮ ਅਤ੍ਥਿ, ਤਸ੍ਮਾ ਵੁਤ੍ਤਂ, ‘‘ਸਕਲਮ੍ਪਿ …ਪੇ… ਲਬ੍ਭਤੀ’’ਤਿ, ਤਂ ਪਨ ਭਣ੍ਡਾਗਾਰਿਕੋ ਨਾਞ੍ਞਾਸਿ ਞਾਣਸ੍ਸ ਸਾਵਕਵਿਸਯੇਪਿ ਸਪ੍ਪਦੇਸਿਕਤ੍ਤਾ, ਧਮ੍ਮਸੇਨਾਪਤਿ ਪਨ ਞਾਣਸ੍ਸ ਤਤ੍ਥ ਨਿਪ੍ਪਦੇਸਿਕਤ੍ਤਾ ਅਞ੍ਞਾਸੀਤਿ. ਤੇਨਾਹ – ‘‘ਆਨਨ੍ਦਤ੍ਥੇਰੋ…ਪੇ… ਅਞ੍ਞਾਸੀ’’ਤਿ. ਏਵਮਾਹਾਤਿ ‘‘ਸਕਲਮਿਦਂ, ਭਨ੍ਤੇ’’ਤਿ ਏਵਂ ਅਵੋਚ.
ਸਾਰਿਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਜਾਣੁਸ੍ਸੋਣਿਬ੍ਰਾਹ੍ਮਣਸੁਤ੍ਤਵਣ੍ਣਨਾ
੪. ਵਲ਼ਵਾਭਿ-ਸਦ੍ਦੋ ਵਲ਼ਵਾਪਰਿਯਾਯੋਤਿ ਆਹ ‘‘ਚਤੂਹਿ ਵਲ਼ਵਾਹਿ ਯੁਤ੍ਤਰਥੇਨਾ’’ਤਿ. ਯੋਧਰਥੋਤਿ ਯੋਧੇਹਿ ਯੁਜ੍ਝਨਤ੍ਥਂ ਆਰੋਹਿਤਬ੍ਬਰਥੋ. ਅਲਙ੍ਕਾਰਰਥੋ ਮਙ੍ਗਲਦਿਵਸੇਸੁ ਅਲਙ੍ਕਤਪਟਿਯਤ੍ਤੇਹਿ ਆਰੋਹਿਤਬ੍ਬਰਥੋ. ਘਨਦੁਕੁਲੇਨ ਪਰਿਵਾਰਿਤੋਤਿ ਰਜਤਪਟ੍ਟਵਣ੍ਣੇਨ ਸੇਤਦੁਕੁਲੇਨ ਪਟਿਚ੍ਛਾਦਿਤੋ. ਪਟਿਚ੍ਛਾਦਨਤ੍ਥੋ ਹਿ ਇਧ ਪਰਿਵਾਰਸਦ੍ਦੋ. ਰਜਤਪਨਾਲ਼ਿਸੁਪਰਿਕ੍ਖਿਤ੍ਤਾ ਸੇਤਭਾਵਕਰਣਤ੍ਥਂ.
ਛਨ੍ਨਂ ਛਨ੍ਨਂ ਮਾਸਾਨਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ. ਏਕਵਾਰਂ ਨਗਰਂ ਪਦਕ੍ਖਿਣਂ ਕਰੋਤੀਤਿ ਇਦਂ ਤਸ੍ਮਿਂ ਠਾਨਨ੍ਤਰੇ ਠਿਤੇਨ ਕਾਤਬ੍ਬਂ ਚਾਰਿਤ੍ਤਂ. ਨਗਰਤੋ ਨ ਪਕ੍ਕਨ੍ਤਾਤਿ ਨਗਰਤੋ ਬਹਿ ਨ ਗਤਾ. ਮਙ੍ਗਲਵਚਨੇ ਨਿਯੁਤ੍ਤਾ ਮਙ੍ਗਲਿਕਾ, ਸੁਵਤ੍ਥਿਵਚਨੇ ਨਿਯੁਤ੍ਤਾ ਸੋਵਤ੍ਥਿਕਾ. ਆਦਿ-ਸਦ੍ਦੇਨ ਥੁਤਿਮਾਗਧਵਨ੍ਦਿਕਾਚਰਿਯਕੇ ਸਙ੍ਗਣ੍ਹਾਤਿ. ਸੁਕਪਤ੍ਤਸਦਿਸਾਨਿ ਵਣ੍ਣਤੋ.
ਵਣ੍ਣਗੀਤਨ੍ਤਿ ਥੁਤਿਗੀਤਂ. ਬ੍ਰਹ੍ਮਭੂਤਂ ਸੇਟ੍ਠਭੂਤਂ ਯਾਨਂ, ਬ੍ਰਹ੍ਮਭੂਤਾਨਂ ਸੇਟ੍ਠਭੂਤਾਨਂ ਯਾਨਨ੍ਤਿ ਵਾ ਬ੍ਰਹ੍ਮਯਾਨਂ. ਵਿਜਿਤਤ੍ਤਾ ਵਿਸੇਸੇਨ ਜਿਨਨਤੋ. ਰਾਗਂ ਵਿਨਯਮਾਨਾ ਪਰਿਯੋਸਾਪੇਤੀਤਿ ਸਬ੍ਬਮ੍ਪਿ ਰਾਗਂ ਸਮੁਚ੍ਛੇਦਵਿਨਯਵਸੇਨ ਵਿਨੇਤਿ, ਅਤ੍ਤਨੋ ਕਿਚ੍ਚਂ ਪਰਿਯੋਸਾਪੇਤਿ. ਕਿਚ੍ਚਪਰਿਯੋਸਾਪਨੇਨੇਵ ਹਿ ਸਯਮ੍ਪਿ ਪਰਿਯੋਸਾਨਂ ਨਿਪ੍ਫਤ੍ਤਿਂ ਉਪਗਚ੍ਛਤਿ. ਤੇਨਾਹ ‘‘ਪਰਿਯੋਸਾਨਂ ਗਚ੍ਛਤਿ ਨਿਪ੍ਫਜ੍ਜਤੀ’’ਤਿ.
ਧੁਰਨ੍ਤਿ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਤਤ੍ਰਮਜ੍ਝਤ੍ਤਤਾਯੁਗੇ ਯੁਤ੍ਤਾ’’ਤਿ. ਈਸਾਤਿ ਯੁਗਸਨ੍ਧਾਰਿਕਾ ਦਾਰੁਯੁਗਲ਼ਾ. ਯਥਾ ਵਾ ਬਾਹਿਰਂ ਯੁਗਂ ਧਾਰੇਤਿ, ਤਸ੍ਸਾ ਠਿਤਾਯ ਏਵ ਕਿਚ੍ਚਸਿਦ੍ਧਿ, ਏਵਂ ਕਿਰਿਯਾਵਸੇਨ ਲਦ੍ਧਬਲੇਨ ਤਤ੍ਰਮਜ੍ਝਤ੍ਤਤਾਯੁਗੇ ਥਿਰਂ ਧਾਰੇਤਿ, ਤੇਹੇਵ ਅਰਿਯਮਗ੍ਗਰਥਸ੍ਸ ਪਵਤ੍ਤਨਂ. ਹਿਰਿਗ੍ਗਹਣੇਨ ਚੇਤ੍ਥ ਤਂਸਹਚਰਣਤੋ ਓਤ੍ਤਪ੍ਪਮ੍ਪਿ ਗਹਿਤਂਯੇਵ ਹੋਤਿ. ਤੇਨਾਹ ‘‘ਅਤ੍ਤਨਾ ਸਦ੍ਧਿ’’ਨ੍ਤਿਆਦਿ. ਨਾਲ਼ਿਯਾ ਮਿਨਮਾਨੋ ਪੁਰਿਸੋ ਵਿਯ ਆਰਮ੍ਮਣਂ ਮਿਨਾਤੀਤਿ ਮਨੋ. ਕਤਰਂ ਪਨ ਤਂ ਮਨੋ, ਕਥਞ੍ਚਸ੍ਸ ਯੋਤ੍ਤਸਦਿਸਤਾਤਿ ਆਹ ‘‘ਵਿਪਸ੍ਸਨਾਚਿਤ੍ਤ’’ਨ੍ਤਿਆਦਿ. ਤੇਨ ਯੋਤ੍ਤਂ ਵਿਯਾਤਿ ਯੋਤ੍ਤਨ੍ਤਿ ਦਸ੍ਸੇਤਿ. ਲੋਕਿਯਵਿਪਸ੍ਸਨਾਚਿਤ੍ਤਂ ਅਤਿਰੇਕਪਞ੍ਞਾਸ ਕੁਸਲਧਮ੍ਮੇ ਏਕਾਬਦ੍ਧੇ ਏਕਸਙ੍ਗਹਿਤੇ ਕਰੋਤੀਤਿ ਸਮ੍ਬਨ੍ਧੋ. ਤੇ ਪਨ ‘‘ਫਸ੍ਸੋ ਹੋਤਿ…ਪੇ… ਅਵਿਕ੍ਖੇਪੋ ਹੋਤੀ’’ਤਿ ਚਿਤ੍ਤਙ੍ਗਵਸੇਨ ਧਮ੍ਮਸਙ੍ਗਹੇ (ਧ. ਸ. ੧) ਆਗਤਨਯੇਨੇਵ ਵੇਦਿਤਬ੍ਬਾ. ਲੋਕੁਤ੍ਤਰਵਿਪਸ੍ਸਨਾਚਿਤ੍ਤਨ੍ਤਿ ਮਗ੍ਗਚਿਤ੍ਤਂ ਆਹ. ਅਤਿਰੇਕਸਟ੍ਠੀਤਿ ਤੇ ਏਵ ਸਮ੍ਮਾਕਮ੍ਮਨ੍ਤਾਜੀਵੇਹਿ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਾਦੀਹਿ ਚ ਸਦ੍ਧਿਂ ਅਤਿਰੇਕਸਟ੍ਠਿ ਕੁਸਲਧਮ੍ਮੇ. ਏਕਾਬਦ੍ਧੇਤਿ ਏਕਸ੍ਮਿਂ ਏਵ ਆਰਮ੍ਮਣੇ ਆਬਦ੍ਧੇ. ਏਕਸਙ੍ਗਹੇਤਿ ਤਥੇਵ ਵਿਪਸ੍ਸਨਾਕਿਚ੍ਚਵਸੇਨ ਏਕਸਙ੍ਗਹੇ ਕਰੋਤਿ. ਪੁਬ੍ਬਙ੍ਗਮਭਾਵੇਨ ਆਰਕ੍ਖਂ ਸਾਰੇਤੀਤਿ ਆਰਕ੍ਖਸਾਰਥੀ. ‘‘ਯਥਾ ਹਿ ਰਥਸ੍ਸ…ਪੇ… ਸਾਰਥੀ’’ਤਿ ਵਤ੍ਵਾ ਤਂ ਦਸ੍ਸੇਤੁਂ ‘‘ਯੋਗ੍ਗਿਯੋ’’ਤਿ ਵੁਤ੍ਤਂ. ਧੁਰਂ ਵਾਹੇਤਿ ਯੋਗ੍ਗੇ. ਯੋਜੇਤਿ ਯੋਗ੍ਗੇ ਸਮਗਤਿਯਞ੍ਚ. ਅਕ੍ਖਂ ਅਬ੍ਭਞ੍ਜਤਿ ਸੁਖਪ੍ਪਵਤ੍ਤਨਤ੍ਥਂ. ਰਥਂ ਪੇਸੇਤਿ ਯੋਗ੍ਗਚੋਦਨੇਨ. ਨਿਬ੍ਬਿਸੇਵਨੇ ਕਰੋਤਿ ਗਮਨਵੀਥਿਯਂ ਪਟਿਪਾਦਨੇਨ ਸਨ੍ਨਿਯੋਜੇਤਿ. ਆਰਕ੍ਖਪਚ੍ਚੁਪਟ੍ਠਾਨਾਤਿ ਆਰਕ੍ਖਂ ਪਚ੍ਚੁਪਟ੍ਠਪੇਤਿ ਅਸਮ੍ਮੋਸਸਭਾਵਤ੍ਤਾ. ਗਤਿਯੋਤਿ ਪਵਤ੍ਤਿਯੋ, ਨਿਪ੍ਫਤ੍ਤਿਯੋ ਵਾ. ਸਮਨ੍ਵੇਸਤੀਤਿ ਗਵੇਸਤਿ.
ਅਰਿਯਪੁਗ੍ਗਲਸ੍ਸ ਨਿਬ੍ਬਾਨਂ ਪਟਿਮੁਖਂ ਸਮ੍ਪਾਪਨੇ ਰਥੋ ਵਿਯਾਤਿ ਰਥੋ. ਪਰਿਕਰੋਤਿ ਵਿਭੂਸਯਤੀਤਿ ਪਰਿਕ੍ਖਾਰੋ, ਵਿਭੂਸਨਂ, ਸੀਲਞ੍ਚ ਅਰਿਯਮਗ੍ਗਸ੍ਸ ਵਿਭੂਸਨਟ੍ਠਾਨਿਯਂ. ਤੇਨ ਵੁਤ੍ਤਂ ‘‘ਚਤੁਪਾਰਿਸੁਦ੍ਧਿਸੀਲਾਲਙ੍ਕਾਰੋ’’ਤਿ, ਸੀਲਭੂਸਨੋਤਿ ਅਤ੍ਥੋ. ਵਿਪਸ੍ਸਨਾਸਮ੍ਪਯੁਤ੍ਤਾਨਨ੍ਤਿ ਲੋਕਿਯਾਯ ਲੋਕੁਤ੍ਤਰਾਯ ਚ ਵਿਪਸ੍ਸਨਾਯ ਸਮ੍ਪਯੁਤ੍ਤਾਨਂ. ਵਿਧਿਨਾ ਈਰੇਤਬ੍ਬਤੋ ਪਵਤ੍ਤੇਤਬ੍ਬਤੋ ਵੀਰਿਯਂ, ਸਮ੍ਮਾਵਾਯਾਮੋ. ਸਮਂ ਸਮ੍ਮਾ ਚ ਧਿਯਤੀਤਿ ਸਮਾਧਿ, ਧੁਰਞ੍ਚ ਤਂ ਸਮਾਧਿ ਚਾਤਿ ਧੁਰਸਮਾਧਿ, ਉਪੇਕ੍ਖਾ ਧੁਰਸਮਾਧਿ ਏਤਸ੍ਸਾਤਿ ਉਪੇਕ੍ਖਾਧੁਰਸਮਾਧਿ, ਅਰਿਯਮਗ੍ਗੋ ਉਪੇਕ੍ਖਾਸਙ੍ਖਾਤਧੁਰਸਮਾਧੀਤਿ ਅਤ੍ਥੋ. ਅਟ੍ਠਕਥਾਯਂ ਪਨ ਬ੍ਯਞ੍ਜਨਂ ਅਨਾਦਿਯਿਤ੍ਵਾ ਧੁਰਸਮਾਧਿਸਦ੍ਦਾਨਂ ਭਿਨ੍ਨਾਧਿਕਰਣਤਾ ਵੁਤ੍ਤਾ. ਪਯੋਗਮਜ੍ਝਤ੍ਤੇਤਿ ਵੀਰਿਯਸਮਤਾਯ. ਅਨਿਚ੍ਛਾਤਿ ਇਚ੍ਛਾਪਟਿਪਕ੍ਖਾ. ਤੇਨਾਹ ‘‘ਅਲੋਭਸਙ੍ਖਾਤਾ’’ਤਿ. ਪਰਿਵਾਰਣਨ੍ਤਿ ਪਰਿਵਾਰੋ, ਪਰਿਚ੍ਛਦੋਤਿ ਅਤ੍ਥੋ.
ਮੇਤ੍ਤਾਤਿ ਮੇਤ੍ਤਾਚੇਤੋਵਿਮੁਤ੍ਤਿ. ਤਥਾ ਕਰੁਣਾ. ਪੁਬ੍ਬਭਾਗੋਤਿ ਉਭਿਨ੍ਨਮ੍ਪਿ ਉਪਚਾਰੋ. ਦ੍ਵੇਪਿ ਕਾਯਚਿਤ੍ਤਵਿਵੇਕਾ ਵਿਯ ਪੁਬ੍ਬਭਾਗਧਮ੍ਮਵਸੇਨ ਵੁਤ੍ਤਾ. ਅਰਿਯਮਗ੍ਗਰਥੇਤਿ ਪਰਿਸੁਦ੍ਧਮਗ੍ਗਸਙ੍ਖਾਤੇ ਰਥੇ. ਅਰਿਯਮਗ੍ਗਰਥੋ ਚ ਮਗ੍ਗਰਥੋ ਚਾਤਿ ਅਰਿਯਮਗ੍ਗਰਥੋ, ਏਵਂ ਏਕਸੇਸਨਯੇਨ ਵਾ ਅਤ੍ਥੋ ਵੇਦਿਤਬ੍ਬੋ. ਤੇਨਾਹ ‘‘ਇਮਸ੍ਮਿਂ ਲੋਕਿਯਲੋਕੁਤ੍ਤਰਮਗ੍ਗਰਥੇ ਠਿਤੋ’’ਤਿ. ਸਨ੍ਨਦ੍ਧਚਮ੍ਮੋਤਿ ਯੋਗਾਵਚਰਸ੍ਸ ਪਟਿਮੁਕ੍ਕਚਮ੍ਮਂ. ਨ ਨਂ ਤੇ ਵਿਜ੍ਝਨ੍ਤੀਤਿ ਵਚਨਪਥਾ ਨ ਨਂ ਵਿਜ੍ਝਨ੍ਤਿ. ਧਮ੍ਮਭੇਦਨਵਸੇਨ ਨ ਭਞ੍ਜਤਿ, ਤਸ੍ਸ ਅਰਿਯਮਗ੍ਗਸ੍ਸ ਰਥਸ੍ਸ ਸਮ੍ਮਾ ਯੋਜਿਤਸ੍ਸ ਅਨ੍ਤਰਾ ਭਙ੍ਗੋ ਨਤ੍ਥੀਤਿ ਅਤ੍ਥੋ.
ਅਤ੍ਤਨੋ ਪੁਰਿਸਕਾਰਂ ਨਿਸ੍ਸਾਯ ਲਦ੍ਧਤ੍ਤਾ ਅਤ੍ਤਨੋ ਸਨ੍ਤਾਨੇਤਿ ਅਧਿਪ੍ਪਾਯੋ. ਅਨੁਤ੍ਤਰਨ੍ਤਿ ਉਤ੍ਤਰਰਹਿਤਂ. ਤਤੋ ਏਵ ਸੇਟ੍ਠਯਾਨਂ, ਨਸ੍ਸ ਕੇਨਚਿ ਸਦਿਸਨ੍ਤਿ ਅਸਦਿਸਂ. ਧਿਤਿਸਮ੍ਪਨ੍ਨਤਾਯ ਧੀਰਾ ਪਣ੍ਡਿਤਪੁਰਿਸਾ ਲੋਕਮ੍ਹਾ ਨਿਯ੍ਯਨ੍ਤਿ ਗਚ੍ਛਨ੍ਤਿ. ‘‘ਜਯਂ ਜਯ’’ਨ੍ਤਿ ਗਾਥਾਯਂ ਵਚਨਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਜਿਨਨ੍ਤਾ ਜਿਨਨ੍ਤਾ’’ਤਿ.
ਜਾਣੁਸ੍ਸੋਣਿਬ੍ਰਾਹ੍ਮਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫-੬. ਕਿਮਤ੍ਥਿਯਸੁਤ੍ਤਾਦਿਵਣ੍ਣਨਾ
੫-੬. ਨਿਯਮਤ੍ਥੋਤਿ ਅਵਧਾਰਣਤ੍ਥੋ. ਤੇਨ ਨਿਯਮੇਨ ਅਵਧਾਰਣੇਨ – ਅਞ੍ਞਂ ਮਗ੍ਗਂ ਪਟਿਕ੍ਖਿਪਤਿ ਇਤੋ ਅਞ੍ਞਸ੍ਸ ਨਿਯ੍ਯਾਨਿਕਮਗ੍ਗਸ੍ਸ ਅਭਾਵਤੋ. ‘‘ਦੁਕ੍ਖਸ੍ਸ ਪਰਿਞ੍ਞਤ੍ਥ’’ਨ੍ਤਿ ਵੁਤ੍ਤਤ੍ਤਾ ਵਟ੍ਟਦੁਕ੍ਖਂ ਕਥਿਤਂ. ਅਰਿਯਮਗ੍ਗੇ ਗਹਿਤੇ ਤਸ੍ਸ ਪੁਬ੍ਬਭਾਗਮਗ੍ਗੋ ਵਿਪਸ੍ਸਨਾਯ ਗਹਿਤੋ ਏਵਾਤਿ ‘‘ਮਿਸ੍ਸਕਮਗ੍ਗੋ ਕਥਿਤੋ’’ਤਿ ਵੁਤ੍ਤਂ. ਉਤ੍ਤਾਨਮੇਵ ਅਪੁਬ੍ਬਸ੍ਸ ਅਭਾਵਾ. ਅਯਂ ਪਨ ਵਿਸੇਸੋ ‘‘ਰਾਗਕ੍ਖਯੋ’’ਤਿਆਦੀਹਿ ਯਦਿਪਿ ਨਿਬ੍ਬਾਨਂ ਵੁਤ੍ਤਂ. ਤਥਾਪਿ ਅਰਹਤ੍ਤਂ ਵਿਯ ਬ੍ਰਹ੍ਮਚਰਿਯਮ੍ਪਿ. ਤੇਨ ਨਿਬ੍ਬਾਨਂ ਏਵ ਵੁਚ੍ਚਤਿ ‘‘ਇਦਂ ਬ੍ਰਹ੍ਮਚਰਿਯਪਰਿਯੋਸਾਨ’’ਨ੍ਤਿ.
ਕਿਮਤ੍ਥਿਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੭. ਦੁਤਿਯਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ
੭. ਰਾਗਵਿਨਯਾਦਿਪਦੇਹਿ ਨਿਬ੍ਬਾਨਂ ਵਾਪਿ ਵੁਚ੍ਚੇਯ੍ਯ ਅਰਹਤ੍ਤਂ ਵਾਪਿ. ਯਸ੍ਮਾ ਸੋ ਭਿਕ੍ਖੁ ਉਭਯਤ੍ਥਪਿ ਨਿਵਿਟ੍ਠਬੁਦ੍ਧਿ, ਤਸ੍ਮਾ ਭਗਵਾ ਤਸ੍ਸ ਅਜ੍ਝਾਸਯਵਸੇਨ ‘‘ਨਿਬ੍ਬਾਨਧਾਤੁਯਾ ਖੋ ਏਤ’’ਨ੍ਤਿਆਦਿਨਾ ਨਿਬ੍ਬਾਨਧਾਤੁਂ ਵਿਸ੍ਸਜ੍ਜੇਤ੍ਵਾ ਪੁਨ ‘‘ਆਸਵਾਨਂ ਖਯੋ ਤੇਨ ਵੁਚ੍ਚਤੀ’’ਤਿ ਆਹ. ਯਸ੍ਮਾ ਅਰਿਯਮਗ੍ਗੋ ਰਾਗਾਦਿਕੇ ਸਮੁਚ੍ਛੇਦਵਸੇਨ ਵਿਨੇਤਿ, ਆਸਵਞ੍ਚ ਸਬ੍ਬਸੋ ਖੇਪੇਤਿ, ਤੇਨ ਚ ਵੁਤ੍ਤਂ ਨਿਬ੍ਬਾਨਂ ਅਰਹਤ੍ਤਞ੍ਚ, ਤਸ੍ਮਾ ਤਦੁਭਯਂ ‘‘ਰਾਗਵਿਨਯੋਤਿਆਦਿ ਨਾਮਮੇਵਾ’’ਤਿ ਵੁਤ੍ਤਂ. ਅਨੁਸਨ੍ਧਿਕੁਸਲਤਾਯ ਪੁਚ੍ਛਨ੍ਤੋ ਏਤਂ ਅਵੋਚਾਤਿ ਇਮਿਨਾ ‘‘ਪੁਚ੍ਛਾਨੁਸਨ੍ਧਿ ਇਧ ਲਬ੍ਭਤੀ’’ਤਿ ਦੀਪਿਤਂ, ਅਜ੍ਝਾਸਯਾਨੁਸਨ੍ਧਿਪਿ ਏਤ੍ਥ ਲਬ੍ਭਤੇਵਾਤਿ ਦਟ੍ਠਬ੍ਬਂ.
ਦੁਤਿਯਅਞ੍ਞਤਰਭਿਕ੍ਖੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮. ਵਿਭਙ੍ਗਸੁਤ੍ਤਵਣ੍ਣਨਾ
੮. ਏਕੇਨ ਪਰਿਯਾਯੇਨ ਅਟ੍ਠਙ੍ਗਿਕਮਗ੍ਗਂ ਵਿਭਜਿਤ੍ਵਾਤਿ ‘‘ਸਮ੍ਮਾਦਿਟ੍ਠੀ’’ਤਿਆਦਿਨਾ ਏਕੇਨ ਪਰਿਯਾਯੇਨ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਵਿਭਾਗੇਨ ਦਸ੍ਸੇਤ੍ਵਾ ‘‘ਕਤਮਾ ਚ, ਭਿਕ੍ਖਵੇ, ਸਮ੍ਮਾਦਿਟ੍ਠੀ’’ਤਿਆਦਿਨਾ ਪੁਨ ਅਪਰੇਨ ਪਰਿਯਾਯੇਨ ਵਿਭਜਿਤੁਕਾਮੋ. ਉਗ੍ਗਹਧਾਰਣਪਰਿਚਯਞਾਣਾਨਿਪਿ ਸਵਨਞਾਣੇ ਏਵ ਅਵਰੋਧਂ ਗਚ੍ਛਨ੍ਤੀਤਿ ‘‘ਸਵਨਸਮ੍ਮਸਨਪਟਿਵੇਧਪਚ੍ਚਵੇਕ੍ਖਣਵਸੇਨਾ’’ਤਿ ਵੁਤ੍ਤਂ.
ਕਮ੍ਮਟ੍ਠਾਨਾਭਿਨਿਵੇਸੋਤਿ ਕਮ੍ਮਟ੍ਠਾਨਪਟਿਪਤ੍ਤਿ. ਪੁਰਿਮਾਨਿ ਦ੍ਵੇ ਸਚ੍ਚਾਨਿ ਉਗ੍ਗਣ੍ਹਿਤ੍ਵਾਤਿ ਸਮ੍ਬਨ੍ਧੋ. ਇਟ੍ਠਂ ਕਨ੍ਤਂ ਮਨਾਪਨ੍ਤਿ ਨਿਰੋਧਮਗ੍ਗੇਸੁ ਨਿਨ੍ਨਭਾਵਂ ਦਸ੍ਸੇਤਿ, ਨ ਅਭਿਨਨ੍ਦਨਂ, ਤਨ੍ਨਿਨ੍ਨਭਾਵੋ ਏਵ ਚ ਤਤ੍ਥ ਕਮ੍ਮਕਰਣਂ ਦਟ੍ਠਬ੍ਬਂ. ਏਕੇਨੇਵਾਕਾਰੇਨ ਸਚ੍ਚਾਨਂ ਪਟਿਵੇਧਨਿਮਿਤ੍ਤਤਾ, ਸੋ ਏਵ ਅਭਿਮੁਖਭਾਵੋ ਤੇਸਂ ਸਮਾਗਮੋਤਿ ਏਕਾਭਿਸਮਯੋ.
ਅਸ੍ਸਾਤਿ ਞਾਣਸ੍ਸ, ਯੋਗਿਨੋ ਵਾ. ਏਤ੍ਥ ਚ ਕੇਚਿ ‘‘ਲੋਕਿਯਞਾਣਮ੍ਪਿ ਪਟਿਵੇਧੋ ਸਬ੍ਬਸ੍ਸ ਯਾਥਾਵਬੋਧਭਾਵਤੋ’’ਤਿ ਵਦਨ੍ਤਿ. ਨਨੁ ਉਗ੍ਗਹਾਦਿਪਟਿਵੇਧੋ ਚ ਪਟਿਵੇਧੋਵ, ਨ ਚ ਸੋ ਲੋਕੁਤ੍ਤਰੋਤਿ? ਤਂ ਨ, ਕੇਵਲੇਨ ਪਟਿਵੇਧ-ਸਦ੍ਦੇਨ ਉਗ੍ਗਹਾਦਿਪਟਿਵੇਧਾਨਂ ਅਵਚਨੀਯਤ੍ਤਾ, ਪਟਿਵੇਧਨਿਮਿਤ੍ਤਤ੍ਤਾ ਵਾ ਉਗ੍ਗਹਾਦਿਵਸੇਨ ਪਵਤ੍ਤਂ ਦੁਕ੍ਖਾਦੀਸੁ ਪੁਬ੍ਬਭਾਗੇ ਞਾਣਂ ‘‘ਪਟਿਵੇਧੋ’’ਤਿ ਵੁਚ੍ਚਤਿ, ਨ ਪਟਿਵੇਧਤ੍ਤਾ, ਪਟਿਵੇਧਭੂਤਮੇਵ ਪਨ ਞਾਣਂ ਉਜੁਕਂ ਪਟਿਵੇਧੋਤਿ ਵਤ੍ਤਬ੍ਬਤਂ ਅਰਹਤਿ. ਕਿਚ੍ਚਤੋਤਿ ਪਰਿਞ੍ਞਾਦਿਕਿਚ੍ਚਤੋ. ਆਰਮ੍ਮਣਪਟਿਵੇਧੋਤਿ ਸਚ੍ਛਿਕਿਰਿਯਾਪਟਿਵੇਧਮਾਹ. ਕਿਚ੍ਚਤੋਤਿ ਅਸਮ੍ਮੋਹਪਟਿਵੇਧਂ. ਉਗ੍ਗਹਾਦੀਹਿ ਸਚ੍ਚਸ੍ਸ ਪਰਿਗ੍ਗਣ੍ਹਨਂ ਪਰਿਗ੍ਗਹੋ.
ਦੁਦ੍ਦਸਤ੍ਤਾਤਿ ਅਨਧਿਗਤਞਾਣੇਨ ਯਾਥਾਵਸਰਸਲਕ੍ਖਣਤੋ ਦਟ੍ਠੁਂ ਅਸਕ੍ਕੁਣੇਯ੍ਯਤ੍ਤਾ ਉਪ੍ਪਤ੍ਤਿਤੋ ਪਾਕਟਾਨਿਪਿ. ਤੇਨਾਹ ‘‘ਦੁਕ੍ਖਸਚ੍ਚਂ ਹੀ’’ਤਿਆਦਿ. ਉਭਯਨ੍ਤਿ ਪੁਰਿਮਂ ਸਚ੍ਚਦ੍ਵਯਂ. ਪਯੋਗੋਤਿ ਕਿਰਿਯਾ, ਵਾਯਾਮੋ ਵਾ. ਤਸ੍ਸ ਮਹਨ੍ਤਤਰਸ੍ਸ ਇਚ੍ਛਿਤਬ੍ਬਤਂ ਦੁਕ੍ਕਰਤਰਤਞ੍ਚ ਉਪਮਾਹਿ ਦਸ੍ਸੇਤਿ ‘‘ਭਵਗ੍ਗਗ੍ਗਹਣਤ੍ਥ’’ਨ੍ਤਿਆਦਿਨਾ. ਯਥਾ ਪੁਰਿਮਂ ਸਚ੍ਚਦ੍ਵਯਂ ਵਿਯ ਕੇਨਚਿ ਪਰਿਯਾਯੇਨ ਅਪਾਕਟਤਾਯ ਪਰਮਗਮ੍ਭੀਰਤ੍ਤਾ ਉਗ੍ਗਹਾਦਿਵਸੇਨ ਪੁਬ੍ਬਭਾਗੇ ਪਵਤ੍ਤਿਭੇਦਂ ਗਹੇਤ੍ਵਾ ‘‘ਦੁਕ੍ਖੇ ਞਾਣ’’ਨ੍ਤਿਆਦਿਨਾ ਚਤੁਬ੍ਬਿਧਂ ਕਤ੍ਵਾ ਵੁਤ੍ਤਂ. ਏਕਮੇਵ ਤਂ ਞਾਣਂ ਹੋਤਿ ਏਕਾਭਿਸਮਯਵਸੇਨੇਵ ਪਵਤ੍ਤਨਤੋ.
ਕਾਮਪਚ੍ਚਨੀਕਟ੍ਠੇਨਾਤਿ ਕਾਮਾਨਂ ਉਜੁਪਚ੍ਚਨੀਕਭਾਵੇਨ. ਕਾਮਤੋ ਨਿਸ੍ਸਟਭਾਵੇਨਾਤਿ ਕਾਮੇਹਿ ਵਿਸਂਯੁਤ੍ਤਭਾਵੇਨ. ਕਾਮਂ ਸਮ੍ਮਸਨ੍ਤਸ੍ਸਾਤਿ ਦੁਵਿਧਮ੍ਪਿ ਕਾਮਂ ਅਨਿਚ੍ਚਾਦਿਤੋ ਸਮ੍ਮਸਨ੍ਤਸ੍ਸ. ਪਜ੍ਜਤਿ ਪਵਤ੍ਤਤਿ ਏਤੇਨਾਤਿ ਪਦਂ, ਕਾਮਸ੍ਸ ਪਦਨ੍ਤਿ ਕਾਮਪਦਂ, ਕਾਮਸ੍ਸ ਉਪ੍ਪਤ੍ਤਿਕਾਰਣਸ੍ਸ ਘਾਤੋ ਸਮੁਗ੍ਘਾਤੋ, ਤਂ ਕਾਮਪਦਘਾਤਂ. ਤੇਨਾਹ ‘‘ਕਾਮਵੂਪਸਮ’’ਨ੍ਤਿ. ਕਾਮੇਹਿ ਵਿਵਿਤ੍ਤਂ ਕਾਮਵਿਵਿਤ੍ਤਂ. ਸੋ ਏਵ ਚ ਨੇਸਂ ਅਨ੍ਤੋ ਸਮੁਚ੍ਛੇਦਵਿਵੇਕੇਤਿ ਕਤ੍ਵਾ ਤਸ੍ਮਿਂ ਸਾਧੇਤਬ੍ਬੇ ਉਪ੍ਪਨ੍ਨੋਤਿ ਵੁਤ੍ਤਂ ‘‘ਕਾਮਵਿਵਿਤ੍ਤਨ੍ਤੇ ਉਪ੍ਪਨ੍ਨੋ’’ਤਿ. ਕਾਮਤੋ ਨਿਕ੍ਖਮਤੀਤਿ ਨਿਕ੍ਖਮੋ, ਸੋ ਏਵ ਨੇਕ੍ਖਮ੍ਮਸਙ੍ਕਪ੍ਪੋ. ਇਮਸ੍ਮਿਞ੍ਚ ਨੇਕ੍ਖਮ੍ਮਸਙ੍ਕਪ੍ਪਸ੍ਸ ਸਦ੍ਦਤ੍ਥਵਿਭਾਵੇਨ ਯਥਾਵੁਤ੍ਤੋ ਕਾਮਪਚ੍ਚਨੀਕਟ੍ਠਾਦਿਕੋ ਅਤ੍ਥਨਿਦ੍ਧਾਰਣਵਿਸੇਸੋ ਅਨ੍ਤੋਗਧੋ.
ਏਸੇਵ ਨਯੋਤਿ ਇਮਿਨਾ ਬ੍ਯਾਪਾਦਪਚ੍ਚਨੀਕਟ੍ਠੇਨ ਵਿਹਿਂਸਾਯ ਪਚ੍ਚਨੀਕਟ੍ਠੇਨਾਤਿਆਦਿਕਂ ਅਬ੍ਯਾਪਾਦਾਵਿਹਿਂਸਾਸਙ੍ਕਪ੍ਪਾਨਂ ਅਤ੍ਥੁਦ੍ਧਾਰਣਵਿਧਿਂ ਅਤਿਦਿਸਤਿ. ਨੇਕ੍ਖਮ੍ਮਸਙ੍ਕਪ੍ਪਾਦਯੋਤਿ ਆਦਿ-ਸਦ੍ਦੇਨ ਅਬ੍ਯਾਪਾਦਅਵਿਹਿਂਸਾਸਙ੍ਕਪ੍ਪੇ ਏਵ ਸਙ੍ਗਣ੍ਹਾਤਿ. ਕਾਮ…ਪੇ… ਸਞ੍ਞਾਨਨ੍ਤਿ ਕਾਮਵਿਤਕ੍ਕਾਦਿਵਿਰਤਿਸਮ੍ਪਯੁਤ੍ਤਾਨਂ ਨੇਕ੍ਖਮ੍ਮਾਦਿਸਞ੍ਞਾਨਂ. ਨਾਨਤ੍ਤਾਤਿ ਨਾਨਾਖਣਿਕਤ੍ਤਾ. ਤੀਸੁ ਠਾਨੇਸੂਤਿ ਤਿਪ੍ਪਕਾਰੇਸੁ ਕਾਰਣੇਸੁ. ਉਪ੍ਪਨ੍ਨਸ੍ਸਾਤਿ ਉਪ੍ਪਜ੍ਜਨਾਰਹਸ੍ਸ. ਭੂਮਿਲਦ੍ਧਉਪ੍ਪਨ੍ਨਂ ਇਧਾਧਿਪ੍ਪੇਤਂ. ਏਸ ਨਯੋ ਇਤੋ ਪਰੇਸੁਪਿ. ਪਦਚ੍ਛੇਦਤੋਤਿ ਕਾਰਣੁਪਚ੍ਛੇਦਤੋ. ਪਦਨ੍ਤਿ ਹਿ ਉਪ੍ਪਤ੍ਤਿਕਾਰਣਨ੍ਤਿ ਵੁਤ੍ਤੋਵਾਯਮਤ੍ਥੋ. ਅਨੁਪ੍ਪਤ੍ਤਿਸਾਧਨਵਸੇਨਾਤਿ ਯਥਾ ਸਙ੍ਕਪ੍ਪੋ ਆਯਤਿਂ ਨੁਪ੍ਪਜ੍ਜਤਿ, ਏਵਂ ਅਨੁਪ੍ਪਤ੍ਤਿਸਾਧਨਵਸੇਨ. ਸਮ੍ਮਾਦਿਟ੍ਠਿ ਵਿਯ ਏਕੋਵ ਕੁਸਲਸਙ੍ਕਪ੍ਪੋ ਉਪ੍ਪਜ੍ਜਤਿ.
ਚਤੂਸੁ ਠਾਨੇਸੂਤਿ ਵਿਸਂਵਾਦਨਾਦੀਸੁ ਚਤੂਸੁ ਵੀਤਿਕ੍ਕਮਟ੍ਠਾਨੇਸੁ. ਪਬ੍ਬਜਿਤਾਨਂ ਮਿਚ੍ਛਾਜੀਵੋ ਨਾਮ ਆਹਾਰਨਿਮਿਤ੍ਤਕੋਤਿ ਆਹ ‘‘ਖਾਦਨੀਯਭੋਜਨੀਯਾਦੀਨਂ ਅਤ੍ਥਾਯਾ’’ਤਿ. ਸਬ੍ਬਸੋ ਅਨੇਸਨਾਯ ਪਹਾਨਂ ਸਮ੍ਮਾਆਜੀਵੋਤਿ ਆਹ ‘‘ਬੁਦ੍ਧਪ੍ਪਸਤ੍ਥੇਨ ਆਜੀਵੇਨਾ’’ਤਿ. ਕਮ੍ਮਪਥਪਤ੍ਤਾਨਂ ਵਸੇਨ ‘‘ਸਤ੍ਤਸੁ ਠਾਨੇਸੂ’’ਤਿ ਵੁਤ੍ਤਂ. ਅਕਮ੍ਮਪਥਪਤ੍ਤਾਯ ਹਿ ਅਨੇਸਨਾਯ ਸੋ ਪਦਘਾਤਂ ਕਰੋਤਿਯੇਵ.
ਤਥਾਰੂਪੇ ਵਾ ਆਰਮ੍ਮਣੇਤਿ ਯਸ੍ਮਿਂ ਆਰਮ੍ਮਣੇ ਇਮਸ੍ਸ ਪੁਬ੍ਬੇ ਕਿਲੇਸਾ ਨ ਉਪ੍ਪਨ੍ਨਾ, ਤਸ੍ਮਿਂ ਏਵ. ਅਨੁਪ੍ਪਨ੍ਨਾਨਨ੍ਤਿ ਅਨੁਪ੍ਪਾਦਸ੍ਸਪਿ ਪਤ੍ਥਨਾਵਸੇਨ ਅਨੁਪ੍ਪਨ੍ਨਾਨਂ. ਵੀਰਿਯਚ੍ਛਨ੍ਦਨ੍ਤਿ ਵੀਰਿਯਸ੍ਸ ਨਿਬ੍ਬਤ੍ਤੇਤੁਕਾਮਤਾਛਨ੍ਦਂ. ‘‘ਛਨ੍ਦਸਮ੍ਪਯੁਤ੍ਤਵੀਰਿਯਞ੍ਚਾ’’ਤਿ ਵਦਨ੍ਤਿ. ਵੀਰਿਯਮੇਵ ਪਨ ਅਨੁਪ੍ਪਨ੍ਨਾਕੁਸਲਾਨੁਪ੍ਪਾਦਨੇ ਲਬ੍ਭਮਾਨਛਨ੍ਦਤਾਯ ਧੁਰਸਮ੍ਪਗ੍ਗਹਤਾਯ ਛਨ੍ਦਪਰਿਯਾਯੇਨ ਵੁਤ੍ਤਂ. ਤਥਾ ਹਿ ਵੀਰਿਯਂ – ‘‘ਅਨਿਕ੍ਖਿਤ੍ਤਛਨ੍ਦਤਾ ਅਨਿਕ੍ਖਿਤ੍ਤਧੁਰਤਾ’’ਤਿ (ਧ. ਸ. ੨੬) ਨਿਦ੍ਦਿਟ੍ਠਂ. ਕੋਸਜ੍ਜਪਕ੍ਖੇ ਪਤਿਤੁਂ ਅਦਤ੍ਵਾ ਚਿਤ੍ਤਂ ਪਗ੍ਗਹਿਤਂ ਕਰੋਤਿ. ਪਧਾਨਨ੍ਤਿ ਪਧਾਨਭੂਤਵੀਰਿਯਂ.
ਉਪ੍ਪਤ੍ਤਿਪਬਨ੍ਧਵਸੇਨਾਤਿ ਨਿਰਨ੍ਤਰੁਪ੍ਪਾਦਨਵਸੇਨ. ਚਤੂਸੁ ਠਾਨੇਸੁ ਕਿਚ੍ਚਸਾਧਨਵਸੇਨਾਤਿ ਯਥਾਵੁਤ੍ਤੇਸੁ ਚਤੂਸੁ ਠਾਨੇਸੁ ਪਧਾਨਕਿਚ੍ਚਸ੍ਸ ਨਿਪ੍ਫਾਦਨਵਸੇਨ ਅਨੁਪ੍ਪਾਦਨਾਦਿਵਸੇਨ. ਕਿਚ੍ਚਸਾਧਨਵਸੇਨਾਤਿ ਕਾਯਵੇਦਨਾਚਿਤ੍ਤਧਮ੍ਮੇਸੁ ਸੁਭਸੁਖਨਿਚ੍ਚਅਤ੍ਤਗਾਹਵਿਧਮਨਵਸੇਨ ਅਸੁਭਦੁਕ੍ਖਾਨਿਚ੍ਚਾਨਤ੍ਤਸਾਧਨਵਸੇਨ.
ਅਯਨ੍ਤਿ ਯਥਾਵੁਤ੍ਤੋ ਸਦਿਸਾਸਦਿਸਤਾਵਿਸੇਸੋ. ਅਸ੍ਸਾਤਿ ਮਗ੍ਗਸ੍ਸ. ਏਤ੍ਥ ਕਥਨ੍ਤਿ ਯਦਿ ਰੂਪਾਵਚਰਚਤੁਤ੍ਥਜ੍ਝਾਨਤੋ ਪਟ੍ਠਾਯ ਯਾਵ ਸਬ੍ਬਭਵਗ੍ਗਾ ਝਾਨਙ੍ਗਮਗ੍ਗਙ੍ਗਬੋਜ੍ਝਙ੍ਗਾਨਂ ਸਦਿਸਤਾ, ਏਵਂ ਸਨ੍ਤੇ ‘‘ਆਰੁਪ੍ਪੇ ਚਤੁਕ੍ਕਪਞ੍ਚਕਜ੍ਝਾਨਂ ਉਪ੍ਪਜ੍ਜਤਿ, ਤਞ੍ਚ ਲੋਕੁਤ੍ਤਰ’’ਨ੍ਤਿ ਏਤ੍ਥ ਕਥਂ ਅਤ੍ਥੋ ਗਹੇਤਬ੍ਬੋਤਿ ਆਹ ‘‘ਏਤ੍ਥਾਪੀ’’ਤਿਆਦਿ. ਤਂਝਾਨਿਕਾਵਾਤਿ ਪਠਮਜ੍ਝਾਨਾਦੀਸੁ ਯਂ ਝਾਨਂ ਮਗ੍ਗਪਟਿਲਾਭਸ੍ਸ ਪਾਦਕਭੂਤਂ, ਤਂਝਾਨਿਕਾਵ ਅਸ੍ਸ ਅਰਿਯਸ੍ਸ ਉਪਰਿਪਿ ਤਯੋ ਮਗ੍ਗਾ. ਏਵਨ੍ਤਿ ਵੁਤ੍ਤਾਕਾਰੇਨ. ਪਾਦਕਜ੍ਝਾਨਮੇਵ ਨਿਯਮੇਤਿ ਆਰੁਪ੍ਪੇ ਚਤੁਕ੍ਕਪਞ੍ਚਕਜ੍ਝਾਨੁਪ੍ਪਤ੍ਤਿਯਂ. ਵਿਪਸ੍ਸਨਾਯ ਆਰਮ੍ਮਣਭੂਤਾ ਖਨ੍ਧਾਤਿ ਸਮ੍ਮਸਿਤਖਨ੍ਧੇ ਵਦਨ੍ਤਿ. ਪੁਗ੍ਗਲਜ੍ਝਾਸਯੋ ਨਿਯਮੇਤਿ ਪਾਦਕਸਮ੍ਮਸਿਤਜ੍ਝਾਨਾਨਂ ਭੇਦੇ. ਯਸ੍ਮਾ ਸਙ੍ਖਾਰੁਪੇਕ੍ਖਾਞਾਣਮੇਵ ਅਰਿਯਮਗ੍ਗਸ੍ਸ ਬੋਜ੍ਝਙ੍ਗਾਦਿਵਿਸੇਸਂ ਨਿਯਮੇਤਿ, ਤਤੋ ਦੁਤਿਯਾਦਿਪਾਦਕਜ੍ਝਾਨਤੋ ਉਪ੍ਪਨ੍ਨਸ੍ਸ ਸਙ੍ਖਾਰੁਪੇਕ੍ਖਾਞਾਣਸ੍ਸ ਪਾਦਕਜ੍ਝਾਨਾਤਿਕ੍ਕਨ੍ਤਾਨਂ ਅਙ੍ਗਾਨਂ ਅਸਮਾਪਜ੍ਜਿਤੁਕਾਮਤਾਵਿਰਾਗਭਾਵਤੋ ਇਤਰਸ੍ਸ ਚ ਅਤਬ੍ਭਾਵਤੋ ਤੀਸੁਪਿ ਵਾਦੇਸੁ ਵਿਪਸ੍ਸਨਾਵ ਨਿਯਮੇਤੀਤਿ ਵੇਦਿਤਬ੍ਬੋ, ਤਸ੍ਮਾ ਵਿਪਸ੍ਸਨਾਨਿਯਮੇਨੇਵ ਹਿ ਪਠਮਵਾਦੇਪਿ ਅਪਾਦਕਜ੍ਝਾਨਾਦਿਪਾਦਕਾਪਿ ਮਗ੍ਗਾ ਪਠਮਜ੍ਝਾਨਿਕਾ ਹੋਨ੍ਤਿ. ਇਤਰੇਹਿ ਚ ਪਾਦਕਜ੍ਝਾਨੇਹਿ ਵਿਪਸ੍ਸਨਾਨਿਯਮੇਹਿ ਤਂਤਂਝਾਨਿਕਾਵ. ਏਵਂ ਸੇਸਵਾਦੇਸੁ ਵਿਪਸ੍ਸਨਾਨਿਯਮੋ ਯਥਾਸਮ੍ਭਵਂ ਯੋਜੇਤਬ੍ਬੋ. ਦੁਤਿਯਵਾਦੇ ਤਂਤਂਝਾਨਿਕਤਾ ਸਮ੍ਮਸਿਤਸਙ੍ਖਾਰਵਿਪਸ੍ਸਨਾਨਿਯਮੇਹਿ ਹੋਤਿ. ਤਤ੍ਰ ਹਿ ਵਿਪਸ੍ਸਨਾ ਤਂਤਂਵਿਰਾਗਭਾਵਨਾ ਭਾਵੇਤਬ੍ਬਾ, ਨ ਸੋਮਨਸ੍ਸਸਹਗਤਾ ਉਪੇਕ੍ਖਾਸਹਗਤਾ ਹੁਤ੍ਵਾ ਝਾਨਙ੍ਗਾਦਿਨਿਯਮਂ ਮਗ੍ਗਸ੍ਸ ਕਰੋਤੀਤਿ ਏਵਂ ਵਿਪਸ੍ਸਨਾਨਿਯਮੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਇਮਸ੍ਮਿਞ੍ਚ ਵਾਦੇ ਪਾਦਕਸਮ੍ਮਸਿਤਜ੍ਝਾਨੁਪਨਿਸ੍ਸਯਸਬ੍ਭਾਵੇ ਅਜ੍ਝਾਸਯੋ ਏਕਨ੍ਤੇਨ ਹੋਤੀਤਿ ‘‘ਪੁਗ੍ਗਲਜ੍ਝਾਸਯੋ ਨਿਯਮੇਤੀਤਿ ਵਦਨ੍ਤੀ’’ਤਿ ਵੁਤ੍ਤਂ, ਅਟ੍ਠਕਥਾਯਂ ਪਨ ਵਿਸੁਦ੍ਧਿਮਗ੍ਗਸ੍ਸ ਏਤਿਸ੍ਸਾ ਅਟ੍ਠਕਥਾਯ ਏਕਸਙ੍ਗਹਿਤਤ੍ਤਾ ‘‘ਤੇਸਂ ਵਾਦਵਿਨਿਚ੍ਛਯੋ…ਪੇ… ਵੇਦਿਤਬ੍ਬੋ’’ਤਿ ਵੁਤ੍ਤਂ. ਪੁਬ੍ਬਭਾਗੇਤਿ ਵਿਪਸ੍ਸਨਾਕ੍ਖਣੇ.
ਵਿਭਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੯. ਸੂਕਸੁਤ੍ਤਵਣ੍ਣਨਾ
੯. ਸੂਕਨ੍ਤਿ ਸਾਲਿਯਵਾਦੀਨਂ ਵਾਲਮਾਹ. ਸੋ ਹਿ ਨਿਕਨ੍ਤਕਸਦਿਸੋ ਪਟਿਮੁਖਗਤਂ ਹਤ੍ਥਂ ਵਾ ਪਾਦਂ ਵਾ ਭਿਨ੍ਦਤਿ, ਤਸ੍ਮਾ ਭੇਦਂ ਇਚ੍ਛਨ੍ਤੇਨ ਉਦ੍ਧਗ੍ਗਂ ਕਤ੍ਵਾ ਠਪਿਤਂ ਸਮ੍ਮਾਪਣਿਹਿਤਂ ਨਾਮ, ਤਥਾ ਅਟ੍ਠਪਿਤਂ ਮਿਚ੍ਛਾਪਣਿਹਿਤਂ ਨਾਮਾਤਿ ਵੁਤ੍ਤਂ. ਮਿਚ੍ਛਾਪਣਿਹਿਤਾਯਾਤਿ ਕਮ੍ਮਸ੍ਸਕਤਪਞ੍ਞਾਯ ਮਿਚ੍ਛਾਠਪਨਂ ਨਾਮ – ‘‘ਇਮੇ ਸਤ੍ਤਾ ਕਮ੍ਮਵਸੇਨ ਸੁਖਦੁਕ੍ਖਂ ਪਚ੍ਚਨੁਭਵਨ੍ਤਿ, ਤਂ ਪਨ ਕਮ੍ਮਂ ਇਸ੍ਸਰਸ੍ਸ ਇਚ੍ਛਾਵਸੇਨ ਬ੍ਰਹ੍ਮਾ ਨਿਮ੍ਮਿਨਾਤੀ’’ਤਿਆਦਿਨਾ ਮਿਚ੍ਛਾਪਕਪ੍ਪਨਂ. ਕੇਚਿ ਪਨ ‘‘ਨਤ੍ਥਿ ਦਿਨ੍ਨਨ੍ਤਿਆਦਿਨਾ ਨਯੇਨ ਪਵਤ੍ਤਿ, ਤਸ੍ਸ ਵਾ ਞਾਣਸ੍ਸ ਅਪ੍ਪਵਤ੍ਤੀ’’ਤਿ ਵਦਨ੍ਤਿ. ਮਗ੍ਗਭਾਵਨਾਯਾਤਿ ਏਤ੍ਥਾਪਿ ਮਿਚ੍ਛਾਮਗ੍ਗਸ੍ਸ ਪਵਤ੍ਤਨਂ, ਅਰਿਯਮਗ੍ਗਸ੍ਸ ਵਾ ਅਪ੍ਪਵਤ੍ਤਨਂ ਮਿਚ੍ਛਾਠਪਨਂ. ਤੇਨਾਹ ‘‘ਅਪ੍ਪਵਤ੍ਤਿਤਤ੍ਤਾ’’ਤਿ. ਅਵਿਜ੍ਜਂ ਭਿਨ੍ਦਿਸ੍ਸਤੀਤਿ ਅਵਿਜ੍ਜਂ ਸਮੁਚ੍ਛਿਨ੍ਦਿਸ੍ਸਤਿ. ਮਗ੍ਗਨਿਸ੍ਸਿਤਂ ਕਤ੍ਵਾ ਮਗ੍ਗੇ ਏਵ ਪਕ੍ਖਿਪਿਤ੍ਵਾ. ਤਞ੍ਹਿ ਞਾਣਂ ਮਗ੍ਗਸ੍ਸ ਮੂਲਕਾਰਣਂ ਮਗ੍ਗੇ ਸਿਦ੍ਧੇ ਤਸ੍ਸ ਕਿਚ੍ਚਸ੍ਸ ਮਤ੍ਥਕਪ੍ਪਤ੍ਤਿਤੋ. ‘‘ਸਮ੍ਮਾਪਣਿਹਿਤਾਯ ਦਿਟ੍ਠਿਯਾ ਸਮ੍ਮਾਪਣਿਹਿਤਾਯ ਮਗ੍ਗਭਾਵਨਾਯਾ’’ਤਿ ਵੁਤ੍ਤਤ੍ਤਾ ਮਿਸ੍ਸਕਮਗ੍ਗੋ ਕਥਿਤੋ. ਛਵਿਭੇਦਸਦਿਸੋ ਚੇਤ੍ਥ ਅਵਿਜ੍ਜਾਭੇਦੋ, ਲੋਹਿਤੁਪ੍ਪਾਦਸਦਿਸੋ ਲੋਕੁਤ੍ਤਰਮਗ੍ਗਭਾਵੋ ਦਟ੍ਠਬ੍ਬੋ.
ਸੂਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਨਨ੍ਦਿਯਸੁਤ੍ਤਵਣ੍ਣਨਾ
੧੦. ਛਨ੍ਨਪਰਿਬ੍ਬਾਜਕੋ ਵਤ੍ਥਚ੍ਛਾਦਿਯਾ ਛਨ੍ਨਙ੍ਗਪਰਿਬ੍ਬਾਜਕੋ, ਨ ਨਗ੍ਗਪਰਿਬ੍ਬਾਜਕੋ.
ਅਵਿਜ੍ਜਾਵਗ੍ਗਵਣ੍ਣਨਾ ਨਿਟ੍ਠਿਤਾ.