੭. ਚਿਤ੍ਤਸਂਯੁਤ੍ਤਂ

੧. ਸਂਯੋਜਨਸੁਤ੍ਤਵਣ੍ਣਨਾ

੩੪੩. ਭੋਗਗਾਮਨ੍ਤਿ ਭੋਗੁਪ੍ਪਤ੍ਤਿਗਾਮਂ. ਪਵਤ੍ਤਤੀਤਿ ਅਪ੍ਪਟਿਹਤਂ ਹੁਤ੍ਵਾ ਪਵਤ੍ਤਤਿ ਪਟਿਸਮ੍ਭਿਦਪ੍ਪਤ੍ਤਿਯਾ.

ਸਂਯੋਜਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪਠਮਇਸਿਦਤ੍ਤਸੁਤ੍ਤਵਣ੍ਣਨਾ

੩੪੪. ਅਵਿਸਾਰਦਤ੍ਤਾਤਿ ਪਞ੍ਹਂ ਬ੍ਯਾਕਾਤੁਂ ਵੇਯ੍ਯਤ੍ਤਿਯਾਭਾਵੇਨ ਅਸਮਤ੍ਥਤ੍ਤਾ. ਉਪਾਸਕੋ ਥੇਰੇਸੁ ਬ੍ਯਾਕਾਤੁਂ ਅਸਕ੍ਕੋਨ੍ਤੇਸੁ ਸਯਂ ਬ੍ਯਾਕਾਤੁਕਾਮੋ ਪੁਚ੍ਛਤਿ, ਨ ਵਿਹੇਸਾਧਿਪ੍ਪਾਯੋ. ਪਠਮਵਚਨੇਨ ਅਬ੍ਯਾਕਰੋਨ੍ਤੇ ਦਿਸ੍ਵਾਵ ਪੁਨਪ੍ਪੁਨਂ ਪੁਚ੍ਛਿਤਂ ਵਿਹੇਸੋ ਵਿਯ ਹੋਤੀਤਿ ਕਤ੍ਵਾ ਵੁਤ੍ਤਂ ‘‘ਵਿਹੇਸੇਤੀ’’ਤਿ.

ਪਠਮਇਸਿਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਦੁਤਿਯਇਸਿਦਤ੍ਤਸੁਤ੍ਤਵਣ੍ਣਨਾ

੩੪੫. ਅਵਨ੍ਤਿਯਾਤਿ ਅਵਨ੍ਤਿਰਟ੍ਠੇ, ਤਂ ਪਨ ਮਜ੍ਝਿਮਪਦੇਸਤੋ ਦਕ੍ਖਿਣਦਿਸਾਯਂ. ਤੇਨਾਹ ‘‘ਦਕ੍ਖਿਣਾਪਥੇ’’ਤਿ. ਅਧਿਪ੍ਪਾਯੇਨਾਤਿ ਤਸ੍ਸ ਵਚਨਸ੍ਸ ਅਨੁਮੋਦਨਾਧਿਪ੍ਪਾਯੇਨ ਵਦਤਿ, ਨ ਪਨ ਤਤੋ ਕਿਞ੍ਚਿ ਗਹੇਤੁਕਾਮਤਾਧਿਪ੍ਪਾਯੇਨ.

ਦੁਤਿਯਇਸਿਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਮਹਕਪਾਟਿਹਾਰਿਯਸੁਤ੍ਤਵਣ੍ਣਨਾ

੩੪੬. ਤੇਸਂ ਅਨੁਜਾਨਨ੍ਤੋਤਿ ਤੇਸਂ ਦਾਸਕਮ੍ਮਕਰਾਨਂ ਸੇਸਕੇ ਯਥਾਰੁਚਿ ਵਿਚਾਰਣਂ ਅਨੁਜਾਨਨ੍ਤੋ. ਕੁਧਿਤਨ੍ਤਿ ਬਲਵਤਾ ਸੂਰਿਯਸਨ੍ਤਾਪੇਨ ਸਙ੍ਕੁਥਿਤਂ. ਤੇਨਾਹ ‘‘ਹੇਟ੍ਠਾ’’ਤਿਆਦਿ. ਅਤਿਤਿਖਿਣਨ੍ਤਿ ਅਤਿਵਿਯ ਤਿਕ੍ਖਧਾਤੁਕਂ. ਅਸਮ੍ਭਿਨ੍ਨਪਦਨ੍ਤਿ ਅਞ੍ਞਤ੍ਥ ਅਨਾਗਤਤ੍ਤਾ ਤਿਪਿਟਕੇ ਅਵੋਮਿਸ੍ਸਕਪਦਂ, ਇਧੇਵ ਆਗਤਪਦਨ੍ਤਿ ਅਤ੍ਥੋ. ਪਟਿਲੀਯਮਾਨੇਨਾਤਿ ਪਟਿਕਂਸੇਨ ਵਿਸੇਸਨੇਨ ਵਿਲੀਯਮਾਨੇਨ ਕਾਯੇਨ.

ਏਤ੍ਥ ਚਾਤਿ ਏਤਸ੍ਮਿਂ ਅਧਿਟ੍ਠਾਨਿਦ੍ਧਿਕਰਣੇ. ਅਬ੍ਭਮਣ੍ਡਪਂ ਕਤ੍ਵਾਤਿ ਸਮਨ੍ਤਤੋ ਛਾਦਨਵਸੇਨ ਮਣ੍ਡਪਂ ਵਿਯ ਮੇਘਪਟਲਂ ਉਪ੍ਪਾਦੇਤ੍ਵਾ. ਦੇਵੋਤਿ ਮੇਘੋ. ਏਕਮੇਕਂ ਫੁਸਿਤਕਂ ਫੁਸਾਯਤੁ ਜਾਲਵਿਨਦ੍ਧਂ ਵਿਯ ਵਸ੍ਸਤੁ. ਏਵਂ ਵੁਤ੍ਤਪ੍ਪਕਾਰੇਨ ਨਾਨਾਪਰਿਕਮ੍ਮਂ ਨਾਨਾਧਿਟ੍ਠਾਨਂ ਏਕਤੋ ਪਰਿਕਮ੍ਮਂ ਏਕਤੋ ਅਧਿਟ੍ਠਾਨਨ੍ਤਿ ਚਤੁਕ੍ਕਮੇਤ੍ਥ ਸਮ੍ਭਵਤੀਤਿ ਦਸ੍ਸੇਤਿ ‘‘ਏਤ੍ਥ ਚਾ’’ਤਿਆਦਿਨਾ. ਯਥਾ ਤਥਾਤਿ ਯਥਾਵੁਤ੍ਤੇਸੁ ਚਤੂਸੁ ਪਕਾਰੇਸੁ ਯੇਨ ਵਾ ਤੇਨ ਵਾ ਪਕਾਰੇਨ ਕਰੋਨ੍ਤਸ੍ਸ. ਕਤਪਰਿਕਮ੍ਮਸ੍ਸਾਤਿ ‘‘ਏਵਂ ਵਾ ਏਵਂ ਵਾ ਹੋਤੂ’’ਤਿ ਪਵਤ੍ਤਿਤਪਰਿਕਮ੍ਮਚਿਤ੍ਤਸ੍ਸ. ‘‘ਪਰਿਕਮ੍ਮਾਨਨ੍ਤਰੇਨਾਤਿ ਅਧਿਟ੍ਠਾਨਚਿਤ੍ਤੁਪ੍ਪਾਦਨਤ੍ਥਂ ਸਮਾਪਨ੍ਨਪਾਦਕਜ੍ਝਾਨਤੋ ਵੁਟ੍ਠਾਯ ਅਧਿਟ੍ਠਾਨਚਿਤ੍ਤਸ੍ਸ ਏਕਾਵਜ੍ਜਨਵੀਥਿਯਂ ਪਵਤ੍ਤਪਰਿਕਮ੍ਮਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਦਨ੍ਤਿ.

ਮਹਕਪਾਟਿਹਾਰਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਪਠਮਕਾਮਭੂਸੁਤ੍ਤਵਣ੍ਣਨਾ

੩੪੭. ਏਲਂ ਵੁਚ੍ਚਤਿ ਦੋਸੋ, ਤਂ ਏਤਸ੍ਸ ਨਤ੍ਥੀਤਿ ਨੇਲਂ, ਤਂ ਅਙ੍ਗਂ ਏਤਸ੍ਸਾਤਿ ਨੇਲਙ੍ਗੋ, ਸੁਵਿਸੁਦ੍ਧਸੀਲਗੁਣੋ. ਤੇਨਾਹ ‘‘ਨੇਲਙ੍ਗਨ੍ਤਿ ਖੋ, ਭਨ੍ਤੇ, ਸੀਲਾਨਮੇਤਂ ਅਧਿਵਚਨ’’ਨ੍ਤਿ. ਅਟ੍ਠਕਥਾਯਂ ਪਨ ਦੋਸਾਭਾਵਮੇਵ ਦਸ੍ਸੇਤੁਂ ‘‘ਨੇਲਙ੍ਗੋਤਿ ਨਿਦ੍ਦੋਸੋ’’ਤਿ ਵੁਤ੍ਤਂ. ਏਤਂ ਭਿਕ੍ਖੁਂ ਆਗਚ੍ਛਨ੍ਤਨ੍ਤਿ ਮਹਾਕਪ੍ਪਿਨਤ੍ਥੇਰਂ ਸਨ੍ਧਾਯ ਵੁਤ੍ਤਂ. ਅਤ੍ਤਨੋ ਦਿਟ੍ਠੇਨ ਕਥੇਸੀਤਿ ਅਤ੍ਤਨੋ ਸਬ੍ਬਞ੍ਞੁਤਞ੍ਞਾਣੇਨ ਪਚ੍ਚਕ੍ਖਤੋ ਉਪਲਕ੍ਖਿਤੇਨ ਅਤ੍ਥੇਨ ਕਥੇਸਿ. ਅਯਂ ਪਨ ਨਯਗ੍ਗਾਹੇਨਾਤਿ ਅਯਂ ਪਨ ਗਹਪਤਿ ਅਸੁਤ੍ਵਾ ਕੇਵਲਂ ਨਯਗ੍ਗਾਹੇਨ ਆਹ.

ਪਠਮਕਾਮਭੂਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਦੁਤਿਯਕਾਮਭੂਸੁਤ੍ਤਵਣ੍ਣਨਾ

੩੪੮. ਨਿਰੋਧਂ ਵਲਞ੍ਜੇਤਿ ਅਨਾਗਾਮਿਭਾਵਤੋ. ਇਮੇ ਸਙ੍ਖਾਰਾਤਿ ਇਮੇ ‘‘ਕਾਯਸਙ੍ਖਾਰੋ, ਵਚੀਸਙ੍ਖਾਰੋ, ਚਿਤ੍ਤਸਙ੍ਖਾਰੋ’’ਤਿ ਵੁਚ੍ਚਮਾਨਾ ਤਯੋ ਸਙ੍ਖਾਰਾ. ਸਦ੍ਦਤੋਪਿ, ਅਤ੍ਥਤੋਪਿ ਅਞ੍ਞਮਞ੍ਞਂ ਮਿਸ੍ਸਾ, ਤਤੋ ਏਵ ਆਲੁਲ਼ਿਤਾ ਆਕੁਲਾ, ਅਵਿਭੂਤਾ ਦੁਬ੍ਬਿਭਾਵਨਾ, ਦੁਦ੍ਦੀਪਨਾ ਅਸਙ੍ਕਰਤੋ ਦੀਪੇਤੁਂ ਦੁਕ੍ਕਰਾ. ਤਥਾ ਹਿ ਕੁਸਲਚੇਤਨਾ ਏਵ ‘‘ਕਾਯਸਙ੍ਖਾਰੋ’’ਤਿਪਿ ਵੁਚ੍ਚਤਿ, ‘‘ਵਚੀਸਙ੍ਖਾਰੋ’’ਤਿਪਿ, ‘‘ਚਿਤ੍ਤਸਙ੍ਖਾਰੋ’’ਤਿਪਿ. ਅਸ੍ਸਾਸਪਸ੍ਸਾਸਾਪਿ ਕਤ੍ਥਚਿ ‘‘ਕਾਯਸਙ੍ਖਾਰੋ’’ਤਿ, ਵਿਤਕ੍ਕਵਿਚਾਰਾਪਿ ‘‘ਵਚੀਸਙ੍ਖਾਰੋ’’ਤਿ ਵੁਚ੍ਚਨ੍ਤਿ, ਸਞ੍ਞਾਵੇਦਨਾਪਿ ‘‘ਚਿਤ੍ਤਸਙ੍ਖਾਰੋ’’ਤਿ ਵੁਚ੍ਚਨ੍ਤਿ. ਤੇਨ ਵੁਤ੍ਤਂ ‘‘ਤਥਾ ਹੀ’’ਤਿਆਦਿ. ਤਤ੍ਥ ਆਕਡ੍ਢਿਤ੍ਵਾ ਗਹਣਂ ਆਦਾਨਂ, ਸਮ੍ਪਤ੍ਤਸ੍ਸ ਹਤ੍ਥੇ ਕਰਣਂ ਗਹਣਂ, ਗਹਿਤਸ੍ਸ ਵਿਸ੍ਸਜ੍ਜਨਂ ਮੁਞ੍ਚਨਂ, ਫਨ੍ਦਨਂ ਚੋਪਨਂ ਪਾਪੇਤ੍ਵਾ ਨਿਪ੍ਫਾਦੇਤ੍ਵਾ. ਹਨੁਸਞ੍ਚੋਪਨਨ੍ਤਿ ਕਾਯਵਿਞ੍ਞਤ੍ਤਿਵਸੇਨ ਪੁਬ੍ਬਭਾਗੇ ਹਨੁਸਞ੍ਚੋਪਨਂ ਕਤ੍ਵਾ. ਏਵਞ੍ਹਿ ਵਚੀਭੇਦਕਰਣਂ. ਏਵਂ ਇਮੇਤਿਆਦਿ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਨਿਗਮਨਂ.

ਪਦਤ੍ਥਂ ਪੁਚ੍ਛਤਿ ਇਤਰਸਙ੍ਖਾਰੇਹਿ ਪਦਤ੍ਥਤੋ ਵਿਸੇਸਂ ਕਥਾਪੇਸ੍ਸਾਮੀਤਿ. ਕਾਯਨਿਸ੍ਸਿਤਾਤਿ ਏਤ੍ਥ ਕਾਯਨਿਸ੍ਸਿਤਤਾ ਚ ਨੇਸਂ ਤਬ੍ਭਾਵਭਾਵਿਤਾਯ ਵੇਦਿਤਬ੍ਬਾ, ਨ ਕਾਯਸ੍ਸ ਨਿਸ੍ਸਯਪਚ੍ਚਯਤਾਵਸੇਨਾਤਿ ਦਸ੍ਸੇਨ੍ਤੋ ‘‘ਕਾਯੇ ਸਤਿ ਹੋਨ੍ਤਿ, ਅਸਤਿ ਨ ਹੋਨ੍ਤੀ’’ਤਿ ਆਹ. ਕਾਯੋਤਿ ਚੇਤ੍ਥ ਕਰਜਕਾਯੋ ਦਟ੍ਠਬ੍ਬੋ. ਚਿਤ੍ਤਨਿਸ੍ਸਿਤਾਤਿ ਚਿਤ੍ਤਂ ਨਿਸ੍ਸਾਯ ਤਂ ਨਿਸ੍ਸਯਪਚ੍ਚਯਭੂਤਂ ਲਭਿਤ੍ਵਾ ਉਪ੍ਪਨ੍ਨਾ.

‘‘ਸਮਾਪਜ੍ਜਾਮੀ’’ਤਿ ਪਦਸ੍ਸ ਸਮੀਪੇ ਵੁਚ੍ਚਮਾਨਂ ‘‘ਸਮਾਪਜ੍ਜਿਸ੍ਸ’’ਨ੍ਤਿ ਪਦਂ ਆਸਨ੍ਨਾਨਾਗਤਕਾਲਵਾਚੀ ਏਵ ਭਵਿਤੁਂ ਯੁਤ੍ਤਂ, ਨ ਇਤਰਨ੍ਤਿ ਆਹ – ‘‘ਪਦਦ੍ਵਯੇਨ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਕਾਲੋ ਕਥਿਤੋ’’ਤਿ. ਤਯਿਦਂ ਤਸ੍ਸ ਤਥਾ ਵਤ੍ਤਬ੍ਬਤਾਯ ਵੁਤ੍ਤਂ, ਨ ਪਨ ਤਸ੍ਸ ਤਥਾ ਚਿਤ੍ਤਪਵਤ੍ਤਿਸਮ੍ਭਵਤੋ. ਸਮਾਪਨ੍ਨੇਪਿ ਏਸੇਵ ਨਯੋ. ਪੁਰਿਮੇਹੀਤਿ ‘‘ਸਮਾਪਜ੍ਜਿਸ੍ਸਂ ਸਮਾਪਜ੍ਜਾਮੀ’’ਤਿ ਦ੍ਵੀਹਿ ਪਦੇਹਿ. ਪਚ੍ਛਿਮੇਨਾਤਿ ‘‘ਸਮਾਪਨ੍ਨੋ’’ਤਿ ਪਦੇਨ.

ਭਾਵਿਤਂ ਹੋਤਿ ਉਪ੍ਪਾਦਿਤਂ ਹੋਤਿ ਨਿਰੋਧਸਮਾਪਨ੍ਨਤ੍ਥਾਯ. ਅਨੁਪੁਬ੍ਬਸਮਾਪਤ੍ਤਿਸਮਾਪਜ੍ਜਨਸਙ੍ਖਾਤਾਯ ਨਿਰੋਧਭਾਵਨਾਯ ਤਂ ਚਿਤ੍ਤਂ ਭਾਵਿਤਂ ਹੋਤਿ. ਤੇਨਾਹ ‘‘ਯਂ ਤ’’ਨ੍ਤਿਆਦਿ. ਦੁਤਿਯਜ੍ਝਾਨੇਯੇਵਾਤਿ ਦੁਤਿਯਜ੍ਝਾਨਕ੍ਖਣੇ ਨਿਰੁਜ੍ਝਤਿ. ਤਤ੍ਥ ਅਨੁਪ੍ਪਜ੍ਜਨਤੋ ਅਨੁਪ੍ਪਾਦਨਤੋ ਹੇਟ੍ਠਾ ਨਿਰੋਧੋਤਿ ਅਧਿਪ੍ਪੇਤੋ. ਚਤੁਨ੍ਨਂ ਅਰੂਪਕ੍ਖਨ੍ਧਾਨਂ ਤਜ੍ਜਾ ਪਰਿਕਮ੍ਮਸਿਦ੍ਧਾ ਯਾ ਅਪ੍ਪਵਤ੍ਤਿ, ਤਤ੍ਥ ‘‘ਨਿਰੋਧਸਮਾਪਤ੍ਤਿਸਞ੍ਞਾ’’ਤਿ, ਯਾ ਨੇਸਂ ਤਥਾ ਅਪ੍ਪਵਤ੍ਤਿ. ਸਾ ‘‘ਅਨ੍ਤੋਨਿਰੋਧੇ ਨਿਰੁਜ੍ਝਤੀ’’ਤਿ ਵੁਤ੍ਤਾ.

‘‘ਚਿਤ੍ਤਸਙ੍ਖਾਰੋ ਨਿਰੁਦ੍ਧੋ’’ਤਿ ਵਚਨਤੋ ਤਦਞ੍ਞੇਸਂ ਅਨਿਰੋਧਂ ਇਚ੍ਛਨ੍ਤਾਨਂ ਵਾਦਂ ਦਸ੍ਸੇਨ੍ਤੋ ‘‘ਚਿਤ੍ਤਸਙ੍ਖਾਰੋ ਨਿਰੁਦ੍ਧੋਤਿ ਵਚਨਤੋ’’ਤਿਆਦਿਂ ਵਤ੍ਵਾ ਤਤ੍ਥ ਅਤਿਪ੍ਪਸਙ੍ਗਦਸ੍ਸਨਮੁਖੇਨ ਤਂ ਵਾਦਂ ਨਿਸੇਧੇਤੁਂ ‘‘ਤੇ ਵਤ੍ਤਬ੍ਬਾ’’ਤਿਆਦਿਮਾਹ. ਅਭਿਨਿਵੇਸਂ ਅਕਤ੍ਵਾਤਿ ਯਥਾਗਤੇ ਬ੍ਯਞ੍ਜਨਮਤ੍ਤੇ ਅਭਿਨਿਵੇਸਂ ਅਕਤ੍ਵਾ. ਆਚਰਿਯਾਨਂ ਨਯੇਤਿ ਆਚਰਿਯਾਨਂ ਪਰਮ੍ਪਰਾਗਤੇ ਧਮ੍ਮਨਯੇ ਧਮ੍ਮਨੇਤ੍ਤਿਯਂ ਠਤ੍ਵਾ.

ਕਿਰਿਯਮਯਪਵਤ੍ਤਸ੍ਮਿਨ੍ਤਿ ਪਰਿਤ੍ਤਭੂਮਕਕੁਸਲਾਕੁਸਲਧਮ੍ਮਪਬਨ੍ਧੇ ਵਤ੍ਤਮਾਨੇ. ਤਸ੍ਮਿਞ੍ਹਿ ਵਤ੍ਤਮਾਨੇ ਕਾਯਿਕ-ਵਾਚਸਿਕ-ਕਿਰਿਯਸਮ੍ਪਵਤ੍ਤਿ ਹੋਤਿ, ਦਸ੍ਸਨ-ਸਵਨਾਦਿਵਸੇਨ ਆਰਮ੍ਮਣਗ੍ਗਹਣੇ ਪਵਤ੍ਤਮਾਨੇਤਿ ਅਤ੍ਥੋ. ਤੇਨਾਹ – ‘‘ਬਹਿਦ੍ਧਾਰਮ੍ਮਣੇਸੁ ਪਸਾਦੇ ਘਟ੍ਟੇਨ੍ਤੇਸੂ’’ਤਿ. ਮਕ੍ਖਿਤਾਨਿ ਵਿਯਾਤਿ ਪੁਞ੍ਛਿਤਾਨਿ ਵਿਯ ਹੋਨ੍ਤਿ ਘਟ੍ਟਨਾਯ ਵਿਬਾਧਿਤਤ੍ਤਾ. ਏਤੇਨਾਯਂ ਘਟ੍ਟਨਾ ਪਞ੍ਚਦ੍ਵਾਰਿਕਵਿਞ੍ਞਾਣਾਨਂ ਵੇਗਸਾ ਉਪ੍ਪਜ੍ਜਨਾਯ ਨ ਆਰਮ੍ਮਣਨ੍ਤਿ ਦਸ੍ਸੇਤਿ. ਤੇਨੇਵਾਹ – ‘‘ਅਨ੍ਤੋਨਿਰੋਧੇ ਪਞ੍ਚ ਪਸਾਦਾ ਅਤਿਵਿਯ ਵਿਰੋਚਨ੍ਤੀ’’ਤਿ.

ਤਤੋ ਪਰਂ ਸਚਿਤ੍ਤਕੋ ਭਵਿਸ੍ਸਾਮੀਤਿ ਇਦਂ ਅਤ੍ਥਤੋ ਆਪਨ੍ਨਂ ਗਹੇਤ੍ਵਾ ਵੁਤ੍ਤਂ – ‘‘ਏਤ੍ਤਕਂ ਕਾਲਂ ਅਚਿਤ੍ਤਕੋ ਭਵਿਸ੍ਸਾਮੀ’’ਤਿ ਏਤੇਨੇਵ ਤਸ੍ਸ ਅਤ੍ਥਸ੍ਸ ਸਿਦ੍ਧਤ੍ਤਾ. ਯਂ ਏਵਂ ਭਾਵਿਤਨ੍ਤਿ ਏਤ੍ਥ ਵਿਸੁਂ ਚਿਤ੍ਤਸ੍ਸ ਭਾਵਨਾ ਨਾਮ ਨਤ੍ਥਿ, ਅਦ੍ਧਾਨਪਰਿਚ੍ਛੇਦਂ ਪਨ ਕਤ੍ਵਾ ਨਿਰੋਧਸਮਾਪਤ੍ਤਤ੍ਥਾਯ ਕਾਤਬ੍ਬਪਰਿਕਮ੍ਮਭਾਵਨਾਯ ਏਵ ਤਸ੍ਸ ਸਿਜ੍ਝਨਤੋ.

ਸਾ ਪਨੇਸਾ ਨਿਰੋਧਕਥਾ. ਦ੍ਵੀਹਿ ਬਲੇਹੀਤਿ ਸਮਥਵਿਪਸ੍ਸਨਾਬਲੇਹਿ. ਤਯੋ ਚ ਸਙ੍ਖਾਰਾਨਨ੍ਤਿ ਤਿਣ੍ਣਂ ਕਾਯਵਚੀਚਿਤ੍ਤਸਙ੍ਖਾਰਾਨਂ ਪਟਿਪ੍ਪਸ੍ਸਦ੍ਧਿਯਾ. ਸੋਲ਼ਸਹਿ ਞਾਣਚਰਿਯਾਹੀਤਿ ਅਨਿਚ੍ਚਾਨੁਪਸ੍ਸਨਾਦੀਨਂ ਅਟ੍ਠਨ੍ਨਂ ਅਨੁਪਸ੍ਸਨਾਞਾਣਾਨਂ, ਅਟ੍ਠਨ੍ਨਞ੍ਚ ਮਗ੍ਗਫਲਞਾਣਾਨਂ ਵਸੇਨ ਇਮਾਹਿ ਸੋਲ਼ਸਹਿ ਞਾਣਪ੍ਪਵਤ੍ਤੀਹਿ. ਨਵਹਿ ਸਮਾਧਿਚਰਿਯਾਹੀਤਿ ਅਟ੍ਠ ਸਮਾਪਤ੍ਤਿਯੋ ਅਟ੍ਠ ਸਮਾਧਿਚਰਿਯਾ, ਤਾਸਂ ਉਪਚਾਰਸਮਾਧਿ ਸਮਾਧਿਭਾਵਸਾਮਞ੍ਞੇਨ ਏਕਾ ਸਮਾਧਿਚਰਿਯਾਤਿ ਏਵਂ ਨਵਹਿ ਸਮਾਧਿਚਰਿਯਾਹਿ. ਵਸੀਭਾਵਤਾਪਞ੍ਞਾਤਿ ਵਸੀਭਾਵਤਾਸਙ੍ਖਾਤਾ ਪਞ੍ਞਾ. ਸਬ੍ਬਾਕਾਰੇਨ ਵਿਸੁਦ੍ਧਿਮਗ੍ਗੇ ਕਥਿਤਾ, ਤੇ ਤਾਵ ਆਕਾਰਾ ਤਿਟ੍ਠਨ੍ਤੁ, ਸਰੂਪਮਤ੍ਤਸ੍ਸ ਪਨਸ੍ਸ ਵਤ੍ਤਬ੍ਬਨ੍ਤਿ ਆਹ – ‘‘ਕੋ ਪਨਾਯਂ ਨਿਰੋਧੋ ਨਾਮਾ’’ਤਿ. ਯਦਿ ਖਨ੍ਧਾਨਂ ਅਪ੍ਪਵਤ੍ਤਿ, ਅਥ ਕਿਮਤ੍ਥਮੇਤਂ ਝਾਨਸੁਖਾਦਿਂ ਵਿਯ ਸਮਾਪਜ੍ਜਨ੍ਤੀਤਿ ਆਹ ‘‘ਸਙ੍ਖਾਰਾਨ’’ਨ੍ਤਿਆਦਿ.

ਫਲਸਮਾਪਤ੍ਤਿਚਿਤ੍ਤਨ੍ਤਿ ਅਰਹਤ੍ਤਂ ਅਨਾਗਾਮਿਫਲਚਿਤ੍ਤਂ. ‘‘ਤਤੋ ਪਰਂ ਭਵਙ੍ਗਸਮਯੇ’’ਤਿ ਵੁਤ੍ਤਤ੍ਤਾ ਆਹ ‘‘ਕਿਂ ਪਨ…ਪੇ… ਨ ਸਮੁਟ੍ਠਾਪੇਤੀ’’ਤਿ. ਸਮੁਟ੍ਠਾਪੇਤਿ ਰੂਪਸਮੁਪ੍ਪਾਦਕਤ੍ਤਾ. ਇਮਸ੍ਸਾਤਿ ਨਿਰੋਧਂ ਸਮਾਪਨ੍ਨਭਿਕ੍ਖੁਨੋ. ਸਾ ਨ ਸਮੁਟ੍ਠਾਪੇਤੀਤਿ ਸਾ ਚਤੁਤ੍ਥਜ੍ਝਾਨਿਕਾ ਫਲਸਮਾਪਤ੍ਤਿ ਨ ਸਮੁਟ੍ਠਾਪੇਤਿ ਅਸ੍ਸਾਸਪਸ੍ਸਾਸੇ. ਫਲਸਮਾਪਤ੍ਤਿਯਾ ਚਤੁਤ੍ਥਜ੍ਝਾਨਿਕਭਾਵੋ ਕਥਂ ਨਿਚ੍ਛਿਤੋਤਿ ਆਹ – ‘‘ਕਿਂ ਵਾ ਏਤੇਨਾ’’ਤਿਆਦਿ. ਵਕ੍ਖਮਾਨਾਕਾਰੇਨਪਿ ਪਰਿਹਾਰੋ ਹੋਤੀਤਿ. ਸਨ੍ਤਸਮਾਪਤ੍ਤਿਤੋਤਿ ਨਿਰੋਧਸਮਾਪਤ੍ਤਿਮੇਵ ਸਨ੍ਧਾਯ ਵਦਤਿ. ਅਬ੍ਬੋਹਾਰਿਕਾ ਹੋਨ੍ਤਿ ਅਤਿਸੁਖੁਮਸਭਾਵਤ੍ਤਾ, ਸਞ੍ਜੀਵਤ੍ਥੇਰਸ੍ਸ ਪੁਬ੍ਬੇ ਸਮਾਪਤ੍ਤਿਕ੍ਖਣੇ ਅਸ੍ਸਾਸਪਸ੍ਸਾਸਾ ਅਬ੍ਬੋਹਾਰਿਕਭਾਵਂ ਗਚ੍ਛਨ੍ਤਿ. ਤੇਨ ਵੁਤ੍ਤਂ ‘‘ਭਵਙ੍ਗਸਮਯੇਨੇਵੇਤਂ ਕਥਿਤ’’ਨ੍ਤਿ.

ਕਿਰਿਯਮਯ …ਪੇ… ਉਪ੍ਪਜ੍ਜਤੀਤਿ ਕਸ੍ਮਾ ਵੁਤ੍ਤਂ? ਨਨੁ ਭਵਙ੍ਗੁਪ੍ਪਤ੍ਤਿਕਾਲਮ੍ਪਿ ਵਿਤਕ੍ਕਵਿਚਾਰਾ ਉਪ੍ਪਜ੍ਜਨ੍ਤੇਵਾਤਿ? ਕਿਞ੍ਚਾਪਿ ਉਪ੍ਪਜ੍ਜਨ੍ਤਿ, ਵਚੀਸਙ੍ਖਾਰਲਕ੍ਖਣਪ੍ਪਤ੍ਤਾ ਪਨ ਨ ਹੋਨ੍ਤੀਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਕਿਂ ਭਵਙ੍ਗ’’ਨ੍ਤਿਆਦਿ ਵੁਤ੍ਤਂ.

ਸੁਞ੍ਞਤੋ ਫਸ੍ਸੋਤਿਆਦਯੋ ਸਗੁਣੇਨਪਿ ਆਰਮ੍ਮਣੇਨਾਤਿ ਆਰਮ੍ਮਣਭੂਤਮੇਤਂ. ਸੁਞ੍ਞਤਾ ਨਾਮ ਫਲਸਮਾਪਤ੍ਤਿ ਨਿਚ੍ਚਸੁਖਅਤ੍ਤਸਭਾਵਤੋ ਸੁਞ੍ਞਤ੍ਤਾ. ‘‘ਸੁਞ੍ਞਤੋ ਫਸ੍ਸੋ’’ਤਿ ਵੁਤ੍ਤਂ ਵੁਤ੍ਤਨਯੇਨ ਸੁਞ੍ਞਸਭਾਵਤ੍ਤਾ. ਅਨਿਮਿਤ੍ਤਾ ਨਾਮ ਫਲਸਮਾਪਤ੍ਤਿ ਰਾਗਨਿਮਿਤ੍ਤਾਦੀਨਂ ਅਭਾਵਤੋ. ਅਪ੍ਪਣਿਹਿਤਾ ਨਾਮ ਫਲਸਮਾਪਤ੍ਤਿ ਰਾਗਪਣਿਧਿਆਦੀਨਮਭਾਵਤੋ. ਸੇਸਂ ਵੁਤ੍ਤਨਯਮੇਵ. ਤੇਨਾਹ ‘‘ਅਨਿਮਿਤ੍ਤਪ੍ਪਣਿਹਿਤੇਸੁਪਿ ਏਸੇਵ ਨਯੋ’’ਤਿ. ਰਾਗਨਿਮਿਤ੍ਤਾਦੀਨਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਸਙ੍ਖਾਰਨਿਮਿਤ੍ਤਸ੍ਸਪਿ ਸਙ੍ਗਹੋ ਦਟ੍ਠਬ੍ਬੋ. ਯਦਗ੍ਗੇਨ ਫਲਸਮਾਪਤ੍ਤਿਸਮ੍ਫਸ੍ਸੋ ਸੁਞ੍ਞਤੋ ਨਾਮ, ਤਦਗ੍ਗੇਨ ਫਲਸਮਾਪਤ੍ਤਿਪਿ ਸੁਞ੍ਞਤਾ ਨਾਮ, ਫਸ੍ਸਸੀਸੇਨ ਪਨ ਦੇਸਨਾ ਆਗਤਾਤਿ ਤਥਾ ਵੁਤ੍ਤਂ. ਅਨਿਮਿਤ੍ਤਪ੍ਪਣਿਹਿਤੇਸੁਪਿ ਏਸੇਵ ਨਯੋ.

ਆਗਮਨਂ ਏਤ੍ਥ, ਏਤਾਯਾਤਿ ਵਾ ਆਗਮਨਿਕਾ, ਸਾ ਏਵ ਆਗਮਨਿਯਾ ਕ-ਕਾਰਸ੍ਸ ਯ-ਕਾਰਂ ਕਤ੍ਵਾ. ਵੁਟ੍ਠਾਤਿ ਨਿਮਿਤ੍ਤਤੋ ਮਗ੍ਗਸ੍ਸ ਉਪ੍ਪਾਦਨੇਨ. ਅਨਿਮਿਤ੍ਤਾ ਨਾਮ ਨਿਚ੍ਚਨਿਮਿਤ੍ਤਸ੍ਸ ਉਗ੍ਘਾਟਨਤੋ. ਏਤ੍ਥ ਚ ਵੁਟ੍ਠਾਨਮੇਵ ਪਮਾਣਂ, ਨ ਪਰਿਗ੍ਗਹਦਸ੍ਸਨਾਨਿ. ਅਪ੍ਪਣਿਹਿਤਾ ਨਾਮ ਸੁਖਪਣਿਧਿਯਾ ਪਟਿਪਕ੍ਖਤੋ. ਸੁਞ੍ਞਤਾ ਨਾਮ ਅਤ੍ਤਦਿਟ੍ਠਿਯਾ ਉਜੁਪਟਿਪਕ੍ਖਤ੍ਤਾ ਸਤ੍ਤਸੁਞ੍ਞਤਾਯ ਸੁਦਿਟ੍ਠਤ੍ਤਾ. ਮਗ੍ਗੋ ਅਨਿਮਿਤ੍ਤੋ ਨਾਮ ਵਿਪਸ੍ਸਨਾਗਮਨਤੋ. ਫਲਂ ਅਨਿਮਿਤ੍ਤਂ ਨਾਮ ਮਗ੍ਗਾਗਮਨਤੋ. ਵਿਕਪ੍ਪੋ ਆਪਜ੍ਜੇਯ੍ਯ ਆਗਮਨਸ੍ਸ ਵਵਤ੍ਥਾਨਸ੍ਸ ਅਭਾਵੇਨ, ਵਿਪਸ੍ਸਨਾਯ ਅਨਿਮਿਤ੍ਤਾਦਿਨਾਮਲਾਭੋ ਅਵਵਤ੍ਥਿਤੋਤਿ ਅਧਿਪ੍ਪਾਯੋ. ਤੇਨ ਵੁਤ੍ਤਂ ‘‘ਤਸ੍ਮਾ’’ਤਿਆਦਿ. ਯਸ੍ਮਾ ਪਨ ਸਾ ਮਗ੍ਗਵੁਟ੍ਠਾਨਕਾਲੇ ਏਵਰੂਪਾਪਿ ਹੋਤੀਤਿ ਤਸ੍ਸ ਵਸੇਨ ਮਗ੍ਗਫਲਾਨਂ ਵਿਯ ਫਸ੍ਸਸ੍ਸਪਿ ਪਵਤ੍ਤਿਰੂਪਤ੍ਤਾ ਯਥਾਵੁਤ੍ਤੋ ਵਿਕਪ੍ਪੋ ਅਨਵਸਰੋਤਿ ਦਟ੍ਠਬ੍ਬਂ. ਤਯੋ ਫਸ੍ਸਾ ਫੁਸਨ੍ਤੀਤਿ ਪੁਗ੍ਗਲਭੇਦਵਸੇਨ ਵੁਤ੍ਤਂ. ਨ ਹਿ ਏਕਂਯੇਵ ਪੁਗ੍ਗਲਂ ਏਤਸ੍ਮਿਂ ਖਣੇ ਤਯੋ ਫਸ੍ਸਾ ਫੁਸਨ੍ਤਿ. ‘‘ਤਿਵਿਧੋ ਫਸ੍ਸੋ ਫੁਸਤੀ’’ਤਿ ਵਾ ਭਵਿਤਬ੍ਬਂ. ਯਸ੍ਮਾ ਪਨ ‘‘ਨਿਰੋਧਫਲਸਮਾਪਤ੍ਤਿਯਾ ਵੁਟ੍ਠਿਤਸ੍ਸਾ’’ਤਿਆਦਿ ਯਸ੍ਸ ਯਥਾਵੁਤ੍ਤਾ ਤਯੋ ਏਵ ਫਸ੍ਸਾ ਸਮ੍ਭਵਨ੍ਤਿ, ਤਸ੍ਸ ਅਨਵਸੇਸਗ੍ਗਹਣਵਸੇਨੇਵ ਵੁਤ੍ਤਂ ‘‘ਤਯੋ ਫਸ੍ਸਾ ਫੁਸਨ੍ਤੀ’’ਤਿ.

ਨਿਬ੍ਬਾਨਂ ਵਿਵੇਕੋ ਨਾਮ ਸਬ੍ਬਸਙ੍ਖਾਰਵਿਵਿਤ੍ਤਭਾਵਤੋ. ਤਸ੍ਮਿਂ ਵਿਵੇਕੇ ਏਕਨ੍ਤੇਨੇਵ ਨਿਨ੍ਨਪੋਣਤ੍ਤਾ ਏਵ ਹਿ ਤੇ ਪਟਿਪ੍ਪਸ੍ਸਦ੍ਧਸਬ੍ਬੁਸ੍ਸੁਕ੍ਕਾ ਉਤ੍ਤਮਪੁਰਿਸਾ ਚਤੁਨ੍ਨਂ ਖਨ੍ਧਾਨਂ ਅਪ੍ਪਵਤ੍ਤਿਂ ਅਨਵਸੇਸਗ੍ਗਹਣਲਕ੍ਖਣਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਨ੍ਤੀਤਿ.

ਦੁਤਿਯਕਾਮਭੂਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਗੋਦਤ੍ਤਸੁਤ੍ਤਵਣ੍ਣਨਾ

੩੪੯. ਨੇਸਨ੍ਤਿ ਅਪ੍ਪਮਾਣਚੇਤੋਵਿਮੁਤ੍ਤਿ-ਆਕਿਞ੍ਚਞ੍ਞਚੇਤੋਵਿਮੁਤ੍ਤਿਸਞ੍ਞਿਤਾਨਂ ਝਾਨਾਨਂ. ਅਤ੍ਥੋਪਿ ਨਾਨਾਤਿ ਆਨੇਤ੍ਵਾ ਯੋਜਨਾ. ਫਰਣਅਪ੍ਪਮਾਣਤਾਯ ‘‘ਅਪ੍ਪਮਾਣਾ ਚੇਤੋਵਿਮੁਤ੍ਤੀ’’ਤਿ ਲਦ੍ਧਨਾਮਂ ਬ੍ਰਹ੍ਮਵਿਹਾਰਜ੍ਝਾਨਨ੍ਤਿ ਆਹ ‘‘ਭੂਮਨ੍ਤਰਤੋ’’ਤਿਆਦਿ. ਆਕਿਞ੍ਚਞ੍ਞਾ ਚੇਤੋਵਿਮੁਤ੍ਤੀਤਿ ਆਕਿਞ੍ਚਞ੍ਞਾਯਤਨਜ੍ਝਾਨਨ੍ਤਿ ਆਹ ‘‘ਭੂਮਨ੍ਤਰਤੋ’’ਤਿਆਦਿ. ਵਿਪਸ੍ਸਨਾਤਿ ਅਨਿਚ੍ਚਾਨੁਪਸ੍ਸਨਾ, ਸਬ੍ਬਾਪਿ ਵਾ. ਪਮਾਣਕਰਣੋ ਨਾਮ ਯਸ੍ਸ ਸਯਂ ਉਪ੍ਪਜ੍ਜਤਿ, ਤਸ੍ਸ ਗੁਣਾਭਾਵਦਸ੍ਸਨਵਸੇਨ ਪਮਾਣਕਰਣਤੋ.

ਫਰਣਅਪ੍ਪਮਾਣਤਾਯਾਤਿ ਫਰਣਵਸੇਨ ਅਪ੍ਪਮਾਣਗੋਚਰਤਾਯ. ਨਿਬ੍ਬਾਨਮ੍ਪਿ ਅਪ੍ਪਮਾਣਮੇਵ ਪਮਾਣਗੋਚਰਾਨਂ ਕਿਲੇਸਾਨਂ ਆਰਮ੍ਮਣਭਾਵਸ੍ਸਪਿ ਅਨਾਗਮਨਤੋ. ਖਲਨ੍ਤਿ ਖਲੇ ਪਸਾਰਿਤਸਾਲਿਸੀਸਾਦਿਭਣ੍ਡਂ. ਕਿਞ੍ਚੇਹੀਤਿ ਮਦ੍ਦਸ੍ਸੁ. ਤੇਨਾਹ ‘‘ਮਦ੍ਦਨਟ੍ਠੋ’’ਤਿ. ਆਰਮ੍ਮਣਭੂਤਂ, ਪਲਿਬੁਦ੍ਧਕਂ ਵਾ ਨਤ੍ਥਿ ਏਤਸ੍ਸ ਕਿਞ੍ਚਨਨ੍ਤਿ ਅਕਿਞ੍ਚਨਂ, ਅਕਿਞ੍ਚਨਮੇਵ ਆਕਿਞ੍ਚਞ੍ਞਂ.

ਰੂਪਨਿਮਿਤ੍ਤਸ੍ਸਾਤਿ ਕਸਿਣਰੂਪਨਿਮਿਤ੍ਤਸ੍ਸ. ਨ ਗਹਿਤਾਤਿ ਸਰੂਪਤੋ ਨ ਗਹਿਤਾ, ਅਤ੍ਥਤੋ ਪਨ ਗਹਿਤਾ ਏਵ. ਤੇਨਾਹ – ‘‘ਸਾ ਸੁਞ੍ਞਾ ਰਾਗੇਨਾਤਿਆਦਿਵਚਨਤੋ ਸਬ੍ਬਤ੍ਥ ਅਨੁਪਵਿਤ੍ਥਾਵਾ’’ਤਿ.

ਨਾਨਾਤਿ ਸਦ੍ਦਵਸੇਨ. ਏਕਤ੍ਥਾਤਿ ਆਰਮ੍ਮਣਵਸੇਨ ਆਰਮ੍ਮਣਭਾਵੇਨ ਏਕਸਭਾਵਾ. ਤੇਨਾਹ ‘‘ਅਪ੍ਪਮਾਣਂ…ਪੇ… ਏਕਤ੍ਥਾ’’ਤਿ. ਆਰਮ੍ਮਣਵਸੇਨਾਤਿ ਆਰਮ੍ਮਣਸ੍ਸ ਵਸੇਨ. ਚਤ੍ਤਾਰੋ ਹਿ ਮਗ੍ਗਾ, ਚਤ੍ਤਾਰਿ ਫਲਾਨਿ ਆਰਮ੍ਮਣਵਸੇਨ ਨਿਬ੍ਬਾਨਪਵਿਟ੍ਠਤਾਯ ਏਕਤ੍ਥਾ ਏਕਾਰਮ੍ਮਣਾ. ਅਞ੍ਞਸ੍ਮਿਂ ਪਨ ਠਾਨੇਤਿ ਇਦਂ ਵਿਸੁਂ ਵਿਸੁਂ ਗਹੇਤ੍ਵਾ ਵੁਤ੍ਤਂ ਅਪ੍ਪਮਾਣਾਦਿ ਪਰਿਯਾਯਵੁਤ੍ਤਂ, ਨਿਬ੍ਬਾਨਂ ਆਰਬ੍ਭ ਪਵਤ੍ਤਨਤੋ. ਤਸ੍ਮਾ ‘‘ਅਞ੍ਞਸ੍ਮਿ’’ਨ੍ਤਿ ਇਦਂ ਤੇਨ ਤੇਨ ਪਰਿਯਾਯੇਨ ਤਤ੍ਥ ਤਤ੍ਥ ਆਗਤਭਾਵਂ ਸਨ੍ਧਾਯ ਵੁਤ੍ਤਂ.

ਗੋਦਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਨਿਗਣ੍ਠਨਾਟਪੁਤ੍ਤਸੁਤ੍ਤਵਣ੍ਣਨਾ

੩੫੦. ਆਗਤਾਗਮੋਤਿ ਵਾਚੁਗ੍ਗਤਪਰਿਯਤ੍ਤਿਧਮ੍ਮੋ. ਵਿਞ੍ਞਾਤਸਾਸਨੋਤਿ ਪਟਿਵਿਦ੍ਧਸਤ੍ਥੁਸਾਸਨੋ. ਤੇਨਾਹ ‘‘ਅਨਾਗਾਮੀ’’ਤਿਆਦਿ. ਨਗ੍ਗਭੋਗ੍ਗਨ੍ਤਿ ਅਵਸਨਭਾਵੇਨ ਨਗ੍ਗਂ, ਕੁਟਿਲਜ੍ਝਾਸਯਤਾਯ ਭੋਗ੍ਗਂ, ਤਤੋ ਏਵ ਨਿਸ੍ਸਿਰਿਕਂ. ਨਗ੍ਗਤਾਯ ਹਿ ਸੋ ਰੂਪੇਨ ਨਿਸ੍ਸਿਰਿਕੋ, ਭੋਗ੍ਗਤਾਯ ਚਿਤ੍ਤੇਨ. ਭਗਵਤੋ ਸਦ੍ਧਾਯਾਤਿ ਭਗਵਤਿ ਸਦ੍ਧਾਯ. ਤਸ੍ਮਿਂ ਸਦ੍ਦਹਨਾ ਓਕਪ੍ਪਨਾ ਤਸ੍ਸ ਸਦ੍ਧਾਤਿਪਿ ਵਤ੍ਤਬ੍ਬਤਂ ਲਭਤਿ. ਗਚ੍ਛਾਮੀਤਿ ਆਗਚ੍ਛਾਮਿ, ਬੁਜ੍ਝਾਮੀਤਿ ਅਤ੍ਥੋ. ਏਤਂ ਨਿਗਣ੍ਠੇਨ ਪੁਚ੍ਛਿਤਮਤ੍ਥਮਾਹ.

ਕਾਯਂ ਉਨ੍ਨਾਮੇਤ੍ਵਾਤਿ ਕਾਯਂ ਅਬ੍ਭੁਨ੍ਨਾਮੇਤ੍ਵਾ. ਕੁਚ੍ਛਿਂ ਨੀਹਰਿਤ੍ਵਾਤਿ ਪਿਟ੍ਠਿਯਾ ਨਿਨ੍ਨਮਨੇਨ ਕੁਚ੍ਛਿਂ ਪੁਰਤੋ ਨੀਹਰਿਤ੍ਵਾ. ਗੀਵਂ ਪਸਾਰਣਵਸੇਨ ਪਗ੍ਗਯ੍ਹ ਪਗ੍ਗਹੇਤ੍ਵਾ ਸਬ੍ਬਂ ਦਿਸਂ ਪੇਕ੍ਖਮਾਨੋ. ਸਬ੍ਬਮਿਦਂ ਨਿਗਣ੍ਠਸ੍ਸ ਪਹਟ੍ਠਾਕਾਰਦਸ੍ਸਨਤ੍ਥਂ ‘‘ਇਦਾਨਿ ਸਮਣਸ੍ਸ ਗੋਤਮਸ੍ਸ ਉਪਰਿ ਵਾਦਂ ਆਰੋਪੇਤੁਂ ਲਬ੍ਭਤੀ’’ਤਿ. ਤੇਨਾਹ ‘‘ਵਾਤਂ ਵਾ ਸੋ’’ਤਿਆਦਿ. ਸਕਾਰਣਾਤਿ ਯੁਤ੍ਤਿਸਹਿਤਾ. ਪਞ੍ਹਮਗ੍ਗੋਤਿ ਪਞ੍ਹਸਙ੍ਖਾਤੋ ਵੀਮਂਸਾ, ਏਵਂ ਭਵਿਤਬ੍ਬਨ੍ਤਿ ਚਿਤ੍ਤੇਨੇਵ ਪਰਿਵੀਮਂਸਾ ਪਞ੍ਹਾ. ਏਕੋ ਉਦ੍ਦੇਸੋਤਿ ਏਕਂ ਉਦ੍ਦਿਸਨਂ ਅਤ੍ਥਸ੍ਸ ਸਂਖਿਤ੍ਤਵਚਨਂ. ਵੇਯ੍ਯਾਕਰਣਨ੍ਤਿ ਨਿਦ੍ਦਿਸਨਂ ਅਤ੍ਥਸ੍ਸ ਵਿਚਾਰੇਤ੍ਵਾ ਕਥਨਂ. ਏਵਨ੍ਤਿ ਇਮਿਨਾ ਨਯੇਨ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਞ੍ਹੁਦ੍ਦੇਸਵੇਯ੍ਯਾਕਰਣੇਸੁ ਅਤ੍ਥੋ ਵਿਤ੍ਥਾਰਤੋ ਵੇਦਿਤਬ੍ਬੋ.

ਨਿਗਣ੍ਠਨਾਟਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਅਚੇਲਕਸ੍ਸਪਸੁਤ੍ਤਵਣ੍ਣਨਾ

੩੫੧. ਅਲਂ ਸਮਤ੍ਥੋ ਅਰਿਯਭਾਵਾਯਾਤਿ ਅਲਮਰਿਯੋ. ਞੇਯ੍ਯਜਾਨਨਟ੍ਠੇਨ ਞਾਣਮੇਵ ਪਚ੍ਚਕ੍ਖਤੋ ਦਸ੍ਸਨਟ੍ਠੇਨ ਞਾਣਦਸ੍ਸਨਂ, ਸੋਯੇਵ ਅਤਿਸਯਟ੍ਠੇਨ ਞਾਣਦਸ੍ਸਨਵਿਸੇਸੋ. ਪਾਵਲ਼ਾ ਵੁਚ੍ਚਤਿ ਆਨਿਸਦਪਦੇਸੋ, ਤਂ ਪਾਵਲ਼ਂ ਰਜੋਹਰਣਤ੍ਥਂ ਨਿਪ੍ਫੋਟੀਯਤਿ ਏਤਾਯਾਤਿ ਪਾਵਲ਼ਨਿਪ੍ਫੋਟਨਾ, ਮੋਰਪਿਞ੍ਛਵਤ੍ਤਿ.

ਅਚੇਲਕਸ੍ਸਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਗਿਲਾਨਦਸ੍ਸਨਸੁਤ੍ਤਵਣ੍ਣਨਾ

੩੫੨. ਮਤ੍ਤਰਾਜਾ ਨਾਮ ਏਕੋ ਭੁਮ੍ਮਦੇਵੋ ਭੂਤਾਧਿਪਤਿ ਸੁਰਾਪੋਤਲਰੁਕ੍ਖਨਿਵਾਸੀ. ਤੇਨ ਵੁਤ੍ਤਂ ‘‘ਮਤ੍ਤਰਾਜਕਾਲੇ’’ਤਿ. ‘‘ਓਸਧਿਤਿਣਵਨਪ੍ਪਤੀਸੂ’’ਤਿ ਵਤ੍ਵਾ ਤੇ ਯਥਾਕ੍ਕਮਂ ਦਸ੍ਸੇਨ੍ਤੋ ‘‘ਹਰੀਤਕਾ…ਪੇ… ਰੁਕ੍ਖੇਸੁ ਚਾ’’ਤਿ ਆਹ. ਪਤ੍ਥਨਾਵਸੇਨ ਚਿਤ੍ਤਂ ਠਪੇਹਿ. ਸਮਿਜ੍ਝਿਸ੍ਸਤੀਤਿ ਯਥਾਧਿਪ੍ਪਾਯਂ ਸਮਿਜ੍ਝਿਸ੍ਸਤਿ. ਤੇਨ ਹੀਤਿ ਯਸ੍ਮਾ ਤਂ ਦੇਵਾਪਿ ਆਸਨ੍ਨਮਰਣਂ ਮਞ੍ਞਨ੍ਤਿ, ਤਸ੍ਮਾ ਸਾ ਵਰਮੇਵ ਭਵਿਸ੍ਸਤਿ, ਤਂ ਤੁਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀਤਿ ਅਧਿਪ੍ਪਾਯੋ.

ਗਿਲਾਨਦਸ੍ਸਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਚਿਤ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.