੮. ਗਾਮਣਿਸਂਯੁਤ੍ਤਂ

੧. ਚਣ੍ਡਸੁਤ੍ਤਵਣ੍ਣਨਾ

੩੫੩. ‘‘ਯੇਨ ਮਿਧੇਕਚ੍ਚੋ ਚਣ੍ਡੋ ਚਣ੍ਡੋਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿ ਏਵਂ ਪਞ੍ਹਪੁਚ੍ਛਨੇਨ ਧਮ੍ਮਸਙ੍ਗਾਹਕਤ੍ਥੇਰੇਹਿ ਚਣ੍ਡੋਤਿ ਗਹਿਤਨਾਮੋ. ਪਾਕਟਂ ਕਰੋਤੀਤਿ ਦਸ੍ਸੇਤਿ ਅਤ੍ਤਨੋ ਚਣ੍ਡਭਾਵਂ.

ਚਣ੍ਡਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਤਾਲਪੁਟਸੁਤ੍ਤਵਣ੍ਣਨਾ

੩੫੪. ਵਾਲੋਤਿ ਵੁਚ੍ਚਤਿ ਤਾਲੋ, ਤਸ੍ਸ ਤਾਲਪੁਟਂ ਨਾਮ. ਯਥਾ ਆਮਲਕੀਫਲਸਮਾਨਕਂ, ਸੋ ਪਨ ਤਾਲਸਦਿਸਮੁਖਵਣ੍ਣਤ੍ਤਾ ਤਾਲਪੁਟੋਤਿ ਏਵਂਨਾਮਕੋ. ਤੇਨਾਹ ‘‘ਤਸ੍ਸ ਕਿਰਾ’’ਤਿਆਦਿ. ਅਭਿਨੀਹਾਰਸਮ੍ਪਨ੍ਨੋ ਅਨੇਕੇਸੁ ਕਪ੍ਪੇਸੁ ਸਮ੍ਭਤਸਾਵਕਬੋਧਿਸਮ੍ਭਾਰੋ. ਤਥਾ ਹੇਸ ਅਸੀਤਿਯਾ ਮਹਾਸਾਵਕੇਸੁ ਅਬ੍ਭਨ੍ਤਰੋ ਜਾਤੋ. ਸਹਸ੍ਸਂ ਦੇਨ੍ਤਿ ਨਚ੍ਚਂ ਪਸ੍ਸਿਤੁਕਾਮਾ. ਸਮਜ੍ਜਵੇਸਨ੍ਤਿ ਨੇਪਚ੍ਚਵੇਸਂ. ਕੀਲ਼ਂ ਕਤ੍ਵਾਤਿ ਨਚ੍ਚਕੀਲ਼ਿਤਂ ਕੀਲ਼ਿਤ੍ਵਾ, ਨਚ੍ਚਿਤ੍ਵਾਤਿ ਅਤ੍ਥੋ.

ਪੁਬ੍ਬੇ ਤਥਾਪਵਤ੍ਤਵੁਤ੍ਤਨ੍ਤਦਸ੍ਸਨੇ ਸਚ੍ਚੇਨ, ਤਬ੍ਬਿਪਰਿਯਾਯੇ ਅਲਿਕੇਨ. ਰਾਗਪਚ੍ਚਯਾਤਿ ਰਾਗੁਪ੍ਪਤ੍ਤਿਯਾ ਕਾਰਣਭੂਤਾ. ਮੁਖਤੋ…ਪੇ… ਦਸ੍ਸਨਾਦਯੋਤਿ ਆਦਿ-ਸਦ੍ਦੇਨ ਮੁਖਤੋ ਅਗ੍ਗਿਜਾਲਨਿਕ੍ਖਮਦਸ੍ਸਨਾਦਿਕੇ ਸਙ੍ਗਣ੍ਹਾਤਿ. ਅਞ੍ਞੇ ਚ…ਪੇ… ਅਭਿਨਯਾਤਿ ਕਾਮਸ੍ਸਾਦਸਂਯੁਤ੍ਤਾਨਂ ਸਿਙ੍ਗਾਰਹਸ੍ਸਅਬ੍ਭੁਤਰਸਾਨਞ੍ਚੇਵ ‘‘ਅਞ੍ਞੇ ਚਾ’’ਤਿ ਵੁਤ੍ਤਸਨ੍ਤਬੀਭਚ੍ਛਰਸਾਨਞ੍ਚ ਦਸ੍ਸਨਕਾ ਅਭਿਨਯਾ. ਦੋਸਪਚ੍ਚਯਾਤਿ ਦੋਸੁਪ੍ਪਤ੍ਤਿਯਾ ਕਾਰਣਭੂਤਾ. ਹਤ੍ਥਪਾਦਚ੍ਛੇਦਾਦੀਤਿ ਆਦਿ-ਸਦ੍ਦੇਨ ਸਙ੍ਗਹਿਤਾਨਂ ਰੁਦ੍ਦਵੀਰਭਯਾਨਕਰਸਾਨਂ ਦਸ੍ਸਨਕਾ ਅਭਿਨਯਾ. ਮੋਹਪਚ੍ਚਯਾਤਿ ਮੋਹੁਪ੍ਪਤ੍ਤਿਯਾ ਕਾਰਣਭੂਤਾ. ਏਵਮਾਦਯੋਤਿ ਆਦਿ-ਸਦ੍ਦੇਨ ਸਙ੍ਗਹਿਤਾਨਂ ਕਰੁਣਾਸਨ੍ਤਭਯਾਨਕਰਸਾਨਂ ਦਸ੍ਸਨਕਾ ਅਭਿਨਯਾ. ਤੇ ਹਿ ਰਸੇ ਸਨ੍ਧਾਯ ਪਾਲ਼ਿਯਂ ‘‘ਯੇ ਧਮ੍ਮਾ ਰਜਨੀਯਾ, ਯੇ ਧਮ੍ਮਾ ਦੋਸਨੀਯਾ, ਯੇ ਧਮ੍ਮਾ ਮੋਹਨੀਯਾ’’ਤਿ ਚ ਵੁਤ੍ਤਂ.

ਨਟਵੇਸਂ ਗਹੇਤ੍ਵਾਵ ਪਚ੍ਚਨ੍ਤਿ ਕਮ੍ਮਸਰਿਕ੍ਖਵਿਪਾਕਵਸੇਨ. ਤਂ ਸਨ੍ਧਾਯਾਤਿ ਤਂ ਯਥਾਵੁਤ੍ਤਂ ਨਿਰਯੇ ਪਚ੍ਚਨਂ ਸਨ੍ਧਾਯ. ਏਤਂ ‘‘ਪਹਾਸੋ ਨਾਮ ਨਿਰਯੋ, ਤਤ੍ਥ ਉਪਪਜ੍ਜਤੀ’’ਤਿ ਵੁਤ੍ਤਂ. ਯਥਾ ਲੋਕੇ ਅਤ੍ਥਵਿਸੇਸਵਸੇਨ ਸਕਮ੍ਮਕਾਨਿਪਿ ਪਦਾਨਿ ਅਕਮ੍ਮਕਾਨਿ ਭਵਨ੍ਤਿ ‘‘ਵਿਮੁਚ੍ਚਤਿ ਪੁਰਿਸੋ’’ਤਿ, ਏਵਂ ਇਧ ਅਤ੍ਥਵਿਸੇਸਵਸੇਨ ਅਕਮ੍ਮਕਂ ਸਕਮ੍ਮਕਂ ਕਤ੍ਵਾ ਵੁਤ੍ਤਂ – ‘‘ਨਾਹਂ, ਭਨ੍ਤੇ, ਏਤਂ ਰੋਦਾਮੀ’’ਤਿ. ਕੋ ਪਨ ਸੋ ਅਤ੍ਥਵਿਸੇਸੋ? ਅਸਹਨਂ ਅਕ੍ਖਮਨਂ, ਤਸ੍ਮਾ ਨ ਰੋਦਾਮਿ ਨ ਸਹਾਮਿ, ਨ ਅਕ੍ਖਮਾਮੀਤਿ ਅਤ੍ਥੋ. ਰੋਦਨਕਾਰਣਞ੍ਹਿ ਅਸਹਨ੍ਤੋ ਤੇਨ ਅਭਿਭੂਤੋ ਰੋਦਤਿ. ਤਮੇਵਸ੍ਸ ਸਕਮ੍ਮਕਭਾਵਸ੍ਸ ਕਾਰਣਭੂਤਂ ਅਤ੍ਥਵਿਸੇਸਂ ‘‘ਨ ਅਸ੍ਸੁਵਿਮੋਚਨਮਤ੍ਤੇਨਾ’’ਤਿ ਵੁਤ੍ਤਂ. ਮਤਂ ਵਾ, ਅਮ੍ਮ, ਰੋਦਨ੍ਤੀਤਿ ਏਤ੍ਥਾਪਿ ਮਤਂ ਰੋਦਨ੍ਤਿ, ਤਸ੍ਸ ਮਰਣਂ ਨ ਸਹਨ੍ਤਿ, ਨਕ੍ਖਮਨ੍ਤੀਤਿ ਪਾਕਟੋਯਮਤ੍ਥੋਤਿ.

ਤਾਲਪੁਟਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੫. ਯੋਧਾਜੀਵਸੁਤ੍ਤਾਦਿਵਣ੍ਣਨਾ

੩੫੫-੩੫੭. ਯੁਜ੍ਝਨਂ ਯੋਧੋ, ਸੋ ਆਜੀਵੋ ਏਤਸ੍ਸਾਤਿ ਯੋਧਾਜੀਵੋ. ਤੇਨਾਹ – ‘‘ਯੁਦ੍ਧੇਨ ਜੀਵਿਕਂ ਕਪ੍ਪਨਕੋ’’ਤਿ, ਉਸ੍ਸਾਹਂ ਵਾਯਾਮਂ ਕਰੋਤੀਤਿ ਯੁਜ੍ਝਨਵਸੇਨ ਉਸ੍ਸਾਹਂ ਵਾਯਾਮਂ ਕਰੋਤਿ. ਪਰਿਯਾਪਾਦੇਨ੍ਤੀਤਿ ਮਰਣਪਰਿਯਨ੍ਤਿਕਂ ਆਪਦਂ ਪਾਪੇਨ੍ਤਿ. ਤੇਨਾਹ ‘‘ਮਰਣਂ ਪਟਿਪਜ੍ਜਾਪੇਨ੍ਤੀ’’ਤਿ. ਦੁਟ੍ਠੁ ਠਪਿਤਨ੍ਤਿ ਦੁਟ੍ਠਾਕਾਰੇਨ ਅਤ੍ਤਨੋ ਪਰੇਸਞ੍ਚ ਅਤ੍ਥਾਵਹਭਾਵਂ ਨ ਗਤਂ ਪਟਿਪਨ੍ਨਂ. ਪਰੇਹਿ ਸਙ੍ਗਾਮੇ ਜਿਤਾ ਹਤਾ ਏਤ੍ਥ ਜਾਯਨ੍ਤੀਤਿ ਪਰਜਿਤੋ ਨਾਮ ਨਿਰਯੋ. ਅਸਿਧਨੁਗਦਾਯਸਙ੍ਕੁਚਕ੍ਕਾਨਿ ਪਞ੍ਚਾਵੁਧਾਨਿ. ਤਂ ਸਨ੍ਧਾਯਾਤਿ ਤਂ ਯੋਧਾਜੀਵਂ ਪੁਗ੍ਗਲਂ ਸਨ੍ਧਾਯ. ਏਤਂ ‘‘ਯੋ ਸੋ’’ਤਿਆਦਿ ਵੁਤ੍ਤਂ. ਚਤੁਤ੍ਥਪਞ੍ਚਮੇਸੂਤਿ ਹਤ੍ਥਾਰੋਹਅਸ੍ਸਾਰੋਹਸੁਤ੍ਤੇਸੁ. ਏਸੇਵ ਨਯੋਤਿ ਏਸੋ ਤਤਿਯੇ ਵੁਤ੍ਤੋ ਏਵ ਅਤ੍ਥਤੋ ਵਿਸੇਸਾਭਾਵਤੋ.

ਯੋਧਾਜੀਵਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੬. ਅਸਿਬਨ੍ਧਕਪੁਤ੍ਤਸੁਤ੍ਤਵਣ੍ਣਨਾ

੩੫੮. ਪਚ੍ਛਾਭੂਮਿਵਾਸਿਨੋਤਿ ਅਪਰਦੇਸਵਾਸਿਨੋ. ਉਦਕਸੁਦ੍ਧਿਕਭਾਵਜਾਨਨਤ੍ਥਾਯਾਤਿ ਅਤ੍ਤਨੋ ਉਦਕਸੁਦ੍ਧਿਕਭਾਵਂ ਜਾਨਨਤ੍ਥਞ੍ਚੇਵ ਲੋਕਸ੍ਸ ਚ ਉਦਕੇਨ ਸੁਦ੍ਧਿ ਹੋਤੀਤਿ ਇਮਸ੍ਸ ਅਤ੍ਥਸ੍ਸ ਜਾਨਨਤ੍ਥਞ੍ਚ. ਉਪਰਿ ਯਾਪੇਨ੍ਤੀਤਿ ਉਪਰਿ ਬ੍ਰਹ੍ਮਲੋਕਂ ਯਾਪੇਨ੍ਤਿ. ਸਮ੍ਮਾ ਞਾਪੇਨ੍ਤੀਤਿ ਸਮ੍ਮਾ ਉਜੁਕਂਯੇਵ ਸਗ੍ਗਂ ਲੋਕਂ ਗਮੇਨ੍ਤਿ. ਤੇਨਾਹ – ‘‘ਸਗ੍ਗਂ ਨਾਮ ਓਕ੍ਕਾਮੇਨ੍ਤੀ’’ਤਿ, ਅਵਕ੍ਕਾਮੇਨ੍ਤਿ ਓਗਾਹਾਪੇਨ੍ਤੀਤਿ ਅਤ੍ਥੋ. ਅਨੁਪਰਿਗਚ੍ਛੇਯ੍ਯਾਤਿ ਅਨੁਪਰਿਤੋ ਗਚ੍ਛੇਯ੍ਯ.

ਅਸਿਬਨ੍ਧਕਪੁਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਖੇਤ੍ਤੂਪਮਸੁਤ੍ਤਵਣ੍ਣਨਾ

੩੫੯. ਥਦ੍ਧਨ੍ਤਿ ਕਥਿਨਂ ਲੂਖਂ. ਊਸਰਨ੍ਤਿ ਊਸਜਾਤਂ. ਚਤੂਹਿਪਿ ਓਘੇਹਿ ਅਨਭਿਭਵਨੀਯਤਾਯ ਅਹਂ ਦੀਪੋ. ਸਬ੍ਬਪਰਿਸ੍ਸਯੇਹਿ ਅਨਭਿਭਵਨੀਯਤਾਯ ਅਹਂ ਲੇਣੋ. ਸਬ੍ਬਦੁਕ੍ਖਪਰਿਤ੍ਤਾਸਨਤੋ ਤਾਯਨਟ੍ਠੇਨ ਅਹਂ ਤਾਣਂ. ਸਬ੍ਬਭਯਹਿਂਸਨਤੋ ਅਹਂ ਸਰਣਨ੍ਤਿ ਯੋਜੇਤਬ੍ਬਂ.

ਉਦਕਮਣਿਕੋਤਿ ਮਹਨ੍ਤਂ ਉਦਕਭਾਜਨਂ. ਬਹਿ ਵਿਸ੍ਸਨ੍ਦਨਵਸੇਨ ਉਦਕਂ ਨ ਹਰਤੀਤਿ ਅਹਾਰੀ, ਪਰਿਤੋ ਨ ਪਗ੍ਘਰਤੀਤਿ ਅਪਰਿਹਾਰੀ. ਸਕ੍ਕਚ੍ਚਮੇਵ ਦੇਸੇਨ੍ਤਿ ਸਦ੍ਧਮ੍ਮਗਾਰਵਸ੍ਸ ਸਬ੍ਬਸਤ੍ਤੇਸੁ ਮਹਾਕਰੁਣਾਯ ਚ ਬੁਦ੍ਧਾਨਂ ਸਮਾਨਰਸਤ੍ਤਾ. ਚਤਸ੍ਸੋ ਪਨ ਪਰਿਸਾ ਸਤ੍ਥੁਗਾਰਵੇਨ ਅਤ੍ਤਨੋ ਚ ਸਦ੍ਧਾਸਮ੍ਪਨ੍ਨਤਾਯ ਸਦ੍ਦਹਿਤ੍ਵਾ ਓਕਪ੍ਪੇਤ੍ਵਾ ਸੁਣਨ੍ਤਿ, ਤਸ੍ਮਾ ਤਾ ਦੇਸਨਾਫਲੇਨ ਯੁਜ੍ਜਨ੍ਤਿ. ਕਿਚ੍ਚਸਿਦ੍ਧਿਯਾ ਸਤ੍ਥੁ ਦੇਸਨਾ ਤਤ੍ਥ ਸਕ੍ਕਚ੍ਚਦੇਸਨਾ ਨਾਮ ਜਾਤਾ.

ਖੇਤ੍ਤੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਸਙ੍ਖਧਮਸੁਤ੍ਤਵਣ੍ਣਨਾ

੩੬੦. ‘‘ਯੋ ਕੋਚਿ ਪੁਰਿਸੋ ਪਾਣਾਤਿਪਾਤੀ ਮੁਸਾਵਾਦੀ, ਸਬ੍ਬੋ ਸੋ ਆਪਾਯਿਕੋ’’ਤਿ ਵਤ੍ਵਾ ਪੁਨ ‘‘ਯਂਬਹੁਲਂ ਯਂਬਹੁਲਂ ਕਰੋਤਿ, ਤੇਨ ਦੁਗ੍ਗਤਿਂ ਗਚ੍ਛਤੀ’’ਤਿ ਵਦਨ੍ਤੋ ਅਤ੍ਤਨਾਵ ਅਤ੍ਤਨੋ ਵਾਦਂ ਭਿਨ੍ਦਤਿ. ਏਵਂ ਸਨ੍ਤੇਤਿ ਯਦਿ ਬਹੁਸੋ ਕਤੇਨ ਪਾਪਕਮ੍ਮੇਨ ਆਪਾਯਿਕੋ, ‘‘ਯੋ ਕੋਚਿ ਪਾਣਮਤਿਪਾਤੇਤੀ’’ਤਿਆਦਿਵਚਨਂ ਮਿਚ੍ਛਾਤਿ. ਚਤ੍ਤਾਰਿ ਪਦਾਨੀਤਿ ‘‘ਯੋ ਕੋਚਿ ਪਾਣਮਤਿਪਾਤੇਤੀ’’ਤਿਆਦਿਨਾ ਨਯੇਨ ਵੁਤ੍ਤਾ ਚਤ੍ਤਾਰੋ ਅਤ੍ਥਕੋਟ੍ਠਾਸਾ. ਦਿਟ੍ਠਿਯਾ ਪਚ੍ਚਯਾ ਹੋਨ੍ਤਿ ‘‘ਅਤ੍ਥਿ ਖੋ ਪਨ ਮਯਾ’’ਤਿਆਦਿਨਾ ਅਯੋਨਿਸੋ ਉਮ੍ਮੁਜ੍ਜਨ੍ਤਸ੍ਸ. ਬਲਸਮ੍ਪਨ੍ਨੋਤਿ ਸਮਤ੍ਥੋ. ਸਙ੍ਖਧਮਕੋਤਿ ਸਙ੍ਖਸ੍ਸ ਧਮਨਕਿਚ੍ਚੇ ਛੇਕੋ. ਅਦੁਕ੍ਖੇਨਾਤਿ ਸੁਖੇਨ. ਉਪਚਾਰੋਪਿ ਅਪ੍ਪਨਾਪਿ ਵਟ੍ਟਤਿ ਉਭਿਨ੍ਨਂ ਸਾਮਞ੍ਞਵਚਨਭਾਵਤੋ. ਅਪ੍ਪਮਾਣਕਤਭਾਵੋ ਲਬ੍ਭਤੇਵ. ਤਥਾ ਹਿ ਤਂ ਕਿਲੇਸਾਨਂ ਵਿਕ੍ਖਮ੍ਭਨਸਮਤ੍ਥਤਾਯ ਦੀਘਸਨ੍ਤਾਨਤਾਯ ਵਿਪੁਲਫਲਤਾਯ ਚ ‘‘ਮਹਗ੍ਗਤ’’ਨ੍ਤਿ ਵੁਚ੍ਚਤਿ.

ਨ ਓਹੀਯਤੀਤਿ ਯਸ੍ਮਿਂ ਸਨ੍ਤਾਨੇ ਕਾਮਾਵਚਰਕਮ੍ਮਂ, ਮਹਗ੍ਗਤਕਮ੍ਮਞ੍ਚ ਕਤੂਪਚਿਤਂ ਵਿਪਾਕਦਾਨੇ ਲਦ੍ਧਾਵਸਰਂ ਹੁਤ੍ਵਾ ਠਿਤਂ, ਤੇਸੁ ਕਾਮਾਵਚਰਕਮ੍ਮਂ ਇਤਰਂ ਨੀਹਰਿਤ੍ਵਾ ਸਯਂ ਤਤ੍ਥ ਓਹੀਯਿਤ੍ਵਾ ਅਤ੍ਤਨੋ ਵਿਪਾਕਂ ਦਾਤੁਂ ਨ ਸਕ੍ਕੋਤਿ, ਮਹਗ੍ਗਤਕਮ੍ਮਮੇਵ ਪਨ ਇਤਰਂ ਪਟਿਬਾਹਿਤ੍ਵਾ ਅਤ੍ਤਨੋ ਵਿਪਾਕਂ ਦਾਤੁਂ ਸਕ੍ਕੋਤਿ ਗਰੁਭਾਵਤੋ. ਤੇਨਾਹ ‘‘ਤਂ ਕਾਮਾਵਚਰਕਮ੍ਮ’’ਨ੍ਤਿਆਦਿ. ਕਿਲੇਸਵਸੇਨਾਤਿ ਪਾਪਕਮ੍ਮਸ੍ਸ ਮੂਲਭੂਤਕਿਲੇਸਵਸੇਨ. ਪਾਣਾਤਿਪਾਤਾਦਯੋ ਹਿ ਦੋਸਮੋਹਲੋਭਾਦਿਮੂਲਕਿਲੇਸਸਮੁਟ੍ਠਾਨਾ. ਕਿਲੇਸਵਸੇਨਾਤਿ ਵਾ ਕਮ੍ਮਕਿਲੇਸਵਸੇਨ. ਵੁਤ੍ਤਞ੍ਹੇਤਂ – ‘‘ਪਾਣਾਤਿਪਾਤੋ ਖੋ, ਗਹਪਤਿਪੁਤ੍ਤ, ਕਮ੍ਮਕਿਲੇਸੋ’’ਤਿਆਦਿ (ਦੀ. ਨਿ. ੩.੨੪੫). ਯਥਾਨੁਸਨ੍ਧਿਨਾਵ ਗਤਨ੍ਤਿ ਯਥਾਨੁਸਨ੍ਧਿਸਙ੍ਖਾਤਅਨੁਸਨ੍ਧਿਨਾ ਓਸਾਨਂ ਗਤਂ ਸਂਕਿਲੇਸਸਮ੍ਮੁਖੇਨ ਉਟ੍ਠਿਤਾਯ ਵੋਦਾਨਧਮ੍ਮਵਸੇਨ ਨਿਟ੍ਠਾਪਿਤਤ੍ਤਾ.

ਸਙ੍ਖਧਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਕੁਲਸੁਤ੍ਤਵਣ੍ਣਨਾ

੩੬੧. ਏਵਂ ਪਵਤ੍ਤਈਹਿਤਿਕਾਤਿ ਏਵਂ ਦ੍ਵਿਧਾ ਪਵਤ੍ਤਈਹਿਤਿਕਾ. ਦ੍ਵੀਹਿਤਿਕਾ ਦੁਕ੍ਕਰਜੀਵਿਕਪਯੋਗਾ. ਸਲਾਕਮਤ੍ਤਂ ਵੁਤ੍ਤਂ ਏਤ੍ਥਾਤਿ ਸਲਾਕਾ ਵੁਤ੍ਤਾ, ਪੁਰਿਮਪਦੇ ਉਤ੍ਤਰਪਦਲੋਪੋ. ਉਭਤੋਕੋਟਿਕਨ੍ਤਿ ਯਦਿ ‘‘ਕੁਲਾਨੁਦਯਂ ਨ ਵਣ੍ਣੇਮੀ’’ਤਿ ਵਦਤਿ, ‘‘ਭੂਤਾ ਨਿਕ੍ਕਰੁਣਾ ਸਮਣ ਤੁਮ੍ਹੇ’’ਤਿ ਵਾਦਂ ਆਰੋਪੇਹਿ. ਅਥ ਸਬ੍ਬਦਾਪਿ ‘‘ਕੁਲਾਨੁਦਯਂ ਵਣ੍ਣੇਮੀ’’ਤਿ ਵਦਤਿ. ਏਵਂ ਸਨ੍ਤੇ ‘‘ਕਸ੍ਮਾ ਏਵਂ ਦੁਬ੍ਭਿਕ੍ਖੇ ਕਾਲੇ ਮਹਤਿਯਾ ਪਰਿਸਾਯ ਪਰਿਵੁਤੋ ਜਨਪਦਚਾਰਿਕਂ ਚਰਨ੍ਤਾ ਕੁਲੂਪਚ੍ਛੇਦਾਯ ਪਟਿਪਜ੍ਜਥਾ’’ਤਿ ਏਵਂ ਉਭਤੋਕੋਟਿਕਂ ਵਾਦਂ ਆਰੋਪੇਹੀਤਿ ਗਾਮਣਿਂ ਉਯ੍ਯੋਜੇਸਿ.

ਦ੍ਵੇ ਅਨ੍ਤੇਤਿ ਉਭੋ ਕੋਟਿਯੋ. ਬਹਿ ਨੀਹਰਿਤੁਨ੍ਤਿ ਨ ਵਣ੍ਣੇਮਿ ਵਣ੍ਣੇਮੀਤਿ ਦ੍ਵੇ ਅਨ੍ਤੇ ਮੋਚੇਨ੍ਤੋ ਤਂ ਪੁਚ੍ਛਿਤਮਤ੍ਥਂ ਬਹਿ ਨੀਹਰਤਿ ਨਾਮ. ਤਤ੍ਥ ਦੋਸਂ ਦਤ੍ਵਾ ਚੋਦੇਨ੍ਤੋ ਤਂ ਅਪੁਚ੍ਛਂ ਕਰੋਨ੍ਤੋ ਗਿਲਿਤ੍ਵਾ ਵਿਯ ਅਨ੍ਤੋ ਪਵੇਸੇਤਿ ਨਾਮ.

ਇਤੋ ਸੋ ਗਾਮਣੀਤਿਆਦਿ ਅਤ੍ਤਨੋ ਭਿਕ੍ਖੂਨਂ ਅਞ੍ਞੇਸਞ੍ਚ ਅਤ੍ਥਕਾਮਾਨਂ ਭਿਕ੍ਖਪ੍ਪਦਾਨੇਨ ਅਨਿਟ੍ਠਪ੍ਪਤ੍ਤਿਅਭਾਵਦਸ੍ਸਨਤ੍ਥਂ ਆਰਦ੍ਧਂ. ਦਾਨੇਨ ਸਮ੍ਭੂਤਾਨੀਤਿ ਦਾਨਮਯੇਨ ਪੁਞ੍ਞਕਿਰਿਯਵਤ੍ਥੁਨਾ ਸਮ੍ਮਦੇਵ ਭੂਤਿਂ ਵਡ੍ਢਿਂ ਪਤ੍ਤਾਨਿ. ਸਚ੍ਚੇਨ ਅਰਿਯਵੋਹਾਰੇਨ ਸਮ੍ਮਦੇਵ ਭੂਤਾਨਿ ਉਪ੍ਪਨ੍ਨਾਨਿ ਸਚ੍ਚਸਮ੍ਭੂਤਾਨੀਤਿ ਆਹ ‘‘ਸਚ੍ਚਂ ਨਾਮ ਸਚ੍ਚਵਾਦਿਤਾ’’ਤਿ. ਸੇਸਸੀਲਨ੍ਤਿ ਅਟ੍ਠਵਿਧਅਰਿਯਵੋਹਾਰਤੋ ਅਞ੍ਞਸੀਲਂ. ਨਿਹਿਤਨ੍ਤਿ ਤਸ੍ਮਿਂ ਕੁਲੇ ਪੁਬ੍ਬਪੁਰਿਸੇਹਿ ਨਿਧਾਨਭਾਵੇਨ ਨਿਹਿਤਂ. ਦੁਪ੍ਪਯੁਤ੍ਤਾਤਿ ਕਸਿਵਾਣਿਜ੍ਜਾਦਿਵਸੇਨ ਦੁਟ੍ਠੁ ਪਯੁਤ੍ਤਾ ਕਮ੍ਮਨ੍ਤਾ. ਵਿਪਜ੍ਜਨ੍ਤੀਤਿ ਨਸ੍ਸਨ੍ਤਿ. ਕੁਲਙ੍ਗਾਰੋਤਿ ਕੁਲਸ੍ਸ ਅਙ੍ਗਾਰਸਦਿਸੋ ਵਿਨਾਸਕਪੁਗ੍ਗਲੋ. ਅਨਿਚ੍ਚਤਾਤਿ ਮਰਣਂ. ਤਸ੍ਮਿਂ ਕੁਲੇ ਪਧਾਨਪੁਰਿਸਾਨਂ ਭੋਗਾਨਂ ਵਾ ਸਬ੍ਬਸੋ ਵਿਨਾਸੋ. ਤੇਨਾਹ ‘‘ਹੁਤ੍ਵਾ ਅਭਾਵੋ’’ਤਿਆਦਿ.

ਕੁਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਮਣਿਚੂਲ਼ਕਸੁਤ੍ਤਵਣ੍ਣਨਾ

੩੬੨. ਤਂ ਪਰਿਸਨ੍ਤਿ ਤਂ ਰਾਜਨ੍ਤੇਪੁਰੇ ਨਿਸਿਨ੍ਨਂ ਰਾਜਪਰਿਸਂ. ਨਯਗ੍ਗਾਹੇਤਿ ਕੁਤੋਚਿਪਿ ਅਸੁਤ੍ਵਾ ਕੇਵਲਂ ਅਤ੍ਤਨੋ ਏਵ ਮਤਿਯਾ ਨਯਗ੍ਗਹਣੇ ਠਤ੍ਵਾ.

ਕਾਰੇਤੁਂ ਵਟ੍ਟਤਿ ਸਤਿ ਸਮ੍ਭਵੇ ਪਟਿਸਙ੍ਖਾਰਸ੍ਸ, ਸੇਨਾਸਨਵਿਨਾਸੋ ਨ ਅਜ੍ਝੁਪੇਕ੍ਖਿਤਬ੍ਬੋਤਿ ਅਧਿਪ੍ਪਾਯੋ. ਅਤ੍ਤਨੋ ਏਤ੍ਥ ਕਿਚ੍ਚਾਵਸਾਨੇ ਯਂ ਗਿਹੀਨਂਯੇਵ ਸਨ੍ਤਕਂ ਤਾਵਕਾਲਿਕਂ, ਤਂ ਗਿਹਿਵਿਕਤਨ੍ਤਿ ਆਹ ‘‘ਗਿਹਿਵਿਕਤਂ ਕਤ੍ਵਾ’’ਤਿ. ਨ ਵਦਾਮਿ ਪਬ੍ਬਜ੍ਜਿਤਾਸਾਰੁਪ੍ਪਤੋ.

ਮਣਿਚੂਲ਼ਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਭਦ੍ਰਕਸੁਤ੍ਤਵਣ੍ਣਨਾ

੩੬੩. ਏਵਂਨਾਮਕੇਤਿ ਮਲ੍ਲਾ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਨੇਸਂ ਨਿਵਾਸਤਾਯ ‘‘ਮਲ੍ਲਾ’’ਇਚ੍ਚੇਵ ਬਹੁਵਚਨਵਸੇਨ ਲਦ੍ਧਨਾਮਤ੍ਤਾ ਏਵਂਨਾਮਕੇ ਜਨਪਦੇ. ਨਤ੍ਥਿ ਏਤਸ੍ਸ ਪਤ੍ਤਿਯਾ ਕਾਲਨ੍ਤਰਸਞ੍ਞਿਤੋ ਕਾਲੋਤਿ ਅਕਾਲੋ, ਸੋ ਏਵ ਅਕਾਲਿਕੋ. ਤੇਨਾਹ – ‘‘ਕਾਲਂ ਅਨਤਿਕ੍ਕਮਿਤ੍ਵਾ ਪਤ੍ਤੇਨਾ’’ਤਿ. ਸੋ ਪਨ ‘‘ਯਂਕਿਞ੍ਚਿ ਦੁਕ੍ਖਂ ਉਪ੍ਪਜ੍ਜਮਾਨਂ ਉਪ੍ਪਜ੍ਜਤਿ, ਸਬ੍ਬਂ ਤਂ ਛਨ੍ਦਮੂਲਕ’’ਨ੍ਤਿ ਏਵਂ ਵੁਤ੍ਤੋ ਦੁਕ੍ਖਸ੍ਸ ਛਨ੍ਦਮੂਲਭਾਵੋ, ਏਵਂ ਛਨ੍ਦਮੂਲਕਸ੍ਸ ਦੁਕ੍ਖਸ੍ਸ ਕਥਿਤਤ੍ਤਾ ‘‘ਇਮਸ੍ਮਿਂ ਸੁਤ੍ਤੇ ਵਟ੍ਟਦੁਕ੍ਖਂ ਕਥਿਤ’’ਨ੍ਤਿ ਵੁਤ੍ਤਂ.

ਭਦ੍ਰਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨. ਰਾਸਿਯਸੁਤ੍ਤਵਣ੍ਣਨਾ

੩੬੪. ਰਾਸਿਂ ਕਤ੍ਵਾ ਮਾਰਪਾਸਵਸੇਨ, ਤਤ੍ਰਾਪਿ ਅਨ੍ਤਰਭੇਦੇਨ ਵਿਭਜਿਤ੍ਵਾ ਪੁਚ੍ਛਿਤਬ੍ਬਪਞ੍ਹੇ ਏਕਤੋ ਰਾਸਿਂ ਕਤ੍ਵਾ. ਤਪਨਂ ਅਤ੍ਤਪਰਿਤਾਪਨਂ ਤਪੋ, ਸੋ ਏਤਸ੍ਸ ਅਤ੍ਥੀਤਿ ਤਪਸ੍ਸੀ, ਤਂ ਤਪਸ੍ਸਿਂ. ਸੋ ਪਨ ਤਂ ਤਪਂ ਨਿਸ੍ਸਾਯ ਠਿਤੋ ਨਾਮ ਹੋਤੀਤਿ ਵੁਤ੍ਤਂ ‘‘ਤਪਨਿਸ੍ਸਿਤਕ’’ਨ੍ਤਿ. ਸੋ ਪਨ ਅਨੇਕਾਕਾਰਭੇਦੇਨ ਲੂਖਂ ਫਰੁਸਂ ਜੀਵਨਸੀਲਤ੍ਤਾ ਲੂਖਜੀਵੀ ਨਾਮ. ਤੇਨਾਹ ‘‘ਲੂਖਜੀਵਿਕ’’ਨ੍ਤਿ. ਮਜ੍ਝਿਮਾਯ ਪਟਿਪਤ੍ਤਿਯਾ ਉਪ੍ਪਥਭਾਵੇਨ ਅਵਨਿਯਾ ਗਨ੍ਧਬ੍ਬਾਤਿ ਅਨ੍ਤਾ, ਤਤੋ ਏਵ ਲਾਮਕਤ੍ਤਾ ਅਨ੍ਤਾ. ਲਾਮਕਮ੍ਪਿ ‘‘ਅਨ੍ਤੋ’’ਤਿ ਵੁਚ੍ਚਤਿ ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨਂ (ਇਤਿਵੁ. ੯੧; ਸਂ. ਨਿ. ੩.੮੦), ਏਕੋ ਅਨ੍ਤੋ’’ਤਿ ਏਵਮਾਦੀਸੁ (ਸਂ. ਨਿ. ੨.੧੫; ੩.੯੦). ਅਟ੍ਠਕਥਾਯਂ ਪਨ ਅਞ੍ਞਮਞ੍ਞਆਧਾਰਭਾਵਂ ਉਰੀਕਤ੍ਵਾ ‘‘ਕੋਟ੍ਠਾਸਾ’’ਤਿ ਵੁਤ੍ਤਂ. ਹੀਨੋ ਗਾਮੋਤਿ ਪਾਲ਼ਿ. ਗਾਮ-ਸਦ੍ਦੋ ਹੀਨਪਰਿਯਾਯੋਤਿ ਅਧਿਪ੍ਪਾਯੇਨਾਹ ‘‘ਗਾਮ੍ਮੋ’’ਤਿ. ਗਾਮੇ ਭਵੋਤਿ ਗਾਮ੍ਮੋ. ਗਾਮ-ਸਦ੍ਦੋ ਚੇਤ੍ਥ ਗਾਮਵਾਸਿਵਿਸਯੋ ‘‘ਗਾਮੋ ਆਗਤੋ’’ਤਿਆਦੀਸੁ ਵਿਯ. ਅਟ੍ਠਕਥਾਯਂ ਪਨ ‘‘ਗਾਮਵਾਸੀਨਂ ਧਮ੍ਮੋ’’ਤਿ ਵੁਤ੍ਤਂ, ਤੇਸਂ ਚਾਰਿਤ੍ਤਨ੍ਤਿ ਅਤ੍ਥੋ. ਅਤ੍ਤ-ਸਦ੍ਦੋ ਇਧ ਸਰੀਰਪਰਿਯਾਯੋ ‘‘ਅਤ੍ਤਨ੍ਤਪੋ’’ਤਿਆਦੀਸੁ ਵਿਯਾਤਿ ਆਹ ‘‘ਸਰੀਰਦੁਕ੍ਖਕਰਣਨ੍ਤਿ ਅਤ੍ਥੋ’’ਤਿ.

ਏਤ੍ਥਾਤਿ ਏਤਸ੍ਮਿਂ ਤਪਨਿਸ੍ਸਿਤਗਰਹਿਤਬ੍ਬਪਦੇ ਕਸ੍ਮਾ ਅਨ੍ਤਦ੍ਵਯਮਜ੍ਝਿਮਪਟਿਪਦਾਗਹਣਂ? ਅਤ੍ਤਕਿਲਮਥਾਨੁਯੋਗੋ ਤਾਵ ਗਯ੍ਹਤੁ ਇਦਮਤ੍ਥਿਤਾਯਾਤਿ ਅਧਿਪ੍ਪਾਯੋ. ਕਾਮਭੋਗੀਤਪਨਿਸ੍ਸਿਤਕਨਿਜ੍ਜਰਵਤ੍ਥੂਨਂ ਦਸ੍ਸਨੇ ਯਥਾਧਿਪ੍ਪੇਤਸ੍ਸ ਅਤ੍ਥਸ੍ਸ ਵਿਭਜਿਤ੍ਵਾ ਕਥਨਂ ਸਮ੍ਭਵਤੀਤਿ ਤੇ ਦਸ੍ਸੇਤ੍ਵਾ ਅਧਿਪ੍ਪੇਤਤ੍ਥੋ ਕਥਿਤੋ.

ਤਮਤ੍ਥਨ੍ਤਿ ਯੋ ‘‘ਕਾਮਭੋਗੀਤਪਨਿਸ੍ਸਿਤਕੇਸੁ ਗਰਹਿਤਬ੍ਬੇਯੇਵ ਗਰਹਤਿ, ਪਸਂਸਿਤਬ੍ਬੇਯੇਵ ਚ ਪਸਂਸਤੀ’’ਤਿ ਵੁਤ੍ਤੋ ਅਤ੍ਥੋ, ਤਮਤ੍ਥਂ ਪਕਾਸੇਨ੍ਤੋ. ਸਾਹਸਿਕਕਮ੍ਮੇਨਾਤਿ ਅਯੁਤ੍ਤੇਨ ਕਮ੍ਮੇਨ. ਧਮ੍ਮੇਨ ਚ ਅਧਮ੍ਮੇਨ ਚਾਤਿ ਧਮ੍ਮਿਕੇਨ ਅਧਮ੍ਮਿਕੇਨ ਚ. ਅਯੋਨਿਸੋ ਪਵਤ੍ਤਂ ਬਾਹਿਰਕਂ ਸਨ੍ਧਾਯ ਚੋਦਕੋ ‘‘ਕਥ’’ਨ੍ਤਿਆਦਿਮਾਹ. ਇਤਰੋ ਨਯਿਦਂ ਤਾਦਿਸਂ ਅਤ੍ਤਪਰਿਤਾਪਨਂ ਅਧਿਪ੍ਪੇਤਂ, ਅਥ ਖੋ ਯੋਨਿਸੋ ਪਵਤ੍ਤਂ ਸਾਸਨਿਕਮੇਵਾਤਿ ਦਸ੍ਸੇਨ੍ਤੋ ‘‘ਚਤੁਰਙ੍ਗਵੀਰਿਯਵਸੇਨ ਚਾ’’ਤਿ ਆਹ. ਤਤ੍ਥ ‘‘ਕਾਮਂ ਤਚੋ ਚ ਨ੍ਹਾਰੁ ਚ ਅਟ੍ਠਿ ਚ ਅਵਸਿਸ੍ਸਤੂ’’ਤਿਆਦਿਨਾ (ਮ. ਨਿ. ੨.੧੮੪; ਸਂ. ਨਿ. ੨.੨੨.੨੩੭; ਅ. ਨਿ. ੨.੫) ਨਯੇਨ ਵੁਤ੍ਤਾ ਸਰੀਰੇਨਿਰਪੇਕ੍ਖਵਿਪਸ੍ਸਨਾਯ ਉਸ੍ਸੁਕ੍ਕਾਪਨਵਸੇਨ ਪਵਤ੍ਤਾ ਵੀਰਿਯਭਾਵਨਾ ‘‘ਚਤੁਰਙ੍ਗਵੀਰਿਯਵਸੇਨਾ’’ਤਿ ਵੁਤ੍ਤਾ. ਤਥਾ ਅਬ੍ਭੋਕਾਸਿਕਨੇਸਜ੍ਜਿਕਤਪਾਦਿਨਿਸ੍ਸਿਤਾਵ ਕਿਲੇਸਨਿਮ੍ਮਥਨਯੋਗ੍ਯਾ ਵੀਰਿਯਭਾਵਨਾ ‘‘ਧੁਤਙ੍ਗਵਸੇਨ ਚਾ’’ਤਿ ਵੁਤ੍ਤਾਤਿ. ਅਰਿਯਮਗ੍ਗੇਨ ਨਿਸ੍ਸੇਸਕਿਲੇਸਾਨਂ ਪਜਹਨਾ ਨਿਜ੍ਜਰਾ. ਸਾ ਚ ਅਤ੍ਤਪਚ੍ਚਕ੍ਖਤਾਯ ਸਨ੍ਦਿਟ੍ਠਿਕਾ ਤਿਣ੍ਣਂ ਮੂਲਕਿਲੇਸਾਨਂ ਪਜਹਨੇਨ ‘‘ਤਿਸ੍ਸੋ’’ਤਿ ਚ ਵੁਤ੍ਤਾ. ਤੇਨਾਹ ‘‘ਏਕੋਪੀ’’ਤਿਆਦਿ.

ਰਾਸਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੩. ਪਾਟਲਿਯਸੁਤ੍ਤਵਣ੍ਣਨਾ

੩੬੫. ‘‘ਮਾਯਞ੍ਚਾਹਂ ਪਜਾਨਾਮੀ’’ਤਿ ਵਚਨਂ ਕਾਮਂ ਤੇਸਂ ਮਾਯਾਵੀਭਾਵਦਸ੍ਸਨਪਰਂ, ਭਗਵਤੋ ਪਨ ਮਾਯਾਸਾਠੇਯ੍ਯਾਦਿਕਸ੍ਸ ਸਬ੍ਬਸ੍ਸ ਪਾਪਧਮ੍ਮਸ੍ਸ ਬੋਧਿਮੂਲੇ ਏਵ ਸੇਤੁਘਾਤੋ, ਤਸ੍ਮਾ ਸਬ੍ਬਸੋ ਪਹੀਨਮਾਯੋ, ਸਬ੍ਬਞ੍ਞੁਤਾਯ ਮਾਯਂ ਅਞ੍ਞੇ ਚ ਞੇਯ੍ਯੇ ਸਬ੍ਬਸੋ ਜਾਨਾਤਿ. ਤੇਨ ਵੁਤ੍ਤਂ ‘‘ਮਾਯਞ੍ਚਾਹਂ, ਗਾਮਣਿ, ਪਜਾਨਾਮੀ’’ਤਿਆਦਿ. ਮਾਯਞ੍ਚ ਪਜਾਨਾਮੀਤਿ ਨ ਕੇਵਲਮਹਂ ਮਾਯਂ ਏਵ ਜਾਨਾਮਿ, ਅਥ ਖੋ ਅਞ੍ਞਮ੍ਪਿ ਇਦਞ੍ਚਿਦਞ੍ਚ ਜਾਨਾਮੀਤਿ.

ਇਤ੍ਥਿਕਾਮੇਹੀਤਿ ਇਤ੍ਥੀਹਿ ਚੇਵ ਤਦਞ੍ਞਕਾਮੇਹਿ ਚ. ਏਕਸ੍ਮਿਂ ਠਾਨੇਤਿ ਏਕਸ੍ਮਿਂ ਪਦੇਸੇ. ਏਕੇਕਸ੍ਸੇਵ ਆਗਨ੍ਤੁਕਸ੍ਸ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ. ਸਤ੍ਤਿਅਨੁਰੂਪੇਨਾਤਿ ਵਿਭਵਸਤ੍ਤਿਅਨੁਰੂਪੇਨ. ਬਲਾਨੁਰੂਪੇਨਾਤਿ ਪਰਿਵਾਰਬਲਾਨੁਰੂਪੇਨ. ਸਤ੍ਤਿਅਨੁਰੂਪੇਨਾਤਿ ਵਾ ਸਦ੍ਧਾਸਤ੍ਤਿਅਨੁਰੂਪੇਨ. ਬਲਾਨੁਰੂਪੇਨਾਤਿ ਵਿਭਵਬਲਾਨੁਰੂਪੇਨ. ਧਮ੍ਮੇਸੁ ਸਮਾਧਿ ਦਸਕੁਸਲਧਮ੍ਮੇਸੁ ਸਮਾਧਾਨਂ. ਅਗ੍ਗਹਿਤਚਿਤ੍ਤਤਾ ਪਰਿਯੁਟ੍ਠਕਾਰਿਤਾ. ਤੇਨ ਲੋਕਿਯਸੀਲਵਿਸੁਦ੍ਧਿ ਦਿਟ੍ਠਿਵਿਸੁਦ੍ਧਿ ਚ ਵੁਤ੍ਤਾ. ਤਥਾ ਚਾਹ – ‘‘ਕੋ ਚਾਦਿ ਕੁਸਲਾਨਂ ਧਮ੍ਮਾਨਂ, ਸੀਲਞ੍ਚ ਸੁਵਿਸੁਦ੍ਧਂ ਦਿਟ੍ਠਿ ਚ ਉਜੁਕਾ’’ਤਿ (ਸਂ. ਨਿ. ੫.੩੬੯). ਤਤ੍ਥ ਪਤਿਟ੍ਠਿਤਸ੍ਸ ਉਪਰਿ ਕਤ੍ਤਬ੍ਬਂ ਦਸ੍ਸੇਤੁਂ ‘‘ਧਮ੍ਮਸਮਾਧਿਸ੍ਮਿਂ ਠਿਤੋ’’ਤਿਆਦਿ ਵੁਤ੍ਤਂ. ਅਯਂ ਪਟਿਪਦਾਤਿ ਤਸ੍ਸ ਕਮ੍ਮਫਲਵਾਦਿਨੋ ਸਤ੍ਥੁ ਵਚਨਂ ਸਬ੍ਬੇਸਞ੍ਚ ਅਯਂ ਮਯ੍ਹਂ ਸੀਲਸਂਵਰਬ੍ਰਹ੍ਮਵਿਹਾਰਭਾਵਨਾਸਙ੍ਖਾਤਾਪਟਿਪਦਾ ਅਨਪਰਾਧਕਤਾਯ ਏਵ ਸਂਵਤ੍ਤਤਿ. ਜਯਗ੍ਗਾਹੋਤਿ ਉਭਯਥਾਪਿ ਮਯ੍ਹਂ ਕਾਚਿ ਜਾਨਿ ਨਤ੍ਥਿ.

ਪਞ੍ਚ ਧਮ੍ਮਾ ਧਮ੍ਮਸਮਾਧਿ ਨਾਮ, ਵਿਪਸ੍ਸਨਾਮਗ੍ਗਫਲਧਮ੍ਮਮਤ੍ਤਂ ਵਾ. ਤਤਿਯਵਿਕਪ੍ਪੇ ਸੀਲਾਦਿਵਿਸੁਦ੍ਧਿਯਾ ਸਦ੍ਧਿਂ ਬ੍ਰਹ੍ਮਵਿਹਾਰਾ ਯਥਾਵੁਤ੍ਤਤਿਵਿਧਧਮ੍ਮਾਵਹਤ੍ਤਾ ਏਵ ਧਮ੍ਮਸਮਾਧਿ ਨਾਮ. ਪੂਰੇਨ੍ਤਸ੍ਸ ਉਪ੍ਪਨ੍ਨਾ ਚਿਤ੍ਤੇਕਗ੍ਗਤਾਤਿ ਵੁਤ੍ਤਖਣਿਕਚਿਤ੍ਤੇਕਗ੍ਗਤਾ. ਸਾਪਿ ਚਿਤ੍ਤਸ੍ਸ ਸਮਾਧਾਨਤੋ ‘‘ਚਿਤ੍ਤਸਮਾਧੀ’’ਤਿ ਵੁਤ੍ਤਾ, ਤਸ੍ਸ ਪਟਿਪਕ੍ਖਂ ਵਿਕ੍ਖਮ੍ਭਨ੍ਤੀ ਸਮੁਚ੍ਛਿਨ੍ਦਨ੍ਤੀ ਚ ਹੁਤ੍ਵਾ ਪਵਤ੍ਤਾ ਯਥਾਵੁਤ੍ਤਸਮਾਧਿ ਏਵ ਵਿਸੇਸੇਨ ਚਿਤ੍ਤਸਮਾਧਿ ਨਾਮ.

ਪਾਟਲਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਗਾਮਣਿਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.