੩-੧੫. ਧਮ੍ਮਵਾਦੀਪਞ੍ਹਸੁਤ੍ਤਾਦਿਵਣ੍ਣਨਾ

੩੧੬-੩੨੮. ਪਹਾਯ ਗਤਤ੍ਤਾਤਿ ਅਰਿਯਮਗ੍ਗੇਨ ਜਹਿਤ੍ਵਾ ਞਾਣਗਮਨੇਨ ਗਤਤ੍ਤਾ. ਸੁਟ੍ਠੁ ਗਤਾਤਿ ਸਮ੍ਮਾ ਗਤਾ ਪਟਿਪਨ੍ਨਾਤਿ ਸੁਗਤਾ. ਪਰਿਜਾਨਨਤ੍ਥਨ੍ਤਿ ਤੀਹਿ ਪਰਿਞ੍ਞਾਹਿ ਪਰਿਜਾਨਨਤ੍ਥਂ. ਦੁਕ੍ਖਸਙ੍ਖਾਤੋਤਿ ‘‘ਦੁਕ੍ਖ’’ਨ੍ਤਿ ਸਙ੍ਖਾਤਬ੍ਬੋ ਵਿਦਿਤਬ੍ਬੋ ਚ ਦੁਕ੍ਖਸਭਾਵੋ ਧਮ੍ਮੋ ਦੁਕ੍ਖਦੁਕ੍ਖਤਾ. ਯਸ੍ਮਾ ਦੁਕ੍ਖਵੇਦਨਾਵਿਨਿਮੁਤ੍ਤਸਙ੍ਖਤਧਮ੍ਮੇ ਸੁਖਵੇਦਨਾਯ ਚ ਯਥਾ ਇਧ ਸਙ੍ਖਾਰਦੁਕ੍ਖਤਾ ਵਿਪਰਿਣਾਮਦੁਕ੍ਖਤਾਤਿ ਦੁਕ੍ਖਪਰਿਯਾਯੋ ਨਿਰੁਪ੍ਪਤੇਵ, ਤਸ੍ਮਾ ਦੁਕ੍ਖਸਭਾਵੋ ਧਮ੍ਮੋ ਏਕੇਨ ਦੁਕ੍ਖਸਦ੍ਦੇਨ ਵਿਸੇਸੇਤ੍ਵਾ ਵੁਤ੍ਤੋ ‘‘ਦੁਕ੍ਖਦੁਕ੍ਖਤਾ’’ਤਿ. ਸੇਸਪਦਦ੍ਵਯੇਤਿ ਸਙ੍ਖਾਰਦੁਕ੍ਖਤਾ ਵਿਪਰਿਣਾਮਦੁਕ੍ਖਤਾਤਿ ਏਤਸ੍ਮਿਂ ਪਦਦ੍ਵਯੇ. ਸਙ੍ਖਾਰਭਾਵੇਨ ਦੁਕ੍ਖਸਭਾਵੋ ਸਙ੍ਖਾਰਦੁਕ੍ਖਤਾ. ਸੁਖਸ੍ਸ ਵਿਪਰਿਣਾਮਨੇਨ ਦੁਕ੍ਖਸਭਾਵੋ ਵਿਪਰਿਣਾਮਦੁਕ੍ਖਤਾ.

ਧਮ੍ਮਵਾਦੀਪਞ੍ਹਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.