੪. ਜਮ੍ਬੁਖਾਦਕਸਂਯੁਤ੍ਤਂ

੧. ਨਿਬ੍ਬਾਨਪਞ੍ਹਸੁਤ੍ਤਵਣ੍ਣਨਾ

੩੧੪. ਨਿਬ੍ਬਾਨਂ ਆਗਮ੍ਮਾਤਿ ਏਤ੍ਥ ਆਗਮ੍ਮਾਤਿ ਸਬ੍ਬਸਙ੍ਖਾਰੇਹਿ ਨਿਬ੍ਬਿਨ੍ਨਸ੍ਸ ਵਿਸਙ੍ਖਾਰਨਿਨ੍ਨਸ੍ਸ ਗੋਤ੍ਰਭੁਨਾ ਵਿਵਟ੍ਟਿਤਮਾਨਸਸ੍ਸ ਮਗ੍ਗੇਨ ਸਚ੍ਛਿਕਰਣੇਨਾਤਿ ਅਤ੍ਥੋ. ਸਚ੍ਛਿਕਿਰਿਯਮਾਨਞ੍ਹਿ ਤਂ ਅਧਿਗਨ੍ਤ੍ਵਾ ਆਰਮ੍ਮਣਪਚ੍ਚਯਭੂਤਞ੍ਚ ਪਟਿਚ੍ਚ ਅਧਿਪਤਿਪਚ੍ਚਯਭੂਤੇ ਚ ਤਸ੍ਮਿਂ ਪਰਮਸ੍ਸਾਸਭਾਵੇਨ ਵਿਮੁਤ੍ਤਸਙ੍ਖਾਰਸ੍ਸ ਪਰਮਗਤਿਭਾਵੇਨ ਚ ਪਤਿਟ੍ਠਾਨਭੂਤੇ ਪਤਿਟ੍ਠਾਯ ਖਯਸਙ੍ਖਾਤੋ ਮਗ੍ਗੋ ਰਾਗਾਦਿਕੇ ਖੇਪੇਤੀਤਿ ਤਂਸਚ੍ਛਿਕਰਣਾਭਾਵੇ ਰਾਗਾਦੀਨਂ ਅਨੁਪ੍ਪਤ੍ਤਿਨਿਰੋਧਗਮਨਾਭਾਵਤੋ ‘‘ਨਿਬ੍ਬਾਨਂ ਆਗਮ੍ਮ ਰਾਗੋ ਖੀਯਤੀ’’ਤਿ ਵੁਤ੍ਤਂ.

ਇਮਿਨਾਵ ਸੁਤ੍ਤੇਨਾਤਿ ਇਮਿਨਾਵ ਜਮ੍ਬੁਖਾਦਕਸੁਤ੍ਤੇਨ. ਕਿਲੇਸਕ੍ਖਯਮਤ੍ਤਂ ਨਿਬ੍ਬਾਨਨ੍ਤਿ ਵਦੇਯ੍ਯ ‘‘ਰਾਗਕ੍ਖਯੋ’’ਤਿਆਦਿਨਾ ਸੁਤ੍ਤੇ ਆਗਤਤ੍ਤਾ. ‘‘ਕਿਲੇਸਕ੍ਖਯਮਤ੍ਤ’’ਨ੍ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਆਹ ‘‘ਕਸ੍ਸਾ’’ਤਿਆਦਿ. ਅਦ੍ਧਾ ਅਤ੍ਤਨੋਤਿ ਵਕ੍ਖਤਿ ‘‘ਪਰਸ੍ਸ ਕਿਲੇਸਕ੍ਖਯੇਨ ਪਰਸ੍ਸ ਨਿਬ੍ਬਾਨਸਮ੍ਪਤ੍ਤਿ ਨ ਯੁਤ੍ਤਾ’’ਤਿ. ਨਿਬ੍ਬਾਨਾਰਮ੍ਮਣਕਰਣੇਨ ਗੋਤ੍ਰਭੁਕ੍ਖਣੇ ਕਿਲੇਸਕ੍ਖਯਪ੍ਪਤ੍ਤਿਤਾ ਚ ਆਪਨ੍ਨਾਤਿ ਆਹ – ‘‘ਕਿਂ ਪਨ ਤੇਸੁ ਅਖੀਣੇਸੁਯੇਵਾ’’ਤਿਆਦਿ. ਨਨੁ ਆਰਮ੍ਮਣਕਰਣਮਤ੍ਤੇਨ ਕਿਲੇਸਕ੍ਖਯੋ ਅਨੁਪ੍ਪਤ੍ਤੋਤਿ ਨ ਸਕ੍ਕਾ ਵਤ੍ਤੁਂ. ਚਿਤ੍ਤਞ੍ਹਿ ਅਤੀਤਾਨਾਗਤਾਦਿਸਬ੍ਬਂ ਆਲਮ੍ਬਨਂ ਕਰੋਤਿ, ਨ ਨਿਪ੍ਫਨ੍ਨਮੇਵਾਤਿ. ਗੋਤ੍ਰਭੂਪਿ ਮਗ੍ਗੇਨ ਯਾ ਕਿਲੇਸਾਨਂ ਅਨੁਪ੍ਪਤ੍ਤਿਧਮ੍ਮਤਾ ਕਾਤਬ੍ਬਾ, ਤਂ ਆਰਬ੍ਭ ਪਵਤ੍ਤਿਸ੍ਸਤੀਤਿ? ਨ, ਅਪ੍ਪਤ੍ਤਨਿਬ੍ਬਾਨਸ੍ਸ ਨਿਬ੍ਬਾਨਾਰਮ੍ਮਣਞਾਣਾਭਾਵਤੋ. ਨ ਹਿ ਅਞ੍ਞੇ ਧਮ੍ਮਾ ਵਿਯ ਨਿਬ੍ਬਾਨਂ, ਤਂ ਪਨ ਅਤਿਗਮ੍ਭੀਰਤ੍ਤਾ ਅਪ੍ਪਤ੍ਤੇਨ ਆਲਮ੍ਬਿਤੁਂ ਨ ਸਕ੍ਕਾ, ਤਸ੍ਮਾ ਤੇਨ ਗੋਤ੍ਰਭੁਨਾ ਪਤ੍ਤਬ੍ਬੇਨ ਤਿਕਾਲਿਕਸਭਾਵਾਤਿਕ੍ਕਨ੍ਤਗਮ੍ਭੀਰਭਾਵੇਨ ਭਵਿਤਬ੍ਬਂ, ਕਿਲੇਸਕ੍ਖਯਮਤ੍ਤਤਂ ਵਾ ਇਚ੍ਛਤੋ ਗੋਤ੍ਰਭੁਤੋ ਪੁਰੇਤਰਂ ਨਿਪ੍ਫਨ੍ਨੇਨ ਕਿਲੇਸਕ੍ਖਯੇਨ ਭਵਿਤਬ੍ਬਂ. ਅਪ੍ਪਤ੍ਤਕਿਲੇਸਕ੍ਖਯਾਰਮ੍ਮਣਕਰਣੇ ਹਿ ਸਤਿ ਗੋਤ੍ਰਭੁਤੋ ਪੁਰੇਤਰਚਿਤ੍ਤਾਨਿਪਿ ਆਲਮ੍ਬੇਯ੍ਯੁਨ੍ਤਿ.

ਤਸ੍ਮਾਤਿਆਦਿ ਵੁਤ੍ਤਸ੍ਸੇਵ ਅਤ੍ਥਸ੍ਸ ਨਿਗਮਨਂ. ਤਂ ਪਨੇਤਂ ਨਿਬ੍ਬਾਨਂ. ਰੂਪਿਨੋ ਧਮ੍ਮਾ ਅਰੂਪਿਨੋ ਧਮ੍ਮਾਤਿਆਦੀਸੂਤਿ ਆਦਿਸਦ੍ਦੇਨ ਲੋਕੁਤ੍ਤਰਅਨਾਸਵਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਅਰੂਪਧਮ੍ਮਾਦਿਭਾਵਗ੍ਗਹਣੇਨ ਚਸ੍ਸ ਪਰਿਨਿਪ੍ਫਨ੍ਨਤਾ ਦੀਪਿਤਾ. ਤੇਨਾਹ ‘‘ਨ ਕਿਲੇਸਕ੍ਖਯਮਤ੍ਤਮੇਵਾ’’ਤਿ. ਕਿਲੇਸਕ੍ਖਯਮਤ੍ਤਤਾਯ ਹਿ ਸਤਿ ਨਿਬ੍ਬਾਨਸ੍ਸ ਬਹੁਤਾ ਆਪਜ੍ਜਤਿ ‘‘ਯਤ੍ਤਕਾ ਕਿਲੇਸਾ ਖੀਯਨ੍ਤਿ, ਤਤ੍ਤਕਾਨਿ ਨਿਬ੍ਬਾਨਾਨੀ’’ਤਿ. ਅਭਾਵਸ੍ਸਭਾਵਤੋ ਗਮ੍ਭੀਰਾਦਿਭਾਵੋ ਅਸਙ੍ਖਤਾਦਿਭਾਵੋ ਚ ਨ ਸਿਯਾ, ਵੁਤ੍ਤੋ ਚ ਸੋ ਨਿਬ੍ਬਾਨਸ੍ਸ, ਤਸ੍ਮਾਸ੍ਸ ਪਚ੍ਚੇਤਬ੍ਬੋ ਪਰਿਨਿਪ੍ਫਨ੍ਨਭਾਵੋ. ਯਸ੍ਮਾ ਚ ਸਮ੍ਮੁਤਿਸਚ੍ਚਾਰਮ੍ਮਣਂ ਸਙ੍ਖਤਧਮ੍ਮਾਰਮ੍ਮਣਂ ਵਾ ਸਮੁਚ੍ਛੇਦਵਸੇਨ ਕਿਲੇਸੇ ਪਜਹਿਤੁਂ ਨ ਸਕ੍ਕੋਤਿ, ਯਤੋ ਮਹਗ੍ਗਤਞਾਣਂ ਵਿਪਸ੍ਸਨਾਞਾਣਂ ਵਾ ਕਿਲੇਸਵਿਕ੍ਖਮ੍ਭਨਵਸੇਨ ਤਦਙ੍ਗਵਸੇਨ ਵਾ ਪਜਹਤਿ, ਤਸ੍ਮਾ ਅਰਿਯਮਗ੍ਗਞਾਣਸ੍ਸ ਸਮ੍ਮੁਤਿਸਚ੍ਚਸਙ੍ਖਤਧਮ੍ਮਾਰਮ੍ਮਣੇਹਿ ਵਿਪਰੀਤਸਭਾਵੇਨ ਆਰਮ੍ਮਣੇਨ ਭਵਿਤਬ੍ਬਂ. ਤਥਾ ਹਿ ਤਂ ਸਮੁਚ੍ਛੇਦਵਸੇਨ ਕਿਲੇਸੇ ਪਜਹੀਤਿ ਏਵਂ ਪਰਿਨਿਪ੍ਫਨ੍ਨਾਸਙ੍ਖਤਸਭਾਵਂ ਨਿਬ੍ਬਾਨਨ੍ਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਨ੍ਤਿ.

ਨਿਬ੍ਬਾਨਪਞ੍ਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩-੧੫. ਧਮ੍ਮਵਾਦੀਪਞ੍ਹਸੁਤ੍ਤਾਦਿਵਣ੍ਣਨਾ

੩੧੬-੩੨੮. ਪਹਾਯ ਗਤਤ੍ਤਾਤਿ ਅਰਿਯਮਗ੍ਗੇਨ ਜਹਿਤ੍ਵਾ ਞਾਣਗਮਨੇਨ ਗਤਤ੍ਤਾ. ਸੁਟ੍ਠੁ ਗਤਾਤਿ ਸਮ੍ਮਾ ਗਤਾ ਪਟਿਪਨ੍ਨਾਤਿ ਸੁਗਤਾ. ਪਰਿਜਾਨਨਤ੍ਥਨ੍ਤਿ ਤੀਹਿ ਪਰਿਞ੍ਞਾਹਿ ਪਰਿਜਾਨਨਤ੍ਥਂ. ਦੁਕ੍ਖਸਙ੍ਖਾਤੋਤਿ ‘‘ਦੁਕ੍ਖ’’ਨ੍ਤਿ ਸਙ੍ਖਾਤਬ੍ਬੋ ਵਿਦਿਤਬ੍ਬੋ ਚ ਦੁਕ੍ਖਸਭਾਵੋ ਧਮ੍ਮੋ ਦੁਕ੍ਖਦੁਕ੍ਖਤਾ. ਯਸ੍ਮਾ ਦੁਕ੍ਖਵੇਦਨਾਵਿਨਿਮੁਤ੍ਤਸਙ੍ਖਤਧਮ੍ਮੇ ਸੁਖਵੇਦਨਾਯ ਚ ਯਥਾ ਇਧ ਸਙ੍ਖਾਰਦੁਕ੍ਖਤਾ ਵਿਪਰਿਣਾਮਦੁਕ੍ਖਤਾਤਿ ਦੁਕ੍ਖਪਰਿਯਾਯੋ ਨਿਰੁਪ੍ਪਤੇਵ, ਤਸ੍ਮਾ ਦੁਕ੍ਖਸਭਾਵੋ ਧਮ੍ਮੋ ਏਕੇਨ ਦੁਕ੍ਖਸਦ੍ਦੇਨ ਵਿਸੇਸੇਤ੍ਵਾ ਵੁਤ੍ਤੋ ‘‘ਦੁਕ੍ਖਦੁਕ੍ਖਤਾ’’ਤਿ. ਸੇਸਪਦਦ੍ਵਯੇਤਿ ਸਙ੍ਖਾਰਦੁਕ੍ਖਤਾ ਵਿਪਰਿਣਾਮਦੁਕ੍ਖਤਾਤਿ ਏਤਸ੍ਮਿਂ ਪਦਦ੍ਵਯੇ. ਸਙ੍ਖਾਰਭਾਵੇਨ ਦੁਕ੍ਖਸਭਾਵੋ ਸਙ੍ਖਾਰਦੁਕ੍ਖਤਾ. ਸੁਖਸ੍ਸ ਵਿਪਰਿਣਾਮਨੇਨ ਦੁਕ੍ਖਸਭਾਵੋ ਵਿਪਰਿਣਾਮਦੁਕ੍ਖਤਾ.

ਧਮ੍ਮਵਾਦੀਪਞ੍ਹਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੬. ਦੁਕ੍ਕਰਪਞ੍ਹਸੁਤ੍ਤਵਣ੍ਣਨਾ

੩੨੯. ਪਬ੍ਬਜ੍ਜਾਯਾਤਿ ਪਬ੍ਬਜਿਤਪਟਿਪਤ੍ਤਿਯਂ. ਧਮ੍ਮਾਨੁਧਮ੍ਮਪ੍ਪਟਿਪਨ੍ਨੋ ਭਿਕ੍ਖੂਤਿ ਧਮ੍ਮਾਨੁਧਮ੍ਮਂ ਪਟਿਪਜ੍ਜਮਾਨੋ ਭਿਕ੍ਖੁ. ਪਾਤਨ੍ਤਿ ਪਾਤੋ. ਨਚਿਰਸ੍ਸਨ੍ਤਿ ਖਿਪ੍ਪਮੇਵ. ਤੇਨਾਹ ‘‘ਲਹੁਯੇਵਾ’’ਤਿ.

ਦੁਕ੍ਕਰਪਞ੍ਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਜਮ੍ਬੁਖਾਦਕਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.