੪. ਅਗਾਰਸੁਤ੍ਤਵਣ੍ਣਨਾ

੨੬੨. ਪੁਰਤ੍ਥਿਮਾਤਿ ਵਿਭਤ੍ਤਿਲੋਪੇਨ ਨਿਦ੍ਦੇਸੋ, ਨਿਸ੍ਸਕ੍ਕੇ ਵਾ ਏਤਂ ਪਚ੍ਚਤ੍ਤਵਚਨਂ. ਪਠਮਜ੍ਝਾਨਾਦਿਵਸੇਨਾਤਿ ਪਠਮਦੁਤਿਯਜ੍ਝਾਨਵਸੇਨ. ਅਨੁਸ੍ਸਤਿਵਸੇਨਾਤਿ ਨਿਦਸ੍ਸਨਮਤ੍ਤਂ ਅਞ੍ਞਸ੍ਸਪਿ ਉਪਚਾਰਜ੍ਝਾਨਗ੍ਗਹਿਤਸ੍ਸ ਸਵਿਤਕ੍ਕਚਾਰਸ੍ਸ ਨਿਰਾਮਿਸਸ੍ਸ ਸੁਖਸ੍ਸ ਲਬ੍ਭਨਤੋ. ਤਸ੍ਸਪਿ ਵਾ ਪਠਮਜ੍ਝਾਨਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਸਙ੍ਗਹੋ ਦਟ੍ਠਬ੍ਬੋ. ਕਾਮਹੇਤੁ ਦੁਕ੍ਖਪ੍ਪਤ੍ਤਾਨਂ ਦੁਕ੍ਖਵੇਦਨਾ ਕਾਮਾਮਿਸੇਨ ਸਾਮਿਸਾ ਵੇਦਨਾ. ਅਨੁਤ੍ਤਰਵਿਮੋਕ੍ਖਾ ਨਾਮ ਅਰਹਤ੍ਤਫਲਂ. ‘‘ਕੁਦਾਸ੍ਸੁ ਨਾਮਾਹਂ ਤਦਾਯਤਨਂ ਉਪਸਮ੍ਪਜ੍ਜ ਵਿਹਰਿਸ੍ਸਾਮੀ’’ਤਿ ਏਵਂ ਪਿਹਂ ਉਪਟ੍ਠਾਪਯਤੋ ਤਸ੍ਮਿਂ ਅਨਿਜ੍ਝਮਾਨੇ ਪਿਹਪ੍ਪਚ੍ਚਯਾ ਉਪ੍ਪਨ੍ਨਦੋਮਨਸ੍ਸਵੇਦਨਾ. ਨੇਕ੍ਖਮ੍ਮਨਿਸ੍ਸਿਤਾ ਉਪੇਕ੍ਖਾਵੇਦਨਾ ਨਿਰਾਮਿਸਾ ਅਦੁਕ੍ਖਮਸੁਖਾ ਨਾਮ. ਸਵਿਸੇਸਂ ਪਨ ਦਸ੍ਸੇਤੁਂ ‘‘ਚਤੁਤ੍ਥਜ੍ਝਾਨਵਸੇਨ ਉਪ੍ਪਨ੍ਨਾ ਅਦੁਕ੍ਖਮਸੁਖਵੇਦਨਾ’’ਤਿ ਵੁਤ੍ਤਂ.

ਅਗਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.