੫. ਦਟ੍ਠਬ੍ਬਸੁਤ੍ਤਵਣ੍ਣਨਾ

੨੫੩. ਵਿਪਰਿਣਾਮਨਵਸੇਨ ਦੁਕ੍ਖਤੋ ਦਟ੍ਠਬ੍ਬਾਤਿ ਕਿਞ੍ਚਾਪਿ ਸੁਖਾ, ਪਰਿਣਾਮਦੁਕ੍ਖਤਾ ਪਨ ਸੁਖਵੇਦਨਾਯ ਏਕਨ੍ਤਿਕਾਤਿ. ਵਿਨਿਵਿਜ੍ਝਨਟ੍ਠੇਨਾਤਿ ਪੀਲ਼ਨਵਸੇਨ ਅਤ੍ਤਭਾਵਸ੍ਸ ਵਿਜ੍ਝਨਟ੍ਠੇਨ. ਹੁਤ੍ਵਾਤਿ ਪਚ੍ਚਯਸਮਾਗਮੇਨ ਉਪ੍ਪਜ੍ਜਿਤ੍ਵਾ. ਤੇਨ ਪਾਕਭਾਵਪੁਬ੍ਬਕੋ ਅਤ੍ਤਲਾਭੋ ਵੁਤ੍ਤੋ. ਅਭਾਵਾਕਾਰੇਨਾਤਿ ਭਙ੍ਗੁਪਗਮਨਾਕਾਰੇਨ. ਤੇਨ ਵਿਦ੍ਧਂਸਭਾਵੋ ਵੁਤ੍ਤੋ. ਉਭਯੇਨ ਉਦਯਬ੍ਬਯਪਰਿਚ੍ਛਿਨ੍ਨਤਾਯ ਸਿਖਪ੍ਪਤ੍ਤਂ ਅਨਿਚ੍ਚਤਂ ਦਸ੍ਸੇਤਿ. ਸ੍ਵਾਯਂ ਹੁਤ੍ਵਾ ਅਭਾਵਾਕਾਰੋ ਇਤਰਾਸੁਪਿ ਵੇਦਨਾਸੁ ਲਬ੍ਭਤੇਵ, ਅਧਿਕੋ ਚ ਪਨ ਦ੍ਵਿਨ੍ਨਂ ਦੁਕ੍ਖਸਭਾਵੋ. ਦੁਕ੍ਖਤਾਵਸੇਨ ਪੁਰਿਮਾਨਂ ਵੇਦਨਾਨਂ ਦਟ੍ਠਬ੍ਬਤਾਯ ਦਸ੍ਸਿਤਤ੍ਤਾ ਪਚ੍ਛਿਮਾਯ ਵੇਦਨਾਯ ਏਵਂ ਦਟ੍ਠਬ੍ਬਤਾ ਦਸ੍ਸਿਤਾ. ਅਦ੍ਦਾਤਿ ਞਾਣਗਤਿਯਾ ਸਚ੍ਛਿਕਤ੍ਵਾ ਅਦਕ੍ਖਿ. ਞਾਣਗਮਨਞ੍ਹੇਤਂ, ਯਦਿਦਂ ਦੁਕ੍ਖਤੋ ਦਸ੍ਸਨਂ. ਸਨ੍ਤਸਭਾਵਂ ਸੁਖਦੁਕ੍ਖਤੋ ਉਪਸਨ੍ਤਰੂਪਤ੍ਤਾ.

ਦਟ੍ਠਬ੍ਬਸੁਤ੍ਤਵਣ੍ਣਨਾ ਨਿਟ੍ਠਿਤਾ.