੧੦. ਅਬ੍ਯਾਕਤਸਂਯੁਤ੍ਤਂ

੧. ਖੇਮਾਸੁਤ੍ਤਵਣ੍ਣਨਾ

੪੧੦. ਬਿਮ੍ਬਿਸਾਰਸ੍ਸ ਉਪਾਸਿਕਾਤਿ ਬਿਮ੍ਬਿਸਾਰਸ੍ਸ ਓਰੋਧਭੂਤਾ ਉਪਾਸਿਕਾ. ਪਣ੍ਡਿਚ੍ਚਂ ਸਿਕ੍ਖਿਤਭਾਵੇਨ. ਵੇਯ੍ਯਤ੍ਤਿਯਂ ਵਿਸਾਰਦਭਾਵੇਨ. ਵਿਸਾਰਦਾ ਨਾਮ ਤਿਹੇਤੁਕਪਟਿਸਨ੍ਧਿਸਿਦ੍ਧਸਾਭਾਵਿਕਪਞ੍ਞਾ, ਤਾਯ ਸਮਨ੍ਨਾਗਤਾ.

ਅਚ੍ਛਿਦ੍ਦਕਗਣਨਾਯ ਕੁਸਲੋਤਿ ਨਵਨ੍ਤਗਣਨਾਯ ਕੁਸਲੋ. ਅਙ੍ਗੁਲਿਮੁਦ੍ਦਾਯ ਗਣਨਾਯ ਕੁਸਲੋਤਿ ਅਙ੍ਗੁਲਿਕਾਯ ਏਵ ਗਣਨਾਯ ਕੁਸਲੋ ਸੇਯ੍ਯਥਾਪਿ ਪਾਦਸਿਕਾ. ਪਿਣ੍ਡਗਣਨਾਯਾਤਿ ਸਙ੍ਕਲਨਪਟੁਪ੍ਪਨ੍ਨਕਾਰਿਨੋ ਪਿਣ੍ਡਵਸੇਨ ਗਣਨਾ. ਤਥਾਗਤੋਤਿ ਖੀਣਾਸਵੋ, ਤਥਾਗਤਂ ਸਨ੍ਧਾਯ ਪੁਚ੍ਛਤੀਤਿ ਖੀਣਾਸਵੋਤਿ ਚਸ੍ਸ ਅਰਹਤ੍ਤਫਲਵਸਿਭਾਵਿਤਖਨ੍ਧੇ ਉਪਾਦਾਯ ਅਯਂ ਪਞ੍ਞਤ੍ਤਿ ਹੋਤਿ. ਤੇਸੁ ਖਨ੍ਧੇਸੁ ਸਤਿ ਖੀਣਾਸਵਾ ਸਤ੍ਤਸਙ੍ਖਾਤਾ ਹੋਨ੍ਤੀਤਿ ਵੋਹਾਰੇਨ ਪਞ੍ਞਪੇਤੁਂ ਸਕ੍ਕਾ ਭਵੇਯ੍ਯ, ਅਸਨ੍ਤੇਸੁ ਨ ਸਕ੍ਕਾ, ਤਸ੍ਮਾ ਪਰਂ ਮਰਣਾਤਿ ਵੁਤ੍ਤਤ੍ਤਾ ਤੇਸਂ ਅਭਾਵਾ ‘‘ਅਬ੍ਯਾਕਤਮੇਤ’’ਨ੍ਤਿ ਵੁਤ੍ਤਂ. ਯਦਿ ਏਵਂ ਤੇਸਂ ਅਭਾਵਤੋ ‘‘ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ ਪੁਟ੍ਠਾਯ ‘‘ਆਮਾ’’ਤਿ ਪਟਿਜਾਨਿਤਬ੍ਬਾ ਸਿਯਾ, ਤਂ ਪਨ ਸਤ੍ਤਸਙ੍ਖਾਤਸ੍ਸ ਪੁਚ੍ਛਿਤਤ੍ਤਾ ਨ ਪਟਿਞ੍ਞਾਤਨ੍ਤਿ ਦਟ੍ਠਬ੍ਬਂ. ਯੇਨ ਰੂਪੇਨਾਤਿ ਸਤ੍ਤਤਥਾਗਤੇ ਵੁਤ੍ਤਰੂਪਂ ਸਬ੍ਬਞ੍ਞੁਤਥਾਗਤੇ ਪਟਿਕ੍ਖਿਪਿਤੁਂ ‘‘ਤਂ ਰੂਪ’’ਨ੍ਤਿਆਦਿ ਵੁਤ੍ਤਂ. ਯਂ ਉਪਾਦਾਯਾਤਿ ਯਂ ਖਨ੍ਧਪਞ੍ਚਕਂ ਉਪਾਦਾਯ. ਤਦਭਾਵੇਨਾਤਿ ਤਸ੍ਸ ਖਨ੍ਧਪਞ੍ਚਕਸ੍ਸ ਅਭਾਵੇਨ. ਤਸ੍ਸਾ ਪਞ੍ਞਤ੍ਤਿਯਾਤਿ ਸਤ੍ਤਪਞ੍ਞਤ੍ਤਿਯਾ ਅਭਾਵਂ. ਨਿਰੁਦ੍ਧਂ ਨ ਨਿਦਸ੍ਸੇਤਿ.

ਖੇਮਾਯ ਥੇਰਿਯਾ ਵੁਤ੍ਤਂ ਪਠਮਂ ਸੁਤ੍ਤਂ ਭਗਵਤੋ ਸੇਟ੍ਠਤ੍ਥਦੀਪਨਤੋ ਅਗ੍ਗਪਦਾਵਚਰਂਵ ਹੋਤੀਤਿ ਵੁਤ੍ਤਂ ‘‘ਅਗ੍ਗਪਦਸ੍ਮਿ’’ਨ੍ਤਿ.

ਖੇਮਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਅਨੁਰਾਧਸੁਤ੍ਤਵਣ੍ਣਨਾ

੪੧੧. ਇਧ ਸਲ਼ਾਯਤਨਵਗ੍ਗੇ ਸਙ੍ਗਾਯਨਵਸੇਨ ਸਙ੍ਗੀਤਿਕਾਰੇਹਿ ਵੁਤ੍ਤਂ.

੩-੮. ਪਠਮਸਾਰਿਪੁਤ੍ਤਕੋਟ੍ਠਿਕਸੁਤ੍ਤਾਦਿਵਣ੍ਣਨਾ

੪੧੨-੪੧੭. ਰੂਪਮਤ੍ਤਨ੍ਤਿ ਏਤ੍ਥ ਮਤ੍ਤ-ਸਦ੍ਦੋ ਵਿਸੇਸਨਿਵਤ੍ਤਿਅਤ੍ਥੋ. ਕੋ ਪਨ ਸੋ ਵਿਸੇਸੋਤਿ? ਯੋ ਬਾਹਿਰਪਰਿਕਪ੍ਪਿਤੋ ਇਧ ਤਥਾਗਤੋਤਿ ਵੁਚ੍ਚਮਾਨੋ ਅਤ੍ਤਾ. ਅਨੁਪਲਬ੍ਭਿਯਸਭਾਵੋਤਿ ਅਨੁਪਲਬ੍ਭਿਯਤ੍ਤਾ.

ਪਠਮਸਾਰਿਪੁਤ੍ਤਕੋਟ੍ਠਿਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੯. ਕੁਤੂਹਲਸਾਲਾਸੁਤ੍ਤਵਣ੍ਣਨਾ

੪੧੮. ਨਾਨਾਵਿਧਨ੍ਤਿ ਤਂਤਂਦਿਟ੍ਠਿਵਾਦਪਟਿਸਂਯੁਤ੍ਤਂ ਅਞ੍ਞਮ੍ਪਿ ਵਾ ਨਾਨਾਵਿਧਂ ਤਿਰਚ੍ਛਾਨਕਥਂ. ਬਹੂਨਂ ਕੁਤੂਹਲੁਪ੍ਪਤ੍ਤਿਟ੍ਠਾਨਤੋਤਿ ਯੋਜਨਾ. ਯਾਵ ਆਭਸ੍ਸਰਬ੍ਰਹ੍ਮਲੋਕਾ ਗਚ੍ਛਤੀਤਿ ਅਗ੍ਗਿਨਾ ਕਪ੍ਪਵੁਟ੍ਠਾਨਕਾਲੇ ਗਚ੍ਛਤਿ, ਤਂ ਸਨ੍ਧਾਯ ਵੁਤ੍ਤਂ. ਇਮਞ੍ਚ ਕਾਯਨ੍ਤਿ ਇਮਂ ਰੂਪਕਾਯਂ. ਚੁਤਿਚਿਤ੍ਤੇਨ ਨਿਕ੍ਖਿਪਤੀਤਿ ਚੁਤਿਚਿਤ੍ਤੇਨ ਭਿਜ੍ਜਮਾਨੇਨ ਨਿਕ੍ਖਿਪਤਿ. ਚੁਤਿਚਿਤ੍ਤਸ੍ਸ ਹਿ ਓਰਂ ਸਤ੍ਤਰਸਮਸ੍ਸ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਉਪ੍ਪਨ੍ਨਂ ਕਮ੍ਮਜਰੂਪਂ ਚੁਤਿਚਿਤ੍ਤੇਨ ਸਦ੍ਧਿਂ ਨਿਰੁਜ੍ਝਤਿ, ਤਤੋ ਪਰਂ ਕਮ੍ਮਜਰੂਪਂ ਨ ਉਪ੍ਪਜ੍ਜਤਿ. ਯਦਿ ਉਪ੍ਪਜ੍ਜੇਯ੍ਯ, ਮਰਣਂ ਨ ਸਿਯਾ, ਚੁਤਿਚਿਤ੍ਤਂ ਰੂਪਂ ਨ ਸਮੁਟ੍ਠਾਪੇਤਿ, ਆਹਾਰਜਸ੍ਸ ਚ ਅਸਮ੍ਭਵੋ ਏਵ, ਉਤੁਜਂ ਪਨ ਵਤ੍ਤਤੇਵ. ਯਸ੍ਮਾ ਪਟਿਸਨ੍ਧਿਕ੍ਖਣੇ ਸਤ੍ਤੋ ਅਞ੍ਞਤਰਣਾਯ ਉਪਪਜ੍ਜਤਿ ਨਾਮ, ਚੁਤਿਕ੍ਖਣੇ ਪਟਿਸਨ੍ਧਿਚਿਤ੍ਤਂ ਅਲਦ੍ਧਂ ਅਞ੍ਞਤਰਣਾਯ, ਤਸ੍ਮਾ ਵੁਤ੍ਤਂ ‘‘ਚੁਤਿਕ੍ਖਣੇ…ਪੇ… ਹੋਤੀ’’ਤਿ.

ਕੁਤੂਹਲਸਾਲਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਆਨਨ੍ਦਸੁਤ੍ਤਵਣ੍ਣਨਾ

੪੧੯. ਤੇਸਂ ਲਦ੍ਧਿਯਾਤਿ ਤੇਸਂ ਸਸ੍ਸਤਵਾਦਾਨਂ ਲਦ੍ਧਿਯਾ ਸਦ੍ਧਿਂ ਏਤਂ ‘‘ਅਤ੍ਥਤ੍ਤਾ’’ਤਿ ਵਚਨਂ ਏਕਂ ਅਭਵਿਸ੍ਸ. ਤਤੋ ਏਵ ਅਨੁਲੋਮਂ ਤਂ ਨਾਭਵਿਸ੍ਸ ਞਾਣਸ੍ਸਾਤਿ ਅਸਾਰਂ ਏਤਨ੍ਤਿ ਅਧਿਪ੍ਪਾਯੋ. ਅਪਿ ਨੁ ਮੇਤਸ੍ਸਾਤਿ ਮੇ ਏਤਸ੍ਸ ਅਨਤ੍ਤਾਤਿ ਵਿਪਸ੍ਸਨਾਞਾਣਸ੍ਸ ਅਨੁਲੋਮਂ ਅਪਿ ਨੁ ਅਭਵਿਸ੍ਸ, ਵਿਲੋਮਕਮੇਵ ਤਸ੍ਸ ਸਿਯਾਤਿ ਅਤ੍ਥੋ.

ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਸਭਿਯਕਚ੍ਚਾਨਸੁਤ੍ਤਵਣ੍ਣਨਾ

੪੨੦. ਯਸ੍ਸਪ’ਸ੍ਸਾਤਿ ਪਾਠਸ੍ਸ ਅਯਂ ਪਿਣ੍ਡਤ੍ਥੋ ‘‘ਆਵੁਸੋ’’ਤਿਆਦਿ. ਤਤ੍ਥਾਯਂ ਸਮ੍ਬਨ੍ਧੋ – ਆਵੁਸੋ, ਯਸ੍ਸਪਿ ਪੁਗ੍ਗਲਸ੍ਸ ਤੀਣਿ ਵਸ੍ਸਾਨਿ ਵੁਟ੍ਠੋ, ਏਤ੍ਤਕੇਨ ਕਾਲੇਨ ‘‘ਹੇਤੁਮ੍ਹਿ ਸਤਿ ਰੂਪੀਤਿਆਦਿਪਞ੍ਞਾਪਨਾ ਹੋਤਿ, ਅਸਤਿ ਨ ਹੋਤੀ’’ਤਿ ਏਤ੍ਤਕਂ ਬ੍ਯਾਕਰਣਂ ਭਵੇਯ੍ਯ, ਤਸ੍ਸ ਪੁਗ੍ਗਲਸ੍ਸ ਏਤ੍ਤਕਮੇਵ ਬਹੁ, ਕੋ ਪਨ ਵਾਦੋ ਅਤਿਕ੍ਕਨ੍ਤੇ! ਇਤੋ ਅਤਿਕ੍ਕਨ੍ਤੇ ਧਮ੍ਮਦੇਸਨਾਨਯੇ ਵਾਦੋਯੇਵ ਵਤ੍ਤਬ੍ਬਮੇਵ ਨਤ੍ਥੀਤਿ ਥੇਰਸ੍ਸ ਪਞ੍ਹਬ੍ਯਾਕਰਣਂ ਸੁਤ੍ਵਾ ਪਰਿਬ੍ਬਾਜਕੋ ਪੀਤਿਸੋਮਨਸ੍ਸਂ ਪਵੇਦੇਸਿ.

ਸਭਿਯਕਚ੍ਚਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਅਬ੍ਯਾਕਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.