੧੯. ਆਸੀਵਿਸਵਗ੍ਗੋ

੧. ਆਸੀਵਿਸੋਪਮਸੁਤ੍ਤਵਣ੍ਣਨਾ

੨੩੮. ਯੇ ਭਿਕ੍ਖੂ ਤਦਾ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸਿਨ੍ਨਾ, ਤੇਸੁ ਕੇਚਿ ਏਕਵਿਹਾਰਿਨੋ, ਕੇਚਿ ਅਤ੍ਤਦੁਤਿਯਾ, ਕੇਚਿ ਅਤ੍ਤਤਤਿਯਾ, ਕੇਚਿ ਅਤ੍ਤਚਤੁਤ੍ਥਾ, ਕੇਚਿ ਅਤ੍ਤਪਞ੍ਚਮਾ ਹੁਤ੍ਵਾ ਅਰਞ੍ਞਾਯਤਨੇਸੁ ਵਿਹਰਨ੍ਤੀਤਿ ਵੁਤ੍ਤਂ – ‘‘ਏਕਚਾਰਿਕ…ਪੇ… ਪਞ੍ਚਚਾਰਿਕੇ’’ਤਿ. ਸਮਾਨਜ੍ਝਾਸਯਤਾ ਸਭਾਗਵੁਤ੍ਤਿਨੋ. ਕਮ੍ਮਟ੍ਠਾਨਾਨੁਯੁਞ੍ਜਨਸ੍ਸ ਕਾਰਕੇ. ਤਤੋ ਏਵ ਤਤ੍ਥ ਯੁਤ੍ਤਪਯੁਤ੍ਤੇ. ਪੁਗ੍ਗਲਜ੍ਝਾਸਯੇਨ ਕਾਰਣਭੂਤੇਨ. ਪਚ੍ਚਯਭੂਤਨ੍ਤਿ ਅਪਸ੍ਸਯਭੂਤਂ. ‘‘ਸੇਯ੍ਯਥਾਪਿ, ਭਿਕ੍ਖਵੇ’’ਤਿ ਆਰਭਿਤ੍ਵਾ ਯਾਵ ‘‘ਤਿਣ੍ਣੋ ਪਾਰਙ੍ਗਤੋ ਥਲੇ ਤਿਟ੍ਠਤਿ ਬ੍ਰਾਹ੍ਮਣੋ’’ਤਿ ਅਯਂ ਮਾਤਿਕਾਨਿਕ੍ਖੇਪੋ. ਤੇਸਂ ਮਾਤਿਕਾਯ ਵਿਤ੍ਥਾਰਭਾਜਨਂ. ਵਾਸਨਾ ਭਵਿਸ੍ਸਤੀਤਿ ਵਾਸਨਾਵਹਂ ਭਵਿਸ੍ਸਤਿ. ਸਿਨੇਰੁਂ ਉਕ੍ਖਿਪਨ੍ਤੋ ਵਿਯਾਤਿਆਦਿ ਇਮਿਸ੍ਸਾ ਦੇਸਨਾਯ ਅਨਞ੍ਞਸਾਧਾਰਣਤਾਯ ਸੁਦੁਕ੍ਕਰਭਾਵਦਸ੍ਸਨਂ.

ਮਞ੍ਚਟ੍ਠੇਸੁ ਮਞ੍ਚਸਮਞ੍ਞਾ ਵਿਯ ਮੁਖਟ੍ਠਂ ਵਿਸਂ ‘‘ਮੁਖ’’ਨ੍ਤਿ ਅਧਿਪ੍ਪੇਤਂ. ਸੁਕ੍ਖਕਟ੍ਠਸਦਿਸਭਾਵਾਪਾਦਨਤੋ ‘‘ਕਟ੍ਠ’’ਨ੍ਤਿ ਵੁਚ੍ਚਤੀਤਿ ਕਟ੍ਠਂ ਮੁਖਂ ਏਤਸ੍ਸਾਤਿ ਕਟ੍ਠਮੁਖੋ, ਦਂਸਨਾਦਿਨਾ ਕਟ੍ਠਸਦਿਸਭਾਵਕਰੋ ਸਪ੍ਪੋ. ਅਥ ਵਾ ਕਟ੍ਠਸਦਿਸਭਾਵਾਪਾਦਨਤੋ ਕਟ੍ਠਂ ਵਿਸਂ ਵਾ ਮੁਖੇ ਏਤਸ੍ਸਾਤਿ ਕਟ੍ਠਮੁਖੋ. ਇਮਿਨਾ ਨਯੇਨ ਸੇਸਪਦੇਸੁਪਿ ਅਤ੍ਥੋ ਵੇਦਿਤਬ੍ਬੋ. ਇਮੇ ਚਤ੍ਤਾਰੋਤਿ ਇਮੇ ਵਿਸਕਿਚ੍ਚਭੇਦੇਨ ਚਤ੍ਤਾਰੋ. ਇਦਾਨਿ ਤਂ ਨੇਸਂ ਵਿਸਕਿਚ੍ਚਭੇਦਂ ਦਸ੍ਸੇਤੁਂ ‘‘ਤੇਸੂ’’ਤਿਆਦਿ ਵੁਤ੍ਤਂ. ਅਯਸੂਲਸਮਪ੍ਪਿਤਂ ਵਿਯਾਤਿ ਅਬ੍ਭਨ੍ਤਰੇ ਅਯਸੂਲਂ ਅਨੁਪ੍ਪਵੇਸਿਤਂ ਵਿਯ. ਪਕ੍ਕਪੂਤਿਪਨਸਂ ਵਿਯਾਤਿ ਪਚ੍ਚਿਤ੍ਵਾ ਕਾਲਾਤਿਕ੍ਕਮੇ ਕੁਥਿਤਪਨਸਫਲਂ ਵਿਯ. ਚਙ੍ਗਵਾਰੇਤਿ ਰਜਕਾਨਂ ਖਾਰਪਰਿਸ੍ਸਾਵਨੇ ਸੁਰਾਪਰਿਸ੍ਸਾਵਨੇ ਵਾ. ਅਨਵਸੇਸਂ ਛਿਜ੍ਜਨੇਨ ਅਸਨਿਪਾਤਟ੍ਠਾਨਂ ਵਿਯ. ਮਹਾਨਿਖਾਦਨੇਨਾਤਿ ਮਹਨ੍ਤੇਨ ਨਿਖਾਦਨੇਨ.

ਵਿਸਵੇਗਵਿਕਾਰੇਨਾਤਿ ਵਿਸਵੇਗਗਤੇਨ ਵਿਕਾਰੇਨ. ਵਾਤੇਨਾਤਿ ਤਸ੍ਸ ਸਪ੍ਪਸ੍ਸ ਸਰੀਰਂ ਫੁਸਿਤ੍ਵਾ ਉਗ੍ਗਤਵਾਤੇਨ. ਨਾਸਵਾਤੇ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਪੁਗ੍ਗਲਪਣ੍ਣਤ੍ਤਿਵਸੇਨਾਤਿ ਤੇਸਂਯੇਵ ਸੋਲ਼ਸਨ੍ਨਂ ਸਪ੍ਪਾਨਂ ਆਗਤਵਿਸੋਤਿਆਦਿਪੁਗ੍ਗਲਨਾਮਸ੍ਸ ਵਸੇਨ ਚਤੁਸਟ੍ਠਿ ਹੋਨ੍ਤਿ ਪਚ੍ਚੇਕਂ ਚਤੁਬ੍ਬਿਧਭਾਵਤੋ. ਆਗਤਵਿਸੋਤਿ ਆਗਚ੍ਛਵਿਸੋ, ਸੀਘਤਰਂ ਅਭਿਰੁਹਨਵਿਸੋਤਿ ਅਤ੍ਥੋ. ਘੋਰਵਿਸੋਤਿ ਕਕ੍ਖਲ਼ਵਿਸੋ, ਦੁਤ੍ਤਿਕਿਚ੍ਛਵਿਸੋ. ਅਯਂ ਸੀਤਉਦਕਂ ਵਿਯ ਹੋਤਿ ਗਾਲ਼੍ਹਦੁਬ੍ਬਿਨਿਮ੍ਮੋਚਯਭਾਵੇਨ. ਉਦਕਸਪ੍ਪੋ ਹਿ ਘੋਰਵਿਸੋ ਹੋਤਿ ਯੇਵਾਤਿ ਵੁਤ੍ਤਂ – ‘‘ਉਦਕਸਪ੍ਪਾਦੀਨਂ ਵਿਸਂ ਵਿਯਾ’’ਤਿ. ਪਞ੍ਞਾਯਤੀਤਿ ਗਣ੍ਡਪਿਲ਼ਕਾਦਿਵਸੇਨ ਪਞ੍ਞਾਯਤਿ. ਅਨੇਲ਼ਕਸਪ੍ਪੋ ਨਾਮ ਮਹਾਆਸੀਵਿਸੋ. ਨੀਲਸਪ੍ਪੋ ਨਾਮ ਸਾਖਵਣ੍ਣੋ ਰੁਕ੍ਖਗ੍ਗਾਦੀਸੁ ਵਿਚਰਣਕਸਪ੍ਪੋ. ਇਮਿਨਾ ਉਪਾਯੇਨਾਤਿ ਯੋਯਂ ਕਟ੍ਠਮੁਖੇਸੁ ਦਟ੍ਠਵਿਸਾਨਂਯੇਵ ‘‘ਆਗਤਵਿਸੋ ਨੋ ਘੋਰਵਿਸੋ’’ਤਿਆਦਿਨਾ ਚਤੁਬ੍ਬਿਧਭਾਵੋ ਵੁਤ੍ਤੋ, ਇਮਿਨਾ ਉਪਾਯੇਨ. ਕਟ੍ਠਮੁਖੇ ਦਟ੍ਠਵਿਸਾਦਯੋਤਿ ਕਟ੍ਠਮੁਖੇਸੁ ਦਟ੍ਠਵਿਸੋ, ਫੁਟ੍ਠਵਿਸੋ, ਵਾਤਵਿਭੋਤਿ ਤਯੋ, ਪੂਤਿਮੁਖਾਦੀਸੁ ਚ ਦਟ੍ਠਵਿਸਾਦਯੋ ਚਤ੍ਤਾਰੋ ਚਤ੍ਤਾਰੋ ਵੇਦਿਤਬ੍ਬੋ.

ਏਕੇਕਨ੍ਤਿ ਚਤੁਸਟ੍ਠਿਯੋ ਏਕੇਕਂ. ਚਤੁਧਾਤਿ ਅਣ੍ਡਜਾਦਿਵਿਭਾਗੇਨ ਚਤੁਧਾ ਵਿਭਜਿਤ੍ਵਾ. ਛਪਣ੍ਣਾਸਾਨੀਤਿ ਛਪਣ੍ਣਾਸਾਧਿਕਾਨਿ. ਗਤਮਗ੍ਗਸ੍ਸਾਤਿ ਯਥਾਵੁਤ੍ਤਸਙ੍ਖ੍ਯਾਗਤਮਗ੍ਗਸ੍ਸ ਪਟਿਲੋਮਤੋ ਸਂਖਿਪ੍ਪਮਾਨਾ ਅਨੁਕ੍ਕਮੇਨ ਚਤ੍ਤਾਰੋਵ ਹੋਨ੍ਤਿ. ਕੁਲਵਸੇਨਾਤਿ ਕਟ੍ਠਮੁਖਾਦਿਜਾਤਿਵਸੇਨ.

ਸਕਲਕਾਯੇ ਆਸਿਞ੍ਚਿਤ੍ਵਾ ਵਿਯ ਠਪਿਤਵਿਸਾਤਿ ਹਿ ਤੇਸਂ ਫੁਟ੍ਠਵਿਸਤਾ, ਵਾਤਵਿਸਤਾ ਵੁਚ੍ਚਤਿ. ਏਵਨ੍ਤਿ ‘‘ਆਸਿਤ੍ਤਵਿਸਾ’’ਤਿਆਦਿਨਾ. ਏਤ੍ਥਾਤਿ ਆਸੀਵਿਸਸਦ੍ਦੇ ਵਚਨਤ੍ਥੋ ਨਿਰੁਤ੍ਤਿਨਯੇਨ ਵੇਦਿਤਬ੍ਬੋ. ਉਗ੍ਗਤਤੇਜਾਤਿ ਉਦਗ੍ਗਤੇਜਾ, ਅਤ੍ਤਨੋ ਵਿਸਤੇਜੇਨ ਨੇਸਂ ਕੁਰੂਰਦਬ੍ਬਤਾ ਵਾ. ਦੁਨ੍ਨਿਮ੍ਮਦ੍ਦਨਵਿਸਾਤਿ ਮਨ੍ਤਾਗਦੇਹਿ ਅਨਿਮ੍ਮਦ੍ਦਨੀਯਵਿਸਾ. ਚਤ੍ਤਾਰੋ ਆਸੀਵਿਸਾਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ. ਤੇਨੇਤ੍ਥ ਅਵਸੇਸਪਾਲ਼ਿਂ ਸਙ੍ਗਣ੍ਹਾਤਿ.

ਆਸੀਵਿਸੇਸੂਤਿ ਇਮੇ ਆਸੀਵਿਸਾ ਦਟ੍ਠਵਿਸਾ ਏਵਾਤਿ ਵੇਦਿਤਬ੍ਬਾ. ਸਰੀਰਟ੍ਠਕੇਸੁਯੇਵਾਤਿ ਤੇਨ ਪੁਰਿਸੇਨ ਤੇਸਂ ਕਸ੍ਸਚਿ ਅਨਿਟ੍ਠਸ੍ਸ ਅਕਤਤ੍ਤਾ ਆਯੁਸੇਸਸ੍ਸ ਚ ਵਿਜ੍ਜਮਾਨਤ੍ਤਾ ਨਂ ਨ ਦਂਸਿਂਸੂਤਿ ਦਟ੍ਠਬ੍ਬਂ. ਪੁਚ੍ਛਿ ਯਥਾਭੂਤਂ ਪਵੇਦੇਤੁਕਾਮੋ. ਦੁਰੁਪਟ੍ਠਾਹਾਤਿ ਦੁਰੁਪਟ੍ਠਾਨਾ. ਸੋਤ੍ਥਿਮਗ੍ਗੋਤਿ ਸੋਤ੍ਥਿਭਾਵਸ੍ਸ ਉਪਾਯੋ.

ਅਨ੍ਤਰਚਰੋਤਿ ਅਨ੍ਤਰਂ ਚਰੋ ਸੁਖਸਤ੍ਤੁ ਵਿਸ੍ਸਾਸਘਾਤੀ. ਤੇਨਾਹ ‘‘ਵਧਕੋ’’ਤਿ. ਇਦਾਨਿ ਤਾਸਂ ਪੇਸਨੇ ਕਾਰਣਂ ਦਸ੍ਸੇਤੁਂ ‘‘ਪਠਮ’’ਨ੍ਤਿਆਦਿ ਵੁਤ੍ਤਂ. ਅਭਿਮੁਖਗਤਂ ਵਿਯ ਅਭਿਮੁਖਗਤਂ. ਈਦਿਸੀਪਿ ਹਿ ਵਚੋਯੁਤ੍ਤਿ ਲੋਕੇ ਨਿਰੂਪੀਯਤਿ ਸਨ੍ਤਿਯਂ ਪੁਰਿਸਂ ਠਪੇਤੀਤਿ ਵਿਯ. ਤਸ੍ਮਾ ਅਭਿਮੁਖਗਤਨ੍ਤਿ ਅਭਿਮੁਖਂ ਤੇਨ ਸਮ੍ਪਤ੍ਤਨ੍ਤਿ ਅਤ੍ਥੋ. ਵਙ੍ਕਸਣ੍ਠਾਨਂ ਫਲਕਂ ਰੁਕ੍ਖਮੂਲੇ ਆਗਤਾਗਤਾਨਂ ਨਿਸੀਦਨਤ੍ਥਾਯ ਅਤ੍ਥਤਂ.

ਅਰਿਤ੍ਤਹਤ੍ਥੋ ਪੁਰਿਸੋ ਸਨ੍ਤਾਰੇਤਿ ਏਤਾਯਾਤਿ ਸਨ੍ਤਾਰਣੀ. ਓਰਿਮਤੀਰਤੋ ਉਤ੍ਤਰਣਾਯ ਸੇਤੁ ਉਤ੍ਤਰਸੇਤੁ. ਏਕੇਨ ਦ੍ਵੀਹਿ ਵਾ ਗਨ੍ਤਬ੍ਬੋ ਰੁਕ੍ਖਮਯੋ ਸੇਤੁ ਰੁਕ੍ਖਸੇਤੁ. ਜਙ੍ਘਸਤ੍ਥੇਨ ਗਮਨਯੋਗ੍ਗੋ ਸੇਤੁ ਜਙ੍ਘਸੇਤੁ. ਸਕਟੇਨ ਗਨ੍ਤੁਂ ਸਕ੍ਕੁਣੇਯ੍ਯੋ ਸਕਟਸੇਤੁ. ਨ ਖੋ ਏਸ ਬ੍ਰਾਹ੍ਮਣੋ ਪਰਮਤ੍ਥਤੋ. ਤਦਤ੍ਥੋ ਪਨ ਏਕਦੇਸੇਨ ਸਮ੍ਭਵਤੀਤਿ ਤਥਾ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਏਤ੍ਤਕਾਨਂ ਪਚ੍ਚਤ੍ਥਿਕਾਨਂ ਬਾਹਿਤਤ੍ਤਾ’’ਤਿ ਆਹ. ਦੇਸਨਨ੍ਤਿ ਉਦ੍ਦੇਸਦੇਸਨਂ. ਵਿਨਿਵਤ੍ਤੇਨ੍ਤੋਤਿ ਪਟਿਸਂਹਰਨ੍ਤੋ. ਨ ਲਦ੍ਧੋ ਵਤਾਸੀਤਿ ਨ ਲਦ੍ਧੋ ਵਤ ਆਸਿ.

ਰਾਜਾ ਵਿਯ ਕਮ੍ਮਂ ਸਤ੍ਤੇਸੁ ਇਸ੍ਸਰਿਯਸ੍ਸ ਵਤ੍ਤਾਪਨਤੋ. ਰਾਜਾ…ਪੇ… ਪੁਥੁਜ੍ਜਨੋ ਵਟ੍ਟਦੁਕ੍ਖਸਙ੍ਖਾਤਾਪਰਾਧਤਾਯ. ਞਾਣਪਲਾਯਨੇਨਾਤਿ ਮਹਾਭੂਤੇਹਿ ਨਿਬ੍ਬਿਨ੍ਦਿਤ੍ਵਾ ਵਿਰਜ੍ਜਿਤ੍ਵਾ ਵਿਮੁਚ੍ਚਿਤੁਕਾਮਤਾਵਸੇਨ ਉਪ੍ਪਨ੍ਨਞਾਣਪਲਾਯਨੇ ਮਗ੍ਗਾਧਿਗਮਸਿਦ੍ਧੇਨੇਵ ਞਾਣਪਲਾਯਨੇਨ. ਏਵਞ੍ਹੇਤ੍ਥ ਉਪਮਾਸਂਸਨ੍ਦਨਂ ਮਤ੍ਥਕਂ ਪਾਪਿਤਮੇਵ ਹੋਤਿ.

ਯਥੇਵ ਹੀਤਿਆਦਿਨਾ ਏਕਦੇਸਨਾਸਮੁਦਾਯਸ੍ਸ ਨਿਦਸ੍ਸਨਂ ਆਰਦ੍ਧਂ. ਯਥਾਵੁਤ੍ਤਵਚਨਂ ਅਟ੍ਠਕਥਾਚਰਿਯਾਨਂ ਵਚਨੇਨ ਸਮਤ੍ਥੇਤਿ ‘‘ਪਤ੍ਥਦ੍ਧੋ ਭਵਤੀ’’ਤਿਆਦਿਨਾ. ਤਤ੍ਥ ਕਟ੍ਠਮੁਖੇਨ ਵਾਤਿ ਵਾ-ਸਦ੍ਦੋ ਉਪਮਤ੍ਥੋ. ਯਥਾ ਕਟ੍ਠਮੁਖੇਨ ਸਪ੍ਪੇਨ ਦਟ੍ਠੋ ਪਤ੍ਥਦ੍ਧੋ ਹੋਤਿ, ਏਵਂ ਪਥਵੀਧਾਤੁਪ੍ਪਕੋਪੇਨ ਸੋ ਕਾਯੋ ਕਟ੍ਠਮੁਖੇਵ ਹੋਤਿ, ਕਟ੍ਠਮੁਖਗਤੋ ਵਿਯ ਪਤ੍ਥਦ੍ਧੋ ਹੋਤੀਤਿ ਅਤ੍ਥੋ. ਅਥ ਵਾ ਵਾ-ਸਦ੍ਦੋ ਅਵਧਾਰਣਤ੍ਥੋ. ਸੋ ‘‘ਪਥਵੀਧਾਤੁਪਕੋਪੇਨ ਵਾ’’ਤਿ ਏਵਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬੋ. ਅਯਞ੍ਹੇਤ੍ਥ ਅਤ੍ਥੋ – ਕਟ੍ਠਮੁਖੇਨ ਦਟ੍ਠੋਪਿ ਕਾਯੋ ਪਥਵੀਧਾਤੁਪ੍ਪਕੋਪੇਨੇਵ ਪਤ੍ਥਦ੍ਧੋ ਹੋਤਿ, ਤਸ੍ਮਾ ਪਥਵੀਧਾਤੁਯਾ ਅਵਿਯੁਤ੍ਤੋ ਸੋ ਕਾਯੋ ਸਬ੍ਬਦਾ ਕਟ੍ਠਮੁਖਗਤੋ ਵਿਯ ਹੋਤੀਤਿ. ਵਾ-ਸਦ੍ਦੋ ਵਾ ਅਨਿਯਮਤ੍ਥੋ. ਤਤ੍ਰਾਯਮਤ੍ਥੋ – ਕਟ੍ਠਮੁਖੇਨ ਦਟ੍ਠੋ ਕਾਯੋ ਪਤ੍ਥਦ੍ਧੋ ਹੋਤਿ ਵਾ, ਨ ਵਾ ਮਨ੍ਤਾਗਦਵਸੇਨ. ਪਥਵੀਧਾਤੁਪ੍ਪਕੋਪੇਨ ਪਨ ਮਨ੍ਤਾਗਦਰਹਿਤੋ ਸੋ ਕਾਯੋ ਕਟ੍ਠਮੁਖਗਤੋ ਵਿਯ ਹੋਤਿ ਏਕਨ੍ਤਪਤ੍ਥਦ੍ਧੋਤਿ. ਤਤ੍ਥ ਕਾਯੋਤਿ ਪਕਤਿਕਾਯੋ. ਪੂਤਿਕੋਤਿ ਕੁਥਿਤੋ. ਸਨ੍ਤਤ੍ਤੋਤਿ ਸਬ੍ਬਸੋ ਤਤ੍ਤੋ ਮਹਾਦਾਹਪ੍ਪਤ੍ਤੋ. ਸਞ੍ਛਿਨ੍ਨੋਤਿ ਸਬ੍ਬਸੋ ਛਿਨ੍ਨੋ ਚੁਣ੍ਣਵਿਚੁਣ੍ਣਭੂਤੋ. ਯਦਾ ਕਾਯੋ ਪਤ੍ਥਦ੍ਧਾਦਿਭਾਵਪ੍ਪਤ੍ਤੋ ਹੋਤਿ, ਤਦਾ ਪੁਰਿਸੋ ਕਟ੍ਠਮੁਖਾਦਿਸਪ੍ਪਸ੍ਸ ਮੁਖੇ ਵਤ੍ਤਮਾਨੋ ਵਿਯ ਹੋਤੀਤਿ ਅਤ੍ਥੋ.

ਵਿਸੇਸਤੋਤਿ ਕਟ੍ਠਮੁਖਾਦਿਵਿਸੇਸਤੋ ਚ ਪਥਵੀਆਦਿਵਿਸੇਸਤੋ ਚ. ਅਨਤ੍ਥਗ੍ਗਹਣਤੋਤਿਆਦਿ ਅਚੇਤਨੇਸੁਪਿ ਭੂਤੇਸੁ ਸਚੇਤਨੇਸੁ ਵਿਯ ਅਨਤ੍ਥਾਦੀਨਂ ਪਚ੍ਚਕ੍ਖਤਾਯ ਨਿਬ੍ਬੇਦਜਨਨਤ੍ਥਂ ਆਰਦ੍ਧਂ. ਤਤ੍ਥ ਆਸਯਤੋਤਿ ਪਵਤ੍ਤਿਟ੍ਠਾਨਤੋ. ਏਤੇਸਨ੍ਤਿ ਮਹਾਭੂਤਾਨਂ. ਸਦਿਸਤਾਤਿ ਵਮ੍ਮਿਕਾਸਯਸੁਸਿਰਗਹਨਸਙ੍ਕਾਰਟ੍ਠਾਨਾਸਯਤਾਯ ਚ ਸਦਿਸਤਾ.

ਪਚ੍ਚਤ੍ਤਲਕ੍ਖਣਵਸੇਨਾਤਿ ਵਿਸੁਂ ਵਿਸੁਂ ਲਕ੍ਖਣਵਸੇਨ. ਪਥਵੀਆਦੀਨਂ ਕਕ੍ਖਲ਼ਭਾਵਾਦਿ, ਤਂਸਮਙ੍ਗਿਨੋ ਪੁਗ੍ਗਲਸ੍ਸ ਕਕ੍ਖਲ਼ਭਾਵਾਪਾਦਨਾਦਿਨਾ ਵਿਕਾਰੁਪ੍ਪਾਦਨਤੋ ਵਿਸਵੇਗਵਿਕਾਰਤੋ ਸਦਿਸਤਾ ਵੇਦਿਤਬ੍ਬਾ.

ਅਨਤ੍ਥਾਤਿ ਬ੍ਯਸਨਾ. ਬ੍ਯਾਧਿਨ੍ਤਿ ਕੁਟ੍ਠਾਦਿਬ੍ਯਾਧਿਂ. ਭਵੇ ਜਾਤਾਭਿਨਨ੍ਦਿਨੋਤਿ ਭਵੇਸੁ ਜਾਤਿਯਾ ਅਭਿਨਨ੍ਦਨਸੀਲਾ. ਪਞ੍ਚਵੋਕਾਰੇ ਹਿ ਜਾਤਿਯਾ ਅਭਿਨਨ੍ਦਨਾ ਨਾਮ ਮਹਾਭੂਤਾਭਿਨਨ੍ਦਨਾ ਏਵ.

ਦੁਰੁਪਟ੍ਠਾਨਤਰਾਨੀਤਿ ਦੁਪ੍ਪਟਿਕਾਰਤਰਾਨਿ. ਦੁਰਾਸਦਾਤਿ ਦੁਰੁਪਸਙ੍ਕਮਨਾ. ‘‘ਉਪਟ੍ਠਾਮੀ’’ਤਿ ਉਪਸਙ੍ਕਮਿਤੁਂ ਨ ਸਕ੍ਕੋਨ੍ਤਿ. ਪਰਿਜਾਨਾਮ ਕਮ੍ਮਨਾਮਾਨਿ, ਉਪਕਾਰਾ ਨਾਮ ਨਤ੍ਥਿ. ਅਨਨ੍ਤਦੋਸੂਪਦ੍ਦਵਤੋਤਿ ਅਪਰਿਮਾਣਦੋਸੂਪਦ੍ਦਵਹੇਤੁਤੋ. ਏਕਪਕ੍ਖਲਨ੍ਤਿ ਏਕਦੁਕ੍ਖਂ.

ਰੂਪਕ੍ਖਨ੍ਧੋ ਭਿਜ੍ਜਮਾਨੋ ਚਤ੍ਤਾਰੋ ਅਰੂਪਕ੍ਖਨ੍ਧੇ ਗਹੇਤ੍ਵਾਵ ਭਿਜ੍ਜਤਿ ਅਰੂਪਕ੍ਖਨ੍ਧਾਨਂ ਏਕਨਿਰੋਧਤ੍ਤਾ. ਵਤ੍ਥੁਰੂਪਮ੍ਪਿ ਗਹੇਤ੍ਵਾਵ ਭਿਜ੍ਜਨ੍ਤਿ ਪਞ੍ਚਵੋਕਾਰੇ ਅਰੂਪਕ੍ਖਨ੍ਧੇਸੁ ਭਿਨ੍ਨੇਸੁ ਰੂਪਕ੍ਖਨ੍ਧਸ੍ਸ ਅਵਟ੍ਠਾਨਾਭਾਵਤੋ. ਏਤ੍ਤਾਵਤਾਤਿ ਲੋਭੁਪ੍ਪਾਦਨਮਤ੍ਤੇਨ. ਪਞ੍ਞਾ ਨਾਮ ਅਤ੍ਤਭਾਵੇ ਉਤ੍ਤਮਙ੍ਗਂ ਪਞ੍ਞੁਤ੍ਤਰਤ੍ਤਾ ਕੁਸਲਧਮ੍ਮਾਨਂ, ਸਤਿ ਚ ਕਿਲੇਸੁਪ੍ਪਤ੍ਤਿਯਂ ਪਞ੍ਞਾਯ ਅਨੁਪ੍ਪਜ੍ਜਨਤੋ ਵੁਤ੍ਤਂ – ‘‘ਏਤ੍ਤਾਵਤਾ ਪਞ੍ਞਾਸੀਸਂ ਪਤਿਤਂ ਨਾਮ ਹੋਤੀ’’ਤਿ. ਯੋਨਿਯੋ ਉਪਨੇਤਿ ਤਦੁਪਗਸ੍ਸ ਕਮ੍ਮਪਚ੍ਚਯਸ੍ਸ ਭਾਵੇ. ‘‘ਜਾਤਿਭਯਂ, ਜਰਾਭਯਂ, ਮਰਣਭਯਂ, ਚੋਰਭਯ’’ਨ੍ਤਿਆਦਿਨਾ ਆਗਤਾਨਿ ਪਞ੍ਚਵੀਸਤਿ ਮਹਾਭਯਾਨਿ, ‘‘ਹਤ੍ਥਮ੍ਪਿ ਛਿਨ੍ਦਤੀ’’ਤਿਆਦਿਨਾ ਆਗਤਾਨਿ ਦ੍ਵਤ੍ਤਿਂਸ ਕਮ੍ਮਕਾਰਣਾਨਿ ਆਗਤਾਨੇਵ ਹੋਨ੍ਤਿ ਕਾਰਣਸ੍ਸ ਸਮਵਟ੍ਠਿਤਤ੍ਤਾ. ਨਨ੍ਦੀਰਾਗੋ ਸਙ੍ਖਾਰਕ੍ਖਨ੍ਧੋਤਿ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਤ੍ਤਾ ਵੁਤ੍ਤਂ.

ਪਾਲ਼ਿਯਂਯੇਵ ਆਗਤਾ ‘‘ਚਕ੍ਖੁਤੋ ਚੇਪਿ ਨਂ, ਭਿਕ੍ਖਵੇ’’ਤਿਆਦਿਨਾ. ਕਿਞ੍ਚਿ ਅਲਭਿਤ੍ਵਾਤਿ ਤਸ੍ਮਿਂ ਸੁਞ੍ਞਗਾਮੇ ਚੋਰਾਨਂ ਗਯ੍ਹੂਪਗਸ੍ਸ ਅਲਾਭਵਚਨੇਨੇਵ ਤਸ੍ਸ ਪੁਰਿਸਸ੍ਸ ਅਤ੍ਤਨੋ ਪਟਿਸਰਣਸ੍ਸ ਅਲਾਭੋ ਵੁਤ੍ਤੋ ਏਵ ਹੋਤੀਤਿ ਨ ਉਦ੍ਧਟੋ, ਪੁਰਿਸਟ੍ਠਾਨਿਯੋ ਭਿਕ੍ਖੁ, ਚੋਰਾ ਪਨ ਬਾਹਿਰਾਯਤਨਟ੍ਠਾਨਿਯਾ. ਅਭਿਨਿਵਿਸਿਤ੍ਵਾਤਿ ਵਿਪਸ੍ਸਨਾਭਿਨਿਵੇਸਂ ਕਤ੍ਵਾ. ਅਜ੍ਝਤ੍ਤਿਕਾਯਤਨਵਸੇਨ ਦੇਸਨਾਯ ਆਗਤਤ੍ਤਾ ਵੁਤ੍ਤਂ ‘‘ਉਪਾਦਾਰੂਪਕਮ੍ਮਟ੍ਠਾਨਵਸੇਨਾ’’ਤਿ.

ਬਾਹਿਰਾਨਨ੍ਤਿ ਬਾਹਿਰਾਯਤਨਾਨਂ. ਪਞ੍ਚ ਕਿਚ੍ਚਾਨੀਤਿ ਚੋਰੇਹਿ ਤਦਾ ਕਾਤਬ੍ਬਾਨਿ ਪਞ੍ਚ ਕਿਚ੍ਚਾਨਿ. ਹਤ੍ਥਸਾਰਨ੍ਤਿ ਅਤ੍ਤਨੋ ਸਨ੍ਤਕੇ ਹਤ੍ਥੇਹਿ ਗਹੇਤਬ੍ਬਸਾਰਭਣ੍ਡਂ. ਪਾਤਨਾਦਿਵਸੇਨ ਹਤ੍ਥਪਰਾਮਾਸਂ ਕਰੋਨ੍ਤਿ. ਪਹਾਰਠਾਨੇਤਿ ਪਹਟਟ੍ਠਾਨੇ. ਠਾਨਸੋ ਤਸ੍ਮਿਂ ਏਵ ਖਣੇਤਿ ਵਦਨ੍ਤਿ. ਅਤ੍ਤਨੋ ਸੁਖਾਵਹਂ ਕੁਸਲਧਮ੍ਮਂ ਪਹਾਯ ਦੁਕ੍ਖਾਵਹੇਨ ਅਕੁਸਲੇਨ ਸਮਙ੍ਗਿਤਾ ਸੁਖਾਵਹਂ ਭਣ੍ਡਂ ਪਹਾਯ ਬਹਿ ਨਿਕ੍ਖਮਨਂ ਵਿਯਾਤਿ ਵੁਤ੍ਤਂ ਸੁਖਨਿਸ੍ਸਯਤ੍ਤਾ ਤਸ੍ਸ. ਹਤ੍ਥਪਰਾ…ਪੇ… ਆਪਜ੍ਜਨਕਾਲੋ ਗੁਣਸਰੀਰਸ੍ਸ ਤਦਾ ਪਮਾਦੇਨ ਬਾਧਿਤਤ੍ਤਾ. ਪਹਾਰ…ਪੇ… ਕਾਲੋ ਤਤੋ ਦਲ਼੍ਹਤਰਂ ਗੁਣਸਰੀਰਸ੍ਸ ਬਾਧਿਤਤ੍ਤਾ. ਪਹਾਰਂ…ਪੇ… ਅਸ੍ਸਮਣਕਾਲੋ ਗੁਣਸਰੀਰਸ੍ਸ ਮਰਣਪ੍ਪਤ੍ਤਿਸਦਿਸਤ੍ਤਾ. ਅਵਸੇਸਜਨਸ੍ਸ ਦਾਸਪਰਿਭੋਗੇਨ ਪਰਿਭੁਞ੍ਜਿਤਬ੍ਬਤਾ ਅਞ੍ਞਥਤ੍ਤਪ੍ਪਤ੍ਤਿਗਿਹਿਭਾਵਾਪਤ੍ਤਿਯਾ ਨਿਦਸ੍ਸਨਭਾਵੇਨ ਵੁਤ੍ਤਾ. ਯਂ ‘‘ਛਸੁ ਦ੍ਵਾਰੇਸੁ ਆਰਮ੍ਮਣੇ ਆਪਾਥਗਤੇ’’ਤਿ ਵੁਤ੍ਤਂ, ਤਮੇਵ ਆਰਮ੍ਮਣਂ ਨਿਸ੍ਸਾਯ ਸਮ੍ਪਰਾਯਿਕੋ ਦੁਕ੍ਖਕ੍ਖਨ੍ਧੋ ਵੇਦਿਤਬ੍ਬੋਤਿ ਯੋਜਨਾ.

ਰੂਪਾਦੀਨੀਤਿ ਰੂਪਸਦ੍ਦਗਨ੍ਧਰਸਾਨਿ. ਤੇਸਨ੍ਤਿ ਯਥਾਵੁਤ੍ਤਭੂਤੁਪਾਦਾਰੂਪਾਨਂ. ਲਹੁਤਾਦਿਵਸੇਨਾਤਿ ਤੇਸਂ ਲਹੁਤਾਦਿਵਸੇਨ. ਦੁਰੁਤ੍ਤਰਣਟ੍ਠੋਤਿ ਉਤ੍ਤਰਿਤੁਂ ਅਸਕ੍ਕੁਣੇਯ੍ਯਭਾਵੋ ਓਘਟ੍ਠੋ. ਵੁਤ੍ਤਨਯੇਨਾਤਿ ‘‘ਸਮ੍ਪਯੁਤ੍ਤਾ ਵੇਦਨਾ ਵੇਦਨਾਕ੍ਖਨ੍ਧੋ’’ਤਿਆਦਿਨਾ ਵੁਤ੍ਤਨਯੇਨ. ਚਤੁਮਹਾਭੂਤਾਦੀਹੀਤਿ ਆਦਿਸਦ੍ਦੇਨ ਉਪਾਦਾਨਕ੍ਖਨ੍ਧਾਦੀਨਂ ਗਹਣਂ. ਚਿਤ੍ਤਕਿਰਿਯਦਸ੍ਸਨਤ੍ਥਨ੍ਤਿ ਚਿਤ੍ਤਪਯੋਗਦਸ੍ਸਨਤ੍ਥਂ. ਵੁਤ੍ਤਵਾਯਾਮਮੇਵਾਤਿ ‘‘ਸਮ੍ਮਾਵਾਯਾਮੋ’’ਤਿ ਯੋ ਅਰਿਯਮਗ੍ਗੇ ਵੁਤ੍ਤੋ. ਭਦ੍ਦੇਕਰਤ੍ਤਾਦੀਨੀਤਿ ‘‘ਅਜ੍ਜੇਵ ਕਿਚ੍ਚਂ ਆਤਪ੍ਪ’’ਨ੍ਤਿਆਦਿਨਾ (ਮ. ਨਿ. ੩.੨੭੨, ੨੭੫, ੨੭੬) ਵੁਤ੍ਤਾਨਿ ਭਦ੍ਦੇਕਰਤ੍ਤਸੁਤ੍ਤਾਦੀਨਿ.

ਕੁਣ੍ਠਪਾਦੋਤਿ ਛਿਨ੍ਨਪਾਦੋਵ ਹੁਤ੍ਵਾ ਗਤਿਵਿਕਲੋ. ਮਾਨਸਂ ਬਨ੍ਧਤੀਤਿ ਤਸ੍ਮਿਂ ਚਿਤ੍ਤੇ ਕਿਚ੍ਚਂ ਨਿਬਨ੍ਧਤਿ. ‘‘ਅਯਂ ਅਰਿਯਮਗ੍ਗੋ ਮਯ੍ਹਂ ਓਘੁਤ੍ਤਰਨੁਪਾਯੋ’’ਤਿ ਤਤ੍ਥ ਚਿਤ੍ਤਸ੍ਸ ਸਨ੍ਨਿਟ੍ਠਾਨਂ ਪੁਨ ਤਤ੍ਥ ਪਵਤ੍ਤਨਂ ਵੀਰਿਯਾਰਮ੍ਭੋ ਚਿਤ੍ਤਬਨ੍ਧਨਂ.

ਤਸ੍ਸ ਨਾਮਰੂਪਸ੍ਸ ਇਮੇ ਨਨ੍ਦੀਰਾਗਾਦਯੋ ਤਣ੍ਹਾਵਿਜ੍ਜਾਦਯੋਤਿ ਕਤ੍ਵਾ ਪਚ੍ਚਯੋ ਧਮ੍ਮਾਯਤਨੇਕਦੇਸੋ. ਅਰਿਯਮਗ੍ਗਨਿਬ੍ਬਾਨਤਣ੍ਹਾਵਜ੍ਜੋ ਇਧ ਧਮ੍ਮਾਯਤਨੇਕਦੇਸੋਤਿ ਚ. ਸੋਲ਼ਸਹਾਕਾਰੇਹੀਤਿ ਪੀਲ਼ਨਾਦੀਹਿ ਸੋਲ਼ਸਹਿ ਆਕਾਰੇਹਿ. ਸਤਿਪਟ੍ਠਾਨਵਿਭਙ੍ਗੇ ਆਗਤਨਯੇਨ ਸਟ੍ਠਿਨਯਸਹਸ੍ਸੇਹਿ. ਦੇਸਨਾਪਰਿਯੋਸਾਨੇ…ਪੇ… ਪਤਿਟ੍ਠਹਿਂਸੂਤਿ ਵਿਪਞ੍ਚਿਤਞ੍ਞੂ ਏਵੇਤ੍ਥ ਗਹਣਵਸੇਨ ਅਧਿਗਤਵਿਸੇਸਾ ਪਰਿਚ੍ਛਿਨ੍ਦਿਤਾ. ਤੇ ਹਿ ਤਦਾ ਧਮ੍ਮਪਟਿਗ੍ਗਾਹਕਭਾਵੇਨ ਸਤ੍ਥੁ ਸਨ੍ਤਿਕੇ ਸਨ੍ਨਿਸਿਨ੍ਨਾ. ਉਗ੍ਘਟਿਤਞ੍ਞੂਨਂ ਪਨ ਨੇਯ੍ਯਾਨਞ੍ਚ ਵਿਸੇਸਾਧਿਗਮੋ ਅਟ੍ਠਕਥਾਯਂ ਨ ਰੁਲ਼੍ਹੋਤਿ ਇਧ ਨ ਗਹਿਤੋਤਿ.

ਆਸੀਵਿਸੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਰਥੋਪਮਸੁਤ੍ਤਵਣ੍ਣਨਾ

੨੩੯. ਸੁਸਂਵੁਤਿਨ੍ਦ੍ਰਿਯਸ੍ਸ ਭੋਜਨੇ ਮਤ੍ਤਞ੍ਞੁਨੋ ਸਤਸ੍ਸ ਸਮ੍ਪਜਾਨਸ੍ਸ ਵਿਹਰਤੋ ਕਿਲੇਸਨਿਮਿਤ੍ਤਂ ਦੁਕ੍ਖਂ ਅਨਵਸਰਨ੍ਤਿ ਸੁਖਸੋਮਨਸ੍ਸਬਹੁਲਤਾ ਵੁਤ੍ਤਾ. ਯਵਤਿ ਤੇਨ ਫਲਂ ਮਿਸ੍ਸਿਤਂ ਵਿਯ ਹੋਤੀਤਿ ਯੋਨਿ, ਏਕਨ੍ਤਿਕਂ ਕਾਰਣਂ. ਅਸ੍ਸਾਤਿ ਭਿਕ੍ਖੁਨੋ. ਪਰਿਪੁਣ੍ਣਨ੍ਤਿ ਅਵਿਕਲਂ. ਅਨਵਸੇਸਂ ਆਸਵੇ ਖੇਪੇਤੀਤਿ ਆਸਵਕ੍ਖਯੋ, ਅਗ੍ਗਮਗ੍ਗੋ. ਯਂ ਯਨ੍ਤਿ ਦਨ੍ਧਂ ਮਜ੍ਝਂ ਜਵੋਤਿ ਜਵਾਦੀਸੁ ਯਂ ਯਂ ਗਮਨਂ. ਰਕ੍ਖਣਤ੍ਥਾਯਾਤਿ ਕਿਲੇਸਚੋਰੇਹਿ ਰਕ੍ਖਣਤ੍ਥਾਯ. ਵੇਗਨਿਗ੍ਗਹਣਤ੍ਥਾਯਾਤਿ ਕਿਲੇਸਹੇਤੁਕਸ੍ਸ ਇਨ੍ਦ੍ਰਿਯਵੇਗਸ੍ਸ ਨਿਗ੍ਗਣ੍ਹਨਤ੍ਥਾਯ. ਨਿਬ੍ਬਿਸੇਵਨਤ੍ਥਾਯਾਤਿ ਵਿਸੇਵਨਸ੍ਸ ਵਿਪ੍ਫਨ੍ਦਿਤਸ੍ਸ ਨਿਰੋਧਨਾਯ. ਕਿਲੇਸੂਪਸਮਤ੍ਥਾਯਾਤਿ ਕਿਲੇਸਾਨਂ ਉਪਰੂਪਰਿ ਸਮਨਤ੍ਥਾਯ ਵੂਪਸਮਨਤ੍ਥਾਯ.

ਸਮਣਰਤਿ ਨਾਮ ਸਮਥਵਿਪਸ੍ਸਨਾਮਗ੍ਗਫਲਸੁਖਾਨਿ. ਦਨ੍ਤਾਨਮ੍ਪਿ ਸਿਨ੍ਧਵਾਨਂ ਸਾਰਥਿਨੋ ਪਯੋਗੇਨ ਸਿਯਾ ਕਾਚਿ ਵਿਸੇਵਨਮਤ੍ਤਾਤਿ ਤਦਭਾਵਂ ਦਸ੍ਸੇਨ੍ਤੋ ‘‘ਨਿਬ੍ਬਿਸੇਵਨੇ ਕਤ੍ਵਾ ਪੇਸੇਨ੍ਤੋ’’ਤਿ ਵੁਤ੍ਤਂ. ਞਾਣਂ ਗਚ੍ਛਤੀਤਿ ਅਸਙ੍ਗਮਨਂ ਪਵਤ੍ਤਤਿ ਪਗੇਵ ਇਨ੍ਦ੍ਰਿਯਭਾਵਨਾਯ ਕਤਤ੍ਤਾ, ਕਿਲੇਸਨਿਗ੍ਗਹਸ੍ਸ ਸੁਖੇਨੇਵ ਸਿਦ੍ਧਤ੍ਤਾ. ਦਾਯਕਸ੍ਸ ਅਜ੍ਝਾਸਯੋ ਵਸੋ ਉਲ਼ਾਰੋ ਲਾਮਕੋ. ਦੇਯ੍ਯਧਮ੍ਮਸ੍ਸ ਪਮਾਣਂ ਵਸੋ ਅਪ੍ਪਕਂ ਬਹੁਕਞ੍ਚ.

ਮਹਾਮਣ੍ਡਪਟ੍ਠਾਨਂ ਨਾਮ ਲੋਹਪਾਸਾਦਸ੍ਸ ਪੁਰਤੋ ਏਵ ਮਹਾਭਿਕ੍ਖੁਸਙ੍ਘਸ੍ਸ ਸਨ੍ਨਿਪਾਤਕਾਲੇ ਤੇਸਂ ਪਹੋਨਕਵਸੇਨ ਮਹਾਮਣ੍ਡਪਸ੍ਸ ਕਤ੍ਤਬ੍ਬਟ੍ਠਾਨਂ. ਗਹਣਮਾਨਨ੍ਤਿ ਪਰਿਵਿਸਗਹਣਭਾਜਨਂ.

ਪਕਤਿਯਾ ਭਤ੍ਤਕਾਰਕਿਚ੍ਚੇ ਅਧਿਗਤੋ ਉਪਟ੍ਠਾਕੁਪਾਸਕੋ. ਮੁਦੁਸਮਖਰਸਞ੍ਞਿਤੇਹਿ, ਦਹਨਪਚਨਭਜ੍ਜਨਸਞ੍ਞਿਤੇਹਿ ਵਾ ਤੀਹਿ ਪਾਕੇਹਿ.

ਪਰਿਸੋਧੇਤ੍ਵਾਤਿ ਰਞ੍ਞੋ ਅਨੁਚ੍ਛਵਿਕਭਾਵਂ ਪਰਿਸੋਧੇਤ੍ਵਾ. ਭੂਮਿਯਂ ਛਡ੍ਡੇਸਿ ‘‘ਭਿਕ੍ਖੂਨਂ ਅਦਤ੍ਵਾ ਮਯਾ ਮੁਖੇ ਪਕ੍ਖਿਤ੍ਤ’’ਨ੍ਤਿ. ਮੁਖੇਨ ਗਣ੍ਹਿ ਤਸ੍ਸ ਨਿਦ੍ਦੋਸਭਾਵਂ ਦਸ੍ਸੇਤੁਂ. ਮਤ੍ਤਂ ਜਾਨਾਪੇਤੁਂ ਪਮਜ੍ਜਿ. ‘‘ਤ੍ਵਂ ਕੁਤੋ ਆਗਤੋ’’ਤਿ ਪੁਚ੍ਛਨੇ ਪਮਾਦਂ ਆਪਜ੍ਜਿ. ਅਨੁਭਾਗੋਤਿ ਅਵਸਿਟ੍ਠਭਾਗੋ. ਇਦਮਤ੍ਥਿਯਨ੍ਤਿ ਇਦਂ ਪਯੋਜਨਂ. ਇਤਰਨ੍ਤਿ ਪਾਲ਼ਿਯਂ ਅਨਾਗਤਮ੍ਪਿ ਆਹਾਰੇ ਪਮਾਣਜਾਨਨਂ.

ਸਯਨਂ ਸੇਯ੍ਯਾ, ਕਾਮਭੋਗੀਨਂ ਸੇਯ੍ਯਾ ਕਾਮਭੋਗਿਸੇਯ੍ਯਾ. ਦਕ੍ਖਿਣਪਸ੍ਸੇਨ ਸਯਾਨੋ ਨਾਮ ਨਤ੍ਥਿ ਦਕ੍ਖਿਣਹਤ੍ਥੇਨ ਕਾਤਬ੍ਬਕਿਚ੍ਚਕਰਣਤੋ. ਤੇਜੁਸ੍ਸਦਤ੍ਤਾਤਿ ਇਦਂ ਅਨੁਤ੍ਰਾਸਸ੍ਸੇਵ ਸੀਹਸ੍ਸ ਸਯਨਨ੍ਤਿ ਦਸ੍ਸੇਤੁਂ ਵੁਤ੍ਤਂ. ਦ੍ਵੇ ਪੁਰਿਮਪਾਦੇ ਏਕਸ੍ਮਿਂ, ਪਚ੍ਛਿਮਪਾਦੇ ਏਕਸ੍ਮਿਂ ਠਾਨੇ ਠਪੇਤ੍ਵਾਤਿ ਹਿ ਇਦਂ ਪਾਦਾਨਂ ਅਵਿਕ੍ਖਿਤ੍ਤਭਾਵਕਰਣਦਸ੍ਸਨਂ.

ਚਤੁਤ੍ਥਜ੍ਝਾਨਸੇਯ੍ਯਾਤਿ ਚਤੁਤ੍ਥਜ੍ਝਾਨਿਕਂ ਫਲਸਮਾਪਤ੍ਤਿਂ ਵਦਤਿ. ਯੇਭੁਯ੍ਯੇਨ ਹਿ ਤਥਾਗਤਾ ਫਲਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾਵ ਸਯਨ੍ਤਿ. ਸਾ ਚ ਨੇਸਂ ਚਤੁਤ੍ਥਜ੍ਝਾਨਤੋ ਵੁਟ੍ਠਾਯ, ਕਿਲੇਸਪਰਿਨਿਬ੍ਬਾਨਸ੍ਸ ਚ ਕਤਤ੍ਤਾਤਿ ਵਦਨ੍ਤਿ. ਇਧ ਸੀਹਸੇਯ੍ਯਾ ਆਗਤਾ ਪਾਦਂ ਅਚ੍ਚਾਧਾਯ ਪੁਬ੍ਬੇਨਾਪਰਂ ਅਜਹਿਤਸਂਲਕ੍ਖਣਾ ਸੇਯ੍ਯਾਤਿ ਕਤ੍ਵਾ. ਤੇਨਾਹ ‘‘ਅਯਂ ਹੀ’’ਤਿਆਦਿ. ਏਵਨ੍ਤਿ ‘‘ਦਕ੍ਖਿਣੇਨ ਪਸ੍ਸੇਨਾ’’ਤਿਆਦਿਨਾ ਵੁਤ੍ਤਾਕਾਰੇਨ ਸੇਯ੍ਯਂ ਕਪ੍ਪੇਤਿ.

ਕਥਂ ਨਿਦ੍ਦਾਯਨ੍ਤੋ ਸਤੋ ਸਮ੍ਪਜਾਨੋ ਹੋਤਿ? ਭਵਙ੍ਗਚਿਤ੍ਤੇਨ ਹਿ ਨਿਦ੍ਦੂਪਗਮਨਨ੍ਤਿ ਅਧਿਪ੍ਪਾਯੋ. ਅਪ੍ਪਹਾਨੇਨਾਤਿ ਤਦਧਿਮੁਤ੍ਤਤਾਯ ਤਦਪ੍ਪਹਾਨਂ ਦਟ੍ਠਬ੍ਬਂ. ਤਥਾ ਤੇਸੁ ਨਿਦ੍ਦੋਕ੍ਕਮਨਸ੍ਸ ਆਦਿਪਰਿਯੋਸਾਨੇਸੁ ਅਜਹਿਤਸਤਿਸਮ੍ਪਜਞ੍ਞਂ ਹੋਤਿ. ਤੇਨਾਹ – ‘‘ਨਿਦ੍ਦਂ ਓਕ੍ਕਮਨ੍ਤੋਪਿ ਸਤੋ ਸਮ੍ਪਜਾਨੋ ਹੋਤੀ’’ਤਿ. ਏਤਂ ਪਨਾਤਿ ‘‘ਨਿਦ੍ਦਂ ਓਕ੍ਕਮਨ੍ਤੋਪਿ ਸਤੋ ਸਮ੍ਪਜਾਨੋ ਹੋਤੀ’’ਤਿ ਵੁਤ੍ਤਨਯਂ ਵਦਤਿ. ਞਾਣਧਾਤੁਕਨ੍ਤਿ ਨ ਰੋਚਯਿਂਸੂਤਿ ਨਿਦ੍ਦੋਕ੍ਕਮਨੇਪਿ ਜਾਗਰਣੇ ਪਵਤ੍ਤਞਾਣਸਭਾਵਮੇਵਾਤਿ ਨ ਰੋਚਯਿਂਸੁ ਪੋਰਾਣਾ. ਨਿਰਨ੍ਤਰਂ ਭਵਙ੍ਗਚਿਤ੍ਤੇਸੁ ਵਤ੍ਤਮਾਨੇਸੁ ਸਤਿਸਮ੍ਪਜਞ੍ਞਾਸਮ੍ਭਵੋਤਿ ਅਧਿਪ੍ਪਾਯੋ. ਪੁਰਿਮਸ੍ਮਿਞ੍ਹਿ ਨਯੇ ਸਤਿਸਮ੍ਪਜਞ੍ਞਸ੍ਸ ਅਸਂਵਰੋ, ਨ ਭਵਙ੍ਗਸ੍ਸ. ਇਨ੍ਦ੍ਰਿਯਸਂਵਰੋ, ਭੋਜਨੇ ਮਤ੍ਤਞ੍ਞੁਤਾ, ਜਾਗਰਿਯਾਨੁਯੋਗੋਤਿ ਇਮੇਹਿ ਤਿਵਙ੍ਗਿਕਾ, ਨਿਮਿਤ੍ਤਾਨੁਬ੍ਯਞ੍ਜਨਪਰਿਵਜ੍ਜਨਾਦਿ ਸਬ੍ਬਂ ਵਿਪਸ੍ਸਨਾਪਕ੍ਖਿਕਮੇਵਾਤਿ ਅਧਿਪ੍ਪਾਯੋ.

ਤਾਨੇਵਾਤਿ ਵਿਪਸ੍ਸਨਾਕ੍ਖਣੇ ਪਵਤ੍ਤਾਨਿ ਇਨ੍ਦ੍ਰਿਯਾਦੀਨਿ. ਯਾਵ ਅਰਹਤ੍ਤਾ ਦੇਸਨਾ ਵਿਤ੍ਥਾਰਤੋ ਕਥੇਤਬ੍ਬਾ. ਪਾਲ਼ਿਯਂ ਪਨ ‘‘ਯੋਨਿ ਚਸ੍ਸ ਆਰਦ੍ਧਾ ਹੋਤਿ ਆਸਵਾਨਂ ਖਯਾਯਾ’’ਤਿ ਸਙ੍ਖੇਪੇਨ ਕਥਿਤਾ.

ਰਥੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਕੁਮ੍ਮੋਪਮਸੁਤ੍ਤਵਣ੍ਣਨਾ

੨੪੦. ਅਟ੍ਠਿਕੁਮ੍ਮੋਤਿ ਪਿਟ੍ਠਿਯਂ ਤਿਖਿਣਟ੍ਠਿਕੋ ਕੁਮ੍ਮੋ. ਤਨ੍ਤਿਬਨ੍ਧੋਤਿ ਬ੍ਯਾਵਟੋ. ਸਮੁਗ੍ਗੇ ਵਿਯ ਅਤ੍ਤਨੋ ਕਪਾਲੇ ਪਕ੍ਖਿਪਿਤ੍ਵਾ. ਸਮੋਦਹਨ੍ਤੋ ਸਮ੍ਮਾ ਓਦਹਨ੍ਤੋ ਅਜ੍ਝਤ੍ਤਮੇਵ ਦਹਨ੍ਤੋ. ਆਰਮ੍ਮਣਕਪਾਲੇਤਿ ਆਰਮ੍ਮਣਕਟਾਹੇ. ਸਮੋਦਹਨ੍ਤੋਤਿ ਦਿਟ੍ਠਮਤ੍ਤਸ੍ਸੇਵ ਚ ਗਹਣਤੋ ਮਨੋਵਿਤਕ੍ਕੇ ਤਤ੍ਥੇਵ ਸਮ੍ਮਦੇਵ ਓਦਹਨ੍ਤੋ. ਤਞ੍ਹਿ ਵਿਸਯਵਸੇਨ ਪਵਤ੍ਤਿਤੁਂ ਅਦੇਨ੍ਤੋ. ਪਞ੍ਚ ਧਮ੍ਮੇਤਿ ‘‘ਕਾਲੇਨ ਵਕ੍ਖਾਮੀ’’ਤਿਆਦਿਨਾ (ਪਰਿ. ੩੬੨) ਵੁਚ੍ਚਮਾਨੇ.

ਕੁਮ੍ਮੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਪਠਮਦਾਰੁਕ੍ਖਨ੍ਧੋਪਮਸੁਤ੍ਤਵਣ੍ਣਨਾ

੨੪੧. ਵਿਲਾਸਮਾਨੋ ਵਿਯ ਸਾਗਰਂ ਪਤ੍ਵਾ. ਅਨ੍ਤੋਸਾਖੋਤਿ ਗਙ੍ਗਾਯ ਤੀਰਸ੍ਸ ਅਨ੍ਤੋ ਓਨਤਸਾਖੋ. ਤੇਮੇਤੀਤਿ ਤਿਨ੍ਤੋ ਹੋਤਿ. ਤਿਰਿਯਂ ਪਤਿਤੋ ਦਣ੍ਡਸੇਤੁ ਵਿਯ ਠਿਤਤ੍ਤਾ ਮਹਾਜਨਸ੍ਸ ਪਚ੍ਚਯੋ ਜਾਤੋ, ਤਥਾ ਮਹਨ੍ਤਭਾਵੇਨ ਗਙ੍ਗਾਸੋਤਂ ਓਤਰਣਾਦਿ ਨਤ੍ਥਿ.

ਅਯਂ ਹੀਤਿ ਅਨਨ੍ਤਰਂ ਵੁਤ੍ਤਪੁਗ੍ਗਲੋ. ਅਰਿਯਮਗ੍ਗਂ ਓਰੁਯ੍ਹਾਤਿ ਚਤੁਬ੍ਬਿਧਂ ਅਰਿਯਮਗ੍ਗਵੀਥਿਂ ਓਤਰਿਤ੍ਵਾ. ‘‘ਚਿਤ੍ਤਂ ਨਾਮੇਤ’’ਨ੍ਤਿਆਦਿਨਾ ਚਿਨ੍ਤੇਤ੍ਵਾ ਗਿਹਿਬਨ੍ਧਨਂ ਨ ਵਿਸ੍ਸਜ੍ਜੇਤੀਤਿ ਸਮ੍ਬਨ੍ਧੋ. ਅਤ੍ਤਨੋ ਭਜਮਾਨਕੇਤਿ ਅਤ੍ਤਨੋ ਭਜਨ੍ਤੇ. ਜੀਵਿਕਤ੍ਥਾਯ ਪਯੁਜ੍ਜਿਤਬ੍ਬਤੋ ਪਯੋਗੋ, ਖੇਤ੍ਤਵਤ੍ਥਾਦਿ. ਤਤੋ ਪਯੋਗਤੋ ਉਟ੍ਠਿਤਂ ਆਯਂ. ਕਿਞ੍ਚਾਪਿ ਭਿਕ੍ਖੂਨਂ ਕਾਯਸਾਮਗ੍ਗਿਂ ਦੇਤਿ ਭਿਕ੍ਖਤ੍ਥਾਯ.

ਮੁਣ੍ਡਘਟਨ੍ਤਿ ਭਿਨ੍ਨੋਟ੍ਠਂ ਘਟਂ. ਖਨ੍ਧੇਤਿ ਅਂਸੇ. ਸਙ੍ਘਭੋਗਨ੍ਤਿ ਸਙ੍ਘਸਨ੍ਤਕਂ ਭੋਗਗਾਮਂ ਗਨ੍ਤ੍ਵਾ. ਅਤ੍ਥਤੋ ਏਵਂ ਵਦਨ੍ਤੀਤਿ ਤਥਾ ਅਤ੍ਥਸ੍ਸ ਸਮ੍ਭਵਤੋ ਏਵਂ ਵਦਨ੍ਤਾ ਵਿਯ ਹੋਨ੍ਤਿ. ਯਾਗੁਮਤ੍ਤਕੇ ਯਾਗੁਨ੍ਤਿ ਯਾਗੁਂ ਪਿਵਿਤ੍ਵਾ ਤਾਯ ਅਪਰਿਪਕ੍ਕਾਯ ਏਵ ਅਞ੍ਞਂ ਯਾਗੁਂ ਅਜ੍ਝੋਹਰਿਤ੍ਵਾਤਿ ਸਮ੍ਬਨ੍ਧੋ.

ਕਿਲੇਸਾਨੁਰਞ੍ਜਿਤੋਵਾਤਿ ਯੋਨਿਸੋਮਨਸਿਕਾਰਸ੍ਸ ਅਭਾਵੇਨ ਕਿਲੇਸਾਨੁਗਤਚਿਤ੍ਤੋ ਏਵ. ਅਕ੍ਖੀਨਿ ਨੀਹਰਿਤ੍ਵਾਤਿ ਕੋਧਵਸੇਨ ਅਕ੍ਖਿਕੇ ਕਰੋਨ੍ਤੋ ਅਕ੍ਖੀਨਿ ਨੀਹਰਿਤ੍ਵਾ ਵਿਚਰਿਸ੍ਸਤਿ. ਉਦ੍ਧਤੋ ਹੋਤਿ ਅਵੂਪਸਨ੍ਤੋ.

ਦਿਟ੍ਠਿਗਤਿਕੋਤਿ ਸਾਸਨਿਕੋ ਏਵਂ ਅਯੋਨਿਸੋ ਉਮ੍ਮੁਜ੍ਜਿਤ੍ਵਾ ਸਾਸਨਂ ਉਦ੍ਧਮ੍ਮਂ ਉਬ੍ਬਿਨਯਂ ਕਤ੍ਵਾ ਦੀਪੇਨ੍ਤੋ ਅਰਿਟ੍ਠਸਦਿਸੋ. ਤੇਨਾਹ ‘‘ਸੋ ਹੀ’’ਤਿਆਦਿ. ਅਰੂਪਭਵੇ ਰੂਪਂ ਅਤ੍ਥਿ, ਅਞ੍ਞਥਾ ਤਤੋ ਚੁਤਸ੍ਸ ਕੁਤੋ ਰੂਪਕ੍ਖਨ੍ਧਸ੍ਸ ਸਮ੍ਭਵੋ. ਅਸਞ੍ਞੀਭਵੇ ਚਿਤ੍ਤਂ ਅਤ੍ਥੀਤਿ ਏਤ੍ਥਾਪਿ ਏਸੇਵ ਨਯੋ. ਬਹੁਚਿਤ੍ਤਕ੍ਖਣਿਕੋ ਲੋਕੁਤ੍ਤਰਮਗ੍ਗੋ ‘‘ਯੋ ਇਮੇ ਚਤ੍ਤਾਰੋ ਸਤਿਪਟ੍ਠਾਨੇ ਭਾਵੇਯ੍ਯ ਸਤ੍ਤਵਸ੍ਸਾਨੀ’’ਤਿਆਦਿਵਚਨਤੋ (ਦੀ. ਨਿ. ੨.੪੦੪; ਮ. ਨਿ. ੧.੧੩੭). ਅਨੁਸਯੋ ਚਿਤ੍ਤਵਿਪ੍ਪਯੁਤ੍ਤੋ, ਅਞ੍ਞਥਾ ਸਾਵਜ੍ਜਾਨਵਜ੍ਜਧਮ੍ਮਾਨਂ ਏਕਜ੍ਝਂ ਉਪ੍ਪਤ੍ਤਿ ਸਿਯਾ. ਤੇ ਚ ਸਤ੍ਤਾ ਸਨ੍ਧਾਵਨ੍ਤਿ ਸਂਸਰਨ੍ਤਿ, ਅਞ੍ਞਥਾ ਕਮ੍ਮਫਲਾਨਂ ਸਮ੍ਬਨ੍ਧੋ ਨ ਸਿਯਾਤਿ. ਇਤਿ ਵਦਨ੍ਤੋ ਏਵਂ ਮਿਚ੍ਛਾਵਾਦਂ ਪਗ੍ਗਯ੍ਹ ਵਦਨ੍ਤੋ.

ਤੇਮਨਰੁਕ੍ਖੋ ਵਿਯ…ਪੇ… ਦੁਲ੍ਲਭਧਮ੍ਮਸ੍ਸਵਨੋ ਚ ਪੁਗ੍ਗਲੋ ਸਦ੍ਧਾਸਿਨੇਹੇਨ ਅਤੇਮਨਤੋ. ਕਤਵਿਨਯੋ ਸਿਕ੍ਖਿਤਵਿਨਯੋ ਯਥਾ ‘‘ਕਤਵਿਜ੍ਜੋ’’ਤਿ. ਧਮ੍ਮਕਥਿਕਾਨਂ ਵਿਚਾਰੇਥਾਤਿ ਇਦਂ ਦੇਯ੍ਯਧਮ੍ਮਂ ਧਮ੍ਮਕਥਿਕਾਨਂ ਅਯ੍ਯਾਨਂ ਤਸ੍ਸ ਤਸ੍ਸ ਯੁਤ੍ਤਵਸੇਨ ਵਿਚਾਰੇਥਾਤਿ ਨਿਯ੍ਯਾਤਨਵਸੇਨ ਵਤ੍ਵਾ. ਦਿਵਾਕਥਿਕੋ ਸਰਭਾਣਕੋ ਸਾਯਨ੍ਹੇ ਕਥੇਤਿ, ਪੁਰਿਮਯਾਮਂ ਕਥੇਨ੍ਤੋ ਰਤ੍ਤਿਕਥਿਕੋ ਭਾਣਕਪੁਗ੍ਗਲੋ.

ਨਨ੍ਦਨਵਨਾਭਿਰਾਮੇਤਿ ਨਨ੍ਦਨਵਨਂ ਵਿਯ ਮਨੋਰਮੇ. ਅਸ੍ਸ ਭਾਰਹਾਰਭਿਕ੍ਖੂਤਿ ਅਸ੍ਸ ਕਿਚ੍ਚਵਾਹਕਭਿਕ੍ਖੂ ਉਪਜ੍ਝਾਯਾਦਯੋ. ਸੁਖਨਿਸਿਨ੍ਨਕਥਨ੍ਤਿ ਪਟਿਸਨ੍ਥਾਰਕਥਾਪੁਬ੍ਬਕਂ ਉਪਨਿਸਿਨ੍ਨਕਥਂ ਸੁਤ੍ਵਾ.

ਠਿਤਸਣ੍ਠਾਨੇਨੇਵ ਠਿਤਾਕਾਰੇਨੇਵ ਠਿਤਂ, ਨਪ੍ਪਯੁਤ੍ਤਨ੍ਤਿ ਅਤ੍ਥੋ. ਚਿਤ੍ਤਕਮ੍ਮਮੂਲਾਦੀਨਿ ਠਿਤਸਣ੍ਠਾਨੇਨੇਵ ਠਿਤਾਤਿ ਯੋਜਨਾ. ਮੁਦੁਤਾਯਾਤਿ ਮੁਦੁਹਦਯਤਾਯ ਸਾਪੇਕ੍ਖਤਾਯ.

ਪਟਿਪਦਨ੍ਤਿ ਸਮਥਵਿਪਸ੍ਸਨਾਪਟਿਪਤ੍ਤਿਂ. ਦੀਪੇਤ੍ਵਾ ਪਕਾਸੇਤ੍ਵਾ ਪਾਕਟਂ ਕਤ੍ਵਾ. ਤਤ੍ਰੁਪ੍ਪਾਦੋਤਿ ਤਤ੍ਰ ਉਪ੍ਪਜ੍ਜਨਕਆਯੁਪ੍ਪਾਦੋ. ਖੇਤ੍ਤਂ ਸਨ੍ਧਾਯ ਵਦਤਿ. ਤੇਲ…ਪੇ… ਹਤ੍ਥਾਤਿ ਤੇਲਘਟ-ਮਧੁਘਟਫਾਣਿਤਘਟਾਦਿਹਤ੍ਥਾ. ਅਪਕ੍ਕਮਿਂਸੁ ਦੁਬ੍ਬਿਚਾਰਿਤਤ੍ਤਾ. ਪੂਰੇਸੀਤਿ ਹੇਟ੍ਠਾ ਚ ਤਤ੍ਥ ਤਤ੍ਥ ਅਤੀਤਾਨਿ ਕਾਲਵਚਨਾਨਿ ਪੋਰਾਣਟ੍ਠਕਥਾਯ ਆਗਤਤ੍ਤਾ ਕਿਰ ਵੁਤ੍ਤਾਨਿ.

ਉਪਗਮਨਾਨੁਪਗਮਨਾਦੀਨਿ ਓਰਿਮਸ੍ਸ ਪਾਰਿਮਸ੍ਸ ਚ ਉਪਗਮਨਾਨੁਪਗਮਨਾਨਿ ਚੇਵ ਮਜ੍ਝੇ ਸਂਸੀਦਨਾਨਿ ਚ. ਪਟਿਵਿਜ੍ਝਿਤੁਨ੍ਤਿ ਜਾਨਿਤੁਂ. ਏਤਨ੍ਤਿ ਯਥਾਵੁਤ੍ਤਂ ਚਕ੍ਖੁਸਭਾਵਂ. ਦੋਮਨਸ੍ਸਨ੍ਤਿ ਤਸ੍ਸੇਵ ਮਨ੍ਦਭਾਵਪਚ੍ਚਯਂ ਦੋਮਨਸ੍ਸਂ. ਆਪਜ੍ਜਨ੍ਤੋਪਿ ਉਪਗਚ੍ਛਤਿ ਨਾਮ ਤਨ੍ਨਿਮਿਤ੍ਤਸਂਕਿਲੇਸਸ੍ਸ ਉਪ੍ਪਾਦਿਤਤ੍ਤਾ. ਤਿਣ੍ਣਂ ਲਕ੍ਖਣਾਨਨ੍ਤਿ ਹੁਤ੍ਵਾ ਅਭਾਵਤੋ ਆਦਿਅਨ੍ਤਵਨ੍ਤਤੋ ਤਾਵਕਾਲਿਕਤੋ ਨਿਚ੍ਚਪਟਿਕ੍ਖੇਪਤੋਤਿਆਦੀਨਂ ਤਿਣ੍ਣਂ ਲਕ੍ਖਣਾਨਂ ਸਲ੍ਲਕ੍ਖਣਵਸੇਨ.

ਵਾਮਤੋਤਿ ਮਿਚ੍ਛਾ. ਦਕ੍ਖਿਣਤੋਤਿ ਸਮ੍ਮਾ. ਯਥਾ ਤਸ੍ਸ ਤਸ੍ਸ ਸਤ੍ਤਸ੍ਸ ਓਰਭਾਵਤ੍ਤਾ ਅਜ੍ਝਤ੍ਤਿਕਾਨਿ ਆਯਤਨਾਨਿ ਓਰਿਮਂ ਤੀਰਂ ਕਤ੍ਵਾ ਵੁਤ੍ਤਾਨਿ, ਏਵਂ ਨੇਸਂ ਪਰਭਾਵਤ੍ਤਾ ਬਾਹਿਰਾਨਿ ਆਯਤਨਾਨਿ ਪਾਰਿਮਂ ਵੁਤ੍ਤਾਨਿ. ਅਪਾਯਮਜ੍ਝੇ ਸਂਸਰਣਹੇਤੁਤਾਯ ਨਨ੍ਦੀਰਾਗੋਵ ‘‘ਮਜ੍ਝੇ ਸਂਸਾਦੋ’’ਤਿ ਵੁਤ੍ਤੋ.

ਉਨ੍ਨਤੋਤਿ ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਉਨ੍ਨਤਿਂ ਉਪਗਤੋ. ਅਤ੍ਤੁਕ੍ਕਂਸਨੇ ਪਂਸੁਕੂਲਿਕਭਾਵੇਨ ਅਤ੍ਤਾਨਂ ਦਹਨਤੋ ਅਞ੍ਞਾਕਾਰਤਾਗਹੇਤਬ੍ਬੋ. ਪਾਸਾਣੋ ਨੁ ਖੋ ਏਸ ਖਾਣੁਕੋਤਿ ਗਹੇਤਬ੍ਬਦਾਰੁਕ੍ਖਨ੍ਧਸਦਿਸੋ ਵੁਤ੍ਤੋ.

ਚੁਣ੍ਣਵਿਚੁਣ੍ਣਂ ਹੋਤਿ ਆਵਟ੍ਟਵੇਗਸ੍ਸ ਬਲਵਭਾਵਤੋ. ਚਤੂਸੁ ਅਪਾਯੇਸੂਤਿ ਪਞ੍ਚਕਾਮਗੁਣਾਵਟ੍ਟੇ ਪਤਿਤਪੁਗ੍ਗਲੋ ਮਨੁਸ੍ਸਲੋਕੇਪਿ ਗੁਣਸਰੀਰਭੇਦਨੇਨ ਦੀਘਰਤ੍ਤਂ ਚੁਣ੍ਣਵਿਚੁਣ੍ਣਂ ਆਪਜ੍ਜਤਿਯੇਵ, ਤਸ੍ਸ ਤਥਾ ਆਪਨ੍ਨਤ੍ਤਾ. ਏਵਞ੍ਹਿ ਸੋ ਅਪਾਯੇਸੁ ਤਾਦਿਸੇਸੁ ਜਾਯਤਿ.

ਸੀਲਸ੍ਸ ਦੁਟ੍ਠਂ ਨਾਮ ਨਤ੍ਥਿ, ਤਸ੍ਮਾ ਅਭਾਵਤ੍ਥੋ ਇਧ ਦੁ-ਸਦ੍ਦੋਤਿ ਆਹ ‘‘ਨਿਸ੍ਸੀਲੋ’’ਤਿ. ‘‘ਪਾਪਂ ਪਾਪੇਨ ਸੁਕਰ’’ਨ੍ਤਿਆਦੀਸੁ (ਉਦਾ. ੪੮) ਵਿਯ ਪਾਪ-ਸਦ੍ਦੋ ਨਿਹੀਨਪਰਿਯਾਯੋਤਿ ਆਹ ‘‘ਲਾਮਕਧਮ੍ਮੋ’’ਤਿ. ਨ ਸੁਚੀਤਿ ਕਾਯਵਾਚਾਚਿਤ੍ਤੇਹਿ ਨ ਸੁਚਿ. ਸਙ੍ਕਾਯ ਵਾਤਿ ਅਤ੍ਤਨੋ ਵਾ ਸਙ੍ਕਾਯ ਪਰੇਸਂ ਸਮਾਚਾਰਕਿਰਿਯਂ ਸਰਤਿ ਆਸਙ੍ਕਤਿ. ਤੇਨਾਹ ‘‘ਤਸ੍ਸ ਹੀ’’ਤਿਆਦਿ. ਤਾਨਿ ਕਮ੍ਮਾਨਿ ਪਵਿਸਤੀਤਿ ਤਾਨਿ ਕਮ੍ਮਾਨਿ ਕਰੋਨ੍ਤਾਨਂ ਅਨ੍ਤਰੇ ਪਵਿਸਤਿ. ਗੁਣਾਨਂ ਪੂਤਿਭਾਵੇਨਾਤਿ ਗੁਣਭਾਵੇਨ ਗਹਿਤਾਨਂ ਸੀਲਧਮ੍ਮਾਨਂ ਸਂਕਿਲਿਟ੍ਠਭਾਵਪ੍ਪਤ੍ਤਿਯਾ. ਕਚਵਰਜਾਤੋਤਿ ਅਬ੍ਭਨ੍ਤਰਂ ਸਞ੍ਜਾਤਕਚਵਰੋ, ਕਚਵਰਭੂਤੋ ਵਾ.

ਅਣਣਾ ਪਬ੍ਬਜ੍ਜਾਤਿ ਅਣਣਸ੍ਸੇਵ ਪਬ੍ਬਜ੍ਜਾ. ਓਰਿਮਤੀਰਾਦੀਨਂ ਉਪਗਮਨਾਨੁਪਗਮਨਾਦੀਨਂ ਜੋਤਿਤਤ੍ਤਾ ਵਟ੍ਟਵਿਵਟ੍ਟਂ ਕਥਿਤਂ.

ਪਠਮਦਾਰੁਕ੍ਖਨ੍ਧੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਦਾਰੁਕ੍ਖਨ੍ਧੋਪਮਸੁਤ੍ਤਵਣ੍ਣਨਾ

੨੪੨. ਯਾ ਆਪਤ੍ਤਿ ਵੁਟ੍ਠਾਨਗਾਮਿਨੀ ਦੇਸਨਾਗਾਮਿਨੀ, ਤਂ ਪਟਿਚ੍ਛਾਦਿਤਕਾਲਤੋ ਪਟ੍ਠਾਯ ਸਂਕਿਲਿਟ੍ਠਾ ਨਾਮ ਅਨ੍ਤਰਾਯਿਕਭਾਵਤੋ. ਆਵੀਕਤਾ ਪਨ ਅਨਾਪਤ੍ਤਿਟ੍ਠਾਨੇ ਤਿਟ੍ਠਤੀਤਿ ਅਸਂਕਿਲਿਟ੍ਠਾ ਨਾਮ. ਤੇਨਾਹ – ‘‘ਆਵੀਕਤਾ ਹਿਸ੍ਸ ਫਾਸੁ ਹੋਤੀ’’ਤਿ. ਏਵਰੂਪਂ ਸਂਕਿਲਿਟ੍ਠਨ੍ਤਿ ਪਟਿਚ੍ਛਾਦਿਤਤਾਯ ਵਾ ਦੁਟ੍ਠੁਲ੍ਲਭਾਵੇਨ ਵਾ ਸਂਕਿਲਿਟ੍ਠਂ.

ਦੁਤਿਯਦਾਰੁਕ੍ਖਨ੍ਧੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਅਵਸ੍ਸੁਤਪਰਿਯਾਯਸੁਤ੍ਤਵਣ੍ਣਨਾ

੨੪੩. ਸਨ੍ਥਾਗਾਰਨ੍ਤਿ ਸਞ੍ਞਾਪਨਾਗਾਰਂ. ਤੇਨਾਹ ‘‘ਉਯ੍ਯੋਗਕਾਲਾਦੀਸੂ’’ਤਿਆਦਿ. ਆਦਿ-ਸਦ੍ਦੇਨ ਮਙ੍ਗਲਮਹਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਸਨ੍ਥਰਨ੍ਤੀਤਿ ਵਿਸ੍ਸਮਨ੍ਤਿ, ਪਰਿਸ੍ਸਮਂ ਵਿਨੋਦੇਨ੍ਤੀਤਿ ਅਤ੍ਥੋ. ਸਹਾਤਿ ਸਨ੍ਨਿਪਾਤਵਸੇਨ ਏਕਜ੍ਝਂ. ਸਹ ਅਤ੍ਥਾਨੁਸਾਸਨਂ ਅਗਾਰਨ੍ਤਿ ਤਸ੍ਮਿਂ ਅਤ੍ਥੇ ਤ੍ਥ-ਕਾਰਸ੍ਸ ਨ੍ਥ-ਕਾਰਂ ਕਤ੍ਵਾ ‘‘ਸਨ੍ਥਾਗਾਰ’’ਨ੍ਤਿ ਵੁਚ੍ਚਤੀਤਿ ਦਟ੍ਠਬ੍ਬਂ, ਪਠਮਂ ਤਤ੍ਥ ਸਮ੍ਮਨ੍ਤਨਵਸੇਨ ਸਨ੍ਥਰਨ੍ਤਿ ਵਿਚਾਰੇਨ੍ਤੀਤਿ ਅਤ੍ਥੋ.

ਤੇਪਿਟਕਂ ਬੁਦ੍ਧਵਚਨਂ ਆਗਤਮੇਵ ਭਵਿਸ੍ਸਤੀਤਿ ਬੁਦ੍ਧਵਚਨਸ੍ਸ ਆਗਮਨਸੀਸੇਨ ਅਰਿਯਫਲਧਮ੍ਮਾਨਮ੍ਪਿ ਆਗਮਨਂ ਵੁਤ੍ਤਮੇਵ. ਤਿਯਾਮਰਤ੍ਤਿਂ ਤਤ੍ਥ ਵਸਨ੍ਤਾਨਂ ਫਲਸਮਾਪਤ੍ਤਿਵਲ਼ਞ੍ਜਨਂ ਹੋਤੀਤਿ. ਤਸ੍ਮਿਞ੍ਚ ਭਿਕ੍ਖੁਸਙ੍ਘੇ ਕਲ੍ਯਾਣਧਮ੍ਮਾ ਕਲ੍ਯਾਣਪੁਥੁਜ੍ਜਨਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਨ੍ਤਾ ਹੋਨ੍ਤੀਤਿ ਅਰਿਯਮਗ੍ਗਧਮ੍ਮਾਨਮ੍ਪਿ ਤਤ੍ਥ ਆਗਮਨਂ ਹੋਤਿਯੇਵ.

ਅਲ੍ਲਗੋਮਯੇਨਾਤਿ ਅਚ੍ਛੇਨ ਅਲ੍ਲਗੋਮਯਰਸੇਨ. ਓਪੁਞ੍ਜਾਪੇਤ੍ਵਾਤਿ ਵਿਲਿਮ੍ਪੇਤ੍ਵਾ. ਚਤੁਜ੍ਜਾਤਿਯਗਨ੍ਧੇਹੀਤਿ ਕੁਙ੍ਕੁਮਤੁਰੁਕ੍ਖਯਵਨਪੁਪ੍ਫਤਮਾਲਪਤ੍ਤਗਨ੍ਧੇਹਿ. ਨਾਨਾਵਣ੍ਣੇਤਿ ਨੀਲਾਦਿਵਸੇਨ ਨਾਨਾਵਣ੍ਣੇ, ਭਿਤ੍ਤਿਵਿਸੇਸਵਸੇਨ ਨਾਨਾਸਣ੍ਠਾਨਰੂਪੇ. ‘‘ਮਹਾਪਿਟ੍ਠਿਕਕੋਜਵੇਤਿ ਹਤ੍ਥਿਪਿਟ੍ਠਿਆਦੀਸੁ ਅਤ੍ਥਰਿਤਬ੍ਬਤਾਯ ‘ਮਹਾਪਿਟ੍ਠਿਕਾ’ਤਿ ਲਦ੍ਧਸਮਞ੍ਞੇ ਕੋਜਵੇ’’ਤਿ ਵਦਨ੍ਤਿ. ਕੁਤ੍ਤਕੇ ਪਨ ਸਨ੍ਧਾਯੇਤਂ ਵੁਤ੍ਤਂ, ‘‘ਚਤੁਰਙ੍ਗੁਲਾਧਿਕਪੁਪ੍ਫਾ ਮਹਾਪਿਟ੍ਠਿਕਕੋਜਵਾ’’ਤਿਪਿ ਵਦਨ੍ਤਿ. ਹਤ੍ਥਤ੍ਥਰਅਸ੍ਸਤ੍ਥਰਾ ਹਤ੍ਥਿਅਸ੍ਸਪਿਟ੍ਠੀਸੁ ਅਤ੍ਥਰਿਤਬ੍ਬਾ ਹਤ੍ਥਿਅਸ੍ਸਰੂਪਵਿਚਿਤ੍ਤਾ ਚ ਅਤ੍ਥਰਕਾ. ਸੀਹਤ੍ਥਰਕਾਦਯੋ ਪਨ ਸੀਹਰੂਪਾਦਿਵਿਚਿਤ੍ਤਾ ਏਵ ਅਤ੍ਥਰਕਾ. ਚਿਤ੍ਤਤ੍ਥਰਕਂ ਨਾਨਾਵਿਧਰੂਪੇਹਿ ਚੇਵ ਨਾਨਾਵਿਧਮਾਲਾਕਮ੍ਮਾਦੀਹਿ ਚ ਵਿਚਿਤ੍ਤਂ ਅਤ੍ਥਰਕਂ.

ਉਪਧਾਨਨ੍ਤਿ ਅਪਸ੍ਸਯਨਂ. ਉਪਦਹਿਤ੍ਵਾਤਿ ਅਪਸ੍ਸਯਯੋਗ੍ਗਭਾਵੇਨ ਠਪੇਤ੍ਵਾ. ਗਨ੍ਧੇਹਿ ਕਤਮਾਲਾ ਗਨ੍ਧਦਾਮਂ. ਤਮਾਲਪਤ੍ਤਾਦੀਹਿ ਕਤਮਾਲਾ ਪਤ੍ਤਦਾਮਂ. ਆਦਿ-ਸਦ੍ਦੇਨ ਹਿਙ੍ਗੁਲਤਕ੍ਕੋਲਜਾਤਿਫਲਜਾਤਿਪੁਪ੍ਫਾਦੀਹਿ ਕਤਦਾਮਂ ਸਙ੍ਗਣ੍ਹਾਤਿ. ਪਲ੍ਲਙ੍ਕਾਕਾਰੇਨ ਕਤਪੀਠਂ ਪਲ੍ਲਙ੍ਕਪੀਠਂ. ਤੀਸੁ ਪਸ੍ਸੇਸੁ ਏਕਪਸ੍ਸੇ ਏਵ ਵਾ ਸਉਪਸ੍ਸਯਂ ਅਪਸ੍ਸਯਪੀਠਂ. ਅਨਪਸ੍ਸਯਂ ਮੁਣ੍ਡਪੀਠਂ. ਯੋਜਨਾਵਟ੍ਟੇਤਿ ਯੋਜਨਪਰਿਕ੍ਖੇਪੋਕਾਸੇ.

ਸਂਵਿਧਾਯਾਤਿ ਅਨ੍ਤਰਵਾਸਕਸ੍ਸ ਕੋਣਪਦੇਸਂ ਇਤਰਪਦੇਸਞ੍ਚ ਸਮਂ ਕਤ੍ਵਾ ਵਿਧਾਯ. ਤੇਨਾਹ – ‘‘ਕਤ੍ਤਰਿਯਾ ਪਦੁਮਂ ਕਨ੍ਤੇਨ੍ਤੋ ਵਿਯਾ’’ਤਿ, ‘‘ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੋ’’ਤਿ ਚ. ਯਸ੍ਮਾ ਬੁਦ੍ਧਾਨਂ ਰੂਪਸਮ੍ਪਦਾ ਵਿਯ ਆਕਪ੍ਪਸਮ੍ਪਦਾਪਿ ਪਰਮੁਕ੍ਕਂਸਤਂ ਗਤਾ, ਤਸ੍ਮਾ ਤਦਾ ਭਗਵਾ ਏਵਂ ਸੋਭੇਯ੍ਯਾਤਿ ਦਸ੍ਸੇਨ੍ਤੋ ‘‘ਸੁਵਣ੍ਣਪਾਮਙ੍ਗੇਨਾ’’ਤਿਆਦਿਮਾਹ. ਤਤ੍ਥ ‘‘ਅਸਮੇਨ ਬੁਦ੍ਧਵੇਸੇਨਾ’’ਤਿਆਦਿਨਾ ਤਦਾ ਭਗਵਾ ਬੁਦ੍ਧਾਨੁਭਾਵਸ੍ਸ ਨਿਗੁਹਨੇ ਕਾਰਣਾਭਾਵਤੋ ਤਤ੍ਥ ਸਨ੍ਨਿਪਤਿਤਦੇਵਮਨੁਸ੍ਸਨਾਗਯਕ੍ਖਗਨ੍ਧਬ੍ਬਾਦੀਨਂ ਪਸਾਦਜਨਨਤ੍ਥਂ ਅਤ੍ਤਨੋ ਸਭਾਵਪਕਤਿਯਾਵ ਕਪਿਲਵਤ੍ਥੁਂ ਪਾਵਿਸੀਤਿ ਦਸ੍ਸੇਤਿ. ਬੁਦ੍ਧਾਨਂ ਕਾਯਪਭਾ ਨਾਮ ਪਕਤਿਯਾ ਅਸੀਤਿਹਤ੍ਥਮਤ੍ਤਪਦੇਸਂ ਵਿਸਰਤੀਤਿ ਆਹ ‘‘ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੀ’’ਤਿ. ਨੀਲਪੀਤਲੋਹਿਤੋਦਾਤਮਞ੍ਜਿਟ੍ਠਪਭਸ੍ਸਰਾਨਂ ਵਸੇਨ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ.

ਸਬ੍ਬਪਾਲਿਫੁਲ੍ਲੋਤਿ ਮੂਲਤੋ ਪਟ੍ਠਾਯ ਯਾਵ ਸਾਖਗ੍ਗਾ ਸਮਨ੍ਤਤੋ ਫੁਲ੍ਲੋ ਵਿਕਸਿਤੋ. ਪਟਿਪਾਟਿਯਾ ਠਪਿਤਾਨਨ੍ਤਿਆਦਿ ਪਰਿਕਪ੍ਪੂਪਮਾ, ਯਥਾ ਤਂ…ਪੇ… ਅਲਙ੍ਕਤਂ ਅਞ੍ਞਂ ਵਿਰੋਚਤਿ, ਏਵਂ ਵਿਰੋਚਿਤ੍ਥ, ਸਮਤਿਂਸਾਯ ਪਾਰਮਿਤਾਹਿ ਅਭਿਸਙ੍ਖਤਤ੍ਤਾ ਏਵਂ ਵਿਰੋਚਿਤ੍ਥਾਤਿ ਵੁਤ੍ਤਂ ਹੋਤਿ. ‘‘ਪਞ੍ਚਵੀਸਤਿਯਾ ਗਙ੍ਗਾਨਨ੍ਤਿ ਸਤਮੁਖਾ ਹੁਤ੍ਵਾ ਸਮੁਦ੍ਦਂ ਪਵਿਟ੍ਠਾਯ ਮਹਾਗਙ੍ਗਾਯ ਮਹਨ੍ਤਮਹਨ੍ਤਾਨਂ ਗਙ੍ਗਾਨਂ ਪਞ੍ਚਵੀਸਤੀ’’ਤਿ ਵਦਨ੍ਤਿ. ਪਪਞ੍ਚਸੂਦਨਿਯਂ (ਮ. ਨਿ. ਅਟ੍ਠ. ੨.੨੨) ‘‘ਪਞ੍ਚਵੀਸਤਿਯਾ ਨਦੀਨ’’ਨ੍ਤਿ ਵੁਤ੍ਤਂ, ਗਙ੍ਗਾਦੀਨਂ ਚਨ੍ਦਭਾਗਾਪਰਿਯੋਸਾਨਾਨਂ ਪਞ੍ਚਵੀਸਤਿਯਾ ਮਹਾਨਦੀਨਨ੍ਤਿ ਅਤ੍ਥੋ. ਪਰਿਕਪ੍ਪਵਚਨਞ੍ਹੇਤਂ. ਸਮ੍ਭਿਜ੍ਜਾਤਿ ਸਮ੍ਭੇਦਂ ਮਿਸ੍ਸੀਭਾਵਂ ਪਤ੍ਵਾ ਮੁਖਦ੍ਵਾਰੇਤਿ ਸਮੁਦ੍ਦਂ ਪਵਿਟ੍ਠਟ੍ਠਾਨੇ.

ਨਾਗਸੁਪਣ੍ਣਗਨ੍ਧਬ੍ਬਯਕ੍ਖਾਦੀਨਨ੍ਤਿਆਦਿ ਪਰਿਕਪ੍ਪਵਸੇਨ ਵੁਤ੍ਤਂ. ਸਹਸ੍ਸੇਨਾਤਿ ਪਦਸਹਸ੍ਸੇਨ, ਭਾਣਵਾਰਪ੍ਪਮਾਣੇਨ ਗਨ੍ਥੇਨਾਤਿ ਅਤ੍ਥੋ.

ਕਮ੍ਪਯਨ੍ਤੋ ਵਸੁਨ੍ਧਰਨ੍ਤਿ ਅਤ੍ਤਨੋ ਗੁਣਵਿਸੇਸੇਹਿ ਪਥਵੀਕਮ੍ਮਂ ਉਨ੍ਨਾਦੇਨ੍ਤੋ, ਏਵਂਭੂਤੋਪਿ ਅਹੇਠਯਨ੍ਤੋ ਪਾਣਾਨਿ. ਸਬ੍ਬਪਦਕ੍ਖਿਣਤ੍ਤਾ ਬੁਦ੍ਧਾਨਂ ਦਕ੍ਖਿਣਂ ਪਠਮਂ ਪਾਦਂ ਉਦ੍ਧਰਨ੍ਤੋ. ਸਮਂ ਸਮ੍ਫੁਸਤੇ ਭੂਮਿਂ ਸੁਪ੍ਪਤਿਟ੍ਠਿਤਪਾਦਤਾਯ. ਯਦਿਪਿ ਭੂਮਿਂ ਸਮਂ ਫੁਸਤਿ, ਰਜਸਾ ਨੁਪਲਿਪ੍ਪਤਿ ਸੁਖੁਮਤ੍ਤਾ ਛਵਿਯਾ. ਨਿਨ੍ਨਟ੍ਠਾਨਂ ਉਨ੍ਨਮਤੀਤਿਆਦਿ ਬੁਦ੍ਧਾਨਂ ਸੁਪ੍ਪਤਿਟ੍ਠਿਤਪਾਦਤਾਸਙ੍ਖਾਤਮਹਾਪੁਰਿਸਲਕ੍ਖਣਪਟਿਲਾਭਸ੍ਸ ਨਿਸ੍ਸਨ੍ਦਫਲਂ. ਨਾਤਿਦੂਰੇ ਉਦ੍ਧਰਤੀਤਿ ਅਤਿਦੂਰੇ ਠਪੇਤੁਂ ਨ ਉਦ੍ਧਰਤਿ. ਨਚ੍ਚਾਸਨ੍ਨੇ ਚ ਨਿਕ੍ਖਿਪਨ੍ਤਿ ਅਚ੍ਚਾਸਨ੍ਨੇ ਚ ਠਾਨੇ ਅਨਿਕ੍ਖਿਪਨ੍ਤੋ ਨਿਯ੍ਯਾਤਿ. ਹਾਸਯਨ੍ਤੋ ਸਦੇਵਕੇ ਲੋਕੇ ਤੋਸੇਨ੍ਤੋ. ਚਤੂਹਿ ਪਾਦੇਹਿ ਚਰਤੀਤਿ ਚਤੁਚਾਰੀ.

ਬੁਦ੍ਧਾਨੁਭਾਵਸ੍ਸ ਪਕਾਸਨਵਸੇਨ ਗਤਤ੍ਤਾ ਵਣ੍ਣਕਾਲੋ ਨਾਮ ਏਸ. ਸਰੀਰਵਣ੍ਣੇ ਵਾ ਗੁਣਵਣ੍ਣੇ ਵਾ ਕਥਿਯਮਾਨੇ ਦੁਕ੍ਕਥਿਤਨ੍ਤਿ ਨ ਵਤ੍ਤਬ੍ਬਂ. ਕਸ੍ਮਾ? ਅਪ੍ਪਮਾਣਵਣ੍ਣਾ ਹਿ ਬੁਦ੍ਧਾ ਭਗਵਨ੍ਤੋ, ਬੁਦ੍ਧਗੁਣਸਂਵਣ੍ਣਨਾ ਜਾਨਨ੍ਤਸ੍ਸ ਯਥਾਰਦ੍ਧਸਂਵਣ੍ਣਨਂਯੇਵ ਅਨੁਪਵਿਸਤਿ. ਦੁਕੂਲਚੁਮ੍ਬਟਕੇਨਾਤਿ ਗਨ੍ਥਿਤ੍ਵਾ ਗਹਿਤਦੁਕੂਲਵਤ੍ਥੇਨ.

ਨਾਗਵਿਕ੍ਕਨ੍ਤਚਾਰਣੋਤਿ ਹਤ੍ਥਿਨਾਗਸਦਿਸਪਦਨਿਕ੍ਖੇਪੋ. ਸਤਪੁਞ੍ਞਲਕ੍ਖਣੋਤਿ ਅਨੇਕਸਤਪੁਞ੍ਞਾਭਿਨਿਬ੍ਬਤ੍ਤਮਹਾਪੁਰਿਸਲਕ੍ਖਣੋ. ਮਣਿਵੇਰੋਚਨੋ ਯਥਾਤਿ ਚਤੁਰਾਸੀਤਿਸਹਸ੍ਸਮਣਿਪਰਿਵਾਰਿਤੋ ਅਤਿਵਿਯ ਵਿਰੋਚਮਾਨੋ ਵਿਜ੍ਜੋਤਮਾਨੋ ਮਣਿ ਵਿਯ. ‘‘ਵੇਰੋਚਨੋ ਨਾਮ ਏਕੋ ਮਣੀ’’ਤਿ ਕੇਚਿ. ਮਹਾਸਾਲੋਵਾਤਿ ਮਹਨ੍ਤੋ ਸਾਲਰੁਕ੍ਖੋ ਵਿਯ, ਸੁਦ੍ਧਟ੍ਠਿਤੋ ਕੋਵਿਲ਼ਾਰਾਦਿ ਮਹਾਰੁਕ੍ਖੋ ਵਿਯ ਵਾ. ਪਦੁਮੋ ਕੋਕਨਦੋ ਯਥਾਤਿ ਕੋਕਨਦਸਙ੍ਖਾਤਂ ਮਹਾਪਦੁਮਂ ਵਿਯ, ਵਿਕਸਮਾਨਪਦੁਮਂ ਵਿਯ ਵਾ.

ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯਾਤਿਆਦਿ ਤਸ੍ਸਾ ਪਕਿਣ੍ਣਕਕਥਾਯ ਅਞ੍ਞੇਸਂ ਸੁਦੁਕ੍ਕਰਭਾਵਦਸ੍ਸਨਞ੍ਚੇਵ ਸੁਣਨ੍ਤਾਨਂ ਅਚ੍ਚਨ੍ਤਸੁਖਾਵਹਭਾਵਦਸ੍ਸਨਞ੍ਚ. ਪਥਵੋਜਂ ਆਕਡ੍ਢਨ੍ਤੋ ਵਿਯਾਤਿ ਨਾਲ਼ਿਯਨ੍ਤਂ ਯੋਜੇਤ੍ਵਾ ਮਹਾਪਥਵਿਯਾ ਹੇਟ੍ਠਿਮਤਲੇ ਪਪ੍ਪਟਕੋਜਂ ਉਦ੍ਧਂ ਮੁਖਂ ਕਤ੍ਵਾ ਆਕਡ੍ਢਨ੍ਤੋ ਵਿਯ. ਯੋਜਨਿਕਨ੍ਤਿ ਯੋਜਨਪਮਾਣਂ. ਮਧੁਭਣ੍ਡਨ੍ਤਿ ਮਧੁਪਟਲਂ.

ਮਹਨ੍ਤਨ੍ਤਿ ਵਿਪੁਲਂ ਉਲ਼ਾਰਪੁਞ੍ਞਂ. ਸਬ੍ਬਦਾਨਂ ਦਿਨ੍ਨਮੇਵ ਹੋਤੀਤਿ ਸਬ੍ਬਮੇਵ ਪਚ੍ਚਯਜਾਤਂ ਆਵਾਸਦਾਯਕੇਨ ਦਿਨ੍ਨਮੇਵ ਹੋਤਿ. ਤਥਾ ਹਿ ਦ੍ਵੇ ਤਯੋ ਗਾਮੇ ਪਿਣ੍ਡਾਯ ਚਰਿਤ੍ਵਾ ਕਿਞ੍ਚਿ ਅਲਦ੍ਧਾ ਆਗਤਸ੍ਸਪਿ ਛਾਯੂਦਕਸਮ੍ਪਨ੍ਨਂ ਆਰਾਮਂ ਪਵਿਸਿਤ੍ਵਾ ਨ੍ਹਾਯਿਤ੍ਵਾ ਪਟਿਸ੍ਸਯੇ ਮੁਹੁਤ੍ਤਂ ਨਿਪਜ੍ਜਿਤ੍ਵਾ ਉਟ੍ਠਾਯ ਨਿਸਿਨ੍ਨਸ੍ਸ ਕਾਯੇ ਬਲਂ ਆਹਰਿਤ੍ਵਾ ਪਕ੍ਖਿਤ੍ਤਂ ਵਿਯ ਹੋਤਿ. ਬਹਿ ਵਿਚਰਨ੍ਤਸ੍ਸ ਚ ਕਾਯੇ ਵਣ੍ਣਧਾਤੁ ਵਾਤਾਤਪੇਹਿ ਕਿਲਮਤਿ, ਪਟਿਸ੍ਸਯਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਮੁਹੁਤ੍ਤਂ ਨਿਸਿਨ੍ਨਸ੍ਸ ਵਿਸਭਾਗਸਨ੍ਤਤਿ ਵੂਪਸਮ੍ਮਤਿ, ਸਭਾਗਸਨ੍ਤਤਿ ਪਤਿਟ੍ਠਾਤਿ, ਵਣ੍ਣਧਾਤੁ ਆਹਰਿਤ੍ਵਾ ਪਕ੍ਖਿਤ੍ਤਾ ਵਿਯ ਹੋਤਿ, ਬਹਿ ਵਿਚਰਨ੍ਤਸ੍ਸ ਚ ਪਾਦੇ ਕਣ੍ਟਕਾ ਵਿਜ੍ਝਨ੍ਤਿ, ਖਾਣੁ ਪਹਰਤਿ, ਸਰੀਸਪਾਦਿਪਰਿਸ੍ਸਯਾ ਚੇਵ ਚੋਰਭਯਞ੍ਚ ਉਪ੍ਪਜ੍ਜਤਿ, ਪਟਿਸ੍ਸਯਂ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਨਿਸਿਨ੍ਨਸ੍ਸ ਪਨ ਸਬ੍ਬੇਪੇਤੇ ਪਰਿਸ੍ਸਯਾ ਨ ਹੋਨ੍ਤਿ. ਸਜ੍ਝਾਯਨ੍ਤਸ੍ਸ ਧਮ੍ਮਪੀਤਿਸੁਖਂ, ਕਮ੍ਮਟ੍ਠਾਨਂ ਮਨਸਿਕਰੋਨ੍ਤਸ੍ਸ ਉਪਸਮਸੁਖਂ ਉਪ੍ਪਜ੍ਜਤਿ ਬਹਿਦ੍ਧਾ ਵਿਕ੍ਖੇਪਾਭਾਵਤੋ. ਬਹਿ ਵਿਚਰਨ੍ਤਸ੍ਸ ਚ ਕਾਯੇ ਸੇਦਾ ਮੁਚ੍ਚਨ੍ਤਿ, ਅਕ੍ਖੀਨਿ ਫਨ੍ਦਨ੍ਤਿ, ਸੇਨਾਸਨਂ ਪਵਿਸਨਕ੍ਖਣੇ ਮਞ੍ਚਪੀਠਾਦੀਨਿ ਨ ਪਞ੍ਞਾਯਨ੍ਤਿ, ਮੁਹੁਤ੍ਤਂ ਨਿਸਿਨ੍ਨਸ੍ਸ ਪਨ ਅਕ੍ਖਿਪਸਾਦੋ ਆਹਰਿਤ੍ਵਾ ਪਕ੍ਖਿਤ੍ਤੋ ਵਿਯ ਹੋਤਿ, ਦ੍ਵਾਰਵਾਤਪਾਨਮਞ੍ਚਪੀਠਾਦੀਨਿ ਪਞ੍ਞਾਯਨ੍ਤਿ. ਏਤਸ੍ਮਿਞ੍ਚ ਆਵਾਸੇ ਵਸਨ੍ਤਂ ਦਿਸ੍ਵਾ ਮਨੁਸ੍ਸਾ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਨ੍ਤਿ. ਤੇਨ ਵੁਤ੍ਤਂ – ‘‘ਆਵਾਸਦਾਨਸ੍ਮਿਞ੍ਹਿ ਦਿਨ੍ਨੇ ਸਬ੍ਬਦਾਨਂ ਦਿਨ੍ਨਮੇਵ ਹੋਤੀ’’ਤਿ. ਭੂਮਟ੍ਠਕ…ਪੇ… ਨ ਸਕ੍ਕਾਤਿ ਅਯਮਤ੍ਥੋ ਮਹਾਸੁਦਸ੍ਸਨਵਤ੍ਥੁਨਾ (ਦੀ. ਨਿ. ੨.੨੪੧ ਆਦਯੋ) ਦੀਪੇਤਬ੍ਬੋ. ਮਾਤੁਕੁਚ੍ਛਿ ਅਸਮ੍ਬਾਧੋਵ ਹੋਤੀਤਿ ਅਯਮਤ੍ਥੋ ਅਨ੍ਤਿਮਭਵਿਕਾਨਂ ਮਹਾਬੋਧਿਸਤ੍ਤਾਨਂ ਪਟਿਸਨ੍ਧਿਵਸੇਨ ਦੀਪੇਤਬ੍ਬੋ.

ਸੀਤਨ੍ਤਿ ਅਜ੍ਝਤ੍ਤਂ ਧਾਤੁਕ੍ਖੋਭਵਸੇਨ ਵਾ ਬਹਿਦ੍ਧਾ ਉਤੁਵਿਪਰਿਣਾਮਵਸੇਨ ਵਾ ਉਪ੍ਪਜ੍ਜਨਕਸੀਤਂ. ਉਣ੍ਹਨ੍ਤਿ ਅਗ੍ਗਿਸਨ੍ਤਾਪਂ, ਤਸ੍ਸ ਚ ਦਵਦਾਹਾਦੀਸੁ ਸਮ੍ਭਵੋ ਦਟ੍ਠਬ੍ਬੋ. ਪਟਿਹਨ੍ਤੀਤਿ ਪਟਿਹਨਤਿ. ਯਥਾ ਤਦੁਭਯਵਸੇਨ ਕਾਯਚਿਤ੍ਤਾਨਂ ਆਬਾਧੋ ਨ ਹਨਤਿ, ਏਵਂ ਕਰੋਤਿ. ਸੀਤੁਣ੍ਹਬ੍ਭਾਹਤੇ ਹਿ ਸਰੀਰੇ ਵਿਕ੍ਖਿਤ੍ਤਚਿਤ੍ਤੋ ਭਿਕ੍ਖੁ ਯੋਨਿਸੋ ਪਦਹਿਤੁਂ ਨ ਸਕ੍ਕੋਤਿ. ਵਾਲ਼ਮਿਗਾਨੀਤਿ ਸੀਹਬ੍ਯਗ੍ਘਾਦਿਵਾਲ਼ਮਿਗੇ. ਗੁਤ੍ਤਸੇਨਾਸਨਞ੍ਹਿ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਨਿਸਿਨ੍ਨਸ੍ਸ ਤੇ ਪਰਿਸ੍ਸਯਾ ਨ ਹੋਨ੍ਤਿ. ਸਰੀਸਪੇਤਿ ਯੇ ਕੇਚਿ ਸਰਨ੍ਤਾ ਗਚ੍ਛਨ੍ਤੇ ਦੀਘਜਾਤਿਕੇ ਸਪ੍ਪਾਦਿਕੇ ਅਞ੍ਞੇ ਚ ਤਥਾਰੂਪੇ. ਮਕਸੇਤਿ ਨਿਦਸ੍ਸਨਮਤ੍ਤਮੇਤਂ, ਡਂਸਾਦੀਨਂ ਏਤੇਨੇਵ ਸਙ੍ਗਹੋ ਦਟ੍ਠਬ੍ਬੋ. ਸਿਸਿਰੇਤਿ ਸੀਤਕਾਲਵਸੇਨ ਸਤ੍ਤਾਹਵਦ੍ਦਲਿਕਾਦਿਵਸੇਨ ਚ ਉਪ੍ਪਨ੍ਨੇ ਸਿਸਿਰਸਮ੍ਫਸ੍ਸੇ. ਵੁਟ੍ਠਿਯੋਤਿ ਯਦਾ ਤਦਾ ਉਪ੍ਪਨ੍ਨਾ ਵਸ੍ਸਵੁਟ੍ਠਿਯੋ ਪਟਿਹਨਤੀਤਿ ਯੋਜਨਾ.

ਵਾਤਾਤਪੋ ਘੋਰੋਤਿ ਰੁਕ੍ਖਗਚ੍ਛਾਦੀਨਂ ਉਬ੍ਬਹਨਭਞ੍ਜਨਾਦਿਵਸੇਨ ਪਵਤ੍ਤਿਯਾ ਘੋਰੋ ਸਰਜਅਰਜਾਦਿਭੇਦੋ ਵਾਤੋ ਚੇਵ ਗਿਮ੍ਹਪਰਿਲ਼ਾਹਸਮਯੇਸੁ ਉਪ੍ਪਤ੍ਤਿਯਾ ਘੋਰੋ ਸੂਰਿਯਾਤਪੋ ਚ. ਪਟਿਹਞ੍ਞਤੀਤਿ ਪਟਿਬਾਹੀਯਤਿ. ਲੇਣਤ੍ਥਨ੍ਤਿ ਨਾਨਾਰਮ੍ਮਣਤੋ ਚਿਤ੍ਤਂ ਨਿਵਤ੍ਤਿਤ੍ਵਾ ਪਟਿਸਲ੍ਲਾਣਾਰਾਮਤ੍ਥਂ. ਸੁਖਤ੍ਥਨ੍ਤਿ ਵੁਤ੍ਤਪਰਿਸ੍ਸਯਾਭਾਵੇਨ ਫਾਸੁਵਿਹਾਰਤ੍ਥਂ. ਝਾਯਿਤੁਨ੍ਤਿ ਅਟ੍ਠਤਿਂਸਾਯ ਆਰਮ੍ਮਣੇਸੁ ਯਤ੍ਥ ਕਤ੍ਥਚਿ ਚਿਤ੍ਤਂ ਉਪਨਿਬਨ੍ਧਿਤ੍ਵਾ ਸਮਾਦਹਨਵਸੇਨ ਝਾਯਿਤੁਂ. ਵਿਪਸ੍ਸਿਤੁਨ੍ਤਿ ਅਨਿਚ੍ਚਾਦਿਵਸੇਨ ਸਙ੍ਖਾਰੇ ਸਮ੍ਮਸਿਤੁਂ.

ਵਿਹਾਰੇਤਿ ਪਟਿਸ੍ਸਯੇ. ਕਾਰਯੇਤਿ ਕਾਰਾਪੇਯ੍ਯ. ਰਮ੍ਮੇਤਿ ਮਨੋਰਮੇ. ਵਾਸਯੇਤ੍ਥ ਬਹੁਸ੍ਸੁਤੇਤਿ ਕਾਰੇਤ੍ਵਾ ਪਨ ਏਤ੍ਥ ਵਿਹਾਰੇਸੁ ਬਹੁਸ੍ਸੁਤੇ ਸੀਲਵਨ੍ਤੇ ਕਲ੍ਯਾਣਧਮ੍ਮੇ ਨਿਵਾਸੇਯ੍ਯ. ਤੇ ਨਿਵਾਸੇਨ੍ਤੋ ਪਨ ਤੇਸਂ ਬਹੁਸ੍ਸੁਤਾਨਂ ਯਥਾ ਪਚ੍ਚਯੇਹਿ ਕਿਲਮਥੋ ਨ ਹੋਤਿ. ਏਵਂ ਅਨ੍ਨਞ੍ਚ ਪਾਨਞ੍ਚ ਵਤ੍ਥਸੇਨਾਸਨਾਨਿ ਚ ਦਦੇਯ੍ਯ ਉਜੁਭੂਤੇਸੁ ਅਜ੍ਝਾਸਯਸਮ੍ਪਨ੍ਨੇਸੁ ਕਮ੍ਮਫਲਾਨਂ ਰਤਨਤ੍ਤਯਗੁਣਾਨਞ੍ਚ ਸਦ੍ਦਹਨੇਨ ਵਿਪ੍ਪਸਨ੍ਨੇਨ ਚੇਤਸਾ. ਇਦਾਨਿ ਗਹਟ੍ਠਪਬ੍ਬਜਿਤਾਨਂ ਅਞ੍ਞਮਞ੍ਞੂਪਕਾਰਤਂ ਦਸ੍ਸੇਤੁਂ ‘‘ਤੇ ਤਸ੍ਸਾ’’ਤਿ ਗਾਥਮਾਹ. ਤਤ੍ਥ ਤੇਤਿ ਬਹੁਸ੍ਸੁਤਾ. ਤਸ੍ਸਾਤਿ ਉਪਾਸਕਸ੍ਸ. ਧਮ੍ਮਂ ਦੇਸੇਨ੍ਤੀਤਿ ਸਕਲਵਟ੍ਟਦੁਕ੍ਖਪਨੂਦਨਂ ਨਿਯ੍ਯਾਨਿਕਂ ਧਮ੍ਮਂ ਕਥੇਨ੍ਤਿ. ਯਂ ਸੋ ਧਮ੍ਮਂ ਇਧਞ੍ਞਾਯਾਤਿ ਸੋ ਪੁਗ੍ਗਲੋ ਯਂ ਸਦ੍ਧਮ੍ਮਂ ਇਮਸ੍ਮਿਂ ਸਾਸਨੇ ਸਮ੍ਮਾਪਟਿਪਜ੍ਜਨੇਨ ਜਾਨਿਤ੍ਵਾ ਅਗ੍ਗਮਗ੍ਗਾਧਿਗਮੇਨ ਅਨਾਸਵੋ ਹੁਤ੍ਵਾ ਪਰਿਨਿਬ੍ਬਾਯਤਿ.

ਆਵਾਸੇਤਿ ਆਵਾਸਦਾਨੇ. ਆਨਿਸਂਸੋਤਿ ਉਦ੍ਰਯੋ. ਪੂਜਾਸਕ੍ਕਾਰਵਸੇਨ ਪਠਮਯਾਮੋ ਖੇਪਿਤੋ, ਸਤ੍ਥੁ ਧਮ੍ਮਦੇਸਨਾਯ ਅਪ੍ਪਾਵਸੇਸੋ ਮਜ੍ਝਿਮਯਾਮੋ ਗਤੋਤਿ ਪਾਲ਼ਿਯਂ ‘‘ਬਹੁਦੇਵ ਰਤ੍ਤਿ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਅਤਿਰੇਕਤਰਂ ਦਿਯਡ੍ਢਯਾਮ’’ਨ੍ਤਿ. ਸਙ੍ਗਹਂ ਨਾਰੋਹਤਿ ਵਿਪੁਲਵਿਤ੍ਥਾਰਭਾਵਤੋ. ਬੁਦ੍ਧਾਨਞ੍ਹਿ ਭਤ੍ਤਾਨੁਮੋਦਨਾਪਿ ਥੋਕਂ ਵਡ੍ਢੇਤ੍ਵਾ ਵੁਚ੍ਚਮਾਨਾ ਦੀਘਮਜ੍ਝਿਮਪਮਾਣਾਪਿ ਹੋਤਿ. ਤਥਾ ਹਿ ਸੁਫੁਸਿਤਂ ਦਨ੍ਤਾਵਰਣਂ, ਜਿਵ੍ਹਾ ਤਨੁਕਾ, ਭਵਙ੍ਗਪਰਿਵਾਸੋ ਪਰਿਤ੍ਤੋ, ਨਤ੍ਥਿ ਵੇਗਾਯਿਤਂ, ਨਤ੍ਥਿ ਵਿਤ੍ਥਾਯਿਤਂ, ਨਤ੍ਥਿ ਅਬ੍ਯਾਵਟਮਨੋ, ਸਬ੍ਬਞ੍ਞੁਤਞ੍ਞਾਣਂ ਸਮੁਪਬ੍ਯੂਲ਼੍ਹਂ, ਅਪਰਿਕ੍ਖਯਾ ਪਟਿਸਮ੍ਭਿਦਾ.

ਸਨ੍ਦਸ੍ਸੇਤ੍ਵਾਤਿਆਦੀਸੁ ਸਨ੍ਦਸ੍ਸੇਤ੍ਵਾ ਆਵਾਸਦਾਨਪਟਿਸਂਯੁਤ੍ਤਂ ਧਮ੍ਮਿਂ ਕਥਂ ਕਤ੍ਵਾ. ਤਤੋ ਪਰਂ, ਮਹਾਰਾਜ, ਇਤਿਪਿ ਸੀਲਂ, ਇਤਿਪਿ ਸਮਾਧਿ, ਇਤਿਪਿ ਪਞ੍ਞਾਤਿ ਸੀਲਾਦਿਗੁਣੇ ਤੇਸਂ ਸਮ੍ਮਾ ਦਸ੍ਸੇਤ੍ਵਾ ਹਤ੍ਥੇਨ ਗਹੇਤ੍ਵਾ ਵਿਯ ਪਚ੍ਚਕ੍ਖਤੋ ਪਕਾਸੇਤ੍ਵਾ. ਸਮਾਦਪੇਤ੍ਵਾਤਿ ਏਵਂ ਸੀਲਂ ਸਮਾਦਾਤਬ੍ਬਂ, ਸੀਲੇ ਪਤਿਟ੍ਠਿਤੇਨ ਏਵਂ ਸਮਾਧਿਪਞ੍ਞਾ ਭਾਵੇਤਬ੍ਬਾਤਿ ਯਥਾ ਤੇ ਸੀਲਾਦਿਗੁਣੇ ਸਮ੍ਮਾ ਆਦਿਯਨ੍ਤਿ, ਤਥਾ ਗਣ੍ਹਾਪੇਤ੍ਵਾ. ਸਮੁਤ੍ਤੇਜੇਤ੍ਵਾਤਿ ਯਥਾਸਮਾਦਿਨ੍ਨਂ ਸੀਲਂ ਸੁਵਿਸੁਦ੍ਧਂ ਹੋਤਿ, ਸਮਥਵਿਪਸ੍ਸਨਾ ਚ ਭਾਵਿਯਮਾਨਾ ਯਥਾ ਸੁਟ੍ਠੁ ਵਿਸੋਧਿਤਾ ਉਪਰੂਪਰਿ ਵਿਸੇਸਾਵਹਾ ਹੋਨ੍ਤਿ, ਏਵਂ ਸਮੁਤ੍ਤੇਜੇਤ੍ਵਾ ਨਿਸਾਮਨਵਸੇਨ ਵੋਦਾਪੇਤ੍ਵਾ. ਸਮ੍ਪਹਂਸੇਤ੍ਵਾਤਿ ਯਥਾਨੁਸਿਟ੍ਠਂ ਠਿਤਸੀਲਾਦਿਗੁਣੇਹਿ ਸਮ੍ਪਤਿ ਪਟਿਲਦ੍ਧਗੁਣਾਨਿਸਂਸੇਹਿ ਚੇਵ ਉਪਰਿਲਦ੍ਧਬ੍ਬਫਲਵਿਸੇਸੇਹਿ ਚ ਚਿਤ੍ਤਂ ਸਮ੍ਪਹਂਸੇਤ੍ਵਾ ਲਦ੍ਧਸ੍ਸਾਸਵਸੇਨ ਸੁਟ੍ਠੁ ਤੋਸੇਤ੍ਵਾ. ਏਵਮੇਤੇਸਂ ਪਦਾਨਂ ਅਤ੍ਥੋ ਵੇਦਿਤਬ੍ਬੋ. ਸਕ੍ਯਰਾਜਾਨੋ ਯੇਭੁਯ੍ਯੇਨ ਭਗਵਤੋ ਧਮ੍ਮਦੇਸਨਾਯ ਸਾਸਨੇ ਲਦ੍ਧਸ੍ਸਾਦਾ ਲਦ੍ਧਪ੍ਪਤਿਟ੍ਠਾ ਚ.

ਉਪਸਗ੍ਗਸਦ੍ਦਾਨਂ ਅਨੇਕਤ੍ਥਤ੍ਤਾ ਅਭਿ-ਸਦ੍ਦੋ ਅਤਿ-ਸਦ੍ਦੇਨ ਸਮਾਨਤ੍ਥੋਪਿ ਹੋਤੀਤਿ ਵੁਤ੍ਤਂ ‘‘ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ’’ਤਿ.

ਤਤ੍ਰ ਕਿਰਾਤਿਆਦਿ ਕੇਚਿਵਾਦੋਤਿ ਬਦ੍ਧੋਪਿ ਨ ਹੋਤਿ. ਤੇਨਾਹ ‘‘ਅਕਾਰਣਮੇਤ’’ਨ੍ਤਿਆਦਿ. ਕਾਯਚਿਤ੍ਤਲਹੁਤਾਦਯੋ ਉਪ੍ਪਜ੍ਜਨ੍ਤੀਤਿ ਇਦਂ ਕਾਯਿਕਚੇਤਸਿਕਅਞ੍ਞਥਾਭਾਵਸ੍ਸ ਕਾਰਣਵਚਨਂ, ਲਹੁਤਾਦਿਉਪ੍ਪਨ੍ਨੇ ਸਵਨਾਨੁਤ੍ਤਰਿਯਪਟਿਲਾਭੇਨ ਲਦ੍ਧਬ੍ਬਧਮ੍ਮਤ੍ਥਵੇਦਸਮਧਿਗਮਤੋ. ਵੁਤ੍ਤਞ੍ਹੇਤਂ –

‘‘ਯਥਾ, ਯਥਾਵੁਸੋ, ਭਿਕ੍ਖੁਨੋ ਸਤ੍ਥਾ ਵਾ ਧਮ੍ਮਂ ਦੇਸੇਤਿ ਅਞ੍ਞਤਰੋ ਵਾ ਗਰੁਟ੍ਠਾਨਿਕੋ ਸਬ੍ਰਹ੍ਮਚਾਰੀ, ਤਥਾ ਤਥਾ ਸੋ ਤਸ੍ਮਿਂ ਧਮ੍ਮੇ ਲਭਤਿ ਅਤ੍ਥਵੇਦਂ, ਲਭਤਿ ਧਮ੍ਮਵੇਦਂ, ਲਭਤਿ ਧਮ੍ਮੂਪਸਂਹਿਤਂ ਪਾਮੋਜ੍ਜ’’ਨ੍ਤਿਆਦਿ (ਦੀ. ਨਿ. ੩.੩੨੨, ੩੫੫; ਅ. ਨਿ. ੫.੨੬).

ਪਿਟ੍ਠਿਵਾਤੋ ਉਪ੍ਪਜ੍ਜਿ ਉਪਾਦਿਨ੍ਨਸਰੀਰਸ੍ਸ ਤਥਾਰੂਪਤ੍ਤਾ ਸਙ੍ਖਾਰਾਨਞ੍ਚ ਅਨਿਚ੍ਚਤਾਯ ਦੁਕ੍ਖਾਨੁਬਨ੍ਧਤ੍ਤਾ. ਅਕਾਰਣਂ ਵਾ ਏਤਨ੍ਤਿ ਯੇਨਾਧਿਪ੍ਪਾਯੇਨ ਵੁਤ੍ਤਂ, ਤਮੇਵ ਅਧਿਪ੍ਪਾਯਂ ਵਿਵਰਿਤੁਂ ‘‘ਪਹੋਤੀ’’ਤਿਆਦਿ ਵੁਤ੍ਤਂ. ਏਕਪਲ੍ਲਙ੍ਕੇਨ ਨਿਸੀਦਿਤੁਂ ਪਹੋਤਿ ਯਥਾ ਤਂ ਵੇਲੁਵਗਾਮਕੇ. ਏਤ੍ਤਕੇ ਠਾਨੇਤਿ ਏਤ੍ਤਕੇ ਠਾਨੇ ਠਾਨਂ ਨਿਪ੍ਫਨ੍ਨਨ੍ਤਿ ਯੋਜਨਾ. ਤਞ੍ਚ ਖੋਤਿ ਵੁਟ੍ਠਾਨਸਞ੍ਞਂ ਚਿਤ੍ਤੇ ਠਪਨਂ. ਧਮ੍ਮਕਥਂ ਸੁਣਮਾਨੋ ਧਮ੍ਮਗਾਰਵੇਨ.

ਅਵਸ੍ਸੁਤਸ੍ਸਾਤਿ ਅਵਸ੍ਸੁਤਭਾਵਸ੍ਸ ਰਾਗਾਦਿਵਸੇਨ. ਅਵਸ੍ਸੁਤਸ੍ਸ ਕਾਰਣਨ੍ਤਿ ਤਿਨ੍ਤਭਾਵਕਾਰਣਂ. ਕਿਲੇਸਾਧਿਮੁਚ੍ਚਨੇਨਾਤਿ ਕਿਲੇਸਵਸੇਨ ਪਰਿਪ੍ਫਨ੍ਦਿਤਵਸੇਨ. ਨਿਬ੍ਬਾਪਨਂ ਵਿਯਾਤਿ ਵੂਪਸਮੋ ਵਿਯ. ਨਿਬ੍ਬਿਸੇਵਨਾਨਨ੍ਤਿ ਪਰਿਪ੍ਫਨ੍ਦਨਰਹਿਤਾਨਂ.

ਅਵਸ੍ਸੁਤਪਰਿਯਾਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਦੁਕ੍ਖਧਮ੍ਮਸੁਤ੍ਤਵਣ੍ਣਨਾ

੨੪੪. ਦੁਕ੍ਖਧਮ੍ਮਾਨਨ੍ਤਿ ਦੁਕ੍ਖਕਾਰਣਾਨਂ. ਤੇਨਾਹ ‘‘ਦੁਕ੍ਖਸਮ੍ਭਵਧਮ੍ਮਾਨ’’ਨ੍ਤਿਆਦਿ. ਤਤ੍ਥ ਕਿਂ ਦੁਕ੍ਖਂ, ਕਾ ਦੁਕ੍ਖਧਮ੍ਮਾਤਿ ਤਦੁਭਯਂ ਦਸ੍ਸੇਤੁਂ ‘‘ਪਞ੍ਚਸੁ ਹੀ’’ਤਿ ਵੁਤ੍ਤਂ. ਤੇਤਿ ਪਞ੍ਚਕ੍ਖਨ੍ਧਾ. ਦੁਕ੍ਖਸਮ੍ਭਵਧਮ੍ਮਤ੍ਤਾਤਿ ਦੁਕ੍ਖੁਪ੍ਪਤ੍ਤਿਕਾਰਣਤ੍ਤਾ. ਅਸ੍ਸਾਤਿ ਤੇਨ. ਕਰਣੇ ਹੇਤਂ ਸਾਮਿਵਚਨਂ. ਕਾਮੇਤਿ ਵਤ੍ਥੁਕਾਮੇ ਕਿਲੇਸਕਾਮੇ ਚ. ਪੁਨ ਅਸ੍ਸਾਤਿ ਸਾਮਿਅਤ੍ਥੇ ਏਵ ਸਾਮਿਵਚਨਂ. ਚਾਰਨ੍ਤਿ ਚਿਤ੍ਤਾਚਾਰਂ. ਵਿਹਾਰਨ੍ਤਿ ਪਞ੍ਚਦ੍ਵਾਰਪ੍ਪਵਤ੍ਤਿਚਾਰਵਿਹਾਰਂ. ‘‘ਏਕਟ੍ਠਾ’’ਤਿ ਚ ਵਦਨ੍ਤਿ. ਤੇਨੇਵ ਹਿ ‘‘ਅਨੁਬਨ੍ਧਿਤ੍ਵਾ ਚਰਨ੍ਤਂ’’ਇਚ੍ਚੇਵ ਵੁਤ੍ਤਂ. ਅਨੁਬਨ੍ਧਿਤ੍ਵਾਤਿ ਚ ਵੀਥਿਚਿਤ੍ਤਪ੍ਪਵਤ੍ਤਿਤੋ ਪਟ੍ਠਾਯ ਯਾਵ ਤਤਿਯਜਵਨਵਾਰਾ ਅਨੁ ਅਨੁ ਬਨ੍ਧਿਤ੍ਵਾ. ਪਕ੍ਖਨ੍ਦਨਾਦੀਤਿ ਆਦਿ-ਸਦ੍ਦੇਨ ਕਸਿਗੋਰਕ੍ਖਾਦਿਵਸੇਨਪਿ ਕਾਮਾਨਂ ਪਰਿਯੇਸਨਦੁਕ੍ਖਂ ਸਙ੍ਗਣ੍ਹਾਤਿ.

ਦਾਯਤੀਤਿ ਦਾਯੋ, ਵਨਂ. ਤੇਨਾਹ ‘‘ਅਟਵਿ’’ਨ੍ਤਿ. ਕਣ੍ਟਕਗਬ੍ਭਨ੍ਤਿ ਓਵਰਕਸਦਿਸਂ ਵਨਂ. ਨਾਮਪਦਂ ਨਾਮ ਕਿਰਿਯਾਪਦਾਪੇਕ੍ਖਨ੍ਤਿ ‘‘ਵਿਜ੍ਝੀ’’ਤਿ ਵਚਨਸੇਸੇਨ ਕਿਰਿਯਾਪਦਂ ਗਣ੍ਹਾਤਿ.

ਦਨ੍ਧਾਯਿਤਤ੍ਤਂ ਉਪ੍ਪਨ੍ਨਕਿਲੇਸਾਨਂ ਅਵਟ੍ਠਾਨਂ. ਤੇਨਾਹ ‘‘ਉਪ੍ਪਨ੍ਨਮਤ੍ਤਾਯਾ’’ਤਿਆਦਿ. ਤਾਯਾਤਿ ਸਤਿਯਾ. ਕਾਚਿ ਕਿਲੇਸਾਤਿ ਚੁਦ੍ਦਸਵਿਧੇ ਚਿਤ੍ਤਸ੍ਸ ਕਿਚ੍ਚੇ ਜਵਨਕਿਚ੍ਚੇ ਏਵ ਚਿਤ੍ਤਕਿਲੇਸਾਨਂ ਉਪ੍ਪਤ੍ਤਿਂ ਕਤ੍ਵਾ ਤਥਾ ਵੁਤ੍ਤਂ. ਨਿਗ੍ਗਹਿਤਾਵ ਹੋਨ੍ਤਿ ਪਵਤ੍ਤਿਤੁਂ ਅਪ੍ਪਦਾਨਵਸੇਨ. ਤੇਨਾਹ ‘‘ਨ ਸਣ੍ਠਾਤੁਂ ਸਕ੍ਕੋਨ੍ਤੀ’’ਤਿ. ਚਕ੍ਖੁਦ੍ਵਾਰਸ੍ਮਿਨ੍ਤਿ ਪਾਲ਼ਿਯਂ ਤਸ੍ਸ ਪਠਮਂ ਗਹਿਤਤਾਯ ਵੁਤ੍ਤਂ, ਤੇਨ ਨਯੇਨ ਸੇਸਦ੍ਵਾਰਾਨਿਪਿ ਗਹਿਤਾਨੇਵ ਹੋਨ੍ਤਿ. ਰਾਗਾਦੀਸੁ ਉਪ੍ਪਨ੍ਨੇਸੁ ਪਠਮਜਵਨਵਾਰੇ. ਸਤਿਸਮ੍ਮੋਸੇਨ ‘‘ਕਿਲੇਸਾ ਮੇ ਉਪ੍ਪਨ੍ਨਾ’’ਤਿ ਞਤ੍ਵਾ ਤਥਾ ਪਚ੍ਚਾਮਾਸਸਤਿਯਾ ਲਬ੍ਭਨਤੋ. ਤੇਨਾਹ – ‘‘ਅਨਚ੍ਛਰਿਯਂ ਚੇਤ’’ਨ੍ਤਿ. ਆਵਟ੍ਟੇਤ੍ਵਾਤਿ ਅਯੋਨਿਸੋ ਆਵਟ੍ਟੇਤ੍ਵਾ. ਆਵਜ੍ਜਨਾਦੀਸੂਤਿ ਤਤੋ ਏਵ ਅਯੋਨਿਸੋ ਆਵਜ੍ਜਨਾਦੀਸੁ ਉਪ੍ਪਨ੍ਨੇਸੁ ਇਟ੍ਠਾਰਮ੍ਮਣਸ੍ਸ ਲਦ੍ਧਤ੍ਤਾ ਪਚ੍ਚਯਸਿਦ੍ਧਿਯਾ ਸਮ੍ਪਤ੍ਤਂ ਪਵਤ੍ਤਨਾਰਹਂ. ਨਿਵਤ੍ਤੇਤ੍ਵਾਤਿ ਦੁਤਿਯਜਵਨਵਾਰੇਪਿ ਕਿਲੇਸੁਪ੍ਪਤ੍ਤਿਂ ਨਿਵਤ੍ਤੇਤ੍ਵਾ. ਕਥਂ ਪਨਸ੍ਸ ਏਵਂ ਲਦ੍ਧੁਂ ਸਕ੍ਕਾਤਿ ਆਹ ‘‘ਆਰਦ੍ਧਵਿਪਸ੍ਸਕਾਨਂ ਹੀ’’ਤਿਆਦਿ. ਭਾਵਨਾਪਟਿਸਙ੍ਖਾਨੇਤਿ ਭਾਵਨਾਯਂ ਪਟਿਸਙ੍ਖਾਨੇ ਚ ਯੋਗਿਨੋ ਪਤਿਟ੍ਠਿਤਭਾਵੋ. ਤਸ੍ਸ ਅਯਮਾਨਿਸਂਸੋ – ਯਂ ਪਚ੍ਚਯਲਾਭੇਨ ਉਪ੍ਪਜ੍ਜਿਤੁਂ ਲਦ੍ਧੋਕਾਸਾਪਿ ਕਿਲੇਸਾ ਪੁਬ੍ਬੇ ਪਵਤ੍ਤਭਾਵਨਾਨੁਭਾਵੇਨ ਵਿਕ੍ਖਮ੍ਭਿਤਾ ਤਥਾ ਤਥਾ ਨਿਗ੍ਗਹਿਤਾ ਏਵ ਹੁਤ੍ਵਾ ਨਿਵਤ੍ਤਨ੍ਤਿ, ਕੁਸਲਾ ਧਮ੍ਮਾਵ ਲਦ੍ਧੋਕਾਸਾ ਉਪਰੂਪਰਿ ਵਡ੍ਢਨ੍ਤਿ.

ਅਭਿਹਟ੍ਠੁਨ੍ਤਿ ਅਭਿਹਰਿਤ੍ਵਾ. ਅਨੁਦਹਨ੍ਤੀਤਿ ਅਨੁਦਹਨ੍ਤਾ ਵਿਯ ਹੋਨ੍ਤਿ. ਅਨੁਸੇਨ੍ਤੀਤਿ ਏਤ੍ਥਾਪਿ ਏਸੇਵ ਨਯੋ. ਅਨਾਵਟ੍ਟਨ੍ਤੇਤਿ ਅਨਿਵਤ੍ਤਨ੍ਤੇ ਸਾਮਞ੍ਞਤੋਤਿ ਅਧਿਪ੍ਪਾਯੋ. ਵਿਪਸ੍ਸਨਾਬਲਮੇਵ ਦੀਪਿਤਂ ਮਗ੍ਗਫਲਾਧਿਗਮਸ੍ਸ ਅਜੋਤਿਤਤ੍ਤਾ.

ਦੁਕ੍ਖਧਮ੍ਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਕਿਂਸੁਕੋਪਮਸੁਤ੍ਤਵਣ੍ਣਨਾ

੨੪੫. ਚਤੁਨ੍ਨਂ ਅਰਿਯਸਚ੍ਚਾਨਂ ਪਰਿਞ੍ਞਾਭਿਸਮਯਾਦਿਵਸੇਨ ਵਿਵਿਧਦਸ੍ਸਨਨ੍ਤਿ ਕਿਚ੍ਚਵਸੇਨ ਨਾਨਾਦਸ੍ਸਨਂ ਹੋਤੀਤਿ ਵੁਤ੍ਤਂ, ‘‘ਦਸ੍ਸਨਨ੍ਤਿ ਪਠਮਮਗ੍ਗਸ੍ਸੇਤਂ ਅਧਿਵਚਨ’’ਨ੍ਤਿ. ਤਯਿਦਂ ਉਪਰਿਮਗ੍ਗੇਸੁ ਭਾਵਨਾਪਰਿਯਾਯਸ੍ਸ ਨਿਰੁਲ਼੍ਹਤ੍ਤਾ ਪਠਮਮਗ੍ਗਸ੍ਸ ਪਠਮਂ ਨਿਬ੍ਬਾਨਦਸ੍ਸਨਤੋ. ਤੇਨਾਹ ‘‘ਪਠਮਮਗ੍ਗੋ ਹੀ’’ਤਿਆਦਿ. ਕੋਚਿ ਯਥਾਵੁਤ੍ਤਂ ਅਵਿਪਰੀਤਂ ਅਤ੍ਥਂ ਅਜਾਨਨ੍ਤੋ ਞਾਣਦਸ੍ਸਨਂ ਨਾਮ ਆਰਮ੍ਮਣਕਰਣਸ੍ਸ ਵਸੇਨ ਅਤਿਪ੍ਪਸਙ੍ਗਂ ਆਸਙ੍ਕੇਯ੍ਯਾਤਿ ਤਂ ਨਿਵਤ੍ਤੇਤੁਂ ‘‘ਗੋਤ੍ਰਭੂ ਪਨਾ’’ਤਿਆਦਿ ਵੁਤ੍ਤਂ. ਨ ਦਸ੍ਸਨਨ੍ਤਿ ਵੁਚ੍ਚਤੀਤਿ ਏਤ੍ਥ ਰਾਜਦਸ੍ਸਨਂ ਉਦਾਹਰਨ੍ਤਿ. ਚਤ੍ਤਾਰੋਪਿ ਮਗ੍ਗਾ ਦਸ੍ਸਨਮੇਵ ਯਥਾਵੁਤ੍ਤੇਨਤ੍ਥੇਨ, ਭਾਵਨਾਪਰਿਯਾਯੋ ਪਨ ਉਪਰਿ ਤਿਣ੍ਣਂ ਮਗ੍ਗਾਨਂ ਪਠਮਮਗ੍ਗਉਪਾਯਸ੍ਸ ਭਾਵਨਾਕਾਰੇਨ ਪਵਤ੍ਤਨਤੋ. ਦਸ੍ਸਨਂ ਵਿਸੁਦ੍ਧਿ ਏਤ੍ਥਾਤਿ ਦਸ੍ਸਨਵਿਸੁਦ੍ਧਿਕਂ, ਨਿਬ੍ਬਾਨਂ. ਫਸ੍ਸਾਯਤਨਂ ਕਮ੍ਮਟ੍ਠਾਨਂ ਅਸ੍ਸ ਅਤ੍ਥੀਤਿ ਫਸ੍ਸਾਯਤਨਕਮ੍ਮਟ੍ਠਾਨਿਕੋ. ਏਸ ਨਯੋ ਸੇਸੇਸੁਪਿ ਪਦੇਸੁ.

ਪਦੇਸਸਙ੍ਖਾਰੇਸੂਤਿ ਸਙ੍ਖਾਰੇਕਦੇਸੇਸੁ. ਹੇਟ੍ਠਿਮਪਰਿਚ੍ਛੇਦੇਨ ਪਥਵਿਆਦਿਕੇ ਧਮ੍ਮਮਤ੍ਤੇ ਦਿਟ੍ਠੇ ਰੂਪਪਰਿਗ੍ਗਹੋ, ਚਕ੍ਖੁਵਿਞ੍ਞਾਣਾਦਿਕੇ ਤਂਸਹਗਤਧਮ੍ਮਮਤ੍ਤੇ ਦਿਟ੍ਠੇ ਅਰੂਪਪਰਿਗ੍ਗਹੋ ਚ ਸਿਜ੍ਝਤੀਤਿ ਵਦਨ੍ਤਿ.

ਅਧਿਗਤਮਗ੍ਗਮੇਵ ਕਥੇਸੀਤਿ ਯੇਨ ਮੁਖੇਨ ਵਿਪਸ੍ਸਨਾਭਿਨਿਵੇਸਂ ਅਕਾਸਿ, ਤਮੇਵਸ੍ਸ ਮੁਖਂ ਕਥੇਸਿ. ਅਯਂ ਪਨਾਤਿ ਕਮ੍ਮਟ੍ਠਾਨਂ ਪੁਚ੍ਛਨ੍ਤੋ ਭਿਕ੍ਖੁ. ਇਮੇਸਨ੍ਤਿ ਫਸ੍ਸਾਯਤਨਕਮ੍ਮਟ੍ਠਾਨਿਕਪਞ੍ਚਕ੍ਖਨ੍ਧਕਮ੍ਮਟ੍ਠਾਨਿਕਾਨਂ ਵਚਨਂ. ‘‘ਅਞ੍ਞਮਞ੍ਞਂ ਨ ਸਮੇਤੀ’’ਤਿ ਵਤ੍ਵਾ ਤਮੇਵਤ੍ਥਂ ਪਾਕਟਂ ਕਰੋਤਿ ‘‘ਪਠਮੇਨਾ’’ਤਿਆਦਿਨਾ. ਪਞ੍ਚਕ੍ਖਨ੍ਧਵਿਮੁਤ੍ਤਸ੍ਸ ਸਙ੍ਖਾਰਸ੍ਸ ਅਭਾਵਾ ‘‘ਨਿਪ੍ਪਦੇਸੇਸੂ’’ਤਿ ਵੁਤ੍ਤਂ. ਤਥੇਵਾਤਿ ਯਥੇਵ ਫਸ੍ਸਾਯਤਨਕਮ੍ਮਟ੍ਠਾਨਿਕਂ, ਤਥੇਵ ਤਂ ਪਞ੍ਚਕ੍ਖਨ੍ਧਕਮ੍ਮਟ੍ਠਾਨਿਕਂ ਪੁਚ੍ਛਿਤ੍ਵਾ.

ਸਮਪ੍ਪਵਤ੍ਤਾ ਧਾਤੁਯੋਤਿ ਰਸਾਦਯੋ ਸਰੀਰਧਾਤੁਯੋ ਸਮਪ੍ਪਵਤ੍ਤਾ, ਨ ਵਿਸਮਾਕਾਰਸਣ੍ਠਿਤਾ ਅਹੇਸੁਂ. ਤੇਨਾਹ ‘‘ਕਲ੍ਲਸਰੀਰਂ ਬਲਪ੍ਪਤ੍ਤ’’ਨ੍ਤਿ. ‘‘ਅਤੀਤਾ ਸਙ੍ਖਾਰਾ’’ਤਿਆਦਿ ਵਿਪਸ੍ਸਨਾਭਿਨਿਵੇਸਵਸੇਨ ਵੁਤ੍ਤਂ. ਸਮ੍ਮਸਨਂ ਸਬ੍ਬਤ੍ਥਕਮੇਵ ਇਚ੍ਛਿਤਬ੍ਬਂ. ਚਾਰਿਭੂਮਿਨ੍ਤਿ ਗੋਚਰਟ੍ਠਾਨਂ.

ਕਾਰਕਭਾਵਨ੍ਤਿ ਭਾਵਨਾਨੁਯੁਞ੍ਜਨਭਾਵਂ. ਪਣ੍ਡੁਰੋਗਪੁਰਿਸੋਤਿ ਪਣ੍ਡੁਰੋਗੀ ਪੁਰਿਸੋ. ਅਰਿਟ੍ਠਨ੍ਤਿ ਸੁਤ੍ਤਂ. ਭੇਸਜ੍ਜਂ ਕਤ੍ਵਾਤਿ ਭੇਸਜ੍ਜਪਯੋਗਂ ਕਤ੍ਵਾ. ਕਰਿਸ੍ਸਾਮੀਤਿ ਭੇਸਜ੍ਜਂ ਕਰਿਸ੍ਸਾਮਿ. ਝਾਮਥੁਣੋ ਵਿਯਾਤਿ ਦਡ੍ਢਥੁਣੋ ਵਿਯ ਖਾਰਕਜਾਲਨਦ੍ਧਤ੍ਤਾ ਤਰੁਣਮਕੁਲਸਨ੍ਤਾਨਸਞ੍ਛਨ੍ਨਤ੍ਤਾ.

ਦਕ੍ਖਿਣਦ੍ਵਾਰਗਾਮੇਤਿ ਦਕ੍ਖਿਣਦ੍ਵਾਰਸਮੀਪੇ ਗਾਮੇ. ਲੋਹਿਤਕੋਤਿ ਲੋਹਿਤਵਣ੍ਣੋ. ਓਚਿਰਕਜਾਤੋਤਿ ਜਾਤਓਲਮ੍ਬਮਾਨਚਿਰਕੋ ਵਿਯ. ਆਦਿਨ੍ਨਸਿਪਾਟਿਕੋਤਿ ਗਹਿਤਫਲਪੋਤਕੋ. ਸਨ੍ਦਚ੍ਛਾਯੋਤਿ ਬਹਲਚ੍ਛਾਯੋ. ਯਸ੍ਮਾ ਤਸ੍ਸ ਰੁਕ੍ਖਸ੍ਸ ਸਾਖਾ ਅਵਿਰਲ਼ਾ ਘਨਪ੍ਪਤ੍ਤਾ ਅਞ੍ਞਮਞ੍ਞਂ ਸਂਸਨ੍ਦਿਤ੍ਵਾ ਠਿਤਾ, ਤਸ੍ਮਾ ਛਾਯਾਪਿਸ੍ਸ ਤਾਦਿਸੀਤਿ ਵੁਤ੍ਤਂ ‘‘ਸਨ੍ਦਚ੍ਛਾਯੋ ਨਾਮ ਸਂਸਨ੍ਦਿਤ੍ਵਾ ਠਿਤਚ੍ਛਾਯੋ’’ਤਿ, ਘਨਚ੍ਛਾਯੋਤਿ ਅਤ੍ਥੋ. ਤਤ੍ਥਾਤਿਆਦਿ ਉਪਮਾਸਂਸਨ੍ਦਨਂ.

ਯੇਨ ਯੇਨਾਕਾਰੇਨ ਅਧਿਮੁਤ੍ਤਾਨਨ੍ਤਿ ਛਫਸ੍ਸਾਯਤਨਾਦਿਮੁਖੇਨ ਯੇਨ ਯੇਨ ਵਿਪਸ੍ਸਨਾਭਿਨਿਵੇਸੇਨ ਵਿਪਸ੍ਸਨ੍ਤਾਨਂ ਨਿਬ੍ਬਾਨਞ੍ਚ ਅਧਿਮੁਤ੍ਤਾਨਂ. ਸੁਟ੍ਠੁ ਵਿਸੁਦ੍ਧਂ ਪਰਿਞ੍ਞਾਤਿਸਮਯਾਦਿਸਿਦ੍ਧਿਯਾ. ਤੇਨ ਤੇਨੇਵਾਕਾਰੇਨਾਤਿ ਅਤ੍ਤਨਾਧਿਮੁਤ੍ਤਾਕਾਰੇਨ. ਇਦਾਨਿ ਤਂ ਤਂ ਆਕਾਰਂ ਉਪਮਾਯ ਸਦ੍ਧਿਂ ਯੋਜੇਤ੍ਵਾ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਆਰਦ੍ਧਂ. ਤਂ ਸੁਵਿਞ੍ਞੇਯ੍ਯਮੇਵ.

ਇਦਨ੍ਤਿ ਨਗਰੋਪਮਂ. ਤਂ ਸਲ੍ਲਕ੍ਖਿਤਨ੍ਤਿ ਕਿਂਸੁਕੋਪਮਦੀਪਿਤਂ ਅਤ੍ਥਜਾਤਂ ਸਚੇ ਸਲ੍ਲਕ੍ਖਿਤਂ. ਅਸ੍ਸ ਭਿਕ੍ਖੁਨੋ. ਧਮ੍ਮਦੇਸਨਤ੍ਥਨ੍ਤਿ ਯਥਾਸਲ੍ਲਕ੍ਖਿਤਸ੍ਸ ਅਤ੍ਥਸ੍ਸ ਵਸੇਨ ਲਦ੍ਧਵਿਸੇਸਸ੍ਸ ਉਪਬ੍ਰੂਹਨਾਯ. ਤਸ੍ਸੇਵਤ੍ਥਸ੍ਸਾਤਿ ਤਸ੍ਸ ਦਸ੍ਸਨਵਿਸੁਦ੍ਧਿਸਙ੍ਖਾਤਸ੍ਸ ਅਤ੍ਥਸ੍ਸ. ਚੋਰਾਸਙ੍ਕਾ ਨ ਹੋਨ੍ਤਿ ਮਜ੍ਝਿਮਦੇਸਰਜ੍ਜਸ੍ਸ ਪਸਨ੍ਨਭਾਵਤੋ. ਤਿਪੁਰਿਸੁਬ੍ਬੇਧਾਨੀਤਿ ਉਬ੍ਬੇਧੇਨ ਤਿਪੁਰਿਸਪ੍ਪਮਾਣਾਨਿ ਨਾਨਾਭਿਤ੍ਤਿਵਿਚਿਤ੍ਤਾਨਿ ਥਮ੍ਭਾਨਂ ਉਪਰਿ ਵਿਵਿਧਮਾਲਾਕਮ੍ਮਾਦਿਵਿਚਿਤ੍ਤਧਨੁਰਾਕਾਰਲਕ੍ਖਿਤਾਨਿ ਮਨੋਰਮਾਨਿ. ਤੇਨਾਹ ‘‘ਨਗਰਸ੍ਸ ਅਲਙ੍ਕਾਰਤ੍ਥ’’ਨ੍ਤਿ. ਨਗਰਦ੍ਵਾਰਸ੍ਸ ਥਿਰਭਾਵਾਪਾਦਨਵਸੇਨ ਠਪੇਤਬ੍ਬਤ੍ਤਾ ਵੁਤ੍ਤਂ ‘‘ਚੋਰਨਿਵਾਰਣਤ੍ਥਾਨਿਪਿ ਹੋਨ੍ਤਿਯੇਵਾ’’ਤਿ. ਪਿਟ੍ਠਸਙ੍ਘਾਤਸ੍ਸਾਤਿ ਦ੍ਵਾਰਬਾਹਸ੍ਸ. ‘‘ਇਮੇ ਆਵਾਸਿਕਾ, ਇਮੇ ਆਗਨ੍ਤੁਕਾ, ਤਤ੍ਥਾਪਿ ਚ ਇਮੇਹਿ ਨਗਰਸ੍ਸ ਨਗਰਸਾਮਿਕਸ੍ਸ ਚ ਅਤ੍ਥੋ. ਇਮੇਸਂ ਵਸੇਨ ਅਨਤ੍ਥੋ ਸਿਯਾ’’ਤਿ ਜਾਨਨਞਾਣਸਙ੍ਖਾਤੇਨ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਅਞ੍ਞਾਤਨਿਵਾਰਣੇ ਪਟੁਭਾਵਸਙ੍ਖਾਤੇਨ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤੋ. ਠਾਨੁਪ੍ਪਤ੍ਤਿਕਪਞ੍ਞਾਸਙ੍ਖਾਤਾਯਾਤਿ ਤਸ੍ਮਿਂ ਤਸ੍ਮਿਂ ਅਤ੍ਥਕਿਚ੍ਚੇ ਤਙ੍ਖਣੁਪ੍ਪਜ੍ਜਨਕਪਟਿਭਾਨਸਙ੍ਖਾਤਾਯ.

ਰਞ੍ਞਾ ਆਯੁਤ੍ਤੋ ਨਿਯੋਜਿਤੋ ਰਾਜਾਯੁਤ੍ਤੋ, ਤਤ੍ਥ ਤਤ੍ਥ ਰਞ੍ਞੋ ਕਾਤਬ੍ਬਕਿਚ੍ਚੇ ਠਪਿਤਪੁਰਿਸੋ. ਕਤਿਪਾਹੇਯੇਵਾਤਿ ਕਤਿਪਯਦਿਵਸੇਯੇਵ ਅਕਿਚ੍ਚਕਰਣੇਨ ਤਸ੍ਸ ਠਾਨਂ ਵਿਬ੍ਭਮੋ ਜਾਤੋਤਿ ਕਤ੍ਵਾ ਵੁਤ੍ਤਂ – ‘‘ਸਬ੍ਬਾਨਿ ਵਿਨਿਚ੍ਛਯਟ੍ਠਾਨਾਦੀਨਿ ਹਾਰੇਤ੍ਵਾ’’ਤਿ.

ਸੀਸਮਸ੍ਸ ਛਿਨ੍ਦਾਹੀਤਿ ਸੀਸਭੂਤਂ ਉਤ੍ਤਮਙ੍ਗਟ੍ਠਾਨਿਯਂ ਤਤ੍ਥ ਤਸ੍ਸ ਰਾਜਕਿਚ੍ਚਂ ਛਿਨ੍ਦਾਤਿ ਅਤ੍ਥੋ. ਅਞ੍ਞਥਾ ਤਸ੍ਸ ਪਾਕਤਿਕੇ ਅਤ੍ਥੇ ਗਯ੍ਹਮਾਨੇ ਪਾਣਾਤਿਪਾਤੋ ਆਣਤ੍ਤੋ ਨਾਮ ਸਿਯਾ. ਨ ਹਿ ਚਕ੍ਕਵਤ੍ਤਿਰਾਜਾ ਤਾਦਿਸਂ ਆਣਾਪੇਤਿ, ਅਞ੍ਞੇਸਮ੍ਪਿ ਤਤੋ ਨਿਵਾਰਕਤ੍ਤਾ. ਅਥ ਵਾ ਛਿਨ੍ਦਾਹੀਤਿ ਮਮ ਆਣਾਯ ਅਸ੍ਸ ਸੀਸਂ ਛਿਨ੍ਦਨ੍ਤੋ ਵਿਯ ਅਤ੍ਤਾਨਂ ਦਸ੍ਸੇਹਿ, ਏਵਂ ਸੋ ਤਤ੍ਥੋਵਾਦਪਟਿਕਰਤ੍ਤਪਤ੍ਤੋ ਓਦਮੇਯ੍ਯਾਤਿ, ਤਥਾ ਚੇਵ ਉਪਰਿ ਪਟਿਪਤ੍ਤਿ ਆਗਤਾ. ਤਤ੍ਥਾਤਿ ਏਤਸ੍ਮਿਂ ਪਚ੍ਚਨ੍ਤਿਮਨਗਰੇ.

ਉਪ੍ਪਨ੍ਨੇਨਾਤਿ ਸਮਥਕਮ੍ਮਟ੍ਠਾਨੇ ਉਪ੍ਪਨ੍ਨੇਨ.

ਤਸ੍ਸੇਵਾਤਿ ਸਕ੍ਕਾਯਸਙ੍ਖਾਤਸ੍ਸ ਨਗਰਸ੍ਸ ‘‘ਦ੍ਵਾਰਾਨੀ’’ਤਿ ਵੁਤ੍ਤਾਨੀਤਿ ਆਨੇਤ੍ਵਾ ਸਮ੍ਬਨ੍ਧੋ. ‘‘ਸੀਘਂ ਦੂਤਯੁਗ’’ਨ੍ਤਿ ਵੁਤ੍ਤਾਤਿ ਯੋਜਨਾ. ਹਦਯਵਤ੍ਥੁਰੂਪਸ੍ਸ ਮਜ੍ਝੇ ਸਿਙ੍ਘਾਟਕਭਾਵੇਨ ਗਹਿਤਤ੍ਤਾ ‘‘ਹਦਯਵਤ੍ਥੁਸ੍ਸ ਨਿਸ੍ਸਯਭੂਤਾਨਂ ਮਹਾਭੂਤਾਨ’’ਨ੍ਤਿ ਵੁਤ੍ਤਂ. ਯਦਿ ਏਵਂ ਵਤ੍ਥੁਰੂਪਮੇਵ ਗਹੇਤਬ੍ਬਂ, ਤਦੇਵੇਤ੍ਥ ਅਗ੍ਗਹੇਤ੍ਵਾ ਕਸ੍ਮਾ ਮਹਾਭੂਤਗ੍ਗਹਣਨ੍ਤਿ ਆਹ ‘‘ਵਤ੍ਥੁਰੂਪਸ੍ਸ ਹੀ’’ਤਿਆਦਿ. ਯਾਦਿਸੋਤਿ ਸਮ੍ਮਾਦਿਟ੍ਠਿਆਦੀਨਂ ਵਸੇਨ ਯਾਦਿਸੋ ਏਵ ਪੁਬ੍ਬੇ ਆਗਤਵਿਪਸ੍ਸਨਾਮਗ੍ਗੋ. ‘‘ਅਯਮ੍ਪਿ ਅਟ੍ਠਙ੍ਗਸਮਨ੍ਨਾਗਤਤ੍ਤਾ ਤਾਦਿਸੋ ਏਵਾ’’ਤਿ ਵਤ੍ਵਾ ਅਰਿਯਮਗ੍ਗੋ ‘‘ਯਥਾਗਤਮਗ੍ਗੋ’’ਤਿ ਵੁਤ੍ਤੋ. ਇਦਂ ਤਾਵੇਤ੍ਥਾਤਿ ਏਤ੍ਥ ਏਤਸ੍ਮਿਂ ਸੁਤ੍ਤੇ ਧਮ੍ਮਦੇਸਨਤ੍ਥਂ ਆਭਤਾਯ ਯਥਾਵੁਤ੍ਤਉਪਮਾਯ ਇਦਂ ਸਂਸਨ੍ਦਨਂ.

ਇਦਂ ਸਂਸਨ੍ਦਨਨ੍ਤਿ ਇਦਾਨਿ ਵਕ੍ਖਮਾਨਂ ਉਪਮਾਯ ਸਂਸਨ੍ਦਨਂ. ਨਗਰਸਾਮਿਉਪਮਾ ਪਞ੍ਚਕ੍ਖਨ੍ਧਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਂ ਖੀਣਾਸਵਂ ਦਸ੍ਸੇਤੁਂ ਆਭਤਾ. ਸਿਙ੍ਘਾਟਕੂਪਮਾ ਚਤੁਮਹਾਭੂਤਵਸੇਨ ਦਸ੍ਸਨਵਿਸੁਦ੍ਧਿਪਤ੍ਤਂ ਖੀਣਾਸਵਂ ਦਸ੍ਸੇਤੁਂ ਆਭਤਾਤਿ ਯੋਜਨਾ. ‘‘ਚਤੁਸਚ੍ਚਮੇਵ ਕਥਿਤ’’ਨ੍ਤਿ ਵਤ੍ਵਾ ਤਾਨਿ ਸਚ੍ਚਾਨਿ ਨਿਦ੍ਧਾਰੇਤ੍ਵਾ ਦਸ੍ਸੇਤੁਂ ‘‘ਸਕਲੇਨਪਿ ਹੀ’’ਤਿਆਦਿ ਵੁਤ੍ਤਂ. ਇਧ ਨਗਰਸਮ੍ਭਾਰੋ ਛਦ੍ਵਾਰਾਦਯੋ. ਤੇਨ ਹਿ ਛਫਸ੍ਸਾਯਤਨਾਦਯੋ ਉਪਮਿਤਾ. ਤੇ ਪਨ ਦੁਕ੍ਖਸਚ੍ਚਪਰਿਯਾਪਨ੍ਨਾਤਿ ਵੁਤ੍ਤਂ ‘‘ਨਗਰਸਮ੍ਭਾਰੇਨ ਦੁਕ੍ਖਸਚ੍ਚਮੇਵ ਕਥਿਤ’’ਨ੍ਤਿ.

ਕਿਂਸੁਕੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਵੀਣੋਪਮਸੁਤ੍ਤਵਣ੍ਣਨਾ

੨੪੬. ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾਤਿ ਕਾਮਂ ਪਾਲ਼ਿਯਂ ਪਰਿਸਾਦ੍ਵਯਮੇਵ ਗਹਿਤਂ, ਸੇਸਪਰਿਸਾਨਂ ਪਨ ਤਦਞ੍ਞੇਸਮ੍ਪਿ ਦੇਵਮਨੁਸ੍ਸਾਨਨ੍ਤਿ ਸਬ੍ਬਸਾਧਾਰਣੋਵਾਯਂ ਧਮ੍ਮਸਙ੍ਗਹੋਤਿ ਇਮਮਤ੍ਥਂ ਉਪਮਾਪੁਬ੍ਬਕਂ ਕਤ੍ਵਾ ਦਸ੍ਸੇਤੁਂ ‘‘ਯਥਾ ਨਾਮਾ’’ਤਿਆਦਿ ਆਰਦ੍ਧਂ. ਯਜਨ੍ਤੋਤਿ ਦਦਨ੍ਤੋ. ਵਿਨ੍ਦਿਤਬ੍ਬੋਤਿ ਲਦ੍ਧਬ੍ਬੋ, ਅਧਿਗਨ੍ਤਬ੍ਬੋਤਿ ਅਤ੍ਥੋ.

ਛਨ੍ਦੋਤਿ ਤਣ੍ਹਾਛਨ੍ਦੋ. ਤੇਨਾਹ – ‘‘ਦੁਬ੍ਬਲਤਣ੍ਹਾ ਸੋ ਰਞ੍ਜੇਤੁਂ ਨ ਸਕ੍ਕੋਤੀ’’ਤਿ. ਪੁਬ੍ਬੁਪ੍ਪਤ੍ਤਿਕਾ ਏਕਸ੍ਮਿਂ ਆਰਮ੍ਮਣੇ ਪਠਮਂ ਉਪ੍ਪਨ੍ਨਾ. ਸਾ ਹਿ ਅਨਾਸੇਵਨਤ੍ਤਾ ਮਨ੍ਦਾ. ਸੋਤਿ ਛਨ੍ਦੋ. ਰਞ੍ਜੇਤੁਂ ਨ ਸਕ੍ਕੋਤਿ ਲਦ੍ਧਾਸੇਵਨਤ੍ਤਾ. ਦੋਸੋ ਨਾਮ ਚਿਤ੍ਤਦੂਸਨਤ੍ਤਾ. ਤਾਨੀਤਿ ਦਣ੍ਡਾਦਾਨਾਦੀਨਿ. ਤਮ੍ਮੂਲਕਾਤਿ ਲੋਭਮੂਲਕਾ ਤਾਵ ਮਾਯਾਸਾਠੇਯ੍ਯਮਾਨਾਤਿਮਾਨਦਿਟ੍ਠਿਚਾਪਲਾਦਯੋ, ਦੋਸਮੂਲਕਾ ਉਪਨਾਹਮਕ੍ਖਪਲਾਸਇਸ੍ਸਾਮਚ੍ਛਰਿਯਥਮ੍ਭਸਾਰਮ੍ਭਾਦਯੋ, ਮੋਹਮੂਲਕਾ ਅਹਿਰਿਕ-ਅਨੋਤ੍ਤਪ੍ਪ-ਥਿਨਮਿਦ੍ਧਵਿਚਿਕਿਚ੍ਛੁਦ੍ਧਚ੍ਚ-ਵਿਪਰੀਤਮਨਸਿਕਾਰਾਦਯੋ, ਸਂਕਿਲੇਸਧਮ੍ਮਾ ਗਹਿਤਾਵ ਹੋਨ੍ਤਿ ਤਂਮੂਲਕਤ੍ਤਾ. ਯਸ੍ਮਾ ਪਨ ਸਬ੍ਬੇਪਿ ਸਂਕਿਲੇਸਧਮ੍ਮਾ ਦ੍ਵਾਦਸਾਕੁਸਲਚਿਤ੍ਤੁਪ੍ਪਾਦਪਰਿਯਾਪਨ੍ਨਾ ਏਵ, ਤਸ੍ਮਾ ਤੇਸਮ੍ਪੇਤ੍ਥ ਗਹਿਤਭਾਵਂ ਦਸ੍ਸੇਤੁਂ ‘‘ਛਨ੍ਦੋ ਰਾਗੋਤਿ ਵਾ’’ਤਿ ਵੁਤ੍ਤਂ.

ਭਾਯਿਤਬ੍ਬਟ੍ਠੇਨ ਸਭਯੋ. ਭੇਰਵਟ੍ਠੇਨ ਸਪ੍ਪਟਿਭਯੋ. ਕੁਸਲਪਕ੍ਖਸ੍ਸ ਵਿਕ੍ਖਮ੍ਭਨਟ੍ਠੇਨ ਸਕਣ੍ਟਕੋ. ਕੁਸਲਅਨਵਜ੍ਜਧਮ੍ਮੇਹਿ ਦੁਰਵਗਾਹਟ੍ਠੇਨ ਸਗਹਨੋ. ਭਵਸਮ੍ਪਤ੍ਤਿਭਵਨਿਬ੍ਬਾਨਾਨਂ ਅਪ੍ਪਦਾਨਭਾਵਤੋ ਉਮ੍ਮਗ੍ਗੋ. ਦੁਗ੍ਗਤਿਗਾਮਿਮਗ੍ਗਤ੍ਤਾ ਕੁਮ੍ਮਗ੍ਗੋ. ਇਰਿਯਨਾਤਿ ਵਤ੍ਤਨਾ ਪਟਿਪਜ੍ਜਨਾ. ਦੁਗ੍ਗਤਿਗਾਮਿਤਾਯ ਕਿਲੇਸੋ ਏਵ ਕਿਲੇਸਮਗ੍ਗੋ. ਨ ਸਕ੍ਕਾ ਸਮ੍ਪਤ੍ਤਿਭਵਂ ਗਨ੍ਤੁਂ ਕੁਤੋ ਨਿਬ੍ਬਾਨਗਮਨਨ੍ਤਿ ਅਧਿਪ੍ਪਾਯੋ.

ਅਸੁਭਾਵਜ੍ਜਨਾਦੀਹੀਤਿ ਆਦਿ-ਸਦ੍ਦੇਨ ਅਨਿਚ੍ਚਮਨਸਿਕਾਰਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਚਿਤ੍ਤਂ ਨਿਵਤ੍ਤਤਿ ਸਰਾਗਚਿਤ੍ਤਂ ਨ ਉਪ੍ਪਜ੍ਜਤਿ ਪਟਿਪਕ੍ਖਮਨਸਿਕਾਰੇਨ ਵਿਨੋਦਿਤਤ੍ਤਾ. ਮਜ੍ਝਤ੍ਤਾਰਮ੍ਮਣੇਤਿ ਅਞ੍ਞਾਣੁਪੇਕ੍ਖਟ੍ਠਾਨਿਯੇ ਆਰਮ੍ਮਣੇ. ਉਦ੍ਦੇਸ…ਪੇ… ਆਵਜ੍ਜਨ੍ਤਸ੍ਸਾਤਿ ਉਦ੍ਦਿਸਾਪਨਵਸੇਨ ਉਦ੍ਦੇਸਂ, ਪਰਿਪੁਚ੍ਛਾਪਨਵਸੇਨ ਪਰਿਪੁਚ੍ਛਂ, ਗਰੂਨਂ ਸਨ੍ਤਿਕੇ ਵਸਨਵਸੇਨ ਗਰੁਵਾਸਂ ਆਵਜ੍ਜਨ੍ਤਸ੍ਸ. ਚਿਤ੍ਤਨ੍ਤਿ ਗਮ੍ਭੀਰਞਾਣਚਰਿਯ-ਪਚ੍ਚਵੇਕ੍ਖਣ-ਪਞ੍ਞਵਨ੍ਤ-ਪੁਗ੍ਗਲਸੇਵਨਵਸੇਨ ਤਦਧਿਮੁਤ੍ਤਿਸਿਦ੍ਧਿਯਾ ਅਞ੍ਞਾਣਚਿਤ੍ਤਂ ਨਿਵਤ੍ਤਤਿ.

ਯਥਾ ‘‘ਪੁਜ੍ਜਭਵਫਲਂ ਪੁਞ੍ਞ’’ਨ੍ਤਿ ਵੁਤ੍ਤਂ ‘‘ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿ (ਦੀ. ਨਿ. ੩.੮੦), ਏਵਂ ਕਿਟ੍ਠਸਮ੍ਭਵਤ੍ਤਾ ‘‘ਕਿਟ੍ਠ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਕਿਟ੍ਠਨ੍ਤਿ ਕਿਟ੍ਠਟ੍ਠਾਨੇ ਉਪ੍ਪਨ੍ਨਸਸ੍ਸ’’ਨ੍ਤਿ.

ਘਟਾਤਿ ਸਿਙ੍ਗਯੁਗਂ ਇਧਾਧਿਪ੍ਪੇਤਨ੍ਤਿ ਆਹ ‘‘ਦ੍ਵਿਨ੍ਨਂ ਸਿਙ੍ਗਾਨਂ ਅਨ੍ਤਰੇ’’ਤਿ. ਘਟਾਤਿ ਗੋਣਾਦੀਨਂ ਸਿਙ੍ਗਨ੍ਤਰਟ੍ਠਸ੍ਸ ਸਮਞ੍ਞਾਤਿ ਵਦਨ੍ਤਿ. ਨਾਸਾਰਜ੍ਜੁਕੇਤਿ ਨਾਸਾਰਜ੍ਜੁਪਾਤਟ੍ਠਾਨੇ.

ਦਮੇਤਿ ਪੁਥੁਤ੍ਤਾਰਮ੍ਮਣਤੋ ਨਿਵਾਰੇਤਿ. ਨਨ੍ਤਿ ਚਿਤ੍ਤਂ. ਯਂ ਸੁਤ੍ਤਂ ਸੁਭਾਸਿਤਂ ਮਯਾ. ਤਦਸ੍ਸਾਤਿ ਤਦਾ ਅਸ੍ਸ ਭਿਕ੍ਖੁਨੋ. ਆਰਮ੍ਮਣੇਤਿ ਕਮ੍ਮਟ੍ਠਾਨਾਰਮ੍ਮਣੇ.

ਸੁਦੁਜਿਤਨ੍ਤਿ ਨਿਬ੍ਬਿਸੇਵਨਭਾਵਕਰਣੇਨ ਜਿਤਂ. ਸੁਤਜ੍ਜਿਤਨ੍ਤਿ ਸੁਟ੍ਠੁ ਦੂਰਕਰਣੇਨ ਜਿਤਂ, ਤਥਾਭੂਤਞ੍ਚ ਤਜ੍ਜਿਤਂ ਨਾਮ ਹੋਤੀਤਿ ਤਥਾ ਵੁਤ੍ਤਂ. ਗੋਚਰਜ੍ਝਤ੍ਤਨ੍ਤਿ ਅਜ੍ਝਤ੍ਤਭੂਤੋ ਗੋਚਰੋ. ਕਮ੍ਮਟ੍ਠਾਨਾਰਮ੍ਮਣਞ੍ਹਿ ਬਹਿਦ੍ਧਾਰੂਪਾਦਿਆਰਮ੍ਮਣਵਿਧੁਰਤਾਯ ਅਜ੍ਝਤ੍ਤਨ੍ਤਿ ਵੁਚ੍ਚਤਿ. ਸਮਥੋ ਅਨੁਰਕ੍ਖਣਂ ਏਤਸ੍ਸਾਤਿ ਸਮਥਾਨੁਰਕ੍ਖਣਂ. ਯਥਾ ਇਨ੍ਦ੍ਰਿਯਸਂਵਰਸੀਲਂ ਸਮਥਾਨੁਰਕ੍ਖਣਂ ਹੋਤਿ, ਤਥਾ ਕਥਿਤਨ੍ਤਿ ਅਤ੍ਥੋ. ਯਥਾ ਹਿ ਇਨ੍ਦ੍ਰਿਯਸਂਵਰਸੀਲਂ ਸਮਥਸ੍ਸ ਪਚ੍ਚਯੋ, ਏਵਂ ਸਮਥੋਪਿ ਤਸ੍ਸ ਪਚ੍ਚਯੋਤਿ.

ਵਾਦਿਯਮਾਨਾਯ ਵੀਣਾਯ. ਚਿਤ੍ਤਂ ਰਞ੍ਜੇਤੀਤਿ ਰਜ੍ਜਨੇਨ. ਅਵਿਸ੍ਸਜ੍ਜਨੀਯਤਾਯ ਚਿਤ੍ਤਂ ਬਨ੍ਧਤੀਤਿ ਬਨ੍ਧਨੀਯੋ. ਵੇਟ੍ਠਕੇਤਿ ਤਨ੍ਤੀਨਂ ਆਸਜ੍ਜਨਵੇਟ੍ਠਕੇ. ਕੋਣਨ੍ਤਿ ਕਵਣਤੋ ਵੀਣਾਯ ਸਦ੍ਦਕਰਣਤੋ ਕੋਣਨ੍ਤਿ ਲਦ੍ਧਨਾਮਂ ਦਾਰੁਦਣ੍ਡਂ ਸਿਙ੍ਗਾਦੀਸੁ ਯੇਨ ਕੇਨਚਿ ਕਤਂ ਘਟਿਕਂ. ਤੇਨਾਹ ‘‘ਚਤੁਰਸ੍ਸਂ ਸਾਰਦਣ੍ਡਕ’’ਨ੍ਤਿ.

ਯਸ੍ਮਾ ਸੋ ਰਾਜਾ ਰਾਜਮਹਾਮਤ੍ਤੋ ਵਾ ਸਦ੍ਦਂ ਯਥਾਸਭਾਵਤੋ ਨ ਅਞ੍ਞਾਸਿ, ਤਸ੍ਮਿਂ ਤਸ੍ਸ ਅਜਾਨਨਾਕਾਰਮੇਵ ਦਸ੍ਸੇਤੁਂ ‘‘ਸਦ੍ਦਂ ਪਸ੍ਸਿਸ੍ਸਾਮੀ’’ਤਿਆਦਿ ਵੁਤ੍ਤਂ.

ਅਸਤੀ ਕਿਰਾਯਨ੍ਤਿ ਪਾਲ਼ਿਯਂ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਨ੍ਤਿ ਯਥਾਲਿਙ੍ਗਮੇਵ ਵਦਨ੍ਤੋ ‘‘ਅਸਾ’’ਤਿ ਆਹ. ‘‘ਅਸਤੀਤਿ ਲਾਮਕਾਧਿਵਚਨ’’ਨ੍ਤਿ ਵਤ੍ਵਾ ਤਤ੍ਥ ਪਯੋਗਂ ਦਸ੍ਸੇਤੁਂ ‘‘ਅਸਾ ਲੋਕਿਤ੍ਥਿਯੋ ਨਾਮਾ’’ਤਿ ਵੁਤ੍ਤਂ, ਲੋਕੇ ਇਤ੍ਥਿਯੋ ਨਾਮ ਅਸਤਿਯੋਤਿ ਅਤ੍ਥੋ, ਤਤ੍ਥ ਕਾਰਣਮਾਹ ‘‘ਵੇਲਾ ਤਾਸਂ ਨ ਵਿਜ੍ਜਤੀ’’ਤਿ. ਪਕਤਿਯਾ ਲੋਕੇ ਜੇਟ੍ਠਭਾਤਾ ਕਨਿਟ੍ਠਭਾਤਾ ਮਾਤੁਲੋਤਿਆਦਿਕਾ ਵੇਲਾ ਮਰਿਯਾਦਾ ਤਾਸਂ ਨ ਵਿਜ੍ਜਤਿ. ਕਸ੍ਮਾ? ਸਾਰਤ੍ਤਾ ਚ ਪਗਬ੍ਬਾ ਚ ਸਬ੍ਬੇਸਮ੍ਪਿ ਸਮ੍ਭੋਗਵਸੇਨ ਵਿਨਿਯੋਗਂ ਗਚ੍ਛਨ੍ਤਿ. ਕਥਂ? ਸਿਖੀ ਸਬ੍ਬਘਸੋ ਯਥਾ. ਤੇਨੇਵਾਹ –

‘‘ਸਬ੍ਬਾ ਨਦੀ ਵਙ੍ਕਗਤੀ, ਸਬ੍ਬੇ ਕਟ੍ਠਮਯਾ ਵਨਾ;

ਸਬ੍ਬਿਤ੍ਥਿਯੋ ਕਰੇ ਪਾਪਂ, ਲਭਮਾਨੇ ਨਿਵਾਤਕੇ’’ਤਿ. (ਜਾ. ੨.੨੧.੩੦੮);

ਅਞ੍ਞਮ੍ਪਿ ਤਨ੍ਤਿਬਦ੍ਧਂ ਚਤੁਰਸ੍ਸਅਮ੍ਬਣਵਾਦਿਤਾਦੀਨਿ. ਵੀਣਾ ਵਿਯ ਪਞ੍ਚਕ੍ਖਨ੍ਧਾ ਅਨੇਕਧਮ੍ਮਸਮੂਹਭਾਵਤੋ. ਰਾਜਾ ਵਿਯ ਯੋਗਾਵਚਰੋ ਤਪ੍ਪਟਿਬਦ੍ਧਧਮ੍ਮਗਵੇਸਕਤ੍ਤਾ. ਅਸ੍ਸਾਤਿ ਯੋਗਾਵਚਰਸ੍ਸ.

ਨਿਰਯਾਦਿਤੋ ਅਞ੍ਞਸ੍ਮਿਮ੍ਪਿ ਗਤਿ-ਸਦ੍ਦੋ ਵਤ੍ਤਤਿ. ਤਤੋ ਵਿਸੇਸਨਤ੍ਥਂ ‘‘ਗਤਿਗਤੀ’’ਤਿ ਵੁਤ੍ਤਂ ‘‘ਦੁਕ੍ਖਦੁਕ੍ਖਂ, ਰੂਪਰੂਪ’’ਨ੍ਤਿ ਚ ਯਥਾ, ਗਤਿਸਞ੍ਞਿਤਂ ਪਵਤ੍ਤਿਟ੍ਠਾਨਨ੍ਤਿ ਅਤ੍ਥੋ. ਤੇਨਾਹ – ‘‘ਏਤ੍ਥਨ੍ਤਰੇ ਸਂਸਰਤਿ ਵਤ੍ਤਤੀ’’ਤਿ. ਸਞ੍ਜਾਯਨਪਦੇਸੋ ਏਵ ਗਤੀਤਿ ਸਞ੍ਜਾਤਿਗਤਿ.

ਤਂ ਪਨ ਗਤਿਂ ਸਤ੍ਤਾਨਂ ਸਂਵੇਗਵਤ੍ਥੁਭੂਤਸ੍ਸ ਪਚ੍ਚਕ੍ਖਸ੍ਸ ਗਬ੍ਭਾਸਯਸ੍ਸ ਵਸੇਨ ਦਸ੍ਸੇਤੁਂ ‘‘ਅਯਮਸ੍ਸ ਕਾਯੋ’’ਤਿਆਦਿ ਵੁਤ੍ਤਂ. ਰੂਪਧਮ੍ਮਸ੍ਸ ਸਲਕ੍ਖਣਂ ਗਤਿ ਨਿਟ੍ਠਾ, ਤਤੋ ਪਰਂ ਅਞ੍ਞਂ ਕਿਞ੍ਚਿ ਨਤ੍ਥੀਤਿ ਸਲਕ੍ਖਣਗਤਿ. ਅਭਾਵੋ ਅਚ੍ਚਨ੍ਤਾਭਾਵੋ. ਸਨ੍ਤਾਨਵਿਚ੍ਛੇਦੋ ਵਿਭਵਗਤਿ ਤਂਨਿਟ੍ਠਾਨਭਾਵਾ. ਭੇਦੋਤਿ ਖਣਨਿਰੋਧੋ, ਇਧਾਪਿ ਤਂਨਿਟ੍ਠਾਨਤਾਯੇਵ ਪਰਿਯਾਯੋ. ਯਾਵ ਭਵਗ੍ਗਾਤਿ ਯਾਵ ਸਬ੍ਬਭਵਗ੍ਗਾ. ਸਲਕ੍ਖਣਵਿਭਵਗਤਿਭੇਦਗਤਿਯੋ ‘‘ਏਸੇਵ ਨਯੋ’’ਤਿ ਇਮਿਨਾਵ ਪਕਾਸਿਤਾਤਿ ਨ ਗਹਿਤਾ. ਤਸ੍ਸ ਖੀਣਾਸਵਸ੍ਸ ਨ ਹੋਤਿ ਅਗ੍ਗਮਗ੍ਗੇਨ ਸਮੁਚ੍ਛਿਨ੍ਨਤ੍ਤਾ.

ਸੀਲਂ ਕਥਿਤਂ ਰੂਪਾਦੀਸੁ ਛਨ੍ਦਾਦਿਨਿਵਾਰਣਸ੍ਸ ਕਥਿਤਤ੍ਤਾ. ਮਜ੍ਝੇ ਸਮਾਧਿਭਾਵਨਾ ਕਥਿਤਾ ‘‘ਅਜ੍ਝਤ੍ਤਮੇਵ ਸਨ੍ਤਿਟ੍ਠਤਿ…ਪੇ… ਸਮਾਧਿਯਤੀ’’ਤਿ ਜੋਤਿਤਤ੍ਤਾ. ਪਰਿਯੋਸਾਨੇ ਚ ਨਿਬ੍ਬਾਨਂ ਕਥਿਤਂ ‘‘ਯਮ੍ਪਿਸ੍ਸ…ਪੇ… ਨ ਹੋਤੀ’’ਤਿ ਵਚਨਤੋ.

ਵੀਣੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਛਪ੍ਪਾਣਕੋਪਮਸੁਤ੍ਤਵਣ੍ਣਨਾ

੨੪੭. ਵਣਸਰੀਰੋਤਿ ਵਣਿਤਸਰੀਰੋ. ਪਕ੍ਕਤ੍ਤਾਤਿ ਕੁਥਿਤਤ੍ਤਾ. ਸਰਦਣ੍ਡੇਸੁ ਸਰਸਮਞ੍ਞਾਤਿ ਕਣ੍ਡ-ਸਦ੍ਦੋ ਸਰਪਰਿਯਾਯੋਤਿ ਆਹ – ‘‘ਸਰਵਨਨ੍ਤਿ ਕਣ੍ਡਵਨ’’ਨ੍ਤਿ. ਅਰੁਗਤ੍ਤੋ…ਪੇ… ਵੇਦਿਤਬ੍ਬੋ ਗੁਣਸਰੀਰਸ੍ਸ ਖਣ੍ਡਛਿਦ੍ਦਸੀਲਾਦੀਹਿ ਹੇਟ੍ਠਾ ਮਜ੍ਝੇ ਉਪਰਿਭਾਗੇ ਚ ਭੇਦਵਿਸਮਚ੍ਛਿਨ੍ਨਵਿਕਾਰਦੋਸਤ੍ਤਾ. ਏਤ੍ਥ ਕੁਸਾ ‘‘ਕਣ੍ਟਕਾ’’ਤਿ ਅਧਿਪ੍ਪੇਤਾ ਕਣ੍ਟਕਸਦਿਸਤ੍ਤਾ, ਕੁਸਤਿਣਾਨਂ ਏਵ ਵਾ ਵੁਤ੍ਤਾਕਾਰਪਦੇਸੋ ‘‘ਕੁਸਕਣ੍ਟਕੋ’’ਤਿ ਵੁਤ੍ਤੋ.

ਗਾਮਵਾਸੀਨਂ ਵਿਜ੍ਝਨਟ੍ਠੇਨਾਤਿ ਨਾਰਹੋਵ ਹੁਤ੍ਵਾ ਤੇਸਂ ਕਾਰਾਨਂ ਪਟਿਗ੍ਗਹਣਵਸੇਨ ਪੀਲ਼ਨਟ੍ਠੇਨ.

ਪਕ੍ਖਿਨ੍ਤਿ ਹਤ੍ਥਿਲਿਙ੍ਗਸਕੁਣਂ. ਤਸ੍ਸ ਕਿਰ ਹਤ੍ਥਿਸੋਣ੍ਡਸਦਿਸਂ ਮੁਖਂ, ਤਸ੍ਮਾ ‘‘ਹਤ੍ਥਿਸੋਣ੍ਡਸਕੁਣ’’ਨ੍ਤਿ ਵੁਤ੍ਤਂ. ਵਿਸ੍ਸਜ੍ਜੇਯ੍ਯਾਤਿ ਰਜ੍ਜੁਯਾ ਯਥਾਬਦ੍ਧਂ ਏਵ ਵਿਸ੍ਸਜ੍ਜੇਯ੍ਯ.

ਭੋਗੇਹੀਤਿ ਅਤ੍ਤਨੋ ਸਰੀਰਭੋਗੇਹਿ. ਮਣ੍ਡਲਂ ਬਨ੍ਧਿਤ੍ਵਾਤਿ ਯਥਾ ਸਰੀਰਂ ਮਣ੍ਡਲਾਕਾਰੇਨ ਤਿਟ੍ਠਤਿ, ਏਵਂ ਕਤ੍ਵਾ. ਸੁਪਿਸ੍ਸਾਮੀਤਿ ਨਿਦ੍ਦਂ ਓਕ੍ਕਮਿਸ੍ਸਾਮਿ. ਡੇਤੁਕਾਮੋਤਿ ਉਪ੍ਪਤਿਤੁਕਾਮੋ. ਦਿਸਾ ਦਿਸਨ੍ਤਿ ਦਿਸਤੋ ਦਿਸਂ.

ਛ ਪਾਣਕਾ ਵਿਯ ਛ ਆਯਤਨਾਨਿ ਨਾਨਜ੍ਝਾਸਯਤ੍ਤਾ, ਨਾਨਜ੍ਝਾਸਯਤਾ ਚ ਨੇਸਂ ਨਾਨਾਵਿਸਯਨਿਨ੍ਨਤਾਯ ਦਟ੍ਠਬ੍ਬਾ. ਦਲ਼੍ਹਰਜ੍ਜੁ ਵਿਯ ਤਣ੍ਹਾ ਤੇਸਂ ਬਨ੍ਧਨਤੋ. ਮਜ੍ਝੇ ਗਣ੍ਠਿ ਵਿਯ ਅਵਿਜ੍ਜਾ ਬਨ੍ਧਨਸ੍ਸ ਦੁਬ੍ਬਿਨਿਮ੍ਮੋਚਨਹੇਤੁਤੋ. ਆਰਮ੍ਮਣਂ ਬਲਵਂ ਹੋਤਿ ਮਨੁਞ੍ਞਭਾਵੇਨ ਚੇਵ ਤਤ੍ਥ ਤਣ੍ਹਾਭਿਨਿਵੇਸਸ੍ਸ ਦਲ਼੍ਹਭਾਵੇਨ ਚ.

ਸਰਿਕ੍ਖਕੇਨ ਵਾ ਉਪਮਾਯ ਆਹਰਣਪਕ੍ਖੇ. ਅਪ੍ਪਨਾਤਿ ਸਂਸਨ੍ਦਨਾ. ਪਾਲ਼ਿਯਂਯੇਵ ਅਪ੍ਪਿਤਾ ਉਪਮਾ ‘‘ਏਵਮੇਵ ਖੋ’’ਤਿਆਦਿਨਾ. ਰੂਪਚਿਤ੍ਤਾਦਿਵਿਸਮਨਿਨ੍ਨਤ੍ਤਾ ਚਕ੍ਖੁਸ੍ਸ ਵਿਸਮਜ੍ਝਾਸਯਤਾ. ਏਸ ਨਯੋ ਸੇਸੇਸੁਪਿ.

ਕਣ੍ਣਚ੍ਛਿਦ੍ਦਕੂਪਕੇਤਿ ਕਣ੍ਣਚ੍ਛਿਦ੍ਦਸਞ੍ਞਿਤੇ ਆਵਾਟੇ. ਤਸ੍ਸਾਤਿ ਸੋਤਸ੍ਸ. ਪਚ੍ਚਯੋ ਹੋਤੀਤਿ ਉਪਨਿਸ੍ਸਯੋ ਹੋਤਿ ਤੇਨ ਵਿਨਾ ਸਦ੍ਦਗ੍ਗਹਣਸ੍ਸ ਅਭਾਵਤੋ. ‘‘ਅਜਟਾਕਾਸੋਪਿ ਵਟ੍ਟਤਿ ਏਵਾ’’ਤਿ ਵਤ੍ਵਾ ਤਸ੍ਸ ਪਚ੍ਚਯਭਾਵਂ ਦਸ੍ਸੇਤੁਂ ‘‘ਅਨ੍ਤੋਲੇਣਸ੍ਮਿ’’ਨ੍ਤਿਆਦਿ ਵੁਤ੍ਤਂ. ਧਾਤੁਪਰਮ੍ਪਰਾ ਘਟ੍ਟੇਨ੍ਤੋਤਿ ਭੂਤਪਰਮ੍ਪਰਾਸਙ੍ਘਟ੍ਟੇਨ੍ਤੋ.

ਏਵਂ ਸਨ੍ਤੇਤਿ ਏਵਂ ਭੂਤਪਰਮ੍ਪਰਾਵਸੇਨ ਸਦ੍ਦੇ ਸੋਤਪਥਮਾਗਚ੍ਛਨ੍ਤੇ. ਸਮ੍ਪਤ੍ਤਗੋਚਰਤਾ ਹੋਤਿ ਸੋਤਸ੍ਸ. ਘਾਨਾਦੀਨਂ ਵਿਯ ‘‘ਦੂਰੇ ਸਦ੍ਦੋ’’ਤਿ ਜਾਨਨਂ ਨ ਸਮ੍ਭਵੇਯ੍ਯ ਸਮ੍ਪਤ੍ਤਗਾਹਿਭਾਵਤੋ. ਤਥਾ ਤਥਾ ਜਾਨਨਾਕਾਰੋ ਹੋਤਿ ਮਨੋਵਿਞ੍ਞਾਣਸ੍ਸ ਗਹਣਾਕਾਰਵਿਸੇਸਤੋ. ਸੋਤਵਿਞ੍ਞਾਣਪ੍ਪਵਤ੍ਤਿ ਪਨ ਉਭਯਤ੍ਥ ਸਮਾਨਾਵ. ਦੂਰੇ ਠਿਤੋਪਿ ਸਦ੍ਦੋ ਤਾਦਿਸੇ ਠਾਨੇ ਪਟਿਘੋਸਾਦੀਨਂ ਪਚ੍ਚਯੋ ਹੋਤਿ ਅਯੋਕਨ੍ਤੋ ਵਿਯ ਅਯੋਚਲਨਸ੍ਸਾਤਿ ਦਟ੍ਠਬ੍ਬਂ. ਧਮ੍ਮਤਾਤਿ ਧਮ੍ਮਸਭਾਵੋ, ਸਦ੍ਦਸ੍ਸ ਸੋ ਸਭਾਵੋਤਿ ਅਤ੍ਥੋ. ਤਤੋ ਤਤੋ ਸਵਨਂ ਹੋਤਿ ਆਕਾਸਸਞ੍ਞਿਤਸ੍ਸ ਉਪਨਿਸ੍ਸਯਸ੍ਸ ਲਬ੍ਭਨਤੋ. ਯਦਿ ਪਨ ਸੋਤਂ ਸਮ੍ਪਤ੍ਤਗਾਹੀ ਸਿਯਾ, ਚਿਤ੍ਤਸਮੁਟ੍ਠਾਨਸਦ੍ਦੋ ਸੋਤਵਿਞ੍ਞਾਣਸ੍ਸ ਆਰਮ੍ਮਣਪਚ੍ਚਯੋ ਨ ਸਿਯਾ. ਪਟ੍ਠਾਨੇ ਚ ਅਵਿਸੇਸੇਨ ‘‘ਸਦ੍ਦਾਯਤਨਂ ਸੋਤਵਿਞ੍ਞਾਣਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ’’ਤਿ ਵੁਤ੍ਤੋ, ਬਹਿਦ੍ਧਾ ਚ ਚਿਤ੍ਤਜਸ੍ਸ ਸਦ੍ਦਸ੍ਸ ਸਮ੍ਭਵੋ ਨਤ੍ਥਿ. ਅਥ ਵਾ ਚਿਤ੍ਤਜੋ ਸਦ੍ਦੋ ਧਾਤੁਪਰਮ੍ਪਰਾਯ ਸੋਤਪਸਾਦਂ ਘਟ੍ਟੇਤਿ, ਨ ਸੋ ਚਿਤ੍ਤਜੋ ਸਦ੍ਦੋ, ਯੋ ਪਰਮ੍ਪਰਾਯ ਪਵਤ੍ਤੋ. ਉਤੁਜੋ ਹਿ ਸੋ, ਤਸ੍ਮਾ ਯਥੁਪ੍ਪਨ੍ਨੋ ਸਦ੍ਦੋ, ਤਤ੍ਥ ਠਿਤੋਵ ਸੋਤਪਸਾਦਸ੍ਸ ਆਪਾਥਂ ਆਗਚ੍ਛਤੀਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ. ਤੇਨ ਵੁਤ੍ਤਂ ‘‘ਅਸਮ੍ਪਤ੍ਤਗੋਚਰਮੇਵੇਤ’’ਨ੍ਤਿ.

ਤਦਾ ਏਕਗ੍ਗਚਿਤ੍ਤਤਂ ਆਪਜ੍ਜਤਿ ਪਰਿਸ੍ਸਯਾਨਂ ਅਭਾਵਤੋ. ਨਾਸਚ੍ਛਿਦ੍ਦਸਙ੍ਖਾਤਆਕਾਸਸਨ੍ਨਿਸ੍ਸਯੇ ਵਤ੍ਤਨਤੋ ਘਾਨਂ ਆਕਾਸਜ੍ਝਾਸਯਂ ਵੁਤ੍ਤਂ. ਵਾਤੇਨ ਵਿਨਾ ਗਨ੍ਧਗਹਣਸ੍ਸ ਅਸਮ੍ਭਵਤੋ ਵਾਤੂਪਨਿਸ੍ਸਯਗਨ੍ਧਗੋਚਰਂ. ਤੇਨਾਹ ‘‘ਤਥਾ ਹੀ’’ਤਿਆਦਿ.

ਗਾਮਤੋ ਲਦ੍ਧਬ੍ਬਂ ਆਹਾਰਂ ਗਾਮਂ, ਤਨ੍ਨਿਨ੍ਨਤਾਯ ਗਾਮਜ੍ਝਾਸਯਤਾ ਵੁਤ੍ਤਾ. ਤਥਾ ਹਿ ਜੀਵਿਤਨਿਮਿਤ੍ਤਂ ਰਸੋ ਜੀਵਿਤਂ, ਤਸ੍ਮਿਂ ਨਿਨ੍ਨਤਾਯ ਤਂ ਅਵ੍ਹਾਯਤੀਤਿ ਜਿਵ੍ਹਾ. ਨ ਸਕ੍ਕਾ ਖੇਲ਼ੇਨ ਅਤੇਮਿਤਸ੍ਸ ਰਸਂ ਜਾਨਿਤੁਂ, ਤਸ੍ਮਾ ਆਪੋਸਨ੍ਨਿਸ੍ਸਿਤਰਸਾਰਮ੍ਮਣਾ ਜਿਵ੍ਹਾਤਿ.

ਆਮਕਸੁਸਾਨਤੋ ਬਹਿ. ਉਪਾਦਿਣ੍ਣਕਜ੍ਝਾਸਯੋਤਿ ਉਪਾਦਿਣ੍ਣਕਨਿਨ੍ਨੋ. ਕਾਯਪਸਾਦਸਨ੍ਨਿਸ੍ਸਯਭੂਤਾਯ ਪਥਵਿਯਾ ਫੋਟ੍ਠਬ੍ਬਾਰਮ੍ਮਣੇ ਘਟਿਤੇ ਏਵ ਤਤ੍ਥ ਵਿਞ੍ਞਾਣੁਪ੍ਪਤ੍ਤਿ, ਨ ਅਞ੍ਞਥਾਤਿ ਵੁਤ੍ਤਂ ‘‘ਪਥਵੀਸਨ੍ਨਿਸ੍ਸਿਤਫੋਟ੍ਠਬ੍ਬਾਰਮ੍ਮਣੋ’’ਤਿ. ਤਥਾ ਹੀਤਿਆਦਿ ਕਾਯਸ੍ਸ ਉਪਾਦਿਣ੍ਣਕਜ੍ਝਾਸਯਤਾਯ ਸਾਧਕਂ. ਅਜ੍ਝਤ੍ਤਿਕਬਾਹਿਰਾਤਿ ਅਜ੍ਝਤ੍ਤਿਕਾ ਬਾਹਿਰਾ ਵਾ. ਅਸ੍ਸਾਤਿ ਕਾਯਸ੍ਸ. ਸੁਸਨ੍ਥਤਸ੍ਸਾਤਿਆਦਿ ਤਸ੍ਸ ਪਥਵਿਯਾ ਪਚ੍ਚਯਭਾਵਦਸ੍ਸਨਂ.

ਨਾਨਜ੍ਝਾਸਯੋਤਿ ਨਾਨਾਰਮ੍ਮਣਨਿਨ੍ਨੋ. ਤੇਨ ਮਨਸ੍ਸ ਮਕ੍ਕਟਸ੍ਸ ਵਿਯ ਅਨਵਟ੍ਠਿਤਤਂ ਦਸ੍ਸੇਤਿ. ਤੇਨਾਹ ‘‘ਦਿਟ੍ਠਪੁਬ੍ਬੇਪੀ’’ਤਿਆਦਿ. ਮੂਲਭਵਙ੍ਗਗ੍ਗਹਣੇਨ ਪਿਟ੍ਠਿਭਵਙ੍ਗਂ ਨਿਵਤ੍ਤੇਤਿ. ਅਸ੍ਸਾਤਿ ਮਨਸ੍ਸ. ਏਵਂ ਕਿਰਿਯਮਯਂ ਵਿਞ੍ਞਾਣਂ ਦਟ੍ਠਬ੍ਬਂ. ਨਾਨਤ੍ਤਨ੍ਤਿ ਭੇਦੋ.

ਯਥਾਰੁਚਿਪ੍ਪਵਤ੍ਤਿਯਾ ਨਿਵਾਰਣਵਸੇਨ ਬਦ੍ਧਾਨਂ. ਨਿਬ੍ਬਿਸੇਵਨਭਾਵਨ੍ਤਿ ਲੋਲਤਾਸਙ੍ਖਾਤਪਰਿਪ੍ਫਨ੍ਦਸ੍ਸ ਅਭਾਵਂ. ਨਾਕਡ੍ਢਤੀਤਿ ਸਵਿਸਯੇ ਰੂਪਾਰਮ੍ਮਣੇ ਚਿਤ੍ਤਸਨ੍ਤਾਨਂ, ਤਂਸਮਙ੍ਗਿਨਂ ਵਾ ਪੁਗ੍ਗਲਂ ਨਾਕਡ੍ਢਤਿ. ਪੁਬ੍ਬਭਾਗਵਿਪਸ੍ਸਨਾਵ ਕਥਿਤਾ ਆਯਤਨਮੁਖੇਨ ‘‘ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬ’’ਨ੍ਤਿ ਵੁਤ੍ਤਤ੍ਤਾ.

ਛਪ੍ਪਾਣਕੋਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਯਵਕਲਾਪਿਸੁਤ੍ਤਵਣ੍ਣਨਾ

੨੪੮. ਯਵਪੁਞ੍ਜੋ ਸੁਪਰਿਪਕ੍ਕਯਵਸਮੁਦਾਯੋ. ਕਾਜਹਤ੍ਥਾਤਿ ਦਣ੍ਡਹਤ੍ਥਾ. ਪੋਥੇਯ੍ਯੁਨ੍ਤਿ ਯਥਾ ਯਵਸਙ੍ਖਾਤਂ ਧਞ੍ਞਂ ਵਣ੍ਟਤੋ ਮੁਚ੍ਚਤਿ, ਏਵਂ ਪੋਥੇਯ੍ਯੁਂ. ਯਵੇ ਸਾਵੇਤ੍ਵਾਤਿ ਯਵਸੀਸਤੋ ਯਵੇ ਪੋਥਨੇਨ ਮੋਚੇਤ੍ਵਾ ਵਿਵੇਚੇਤ੍ਵਾ.

ਚਤੁਮਹਾਪਥੋ ਵਿਯ ਛ ਆਯਤਨਾਨਿ ਆਰਮ੍ਮਣਦਣ੍ਡਕੇਹਿ ਹਨਨਟ੍ਠਾਨਤ੍ਤਾ. ਯਵਕਲਾਪੀ ਵਿਯ ਸਤ੍ਤੋ ਤੇਹਿ ਹਞ੍ਞਮਾਨਤ੍ਤਾ. ਛ ਬ੍ਯਾਭਙ੍ਗਿਯੋ ਵਿਯ ਸਭਾਵਤੋ ਛਧਾਪਿ ਪਚ੍ਚੇਕਂ ਇਟ੍ਠਾਨਿਟ੍ਠਮਜ੍ਝਤ੍ਤਵਸੇਨ ਅਟ੍ਠਾਰਸ ਆਰਮ੍ਮਣਾਨਿ ਯਵਕਲਾਪਟ੍ਠਾਨਿਯਸ੍ਸ ਸਤ੍ਤਸ੍ਸ ਹਨਨਤੋ. ਭਵਪਤ੍ਥਨਾਯ ਅਪਰਾਪਰੁਪ੍ਪਤ੍ਤਿਂ ਸਨ੍ਧਾਯ ‘‘ਭਵਪਤ੍ਥਨਾ ਕਿਲੇਸਾ’’ਤਿ ਬਹੁਵਚਨਨਿਦ੍ਦੇਸੋ. ਭਵਪਤ੍ਥਨਾ ਚ ਤਸ੍ਸ ਪਚ੍ਚਯਭੂਤਾ ਕਿਲੇਸਾ ਚਾਤਿ ਭਵਪਤ੍ਥਨਾਕਿਲੇਸਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਯਸ੍ਮਾ ਸਤ੍ਤਾਨਂ ਵਟ੍ਟਦੁਕ੍ਖਂ ਨਾਮ ਸਬ੍ਬਮ੍ਪਿ ਤਂ ਭਵਪਤ੍ਥਨਾਮੂਲਕਂ, ਤਸ੍ਮਾ ਵੁਤ੍ਤਂ ‘‘ਏਵਂ ਸਤ੍ਤਾ’’ਤਿਆਦਿ. ਭਵਪਤ੍ਥਨਕਿਲੇਸਾਤਿ ਚ ਭਵਪਤ੍ਥਨਾਮੂਲਕਂ ਕਿਲੇਸਂ.

ਭੁਮ੍ਮਨ੍ਤਿ ਸਮੀਪਤ੍ਥੇ ਭੁਮ੍ਮਂ. ਤੇਨਾਹ ‘‘ਸੁਧਮ੍ਮਾਯ ਦ੍ਵਾਰੇ’’ਤਿ. ਨ ਕਤਨ੍ਤਿ ਦੁਕ੍ਖੁਪ੍ਪਾਦਨਂ ਨ ਕਤਂ. ਨਵਗੂਥਸੂਕਰਂ ਵਿਯਾਤਿ ਨਵਗੂਥਭਕ੍ਖਸੂਕਰਂ ਵਿਯ. ਚਿਤ੍ਤੇਨੇਵਾਤਿ ਯੋ ਬਜ੍ਝਤਿ, ਤਸ੍ਸ ਚਿਤ੍ਤੇਨੇਵ. ਤਸ੍ਮਾਤਿ ਯਸ੍ਮਾ ਵੇਪਚਿਤ੍ਤਿਬਨ੍ਧਨਸ੍ਸ ਬਨ੍ਧਨਮੁਚ੍ਚਨਂ ਵਿਯ, ਤਸ੍ਮਾ ‘‘ਵੇਪਚਿਤ੍ਤਿਬਨ੍ਧਨ’’ਨ੍ਤਿ ਵੁਤ੍ਤਂ. ਞਾਣਮੋਕ੍ਖਂ ਬਨ੍ਧਨਨ੍ਤਿ ਞਾਣੇਨ ਮੁਚ੍ਚਨਂ ਬਨ੍ਧਨਂ.

ਮਞ੍ਞਮਾਨੋਤਿ ਪਰਿਕਪ੍ਪਿਤਤਣ੍ਹਾਵਸੇਨ ‘‘ਏਤਂ ਮਮਾ’’ਤਿ, ਦਿਟ੍ਠਿਵਸੇਨ ‘‘ਏਸੋ ਮੇ ਅਤ੍ਤਾ’’ਤਿ, ਮਾਨਵਸੇਨ ‘‘ਏਸੋਹਮਸ੍ਮੀ’’ਤਿ ਮਞ੍ਞਨ੍ਤੋ. ਖਨ੍ਧਵਿਨਿਮੁਤ੍ਤਸ੍ਸ ਮਞ੍ਞਮਾਨਵਤ੍ਥੁਨੋ ਅਭਾਵਾ ‘‘ਖਨ੍ਧੇ ਮਞ੍ਞਨ੍ਤੋ’’ਤਿ ਵੁਤ੍ਤਂ. ਏਤਨ੍ਤਿ ‘‘ਮਾਰਸ੍ਸਾ’’ਤਿ ਏਤਂ ਸਾਮਿਵਚਨਂ. ਕਿਲੇਸਮਾਰੇਨ ਬਦ੍ਧੋਤਿ ਕਿਲੇਸਮਾਰੇਨ ਤੇਨੇਵ ਕਿਲੇਸਬਨ੍ਧਨੇਨ ਬਦ੍ਧੋ. ਮੁਤ੍ਤੋਤਿ ਏਤ੍ਥਾਪਿ ਏਸੇਵ ਨਯੋ.

ਤਣ੍ਹਾਮਞ੍ਞਨਾਯ ਸਤਿ ਦਿਟ੍ਠਿਮਾਨਮਞ੍ਞਨਾਨਂ ਪਸਙ੍ਗੋ ਏਵ ਨਤ੍ਥੀਤਿ ਯਥਾ ‘‘ਅਸ੍ਮੀ’’ਤਿ ਪਦੇਨ ਦਿਟ੍ਠਿਮਾਨਮਞ੍ਞਨਾ ਵੁਤ੍ਤਾ ਹੋਨ੍ਤਿ, ਏਵਂ ਤਣ੍ਹਾਮਞ੍ਞਿਤਾਪੀਤਿ ਵੁਤ੍ਤਂ ‘‘ਅਸ੍ਮੀਤਿ ਪਦੇਨ ਤਣ੍ਹਾਮਞ੍ਞਿਤਂ ਵੁਤ੍ਤ’’ਨ੍ਤਿ. ਅਯਮਹਮਸ੍ਮੀਤਿ ਪਦੇਨ ਦਿਟ੍ਠਿਮਞ੍ਞਿਤਨ੍ਤਿ ਏਤਰਹਿ ਲਬ੍ਭਮਾਨਦਿਟ੍ਠਿਵਤ੍ਥੁਵਸੇਨੇਵ. ਭਵਿਸ੍ਸਨ੍ਤਿ ਅਨਾਗਤਦਿਟ੍ਠਿਵਤ੍ਥੁਪਰਿਕਪ੍ਪਨਵਸੇਨੇਵ ਦਿਟ੍ਠਿਮਞ੍ਞਿਤਂ. ਯੇਭੁਯ੍ਯੇਨ ਹਿ ਅਨਾਗਤਾਲਿਙ੍ਗਨਾ ਸਸ੍ਸਤਦਿਟ੍ਠਿ. ਉਚ੍ਛੇਦਵਸੇਨ ਦਿਟ੍ਠਿਮਞ੍ਞਿਤਮੇਵਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਰੂਪੀਤਿਆਦੀਨਿ ਪਦਾਨਿ. ਸਸ੍ਸਤਸ੍ਸੇਵਾਤਿ ਸਸ੍ਸਤਗਾਹਸ੍ਸੇਵ ਪਭੇਦਦੀਪਨਾਨਿ. ਯਸ੍ਮਾ ਮਞ੍ਞਿਤਂ ਆਬਾਧਵਸੇਨ ਰੋਗੋ, ਅਨ੍ਤੋਦੋਸਵਸੇਨ ਗਣ੍ਡੋ, ਅਙ੍ਗਨਿਕਨ੍ਤਵਸੇਨ ਸਲ੍ਲਂ, ਤਸ੍ਮਾ ਇਮੇਹਿ ਤਣ੍ਹਾਦੀਹਿ ਕਿਲੇਸੇਹਿ ਪਾਕਟਚਲਨਵਸੇਨ ਇਞ੍ਜਨ੍ਤਿ ਚੇਵ, ਅਪਾਕਟਸਞ੍ਚਲਨਵਸੇਨ ਫਨ੍ਦਨ੍ਤਿ ਚ. ਪਪਞ੍ਚਿਤਂ ਸਂਸਾਰੇ ਚਿਰਾਯਨਂ ਦਟ੍ਠਬ੍ਬਂ, ਖਨ੍ਧਸਨ੍ਤਾਨਸ੍ਸ ਵਾ ਵਿਤ੍ਥਾਰਣਂ. ਪਮਤ੍ਤਾਕਾਰਪ੍ਪਤ੍ਤਾ ਮੁਚ੍ਛਨਾਕਾਰਪ੍ਪਤ੍ਤਾ. ਤੇਸਨ੍ਤਿ ਤਣ੍ਹਾਦਿਟ੍ਠਿਕਿਲੇਸਾਨਂ. ਆਕਾਰਦਸ੍ਸਨਤ੍ਥਨ੍ਤਿ ਪਵਤ੍ਤਿਆਕਾਰਦਸ੍ਸਨਤ੍ਥਂ.

ਮਾਨੋ ਨਾਮ ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਮਜ੍ਜਨਾਕਾਰਪ੍ਪਵਤ੍ਤਿ. ਤਣ੍ਹਾਯ ਸਮ੍ਪਯੁਤ੍ਤਮਾਨਵਸੇਨਾਤਿ ਕਸ੍ਮਾ ਵੁਤ੍ਤਂ? ਨਨੁ ਸਬ੍ਬੋ ਮਾਨੋ ਤਣ੍ਹਾਸਮ੍ਪਯੁਤ੍ਤੋ? ਸਤਿ ਹਿ ਬ੍ਯਭਿਚਾਰੇ ਵਿਸੇਸਨਂ ਇਚ੍ਛਿਤਬ੍ਬਨ੍ਤਿ. ਸਚ੍ਚਮੇਤਂ, ਤਣ੍ਹਾ ਪਨ ਅਤ੍ਥਿ ਮਾਨਸ੍ਸ ਪਚ੍ਚਯਭੂਤਾ, ਅਤ੍ਥਿ ਮਾਨਸ੍ਸ ਅਪ੍ਪਚ੍ਚਯਭੂਤਾ, ਯਤੋ ਮਾਨੋ ਅਨਿਯਤੋ ਵੁਚ੍ਚਤਿ. ਤਥਾ ਹਿ ਪਟ੍ਠਾਨੇ ‘‘ਸਂਯੋਜਨਂ ਧਮ੍ਮਂ ਪਟਿਚ੍ਚ ਸਂਯੋਜਨੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ’’ਤਿ ਏਤ੍ਥ ਸਂਯੋਜਨਾਨਿ ਸਂਯੋਜਨੇਹਿ ਯਥਾਲਾਭਂ ਯੋਜੇਤ੍ਵਾ ਦਸ੍ਸਿਤਯੋਜਨਾਯ ‘‘ਕਾਮਰਾਗਸਂਯੋਜਨਂ ਪਟਿਚ੍ਚ ਮਾਨਸਂਯੋਜਨਂ ਅਵਿਜ੍ਜਾਸਂਯੋਜਨ’’ਨ੍ਤਿ ਵਤ੍ਵਾ ‘‘ਕਾਮਰਾਗਸਂਯੋਜਨਂ ਪਟਿਚ੍ਚ ਅਵਿਜ੍ਜਾਸਂਯੋਜਨ’’ਨ੍ਤਿ, ‘‘ਮਾਨਸਂਯੋਜਨਂ ਪਟਿਚ੍ਚ ਭਵਰਾਗਸਂਯੋਜਨਂ ਅਵਿਜ੍ਜਾਸਂਯੋਜਨ’’ਨ੍ਤਿ ਚ ਵਤ੍ਵਾ ‘‘ਭਵਰਾਗਸਂਯੋਜਨਂ ਪਟਿਚ੍ਚ ਅਵਿਜ੍ਜਾਸਂਯੋਜਨ’’ਨ੍ਤਿ ਵੁਤ੍ਤਂ. ਏਤ੍ਥ ਚ ਕਾਮਰਾਗਭਵਰਾਗਸਂਯੋਜਨੇਹਿ ਮਾਨਸ੍ਸ ਅਨਿਯਤਭਾਵੋ ਪਕਾਸਿਤੋ. ਤਤ੍ਥ ਯਾ ਤਣ੍ਹਾ ਬਲਵਤੀ, ਤਂ ਸਨ੍ਧਾਯ ਇਦਂ ਵੁਤ੍ਤਂ ‘‘ਤਣ੍ਹਾਯ ਸਮ੍ਪਯੁਤ੍ਤਮਾਨਵਸੇਨਾ’’ਤਿ. ਬਲਵਤਣ੍ਹਾਸਮ੍ਪਯੁਤ੍ਤੋ ਹਿ ਮਾਨੋ ਸਯਮ੍ਪਿ ਬਲਵਾ ਹੁਤ੍ਵਾ ਅਸ੍ਮੀਤਿ ਸਵਿਸੇਸਂ ਮਜ੍ਜਨਵਸੇਨ ਪਵਤ੍ਤਤੀਤਿ.

ਦਿਟ੍ਠਿਵਸੇਨਾਤਿ ਮਾਨਮੂਲਕਦਿਟ੍ਠਿਵਸੇਨ. ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ ਹਿ ਬਹੁਲਮਾਨੁਪੇਤਸ੍ਸ ਪੁਗ੍ਗਲਸ੍ਸ ਰੂਪਾਦੀਸੁ ਏਕਂ ਉਦ੍ਦਿਸ੍ਸ ਅਯਮਹਮਸ੍ਮੀਤਿ ਦਿਟ੍ਠਿਯਾ ਉਪ੍ਪਨ੍ਨਾਯ ਮਾਨਸ੍ਸ ਅਪ੍ਪਹੀਨਤ੍ਤਾ ਮਾਨੋਪਿ ਤਤ੍ਥ ਤਤ੍ਥੇਵ ਉਪ੍ਪਜ੍ਜਤਿ. ਇਤਿ ਮਾਨਮੂਲਕਂ ਦਿਟ੍ਠਿਂ ਸਨ੍ਧਾਯਾਹ ‘‘ਅਯਮਹਮਸ੍ਮੀਤਿ ਦਿਟ੍ਠਿਵਸੇਨ ਵੁਤ੍ਤ’’ਨ੍ਤਿ. ਚੋਦਕੋ ਪਨ ਇਮਮਤ੍ਥਂ ਅਜਾਨਨ੍ਤੋ ਅਨੁਪਲਬ੍ਭਮਾਨਮੇਵ ਸਮ੍ਪਯੋਗਤ੍ਥਂ ਗਹੇਤ੍ਵਾ ‘‘ਨਨੁ ਚਾ’’ਤਿਆਦਿਨਾ ਚੋਦੇਤਿ. ਇਤਰੋ ‘‘ਆਮ ਨਤ੍ਥੀ’’ਤਿ ਤਮਤ੍ਥਂ ਸਮ੍ਪਟਿਚ੍ਛਿਤ੍ਵਾ ‘‘ਮਾਨਸ੍ਸ ਪਨਾ’’ਤਿਆਦਿਨਾ ਪਰਿਹਾਰਮਾਹ. ਤਸ੍ਸਤ੍ਥੋ ਵੁਤ੍ਤੋ ਏਵ.

ਯਵਕਲਾਪਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਆਸੀਵਿਸਵਗ੍ਗਵਣ੍ਣਨਾ ਨਿਟ੍ਠਿਤਾ.

ਚਤੁਤ੍ਥੋ ਪਣ੍ਣਾਸਕੋ.

ਸਲ਼ਾਯਤਨਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.