੧੮. ਸਮੁਦ੍ਦਵਗ੍ਗੋ

੧. ਪਠਮਸਮੁਦ੍ਦਸੁਤ੍ਤਵਣ੍ਣਨਾ

੨੨੮. ਯਦਿ ‘‘ਦੁਪ੍ਪੂਰਣਟ੍ਠੇਨ ਸਮੁਦ੍ਦਨਟ੍ਠੇਨਾ’’ਤਿ ਇਮਿਨਾ ਅਤ੍ਥਦ੍ਵਯੇਨ ਸਾਗਰੋ ‘‘ਸਮੁਦ੍ਦੋ’’ਤਿ ਵੁਚ੍ਚਤਿ, ਚਕ੍ਖੁਸ੍ਸੇਵੇਤਂ ਨਿਪ੍ਪਰਿਯਾਯਤੋ ਯੁਜ੍ਜਤੀਤਿ ਦਸ੍ਸੇਤੁਂ ‘‘ਯਦੀ’’ਤਿਆਦਿ ਵੁਤ੍ਤਂ. ਤਤ੍ਥ ਦੁਪ੍ਪੂਰਣਟ੍ਠੇਨਾਤਿ ਪੂਰੇਤੁਂ ਅਸਕ੍ਕੁਣੇਯ੍ਯਭਾਵੇਨ. ਸਮੁਦ੍ਦਨਟ੍ਠੇਨਾਤਿ ਸਬ੍ਬਸੋ ਉਪਰੂਪਰਿਪਕ੍ਖਿਤ੍ਤਗਮਨੇਨ. ਮਹਾਗਙ੍ਗਾਦਿਮਹਾਨਦੀਨਂ ਮਹਤਾ ਉਦਕੋਘੇਨ ਅਨੁਸਂਵਚ੍ਛਰਂ ਅਨੁਪਕ੍ਖਨ੍ਦਮਾਨੋਪਿ ਹਿ ਸਮੁਦ੍ਦੋ ਪਾਰਿਪੂਰਿਂ ਨ ਗਚ੍ਛਤਿ, ਯਞ੍ਚ ਭੂਮਿਪਦੇਸਂ ਓਤ੍ਥਰਤਿ, ਤਂ ਸਮੁਦ੍ਦਭਾਵਂ ਨੇਤਿ, ਅਭਾਵਂ ਵਾ ਪਾਪੁਣਾਤਿ ਅਪਯਾਤੇ ਸਮੁਦ੍ਦੋਦਕੇ, ਤਂ ਵਾ ਅਨੁਦਕਭਾਵਪਤ੍ਤਿਯਾ ਅਤਥਮੇਵ ਹੋਤਿ. ਕਾਮਞ੍ਚੇਸ ਦੁਪ੍ਪੂਰਣਟ੍ਠੋ ਸਮੁਦ੍ਦਨਟ੍ਠੋ ਸਾਗਰੇ ਲਬ੍ਭਤਿ, ਤਥਾਪਿ ਤਂ ਦ੍ਵਯਂ ਚਕ੍ਖੁਸ੍ਮਿਂਯੇਵ ਵਿਸੇਸਤੋ ਲਬ੍ਭਤੀਤਿ ਦਸ੍ਸੇਨ੍ਤੋ ‘‘ਤਸ੍ਸ ਹੀ’’ਤਿਆਦਿਮਾਹ. ਸਮੋਸਰਨ੍ਤਨ੍ਤਿ ਸਬ੍ਬਸੋ ਨੀਲਾਦਿਭਾਗੇਹਿ ਓਸਰਨ੍ਤਂ, ਆਪਾਥਂ ਆਗਚ੍ਛਨ੍ਤਨ੍ਤਿ ਅਤ੍ਥੋ. ਕਾਤੁਂ ਨ ਸਕ੍ਕੋਤਿ ਦੁਪ੍ਪੂਰਣੀਯਤ੍ਤਾ. ਸਦੋਸਗਮਨੇਨ ਗਚ੍ਛਤਿ ਸਤ੍ਤਸਨ੍ਤਾਨਸ੍ਸ ਦੁਸ੍ਸਨਤੋ. ਦੁਸ੍ਸਨਟ੍ਠਤਾ ਚਸ੍ਸ ਚਕ੍ਖੁਦ੍ਵਾਰਿਕਤਣ੍ਹਾਵਸੇਨ ਵੇਦਿਤਬ੍ਬਾ. ਯਥਾ ਸਮੁਦ੍ਦੇ ਅਪਰਾਪਰਂ ਪਰਿਵਤ੍ਤਮਾਨੋ ਊਮਿਯਾ ਵੇਗੋ ਸਮੁਦ੍ਦਸ੍ਸਾਤਿ ਵੁਚ੍ਚਤਿ, ਏਵਂ ਚਕ੍ਖੁਸਮੁਦ੍ਦਸ੍ਸ ਪੁਰਤੋ ਅਪਰਾਪਰਂ ਪਰਿਵਤ੍ਤਮਾਨਂ ਨੀਲਾਦਿਭੇਦਂ ਰੂਪਾਰਮ੍ਮਣਂ ਚਕ੍ਖੁਸ੍ਸਾਤਿ ਵਤ੍ਤਬ੍ਬਤਂ ਅਰਹਤਿ ਅਨਞ੍ਞਸਾਧਾਰਣਤ੍ਤਾਤਿ ਵੁਤ੍ਤਂ ‘‘ਰੂਪਮਯੋ ਵੇਗੋ’’ਤਿ. ਅਸਮਪੇਕ੍ਖਿਤੇਤਿ ਸਮ੍ਮਾਦਸ੍ਸਨੇ ਰੂਪੇ ਮਨਾਪਭਾਵਂ ਅਮਨਾਪਭਾਵਞ੍ਚ ਗਹੇਤ੍ਵਾ, ‘‘ਇਦਂ ਨਾਮ ਮਯਾ ਦਿਟ੍ਠ’’ਨ੍ਤਿ ਅਨੁਪਧਾਰੇਨ੍ਤਸ੍ਸ ਕੇਵਲਂ ਸਮੂਹਘਨਵਸੇਨ ਗਣ੍ਹਨ੍ਤਸ੍ਸ ਗਹਣਂ ਅਸਮਪੇਕ੍ਖਨਂ. ਸਹਤੀਤਿ ਅਧਿਭਵਤਿ, ਤਂਨਿਮਿਤ੍ਤਂ ਕਞ੍ਚਿ ਵਿਕਾਰਂ ਨਾਪਜ੍ਜਤਿ.

ਊਮੀਤਿ ਵੀਚਿਯੋ. ਆਵਟ੍ਟੋ ਆਵਟ੍ਟਨਵਸੇਨ ਪਵਤ੍ਤਂ ਉਦਕਂ. ਗਾਹਰਕ੍ਖਸਮਕਰਾਦਯੋ ਗਾਹਰਕ੍ਖਸੋ. ਯਥਾ ਸਮੁਦ੍ਦੇ ਊਮਿਯੋ ਉਪਰੂਪਰਿ ਵਤ੍ਤਮਾਨਾ ਅਤ੍ਤਨਿ ਪਤਿਤਪੁਗ੍ਗਲਂ ਅਜ੍ਝੋਤ੍ਥਰਿਤ੍ਵਾ ਅਨਯਬ੍ਯਸਨਂ ਆਪਾਦੇਨ੍ਤਿ, ਤਥਾ ਆਵਟ੍ਟਗਾਹਰਕ੍ਖਸਾ. ਏਵਮੇਤੇ ਰਾਗਾਦਯੋ ਕਿਲੇਸਾ ਸਯਂ ਉਪ੍ਪਨ੍ਨਕਸਤ੍ਤੇ ਅਜ੍ਝੋਤ੍ਥਰਿਤ੍ਵਾ ਅਨਯਬ੍ਯਸਨਂ ਆਪਾਦੇਨ੍ਤਿ, ਕਿਲੇਸੁਪ੍ਪਤ੍ਤਿਨਿਮਿਤ੍ਤਤਾਯ ਸਤ੍ਤਾਨਂ ਅਨਯਬ੍ਯਸਨਾਪਤ੍ਤਿਹੇਤੁਭੂਤਸ੍ਸ ਊਮਿਭਯਸ੍ਸ ਆਰਮ੍ਮਣਵਸੇਨ ਚਕ੍ਖੁਸਮੁਦ੍ਦੋ ‘‘ਸਊਮਿਸਾਵਟ੍ਟੋ ਸਗਾਹੋ ਸਰਕ੍ਖਸੋ’’ਤਿ ਵੁਤ੍ਤੋ.

ਊਮਿਭਯਨ੍ਤਿ ਏਤ੍ਥ ਭਾਯਤਿ ਏਤਸ੍ਮਾਤਿ ਭਯਂ, ਊਮੀਵ ਭਯਂ ਊਮਿਭਯਂ. ਕੁਜ੍ਝਨਟ੍ਠੇਨ ਕੋਧੋ. ਸ੍ਵੇਵ ਚਿਤ੍ਤਸ੍ਸ ਚ ਅਭਿਮਦ੍ਦਨਵਸੇਨੁਪ੍ਪਾਦਨਤ੍ਥੇਨ ਦਲ਼੍ਹਂ ਆਯਾਸਨਟ੍ਠੇਨ ਉਪਾਯਾਸੋ. ਏਤ੍ਥ ਚ ਅਨੇਕਵਾਰਂ ਪਵਤ੍ਤਿਤ੍ਵਾ ਸਤ੍ਤੇ ਅਜ੍ਝੋਤ੍ਥਰਿਤ੍ਵਾ ਸੀਸਂ ਉਕ੍ਖਿਪਿਤੁਂ ਅਦਤ੍ਵਾ ਅਨਯਬ੍ਯਸਨਨਿਪ੍ਫਾਦਨੇਨ ਕੋਧੂਪਾਯਾਸਸ੍ਸ ਊਮਿਸਦਿਸਤਾ ਦਟ੍ਠਬ੍ਬਾ. ਤਥਾ ਕਾਮਗੁਣਾ ਕਿਲੇਸਾਭਿਭੂਤੇ ਸਤ੍ਤੇ ਮਾਨੇ ਵਿਯ ਰੂਪਾਦਿਵਿਸਯਸਙ੍ਖਾਤੇ ਅਤ੍ਤਨਿ ਸਂਸਾਰੇਤ੍ਵਾ ਯਥਾ ਤਤੋ ਬਹਿਭੂਤੇ ਨੇਕ੍ਖਮ੍ਮੇ ਚਿਤ੍ਤਮ੍ਪਿ ਨ ਉਪ੍ਪਜ੍ਜਤਿ, ਏਵਂ ਆਵਟ੍ਟੇਤ੍ਵਾ ਬ੍ਯਸਨਾਪਾਦਨੇਨ ਆਵਟ੍ਟਸਦਿਸਤਾ ਦਟ੍ਠਬ੍ਬਾ. ਯਦਾ ਪਨ ਗਾਹਰਕ੍ਖਸੋ ਆਰਕ੍ਖਰਹਿਤਂ ਅਤ੍ਤਨੋ ਗੋਚਰਭੂਮਿਗਤਂ ਪੁਰਿਸਂ ਅਭਿਭੁਯ੍ਯ ਗਹੇਤ੍ਵਾ ਅਗੋਚਰੇ ਠਿਤਮ੍ਪਿ ਗੋਚਰਂ ਨੇਤ੍ਵਾ ਭੇਰਵਰੂਪਦਸ੍ਸਨਾਦਿਨਾ ਅਤ੍ਤਨੋ ਉਪਕ੍ਕਮਂ ਕਾਤੁਂ ਅਸਮਤ੍ਥਂ ਕਤ੍ਵਾ ਅਨ੍ਵਾਵਿਸਿਤ੍ਵਾ ਵਣ੍ਣਬਲਭੋਗਆਯੁਸੁਖੇਹਿ ਵਿਯੋਜੇਤ੍ਵਾ ਮਹਨ੍ਤਂ ਅਨਯਬ੍ਯਸਨਂ ਆਪਾਦੇਤਿ, ਏਵਂ ਮਾਤੁਗਾਮੋਪਿ ਯੋਨਿਸੋਮਨਸਿਕਾਰਰਹਿਤਂ ਅਵੀਰਪੁਰਿਸਂ ਅਤ੍ਤਨੋ ਰੂਪਾਦੀਹਿ ਪਲੋਭਨਵਸੇਨ ਅਭਿਭੁਯ੍ਯ ਗਹੇਤ੍ਵਾ ਵਾ ਵੀਰਜਾਤਿਯਮ੍ਪਿ ਇਤ੍ਥਿਕੁਤ੍ਤਭੂਤੇਹਿ ਅਤ੍ਤਨੋ ਹਾਵਭਾਵਵਿਲਾਸੇਹਿ ਇਤ੍ਥਿਮਾਯਾਯ ਅਨ੍ਵਾਵਿਸਿਤ੍ਵਾ ਵਾ ਅਵਸਂ ਅਤ੍ਤਨੋ ਉਪਕਾਰਧਮ੍ਮੇ ਸੀਲਾਦਯੋ ਸਮ੍ਪਾਦੇਤੁਂ ਅਸਮਤ੍ਥਂ ਕਰੋਨ੍ਤੋ ਗੁਣਵਣ੍ਣਾਦੀਹਿ ਵਿਯੋਜੇਤ੍ਵਾ ਮਹਨ੍ਤਂ ਅਨਯਬ੍ਯਸਨਂ ਆਪਾਦੇਤਿ, ਏਵਂ ਮਾਤੁਗਾਮਸ੍ਸ ਗਾਹਰਕ੍ਖਸਸਦਿਸਤਾ ਦਟ੍ਠਬ੍ਬਾ. ਊਮਿਭਯਨ੍ਤਿ ਲਕ੍ਖਣਵਚਨਂ. ਯਥਾ ਹਿ ਊਮਿ ਭਾਯਿਤਬ੍ਬਟ੍ਠੇਨ ਭਯਂ, ਏਵਂ ਆਵਟ੍ਟਗਾਹਰਕ੍ਖਸਾਪੀਤਿ ਊਮਿਆਦਿਭਯੇਨ ਸਭਯਨ੍ਤਿ ਅਤ੍ਥੋ ਵੇਦਿਤਬ੍ਬੋ. ਅਨ੍ਤਂ ਅਵਸਾਨਂ ਗਤੋ, ਏਵਂ ਪਾਰਂ ਨਿਬ੍ਬਾਨਂ ਗਤੋਤਿ ਵੁਚ੍ਚਤਿ.

ਪਠਮਸਮੁਦ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨-੩. ਦੁਤਿਯਸਮੁਦ੍ਦਸੁਤ੍ਤਾਦਿਵਣ੍ਣਨਾ

੨੨੯-੨੩੦. ਕਿਲੇਸਾਨਂ ਅਲ੍ਲਭਾਵੂਪਨਯਨਨ੍ਤਿ ਆਹ ‘‘ਤੇਮਨਟ੍ਠੇਨਾ’’ਤਿ. ਅਰਿਯਸਾਵਕੇਤਿ ਅਨਾਗਾਮਿਨੋ. ਤੇ ਹਿ ਕਾਮਭਵਵਸੇਨ ਅਤਿਨ੍ਤਤਾਯ ਨ ਸਮੁਨ੍ਨਾ. ਤਯੋ ਮਚ੍ਚੂਤਿ ਕਿਲੇਸਾਭਿਸਙ੍ਖਾਰਦੇਵਪੁਤ੍ਤਮਾਰੇ. ਤੀਹਿ ਉਪਧੀਹੀਤਿ ਕਿਲੇਸਾਭਿਸਙ੍ਖਾਰਕਾਮਗੁਣਾਨਂ ਵਸੇਨ ਤੀਹਿ ਉਪਧੀਹਿ. ਖਨ੍ਧੁਪਧਿਨਾ ਪਨ ਸੋ ਨ ਨਿਰੂਪਧਿ ਸਉਪਾਦਿਸੇਸਸ੍ਸੇਵ ਨਿਬ੍ਬਾਨਸ੍ਸ ਅਧਿਗਤਤ੍ਤਾ. ਗਤੋਤਿ ਪਟਿਪਤ੍ਤਿਗਮਨੇਨ ਗਤੋ.

ਦੁਤਿਯਸਮੁਦ੍ਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੪-੬. ਖੀਰਰੁਕ੍ਖੋਪਮਸੁਤ੍ਤਾਦਿਵਣ੍ਣਨਾ

੨੩੧-੨੩੩. ਅਪ੍ਪਹੀਨਟ੍ਠੇਨਾਤਿ ਮਗ੍ਗੇਨ ਅਸਮੁਗ੍ਘਾਟਿਤਭਾਵੇਨ. ਅਤ੍ਥੀਤਿ ਵਿਜ੍ਜਤਿ. ਸਤਿ ਪਚ੍ਚਯੇ ਵਿਜ੍ਜਮਾਨਕਿਚ੍ਚਕਰਣਤੋ ਪਰਿਯੁਟ੍ਠਾਨਂ ਅਪ੍ਪਕਂ ਮੂਸਿਕਾਵਿਸਂ ਵਿਯ ਪਰਿਤ੍ਤਂ ਨਾਮ ਹੋਤਿ ਅਪ੍ਪਾਨੁਭਾਵਤ੍ਤਾ. ਏਵਰੂਪਾਪੀਤਿ ਅਪ੍ਪਕਾਪਿ. ਅਸ੍ਸਾਤਿ ਅਪ੍ਪਹੀਨਕਿਲੇਸਸ੍ਸ. ਅਧਿਮਤ੍ਤਾਨਨ੍ਤਿ ਇਟ੍ਠਾਨਂ ਰਜਨੀਯਾਨਂ, ਵਤ੍ਥੁਵਸੇਨ ਪਰਿਤ੍ਤਕਮ੍ਪਿ ਇਟ੍ਠਾਰਮ੍ਮਣਂ ਅਧਿਮਤ੍ਤਮੇਵ. ਤੇਨਾਹ ‘‘ਨਖਪਿਟ੍ਠਿਪ੍ਪਮਾਣਮ੍ਪੀ’’ਤਿਆਦਿ. ਦਹਰੋਤਿਆਦੀਨਿ ਤੀਣਿਪਿ ਪਦਾਨਿ. ਆਭਿਨ੍ਦੇਯ੍ਯਾਤਿ ਭਿਨ੍ਦੇਯ੍ਯ. ਤਂ ਉਭਯਨ੍ਤਿ ਤਂ ਚਕ੍ਖੁਰੂਪਨ੍ਤਿ ਉਭਯਮ੍ਪਿ ਆਯਤਨਂ.

ਖੀਰਰੁਕ੍ਖੋਪਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਉਦਾਯੀਸੁਤ੍ਤਵਣ੍ਣਨਾ

੨੩੪. ਇਤਿਪੀਤਿ ਇਮਿਨਾਪਿ ਕਾਰਣੇਨ. ਅਨਿਚ੍ਚੇਨਾਤਿ ਅਨਿਚ੍ਚਭਾਵੇਨ ਅਨਤ੍ਤਲਕ੍ਖਣਂ ਕਥਿਤਂ. ਯਸ੍ਮਾ ਹੇਤੁਪਚ੍ਚਯਾ ਵਿਞ੍ਞਾਣਸ੍ਸ ਉਪ੍ਪਤ੍ਤਿ ਸਤਿ ਚ ਉਪ੍ਪਾਦੇ ਨਿਰੋਧੇਨ ਭਵਿਤਬ੍ਬਂ, ਉਪ੍ਪਾਦਵਯਵਨ੍ਤਤਾਯ ਅਨਿਚ੍ਚਂ ਵਿਞ੍ਞਾਣਂ, ਯਦਿ ਚ ਅਤ੍ਤਾ ਸਿਯਾ ਪਚ੍ਚਯੇਹਿ ਵਿਨਾ ਸਿਜ੍ਝੇਯ੍ਯ, ਨ ਚ ਤਥਾਸ੍ਸ ਸਿਦ੍ਧਿ, ਤਸ੍ਮਾ ‘‘ਵਿਞ੍ਞਾਣਂ ਅਨਤ੍ਤਾ’’ਤਿ ਅਨਿਚ੍ਚਤਾਯ ਅਨਤ੍ਤਤਾ ਕਥਿਤਾ.

ਉਦਾਯੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਆਦਿਤ੍ਤਪਰਿਯਾਯਸੁਤ੍ਤਵਣ੍ਣਨਾ

੨੩੫. ਕਿਲੇਸਾਨਂ ਅਨੁ ਅਨੁ ਬ੍ਯਞ੍ਜਨਤੋ ਪਰਿਬ੍ਯਤ੍ਤਿਯਾ ਉਪ੍ਪਤ੍ਤਿਪਚ੍ਚਯਭਾਵਤੋ ਅਨੁਬ੍ਯਞ੍ਜਨਂ, ਹਤ੍ਥਪਾਦਾਦਿਅਵਯਵਾਤਿ ਆਹ – ‘‘ਹਤ੍ਥਾ ਸੋਭਨਾ’’ਤਿਆਦਿ. ਨਿਮਿਤ੍ਤਗ੍ਗਾਹੋਤਿ ਕਿਲੇਸੁਪ੍ਪਤ੍ਤਿਯਾ ਨਿਮਿਤ੍ਤਭੂਤੋ ਗਾਹੋ. ਸਂਸਨ੍ਦੇਤ੍ਵਾ ਗਹਣਨ੍ਤਿ ਅਵਯਵੇ ਸਮੋਧਾਨੇਤ੍ਵਾ ‘‘ਇਤ੍ਥਿਪੁਰਿਸੋ’’ਤਿਆਦਿਨਾ ਏਕਜ੍ਝਂ ਗਹਣਂ. ਵਿਭਤ੍ਤਿਗਹਣਨ੍ਤਿ ਵਿਭਾਗੇਨ ਅਨਵਸੇਸਗ੍ਗਹਣਂ. ਕੁਮ੍ਭੀਲਸਦਿਸੋਤਿ ਕੁਮ੍ਭੀਲਗਾਹਸਦਿਸੋ. ਤੇਨਾਹ – ‘‘ਸਬ੍ਬਮੇਵ ਗਣ੍ਹਾਤੀ’’ਤਿ ਹਤ੍ਥਪਾਦਾਦੀਸੁ ਤਂ ਤਂ ਕੋਟ੍ਠਾਸਂ ਵਿਭਜਿਤ੍ਵਾ ਗਹਣਂ ਰਤ੍ਤਪਾਸਦਿਸੋ ਜਲੂਕਗਾਹਸਦਿਸੋ. ਏਕਜਵਨਵਾਰੇਪਿ ਲਬ੍ਭਨ੍ਤੀਤਿ ਇਦਂ ਚਕ੍ਖੁਦ੍ਵਾਰਾਨੁਸਾਰੇਨ ਉਪ੍ਪਨ੍ਨਮਨੋਦ੍ਵਾਰਿਕਜਵਨਂ ਸਨ੍ਧਾਯ ਵੁਤ੍ਤਂ.

ਨਿਮਿਤ੍ਤਸ੍ਸਾਦੇਨ ਗਨ੍ਥਿਤਨ੍ਤਿ ਯਥਾਵੁਤ੍ਤੇ ਨਿਮਿਤ੍ਤੇ ਅਸ੍ਸਾਦਗਾਹੇਨ ਗਨ੍ਥਿਤਂ ਸਮ੍ਬਦ੍ਧਂ. ਭਵਙ੍ਗੇਨੇਵਾਤਿ ਮੂਲਭਵਙ੍ਗੇਨੇਵ. ਕਿਲੇਸਭਯਂ ਦਸ੍ਸੇਨ੍ਤੋਤਿ ਤਥਾ ਕਿਲੇਸੁਪ੍ਪਤ੍ਤਿਯਾ ਸਤਿ ਅਕੁਸਲਚਿਤ੍ਤੇਨ ਅਨ੍ਤਰਿਤਂ ਚੇ ਮਰਣਚਿਤ੍ਤਂ ਭਵੇਯ੍ਯ, ਏਕਨ੍ਤਤੋ ਨਿਰਯੇ ਵਾ ਤਿਰਚ੍ਛਾਨਯੋਨਿਯਾ ਵਾ ਉਪ੍ਪਤ੍ਤਿ ਸਿਯਾਤਿ ਕਿਲੇਸਾਨਂ ਭਾਯਿਤਬ੍ਬਂ ਦਸ੍ਸੇਨ੍ਤੋ. ‘‘ਸਮਯਵਸੇਨ ਵਾ ਏਵਂ ਵੁਤ੍ਤ’’ਨ੍ਤਿ ਵਤ੍ਵਾ ਤਮਤ੍ਥਂ ਵਿਵਰਨ੍ਤੋ ‘‘ਚਕ੍ਖੁਦ੍ਵਾਰਸ੍ਮਿਞ੍ਹੀ’’ਤਿਆਦਿਮਾਹ. ਰਤ੍ਤਚਿਤ੍ਤਂ ਵਾਤਿ ਰਾਗਵਸੇਨ ਰਤ੍ਤਚਿਤ੍ਤਂ ਵਾ. ਦੁਟ੍ਠਚਿਤ੍ਤੇਨ ਕਥਂ ਆਰਮ੍ਮਣਰਸਾਨੁਭਵਨਨ੍ਤਿ? ਦੋਮਨਸ੍ਸਵੇਦਨੁਪ੍ਪਤ੍ਤਿ ਏਵ ਤਸ੍ਸ ਆਰਮ੍ਮਣਰਸਾਨੁਭਵਨਂ ਦਟ੍ਠਬ੍ਬਂ. ਇਮਸ੍ਸ ਸਮਯਸ੍ਸਾਤਿ ਮਰਣਸਮਯਸ੍ਸ.

ਉਭਿਨ੍ਨਂ ਨਾਸਚ੍ਛਿਦ੍ਦਾਨਂ ਮਜ੍ਝੇ ਠਿਤ-ਅਟ੍ਠਿਤੁਦਨਂ ਸਹ ਖੁਰਟ੍ਠੇਨ ਛਿਨ੍ਦਨਂ. ਦਣ੍ਡਕਵਾਸੀਤਿ ਦੀਘਦਣ੍ਡਕਾ ਮਹਾਵਾਸਿ. ਨਿਪਜ੍ਜਿਤ੍ਵਾ ਨਿਦ੍ਦੋਕ੍ਕਮਨਨ੍ਤਿ ਇਮਿਨਾ ਪਚਲਾਯਿਕਨਿਦ੍ਦਂ ਪਟਿਕ੍ਖਿਪਤਿ. ਤਤ੍ਥ ਹਿ ਕਦਾਚਿ ਅਨ੍ਤਰਾ ਮਿਚ੍ਛਾਵਿਤਕ੍ਕਾਨਂ ਸਲ੍ਲਕਾਨਂ ਅਵਸਰੋ ਸਿਯਾ, ਨਤ੍ਥੇਵ ਨਿਪਜ੍ਜਿਤ੍ਵਾ ਮਹਾਨਿਦ੍ਦਂ ਓਕ੍ਕਨ੍ਤਕਾਲੇ. ਵਿਤਕ੍ਕਾਨਨ੍ਤਿ ਮਿਚ੍ਛਾਵਿਤਕ੍ਕਾਨਂ.

ਆਦਿਤ੍ਤਪਰਿਯਾਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯-੧੦. ਪਠਮਹਤ੍ਥਪਾਦੋਪਮਸੁਤ੍ਤਾਦਿਵਣ੍ਣਨਾ

੨੩੬-੨੩੭. ਨਵਮਂ ‘‘ਪਞ੍ਞਾਯਤੀ’’ਤਿ ਵੁਚ੍ਚਮਾਨੇ ਬੁਜ੍ਝਨਕਾਨਂ ਅਜ੍ਝਾਸਯਵਸੇਨ ਵੁਤ੍ਤਨ੍ਤਿ ਆਹ – ‘‘ਦਸਮੇ ਨ ਹੋਤੀਤਿ ਵੁਚ੍ਚਮਾਨੇ’’ਤਿਆਦਿ. ਏਤ੍ਤਕਮੇਵ ਹਿ ਦ੍ਵਿਨ੍ਨਂ ਸੁਤ੍ਤਾਨਂ ਵਿਸੇਸੋਤਿ.

ਪਠਮਹਤ੍ਥਪਾਦੋਪਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਸਮੁਦ੍ਦਵਗ੍ਗਵਣ੍ਣਨਾ ਨਿਟ੍ਠਿਤਾ.