੨. ਖਣਸੁਤ੍ਤਵਣ੍ਣਨਾ

੧੩੫. ਛਫਸ੍ਸਾਯਤਨਿਕਾਤਿ ਛਹਿ ਫਸ੍ਸਾਯਤਨੇਹਿ ਅਨਿਟ੍ਠਸਂਵੇਦਨਿਯਾ. ਛਦ੍ਵਾਰਫਸ੍ਸਪਟਿਵਿਞ੍ਞਤ੍ਤੀਤਿ ਛਹਿਪਿ ਦ੍ਵਾਰੇਹਿ ਆਰਮ੍ਮਣਸ੍ਸ ਪਟਿਸਂਵੇਦਨਾ ਹੋਤਿਯੇਵ ਸਬ੍ਬਸੋ ਦੁਕ੍ਖਾਨੁਭਵਨਤ੍ਥਂ. ਤਾਵਤਿਂਸਪੁਰਨ੍ਤਿ ਸੁਦਸ੍ਸਨਮਹਾਨਗਰਂ. ਅਭਾਵੋ ਨਾਮ ਨਤ੍ਥਿ ਸਬ੍ਬਥਾ ਸੁਖਾਨੁਭਵਨਤੋ. ਨਿਰਯੇਤਿ ਇਮਿਨਾ ਦੁਗ੍ਗਤਿ ਭਵਸਾਮਞ੍ਞੇਨ ਇਤਰਾਪਾਯਾਪਿ ਗਹਿਤਾ ਏਵ. ਮਗ੍ਗਬ੍ਰਹ੍ਮਚਰਿਯਵਾਸਂ ਵਸਿਤੁਂ ਨ ਸਕ੍ਕਾਤਿ ਇਮਿਨਾ ਪਨ ਸਬ੍ਬੇਸਮ੍ਪਿ ਅਚ੍ਛਿਨ੍ਦਿਕਟ੍ਠਾਨਾਨਂ ਗਹਣਂ ਦਟ੍ਠਬ੍ਬਂ. ਇਮੇਵਾਤਿ ਇਮਸ੍ਮਿਂ ਮਨੁਸ੍ਸਲੋਕੇ ਏਵ. ਅਪਾਯੋਪਿ ਪਞ੍ਞਾਯਤਿ ਅਪਾਯਦੁਕ੍ਖਸਦਿਸਸ੍ਸ ਦੁਕ੍ਖਸ੍ਸ ਕਦਾਚਿ ਪਟਿਸਂਵੇਦਨਤੋ. ਸਗ੍ਗੋਪਿ ਪਞ੍ਞਾਯਤਿ ਦੇਵਭੋਗਸਦਿਸਸਮ੍ਪਤ੍ਤਿਯਾ ਕਦਾਚਿ ਪਟਿਲਭਿਤਬ੍ਬਤੋ.

ਅਯਂ ਕਮ੍ਮਭੂਮੀਤਿ ਅਯਂ ਮਨੁਸ੍ਸਲੋਕੋ ਪੁਰਿਸਥਾਮਕਰਣਾਯ ਕਮ੍ਮਭੂਮਿ ਨਾਮ ਤਾਸਂ ਯੋਗ੍ਯਟ੍ਠਾਨਭਾਵਤੋ. ਤਤ੍ਥ ਪਧਾਨਕਮ੍ਮਂ ਦਸ੍ਸੇਨ੍ਤੋ ‘‘ਇਧ ਮਗ੍ਗਭਾਵਨਾ’’ਤਿ ਆਹ. ਠਾਨਾਨੀਤਿ ਕਾਰਣਾਨਿ. ਸਂਵੇਜਨਿਯਾਨੀਤਿ ਸਂਵੇਗਜਨਨਾਨਿ ਬਹੂਨਿ ਜਾਤਿਆਦੀਨਿ. ਤਥਾ ਹਿ ਜਾਤਿ, ਜਰਾ, ਬ੍ਯਾਧਿ, ਮਰਣਂ, ਅਪਾਯਭਵਂ, ਤਤ੍ਥਪਿ ਨਿਰਯੂਪਪਤ੍ਤਿਹੇਤੁਕਂ, ਤਿਰਚ੍ਛਾਨੁਪਪਤ੍ਤਿਹੇਤੁਕਂ, ਅਸੂਰਕਾਯੂਪਪਤ੍ਤਿਹੇਤੁਕਂ, ਅਤੀਤੇ ਵਟ੍ਟਮੂਲਕਂ, ਅਨਾਗਤੇ ਵਟ੍ਟਮੂਲਕਂ, ਪਚ੍ਚੁਪ੍ਪਨ੍ਨੇ ਆਹਾਰਪਰਿਯੇਟ੍ਠਿਮੂਲਕਨ੍ਤਿ ਬਹੂਨਿ ਸਂਵੇਗਵਤ੍ਥੂਨਿ ਪਚ੍ਚਵੇਕ੍ਖਿਤ੍ਵਾ ਸਂਵੇਗਜਾਤੋ ਸਞ੍ਜਾਤਸਂਵੇਗੋ ਯੋਨਿਸੋ ਪਧਾਨਮਨੁਯੁਞ੍ਜਸ੍ਸੁ. ਸਂਵੇਗਾਤਿ ਸਂਵੇਗਮਾਪਜ੍ਜਸ੍ਸੁ.

ਖਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.