੩. ਪਠਮਰੂਪਾਰਾਮਸੁਤ੍ਤਵਣ੍ਣਨਾ

੧੩੬. ਸਮ੍ਮੁਦਿਤਾ ਸਮ੍ਮੋਦਪ੍ਪਤ੍ਤਾ, ਪਮੋਦਿਤਾ ਸਞ੍ਜਾਤਪਮੋਦਾ. ਦੁਕ੍ਖਾਤਿ ਦੁਕ੍ਖਵਨ੍ਤੋ ਸਞ੍ਜਾਤਦੁਕ੍ਖਾ. ਤੇਨਾਹ ‘‘ਦੁਕ੍ਖਿਤਾ’’ਤਿ. ਸੁਖਂ ਏਤਸ੍ਸ ਅਤ੍ਥੀਤਿ ਸੁਖੋ, ਸੁਖੀ. ਤੇਨਾਹ ‘‘ਸੁਖਿਤੋ’’ਤਿ. ਯਤ੍ਤਕਾ ਰੂਪਾਦਯੋ ਧਮ੍ਮਾ ਲੋਕੇ ਅਤ੍ਥੀਤਿ ਵੁਚ੍ਚਤਿ. ਪਸ੍ਸਨ੍ਤਾਨਨ੍ਤਿ ਸਚ੍ਚਪਟਿਵੇਧੇਨ ਸਮ੍ਮਦੇਵ ਪਸ੍ਸਨ੍ਤਾਨਂ. ‘‘ਪਚ੍ਚਨੀਕਂ ਹੋਤੀ’’ਤਿ ਵਤ੍ਵਾ ਤਂ ਪਚ੍ਚਨੀਕਭਾਵਂ ਦਸ੍ਸੇਤੁਂ ‘‘ਲੋਕੋ ਹੀ’’ਤਿਆਦਿ ਵੁਤ੍ਤਂ. ਅਸੁਭਾਤਿ ‘‘ਆਹੂ’’ਤਿਪਦਂ ਆਨੇਤ੍ਵਾ ਸਮ੍ਬਨ੍ਧੋ. ਸਬ੍ਬਮੇਤਨ੍ਤਿ ‘‘ਸੁਖਂ ਦਿਟ੍ਠਮਰਿਯੇਭਿ…ਪੇ… ਤਦਰਿਯਾ ਸੁਖਤੋ ਵਿਦੂ’’ਤਿ ਚ ਵੁਤ੍ਤਂ. ਸਬ੍ਬਮੇਤਂ ਨਿਬ੍ਬਾਨਮੇਵ ਸਨ੍ਧਾਯ ਵੁਤ੍ਤਂ. ਨਿਬ੍ਬਾਨਮੇਵ ਹਿ ਏਕਨ੍ਤਤੋ ਸੁਖਂ ਨਾਮ.

ਪਞ੍ਚਨਵੁਤਿਪਾਸਣ੍ਡਿਨੋ ਤੇਸਞ੍ਚ ਪਾਸਣ੍ਡਿਭਾਵੋ ਪਪਞ੍ਚਸੂਦਨਿਟ੍ਠਕਥਾਯਂ ਪਕਾਸਿਤੋ ਏਵ. ਕਿਲੇਸਨੀਵਰਣੇਨ ਨਿਵੁਤਾਨਨ੍ਤਿ ਕਿਲੇਸਖਨ੍ਧਾ ਕਿਲੇਸਨੀਵਰਣਂ, ਤੇਨ ਨਿਵਾਰਿਤਾਨਂ. ਨਿਬ੍ਬਾਨਦਸ੍ਸਨਂ ਨਾਮ ਅਰਿਯਮਗ੍ਗੋ, ਤੇਨ ਤਸ੍ਸ ਪਟਿਵਿਜ੍ਝਨਞ੍ਚ ਕਾਲ਼ਮੇਘਅਵਚ੍ਛਾਦਿਤਂ ਵਿਯ ਚਨ੍ਦਮਣ੍ਡਲਂ.

ਪਰਿਚ੍ਛਿਨ੍ਦਿਤ੍ਵਾਤਿ ਅਸੁਭਭਾਵਪਰਿਚ੍ਛਿਨ੍ਦਨੇਨ ਸਮ੍ਮਾਵਿਞ੍ਞਾਣਦਸ੍ਸਨੇਨ ਚ ਪਰਿਚ੍ਛਿਨ੍ਦਿਤ੍ਵਾ. ਮਗ੍ਗਧਮ੍ਮਸ੍ਸਾਤਿ ਅਰਿਯਮਗ੍ਗਧਮ੍ਮਸ੍ਸ.

ਅਨੁਪਨ੍ਨੇਹੀਤਿ ਅਨੁ ਅਨੁ ਅਵਿਹਾਯ ਪਟਿਪਨ੍ਨੇਹਿ. ਕੋ ਨੁ ਅਞ੍ਞੋ ਜਾਨਿਤੁਂ ਅਰਹਤਿ, ਅਞ੍ਞੋ ਨ ਜਾਨਾਤੀਤਿ ਦਸ੍ਸੇਤਿ.

ਪਠਮਰੂਪਾਰਾਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.