੧੨. ਲੋਕਕਾਮਗੁਣਵਗ੍ਗੋ

੧-੨. ਪਠਮਮਾਰਪਾਸਸੁਤ੍ਤਾਦਿਵਣ੍ਣਨਾ

੧੧੪-੧੧੫. ਆਵਸਤਿ ਏਤ੍ਥ ਕਿਲੇਸਮਾਰੋਤਿ ਆਵਾਸੋ. ਕਾਮਗੁਣਅਜ੍ਝਤ੍ਤਿਕਬਾਹਿਰਾਨਿ ਆਯਤਨਾਨਿ. ਕਿਲੇਸਮਾਰਸ੍ਸ ਆਵਾਸਂ ਗਤੋ ਵਸਂ ਗਤੋ. ਤਿਵਿਧਸ੍ਸਾਤਿ ਪਪਞ੍ਚਸਞ੍ਞਾਸਙ੍ਖਾਤਸ੍ਸ ਤਿਵਿਧਸ੍ਸਪਿ ਮਾਰਸ੍ਸ. ਤਤੋ ਏਵ ਦੇਵਪੁਤ੍ਤਮਾਰਸ੍ਸਪਿ ਵਸਂ ਗਤੋਤਿ ਸਕ੍ਕਾ ਵਿਞ੍ਞਾਤੁਂ.

ਪਠਮਮਾਰਪਾਸਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੩. ਲੋਕਨ੍ਤਗਮਨਸੁਤ੍ਤਵਣ੍ਣਨਾ

੧੧੬. ਲੋਕਿਯਨ੍ਤਿ ਏਤ੍ਥ ਸਤ੍ਤਕਾਯਭੂਤਗਾਮਾਦੀਤਿ ਲੋਕੋ, ਚਕ੍ਕਵਾਲ਼ੋ. ਸਙ੍ਖਾਰੋ ਪਨ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋ. ਅਨ੍ਤਨ੍ਤਿ ਓਸਾਨਂ. ਸਬ੍ਬਞ੍ਞੁਤਞ੍ਞਾਣੇਨ ਸਂਸਨ੍ਦਿਤ੍ਵਾਤਿ ਸਬ੍ਬਞ੍ਞੁਤਞ੍ਞਾਣਗਤਿਯਾ ਸਮਾਨੇਤ੍ਵਾ ਅਵਿਰੋਧੇਤ੍ਵਾ. ਥੋਮੇਸ੍ਸਾਮੀਤਿ ਪਸਂਸਿਸ੍ਸਾਮਿ.

ਏਵਂਸਮ੍ਪਤ੍ਤਿਕਨ੍ਤਿ ਏਵਂਸਮ੍ਪਜ੍ਜਨਕਂ ਏਵਂਪਸ੍ਸਿਤਬ੍ਬਂ ਇਦਂ ਮਮ ਅਜ੍ਝੇਸਨਂ. ਤੇਨਾਹ ‘‘ਈਦਿਸਨ੍ਤਿ ਅਤ੍ਥੋ’’ਤਿ. ਜਾਨਂ ਜਾਨਾਤੀਤਿ ਸਬ੍ਬਞ੍ਞੁਤਞ੍ਞਾਣੇਨ ਜਾਨਿਤਬ੍ਬਂ ਜਾਨਾਤਿ ਏਵ. ਨ ਹਿ ਪਦੇਸਞ੍ਞਾਣੇ ਠਿਤੋ ਜਾਨਿਤਬ੍ਬਂ ਸਬ੍ਬਂ ਜਾਨਾਤਿ. ਉਕ੍ਕਟ੍ਠਨਿਦ੍ਦੇਸੇਨ ਹਿ ਅਵਿਸੇਸਗ੍ਗਹਣੇਨ ਚ ‘‘ਜਾਨ’’ਨ੍ਤਿ ਇਮਿਨਾ ਨਿਰਵਸੇਸਂ ਞੇਯ੍ਯਜਾਤਂ ਪਰਿਗ੍ਗਯ੍ਹਤੀਤਿ ਤਬ੍ਬਿਸਯਾਯ ਜਾਨਨਕਿਰਿਯਾਯ ਸਬ੍ਬਞ੍ਞੁਤਞ੍ਞਾਣਮੇਵ ਕਰਣਂ ਭਵਿਤੁਂ ਯੁਤ੍ਤਂ. ਪਕਰਣਵਸੇਨ ‘‘ਭਗਵਾ’’ਤਿ ਪਦਸਨ੍ਨਿਧਾਨੇਨ ਚ ਅਯਮਤ੍ਥੋ ਵਿਭਾਵੇਤਬ੍ਬੋ. ਪਸ੍ਸਿਤਬ੍ਬਮੇਵ ਪਸ੍ਸਤੀਤਿ ਦਿਬ੍ਬਚਕ੍ਖੁ-ਪਞ੍ਞਾਚਕ੍ਖੁ-ਧਮ੍ਮਚਕ੍ਖੁ-ਬੁਦ੍ਧਚਕ੍ਖੁ-ਸਮਨ੍ਤਚਕ੍ਖੁ-ਸਙ੍ਖਾਤੇਹਿ ਞਾਣਚਕ੍ਖੂਹਿ ਪਸ੍ਸਿਤਬ੍ਬਂ ਪਸ੍ਸਤਿ ਏਵ. ਅਥ ਵਾ ਜਾਨਂ ਜਾਨਾਤੀਤਿ ਯਥਾ ਅਞ੍ਞੇ ਸਵਿਪਲ੍ਲਾਸਾ ਕਾਮਰੂਪਪਰਿਞ੍ਞਾਵਾਦਿਨੋ ਜਾਨਨ੍ਤਾਪਿ ਵਿਪਲ੍ਲਾਸਵਸੇਨ ਜਾਨਨ੍ਤਿ, ਨ ਏਵਂ ਭਗਵਾ. ਭਗਵਾ ਪਨ ਪਹੀਨਵਿਪਲ੍ਲਾਸਤ੍ਤਾ ਜਾਨਨ੍ਤੋ ਜਾਨਾਤਿ ਏਵ, ਦਿਟ੍ਠਿਦਸ੍ਸਨਸ੍ਸ ਅਭਾਵਾ ਪਸ੍ਸਨ੍ਤੋ ਪਸ੍ਸਤਿ ਏਵਾਤਿ ਅਤ੍ਥੋ.

ਦਸ੍ਸਨਪਰਿਣਾਯਕਟ੍ਠੇਨਾਤਿ ਯਥਾ ਚਕ੍ਖੁ ਸਤ੍ਤਾਨਂ ਦਸ੍ਸਨਤ੍ਥਂ ਪਰਿਣੇਤਿ ਸਾਧੇਤਿ, ਏਵਂ ਲੋਕਸ੍ਸ ਯਾਥਾਵਦਸ੍ਸਨਸਾਧਨਤੋਪਿ ਦਸ੍ਸਨਕਿਚ੍ਚਪਰਿਣਾਯਕਟ੍ਠੇਨ ਚਕ੍ਖੁਭੂਤੋ, ਪਞ੍ਞਾਚਕ੍ਖੁਮਯਤ੍ਤਾ ਵਾ ਸਯਮ੍ਭੂਞਾਣੇਨ ਪਞ੍ਞਾਚਕ੍ਖੁਂ ਭੂਤੋ ਪਤ੍ਤੋਤਿ ਵਾ ਚਕ੍ਖੁਭੂਤੋ. ਞਾਣਭੂਤੋਤਿ ਏਤਸ੍ਸ ਚ ਏਵਮੇਵ ਅਤ੍ਥੋ ਦਟ੍ਠਬ੍ਬੋ. ਧਮ੍ਮਾ ਵਾ ਬੋਧਿਪਕ੍ਖਿਯਾ, ਤੇਹਿ ਉਪ੍ਪਨ੍ਨਤ੍ਤਾ ਲੋਕਸ੍ਸ ਚ ਤਦੁਪ੍ਪਾਦਨਤੋ ਅਨਞ੍ਞਸਾਧਾਰਣਂ ਵਾ ਧਮ੍ਮਂ ਪਤ੍ਤੋ ਅਧਿਗਤੋਤਿ ਧਮ੍ਮਭੂਤੋ. ‘‘ਬ੍ਰਹ੍ਮਾ’’ਵੁਚ੍ਚਤਿ ਸੇਟ੍ਠਟ੍ਠੇਨ ਮਗ੍ਗਞਾਣਂ, ਤੇਨ ਉਪ੍ਪਨ੍ਨਤ੍ਤਾ ਲੋਕਸ੍ਸ ਚ ਤਦੁਪ੍ਪਾਦਨਤੋ ਤਞ੍ਚ ਸਯਮ੍ਭੂਞਾਣੇਨ ਪਤ੍ਤੋਤਿ ਬ੍ਰਹ੍ਮਭੂਤੋ. ਚਤੁਸਚ੍ਚਧਮ੍ਮਂ ਵਦਤੀਤਿ ਵਤ੍ਤਾ. ਚਿਰਂ ਸਚ੍ਚਪਟਿਵੇਧਂ ਪਵਤ੍ਤੇਨ੍ਤੋ ਵਦਤੀਤਿ ਪਵਤ੍ਤਾ. ਅਤ੍ਥਂ ਨੀਹਰਿਤ੍ਵਾਤਿ ਦੁਕ੍ਖਾਦਿਅਤ੍ਥਂ ਉਦ੍ਧਰਿਤ੍ਵਾ. ਪਰਮਤ੍ਥਂ ਵਾ ਨਿਬ੍ਬਾਨਂ ਪਾਪਯਿਤਾ. ਅਮਤਸਚ੍ਛਿਕਿਰਿਯਂ ਸਤ੍ਤੇਸੁ ਉਪ੍ਪਾਦੇਨ੍ਤੋ ਅਮਤਂ ਦਦਾਤੀਤਿ ਅਮਤਸ੍ਸ ਦਾਤਾ. ਬੋਧਿਪਕ੍ਖਿਯਧਮ੍ਮਾਨਂ ਤਦਾਯਤ੍ਤਭਾਵਤੋ ਧਮ੍ਮਸ੍ਸਾਮੀ. ਪੁਨਪ੍ਪੁਨਂ ਯਾਚਾਪੇਨ੍ਤੋ ਭਾਰਿਯਂ ਕਰੋਨ੍ਤੋ ਗਰੁਂ ਕਰੋਤਿ ਨਾਮ, ਤਥਾ ਦੁਵਿਞ੍ਞੇਯ੍ਯਂ ਕਤ੍ਵਾ ਕਥੇਨ੍ਤੋਪਿ.

ਚਕ੍ਖੁਨਾ ਵਿਜ੍ਜਮਾਨੇਨ ਲੋਕਸਞ੍ਞੀ ਹੋਤਿ, ਨ ਤਸ੍ਮਿਂ ਅਸਤਿ. ਨ ਹਿ ਅਜ੍ਝਤ੍ਤਿਕਾਯਤਨਵਿਰਹੇਨ ਲੋਕਸਮਞ੍ਞਾ ਅਤ੍ਥਿ. ਤੇਨਾਹ ‘‘ਚਕ੍ਖੁਞ੍ਹਿ ਲੋਕੋ’’ਤਿਆਦਿ. ਅਪ੍ਪਹੀਨਦਿਟ੍ਠੀਤਿ ਅਸਮੂਹਤਸਕ੍ਕਾਯਦਿਟ੍ਠਿਕੋ ਘਨਵਿਨਿਬ੍ਭੋਗਂ ਕਾਤੁਂ ਅਸਕ੍ਕੋਨ੍ਤੋ ਸਮੁਦਾਯਂ ਵਿਯ ਅਵਯਵਂ ‘‘ਲੋਕੋ’’ਤਿ ਸਞ੍ਜਾਨਾਤਿ ਚੇਵ ਮਞ੍ਞਤਿ ਚ. ਤਥਾਤਿ ਇਮਿਨਾ ‘‘ਲੋਕੋਤਿ ਸਞ੍ਜਾਨਾਤਿ ਚੇਵ ਮਞ੍ਞਤਿ ਚਾ’’ਤਿ ਪਦਤ੍ਤਯਂ ਆਕਡ੍ਢਤਿ. ਤਸ੍ਸਾਤਿ ਪੁਥੁਜ੍ਜਨਸ੍ਸ, ਚਕ੍ਕਵਾਲ਼ਲੋਕਸ੍ਸ ਵਾ. ਚਕ੍ਖਾਦਿਮੇਵ ਹਿ ਸਹੋਕਾਸੇਨ ‘‘ਚਕ੍ਕਵਾਲ਼ੋ’’ਤਿ ਪੁਥੁਜ੍ਜਨੋ ਸਞ੍ਜਾਨਾਤਿ. ਗਮਨੇਨਾਤਿ ਪਦਸਾ ਗਮਨੇਨ. ਨ ਸਕ੍ਕਾ ਤੇਸਂ ਅਨਨ੍ਤਤ੍ਤਾ. ਲੁਜ੍ਜਨਟ੍ਠੇਨਾਤਿ ਅਭਿਸਙ੍ਖਾਰਲੋਕਵਸੇਨ ਲੋਕਸ੍ਸ ਅਨ੍ਤਂ ਦਸ੍ਸੇਤੁਂ ਵੁਤ੍ਤਂ. ਤਸ੍ਸ ਅਨ੍ਤੋ ਨਾਮ ਨਿਬ੍ਬਾਨਂ. ਤਂ ਪਤ੍ਤੁਂ ਸਕ੍ਕਾ ਸਮ੍ਮਾਪਟਿਪਤ੍ਤਿਯਾ ਪਤ੍ਤਬ੍ਬਤ੍ਤਾ. ਚਕ੍ਕਵਾਲ਼ਲੋਕਸ੍ਸ ਪਨ ਅਨ੍ਤੋ ਨਾਮ, ਨਤ੍ਥਿ ਤਸ੍ਸ ਗਮਨੇਨ ਅਪ੍ਪਤ੍ਤਬ੍ਬਤ੍ਤਾ.

ਇਮੇਹਿ ਪਦੇਹੀਤਿ ਇਮੇਹਿ ਵਾਕ੍ਯਵਿਭਾਗੇਹਿ ਪਦੇਹਿ. ਤਾਨਿ ਪਨ ਅਕ੍ਖਰਸਮੁਦਾਯਲਕ੍ਖਣਾਨੀਤਿ ਆਹ ‘‘ਅਕ੍ਖਰਸਮ੍ਪਿਣ੍ਡਨੇਹੀ’’ਤਿ. ਪਾਟਿਯੇਕ੍ਕਅਕ੍ਖਰੇਹੀਤਿ ਤਸ੍ਮਿਂ ਤਸ੍ਮਿਂ ਪਦੇ ਪਟਿਨਿਯਤਸਨ੍ਨਿਵੇਸੇਹਿ ਵਿਸੁਂ ਵਿਸੁਂ ਚਿਤ੍ਤੇਨ ਗਯ੍ਹਮਾਨੇਹਿ ਅਕ੍ਖਰੇਹੀਤਿ ਅਤ੍ਥੋ.

ਗਮਨਟ੍ਠੇਨ ‘‘ਪਣ੍ਡਾ’’ ਵੁਚ੍ਚਤਿ ਪਞ੍ਞਾ, ਤਾਯ ਇਤੋ ਗਤੋ ਪਤ੍ਤੋਤਿ ਪਣ੍ਡਿਤੋ, ਪਞ੍ਞਵਾ. ਮਹਾਪਞ੍ਞਤਾ ਨਾਮ ਪਟਿਸਮ੍ਭਿਦਾਵਸੇਨ ਵੇਦਿਤਬ੍ਬਾਤਿ ਆਹ ‘‘ਮਹਨ੍ਤੇ ਅਤ੍ਥੇ’’ਤਿਆਦਿ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ ਪਠਮਵਿਕਪ੍ਪੇ, ਦੁਤਿਯਵਿਕਪ੍ਪੇ ਪਨ ਪਚ੍ਚਾਮਸਨਨ੍ਤਿ ਆਹ ‘‘ਤਂ ਬ੍ਯਾਕਤ’’ਨ੍ਤਿ.

ਲੋਕਨ੍ਤਗਮਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਕਾਮਗੁਣਸੁਤ੍ਤਵਣ੍ਣਨਾ

੧੧੭. ਚੇਤਸੋਤਿ ਕਰਣੇ ਸਾਮਿਵਚਨਂ. ਚਿਤ੍ਤੇਨ ਸਂਫੁਸਨਂ ਨਾਮ ਅਨੁਭਵੋਤਿ ਆਹ ‘‘ਚਿਤ੍ਤੇਨ ਅਨੁਭੂਤਪੁਬ੍ਬਾ’’ਤਿ. ਉਤੁਤ੍ਤਯਾਨੁਰੂਪਤਾਵਸੇਨ ਪਾਸਾਦਤ੍ਤਯਂ, ਤਂ ਵਸੇਨ ਤਿਵਿਧਨਾਟਕਭੇਦੋ. ਮਨੋਰਮ੍ਮਤਾਮਤ੍ਤੇਨ ਕਾਮਗੁਣਂ ਕਤ੍ਵਾ ਦਸ੍ਸਿਤਂ, ਨ ਕਾਮਵਸੇਨ. ਨ ਹਿ ਅਭਿਨਿਕ੍ਖਮਨਤੋ ਉਦ੍ਧਂ ਬੋਧਿਸਤ੍ਤਸ੍ਸ ਕਾਮਵਿਤਕ੍ਕਾ ਭੂਤਪੁਬ੍ਬਾ. ਤੇਨਾਹ ਮਾਰੋ ਪਾਪਿਮਾ –

‘‘ਸਤ੍ਤ ਵਸ੍ਸਾਨਿ ਭਗਵਨ੍ਤਂ, ਅਨੁਬਨ੍ਧਿਂ ਪਦਾਪਦਂ;

ਓਤਾਰਂ ਨਾਧਿਗਚ੍ਛਿਸ੍ਸਂ, ਸਮ੍ਬੁਦ੍ਧਸ੍ਸ ਸਤੀਮਤੋ’’ਤਿ. (ਸੁ. ਨਿ. ੪੪੮);

ਮੇਤ੍ਤੇਯ੍ਯੋ ਨਾਮਾਤਿਆਦਿ ਅਨਾਗਤਾਰਮ੍ਮਣਦਸ੍ਸਨਮਤ੍ਤਂ, ਨ ਬੋਧਿਸਤ੍ਤਸ੍ਸ ਏਵਂ ਉਪ੍ਪਜ੍ਜਤੀਤਿ. ਅਤ੍ਤਾ ਪਿਯਾਯਿਤਬ੍ਬਰੂਪੋ ਏਤਸ੍ਸਾਤਿ ਅਤ੍ਤਰੂਪੋ, ਉਤ੍ਤਰਪਦੇ ਪੁਰਿਮਪਦਲੋਪੇਨਾਤਿ ‘‘ਅਤ੍ਤਨੋ ਹਿਤਕਾਮਜਾਤਿਕੇਨਾ’’ਤਿ ਅਤ੍ਥੋ ਵੁਤ੍ਤੋ. ਅਤ੍ਤਰੂਪੇਨਾਤਿ ਵਾ ਪੀਤਿਸੋਮਨਸ੍ਸੇਹਿ ਗਹਿਤਸਭਾਵੇਨ ਤੁਟ੍ਠਪਹਟ੍ਠੇਨ ਉਦਗ੍ਗੁਦਗ੍ਗੇਨ. ਅਪ੍ਪਮਾਦੋਤਿ ਅਪ੍ਪਮਜ੍ਜਨਂ ਕੁਸਲਧਮ੍ਮੇਸੁ ਅਖਣ੍ਡਕਾਰਿਤਾਤਿ ਆਹ ‘‘ਸਾਤਚ੍ਚਕਿਰਿਯਾ’’ਤਿ. ਅਵੋਸ੍ਸਗ੍ਗੋਤਿ ਚਿਤ੍ਤਸ੍ਸ ਕਾਮਗੁਣੇਸੁ ਅਵੋਸ੍ਸਜ੍ਜਨਂ ਪਕ੍ਖਨ੍ਦਿਤੁਂ ਅਪ੍ਪਦਾਨਂ. ਪੁਰਿਮੋ ਵਿਕਪ੍ਪੋ ਕੁਸਲਾਨਂ ਧਮ੍ਮਾਨਂ ਕਰਣਵਸੇਨ ਦਸ੍ਸਿਤੋ, ਪਚ੍ਛਿਮੋ ਅਕੁਸਲਾਨਂ ਅਕਰਣਵਸੇਨ. ਦ੍ਵੇ ਧਮ੍ਮਾਤਿ ਅਪ੍ਪਮਾਦੋ ਸਤੀਤਿ ਦ੍ਵੇ ਧਮ੍ਮਾ. ਅਪ੍ਪਮਾਦੋ ਸਤਿ ਚ ਤਥਾ ਪਵਤ੍ਤਾ ਚਤ੍ਤਾਰੋ ਕੁਸਲਧਮ੍ਮਕ੍ਖਨ੍ਧਾ ਵੇਦਿਤਬ੍ਬਾ. ਕਤ੍ਤਬ੍ਬਾਤਿ ਪਵਤ੍ਤੇਤਬ੍ਬਾ.

ਤਸ੍ਮਿਂ ਆਯਤਨੇਤਿ ਤਸ੍ਮਿਂ ਨਿਬ੍ਬਾਨਸਞ੍ਞਿਤੇ ਕਾਰਣੇ ਪਟਿਵੇਧੇ. ਤਂ ਕਾਰਣਨ੍ਤਿ ਛਨ੍ਨਂ ਆਯਤਨਾਨਂ ਕਾਰਣਂ. ਸਲ਼ਾਯਤਨਂ ਨਿਰੁਜ੍ਝਤਿ ਏਤ੍ਥਾਤਿ ਸਲ਼ਾਯਤਨਨਿਰੋਧੋ ਵੁਚ੍ਚਤਿ ਨਿਬ੍ਬਾਨਂ. ਤੇਨਾਹ ‘‘ਨਿਬ੍ਬਾਨਂ. ਤਂ ਸਨ੍ਧਾਯਾ’’ਤਿਆਦਿ. ਨਿਬ੍ਬਾਨਸ੍ਮਿਨ੍ਤਿ ਨਿਬ੍ਬਾਨਮ੍ਹਿ.

ਕਾਮਗੁਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੬. ਸਕ੍ਕਪਞ੍ਹਸੁਤ੍ਤਾਦਿਵਣ੍ਣਨਾ

੧੧੮-੧੧੯. ਦਿਟ੍ਠੇਤਿ ਪਚ੍ਚਕ੍ਖਭੂਤੇ. ਧਮ੍ਮੇਤਿ ਉਪਾਦਾਨਕ੍ਖਨ੍ਧਧਮ੍ਮੇ. ਤਤ੍ਥ ਹਿ ਅਤ੍ਤਾਤਿ ਭਵਤਿ ਸਞ੍ਞਾ ਦਿਟ੍ਠਿ ਚਾਤਿ ਅਤ੍ਤਭਾਵਸਞ੍ਞਾ. ਤੇਨਾਹ – ‘‘ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ’’ਤਿ. ‘‘ਤਨ੍ਨਿਸ੍ਸਿਤ’’ਨ੍ਤਿ ਏਤ੍ਥ ਤਂ-ਸਦ੍ਦੇਨ ਹੇਟ੍ਠਾ ਅਭਿਨਨ੍ਦਨਾਦਿਪਰਿਯਾਯੇਨ ਵੁਤ੍ਤਾ ਤਣ੍ਹਾ ਪਚ੍ਚਾਮਟ੍ਠਾਤਿ ਆਹ – ‘‘ਤਣ੍ਹਾਨਿਸ੍ਸਿਤ’’ਨ੍ਤਿ. ਤਂ ਉਪਾਦਾਨਂ ਏਤਸ੍ਸਾਤਿ ਤਦੁਪਾਦਾਨਂ. ਤੇਨਾਹ – ‘‘ਤਂਗਹਣ’’ਨ੍ਤਿਆਦਿ. ਤਣ੍ਹੁਪਾਦਾਨਸਙ੍ਖਾਤਂ ਗਹਣਂ ਏਤਸ੍ਸਾਤਿ ਤਂਗਹਣਂ. ਛਟ੍ਠਂ ਉਤ੍ਤਾਨਮੇਵ ਪਞ੍ਚਮੇ ਵੁਤ੍ਤਨਯਤ੍ਤਾ.

ਸਕ੍ਕਪਞ੍ਹਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਸਾਰਿਪੁਤ੍ਤਸਦ੍ਧਿਵਿਹਾਰਿਕਸੁਤ੍ਤਵਣ੍ਣਨਾ

੧੨੦. ਘਟੇਸ੍ਸਤੀਤਿ ਪੁਬ੍ਬੇਨਾਪਰਂ ਘਟਿਤਂ ਸਮ੍ਬਨ੍ਧਂ ਕਰਿਸ੍ਸਤਿ. ਵਿਚ੍ਛੇਦਨ੍ਤਿ ਬ੍ਰਹ੍ਮਚਰਿਯਸ੍ਸ ਵਿਰੋਧਿਪਚ੍ਚਯਸਮੁਪ੍ਪਤ੍ਤਿਯਾ ਉਚ੍ਛੇਦਂ.

੮. ਰਾਹੁਲੋਵਾਦਸੁਤ੍ਤਵਣ੍ਣਨਾ

੧੨੧. ਯੇ ਧਮ੍ਮਾ ਸਮ੍ਮਦੇਵ ਭਾਵਿਤਾ ਬਹੁਲੀਕਤਾ ਵਿਮੁਤ੍ਤਿਯਾ ਅਰਹਤ੍ਤਸ੍ਸ ਸਚ੍ਛਿਕਿਰਿਯਾਯ ਸਂਵਤ੍ਤਨ੍ਤਿ, ਤੇ ਸਦ੍ਧਾਦਯੋ ਸਮ੍ਭਾਰਾ ਵਿਮੁਤ੍ਤਿਪਰਿਪਾਚਨਿਯਾਤਿ ਅਧਿਪ੍ਪੇਤਾ. ਪਰਿਪਾਚੇਨ੍ਤੀਤਿ ਪਰਿਪਾਕਂ ਪਰਿਣਾਮਂ ਗਮੇਨ੍ਤਿ. ਧਮ੍ਮਾਤਿ ਕਾਰਣਭੂਤਾ ਧਮ੍ਮਾ. ਵਿਸੁਦ੍ਧਿਕਾਰਣਵਸੇਨਾਤਿ ਵਿਸੁਦ੍ਧਿਕਾਰਣਤਾਵਸੇਨ, ਸਾ ਪਨ ਸਦ੍ਧਿਨ੍ਦ੍ਰਿਯਾਦੀਨਂ ਕਾਰਣਤੋ ਵਿਸੁਦ੍ਧਿ. ਯਥਾ ਨਾਮ ਜਾਤਿਸਮ੍ਪਨ੍ਨਸ੍ਸ ਖਤ੍ਤਿਯਕੁਮਾਰਸ੍ਸ ਵਿਪਕ੍ਖਵਿਗਮੇਨ ਪਕ੍ਖਸਙ੍ਗਹੇਨ ਪਵਤ੍ਤਿਟ੍ਠਾਨਸਮ੍ਪਤ੍ਤਿਯਾ ਚ ਪਰਿਸੁਦ੍ਧਿ ਹੋਤਿ, ਏਵਮੇਵਂ ਦਟ੍ਠਬ੍ਬਾਤਿ ਦਸ੍ਸੇਨ੍ਤੋ ‘‘ਵੁਤ੍ਤਂ ਹੇਤ’’ਨ੍ਤਿਆਦਿਮਾਹ.

ਅਸ੍ਸਦ੍ਧਾਦਯੋਪਿ ਪੁਗ੍ਗਲਾ ਸਦ੍ਧਾਦੀਨਂ ਯਾਵਦੇਵ ਪਰਿਹਾਨਾਯ ਹੋਨ੍ਤਿ, ਸਦ੍ਧਾਦਯੋ ਪਾਰਿਪੂਰਿਯਾਵ, ਤਥਾ ਪਸਾਦਨਿਯਸੁਤ੍ਤਨ੍ਤਾਦਿਪਚ੍ਚਵੇਕ੍ਖਣਾ, ਪਸਾਦਨਿਯਸੁਤ੍ਤਨ੍ਤਾ ਨਾਮ ਸਮ੍ਪਸਾਦਨੀਯਸੁਤ੍ਤਾਦਯੋ. ਸਮ੍ਮਪ੍ਪਧਾਨੇਤਿ ਸਮ੍ਮਪ੍ਪਧਾਨਸੁਤ੍ਤਨ੍ਤੇ. ਸਤਿਪਟ੍ਠਾਨੇਤਿ ਚਤ੍ਤਾਰੋ ਸਤਿਪਟ੍ਠਾਨੇ. ਝਾਨਵਿਮੋਕ੍ਖੇਤਿ ਝਾਨਾਨਿ ਚੇਵ ਵਿਮੋਕ੍ਖੇ ਚ ਉਦ੍ਦਿਸ੍ਸ ਪਵਤ੍ਤਸੁਤ੍ਤਨ੍ਤੇ. ਗਮ੍ਭੀਰਞਾਣਚਰਿਯੇਤਿ ਖਨ੍ਧਾਯਤਨਧਾਤੁਪਟਿਚ੍ਚਸਮੁਪ੍ਪਾਦਪਟਿਸਂਯੁਤ੍ਤਸੁਤ੍ਤਨ੍ਤੇ.

ਕਲ੍ਯਾਣਮਿਤ੍ਤਤਾਦਯੋਤਿ ਕਲ੍ਯਾਣਮਿਤ੍ਤਤਾ ਸੀਲਸਂਵਰੋ ਅਭਿਸਲ੍ਲੇਖਕਥਾ ਵੀਰਿਯਾਰਮ੍ਭੋ ਨਿਬ੍ਬੇਧਿਕਪਞ੍ਞਾਤਿ ਇਮੇ ਕਲ੍ਯਾਣਮਿਤ੍ਤਾਦਯੋ ਪਞ੍ਚ ਧਮ੍ਮਾ, ਯੇ ‘‘ਇਧ, ਮੇਘਿਯ, ਭਿਕ੍ਖੁ ਕਲ੍ਯਾਣਮਿਤ੍ਤੋ ਹੋਤੀ’’ਤਿਆਦਿਨਾ ਉਦਾਨੇ (ਉਦਾ. ੩੧) ਕਥਿਤਾ. ਲੋਕਂ ਵੋਲੋਕੇਨ੍ਤਸ੍ਸਾਤਿ ਆਯਸ੍ਮਤੋ ਰਾਹੁਲਸ੍ਸ ਤਾਸਞ੍ਚ ਦੇਵਤਾਨਂ ਇਨ੍ਦ੍ਰਿਯਪਰਿਪਾਕਂ ਪਸ੍ਸਨ੍ਤਸ੍ਸ. ਤਤੋ ਯੇਨ ਅਨ੍ਧਵਨਂ, ਤਤ੍ਥ ਦਿਵਾਵਿਹਾਰਾਯ ਮਹਾਸਮਾਗਮੋ ਭਵਿਸ੍ਸਤੀਤਿ. ਤਥਾ ਹਿ ਵਕ੍ਖਤਿ ‘‘ਏਤ੍ਤਕਾਤਿ ਗਣਨਾਵਸੇਨ ਪਰਿਚ੍ਛੇਦੋ ਨਤ੍ਥੀ’’ਤਿ.

ਰੁਕ੍ਖਪਬ੍ਬਤਨਿਸ੍ਸਿਤਾ ਭੂਮਟ੍ਠਕਾ, ਆਕਾਸਚਾਰਿਵਿਮਾਨਵਾਸਿਨੋ ਅਨ੍ਤਲਿਕ੍ਖਟ੍ਠਕਾ. ਧਮ੍ਮਚਕ੍ਖੁਨ੍ਤਿ ਵੇਦਿਤਬ੍ਬਾਨਿ ਚਤੁਸਚ੍ਚਧਮ੍ਮਾਨਂ ਦਸ੍ਸਨਟ੍ਠੇਨ.

ਰਾਹੁਲੋਵਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਲੋਕਕਾਮਗੁਣਵਗ੍ਗਵਣ੍ਣਨਾ ਨਿਟ੍ਠਿਤਾ.