੩. ਪਟਿਪਦਾਸੁਤ੍ਤਵਣ੍ਣਨਾ

੩. ਮਿਚ੍ਛਾ ਪਟਿਪਜ੍ਜਤਿ ਏਤਾਯਾਤਿ ਮਿਚ੍ਛਾਪਟਿਪਦਾ, ਵਟ੍ਟਗਾਮਿਮਗ੍ਗੋ ਦੁਕ੍ਖਾਵਹਤ੍ਤਾ. ਤਂ ਮਿਚ੍ਛਾਪਟਿਪਦਂ. ਤੇਨਾਹ ‘‘ਅਨਿਯ੍ਯਾਨਿਕਪਟਿਪਦਾ’’ਤਿ. ਸੋ ਪੁਞ੍ਞਾਭਿਸਙ੍ਖਾਰੋ ਕਥਂ ਮਿਚ੍ਛਾਪਟਿਪਦਾ ਹੋਤੀਤਿ? ਸਮ੍ਪਤ੍ਤਿਭਵੇ ਸੁਖਾਵਹੋਵ ਹੋਤੀਤਿ ਅਧਿਪ੍ਪਾਯੋ. ਵਟ੍ਟਸੀਸਤ੍ਤਾਤਿ ਵਟ੍ਟਪਕ੍ਖਿਯਾਨਂ ਉਤ੍ਤਮਙ੍ਗਭਾਵਤੋ. ਅਨ੍ਤਮਸੋਤਿ ਉਕ੍ਕਂਸਪਰਿਯਨ੍ਤਂ ਸਨ੍ਧਾਯ ਵਦਤਿ ਅਵਕਂਸਪਰਿਯਨ੍ਤਤੋ. ‘‘ਇਦਂ ਮੇ ਪੁਞ੍ਞਂ ਨਿਬ੍ਬਾਨਾਧਿਗਮਾਯ ਪਚ੍ਚਯੋ ਹੋਤੂ’’ਤਿ ਏਵਂ ਨਿਬ੍ਬਾਨਂ ਪਤ੍ਥੇਤ੍ਵਾ ਪਵਤ੍ਤਿਤਂ. ਪਣ੍ਣਮੁਟ੍ਠਿਦਾਨਮਤ੍ਤਨ੍ਤਿ ਸਾਕਪਣ੍ਣਮੁਟ੍ਠਿਦਾਨਮਤ੍ਤਂ. ਅਪ੍ਪਤ੍ਵਾਤਿ ਅਨ੍ਤੋਗਧਹੇਤੁ ਏਸ ਨਿਦ੍ਦੇਸੋ, ਅਪਾਪੇਤ੍ਵਾਤਿ ਅਤ੍ਥੋ. ਯਦਗ੍ਗੇਨ ਵਾ ਪਟਿਪਜ੍ਜਨਤੋ ਅਰਹਤ੍ਤਂ ਪਤ੍ਤੋਤਿ ਵੁਚ੍ਚਤਿ, ਤਦਗ੍ਗੇਨ ਤਦਾਵਹਾ ਪਟਿਪਦਾਪਿ ਪਤ੍ਤਾਤਿ ਵੁਚ੍ਚਤੀਤਿ ‘‘ਅਪ੍ਪਤ੍ਵਾ’’ਤਿ ਵੁਤ੍ਤਂ. ਅਨੁਲੋਮਵਸੇਨਾਤਿ ਅਨੁਲੋਮਪਟਿਚ੍ਚਸਮੁਪ੍ਪਾਦਵਸੇਨ. ਪਟਿਲੋਮਵਸੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਪਟਿਪਦਾ ਪੁਚ੍ਛਿਤਾਤਿ ਏਤੇਨ ਪਟਿਪਦਾ ਦੇਸੇਤੁਂ ਆਰਦ੍ਧਾਤਿ ਅਯਮ੍ਪਿ ਅਤ੍ਥੋ ਸਙ੍ਗਹਿਤੋ ਯਥਾਰਦ੍ਧਸ੍ਸ ਅਤ੍ਥਸ੍ਸ ਕਥੇਤੁਕਮ੍ਯਤਾਪੁਚ੍ਛਾਯ ਇਧਾਗਤਤ੍ਤਾ. ਅਨੁਲੋਮਪਟਿਚ੍ਚਸਮੁਪ੍ਪਾਦਦੇਸਨਾਯਮ੍ਪੇਤ੍ਥ ਬ੍ਯਤਿਰੇਕਮੁਖੇਨ ਅਵਿਜ੍ਜਾਦਿਨਿਰੋਧਾ ਪਨ ਵਿਜ੍ਜਾਯ ਸਤਿ ਹੋਤਿ ਸਙ੍ਖਾਰਾਨਂ ਅਸਮ੍ਭਵੋਤਿ ਵੁਤ੍ਤਂ ‘‘ਨਿਬ੍ਬਾਨਂ ਭਾਜਿਤ’’ਨ੍ਤਿ. ਸਰੂਪੇਨ ਪਨ ਤਾਯ ਵਟ੍ਟਮੇਵ ਪਕਾਸਿਤਂ. ਵਕ੍ਖਤਿ ਹਿ ਪਰਿਯੋਸਾਨੇ ‘‘ਵਟ੍ਟਵਿਵਟ੍ਟਮੇਵ ਕਥਿਤ’’ਨ੍ਤਿ. ਨਿਯ੍ਯਾਤਨੇਤਿ ਨਿਗਮਨੇ. ਫਲੇਨਾਤਿ ਪਤ੍ਤਬ੍ਬਫਲੇਨ ਪਟਿਪਦਾਯ ਸਮ੍ਪਾਪਕਹੇਤੁਨੋ ਦਸ੍ਸਿਤਤ੍ਤਾ. ਯਥਾ ਹਿ ਤਿਵਿਧੋ ਹੇਤੁ ਞਾਪਕੋ, ਨਿਬ੍ਬਤ੍ਤਕੋ, ਸਮ੍ਪਾਪਕੋਤਿ, ਏਵਂ ਤਿਵਿਧਂ ਫਲਂ ਞਾਪੇਤਬ੍ਬਂ, ਨਿਬ੍ਬਤ੍ਤੇਤਬ੍ਬਂ, ਸਮ੍ਪਾਪੇਤਬ੍ਬਨ੍ਤਿ. ਤਸ੍ਮਾ ਪਤ੍ਤਬ੍ਬਫਲੇਨ ਨਿਬ੍ਬਾਨੇਨ ਤਂਸਮ੍ਪਾਪਕਹੇਤੁਭੂਤਾਯ ਪਟਿਪਦਾਯ ਦਸ੍ਸਿਤਤ੍ਤਾਤਿ ਅਤ੍ਥੋ. ਤੇਨਾਹ ‘‘ਫਲੇਨ ਹੇਤ੍ਥਾ’’ਤਿਆਦਿ. ਅਯਂ ਵੁਚ੍ਚਤੀਤਿ ਏਵਂ ਨਿਬ੍ਬਾਨਫਲਾ ਅਯਂ ‘‘ਸਮ੍ਮਾਪਟਿਪਦਾ’’ਤਿ ਵੁਚ੍ਚਤਿ. ਅਸੇਸਵਿਰਾਗਾ ਅਸੇਸਨਿਰੋਧਾਤਿ ਸਮੁਚ੍ਛੇਦਪ੍ਪਹਾਨਵਸੇਨ ਅਵਿਜ੍ਜਾਯ ਅਸੇਸਵਿਰਜ੍ਜਨਤੋ ਅਸੇਸਨਿਰੁਜ੍ਝਨਤੋ ਚ. ਪਦਦ੍ਵਯੇਨਪਿ ਅਨੁਪ੍ਪਾਦਨਿਰੋਧਮੇਵ ਵਦਤਿ. ਤਞ੍ਹਿ ਨਿਬ੍ਬਾਨਂ. ਦੁਤਿਯਵਿਕਪ੍ਪੇ ਅਯਂ ਏਤ੍ਥ ਅਧਿਪ੍ਪਾਯੋ – ਯੇਨ ਮਗ੍ਗੇਨ ਕਰਣਭੂਤੇਨ ਅਸੇਸਨਿਰੋਧੋ ਹੋਤਿ, ਅਵਿਜ੍ਜਾਯ ਅਸੇਸਨਿਰੋਧੋ ਯਂ ਆਗਮ੍ਮ ਹੋਤਿ, ਤਂ ਮਗ੍ਗਂ ਦਸ੍ਸੇਤੁਨ੍ਤਿ. ਏਵਞ੍ਹਿ ਸਤੀਤਿ ਏਵਂ ਪਦਭਾਜਨਸ੍ਸ ਨਿਬ੍ਬਾਨਸ੍ਸ ਪਦਤ੍ਥੇ ਸਤਿ. ਸਾਨੁਭਾਵਾ ਪਟਿਪਦਾ ਵਿਭਤ੍ਤਾ ਹੋਤੀਤਿ ਅਵਿਜ੍ਜਾਯ ਅਸੇਸਨਿਰੋਧਹੇਤੁਪਟਿਪਦਾ ਤਤ੍ਥ ਸਾਤਿਸਯਸਾਮਤ੍ਥਿਯਸਮਾਯੋਗਤੋ ਸਾਨੁਭਾਵਾ ਵਿਭਤ੍ਤਾ ਹੋਤਿ. ਮਿਚ੍ਛਾਪਟਿਪਦਾਗਹਣੇਨੇਤ੍ਥ ਵਟ੍ਟਸ੍ਸਪਿ ਵਿਭਤ੍ਤਤ੍ਤਾ ਵੁਤ੍ਤਂ ‘‘ਵਟ੍ਟਵਿਵਟ੍ਟਮੇਵ ਕਥਿਤ’’ਨ੍ਤਿ.

ਪਟਿਪਦਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.