੩. ਤਤਿਯਵਗ੍ਗੋ

੧. ਸਮ੍ਬਹੁਲਸੁਤ੍ਤਵਣ੍ਣਨਾ

੧੫੭. ਜਟਾਚੁਮ੍ਬਟਕੇਨਾਤਿ ਸੀਸੇ ਪਟਿਮੁਕ੍ਕੇਨ ਜਟਾਕਲਾਪੇਨ. ਅਪਰਿਗ੍ਗਹਬ੍ਰਾਹ੍ਮਣਪਬ੍ਬਜਿਤਾ ਹਿ ਜਟਾਯ ਉਞ੍ਛਾਚਰਿਯਂ ਚਰਨ੍ਤਿ. ਉਦੁਮ੍ਬਰਦਣ੍ਡਞ੍ਹਿ ਅਤ੍ਤਗੁਤ੍ਤਤ੍ਥਾਯ ਗਹਿਤਂ ਤੇਸਂ ਅਪ੍ਪਿਚ੍ਛਭਾਵਪ੍ਪਕਾਸਨਂ. ਤੇਨਾਹ ‘‘ਅਪ੍ਪਿਚ੍ਛਭਾਵਪ੍ਪਕਾਸਨਤ੍ਥ’’ਨ੍ਤਿ. ਸੀਸਂ ਓਕਮ੍ਪੇਤ੍ਵਾਤਿ ਏਤ੍ਥ ਅਤਿਵਿਯ ਸੀਸਸ੍ਸ ਓਕਮ੍ਪਿਤਭਾਵਂ ਦਸ੍ਸੇਤੁਂ ‘‘ਹਨੁਕੇਨ ਉਰਂ ਪਹਰਨ੍ਤੋ ਅਧੋਨਤਂ ਕਤ੍ਵਾ’’ਤਿ ਵੁਤ੍ਤਂ. ਜਿਵ੍ਹਂ ਨੀਹਰਿਤ੍ਵਾਤਿ ਲਮ੍ਬਨਚਾਲਨਵਸੇਨ ਮੁਖਤੋ ਨਿਕ੍ਖਾਮੇਤ੍ਵਾ. ਤੇਨਾਹ ‘‘ਉਦ੍ਧ’’ਨ੍ਤਿਆਦਿ. ਤਿਸਾਖਨ੍ਤਿ ਤਿਭਙ੍ਗਭਕੁਟਿ ਵਿਯ ਨਲਾਟੇ ਜਾਤਤ੍ਤਾ ਨਲਾਟਿਕਂ. ਤੇਨਾਹ ‘‘ਨਲਾਟੇ ਉਟ੍ਠਿਤਂ ਵਲਿਤ੍ਤਯ’’ਨ੍ਤਿ, ਤਿਭਙ੍ਗਵਲਿਕਂ ਨਲਾਟੇ ਕਤ੍ਵਾਤਿ ਅਤ੍ਥੋ. ਅਤ੍ਤਨੋਵ ਤੇਲੇਤਿ ਅਤ੍ਤਨੋਵ ਪਾਪਕਮ੍ਮਨਿਬ੍ਬਤ੍ਤਕੇ ਤੇਲੇ, ਪਚਿਤਬ੍ਬਟ੍ਠਾਨਗੇਹੇਤਿ ਅਧਿਪ੍ਪਾਯੋ.

ਸਮ੍ਬਹੁਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਸਮਿਦ੍ਧਿਸੁਤ੍ਤਵਣ੍ਣਨਾ

੧੫੮. ਮਯ੍ਹਂ ਲਾਭਾਤਿ ਏਵਰੂਪਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਸਤ੍ਥੁਸ੍ਸ ਪਟਿਲਾਭੋ, ਏਵਰੂਪਸ੍ਸ ਚ ਨਾਮ ਨਿਯ੍ਯਾਨਿਕਸ੍ਸ ਸਦ੍ਧਮ੍ਮਸ੍ਸ ਪਟਿਲਾਭੋ, ਏਵਰੂਪਾਨਞ੍ਚ ਸੁਪ੍ਪਟਿਪਨ੍ਨਾਨਂ ਸਬ੍ਰਹ੍ਮਚਾਰੀਨਂ ਪਟਿਲਾਭੋ, ਏਤੇ ਮਯ੍ਹਂ ਸੁਲਦ੍ਧਲਾਭਾ. ਮਯ੍ਹਂ ਸੁਲਦ੍ਧਨ੍ਤਿ ਯਞ੍ਚੇਤਂ ਮਮ ਨਿਯ੍ਯਾਨਿਕਸਾਸਨੇ ਪਬ੍ਬਜ੍ਜਾ ਉਪਸਮ੍ਪਦਾ, ਤਸ੍ਮਿਞ੍ਚ ਅਭਿਰਤੀਤਿ ਸਬ੍ਬਞ੍ਚੇਤਂ ਮਯਾ ਸੁਲਦ੍ਧਂ. ਯਥਾ ਪਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਪ੍ਪਨ੍ਨੋ, ਤਂ ਦਸ੍ਸੇਤੁਂ ‘‘ਸੋ ਕਿਰਾ’’ਤਿਆਦਿ ਵੁਤ੍ਤਂ. ਚਰਿਤਾਨੁਰੂਪਵਸੇਨ ਗਹਿਤਂ ਮੂਲਕਮ੍ਮਟ੍ਠਾਨਂ. ਪਾਸਾਦਿਕਨ੍ਤਿ ਪਸਾਦਾਵਹਂ. ਏਵਮਹੋਸੀਤਿ ‘‘ਲਾਭਾ ਵਤ ਮੇ’’ਤਿਆਦਿਨਾ ਏਵਂ ਪਰਿਵਿਤਕ੍ਕੋ ਅਹੋਸਿ. ਨਿਸਿਨ੍ਨਸਦਿਸੋਤਿ ਨਿਸਿਨ੍ਨੋ ਵਿਯ. ਤਸ੍ਮਿਂਯੇਵ ਠਾਨੇਤਿ ਯਸ੍ਮਿਂ ਠਾਨੇ ਨਿਸਿਨ੍ਨਂ ਮਾਰੋ ਉਪਸਙ੍ਕਮਿ, ਤਸ੍ਮਿਂਯੇਵ ਠਾਨੇ. ਤਸ੍ਸਾਤਿ ਸਮਿਦ੍ਧਿਤ੍ਥੇਰਸ੍ਸ. ਕਮ੍ਮਟ੍ਠਾਨਂ ਸਪ੍ਪਾਯਨ੍ਤਿ ਕਮ੍ਮਟ੍ਠਾਨਭਾਵਨਾਯ ਅਨੁਯੁਞ੍ਜਨਂ ਸਪ੍ਪਾਯਂ ਉਪਕਾਰਾਵਹਂ ਭਵਿਸ੍ਸਤਿ.

ਮਯ੍ਹਨ੍ਤਿ ਮਯਾ. ਸਤਿ ਚ ਪਞ੍ਞਾ ਚ ਸਤਿਪਞ੍ਞਾ, ਤਾ ਅਰਿਯਮਗ੍ਗੇਨ ਜਾਨਨਸਮਤ੍ਥਨਭਾਵੇਨ ਅਵਬੁਦ੍ਧਾ. ਥੇਰੋ ਕਿਰ ਤਦਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਸਿ. ਕਾਮਨ੍ਤਿ ਯਥਾਰੁਚਿ. ਕੇਚਿ ‘‘ਕਾਮਂ ਕਰਸ੍ਸੂਤਿ ਆਯਸ੍ਮਤੋ ‘ਕਾਮਾ’ਤਿ ਮਾਰਸ੍ਸ ਆਲਪਨ’’ਨ੍ਤਿ ਵਦਨ੍ਤਿ. ਵਿਭਿਂਸਕਾਰਹਾਨੀਤਿ ਭਯਾਨਕਾਰਹਾਨਿ. ਰੂਪਾਨੀਤਿ ਵਿਪ੍ਪਕਾਰਾਨਿ. ਵਿਪ੍ਪਕਾਰਤ੍ਥੋਪਿ ਹਿ ਰੂਪਸਦ੍ਦੋ ‘‘ਰੂਪਂ ਦਸ੍ਸੇਤਿ ਅਨਪ੍ਪਕ’’ਨ੍ਤਿਆਦੀਸੁ ਵਿਯ. ਨ ਕਮ੍ਪੇਸ੍ਸਸੀਤਿ ਸਮਣਧਮ੍ਮਕਰਣਤੋ ਨ ਚਲਿਸ੍ਸਸਿ.

ਸਮਿਦ੍ਧਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਗੋਧਿਕਸੁਤ੍ਤਵਣ੍ਣਨਾ

੧੫੯. ਪਬ੍ਬਤਸ੍ਸ ਪਸ੍ਸੇਤਿ ਪਬ੍ਬਤਪਾਦੇ ਉਪਚ੍ਚਕਾਯਂ. ਸਮਯੇ ਸਮਯੇ ਲਦ੍ਧਤ੍ਤਾ ਸਾਮਯਿਕਂ. ਤੇਨਾਹ ‘‘ਅਪ੍ਪਿਤਪ੍ਪਿਤਕ੍ਖਣੇ ਪਚ੍ਚਨੀਕਧਮ੍ਮੇਹਿ ਵਿਮੁਚ੍ਚਤੀ’’ਤਿ. ਲੋਕਿਯਵਿਮੁਤ੍ਤਿ ਹਿ ਅਨਚ੍ਚਨ੍ਤਪਹਾਯਿਤਾਯ ਸਮਯਵਿਮੁਤ੍ਤਿ ਨਾਮ, ਲੋਕੁਤ੍ਤਰਵਿਮੁਤ੍ਤਿ ਅਚ੍ਚਨ੍ਤਪਹਾਯਿਤਾਯ ਅਸਮਯਵਿਮੁਤ੍ਤਿ. ਤਾਹਿ ਸਮਨ੍ਨਾਗਤਾ ‘‘ਸਮਯਵਿਮੁਤ੍ਤਾ, ਅਸਮਯਵਿਮੁਤ੍ਤਾ’’ਤਿ ਚ ਵੁਚ੍ਚਨ੍ਤਿ. ਯਾਵ ਪਠਮਜ੍ਝਾਨਨਿਬ੍ਬਤ੍ਤਨਂ, ਤਾਵ ਕਸ੍ਮਾ ਪਰਿਹਾਯੀਤਿ ਅਤ੍ਥੋ? ਸਾਬਾਧਤ੍ਤਾਤਿ ਸਰੋਗਤ੍ਤਾ. ਵਾਤਪਿਤ੍ਤਸੇਮ੍ਹਵਸੇਨਾਤਿ ਕਦਾਚਿ ਵਾਤਪਿਤ੍ਤਵਸੇਨ, ਕਦਾਚਿ ਵਾਤਸੇਮ੍ਹਵਸੇਨ, ਉਭਿਨ੍ਨਮ੍ਪਿ ਸਨ੍ਨਿਪਾਤਵਸੇਨ. ਅਨੁਸਾਯਿਕੋਤਿ ਕਾਯਂ ਅਨੁਗਨ੍ਤ੍ਵਾ ਸਯਿਤੋ, ਯਾਪ੍ਯਾਮਯਭਾਵੇਨ ਠਿਤੋਤਿ ਅਤ੍ਥੋ. ਸਮਾਧਿਸ੍ਸਾਤਿ ਸਮਾਧਿਭਾਵਨਾਯ. ਉਪਕਾਰਕਧਮ੍ਮੇ ਉਤੁਭੋਜਨਾਦਿਕੇ. ਪੂਰੇਤੁਨ੍ਤਿ ਸਮੋਧਾਨੇਤੁਂ. ਪਰਿਹਾਯੀਤਿ ਸਰੀਰਸ੍ਸ ਅਕਲ੍ਲਭਾਵਤੋ.

ਆਹਰੇਯ੍ਯਨ੍ਤਿ ਜੀਵਿਤਹਰਣਤ੍ਥਾਯ ਉਪਨੇਯ੍ਯਂ. ਨਿਬਦ੍ਧਾ ਗਤਿ ਹੋਤਿ ਕੇਵਲਂ ਬ੍ਰਹ੍ਮਲੋਕੂਪਪਤ੍ਤਿਤੋ, ਨ ਸੋਤਾਪਨ੍ਨਾਦੀਨਂ ਵਿਯ ਪਰਿਚ੍ਛਿਨ੍ਨਭਾਵੇਨ. ਤੇਨਾਹ ‘‘ਬ੍ਰਹ੍ਮਲੋਕੇ ਨਿਬ੍ਬਤ੍ਤਤੀ’’ਤਿ.

ਜਲਮਾਨਾਤਿ ਸਮੁਟ੍ਠਿਤਨਿਯਤਇਦ੍ਧਿਯਾ ਅਨਞ੍ਞਸਾਧਾਰਣਪਰਿਵਾਰਸਮ੍ਪਤ੍ਤਿਯਾ ਚ ਸਦੇਵਕੇ ਲੋਕੇ ਜਲਮਾਨਾ. ਮਂਸਚਕ੍ਖੁ ਦਿਬ੍ਬਚਕ੍ਖੁ ਧਮ੍ਮਚਕ੍ਖੁ ਪਞ੍ਞਾਚਕ੍ਖੁ ਸਮਨ੍ਤਚਕ੍ਖੂਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਾ. ਆਨੁਭਾਵਧਰਾਤਿ ਅਚਿਨ੍ਤੇਯ੍ਯਾਪਰਿਮੇਯ੍ਯਬੁਦ੍ਧਾਨੁਭਾਵਸਮ੍ਪਨ੍ਨਾ. ਆਨੁਭਾਵਪਰਿਯਾਯੋਪਿ ਹਿ ਜੁਤਿ-ਸਦ੍ਦੋ ਹੋਤਿ ‘‘ਇਦ੍ਧਿਜੁਤਿਬਲਵੀਰਿਯੂਪਪਤ੍ਤੀ’’ਤਿਆਦੀਸੁ (ਜਾ. ੨.੨੨.੧੫੮੯, ੧੫੯੫) ਵਿਯ. ਅਨਵਸੇਸਤੋ ਮਾਨਂ ਸਿਯਤਿ ਸਮੁਚ੍ਛਿਨ੍ਦਤੀਤਿ ਅਗ੍ਗਮਗ੍ਗੋ ਮਾਨਸਂ. ਤਨ੍ਨਿਬ੍ਬਤ੍ਤਨਾ ਪਨ ਅਰਹਤ੍ਤਸ੍ਸ ਮਾਨਸਤਾ ਦਟ੍ਠਬ੍ਬਾ. ਸੀਲਾਦੀਨੀਤਿ ਅਨੁਤ੍ਤਰਸੀਲਾਦੀਨਿ. ਸਿਕ੍ਖਮਾਨੋਤਿ ਸਿਕ੍ਖਾਨਿ ਭਾਵੇਨ੍ਤੋ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦੇਨ੍ਤੋ. ਨ ਚਿਤ੍ਤਭਾਵਨਾ. ਤੇਨਾਹ ‘‘ਸਕਰਣੀਯੋ’’ਤਿ. ਜਨੇਤਿ ਸਤ੍ਤਸ੍ਸ ਕਾਯੇ, ਸਦੇਵਕੇ ਲੋਕੇਤਿ ਅਤ੍ਥੋ. ਵਿਸ੍ਸੁਤਾਤਿ ਅਨਞ੍ਞਸਾਧਾਰਣੇਹਿ ਸੀਲਾਦਿਗੁਣੇਹਿ ਵਿਸ੍ਸੁਤਾ.

ਵੇਦਨਂ ਵਿਕ੍ਖਮ੍ਭੇਤ੍ਵਾਤਿ ਉਪ੍ਪਨ੍ਨਂ ਦੁਕ੍ਖਵੇਦਨਂ ਪਟਿਚ੍ਚ ਉਪ੍ਪਨ੍ਨਅਤ੍ਤਕਿਲਮਥਂ ਅਨੁਪ੍ਪਾਦਨਵਸੇਨ ਵਿਕ੍ਖਮ੍ਭੇਤ੍ਵਾ ਤਂਯੇਵ ਵੇਦਨਂ ਪਰਿਗ੍ਗਹੇਤ੍ਵਾ ਪਵਤ੍ਤਵਿਪਸ੍ਸਨਾ ਵੀਥਿਮੇਵ ਓਤਰਤੀਤਿ ਕਤ੍ਵਾ ਮੂਲਕਮ੍ਮਟ੍ਠਾਨਨ੍ਤਿ ਵੁਤ੍ਤਂ. ‘‘ਸਮਸੀਸੀ ਹੁਤ੍ਵਾ ਪਰਿਨਿਬ੍ਬਾਯੀ’’ਤਿ ਵਤ੍ਵਾ ਤਸ੍ਸ ਪਭੇਦਂ ਵਿਭਜਿਤ੍ਵਾ ਇਧਾਧਿਪ੍ਪੇਤਂ ਦਸ੍ਸੇਤੁਂ ‘‘ਸਮਸੀਸੀ ਨਾਮ ਤਿਵਿਧੋ ਹੋਤੀ’’ਤਿਆਦਿਮਾਹ. ਇਰਿਯਾਪਥਵਸੇਨ ਸਮਸੀਸੀ ਇਰਿਯਾਪਥਸਮਸੀਸੀ. ਏਸ ਨਯੋ ਸੇਸਦ੍ਵਯੇਪਿ.

ਇਰਿਯਾਪਥਕੋਪਨਞ੍ਚਾਤਿ ਇਰਿਯਾਪਥੇਹਿ ਅਸਮਾਯੋਗੋ. ਏਕਪ੍ਪਹਾਰੇਨੇਵਾਤਿ ਏਕਵੇਲਾਯਮੇਵ. ਪਰਿਨਿਬ੍ਬਾਨਵਸੇਨਾਤਿ ਅਨੁਪਾਦਿਸੇਸਪਰਿਨਿਬ੍ਬਾਨਵਸੇਨ, ਨ ਕਿਲੇਸਕ੍ਖਯਮਤ੍ਤੇਨ. ਏਤ੍ਥਾਤਿ ਏਤੇਸੁ ਦ੍ਵੀਸੁ ਨਯੇਸੁ. ਏਵਂ ਸਤਿ ਤੇਨੇਵ ਇਰਿਯਾਪਥੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਤੇਨੇਵ ਇਰਿਯਾਪਥੇਨ, ਏਕਸ੍ਮਿਂ ਅਨ੍ਤੋਰੋਗੇਯੇਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਤੇਨੇਵ ਰੋਗੇਨ ਪਰਿਨਿਬ੍ਬਾਯਨ੍ਤਾ ਖੀਣਾਸਵਾ ਬਹਵੋਪਿ ਸਮਸੀਸਿਨੋ ਏਵ ਸਮ੍ਭਵੇਯ੍ਯੁਂ. ਤਸ੍ਮਾ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

ਸੀਸਞ੍ਚੇਤ੍ਥ ਤੇਰਸ – ਪਲਿਬੋਧਸੀਸਂ ਤਣ੍ਹਾ, ਬਨ੍ਧਨਸੀਸਂ ਮਾਨੋ, ਪਰਾਮਾਸਸੀਸਂ ਦਿਟ੍ਠਿ, ਵਿਕ੍ਖੇਪਸੀਸਂ ਉਦ੍ਧਚ੍ਚਂ, ਕਿਲੇਸਸੀਸਂ ਅਵਿਜ੍ਜਾ, ਅਧਿਮੋਕ੍ਖਸੀਸਂ ਸਦ੍ਧਾ, ਪਗ੍ਗਹਸੀਸਂ ਵੀਰਿਯਂ, ਉਪਟ੍ਠਾਨਸੀਸਂ ਸਤਿ, ਅਵਿਕ੍ਖੇਪਸੀਸਂ ਸਮਾਧਿ, ਦਸ੍ਸਨਸੀਸਂ ਪਞ੍ਞਾ, ਪਵਤ੍ਤਿਸੀਸਂ ਜੀਵਿਤਿਨ੍ਦ੍ਰਿਯਂ, ਗੋਚਰਸੀਸਂ ਵਿਮੋਕ੍ਖੋ, ਸਙ੍ਖਾਰਸੀਸਂ ਨਿਰੋਧੋਤਿ. ਇਮੇਸੁ ਤੇਰਸਸੁ ਸੀਸੇਸੁ ਪਲਿਬੋਧਸੀਸਾਦੀਨਿ ਪਵਤ੍ਤਿਸੀਸਞ੍ਚ ਪਰਿਯਾਦਿਯਿਤਬ੍ਬਾਨਿ, ਅਧਿਮੋਕ੍ਖਸੀਸਾਦੀਨਿ ਪਰਿਯਾਦਾਯਕਾਨਿ, ਪਰਿਯਾਦਾਯਕਫਲਂ ਗੋਚਰਸੀਸਂ. ਤਞ੍ਹਿ ਵਿਸਯਜ੍ਝਤ੍ਤਂ ਫਲਂ ਵਿਮੋਕ੍ਖੋ, ਪਰਿਯਾਦਾਯਕਸ੍ਸ ਮਗ੍ਗਸ੍ਸ ਫਲਸ੍ਸ ਚ ਆਰਮ੍ਮਣਂ ਸਙ੍ਖਾਰਸੀਸਂ ਸਙ੍ਖਾਰਵਿਵੇਕਭੂਤੋ ਨਿਰੋਧੋਤਿ ਪਰਿਯਾਦਿਯਿਤਬ੍ਬਾਨਂ ਪਰਿਯਾਦਾਯਕਫਲਾਰਮ੍ਮਣਾਨਂ ਸਹ ਵਿਯ ਸਂਸਿਦ੍ਧਂ ਦਸ੍ਸਨੇਨ ਸਮਸੀਸਿਭਾਵਂ ਦਸ੍ਸੇਤੁਂ ਪਟਿਸਮ੍ਭਿਦਾਯਂ ਤੇਰਸ ਸੀਸਾਨਿ ਵੁਤ੍ਤਾਨਿ. ਇਧ ਪਨ ‘‘ਅਪੁਬ੍ਬਂ ਅਚਰਿਮਂ ਆਸਵਪਰਿਯਾਦਾਨਞ੍ਚ ਹੋਤਿ ਜੀਵਿਤਪਰਿਯਾਦਾਨਞ੍ਚਾ’’ਤਿ (ਪੁ. ਪ. ੧੬) ਵਚਨਤੋ ਤੇਸੁ ਕਿਲੇਸਪਵਤ੍ਤਸੀਸਾਨਮੇਵ ਵਸੇਨ ਯੋਜਨਂ ਕਰੋਨ੍ਤੋ ‘‘ਏਤ੍ਥ ਚ ਪਵਤ੍ਤਿਸੀਸ’’ਨ੍ਤਿਆਦਿਮਾਹ.

ਤਤ੍ਥ ਪਵਤ੍ਤਿਸੀਸਂ ਪਵਤ੍ਤਤੋ ਵੁਟ੍ਠਹਨ੍ਤੋ ਮਗ੍ਗੋ ਚੁਤਿਤੋ ਉਦ੍ਧਂ ਅਪ੍ਪਵਤ੍ਤਿਕਰਣਵਸੇਨ ਯਦਿਪਿ ਪਰਿਯਾਦੀਯਤਿ, ਯਾਵ ਪਨ ਚੁਤਿ, ਤਾਵ ਪਵਤ੍ਤਿਸਬ੍ਭਾਵਤੋ ‘‘ਪਵਤ੍ਤਿਸੀਸਂ ਜੀਵਿਤਿਨ੍ਦ੍ਰਿਯਂ ਚੁਤਿਚਿਤ੍ਤਂ ਖੇਪੇਤੀ’’ਤਿ ਆਹ. ਕਿਲੇਸਪਰਿਯਾਦਾਨੇਨ ਪਨ ਮਗ੍ਗਚਿਤ੍ਤੇਨ ਅਤ੍ਤਨੋ ਅਨਨ੍ਤਰਂ ਵਿਯ ਨਿਪ੍ਫਾਦੇਤਬ੍ਬਾ ਪਚ੍ਚਵੇਕ੍ਖਣਵਾਰਾ ਚ ਕਿਲੇਸਪਰਿਯਾਦਾਨਸ੍ਸੇਵ ਵਾਰਾਤਿ ਵਤ੍ਤਬ੍ਬਤਂ ਅਰਹਨ੍ਤਿ. ‘‘ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਂ ਹੋਤੀ’’ਤਿ (ਮ. ਨਿ. ੧.੭੮; ਸਂ. ਨਿ. ੩.੧੨) ਵਚਨਤੋ ਪਚ੍ਚਵੇਕ੍ਖਣਪਰਿਸਮਾਪਨੇਨ ਕਿਲੇਸਪਰਿਯਾਦਾਨਂ ਸਮਾਪਿਤਂ ਨਾਮ ਹੋਤਿ, ਤਂ ਪਨ ਪਰਿਸਮਾਪਨਂ ਯਦਿ ਚੁਤਿਚਿਤ੍ਤੇਨ ਹੋਤਿ, ਤੇਨੇਵ ਜੀਵਿਤਪਰਿਸਮਾਪਨਞ੍ਚ ਹੋਤੀਤਿ ਇਮਾਯ ਵਾਰਚੁਤਿਸਮਤਾਯ ਕਿਲੇਸਪਰਿਯਾਦਾਨਜੀਵਿਤਪਰਿਯਾਦਾਨਾਨਂ ਅਪੁਬ੍ਬਾਚਰਿਮਤਾ ਵੇਦਿਤਬ੍ਬਾਤਿ ਦਸ੍ਸੇਨ੍ਤੋ ‘‘ਦ੍ਵਿਨ੍ਨਂ ਚਿਤ੍ਤਾਨਂ ਏਕਤੋ ਉਪ੍ਪਾਦੋ ਨਤ੍ਥੀ’’ਤਿਆਦਿਮਾਹ. ਦ੍ਵਿਨ੍ਨਂ ਚਿਤ੍ਤਾਨਨ੍ਤਿ ਚੁਤਿਚਿਤ੍ਤਮਗ੍ਗਚਿਤ੍ਤਾਨਂ. ਤਨ੍ਤਿ ਪਚ੍ਚਵੇਕ੍ਖਣਂ ਪਰਿਪੁਣ੍ਣਜਵਨਚਿਤ੍ਤਾਨਂ ਸਤ੍ਤਕ੍ਖਤ੍ਤੁਂ ਪਵਤ੍ਤਿਯਾ, ਅਪਰਿਪੁਣ੍ਣਾਨਂ ਵਾ ਪਞ੍ਚਕ੍ਖਤ੍ਤੁਂ ਪਵਤ੍ਤਿਯਾ. ਕਿਞ੍ਚਾਪਿ ‘‘ਏਕੋ ਵਾ ਦ੍ਵੇ ਵਾ’’ਤਿ ਵੁਤ੍ਤਂ ਯਥਾ ‘‘ਏਕਂ ਵਾ ਦ੍ਵੇ ਵਾ ਤਦਾਰਮ੍ਮਣਚਿਤ੍ਤਾਨੀ’’ਤਿ, ਹੇਟ੍ਠਿਮਨ੍ਤੇਨ ਪਨ ਦ੍ਵੇ ਪਵਤ੍ਤਨ੍ਤਿ.

ਉਪ੍ਪਾਟੇਤ੍ਵਾਤਿ ਉਦ੍ਧਰਿਤ੍ਵਾਤਿ ਅਤ੍ਥੋ. ਅਨੁਪਾਦਿਸੇਸੇਨਾਤਿ ਅਨੁਪਾਦਿਸੇਸਨਿਬ੍ਬਾਨੇਨ.

ਧੂਮਾਯਿਤਤ੍ਤਨ੍ਤਿ ਧੂਮਸ੍ਸ ਵਿਯ ਅਯਿਤਭਾਵਂ ਪਵਤ੍ਤਿਆਕਾਰਂ. ਧੂਮਸਦਿਸਾ ਵਲਾਹਕਾ ਧੂਮਵਲਾਹਕਾ, ਤਿਮਿਰਵਲਾਹਕਾ, ਯੇ ਮਹਿਕਾ ‘‘ਤਿਮਿਰ’’ਨ੍ਤਿ ਵੁਚ੍ਚਨ੍ਤਿ. ਅਪ੍ਪਤਿਟ੍ਠਿਤੇਨਾਤਿ ਪਤਿਟ੍ਠਂ ਅਲਭਨ੍ਤੇਨ. ਇਤ੍ਥਮ੍ਭੂਤਲਕ੍ਖਣੇ ਏਤਂ ਕਰਣਵਚਨਂ, ਅਨੁਪ੍ਪਤ੍ਤਿਧਮ੍ਮੇਨਾਤਿ ਅਤ੍ਥੋ. ਸਤਿ ਹਿ ਉਪ੍ਪਾਦੇ ਪਤਿਟ੍ਠਿਤਂ ਨਾਮ ਸਿਯਾ, ਅਟ੍ਠਕਥਾਯਂ ਪਨ ਯਦੇਵ ਤਸ੍ਸ ਵਿਞ੍ਞਾਣਸ੍ਸ ਅਪ੍ਪਤਿਟ੍ਠਾਨਕਾਰਣਂ, ਤਦੇਵ ਪਰਿਨਿਬ੍ਬਾਨਕਾਰਣਨ੍ਤਿ ਵੁਤ੍ਤਂ ‘‘ਅਪ੍ਪਤਿਟ੍ਠਿਤਕਾਰਣਾ’’ਤਿ.

ਸੋਕੇਨ ਫੁਟ੍ਠਸ੍ਸਾਤਿ ‘‘ਅਫਲੋ ਵਤ ਮੇ ਵਾਯਾਮੋ ਜਾਤੋ’’ਤਿ ਸੋਕੇਨ ਅਭਿਭੂਤਸ੍ਸ. ਅਭਸ੍ਸਥਾਤਿ ਬਲਵਸੋਕਾਭਿਤੁਨ੍ਨਸ੍ਸ ਸਤਿਸਮ੍ਮੋਸਾ ਸਿਥਿਲਂ ਗਹਿਤਾ ਭਸ੍ਸਿ ਪਤਿਤਾ ਸਾ ਕਚ੍ਛਾ.

ਗੋਧਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਸਤ੍ਤਵਸ੍ਸਾਨੁਬਨ੍ਧਸੁਤ੍ਤਵਣ੍ਣਨਾ

੧੬੦. ਯਸ੍ਮਾ ਕਪਿਲਵਤ੍ਥੁਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਮਾਰੋ ਓਤਾਰਾਪੇਕ੍ਖੋ ਲੋਕਨਾਥਂ ਅਨੁਬਨ੍ਧਿਤੁਂ ਆਰਦ੍ਧੋ, ਤਸ੍ਮਾ ਵੁਤ੍ਤਂ ‘‘ਪੁਰੇ ਬੋਧਿਯਾ ਛਬ੍ਬਸ੍ਸਾਨੀ’’ਤਿ. ਅਤਿਗਹੇਤ੍ਵਾਤਿ ਅਨੁਗਨ੍ਤ੍ਵਾ ਤਸ੍ਸ ਯਥਾਰੁਚਿ ਪਟਿਪਤ੍ਤਿਂ ਅਨੁਵਤ੍ਤੋ ਵਿਯ ਹੁਤ੍ਵਾ.

ਅਵਜ੍ਝਾਯਨ੍ਤੋਤਿ ਪਜ੍ਝਾਯਨ੍ਤੋ. ਜਿਤੋ ਵਿਤ੍ਤਪਰਾਜਿਤੋ ਅਸਿ ਨੁ. ਪਮਾਣਾਤਿਕ੍ਕਨ੍ਤਨ੍ਤਿ ਗਰੁਤਰਂ.

ਖਨਿਤ੍ਵਾ ਉਮ੍ਮੂਲੇਤ੍ਵਾ. ਕਾਮਾਸਵਾਦੀਨਿ ਪਜਹਨ੍ਤੋ ਅਨਾਸਵੋ.

ਪੇਹੀਤਿ ਅਪੇਹਿ. ਪਾਰਗਾਮਿਨੋਤਿ ਪਾਰਙ੍ਗਮਨਸੀਲਾ. ਤੇਕਾਲਿਕੋ ਅਯਂ ਗਾਮਿ-ਸਦ੍ਦੋਤਿ ਆਹ ‘‘ਯੇਪੀ’’ਤਿਆਦਿ.

ਮਾਰਵਿਸੂਕਾਨੀਤਿ ਮਾਰਕਣ੍ਟਕਾਨਿ ਕਣ੍ਟਕਸਦਿਸਾਨਿ ਮਾਰਸ੍ਸ ਦੁਰਾਚਾਰਾਨਿ. ਵਿਰੁਦ੍ਧਸੇਵਿਤਾਨਿ ਵਿਰੋਧਵਸੇਨ ਤਾਸਂਯੇਵ ਵੇਵਚਨਾਨਿ. ਤਾਨਿ ਸਰੂਪਤੋ ਦਸ੍ਸੇਤੁਂ ‘‘ਅਪ੍ਪਮਾਯੂ’’ਤਿਆਦਿ ਵੁਤ੍ਤਂ. ਨਿਬ੍ਬੇਜਨੀਯਾਤਿ ਨਿਬ੍ਬੇਦਦਾਯਿਕਾ. ਉਕ੍ਕਣ੍ਠਨੀਯਾਤਿ ਉਕ੍ਕਣ੍ਠਵਹਾ.

ਵਿਕਪ੍ਪਵਸੇਨ ਵੇਦਿਤਬ੍ਬੋ ਓਪਮ੍ਮਪਰਿਕਪ੍ਪਵਿਸਯਤ੍ਤਾ ਤਸ੍ਸ ਕਿਰਿਯਾਪਦਸ੍ਸ. ਤੇਨਾਹ ‘‘ਅਨੁਪਰਿਗਚ੍ਛੇਯ੍ਯਾ’’ਤਿ. ਏਤ੍ਥਾਤਿ ਏਤਸ੍ਮਿਂ ਮੇਦਵਣ੍ਣਵਤ੍ਥੁਸ੍ਮਿਂ. ਮੁਦੁਨ੍ਤਿ ਮੁਦੁਮਧੁਰਸਂ ਵਿਨ੍ਦੇਯ੍ਯਾਮ ਪਟਿਲਭੇਯ੍ਯਾਮ. ਅਸ੍ਸਾਦੋਤਿ ਅਸ੍ਸਾਦੇਤਬ੍ਬੋ.

ਸਤ੍ਤਵਸ੍ਸਾਨੁਬਨ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਮਾਰਧੀਤੁਸੁਤ੍ਤਵਣ੍ਣਨਾ

੧੬੧. ਚਿਨ੍ਤੇਸੀਤਿ ਸੋਕਵਸਿਕੋ ਹੁਤ੍ਵਾ ਚਿਨ੍ਤਯਿ. ਗਣਿਕਾਰਹਤ੍ਥਿਨਿਯੋਤਿ ਦੀਪਕਕਰੇਣੁਯੋ. ਏਕਸਤਂ ਏਕਸਤਨ੍ਤਿ ਏਕਸਤਂ ਏਕਸਤਂ ਪਚ੍ਚੇਕਂ ਸਤਂ ਸਤਨ੍ਤਿ ਅਤ੍ਥੋ. ਤੇਨਾਹ ‘‘ਏਕੇਕਂ ਸਤਂ ਸਤਂ ਕਤ੍ਵਾ’’ਤਿ. ਕੁਮਾਰਿਵਣ੍ਣਸਤਨ੍ਤਿ ਕੁਮਾਰਿਤ੍ਥੀਨਂ ਅਤ੍ਤਭਾਵਾਨਂ ਸਤਂ. ਤਾ ਕਿਰ ਪਠਮਂ ਕਞ੍ਞਾਰੂਪੇਨ ਅਤ੍ਤਾਨਂ ਦਸ੍ਸੇਸੁਂ. ਅਨੁਪਗਤਪੁਪ੍ਫਾਨਞ੍ਹਿ ਸਮਞ੍ਞਾ ਕਞ੍ਞਾਤਿ. ਪੁਨ ਯਥਾਵੁਤ੍ਤਕੁਮਾਰਿਰੂਪੇਨ ਉਪਗਤਪੁਪ੍ਫਾ ਹਿ ਕੁਮਾਰੀ. ਪੁਨ ਵਧੁਕਾਰੂਪੇਨ. ਤਂ ਸਨ੍ਧਾਯ ਵੁਤ੍ਤਂ ‘‘ਅਵਿਜਾਤਵਣ੍ਣਸਤ’’ਨ੍ਤਿ. ਤਤਿਯਵਾਰੇ ਯੁਵਤਿਰੂਪੇਨ. ਵਿਜਾਤਾ ਹਿ ਇਤ੍ਥੀ ਅਨਤਿਕ੍ਕਨ੍ਤਮਜ੍ਝਿਮਵਯਾ ਯੁਵਤੀ. ਏਤ੍ਤਾਵਤਾ ਬਾਲਾ ਤਰੁਣੀ ਪੋਰੀਤਿ ਤਿਵਿਧਾਸੁ ਇਤ੍ਥੀਸੁ ਪੁਰਿਮਾ ਦ੍ਵੇ ਦਸ੍ਸਿਤਾ, ਪਰਿਯੋਸਾਨਵਾਰੇਸੁ ਮਨੁਸ੍ਸਜਾਤਿਕਾਨਂ ਮਨੁਸ੍ਸਿਤ੍ਥਿਯੋਵ ਰੁਚ੍ਚਨ੍ਤੀਤਿ ਤੇਨ ਮਨੁਸ੍ਸਰੂਪੇਨ ਤਾ ਅਤ੍ਤਾਨਂ ਦਸ੍ਸੇਸੁਂ.

ਅਤ੍ਥਸ੍ਸ ਪਤ੍ਤਿਨ੍ਤਿ ਏਕਨ੍ਤਤੋ ਹਿਤਾਨੁਪ੍ਪਤ੍ਤਿਂ. ਹਦਯਸ੍ਸ ਸਨ੍ਤਿਨ੍ਤਿ ਪਰਮਚਿਤ੍ਤੁਪਸਮਂ. ਕਿਲੇਸਸੇਨਨ੍ਤਿ ਕਾਮਗੁਣਸਙ੍ਖਾਤਂ ਪਠਮਂ ਕਿਲੇਸਸੇਨਂ. ਸਾ ਹਿ ਕਿਲੇਸਸੇਨਾ ਅਚ੍ਛਰਾਸਙ੍ਘਾਤਸਭਾਵਾਪਿ ਪਟਿਪਤ੍ਥਯਮਾਨਾ ਪਿਯਾਯਿਤਬ੍ਬਇਚ੍ਛਿਤਬ੍ਬਰੂਪਭਾਵਤੋ ਪਿਯਰੂਪਸਾਤਰੂਪਾ ਨਾਮ ਅਤ੍ਤਨੋ ਕਿਚ੍ਚਵਸੇਨ. ਏਕੋ ਅਹਂ ਝਾਯਨ੍ਤੋਤਿ ਗਣਸਙ੍ਗਣਿਕਾਯ ਕਿਲੇਸਸਙ੍ਗਣਿਕਾਯ ਚ ਅਭਾਵਤੋ ਏਕੋ ਅਸਹਾਯੋ ਅਹਂ ਲਕ੍ਖਣੂਪਨਿਜ੍ਝਾਨੇਨ ਨਿਜ੍ਝਾਯਨ੍ਤੋ. ਅਨੁਬੁਜ੍ਝਿਨ੍ਤਿ ਅਨੁਕ੍ਕਮੇਨ ਮਗ੍ਗਪਟਿਪਾਟਿਯਾ ਬੁਜ੍ਝਿਂ ਪਟਿਬੁਜ੍ਝਿਂ. ਤਸ੍ਮਾਤਿ ਯਥਾਵੁਤ੍ਤਵਿਵੇਕਸੁਖਸਮਧਿਗਮਨਿਮਿਤ੍ਤਂ. ਅਕਰਣੇਨਾਤਿ ਮਿਤ੍ਤਸਨ੍ਥਵਸ੍ਸ ਅਕਰਣੇਨ. ਸਕ੍ਖੀਤਿ ਸਕ੍ਖਿਭਾਵੋ.

ਕਤਮੇਨ ਵਿਹਾਰੇਨਾਤਿ ਝਾਨਸਮਾਪਤ੍ਤੀਨਂ ਕਤਮੇਨ ਵਿਹਾਰੇਨ. ਇਧ ਦੁਤਿਯਪਦਸ੍ਸ ਅਤ੍ਥੋ ਵਿਸ੍ਸਜ੍ਜਨਗਾਥਾਵਣ੍ਣਨਾਯਮੇਵ ਆਵਿ ਭਵਿਸ੍ਸਤਿ. ਅਨਾਮਨ੍ਤੇਨ ‘‘ਤਂ ਪੁਗ੍ਗਲ’’ਨ੍ਤਿ ਸਮ੍ਮੁਖਾ ਠਿਤਮ੍ਪਿ ਭਗਵਨ੍ਤਂ ਅਸਮ੍ਮੁਖਾ ਵਿਯ ਕਤ੍ਵਾ ਵਦਤਿ, ਕਥਂ ਤ੍ਵਨ੍ਤਿ ਅਤ੍ਥੋ.

‘‘ਅਵਿਤਕ੍ਕਝਾਯੀ’’ਤਿ ਵਕ੍ਖਮਾਨਤ੍ਤਾ ਅਯਮੇਵੇਤ੍ਥ ਕਾਯਪਸ੍ਸਦ੍ਧਿ ਵੇਦਿਤਬ੍ਬਾਤਿ ਆਹ ‘‘ਚਤੁਤ੍ਥਜ੍ਝਾਨੇਨ ਅਸ੍ਸਾਸਪਸ੍ਸਾਸਕਾਯਸ੍ਸ ਪਸ੍ਸਦ੍ਧਤ੍ਤਾ ਪਸ੍ਸਦ੍ਧਕਾਯੋ’’ਤਿ. ਪੁਞ੍ਞਾਭਿਸਙ੍ਖਾਰਾਦਿਕੇ ਕਮ੍ਮਾਭਿਸਙ੍ਖਾਰੇ. ਕਾਮਾਲਯਾਦੀਨਂ ਅਭਾਵਤੋ ਅਨਾਲਯੋ. ਨ ਸਰਤੀਤਿ ਨ ਸਵਤਿ. ਰਾਗਵਸੇਨ ਹਿ ਸਤ੍ਤਾ ਸਂਸਾਰਮਨੁਸਵਨ੍ਤਿ. ਨ ਥਿਨੋਤਿ ਨ ਥਿਨਮਿਦ੍ਧਚਿਤ੍ਤੋ. ਮੋਹਵਸੇਨ ਹਿ ਸਤ੍ਤਾ ਥਿਨਮਿਦ੍ਧਂ ਆਪਜ੍ਜਨ੍ਤੀਤਿ. ਦਿਯਡ੍ਢਕਿਲੇਸਸਹਸ੍ਸਨ੍ਤਿ ਖੁਦ੍ਦਕਵਤ੍ਥੁਵਿਭਙ੍ਗੇ (ਵਿਭ. ੮੪੨, ੯੭੬) ਆਗਤੇਸੁ ਅਟ੍ਠਸੁ ਕਿਲੇਸਸਤੇਸੁ ਅਟ੍ਠਸਤਂ ਤਣ੍ਹਾਵਿਚਰਿਤਾਨਿ ਅਪਨੇਤ੍ਵਾ ਸੇਸਾ ਪਞ੍ਞਾਸਾਧਿਕਂ ਸਤਂ ਕਿਲੇਸਾ, ਤੇ ਬ੍ਰਹ੍ਮਜਾਲੇ (ਦੀ. ਨਿ. ੧.੩੧) ਆਗਤਾਹਿ ਦ੍ਵਾਸਟ੍ਠਿਯਾ ਦਿਟ੍ਠੀਹਿ ਸਹ ਪਞ੍ਚਪਞ੍ਞਾਸਾਧਿਕਂ ਸਤ੍ਤਸਤਂ ਹੋਤਿ; ਤਾ ਚ ਉਪ੍ਪਨ੍ਨਾਨੁਪ੍ਪਨ੍ਨਭਾਵੇਨ ਦਿਗੁਣਿਤਾ ਦਿਯਡ੍ਢਕਿਲੇਸਸਹਸ੍ਸਂ ਦਸਾਧਿਕਂ ਹੋਤਿ; ਤਂ ਅਪ੍ਪਕਂ ਪਨ ਊਨਮਧਿਕਂ ਵਾ ਗਣਨੁਪਗਂ ਨ ਹੋਤੀਤਿ ‘‘ਦਿਯਡ੍ਢਕਿਲੇਸਸਹਸ੍ਸ’’ਨ੍ਤਿ ਵੁਤ੍ਤਂ. ਇਤਰੇਸਂ ਅਤੀਤਾਦਿਭਾਵਾਮਸਨਤੋ ਅਗ੍ਗਹਣਂ ਪਹਾਨਸ੍ਸ ਅਧਿਪ੍ਪੇਤਤ੍ਤਾ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਅਭਿਧਮ੍ਮਟੀਕਾਯਂ (ਧ. ਸ. ਅਨੁਟੀ. ਨਿਦਾਨਕਥਾਵਣ੍ਣਨਾ) ਵੁਤ੍ਤਨਯੇਨ ਵੇਦਿਤਬ੍ਬੋ. ਪਠਮਪਦੇਨਾਤਿ ‘‘ਨ ਕੁਪ੍ਪਤੀ’’ਤਿ ਇਮਿਨਾ ਪਦੇਨ. ਦੁਤਿਯੇਨਾਤਿ ‘‘ਨ ਸਰਤੀ’’ਤਿ ਪਦੇਨ. ਤਤਿਯੇਨਾਤਿ ‘‘ਨ ਥਿਨੋ’’ਤਿ ਪਦੇਨ. ਨੀਵਰਣਪ੍ਪਹਾਨੇਨ ਖੀਣਾਸਵਤਂ ਦਸ੍ਸੇਤਿ, ਅਨਵਸੇਸਤੋ ਨੀਵਰਣਾਨਂ ਅਚ੍ਚਨ੍ਤਪ੍ਪਹਾਨਂ ਅਧਿਪ੍ਪੇਤਂ.

ਪਞ੍ਚਦ੍ਵਾਰਿਕਕਿਲੇਸੋਘਂ ਤਿਣ੍ਣੋਤਿ ਛਨ੍ਨਂ ਦ੍ਵਾਰਾਨਂ ਵਸੇਨ ਪਵਤ੍ਤਨਕਿਲੇਸੋਘਂ ਤਰਿਤ੍ਵਾ ਠਿਤੋ. ਕਾਮੋਘਦਿਟ੍ਠੋਘਭਵੋਘਟ੍ਠਕਿਲੇਸਭਾਵਤੋ ‘‘ਪਞ੍ਚੋਘਗ੍ਗਹਣੇਨ ਵਾ ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ ਵੇਦਿਤਬ੍ਬਾਨੀ’’ਤਿ ਆਹ. ਰੂਪਰਾਗਾਦਯੋ ਵਿਸੇਸਤੋ ਨ ਪਞ੍ਚਦ੍ਵਾਰਿਕਾਤਿ ਵੁਤ੍ਤਂ ‘‘ਛਟ੍ਠਗ੍ਗਹਣੇਨ ਪਞ੍ਚੁਦ੍ਧਮ੍ਭਾਗਿਯਾਨਿ ਵੇਦਿਤਬ੍ਬਾਨੀ’’ਤਿ.

ਮਚ੍ਚੁਰਾਜਸ੍ਸਾਤਿ ਸਮ੍ਬਨ੍ਧੇ ਸਾਮਿਵਚਨਨ੍ਤਿ ਦਸ੍ਸੇਨ੍ਤੋ ‘‘ਮਚ੍ਚੁਰਾਜਸ੍ਸ ਹਤ੍ਥਤੋ’’ਤਿ ਆਹ. ਨਯਮਾਨਾਨਨ੍ਤਿ ਅਨਾਦਰੇ ਸਾਮਿਵਚਨਨ੍ਤਿ ਕਤ੍ਵਾ ਵੁਤ੍ਤਂ ‘‘ਨਯਮਾਨੇਸੂ’’ਤਿ.

ਊਹਚ੍ਚਾਤਿ ਬੁਦ੍ਧਂ ਨਿਸ੍ਸਾਯ. ‘‘ਇਦਮਵੋਚਾ’’ਤਿ ਦੇਸਨਂ ਨਿਟ੍ਠਾਪੇਤ੍ਵਾਤਿ ਏਤੇਨ ਸਂਯੁਤ੍ਤੇਸੁ ਅਯਂ ਨਿਗਮਨਪਾਲ਼ਿ, ਹੇਟ੍ਠਾ ਅਨਾਗਤਨਯਤ੍ਤਾ ਪਨ ਕੇਸੁਚਿ ਪੋਤ੍ਥਕੇਸੁ ਨ ਲਿਖੀਯਤੀਤਿ ਦਸ੍ਸੇਤਿ. ਦਦ੍ਦਲ੍ਲਮਾਨਾਤਿ ਜਜ੍ਜਕਾਰਸ੍ਸ ਹਿ ਦਦ੍ਦਕਾਰਂ ਕਤ੍ਵਾ ਨਿਦ੍ਦੇਸੋ. ਤੇਨਾਹ ‘‘ਅਤਿਵਿਯ ਜਲਮਾਨਾ’’ਤਿ. ਨੀਹਰੀਤਿ ਤਾਸਂ ਕਾਯਵਚੀਵਿਕਾਰਂ ਨ ਮਨਸਿਕਰੋਨ੍ਤੋ ਤਿਣਾਯਪਿ ਅਮਞ੍ਞਮਾਨੋਵ ਅਨਪੇਕ੍ਖੇਨੇਵ ਨੀਹਰਿ. ਫਲਤੋ ਭਟ੍ਠਨ੍ਤਿ ਫਲਸਿਪਾਟਿਕਤੋ ਭਟ੍ਠਂ. ਕੁਣ੍ਡਤਿਣਾਦਿਗਚ੍ਛਤੂਲਂ ਪੋਟਕਿਤੂਲਂ.

ਮਾਰਧੀਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਮਾਰਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.