੫. ਭਿਕ੍ਖੁਨੀਸਂਯੁਤ੍ਤਂ

੧. ਆਲ਼ਵਿਕਾਸੁਤ੍ਤਵਣ੍ਣਨਾ

੧੬੨. ਆਲ਼ਵਿਯਂ ਜਾਤਾਤਿ ਆਲ਼ਵਿਯਂ ਵਿਜਾਯਿਤ੍ਵਾ ਸਂਵਡ੍ਢਮਾਨਾ. ਤੇਨਾਹ ‘‘ਆਲ਼ਵਿਨਗਰਤੋਯੇਵ ਚ ਨਿਕ੍ਖਮ੍ਮ ਪਬ੍ਬਜਿਤਾ’’ਤਿ. ਧਨਂ ਸਮਾਦਪੇਤ੍ਵਾਤਿ ਚੇਤਿਯਸ੍ਸ ਰਾਜਾ ਏਕਂ ਮੁਖਂ, ਰਾਜਪੁਤ੍ਤੋ ਏਕਂ, ਅਮਚ੍ਚਾਨਂ ਜੇਟ੍ਠਕੋ ਹੁਤ੍ਵਾ ਸੇਨਾਪਤਿ ਏਕਂ, ਜਨਪਦਾਨਂ ਜੇਟ੍ਠਕੋ ਹੁਤ੍ਵਾ ਸੇਟ੍ਠਿ ਏਕਨ੍ਤਿ ਏਵਂ ਚਤੂਸੁ ਮੁਖੇਸੁ ਨਵਕਮ੍ਮੇ ਕਯਿਰਮਾਨੇ ਸੇਟ੍ਠਿਨਾ ਗਹਿਤਮੁਖੇ ਕਮ੍ਮੇ ਓਲੀਯਮਾਨੇ ਏਕੋ ਉਪਾਸਕੋ ਅਰਿਯਸਾਵਕੋ ਪਞ੍ਚ ਸਕਟਸਤਾਨਿ ਯੋਜਾਪੇਤ੍ਵਾ ਜਨਪਦਂ ਗਨ੍ਤ੍ਵਾ ‘‘ਯੋ ਯਂ ਦਾਤੁਂ ਉਸ੍ਸਹਤਿ ਹਿਰਞ੍ਞਂ ਵਾ ਸੁਵਣ੍ਣਂ ਵਾ ਸਤ੍ਤਵਿਧਰਤਨਂ ਵਾ ਹਰਿਤਾਲਂ ਵਾ ਮਨੋਸਿਲਂ ਵਾ, ਸੋ ਧਨਂ ਦੇਤੂ’’ਤਿ ਸਮਾਦਪੇਤ੍ਵਾ ਯਥਾਲਦ੍ਧਂ ਪਠਮਂ ਕਮ੍ਮਟ੍ਠਾਨਂ ਪੇਸੇਤ੍ਵਾ ‘‘ਨਵਕਮ੍ਮਂ ਨਿਟ੍ਠਿਤ’’ਨ੍ਤਿ ਸੁਤ੍ਵਾ ਏਕਕਂ ਆਗਚ੍ਛਨ੍ਤਂ ਅਨ੍ਤਰਾਮਗ੍ਗੇ ਚੋਰਾ ਪਲਿਬੁਨ੍ਧਿਤ੍ਵਾ ਤਤੋ ਕਿਞ੍ਚਿਪਿ ਧਨਂ ਅਲਭਨ੍ਤਾ ‘‘ਸਚੇ ਨਂ ਮੁਞ੍ਚਿਸ੍ਸਾਮ, ਅਨਤ੍ਥਂ ਨੋ ਕਰੇਯ੍ਯਾ’’ਤਿ ਜੀਵਿਤਾ ਵੋਰੋਪੇਸੁਂ. ਅਨਪਰਾਧੇ ਅਰਿਯਸਾਵਕੇ ਅਪਰਾਧਕਾ ਤੇ ਚੋਰਾ ਅਨ੍ਧਾ ਜਾਤਾ, ਤਸ੍ਮਾ ਤਂ ਠਾਨਂ ‘‘ਅਨ੍ਧਵਨ’’ਨ੍ਤਿ ਪਞ੍ਞਾਯਿਤ੍ਥਾਤਿ ਅਟ੍ਠਕਥਾਯਂ ਵੁਤ੍ਤਂ. ਖੀਣਾਸਵਾਨਂ ਯਸ੍ਮਾ ਯਤ੍ਥ ਕਤ੍ਥਚਿ ਚਿਤ੍ਤਵਿਵੇਕੋ ਹੋਤਿਯੇਵ ਉਪਧਿਵਿਵੇਕਸ੍ਸ ਸਿਦ੍ਧਤ੍ਤਾ. ਤਸ੍ਮਾ ‘‘ਕਾਯਵਿਵੇਕਤ੍ਥਿਨੀ’’ਤਿ ਵੁਤ੍ਤਂ.

ਨਿਸ੍ਸਰਣਨ੍ਤਿ ਨਿਬ੍ਬਾਨਂ ਸਬ੍ਬਸਙ੍ਖਤਸ੍ਸ ਨਿਸ੍ਸਟਤ੍ਤਾ. ਪਚ੍ਚਵੇਕ੍ਖਣਞਾਣੇਨਾਤਿ ਪਚ੍ਚਵੇਕ੍ਖਣਞਾਣੇਨ, ਪਗੇਵ ਮਗ੍ਗਫਲਞਾਣੇਹੀਤਿ ਅਧਿਪ੍ਪਾਯੋ. ਨਿਬ੍ਬਾਨਪਦਨ੍ਤਿ ਨਿਬ੍ਬਾਨਸਙ੍ਖਾਤਂ ਧਮ੍ਮਕੋਟ੍ਠਾਸਂ. ਵਿਨਿਵਿਜ੍ਝਨਟ੍ਠੇਨਾਤਿ ਹਦਯਂ ਵਿਨਿਵਿਦ੍ਧੇਨ ਹਦਯਮ੍ਹਿ ਵਿਜ੍ਝਿਤ੍ਵਾ ਦੁਕ੍ਖੁਪ੍ਪਾਦਨੇਨ ਖਨ੍ਧਾਨਂ ਏਤੇ ਪਞ੍ਚ ਕਾਮਾ ਸਤ੍ਤਿਸੂਲਸਦਿਸਾ. ਅਧਿਕੁਟ੍ਟਨਭਣ੍ਡਿਕਾਤਿ ਆਘਾਤਨਘਟਿਕਾ.

ਆਲ਼ਵਿਕਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਸੋਮਾਸੁਤ੍ਤਵਣ੍ਣਨਾ

੧੬੩. ਠਾਨਨ੍ਤਿ ਇਸ੍ਸਰਿਯਟ੍ਠਾਨਂ ਵਿਸਯਜ੍ਝਤ੍ਤਂ. ਦੁਪ੍ਪਸਹਂ ਅਕਮ੍ਪਿਯਭਾਵਤ੍ਤਾ. ਦ੍ਵਙ੍ਗੁਲਪਞ੍ਞਾਯਾਤਿ ਏਤ੍ਥ ਇਤ੍ਥਿਯੋ ਹਿ ਦਹਰਕੁਮਾਰਿਕਾਕਾਲਤੋ ਪਟ੍ਠਾਯ ਓਦਨਪਚਨਵਿਧਿਂ ਅਨੁਤਿਟ੍ਠਨ੍ਤਿਯੋ ਉਕ੍ਖਲਿਯਂ ਉਦਕਂ ਤਾਪੇਤ੍ਵਾ ਤਣ੍ਡੁਲੇ ਪਕ੍ਖਿਪਿਤ੍ਵਾ ਅਤ੍ਤਨੋ ਬੁਦ੍ਧਿਯਾ ਤੇਸਂ ਪਾਕਕਾਲਪ੍ਪਮਾਣਂ ਪਰਿਚ੍ਛਿਨ੍ਦਿਤੁਂ ਤਾਨਿ ਦਬ੍ਬਿਯਾ ਉਦ੍ਧਰਿਤ੍ਵਾਪਿ ਵਣ੍ਣਸਣ੍ਠਾਨਗ੍ਗਹਣਮਤ੍ਤੇਨ ਪਕ੍ਕਾਪਕ੍ਕਭਾਵਂ ਜਾਨਿਤੁਂ ਨ ਸਕ੍ਕੋਨ੍ਤਿ, ਕੇਵਲਂ ਪਨ ਦ੍ਵੀਹਿ ਅਙ੍ਗੁਲੀਹਿ ਉਪ੍ਪੀਲ਼ਿਤਕਾਲੇ ਏਵ ਜਾਨਨ੍ਤਿ, ਤਸ੍ਮਾ ਦ੍ਵੀਹਙ੍ਗੁਲਿਕੇਹਿ ਦੁਬ੍ਬਲਪਞ੍ਞਤ੍ਤਾ ‘‘ਦ੍ਵਙ੍ਗੁਲਪਞ੍ਞਾ’’ਤਿ ਵੁਚ੍ਚਨ੍ਤਿ. ਫਲਸਮਾਪਤ੍ਤਿਞਾਣਪ੍ਪਵਤ੍ਤਿਕਿਤ੍ਤਨੇਨ ਚਤੂਸੁ ਸਚ੍ਚੇਸੁ ਅਸਮ੍ਮੋਹਵਿਹਾਰੋ ਦੀਪਿਤੋ ਹੋਤੀਤਿ ਆਹ ‘‘ਞਾਣਮ੍ਹਿ ਵਤ੍ਤਮਾਨਮ੍ਹੀਤਿ ਫਲਸਮਾਪਤ੍ਤਿਞਾਣੇ ਪਵਤ੍ਤਮਾਨੇ’’ਤਿ. ਵਿਪਸ੍ਸਨ੍ਤਸ੍ਸਾਤਿ ਅਸਮ੍ਮੋਹਪਟਿਵੇਧਤੋ ਵਿਸੇਸੇਨ ਪਸ੍ਸਨ੍ਤਸ੍ਸ ਖਨ੍ਧਪਞ੍ਚਕਮੇਵ ਸਚ੍ਚਾਭਿਸਮਯਤੋ ਪੁਬ੍ਬਭਾਗੇ ਵਿਪਸ੍ਸਨ੍ਤਸ੍ਸ. ਅਞ੍ਞਂ ਵਾਤਿ ਇਤ੍ਥਿਪੁਰਿਸਤੋ ਅਞ੍ਞਂ ਵਾ ਕਿਞ੍ਚਿ ਵਤ੍ਥੁਂ. ‘‘ਅਹਂ ਅਸ੍ਮੀ’’ਤਿ ਮਾਨਦਿਟ੍ਠਿਗਾਹਤਣ੍ਹਾਗਾਹਵਸੇਨ ਗਹਿਤਵਤ੍ਥੁਸ੍ਮਿਂ ਯੇਵਾਤਿ ਆਹ ‘‘ਅਹਂ ਅਸ੍ਮੀਤਿ ਤਣ੍ਹਾਮਾਨਦਿਟ੍ਠਿਵਸੇਨਾ’’ਤਿ.

ਸੋਮਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਕਿਸਾਗੋਤਮੀਸੁਤ੍ਤਵਣ੍ਣਨਾ

੧੬੪. ‘‘ਕਿਸਾਗੋਤਮੀ’’ਤਿ ਏਤ੍ਥ ਕਾ ਪਨਾਯਂ ਕਿਸਾਗੋਤਮੀ, ਕਿਸ੍ਸ ਅਯਂ ਭਿਕ੍ਖੁਨੀ ਹੁਤ੍ਵਾ ਸਮਣਧਮ੍ਮਂ ਮਤ੍ਥਕਂ ਪਾਪੇਸੀਤਿ ਤਮਤ੍ਥਂ ਵਿਭਾਵੇਤੁਂ ‘‘ਪੁਬ੍ਬੇ ਕਿਰਾ’’ਤਿਆਦਿਮਾਰਦ੍ਧਂ. ਅਙ੍ਗਾਰਾਵਾਤਿ ਅਦ੍ਦਾਰਿਟ੍ਠਕਵਣ੍ਣਅਙ੍ਗਾਰਾ ਏਵ ਜਾਤਾ. ਦਾਰੁਸਾਕਨ੍ਤਿ ਅਦ੍ਧਮਾਸਕੇਨ ਦਾਰੁਂ ਸਾਕਞ੍ਚ ਆਹਰਿਸ੍ਸਾਮੀਤਿ ਅਨ੍ਤਰਾਪਣੇ ਅਨ੍ਤਰਵੀਥਿਂ ਗਤਾ.

ਸਿਦ੍ਧਤ੍ਥਕਨ੍ਤਿ ਸਾਸਪਂ. ਸਾਲਾਯਨ੍ਤਿ ਅਨਾਥਸਾਲਾਯਂ. ਖੁਰਗ੍ਗੇਯੇਵਾਤਿ ਖੁਰਸਿਖੇ ਏਵ, ਕੇਸੋਰੋਹਨਕ੍ਖਣੇ ਏਵਾਤਿ ਅਤ੍ਥੋ.

ਏਕਮਾਸੀਤਿ ਏਤ੍ਥ ਮ-ਕਾਰੋ ਪਦਸਨ੍ਧਿਕਰੋ. ਸਂਹਿਤਾਵਸੇਨ ਚ ਪੁਰਿਮਪਦੇ ਵਾ ਰਸ੍ਸਤ੍ਤਂ. ਪਰਪਦੇ ਵਾ ਦੀਘਤ੍ਤਨ੍ਤਿ ਆਹ ‘‘ਏਕਾ ਆਸੀ’’ਤਿ. ਭਾਵਨਪੁਂਸਕਮੇਤਂ ‘‘ਏਕਮਨ੍ਤਂ ਨਿਸੀਦੀ’’ਤਿਆਦੀਸੁ ਵਿਯ. ਪੁਤ੍ਤਮਰਣਂ ਅਨ੍ਤਂ ਅਤੀਤਂ ਇਦਾਨਿ ਪੁਤ੍ਤਮਰਣਸ੍ਸ ਅਭਾਵਤੋ. ਤੇਨੇਵਾਹ ‘‘ਪੁਤ੍ਤਮਰਣਂ ਨਾਮ ਨਤ੍ਥੀ’’ਤਿ. ਪੁਰਿਸਂ ਗਵੇਸਿਤੁਨ੍ਤਿ ਯਥਾ ਮਯ੍ਹਂ ਪੁਰਿਸਗਵੇਸਨਾ ਨਾਮ ਸਬ੍ਬਸੋ ਨਤ੍ਥਿ, ਤਥਾ ਏਵ ਪੁਤ੍ਤਗਵੇਸਨਾਪਿ ਨਤ੍ਥਿ, ਤਸ੍ਮਾ ਮੇ ਪੁਤ੍ਤਮਰਣਂ ਏਤਦਨ੍ਤਂ, ਸਬ੍ਬੇਸੁ ਖਨ੍ਧਾਦੀਸੁ ਭਵਾਦੀਸੁ ਚ ਤਣ੍ਹਾਨਨ੍ਦਿਯਾ ਅਭਾਵਕਥਨੇਨ ਸਬ੍ਬਸਤ੍ਤੇਸੁ ਤਣ੍ਹਾ ਸਬ੍ਬਸੋ ਵਿਸੋਸਿਤਾ, ਤਸ੍ਸਾਯੇਵ ਕਾਰਕਅਵਿਜ੍ਜਾਕ੍ਖਨ੍ਧੋ ਪਦਾਲਿਤੋਤਿ ਅਤ੍ਤਨੋ ਨਿਕ੍ਕਿਲੇਸਤਂ ਪਵੇਦੇਨ੍ਤੀ ਥੇਰੀ ਸੀਹਨਾਦਂ ਨਦੀਤਿ.

ਕਿਸਾਗੋਤਮੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਵਿਜਯਾਸੁਤ੍ਤਵਣ੍ਣਨਾ

੧੬੫. ਪਞ੍ਚ ਅਙ੍ਗਾਨਿ ਏਤਸ੍ਸਾਤਿ ਪਞ੍ਚਙ੍ਗਂ, ਪਞ੍ਚਙ੍ਗਮੇਵ ਪਞ੍ਚਙ੍ਗਿਕਂ, ਤੇਨ ਪਞ੍ਚਙ੍ਗਿਕੇਨ. ਆਤਤਨ੍ਤਿਆਦੀਸੁ ਆਤਤਂ ਨਾਮ ਚਮ੍ਮਪਰਿਯੋਨਦ੍ਧੇਸੁ ਭੇਰਿਆਦੀਸੁ ਏਕਤਲਂ ਤੂਰਿਯਂ. ਵਿਤਤਂ ਨਾਮ ਉਭਯਤਲਂ. ਆਤਤਵਿਤਤਂ ਨਾਮ ਤਨ੍ਤਿਬਦ੍ਧਵੀਣਾਦਿ. ਸੁਸਿਰਂ ਵਂਸਾਦਿ. ਘਨਂ ਸਮ੍ਮਾਦਿ. ਤਤਆਦਿਵਿਸੇਸੋਪਿ ਆਤਤਮੇਵਾਤਿ ‘‘ਚਮ੍ਮਪਰਿਯੋਨਦ੍ਧੇਸੂ’’ਤਿ ਵਿਸੇਸਨਂ. ਏਕਤਲਂ ਕੁਮ੍ਭਥੂਣਦਦ੍ਦਰਾਦਿ. ਉਭਯਤਲਂ ਭੇਰਿਮੁਦਿਙ੍ਗਾਦਿ. ਚਮ੍ਮਪਰਿਯੋਨਦ੍ਧਂ ਸੇਸਂ ਤਨ੍ਤਿਬਦ੍ਧਂ ਸਬ੍ਬਂ ਆਤਤਵਿਤਤਂ ਨਾਮ, ਗੋਮੁਖੀਆਦੀਨਮ੍ਪਿ ਏਤ੍ਥੇਵ ਸਙ੍ਗਹੋ ਦਟ੍ਠਬ੍ਬੋ. ਵਂਸਾਦੀਤਿ ਆਦਿਸਦ੍ਦੇਨ ਸਙ੍ਖਸਿਙ੍ਗਾਨਮ੍ਪਿ ਸਙ੍ਗਹੋ. ਸਮ੍ਮਤਾਲ਼-ਕਂਸਤਾਲ਼-ਸਿਲਾਤਾਲ਼-ਸਲਾਕਤਾਲ਼ਾਦਿ ਸਮ੍ਮਾਦਿ ਨਾਮ. ਤਤ੍ਥ ਸਮ੍ਮਤਾਲ਼ਂ ਨਾਮ ਦਣ੍ਡਮਯਤਾਲ਼ਂ, ਕਂਸਮਯਤਾਲ਼ਂ ਕਂਸਤਾਲ਼ਂ, ਸਿਲਾਯਂ ਅਯੋਪਤ੍ਤੇਨ ਚ ਤਾਲ਼ਨਤਾਲ਼ਂ. ਸਬ੍ਬੇ ਕਾਮਗੁਣੇ. ਉਗ੍ਘਰਿਤਪਗ੍ਘਰਿਤਟ੍ਠੇਨਾਤਿ ਉਪਰਿ ਘਰਣੇਨ ਚ ਵਿਸ੍ਸਨ੍ਦਨੇਨ ਚ. ਏਵਨ੍ਤਿ ‘‘ਇਮਿਨਾ ਪੂਤਿਕਾਯੇਨਾ’’ਤਿ. ਅਰੂਪਟ੍ਠਾਯਿਨੋਤਿ ਸਤ੍ਤਾਧਿਟ੍ਠਾਨੇਨਾਯਂ ਧਮ੍ਮਦੇਸਨਾਤਿ ਆਹ ‘‘ਸਬ੍ਬਤ੍ਥਾਤਿ ਸਬ੍ਬੇਸੁ ਰੂਪਾਰੂਪਭਵੇਸੂ’’ਤਿ. ਤੇਸਂ ਦ੍ਵਿਨ੍ਨਂ ਰੂਪਾਰੂਪਭਵਾਨਂ ਗਹਿਤਤ੍ਤਾ. ਭਵਭਾਵਸਾਮਞ੍ਞਤੋ, ਤਦਧਿਟ੍ਠਾਨਤੋ ਗਹਿਤੇ ਕਾਮਭਵੇ. ਅਵਿਜ੍ਜਾਤਮੋ ਵਿਹਤੋ ਅਗ੍ਗਮਗ੍ਗੇਨ ਸਮੁਗ੍ਘਾਤਿਤਤ੍ਤਾ.

ਵਿਜਯਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਉਪ੍ਪਲਵਣ੍ਣਾਸੁਤ੍ਤਵਣ੍ਣਨਾ

੧੬੬. ਅਗ੍ਗਤੋ ਪਟ੍ਠਾਯਾਤਿ ਸਬ੍ਬਅਗ੍ਗਤੋ ਪਭੁਤਿ ਯਾਵ ਮੂਲਾ ਅਨ੍ਤਰਾਯੁਤ੍ਤਂ ਸਮ੍ਮਦੇਵ ਪੁਪ੍ਫਿਤਂ ਸਾਲਰੁਕ੍ਖਂ. ਵਣ੍ਣਧਾਤੁਸੀਸੇਨ ਵਣ੍ਣਧਾਤੁਸਮ੍ਪਨ੍ਨਂ ਦੁਤਿਯਂ ਭਿਕ੍ਖੁਨਿਂ ਵਦਤੀਤਿ ਆਹ ‘‘ਤਯਾ ਸਦਿਸਾ ਅਞ੍ਞਾ ਭਿਕ੍ਖੁਨੀ ਨਤ੍ਥੀ’’ਤਿ. ਪਖੁਮਸੀਸੇਨ ਅਕ੍ਖਿਭਣ੍ਡਂ ਵੁਚ੍ਚਤੀਤਿ ਆਹ ‘‘ਪਖੁਮਨ੍ਤਰਿਕਾਯਨ੍ਤਿ ਦ੍ਵਿਨ੍ਨਂ ਅਕ੍ਖੀਨਂ ਮਜ੍ਝੇ’’ਤਿ. ਨਾਸਵਂਸੇਤਿ ਨਾਸਵਂਸਮੂਲੇ. ‘‘ਨ ਪਸ੍ਸਸੀ’’ਤਿ ਵਤ੍ਵਾ ਅਦਸ੍ਸਨੇ ਕਾਰਣਂ ਆਹ ‘‘ਵਸੀਭੂਤਮ੍ਹੀ’’ਤਿ.

ਉਪ੍ਪਲਵਣ੍ਣਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਚਾਲਾਸੁਤ੍ਤਵਣ੍ਣਨਾ

੧੬੭. ਇਦਨ੍ਤਿ ਇਦਂ ਦਸ੍ਸਨਂ. ਗਾਹਾਪੇਸੀਤਿ ਸਮਾਦਾਪੇਸਿ ‘‘ਜਾਤਿਂ ਮਾ ਰੋਚਾ’’ਤਿ. ਅਞ੍ਞਨ੍ਤਿ ਬਨ੍ਧਵਧਤੋ ਅਞ੍ਞਂ ਛੇਦਨਾਦਿਂ. ਨਿਵੇਸੇਸੀਤਿ ਪਵਿਸਾਪੇਸਿ.

ਚਾਲਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਉਪਚਾਲਾਸੁਤ੍ਤਵਣ੍ਣਨਾ

੧੬੮. ਪੁਨਪ੍ਪੁਨਂ…ਪੇ… ਆਗਚ੍ਛਨ੍ਤਿ ਕਾਰਣਸ੍ਸ ਅਸਮੂਹਤਤ੍ਤਾ. ਸਨ੍ਤਾਪਿਤੋ ਕਿਲੇਸਸਨ੍ਤਾਪੇਹਿ. ਅਗਤੀਤਿ ਅਵਿਸਯੋ.

ਉਪਚਾਲਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਸੀਸੁਪਚਾਲਾਸੁਤ੍ਤਵਣ੍ਣਨਾ

੧੬੯. ਸਮਣਿਸਦਿਸਾਤਿ ਸਮਣਲਿਙ੍ਗਸ੍ਸ ਧਾਰਣੇਨ ਸਮਣਿਸਦਿਸਾ, ਕਸ੍ਸਚਿਪਿ ਪਾਸਣ੍ਡਸ੍ਸ ਅਰੁਚ੍ਚਨਤੋ ਮੋਨਮਗ੍ਗਸ੍ਸ ਅਪ੍ਪਟਿਪਜ੍ਜਨਤੋ ਤਵ ਸਮਣਿਭਾਵਂ ਨਾਨੁਪਸ੍ਸਾਮੀਤਿ ਅਧਿਪ੍ਪਾਯੋ. ਪਾਸਂ ਡੇਨ੍ਤੀਤਿ ਪਾਸਂ ਸਜ੍ਜੇਨ੍ਤਿ, ਯਥਾ ਤਤ੍ਥ ਦਿਟ੍ਠਿਪਾਸੇ ਸਤ੍ਤਾਨਂ ਚਿਤ੍ਤਂ ਪਟਿਮੁਕ੍ਕਂ ਹੋਤਿ, ਏਵਂ ਸਜ੍ਜੇਨ੍ਤੀਤਿ ਅਤ੍ਥੋ. ਤਥਾਭੂਤਾ ਚ ਤੇ ਸਤ੍ਤਾਨਂ ਚਿਤ੍ਤੇ ਖਿਤ੍ਤਾ ਵਿਯ ਹੋਨ੍ਤੀਤਿ ਆਹ ‘‘ਚਿਤ੍ਤੇਸੁ ਦਿਟ੍ਠਿਪਾਸਂ ਖਿਪਨ੍ਤੀਤਿ ਅਤ੍ਥੋ’’ਤਿ. ਪਾਸੇ ਮੋਚੇਤੀਤਿ ਦਿਟ੍ਠਿਪਾਸੇ ਸਤ੍ਤਾਨਂ ਚਿਤ੍ਤਸਨ੍ਤਾਨਤੋ ਨੀਹਰਤਿ ਧਮ੍ਮਸੁਧਮ੍ਮਤਾਯ. ਤਸ੍ਮਾਤਿ ਪਾਸਮੋਚਨਤੋ ਪਾਸਣ੍ਡੋਤਿ ਨ ਵੁਚ੍ਚਤਿ. ‘‘ਇਤੋ ਬਹਿਦ੍ਧਾਯੇਵ ਪਾਸਣ੍ਡਾ ਹੋਨ੍ਤੀ’’ਤਿ ਵੁਤ੍ਤਸ੍ਸ ਅਤ੍ਥਸ੍ਸ ਨਿਗਮਨਂ. ਏਵਞ੍ਚ ਕਤ੍ਵਾ ਸਬ੍ਬੇਪਿ ਬਾਹਿਰਕਸਮਯੇ ਸਨ੍ਧਾਯ ਚੂਲ਼ਸੀਹਨਾਦਸੁਤ੍ਤੇ ‘‘ਛਨ੍ਨਵੁਤਿ ਪਾਸਣ੍ਡਾ’’ਤਿ ਵੁਤ੍ਤਂ. ਪਸੀਦਨ੍ਤੀਤਿ ਦਿਟ੍ਠਿਪਙ੍ਕੇ ਸਂਸਾਰਪਙ੍ਕੇ ਚ ਪਕਾਰੇਹਿ ਅਗਾਧਾ ਓਸੀਦਨ੍ਤਿ.

ਅਭਿਭਵਿਤ੍ਵਾਤਿ ਸਬ੍ਬਸਂਕਿਲੇਸਪ੍ਪਹਾਨੇਨ ਅਭਿਭੁਯ੍ਯ ਅਤਿਕ੍ਕਮਿਤ੍ਵਾ. ਅਜਿਤੋਤਿ ਅਜਿਨਿ ਅਵਿਜਯਤ੍ਤਾ. ਸਬ੍ਬਾਨਿ ਅਕੁਸਲਕਮ੍ਮਾਨਿ ਕੁਸਲਕਮ੍ਮਾਨਿ ਚ ਖੀਣਾਨਿ ਏਤ੍ਥਾਤਿ ਸਬ੍ਬਕਮ੍ਮਕ੍ਖਯੋ, ਅਰਹਤ੍ਤਂ. ਉਪਧਯੋ ਸਮ੍ਮਦੇਵ ਖੀਯਨ੍ਤਿ ਏਤ੍ਥਾਤਿ ਉਪਧਿਸਙ੍ਖਯੋ, ਨਿਬ੍ਬਾਨਂ.

ਸੀਸੁਪਚਾਲਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਸੇਲਾਸੁਤ੍ਤਵਣ੍ਣਨਾ

੧੭੦. ਕੇਨਿਦਂ ਪਕਤਂ ਬਿਮ੍ਬਨ੍ਤਿ ਇਦਂ ਅਤ੍ਤਭਾਵਸਞ੍ਞਿਤਂ ਬਿਮ੍ਬਂ ਬ੍ਰਹ੍ਮਾ-ਵਿਸਣੁਪੁਰਿਸ-ਪਜਾਪਤਿਆਦੀਸੁ ਕੇਨ ਕਤਂ ਨਿਮ੍ਮਿਤਂ ਨਿਬ੍ਬਤ੍ਤਿਤਨ੍ਤਿ ਕਤ੍ਤਬ੍ਬਮੋਹਂ ਨਾਮ ਕਾਤੁਕਾਮੋ ਪੁਚ੍ਛਤਿ. ਅਘਨ੍ਤਿ ਅਘਵਤ੍ਥੁ. ਤੇਨਾਹ ‘‘ਦੁਕ੍ਖਪਤਿਟ੍ਠਾਨਤ੍ਤਾ’’ਤਿ. ਹੇਤੁਨਿਰੋਧੇਨਾਤਿ ਤਣ੍ਹਾਸਙ੍ਖਤਸ੍ਸ ਹੇਤੁਨੋ ਅਨੁਪ੍ਪਾਦਨਿਰੋਧੇਨ. ਪਚ੍ਚਯਵੇਕਲ੍ਲੇਨਾਤਿ ਤਦਵਸਿਟ੍ਠਕਿਲੇਸਾਭਿਸਙ੍ਖਾਰਾਦਿਪਚ੍ਚਯਸ੍ਸ ਵੇਕਲ੍ਲਭਾਵੇਨ, ਅਪਚ੍ਚਯਭਾਵੂਪਗਮਨੇਨਾਤਿ ਅਤ੍ਥੋ.

ਸੇਲਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਵਜਿਰਾਸੁਤ੍ਤਵਣ੍ਣਨਾ

੧੭੧. ਸੁਦ੍ਧਸਙ੍ਖਾਰਪੁਞ੍ਜੇਤਿ ਰੂਪਾਰੂਪਵਿਭਾਗੇ ਕਿਲੇਸਸਙ੍ਖਾਰਸਮੂਹੇ. ਪਰਮਤ੍ਥਤੋਤਿ ਸਭਾਵੇਨ. ਯਥਾ ਨ ਹਿ ਸਤ੍ਤਸਞ੍ਞਿਤਸਙ੍ਖਾਰਪੁਞ੍ਜੋ ਨਾਮ ਪਰਮਤ੍ਥਤੋ ਉਪਲਬ੍ਭਤਿ, ਏਵਂ ਤਬ੍ਬਿਨਿਮੁਤ੍ਤੋ ਨਾਮ ਕੋਚਿ ਨ ਉਪਲਬ੍ਭਤਿ ਅਵਿਜ੍ਜਮਾਨਤ੍ਤਾ. ਵਿਜ੍ਜਮਾਨੇਸੂਤਿ ਯਥਾਪਚ੍ਚਯਸਮ੍ਪਤ੍ਤਿਯਾ ਲਬ੍ਭਮਾਨੇਸੁ. ਤੇਨਾਕਾਰੇਨਾਤਿ ਇਤ੍ਥਿਪੁਰਿਸਾਦਿਆਕਾਰੇਨ. ਵਵਤ੍ਥਿਤੇਸੂਤਿ ਪਚ੍ਚੇਕਂ ਪਚ੍ਚਯਵਿਸੇਸਸਮੁਟ੍ਠਿਤਂ ਸਣ੍ਠਾਨਵਿਸੇਸਂ ਉਪਾਦਾਯ ‘‘ਪੁਰਿਸੋ ਹਤ੍ਥੀ ਅਸ੍ਸੋ’’ਤਿਆਦਿਨਾ ਅਭਿਸਙ੍ਗਤੋ ਪਵਤ੍ਤੇਸੁ. ਸਮ੍ਮੁਤੀਤਿ ਸਤ੍ਤੋਤਿ ਵੋਹਾਰੋ. ਤੇਨਾਹ ‘‘ਸਮਞ੍ਞਾਮਤ੍ਤਮੇਵਾ’’ਤਿ. ਪਞ੍ਚਕ੍ਖਨ੍ਧਦੁਕ੍ਖਨ੍ਤਿ ਪਞ੍ਚਕ੍ਖਨ੍ਧਸਞ੍ਞਿਤਂ ਦੁਕ੍ਖਂ. ਵੁਤ੍ਤਂ ਹੇਤਂ ਭਗਵਤਾ ‘‘ਸਂਖਿਤ੍ਤੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਾ’’ਤਿ (ਦੀ. ਨਿ. ੨.੩੮੭; ਮ. ਨਿ. ੧.੧੨੦; ੩.੩੭੩; ਵਿਭ. ੨੦੨) ਅਞ੍ਞੋ ਨੇਵ ਸਮ੍ਭੋਤਿ ਯਥਾਵੁਤ੍ਤਦੁਕ੍ਖਤੋ ਅਞ੍ਞਸ੍ਸ ਸਙ੍ਖਤਧਮ੍ਮਸ੍ਸ ਅਭਾਵਤੋ. ਨ ਨਿਰੁਜ੍ਝਤੀਤਿ ਤਤੋ ਅਞ੍ਞਂ ਨ ਨਿਰੁਜ੍ਝਤਿ, ਉਪ੍ਪਾਦਤੋ ਹੋਤਿ ਨਿਰੋਧੋਤਿ.

ਵਜਿਰਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਭਿਕ੍ਖੁਨੀਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.