੧. ਪਠਮਵਗ੍ਗੋ

੧. ਤਪੋਕਮ੍ਮਸੁਤ੍ਤਵਣ੍ਣਨਾ

੧੩੭. ਉਰੁਵੇਲਾਯ ਸਮੀਪੇ ਗਾਮੋ ਉਰੁਵੇਲਗਾਮੋ, ਤਂ ਉਰੁਵੇਲਗਾਮਂ ਅਭਿਮੁਖਭਾਵੇਨ ਸਮ੍ਮਦੇਵ ਸਬ੍ਬਧਮ੍ਮੇ ਬੁਜ੍ਝਤੀਤਿ ਅਭਿਸਮ੍ਬੋਧਿ, ਸਬ੍ਬਞ੍ਞੁਤਞ੍ਞਾਣਂ, ਤੇਨ ਸਮਨ੍ਨਾਗਤਤ੍ਤਾ ਚ ਭਗਵਾ ਅਭਿਸਮ੍ਬੁਦ੍ਧੋਤਿ ਵੁਚ੍ਚਤਿ. ਤਸ੍ਸ ਪਞ੍ਚਚਤ੍ਤਾਲੀਸਾਯ ਵਸ੍ਸੇਸੁ ਆਦਿਤੋ ਪਨ੍ਨਰਸ ਵਸ੍ਸਾਨਿ ਪਠਮਬੋਧਿ, ਇਧ ਪਨ ਸਤ੍ਤਾਹਬ੍ਭਨ੍ਤਰਮੇਵ ਅਧਿਪ੍ਪੇਤਨ੍ਤਿ ਆਹ ‘‘ਅਭਿਸਮ੍ਬੁਦ੍ਧੋ ਹੁਤ੍ਵਾ ਅਨ੍ਤੋਸਤ੍ਤਾਹਸ੍ਮਿਂ ਯੇਵਾ’’ਤਿ. ਅਸੁਖਭਾਵੇਨ ਅਞ੍ਞੇਹਿ ਕਾਤੁਂ ਅਸਕ੍ਕੁਣੇਯ੍ਯਤ੍ਤਾ ਦੁਕ੍ਕਰਂ ਕਰੋਤੀਤਿ ਦੁਕ੍ਕਰਕਾਰੋ, ਸੋ ਏਵ ਇਤ੍ਥਿਲਿਙ੍ਗਵਸੇਨ ਦੁਕ੍ਕਰਕਾਰਿਕਾ. ਤਾਯ ਮੁਤ੍ਤੋ ਵਤਮ੍ਹੀਤਿ ਚਿਨ੍ਤੇਸਿ. ਯਦਿ ਏਵਂ ਕਸ੍ਮਾ ਤਂ ਲੋਕਨਾਥੋ ਛਬ੍ਬਸ੍ਸਾਨਿ ਸਮਨੁਯੁਞ੍ਜਤਿ? ਕਮ੍ਮਪੀਲ਼ਿਤਵਸੇਨ. ਵੁਤ੍ਤਞ੍ਹੇਤਂ ਅਪਦਾਨੇ (ਅਪ. ਥੇਰ ੧.੩੯.੯੨-੯੪) –

‘‘ਅਵਚਾਹਂ ਜੋਤਿਪਾਲੋ, ਸੁਗਤਂ ਕਸ੍ਸਪਂ ਤਦਾ;

ਕੁਤੋ ਨੁ ਬੋਧਿ ਮੁਣ੍ਡਸ੍ਸ, ਬੋਧਿ ਪਰਮਦੁਲ੍ਲਭਾ.

‘‘ਤੇਨ ਕਮ੍ਮਵਿਪਾਕੇਨ, ਅਚਰਿਂ ਦੁਕ੍ਕਰਂ ਬਹੁਂ;

ਛਬ੍ਬਸ੍ਸਾਨੁਰੁਵੇਲਾਯਂ, ਤਤੋ ਬੋਧਿਮਪਾਪੁਣਿਂ.

‘‘ਨਾਹਂ ਏਤੇਨ ਮਗ੍ਗੇਨ, ਪਾਪੁਣਿਂ ਬੋਧਿਮੁਤ੍ਤਮਂ;

ਕੁਮ੍ਮਗ੍ਗੇਨ ਗਵੇਸਿਸ੍ਸਂ, ਪੁਬ੍ਬਕਮ੍ਮੇਨ ਵਾਰਿਤੋ’’ਤਿ.

ਮਾਰੇਤੀਤਿ ਵਿਬਾਧੇਤਿ. ਵਿਪਤ੍ਤਿਆਦਿਸਂਯੋਜਨਞ੍ਹਿ ਸਾਧੂਨਂ ਪਰਮਤ੍ਥਤੋ ਮਰਣਂ ਸਚ੍ਚਪਟਿਵੇਧਮਾਰਣਤ੍ਤਾ, ਪਾਪਤਰਤ੍ਤਾ ਪਾਪਤਮੋਤਿ ਪਾਪਿਮਾ. ਸਾ ਚਸ੍ਸ ਪਾਪਤਮਤਾ ਪਾਪਵੁਤ੍ਤਿਤਾਯਾਤਿ ਆਹ ‘‘ਪਾਪੇ ਨਿਯੁਤ੍ਤੋ’’ਤਿ. ਅਧਿਪਤੀਤਿ ਕਾਮਾਧਿਪਤਿ. ਅਪ੍ਪਹੀਨਕਾਮਰਾਗੇ ਅਤ੍ਤਨੋ ਵਸੇ ਵਤ੍ਤੇਤੀਤਿ ਵਸਵਤ੍ਤੀ. ਤੇਸਂਯੇਵ ਕੁਸਲਕਮ੍ਮਾਨਂ ਅਨ੍ਤਂ ਕਰੋਤੀਤਿ ਅਨ੍ਤਕੋ. ਵਟ੍ਟਦੁਕ੍ਖਤੋ ਅਪਰਿਮੁਤ੍ਤਪਚ੍ਚਯਤ੍ਤਾ ਨਮੁਚਿ. ਮਤ੍ਤਾਨਂ ਪਮਤ੍ਤਾਨਂ ਬਨ੍ਧੂਤਿ ਪਮਤ੍ਤਬਨ੍ਧੁ.

ਤਪੋਕਮ੍ਮਾਤਿ ਅਤ੍ਤਕਿਲਮਥਾਨੁਯੋਗਤੋ. ਅਪਰਦ੍ਧੋਤਿ ਵਿਰਜ੍ਝਸਿ. ‘‘ਅਪਰਾਧੋ’’ਤਿਪਿ ਅਤ੍ਥਿ, ਸੋਯੇਵ ਅਤ੍ਥੋ. ਕਾਯਕਿਲਮਥਂ ਅਨੁਯੁਞ੍ਜਨ੍ਤੋ ਯੇਭੁਯ੍ਯੇਨ ਅਮਰਤ੍ਥਾਯ ਅਨੁਯੁਞ੍ਜਤਿ, ਸੋ ਚ ਕਮ੍ਮਵਾਦੀਹਿ ਅਨੁਯੁਞ੍ਜਿਯਮਾਨੋ ਦੇਵਤ੍ਥਾਯ ਸਿਯਾਤਿ ਆਹ ‘‘ਅਮਰਭਾਵਤ੍ਥਾਯਾ’’ਤਿ. ਸਬ੍ਬਂ ਤਪਨ੍ਤਿ ਸਬ੍ਬਂ ਅਤ੍ਤਪਰਿਤਾਪਨਂ. ਅਤ੍ਥਾਵਹਂ ਨ ਭਵਤਿ ਬੋਧਿਯਾ ਅਨੁਪਾਯਤ੍ਤਾ. ਕਿਞ੍ਚਸ੍ਸਾਤਿ ਕਿਞ੍ਚਿ ਸਿਯਾਤਿ ਅਤ੍ਥੋ. ਫਿਯਾਰਿਤ੍ਤਂਵ ਧਮ੍ਮਨੀਤਿ ਧਮ੍ਮਂ ਵੁਚ੍ਚਤਿ ਵਣ੍ਣੁ, ਸੋ ਇਧ ‘‘ਧਮ੍ਮ’’ਨ੍ਤਿ ਵੁਤ੍ਤੋ, ਧਮ੍ਮਨਿ ਵਣ੍ਣੁਪਦੇਸੇਤਿ ਅਤ੍ਥੋ. ਤੇਨਾਹ ‘‘ਅਰਞ੍ਞੇ’’ਤਿ. ਉਭੋਸੁ ਪਸ੍ਸੇਸੁ ਫਿਯਾਹਿ ਆਕਡ੍ਢੇਯ੍ਯ ਚੇਵ ਅਰਿਤ੍ਤੇਹਿ ਉਪ੍ਪੀਲ਼ੇਯ੍ਯ ਚ.

ਸਮ੍ਮਾਵਾਚਾਕਮ੍ਮਨ੍ਤਾਜੀਵਾ ਗਹਿਤਾ ਮਗ੍ਗਸੀਲਸ੍ਸ ਅਧਿਪ੍ਪੇਤਤ੍ਤਾ. ਸਮਾਧਿਨੋ ਹਿ ਗਹਣੇਨ ਸਮ੍ਮਾਵਾਯਾਮਸਤਿਸਮਾਧਯੋ ਗਹਿਤਾ ਉਪਕਾਰਭਾਵਤੋ. ਪਞ੍ਞਾਯਾਤਿ ਏਤ੍ਥਾਪਿ ਏਸੇਵ ਨਯੋ. ਬੁਜ੍ਝਤਿ ਏਤੇਨਾਤਿ ਬੋਧੋ. ਮਗ੍ਗੋਤਿ ਆਹ ‘‘ਬੋਧਾਯਾਤਿ ਮਗ੍ਗਤ੍ਥਾਯਾ’’ਤਿ. ਕਥਂ ਪਨ ਮਗ੍ਗਂ ਮਗ੍ਗਤ੍ਥਾਯ ਭਾਵੇਤੀਤਿ ਆਹ ‘‘ਯਥਾ ਹੀ’’ਤਿਆਦਿ. ਤੇਨ ਯਥਾ ਯਾਗੁਪਚਨਾਰਮ੍ਭੋ ਯਾਵਦੇਵ ਯਾਗੁਅਤ੍ਥੋ, ਏਵਂ ਮਗ੍ਗਭਾਵਨਾਰਮ੍ਭੋ ਮਗ੍ਗਾਧਿਗਮਤ੍ਥਾਯਾਤਿ ਦਸ੍ਸੇਤਿ. ਆਰਮ੍ਭੋਤਿ ਚ ਅਰਿਯਮਗ੍ਗਭਾਵਨਾਯ ਬਨ੍ਧਾਪਨਂ ਦਟ੍ਠਬ੍ਬਂ. ਕੇਚਿ ਪਨ ‘‘ਮਗ੍ਗਨ੍ਤਿ ਅਰਿਯਮਗ੍ਗਂ, ਬੋਧਾਯਾਤਿ ਅਰਹਤ੍ਤਸਮ੍ਬੋਧਾਯ, ਏਵਞ੍ਚ ਕਤ੍ਵਾ ‘ਪਤ੍ਤੋਸ੍ਮਿ ਪਰਮਸੁਦ੍ਧਿ’ਨ੍ਤਿ ਇਦਮ੍ਪਿ ਵਚਨਂ ਸਮਤ੍ਥਿਤ’’ਨ੍ਤਿ ਵਦਨ੍ਤਿ, ਅਪਰੇ ਪਨ ‘‘ਸਬ੍ਬਞ੍ਞੁਤਞ੍ਞਾਣਸਮ੍ਬੋਧਾਯਾਤਿ. ਸੋ ਹਿ ਸਬ੍ਬਸ੍ਮਾਪਿ ਬੋਧਿਤੋ ਉਤ੍ਤਰਿਤਰੋ’’ਤਿ. ਨਿਹਤੋ ਨਿਬ੍ਬਿਸੇਵਨਭਾਵਂ ਪਾਪਿਤੋ. ਤੇਨਾਹ ‘‘ਪਰਾਜਿਤੋ’’ਤਿ.

ਤਪੋਕਮ੍ਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਹਤ੍ਥਿਰਾਜਵਣ੍ਣਸੁਤ੍ਤਵਣ੍ਣਨਾ

੧੩੮. ਅਨ੍ਧਭਾਵਕਾਰਕੇਤਿ ਪਚੁਰਜਨਸ੍ਸ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣੇਨ ਅਨ੍ਧਭਾਵਕਾਰਕੇ. ਮਹਾਤਮੇਤਿ ਮਹਤਿ ਤਮਸਿ. ਪਾਸਾਣਫਲਕੇ ਮਹਾਚੀਵਰਂ ਸੀਸੇ ਠਪੇਤ੍ਵਾਤਿ ਏਤੇਨ ਤਂ ਫਲਕਂ ਅਪਸ੍ਸਾਯ ਨਿਸਿਨ੍ਨੋਤਿ ਦਸ੍ਸੇਤਿ. ਪਧਾਨਨ੍ਤਿ ਭਾਵਨਂ. ਪਰਿਗ੍ਗਣ੍ਹਮਾਨੋਤਿ ਸਬ੍ਬਸੋ ਗਣ੍ਹਨ੍ਤੋ ਅਵਿਸ੍ਸਜ੍ਜੇਨ੍ਤੋ, ਭਾਵਨਂ ਅਨੁਯੁਞ੍ਜਨ੍ਤੋ ਅਨੁਪੁਬ੍ਬਸਮਾਪਤ੍ਤਿਯੋ ਫਲਸਮਾਪਤ੍ਤਿਞ੍ਚ ਮਨਸਿਕਰੋਨ੍ਤੋਤਿ ਅਤ੍ਥੋ. ਤੇਨਾਹ ‘‘ਨਨੁ ਚਾ’’ਤਿਆਦਿ. ਅਰਿਟ੍ਠਕੋਤਿ ਅਰਿਟ੍ਠਕਵਣ੍ਣੋ. ਤੇਨਾਹ ‘‘ਕਾਲ਼ਕੋ’’ਤਿ.

ਦੀਘਮਦ੍ਧਾਨਨ੍ਤਿ ਚਿਰਤਰਂ ਕਾਲਂ. ਸਂਸਰਨ੍ਤਿ ਆਸਾਦਨਾਧਿਪ੍ਪਾਯੇਨ ਸਞ੍ਚਰਨ੍ਤੋ, ਅਲਂ ਤੁਯ੍ਹਂ ਏਤੇਨ ਨਿਪ੍ਪਯੋਜਨਨ੍ਤਿ ਅਧਿਪ੍ਪਾਯੋ. ਨ ਹਿ ਤੇਨ ਮਾਰਸ੍ਸ ਕਾਚਿ ਅਤ੍ਥਸਿਦ੍ਧੀਤਿ.

ਹਤ੍ਥਿਰਾਜਵਣ੍ਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਸੁਭਸੁਤ੍ਤਵਣ੍ਣਨਾ

੧੩੯. ਸੁਸਂਵੁਤਾਤਿ ਮਗ੍ਗਸਂਵਰੇਨ ਸੁਟ੍ਠੁ ਸਂਵੁਤਾ. ਸੁਪਿਹਿਤਾਤਿ ਸੁਟ੍ਠੁ ਪਿਹਿਤਾ. ਵਸਾਨੁਗਾਤਿ ਕਾਯਾਦਿਦ੍ਵਾਰਵਸਾਨੁਗਾ ਵਸਵਤ੍ਤਿਨੋ ਨ ਹੋਨ੍ਤਿ. ਬਦ੍ਧਚਰਾਤਿ ਪਟਿਬਦ੍ਧਚਰਿਯਾਤਿ.

ਸੁਭਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਪਠਮਮਾਰਪਾਸਸੁਤ੍ਤਵਣ੍ਣਨਾ

੧੪੦. ਉਪਾਯਮਨਸਿਕਾਰੇਨਾਤਿ ਅਨਿਚ੍ਚਾਦੀਸੁ ਅਨਿਚ੍ਚਾਦਿਤੋ ਮਨਸਿਕਰਣੇਨ. ਉਪਾਯਵੀਰਿਯੇਨਾਤਿ ਅਨੁਪ੍ਪਨ੍ਨਾਕੁਸਲਾਨਂ ਅਨੁਪ੍ਪਾਦਨਾਯ ਵਿਧਿਨਾ ਪਵਤ੍ਤਵੀਰਿਯੇਨ. ਕਾਰਣਵੀਰਿਯੇਨਾਤਿ ਅਨੁਪ੍ਪਨ੍ਨਾਨੁਪ੍ਪਾਦਨਾਦਿਅਤ੍ਥਸ੍ਸ ਕਾਰਣਭੂਤੇਨ ਵੀਰਿਯੇਨ. ਅਨੁਪ੍ਪਨ੍ਨਪਾਪਕਾਨੁਪ੍ਪਾਦਨਾਦਿਅਤ੍ਥਾਨਿ ਹਿ ਵੀਰਿਯਾਨਿ ਯਦਤ੍ਥਂ ਹੋਨ੍ਤਿ, ਤਂ ਅਤ੍ਥਂ ਸਾਧੇਨ੍ਤਿਯੇਵਾਤਿ ਏਤਸ੍ਸ ਅਤ੍ਥਸ੍ਸ ਦੀਪਕੋ ਸਮ੍ਮਾ-ਸਦ੍ਦੋ. ਯੋਨਿਸੋਸਮ੍ਮਾਸਦ੍ਦੇਨ ਹਿ ਉਪਾਯਕਾਰਣਤ੍ਥਦੀਪਕਤਂ ਸਨ੍ਧਾਯ ‘‘ਉਪਾਯਵੀਰਿਯੇਨ ਕਾਰਣਵੀਰਿਯੇਨਾ’’ਤਿ ਵੁਤ੍ਤਂ. ਅਰਹਤ੍ਤਫਲਵਿਮੁਤ੍ਤਿ ਉਕ੍ਕਟ੍ਠਨਿਦ੍ਦੇਸੇਨ. ਮਾਰੇਨ ‘‘ਮਯ੍ਹਂ ਖੋ, ਭਿਕ੍ਖਵੇ’’ਤਿਆਦਿਕਂ ਭਗਵਤੋ ਵਚਨਂ ਸੁਤ੍ਵਾ ਵੁਤ੍ਤਂ ‘‘ਅਰਹਤ੍ਤਂ ਪਤ੍ਵਾਪਿ ਨ ਤੁਸ੍ਸਤੀ’’ਤਿਆਦਿ.

ਕਿਲੇਸਪਾਸੇਨਾਤਿ ਕਿਲੇਸਮਾਰਸ੍ਸ ਉਪਾਯਭੂਤੇਨ. ਕਿਲੇਸਮਾਰੋ ਹਿ ਸਤ੍ਤੇ ਕਾਮਗੁਣਪਾਸੇਹਿ ਨਿਬਨ੍ਧਤਿ, ਨ ਪਨ ਸਯਮੇਵ. ਤੇਨਾਹ ‘‘ਯੇ ਦਿਬ੍ਬਾ ਕਾਮਗੁਣਸਙ੍ਖਾਤਾ’’ਤਿਆਦਿ. ਮਾਰਬਨ੍ਧਨੇਤਿ ਕਿਲੇਸਮਾਰਸ੍ਸ ਬਨ੍ਧਨਟ੍ਠਾਨੇ, ਭਵਚਾਰਕੇਤਿ ਅਤ੍ਥੋ. ਨ ਮੇ ਸਮਣ ਮੋਕ੍ਖਸੀਤਿ ਇਦਂ ਮਾਰੋ ‘‘ਅਨੁਤ੍ਤਰਾ ਵਿਮੁਤ੍ਤਿ ਅਨੁਪ੍ਪਤ੍ਤਾ, ਵਿਮੁਤ੍ਤਾ ਸਬ੍ਬਪਾਸੇਹੀ’’ਤਿ ਚ ਭਗਵਤੋ ਵਚਨਂ ਅਸਦ੍ਦਹਨ੍ਤੋ ਵਦਤਿ ਸਦ੍ਦਹਨ੍ਤੋਪਿ ਵਾ ‘‘ਏਵਮਯਂ ਪਰੇਸਂ ਸਤ੍ਤਾਨਂ ਮੋਕ੍ਖਾਯ ਉਸ੍ਸਾਹਂ ਨ ਕਰੇਯ੍ਯਾ’’ਤਿ ਅਤ੍ਤਨੋ ਕੋਹਞ੍ਞੇ ਠਤ੍ਵਾ ਵਦਤਿ.

ਪਠਮਮਾਰਪਾਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਮਾਰਪਾਸਸੁਤ੍ਤਵਣ੍ਣਨਾ

੧੪੧. ਅਨੁਪੁਬ੍ਬਗਮਨਚਾਰਿਕਨ੍ਤਿ ਗਾਮਨਿਗਮਰਾਜਧਾਨੀਸੁ ਅਨੁਕ੍ਕਮੇਨ ਗਮਨਸਙ੍ਖਾਤਂ ਚਾਰਿਕਂ. ਏਵਂ ਹਿ ਗਤੇਸੂਤਿ ਏਵਂ ਤੁਮ੍ਹੇਸੁ ਬਹੂਸੁ ਏਕਜ੍ਝਂ ਗਤੇਸੁ.

ਆਦਿਮ੍ਹਿ ਕਲ੍ਯਾਣਂ ਏਤਸ੍ਸਾਤਿ ਆਦਿਕਲ੍ਯਾਣਂ, ਤਥਾ ਸੇਸੇਸੁ. ਸਾਸਨਸ੍ਸ ਆਦਿ ਸੀਲਂ ਮੂਲਕਤ੍ਤਾ. ਤਸ੍ਸ ਸਮਥਾਦਯੋ ਮਜ੍ਝਂ ਸਾਸਨਸਮ੍ਪਤ੍ਤਿਯਾ ਵੇਮਜ੍ਝਭਾਵਤੋ. ਫਲਨਿਬ੍ਬਾਨਾਨਿ ਪਰਿਯੋਸਾਨਂ ਤਦਧਿਗਮਤੋ ਉਤ੍ਤਰਿ ਕਰਣੀਯਾਭਾਵਤੋ. ਸਾਸਨੇ ਸਮ੍ਮਾਪਟਿਪਤ੍ਤਿ ਨਾਮ ਪਞ੍ਞਾਯ ਹੋਤਿ, ਤਸ੍ਸਾ ਚ ਸੀਲਂ ਸਮਾਧਿ ਚ ਮੂਲਨ੍ਤਿ ਆਹ ‘‘ਸੀਲਸਮਾਧਯੋ ਵਾ ਆਦੀ’’ਤਿ. ਯਸ੍ਮਾ ਪਞ੍ਞਾ ਅਨੁਬੋਧਪਟਿਵੇਧਵਸੇਨ ਦੁਵਿਧਾ, ਤਸ੍ਮਾ ਤਦੁਭਯਂ ਗਣ੍ਹਨ੍ਤੋ ‘‘ਵਿਪਸ੍ਸਨਾਮਗ੍ਗਾ ਮਜ੍ਝ’’ਨ੍ਤਿ ਆਹ. ਪਞ੍ਞਾਨਿਪ੍ਫਤ੍ਤਿ ਫਲਕਿਚ੍ਚਂ, ਨਿਬ੍ਬਾਨਸਚ੍ਛਿਕਿਰਿਯਾ ਪਨ ਸਮ੍ਮਾਪਟਿਪਤ੍ਤਿਯਾ ਪਰਿਯੋਸਾਨਂ ਤਤੋ ਪਰਂ ਕਤ੍ਤਬ੍ਬਾਭਾਵਤੋਤਿ ਆਹ ‘‘ਫਲਨਿਬ੍ਬਾਨਾਨਿ ਪਰਿਯੋਸਾਨ’’ਨ੍ਤਿ. ਫਲਗ੍ਗਹਣੇਨ ਹਿ ਸਉਪਾਦਿਸੇਸਨਿਬ੍ਬਾਨਂ ਗਯ੍ਹਤਿ, ਇਤਰੇਨ ਇਤਰਂ, ਤਦੁਭਯਵਸੇਨ ਪਟਿਪਤ੍ਤਿਯਾ ਓਸਾਨਨ੍ਤਿ ਆਹ ‘‘ਫਲਨਿਬ੍ਬਾਨਾਨਿ ਪਰਿਯੋਸਾਨ’’ਨ੍ਤਿ. ‘‘ਤਸ੍ਮਾਤਿਹ ਤ੍ਵਂ, ਭਿਕ੍ਖੁ, ਆਦਿਮੇਵ ਵਿਸੋਧੇਹਿ ਕੁਸਲੇਸੁ ਧਮ੍ਮੇਸੁ. ਕੋ ਚਾਦਿ ਕੁਸਲਾਨਂ ਧਮ੍ਮਾਨਂ? ਸੀਲਞ੍ਚ ਸੁਵਿਸੁਦ੍ਧਂ, ਦਿਟ੍ਠਿ ਚ ਉਜੁਕਾ’’ਤਿ (ਸਂ. ਨਿ. ੫.੩੬੯) ਵਚਨਤੋ ਸੀਲਦਿਟ੍ਠੁਜੁਕਤਾਯ ਮਤ੍ਥਕਭੂਤਾ ਵਿਪਸ੍ਸਨਾ, ਤਦਧਿਟ੍ਠਾਨਾ ਸੀਲਸਮਾਧੀਤਿ ਇਮੇ ਤਸ੍ਸ ਸਾਸਨਸ੍ਸ ਮੂਲਨ੍ਤਿ ਆਹ ‘‘ਸੀਲਸਮਾਧਿਵਿਪਸ੍ਸਨਾ ਵਾ ਆਦੀ’’ਤਿ. ਸੇਸਂ ਵੁਤ੍ਤਨਯਮੇਵ.

ਕਿਞ੍ਚਾਪਿ ਅਵਯਵਵਿਨਿਮੁਤ੍ਤੋ ਸਮੁਦਾਯੋ ਨਤ੍ਥਿ, ਯੇਸੁ ਪਨ ਅਵਯਵੇਸੁ ਸਮੁਦਾਯਰੂਪੇਨ ਅਪੇਕ੍ਖਿਤੇਸੁ ਗਾਥਾਤਿ ਸਮਞ੍ਞਾ, ਤਂ ਤਤੋ ਭਿਨ੍ਨਂ ਵਿਯ ਕਤ੍ਵਾ ਦਸ੍ਸੇਨ੍ਤੋ ‘‘ਚਤੁਪ੍ਪਦਿਕਗਾਥਾਯ ਤਾਵ ਪਠਮਪਾਦੋ’’ਤਿਆਦਿਮਾਹ. ਪਞ੍ਚਪਦਛਪ੍ਪਦਾਨਂ ਗਾਥਾਨਂ ਆਦਿਪਰਿਯੋਸਾਨਗ੍ਗਹਣੇਨ ਇਤਰੇ ਦੁਤਿਯਾਦਯੋ ਤਯੋ ਚਤ੍ਤਾਰੋ ਵਾ ਮਜ੍ਝਨ੍ਤਿ ਅਵੁਤ੍ਤਸਿਦ੍ਧਮੇਵਾਤਿ ਨ ਵੁਤ੍ਤਂ. ਏਕਾਨੁਸਨ੍ਧਿਕਸੁਤ੍ਤਸ੍ਸਾਤਿ ਇਦਂ ਬਹੁਵਿਭਾਗਂ ਯਥਾਨੁਸਨ੍ਧਿਨਾ ਏਕਾਨੁਸਨ੍ਧਿਕਂ ਸੁਤ੍ਤਂ ਸਨ੍ਧਾਯ ਵੁਤ੍ਤਂ, ਇਤਰਸ੍ਸ ਪਨ ਤੇਯੇਵ ਦੇਸੇਤਬ੍ਬਧਮ੍ਮਵਿਭਾਗੇਨ ਆਦਿਮਜ੍ਝਪਰਿਯੋਸਾਨਭਾਗਾ ਲਬ੍ਭਨ੍ਤਿ. ਨਿਦਾਨਨ੍ਤਿ ਕਾਲਦੇਸਕਪਰਿਸਾਦਿ-ਅਪਦਿਸਨਲਕ੍ਖਣਾਦਿਕੋ ਅਤ੍ਥੋ. ਇਦਮਵੋਚਾਤਿ ਇਤਿ-ਸਦ੍ਦੋ ਆਦਿਅਤ੍ਥੋ. ਤੇਨ ਤਦਵਸੇਸਨਿਗਮਨਪਾਲ਼ਿਂ ਸਙ੍ਗਣ੍ਹਾਤਿ. ਅਨੇਕਾਨੁਸਨ੍ਧੀਕਸ੍ਸ ਸਹ ਨਿਦਾਨੇਨ ਪਠਮੋ ਅਨੁਸਨ੍ਧਿ ਆਦਿ. ਸਹ ਨਿਗਮਨੇਨ ਪਚ੍ਛਿਮੋ ਪਰਿਯੋਸਾਨਂ, ਇਤਰੇਨ ਮਜ੍ਝਿਮਨ੍ਤਿਆਦਿਮਜ੍ਝਪਰਿਯੋਸਾਨਾਨਿ ਵੇਦਿਤਬ੍ਬਾਨਿ.

ਸਾਤ੍ਥਕਨ੍ਤਿ ਅਤ੍ਥਸਮ੍ਪਤ੍ਤਿਯਾ ਸਾਤ੍ਥਕਂ ਕਤ੍ਵਾ. ਸਬ੍ਯਞ੍ਜਨਨ੍ਤਿ ਬ੍ਯਞ੍ਜਨਸਮ੍ਪਤ੍ਤਿਯਾ ਸਬ੍ਯਞ੍ਜਨਂ. ਸਮ੍ਪਤ੍ਤਿ ਚ ਨਾਮ ਪਰਿਪੁਣ੍ਣਬ੍ਯਞ੍ਜਨਤਾਤਿ ਆਹ ‘‘ਬ੍ਯਞ੍ਜਨੇਹਿ…ਪੇ… ਦੇਸੇਤਾ’’ਤਿ. ਸਕਲਪਰਿਪੁਣ੍ਣਨ੍ਤਿ ਸਬ੍ਬਸੋ ਪਰਿਪੁਣ੍ਣਂ ਸੀਲਾਦਿਪਞ੍ਚਧਮ੍ਮਕ੍ਖਨ੍ਧਪਾਰਿਪੂਰਿਯਾ. ਨਿਰੁਪਕ੍ਕਿਲੇਸਂ ਦਿਟ੍ਠਿਮਾਨਾਦਿਉਪਕ੍ਕਿਲੇਸਾਭਾਵਤੋ. ਅਵਿਸੇਸਤੋ ਤਿਸ੍ਸੋ ਸਿਕ੍ਖਾ ਸਕਲੇ ਸਾਸਨੇ ਭਵਨ੍ਤਿ. ਧਮ੍ਮੋਤਿ ਪਨ ਬ੍ਰਹ੍ਮਚਰਿਯਂ ਵਾ ਸਨ੍ਧਾਯ ਵੁਤ੍ਤਂ ‘‘ਕਤਮੇਸਾਨਂ ਖੋ, ਭਨ੍ਤੇ, ਬੁਦ੍ਧਾਨਂ ਭਗਵਨ੍ਤਾਨਂ ਬ੍ਰਹ੍ਮਚਰਿਯਂ ਚਿਰਟ੍ਠਿਤਿਕਂ ਅਹੋਸੀ’’ਤਿਆਦੀਸੁ (ਪਾਰਾ. ੧੮) ਵਿਯ. ਦੁਕੂਲਸਾਣਿਯਾ ਪਟਿਚ੍ਛਨ੍ਨਾ ਵਿਯ, ਨ ਤੁ ਪਾਕਾਰਸੇਲਾਦਿਪਟਿਚ੍ਛਨ੍ਨਾ ਵਿਯ. ਤੇਨ ਧਮ੍ਮਨਿਰੁਤ੍ਤਿਯਾ ਸਕਲਕਿਲੇਸਾਨਂ ਪਹਾਨਾਨੁਭਾਵਂ ਵਦਤਿ. ਅਲਾਭਪਰਿਹਾਨਿਯਾ, ਨ ਲਦ੍ਧਪਰਿਹਾਨਿਯਾ. ਅਡ੍ਢੁਡ੍ਢਾਨੀਤਿ ਪਞ੍ਚਸਤਾਧਿਕਾਨਿ ਤੀਣਿ ਪਾਟਿਹਾਰਿਯਸਹਸ੍ਸਾਨਿ. ਸਾਤਨ੍ਤਿ ਸੁਖਂ.

ਦੁਤਿਯਮਾਰਪਾਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸਪ੍ਪਸੁਤ੍ਤਵਣ੍ਣਨਾ

੧੪੨. ਸੁਰਾਕਾਰਕਾਨਨ੍ਤਿ ਪਿਟ੍ਠਸੁਰਾਯੋਜਨਕਾਨਂ. ਕੋਸਲਾਨਂ ਇਸ੍ਸਰੋਤਿ ਕੋਸਲੋ, ਕੋਸਲਰਾਜਸ੍ਸ ਅਯਨ੍ਤਿ ਕੋਸਲਿਕਾ. ਪਰਿਭੋਗਪਾਤੀਤਿ ਭਤ੍ਤਪਰਿਭੋਜਨਤ੍ਥਾਯ ਪਾਤਿ ਪਰਿਭੋਗਪਾਤਿ. ਕਮ੍ਮਾਰੁਦ੍ਧਨਪਣਾਲ਼ਿਯਾਤਿ ਕਮ੍ਮਾਰੁਦ੍ਧਨਪਣਾਲ਼ਿਮੁਖੇ. ਧਮਮਾਨਾਯਾਤਿ ਧਮਿਯਮਾਨਾਯ. ਤਂ ਪਨ ਯਸ੍ਮਾ ਭਸ੍ਤਵਾਤੇਹਿ ਪੂਰਿਤਂ ਨਾਮ ਹੋਤਿ, ਤਸ੍ਮਾ ‘‘ਭਸ੍ਤਵਾਤੇਨ ਪੂਰਿਯਮਾਨਾਯਾ’’ਤਿ ਵੁਤ੍ਤਂ. ਨਿਯਾਮਭੂਮਿਯਨ੍ਤਿ ਭਗਵਤੋ ਪਟਿਸਲ੍ਲਾਨਟ੍ਠਾਨੇ ਸਞ੍ਚਰਨ੍ਤਂ ਮਾਰਂ ਮਂਸਚਕ੍ਖੁਨਾਵ ਦਿਸ੍ਵਾ. ਤੇਨਾਹ ‘‘ਵਿਜ੍ਜੁਲਤਾਲੋਕੇਨਾ’’ਤਿ.

ਸੇਯ੍ਯਤ੍ਥਾਯਾਤਿ ਸੇਯ੍ਯਾਨਿਸਂਸਾਯ. ਤੇਨਾਹ ‘‘ਠਸ੍ਸਾਮੀ’’ਤਿਆਦਿ. ਅਤ੍ਤਸਞ੍ਞਤੋਤਿ ਅਤ੍ਤਭਾਵੇਨ ਸਂਯਤੋ. ਤੇਨਾਹ ‘‘ਸਂਯਤਤ੍ਤਭਾਵੋ’’ਤਿ. ਤਂਸਣ੍ਠਿਤਸ੍ਸਾਤਿ ਤਸ੍ਮਿਂ ਹਤ੍ਥਪਾਦਕੁਕ੍ਕੁਚ੍ਚਰਹਿਤੇ ਬੁਦ੍ਧਮੁਨਿਸ੍ਮਿਂ ਅਵਟ੍ਠਿਤਸ੍ਸ. ਵੋਸ੍ਸਜ੍ਜ ਚਰੇਯ੍ਯ ਤਤ੍ਥ ਸੋਤਿ ਇਮਿਨਾ ਭਗਵਾ ਤਂ ਬ੍ਯਾਕਰਮਾਨੋ ਵਿਭਿਂਸਿਤਾ ਬੁਦ੍ਧਾਨਂ ਕਿਂ ਕਰਿਸ੍ਸਤਿ ਭਯਾਭਾਵਤੋ? ਕੇਵਲਂ ਪਨ ਅਨਟ੍ਠਵਲਿਕਂ ਉਪ੍ਪੀਲ਼ੇਨ੍ਤੋ ਵਿਯ ਤ੍ਵਮੇਵ ਆਯਾਸਂ ਆਪਜ੍ਜਿਸ੍ਸਸੀਤਿ ਮਾਰਂ ਸਨ੍ਤਜ੍ਜੇਤਿ.

ਭੇਰਵਾਤਿ ਅਵੀਤਰਾਗਾਨਂ ਭਯਜਨਕਾ. ਤਤ੍ਥਾਤਿ ਤਂਨਿਮਿਤ੍ਤਂ. ਫਲੇਯ੍ਯਾਤਿ ਭਿਜ੍ਜੇਯ੍ਯ. ਸਤ੍ਤਿਸਲ੍ਲਨ੍ਤਿ ਸਤ੍ਤਿਸਙ੍ਖਾਤਂ ਪੁਥੁਸਲ੍ਲਂ. ਉਰਸ੍ਮਿਂ ਚਾਰਯੇਯ੍ਯੁਨ੍ਤਿ ਫਾਸੁਂ ਵਿਜ੍ਝਿਤੁਂ ਠਪੇਯ੍ਯੁਂ ਉਗ੍ਗਿਰੇਯ੍ਯੁਂ. ਖਨ੍ਧੁਪਧੀਸੂਤਿ ਖਨ੍ਧਸਙ੍ਖਾਤੇਸੁ ਉਪਧੀਸੁ. ਤਾਣਂ ਕਰੋਨ੍ਤਿ ਨਾਮਾਤਿ ਤਤੋ ਭਯਨਿਮਿਤ੍ਤਤੋ ਅਤ੍ਤਨੋ ਤਾਣਂ ਕਰੋਨ੍ਤਿ ਨਾਮ.

ਸਪ੍ਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸੁਪਤਿਸੁਤ੍ਤਵਣ੍ਣਨਾ

੧੪੩. ਉਤੁਗਾਹਾਪਨਤ੍ਥਂ ਧੋਵਿਤ੍ਵਾ, ਨ ਰਜੋਜਲ੍ਲਵਿਕ੍ਖਾਲਨਤ੍ਥਂ. ਤੇਨਾਹ ‘‘ਬੁਦ੍ਧਾਨਂ ਪਨਾ’’ਤਿਆਦਿ. ਧੋਤਪਾਦਕੇ ਗੇਹੇਤਿ ਧੋਤਪਾਦੇਹਿ ਅਕ੍ਕਮਿਤਬ੍ਬਕੇ. ਵਤ੍ਤਭੇਦੋ ਨਾਮ ਨਤ੍ਥਿ ਧਮ੍ਮਸ੍ਸਾਮਿਭਾਵਤੋ. ਵਤ੍ਤਸੀਸੇ ਠਤ੍ਵਾ ਧੋਵਨ੍ਤਿ ਅਞ੍ਞੇਸਂ ਦਿਟ੍ਠਾਨੁਗਤਿਆਪਜ੍ਜਨਤ੍ਥਂ. ਸੋਪ੍ਪਪਰਿਗ੍ਗਾਹਕੇਨਾਤਿ ਏਤ੍ਥ ਸੋਪ੍ਪਂ ਨਾਮ ਨਿਦ੍ਦਾਯ ਅਨ੍ਤਰਨ੍ਤਰਾ ਪਵਤ੍ਤਕਿਰਿਯਮਯਚਿਤ੍ਤਪ੍ਪਵਤ੍ਤਿਰਹਿਤਾ ਨਿਰਨ੍ਤਰਭਵਙ੍ਗਸਨ੍ਤਤੀਤਿ ਤਂ ਸਭਾਵਤੋ ਪਯੋਜਨਤੋ ਕਾਲਪਰਿਚ੍ਛੇਦਤੋ ਪਰਿਗ੍ਗਾਹਕਂ ਉਪਰਿਨਿਦ੍ਦੇਸਸਤਿਸਮ੍ਪਜਞ੍ਞਂ ਸਨ੍ਧਾਯ ਵੁਤ੍ਤਂ ‘‘ਸੋਪ੍ਪਪਰਿਗ੍ਗਾਹਕੇਨ ਸਤਿਸਮ੍ਪਜਞ੍ਞੇਨਾ’’ਤਿ. ਕੇਚਿ ਪਨ ‘‘ਨਿਦ੍ਦਾਸੋਪ੍ਪਨਾ’’ਤਿ ਵਦਨ੍ਤਿ, ਤਂ ਭਗਵਤੋ ਸੋਪ੍ਪਂ ਹੀਲ਼ੇਨ੍ਤੋ ਵਦਤਿ.

ਕਿਂ ਨੂਤਿ ਏਤ੍ਥਂ ਕਿਨ੍ਤਿ ਹੇਤੁਨਿਸ੍ਸਕ੍ਕੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਕਸ੍ਮਾ ਨੁ ਸੁਪਸੀ’’ਤਿ? ਦੁਬ੍ਭਗੋ ਵੁਚ੍ਚਤਿ ਨਿਸ੍ਸਿਰਿਕੋ ਭਿਨ੍ਨਭਗੋ, ਸੋ ਪਨ ਮਤਸਦਿਸੋ ਵਿਸਞ੍ਞਿਸਦਿਸੋ ਚ ਹੋਤੀਤਿ ਆਹ ‘‘ਮਤੋ ਵਿਯ ਵਿਸਞ੍ਞੀ ਵਿਯ ਚਾ’’ਤਿ.

ਆਦਿਨਾਤਿ ਆਦਿ-ਸਦ੍ਦੇਨ ‘‘ਬਾਹਿਰਸ੍ਸ ਉਪਾਦਾਯ ਅਟ੍ਠਾਰਸਾ’’ਤਿਆਦਿਨਾ (ਵਿਭ. ੮੪੨) ਆਗਤਂ ਤਣ੍ਹਾਕੋਟ੍ਠਾਸਂ ਸਙ੍ਗਣ੍ਹਾਤਿ. ਤਤ੍ਥ ਤਤ੍ਥ ਵਿਸਤ੍ਤਤਾਯਾਤਿ ਤਮ੍ਮਿਂ ਤਸ੍ਮਿਂ ਆਰਮ੍ਮਣੇ ਵਿਸੇਸਤੋ ਆਸਤ੍ਤਭਾਵੇਨ. ਵਿਸਸ੍ਸ ਦੁਕ੍ਖਨਿਬ੍ਬਤ੍ਤਕਕਮ੍ਮਸ੍ਸ ਹੇਤੁਭਾਵਤੋ ਵਿਸਮੂਲਤਾ ਵਿਸਂ ਵਾ ਦੁਕ੍ਖਦੁਕ੍ਖਾਦਿਭੂਤਵੇਦਨਾ ਮੂਲਂ ਏਤਸ੍ਸਾਤਿ ਵਿਸਮੂਲਾ, ਤਣ੍ਹਾ. ਤਸ੍ਸ ਰੂਪਾਦਿਕਸ੍ਸ ਦੁਕ੍ਖਸ੍ਸ ਪਰਿਭੋਗੋ, ਨ ਅਮਤਸ੍ਸਾਤਿ ਵਿਸਪਰਿਭੋਗਤਾ. ਕਤ੍ਥਚਿ ਨੇਤੁਨ੍ਤਿ ਕਤ੍ਥਚਿ ਭਵੇ ਸਬ੍ਬਥਾ ਨੇਤੁਂ? ਪਰਿਕ੍ਖਯਾਤਿ ਸਬ੍ਬਸੋ ਖੀਣਤ੍ਤਾ. ਤੁਯ੍ਹਂ ਕਿਂ ਏਤ੍ਥਾਤਿ ਸਬ੍ਬੁਪਧਿਪਰਿਕ੍ਖਯਾ ਸੁਦ੍ਧਸ੍ਸ ਮਮ ਪਟਿਪਤ੍ਤਿਯਂ ਤੁਯ੍ਹਂ ਕਿਂ ਉਜ੍ਝਾਯਨਂ? ਕੇਵਲਂ ਵਿਘਾਤੋਯੇਵ ਤੇਤਿ ਦਸ੍ਸੇਤਿ.

ਸੁਪਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਨਨ੍ਦਤਿਸੁਤ੍ਤਵਣ੍ਣਨਾ

੧੪੪. ਅਟ੍ਠਮਂ ਉਤ੍ਤਾਨਤ੍ਥਮੇਵ.

ਨਨ੍ਦਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਪਠਮਆਯੁਸੁਤ੍ਤਵਣ੍ਣਨਾ

੧੪੫. ਪਣ੍ਣਾਸਂ ਵਾ ਵਸ੍ਸਾਨਿ ਜੀਵਤਿ ਵਸ੍ਸਸਤਤੋ ਉਪਰਿ ਸੇਯ੍ਯਥਾਪਿ ਥੇਰੋ ਅਨੁਰੁਦ੍ਧੋ. ਸਟ੍ਠਿ ਵਾ ਵਸ੍ਸਾਨਿ ਸੇਯ੍ਯਥਾਪਿ ਥੇਰੋ ਬਾਕੁਲੋ. ਪਟਿਹਰਿਤ੍ਵਾ ਪਚ੍ਚਨੀਕਭਾਵੇ ਸਾਤਂ ਸੁਖਂ ਏਤਸ੍ਸਾਤਿ ਪਚ੍ਚਨੀਕਸਾਤੋ, ਤਬ੍ਭਾਵੋ ਪਚ੍ਚਨੀਕਸਾਤਤਾ, ਤਾਯ. ਅਭਿਭਵਿਤ੍ਵਾ ਅਭਾਸਿ ਪਟਿਵਚਨਂ ਜਾਨਮਾਨੋਵ.

ਨ ਹੀਲ਼ੇਯ੍ਯ ਨ ਜਿਗੁਚ੍ਛੇਯ੍ਯ. ਏਵਨ੍ਤਿ ਸੋ ਦਾਰਕੋ ਵਿਯ ਕਿਞ੍ਚਿ ਅਚਿਨ੍ਤੇਨ੍ਤੋ ਸਪ੍ਪੁਰਿਸੋ ਚਰੇਯ੍ਯ, ਏਵਂ ਹਿਸ੍ਸ ਚਿਤ੍ਤਦੁਕ੍ਖਂ ਨ ਹੋਤੀਤਿ ਅਧਿਪ੍ਪਾਯੋ. ਪਜ੍ਜਲਿਤਸੀਸੋ ਵਿਯ ਚਰੇਯ੍ਯਾਤਿ ਯਥਾ ਪਜ੍ਜਲਿਤਸੀਸੋ ਪੁਰਿਸੋ ਅਞ੍ਞਂ ਕਿਞ੍ਚਿ ਅਕਤ੍ਵਾ ਤਸ੍ਸੇਵ ਵੂਪਸਮਾਯ ਵਾਯਮੇਯ੍ਯ, ਏਵਂ ਸਪ੍ਪੁਰਿਸੋ ਆਯੁਂ ਪਰਿਤ੍ਤਨ੍ਤਿ ਞਤ੍ਵਾ ਤੇਨੇਵ ਨਯੇਨ ਸਬ੍ਬਸਙ੍ਖਾਰਗਤਂ ਅਨਿਚ੍ਚਂ, ਅਨਿਚ੍ਚਤ੍ਤਾ ਏਵ ਦੁਕ੍ਖਂ, ਅਨਤ੍ਤਾਤਿ ਵਿਪਸ੍ਸਨਮ੍ਪਿ ਓਤਰਿਤ੍ਵਾ ਤਂ ਉਸ੍ਸੁਕ੍ਕਾਪੇਨ੍ਤੋਪਿ ਸਙ੍ਖਾਰਵਿਗਮਾਯ ਚਰੇਯ੍ਯ ਪਟਿਪਜ੍ਜੇਯ੍ਯ.

ਪਠਮਆਯੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਦੁਤਿਯਆਯੁਸੁਤ੍ਤਵਣ੍ਣਨਾ

੧੪੬. ਨੇਮੀਵਾਤਿ ਨੇਮਿਸੀਸੇਨ ਚਕ੍ਕਂ ਵਦਤਿ. ਕੁਬ੍ਬਰਂ ਅਨੁਪਰਿਯਾਯਤੀਤਿ ਕੁਬ੍ਬਰਂ ਅਨੁਪਰਿਵਤ੍ਤਤਿ. ਤਥਾਭੂਤੋ ਪਨ ਸੋ ਤਂ ਅਜਹਨ੍ਤੋਵਾਤਿ ਆਹ ‘‘ਨ ਵਿਜਹਤੀ’’ਤਿ. ਆਯੁ ਅਨੁਪਰਿਯਾਯਤੀਤਿ ਮਚ੍ਚਾਨਂ ਆਯੁ ਗਤਮ੍ਪਿ ਪਚ੍ਚਾਗਚ੍ਛਤੀਤਿ ਭਗਵਤੋ ਪਟਾਣਿ ਹੁਤ੍ਵਾ ਵਦਤਿ, ਭਗਵਾ ਪਨ ਤਂ ਅਭਿਭਵਿਤ੍ਵਾ ‘‘ਅਚ੍ਚਯਨ੍ਤਿ ਅਹੋਰਤ੍ਤਾ’’ਤਿਆਦਿਨਾ ਆਯੁਨੋ ਅਚ੍ਚਯਗਮਨਮਰਣਤਂਯੇਵ ਪਵੇਦੇਸਿ.

ਦੁਤਿਯਆਯੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.