੫. ਚਨ੍ਦਨਸੁਤ੍ਤਵਣ੍ਣਨਾ

੯੬. ਹੇਟ੍ਠਾਤਿ ਕਾਮਭਵੇ. ਤਤ੍ਥ ਹਿ ਪਰਿਬ੍ਭਮਨ੍ਤਸ੍ਸ ਪਤਿਟ੍ਠਾ ਦੁਲ੍ਲਭਾ ਯੇਭੁਯ੍ਯੇਨ ਤਤ੍ਥ ਸਤ੍ਤਾ ਨਿਮੁਗ੍ਗਾ ਏਵ ਹੋਨ੍ਤਿ, ਤਸ੍ਮਾ ਹੇਟ੍ਠਾ ਅਪ੍ਪਤਿਟ੍ਠੋ ਸਂਸਾਰੋ. ਉਪਰੀਤਿ ਮਹਗ੍ਗਤਭਵੇ. ਤਤ੍ਥ ਹਿ ਨਿਬ੍ਬਤ੍ਤਸ੍ਸ ਨਿਬ੍ਬਾਨਂ ਆਰੁਹਿਤੁਂ ਆਲਮ੍ਬਨਾ ਦੁਲ੍ਲਭਾ, ਝਾਨਾਭਿਰਤਿਯਾ ਤਤ੍ਥੇਵ ਨਿਕਨ੍ਤਿ ਤੇਸਂ ਬਲਵਤੀ ਹੋਤਿ, ਤਸ੍ਮਾ ਉਪਰਿ ਅਨਾਲਮ੍ਬਨੋ ਸਂਸਾਰੋ. ਪੇਸਿਤਤ੍ਤੋਤਿ ਨਿਬ੍ਬਾਨਂ ਪਤਿ ਪੇਸਿਤਚਿਤ੍ਤੋ. ਤਯੋ ਕਮ੍ਮਾਭਿਸਙ੍ਖਾਰਾਤਿ ਪੁਞ੍ਞਾਭਿਸਙ੍ਖਾਰਾਦਯੋ ਤਯੋ ਅਭਿਸਙ੍ਖਾਰਾ. ਤੇਨ ‘‘ਨਨ੍ਦੀਪੁਬ੍ਬਕੋ ਕਮ੍ਮਭਵੋ’’ਤਿ ਵਤ੍ਵਾ ‘‘ਨਨ੍ਦਿਂ ਜਨੇਤ੍ਵਾ’’ਤਿ ਵੁਤ੍ਤੋ. ਕਾਮਸਞ੍ਞਾਸੀਸੇਨ ਕਾਮਚ੍ਛਨ੍ਦਸ੍ਸ ਗਹਣਂ, ਕਾਮਚ੍ਛਨ੍ਦਪਮੁਖਾਨਿ ਚ ਓਰਮ੍ਭਾਗਿਯਸਂਯੋਜਨਾਨਿ ਗਹਿਤਾਨੀਤਿ ਆਹ ‘‘ਕਾਮਸਞ੍ਞਾਗਹਣੇਨ ਪਞ੍ਚੋਰਮ੍ਭਾਗਿਯਸਂਯੋਜਨਾਨੀ’’ਤਿ. ਰੂਪਭਵੋ ਰੂਪਂ ਭਵਪਦਲੋਪੇਨ. ਰੂਪਭਵਗ੍ਗਹਣੇਨ ਚੇਤ੍ਥ ਸੇਸਭਵਸ੍ਸਪਿ ਗਹਣਂ. ਤਸ੍ਸ ਸਂਯੋਜਨਗ੍ਗਹਣੇਨ ਪਞ੍ਚ ਉਦ੍ਧਮ੍ਭਾਗਿਯਸਂਯੋਜਨਾਨਿ ਗਹਿਤਾਨਿ. ਮਹੋਘੇਤਿ ਸਂਸਾਰਮਹੋਘੇ. ਤੇਸਨ੍ਤਿ ਕਾਮਭਵਾਦੀਨਂ ਗਹਣੇਨ ਭਵਭਾਵੇਨ ਤਦੇਕਲਕ੍ਖਣਤਾਯ. ਅਰੂਪਭਵੋ ਗਹਿਤੋ ਲਕ੍ਖਣਹਾਰਨਯੇਨ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਚਨ੍ਦਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.