੪. ਏਕਮੂਲਸੁਤ੍ਤਵਣ੍ਣਨਾ

੪੪. ਪਤਿਟ੍ਠਟ੍ਠੇਨ ਅਵਿਜ੍ਜਾਸਙ੍ਖਾਤਂ ਏਕਂ ਮੂਲਂ ਏਤਿਸ੍ਸਾਤਿ ਏਕਮੂਲਾ. ਤਂ ਏਕਮੂਲਂ. ਯਥਾ ਸਂਯੋਜਨੀਯੇਸੁ ਅਸ੍ਸਾਦਾਨੁਪਸ੍ਸਨਾਵਸੇਨ ਤਣ੍ਹਾਸਮੁਪ੍ਪਾਦੋ, ਏਵਂ ਤਣ੍ਹਾਭਿਭਵਵਸੇਨ ਅਨਵਬੋਧੋਤਿ ਅਵਿਜ੍ਜਾ ਤਣ੍ਹਾਯ ਮੂਲਂ, ਤਣ੍ਹਾ ਚ ਅਵਿਜ੍ਜਾਯ ਮੂਲਂ. ਅਯਞ੍ਹਿ ਨਯੋ ਉਪਨਿਸ੍ਸਯਤਾਵਸੇਨ ਵੁਤ੍ਤੋ, ਸਹਜਾਤਵਸੇਨ ਚਾਯਂ ਅਞ੍ਞਮਞ੍ਞਂ ਮੂਲਭਾਵੋ ਪਾਕਟੋਯੇਵ. ਇਧ ਪਨ ਇਮਿਸ੍ਸਂ ਗਾਥਾਯਂ ਅਧਿਪ੍ਪੇਤਾ ‘‘ਏਕਮੂਲ’’ਨ੍ਤਿ ਸਾ ਤਣ੍ਹਾ. ਤਤ੍ਥ ਯਾ ਭਵਤਣ੍ਹਾ, ਸਾ ਸਸ੍ਸਤਦਿਟ੍ਠਿਵਸੇਨ ਆਵਟ੍ਟਤਿ ਪਰਿਵਤ੍ਤਤਿ, ਵਿਭਵਤਣ੍ਹਾ ਉਚ੍ਛੇਦਦਿਟ੍ਠਿਵਸੇਨ, ਏਵਂ ਦ੍ਵਿਰਾਵਟ੍ਟਂ. ਸਹਜਾਤਕੋਟਿਯਾਤਿ ਸਹਜਾਤਕੋਟਿਯਾਪਿ, ਪਗੇਵ ਸਮ੍ਮੁਯ੍ਹਂ ਆਪਨ੍ਨਸ੍ਸ ਪਨ ਵਤ੍ਤਮਾਨਾਯ ਤਣ੍ਹਾਯ ਬਲਵਭਾਵੇਨ ਮਲੀਨਤਾ ਸਿਯਾ. ਉਪਨਿਸ੍ਸਯਕੋਟਿਯਾਤਿ ਉਪਨਿਸ੍ਸਯਕੋਟਿਯਾਵ ਸਹਜਾਤਕੋਟਿਯਾ ਅਸਮ੍ਭਵਤੋ. ਪਤ੍ਥਰਣਟ੍ਠਾਨਾਤਿ ਵਿਤ੍ਥਤਾ ਹੁਤ੍ਵਾ ਪਵਤ੍ਤਿਟ੍ਠਾਨਭੂਮਿ. ਤੇਨਾਹ ‘‘ਤੇਸੁ ਸਾ ਪਤ੍ਥਰਤੀ’’ਤਿ. ਸਮੁਦ੍ਦਨਟ੍ਠੇਨ ਸਮੁਦ੍ਦੋ. ਉਤ੍ਤਰਿਤੁਂ ਅਸਕ੍ਕੁਣੇਯ੍ਯਤਾਯ ਪਤਾਯ ਅਲਂ ਪਰਿਯਤ੍ਤੋਤਿ ਪਾਤਾਲੋ, ਅਯਂ ਪਨ ਪਾਤਾਲੋ ਵਿਯਾਤਿ ਪਾਤਾਲੋ. ਤੇਨਾਹ ‘‘ਅਪ੍ਪਤਿਟ੍ਠਟ੍ਠੇਨਾ’’ਤਿ. ਅਗਾਧਗਮ੍ਭੀਰਤਾਯਾਤਿ ਅਤ੍ਥੋ.

ਏਕਮੂਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.