੫. ਅਨੋਮਸੁਤ੍ਤਵਣ੍ਣਨਾ

੪੫. ਅਨੋਮਨਾਮਨ੍ਤਿ ਅਨੂਨਨਾਮਂ. ਗੁਣਨੇਮਿਤ੍ਤਿਕਾਨਿ ਏਵ ਹਿ ਭਗਵਤੋ ਨਾਮਾਨਿ. ਗੁਣਾਨਞ੍ਚਸ੍ਸ ਪਰਿਪੁਣ੍ਣਤਾਯ ਅਨੂਨਨਾਮਨ੍ਤਿ ਆਹ ‘‘ਸਬ੍ਬਗੁਣਸਮਨ੍ਨਾਗਤਤ੍ਤਾ’’ਤਿਆਦਿ. ਅਪਿਚ ਤਥਾ ਤੇਵਿਜ੍ਜੋ, ਛਲ਼ਭਿਞ੍ਞੋਤਿਆਦੀਨਿ ਨਾਮਾਨਿ ਅਨੋਮਨਾਮਾਨਿ ਨ ਹੋਨ੍ਤਿ ਪਰਿਚ੍ਛਿਨ੍ਨਵਿਸਯਤ੍ਤਾ, ਭਗਵਤੋ ਪਨ ਸਤ੍ਥਾ, ਸਬ੍ਬਞ੍ਞੂ, ਸਮ੍ਮਾਸਮ੍ਬੁਦ੍ਧੋਤਿਆਦੀਨਿ ਨਾਮਾਨਿ ਅਨੋਮਨਾਮਾਨਿ ਨਾਮ ਮਹਾਵਿਸਯਤ੍ਤਾ ਅਨੂਨਭਾਵਤੋ. ਤੇਨਾਹ ‘‘ਅਵੇਕਲ੍ਲਨਾਮ’’ਨ੍ਤਿ. ਖਨ੍ਧਨ੍ਤਰਾਦਯੋਤਿ ਖਨ੍ਧਵਿਸੇਸਾਦਿਕੇ. ਞਾਣੇਨ ਯਾਥਾਵਤੋ ਅਰਣੀਯਟ੍ਠੇਨ ਅਤ੍ਥੇ. ਅਨ੍ਵਯਪਞ੍ਞਾਧਿਗਮਾਯਾਤਿ ਲੋਕੁਤ੍ਤਰਪਞ੍ਞਾਪਟਿਲਾਭਾਯ. ਪਟਿਪਦਨ੍ਤਿ ਸਮਥਵਿਪਸ੍ਸਨਾਪਟਿਪਦਂ. ਕਿਲੇਸਕਾਮਾਨਂ ਵਸੇਨ ਅਲ੍ਲੀਯਿਤਬ੍ਬਟ੍ਠੇਨ ਕਾਮਾ ਏਵ ਆਲਯੋ. ਅਤੀਤਕਾਲੇਯੇਵ ਕਮਨਤਂ ਗਹੇਤ੍ਵਾ ਵੁਤ੍ਤਂ ‘‘ਕਮਮਾਨ’’ਨ੍ਤਿ. ਨ ਏਤਰਹਿ ਤਦਭਾਵਤੋਤਿ ਆਹ ‘‘ਅਤੀਤਂ ਪਨ ਉਪਾਦਾਯ ਇਦਂ ਵੁਤ੍ਤ’’ਨ੍ਤਿ. ਮਹਾਨੁਭਾਵਤਾਦਿਨਾ ਮਹਨ੍ਤਾਨਂ.

ਅਨੋਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.