੩. ਅਨ੍ਨਸੁਤ੍ਤਵਣ੍ਣਨਾ

੪੩. ਪਤ੍ਥੇਨ੍ਤੀਤਿ ਪਿਹੇਨ੍ਤਿ. ਯਤ੍ਥਸ੍ਸ ਉਪਗਮਨਂ ਲੋਕੇ ਪਾਕਟਤਰਂ ਅਹੋਸਿ, ਤੇ ਉਦਾਹਰਣਵਸੇਨ ਦਸ੍ਸੇਨ੍ਤੋ ‘‘ਚਿਤ੍ਤਗਹਪਤਿਸੀਵਲਿਤ੍ਥੇਰਾਦਿਕੇ ਵਿਯਾ’’ਤਿ ਆਹ. ਅਨ੍ਨਨ੍ਤਿ ਅਨ੍ਨਸਞ੍ਞਿਤੋ ਚਤੁਬ੍ਬਿਧੋਪਿ ਪਚ੍ਚਯੋ. ਸਬ੍ਬੇਪਿ ਦਾਯਕੇ ਏਕਜ੍ਝਂ ਗਹੇਤ੍ਵਾ ਸਾਮਞ੍ਞਤੋ ਏਕਵਸੇਨ ‘‘ਦਾਯਕਮੇਵਾ’’ਤਿ ਵੁਤ੍ਤਂ, ਯਥਾ ਚਾਹ ‘‘ਕੋ ਨਾਮ ਸੋ ਯਕ੍ਖੋ, ਯਂ ਅਨ੍ਨਂ ਨਾਭਿਨਨ੍ਦਤੀ’’ਤਿ? ਤਤ੍ਥ ਯਕ੍ਖੋਤਿ ਸਤ੍ਤੋ. ਸਾਮਞ੍ਞਜੋਤਨਾ ਚ ਨਾਮ ਯਸ੍ਮਾ ਪੁਥੁਅਤ੍ਥਵਿਸਯਾ, ਤਸ੍ਮਾ ‘‘ਯੇ ਨਂ ਦਦਨ੍ਤਿ ਸਦ੍ਧਾਯ, ਵਿਪ੍ਪਸਨ੍ਨੇਨ ਚੇਤਸਾ. ਤਮੇਵ ਅਨ੍ਨਂ ਭਜਤੀ’’ਤਿ ਵੁਤ੍ਤਂ. ਤਤ੍ਥ ਮ-ਕਾਰੋ ਪਦਸਨ੍ਧਿਕਰੋ, ਤੇ ਏਵਾਤਿ ਅਤ੍ਥੋ. ਦਾਯਕਂ ਅਪਰਿਚ੍ਚਜਨਮੇਵ ਅਨੁਗਚ੍ਛਤਿ ਚਕ੍ਕਂ ਵਿਯ ਕੁਬ੍ਬਰਂ.

ਅਨ੍ਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.