੧੦. ਦੁਤਿਯਪਜ੍ਜੁਨ੍ਨਧੀਤੁਸੁਤ੍ਤਵਣ੍ਣਨਾ

੪੦. ਬੁਦ੍ਧਞ੍ਚ ਧਮ੍ਮਞ੍ਚ ਨਮਸ੍ਸਮਾਨਾਤਿ ਬੁਦ੍ਧਸੁਬੁਦ੍ਧਤਂ ਧਮ੍ਮਸੁਧਮ੍ਮਤਞ੍ਚ ਞਤ੍ਵਾ ਤਦੁਭਯਂ ਨਮਸ੍ਸਮਾਨਾ. ਯਸ੍ਮਾ ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨੋ ਸਙ੍ਘੇ ਚ ਪਸਨ੍ਨੋ ਏਵ ਹੋਤਿ ਤਸ੍ਸ ਸੁਪ੍ਪਟਿਪਤ੍ਤਿਯਾ ਵਿਜਾਨਨਤੋ, ਤਸ੍ਮਾ ਸੋ ਅਤ੍ਥੋ ਗਾਥਾਯ ਚ-ਸਦ੍ਦਸਙ੍ਗਹਿਤੋਤਿ ਦਸ੍ਸੇਨ੍ਤੋ ‘‘ਚ-ਸਦ੍ਦੇਨ ਸਙ੍ਘਞ੍ਚਾ’’ਤਿ ਆਹ ਅਤ੍ਥਵਤਿਯੋਤਿ ਲੋਕਿਯਲੋਕੁਤ੍ਤਰਅਤ੍ਥਸਙ੍ਗਹਿਤਾ ਲੋਕਿਯਕੁਸਲਲੋਕੁਤ੍ਤਰਮਗ੍ਗਸਙ੍ਗਣ੍ਹਨਤੋ. ਯਂ ਧਮ੍ਮਂ ਸਾ ਅਭਾਸੀਤਿ ਯਂ ਤੁਮ੍ਹਾਕਂ ਧਮ੍ਮਂ ਪਟਿਵਿਜ੍ਝਿਤ੍ਵਾ ਠਿਤਾ, ਸਾ ਮਹਾਕੋਕਨਦਾ ਅਤ੍ਤਨੋ ਬਲਾਨੁਰੂਪਂ ਅਭਾਸਿ. ਬਹੁਨਾਤਿ ਨਾਨਪ੍ਪਕਾਰੇਨ. ਪਰਿਯਾਯੇਨਾਤਿ ਕਾਰਣੇਨ. ਤਾਦਿਸੋਤਿ ਤਥਾਰੂਪੋ ਤਥਾਪਟਿਵਿਦ੍ਧਸਚ੍ਚੋ ਅਤ੍ਥਧਮ੍ਮਾਦੀਸੁ ਕੁਸਲੋ ਏਕੇਕਂ ਪਦਮ੍ਪਿ ਉਦਾਹਰਣਹੇਤੁਨਿਗਮਨਾਨਿ ਨੀਹਰਨ੍ਤੋ ਆਚਿਕ੍ਖਤਿ ਦੇਸੇਤਿ ਪਞ੍ਞਪੇਤਿ ਪਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨੀਕਰੋਤਿ. ਤੇਨਾਹ ‘‘ਅਯਂ ਭਗਵਾ’’ਤਿਆਦਿ. ਏਤੇਨ ਅਤਿਵਿਯ ਵਿਤ੍ਥਾਰਕ੍ਖਮੋ ਸੁਗਤਧਮ੍ਮੋਤਿ ਦਸ੍ਸੇਤਿ. ਪਰਿਯਾਪੁਟਨ੍ਤਿ ਪਰਿਵਤ੍ਤਿਤਂ. ਏਵਂ ਵਿਤ੍ਥਾਰਕ੍ਖਮਂ ਧਮ੍ਮਂ ਯਸ੍ਮਾ ਦੇਵਧੀਤਾ ‘‘ਸਂਖਿਤ੍ਤਮਤ੍ਥਂ ਲਪਯਿਸ੍ਸਾਮੀ’’ਤਿ ਅਵੋਚ, ਤਸ੍ਮਾ ਵੁਤ੍ਤਂ ‘‘ਤਸ੍ਸਤ੍ਥ’’ਨ੍ਤਿਆਦਿ.

ਦੁਤਿਯਪਜ੍ਜੁਨ੍ਨਧੀਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਤੁਲ੍ਲਪਕਾਯਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.