੪. ਸਤੁਲ੍ਲਪਕਾਯਿਕਵਗ੍ਗੋ

੧. ਸਬ੍ਭਿਸੁਤ੍ਤਵਣ੍ਣਨਾ

੩੧. ਸਤਂ ਸਾਧੂਨਂ ਸਰਣਗਮਨਸੀਲਾਦਿਭੇਦਸ੍ਸ ਧਮ੍ਮਸ੍ਸ ਉਲ੍ਲਪਨਤੋ, ਅਤ੍ਤਨੋ ਵਾ ਪੁਬ੍ਬੇਨਿਵਾਸਾਨੁਸ੍ਸਤਿਯਾ ਤਸ੍ਸ ਧਮ੍ਮਸ੍ਸ ਉਲ੍ਲਪਨਤੋ ਕਥਨਤੋ ਸਤੁਲ੍ਲਪਾ, ਦੇਵਤਾ, ਤਾਸਂ ਕਾਯੋ ਸਮੂਹੋ, ਤਤ੍ਥ ਭਵਾਤਿ ਸਤੁਲ੍ਲਪਕਾਯਿਕਾ. ਤੇਨਾਹ ‘‘ਸਤਂ ਧਮ੍ਮ’’ਨ੍ਤਿਆਦਿ. ਸਮਾਦਾਨਵਸੇਨ ਉਲ੍ਲਪੇਤ੍ਵਾ, ਨ ਵਣ੍ਣਨਾਕਥਨਮਤ੍ਤੇਨ ਤਤ੍ਰਾਤਿ ਤਸ੍ਮਿਂ ਤਾਸਂ ਦੇਵਤਾਨਂ ਸਤੁਲ੍ਲਪਕਾਯਿਕਭਾਵੇ. ਇਦਂ ਵਤ੍ਥੂਤਿ ਇਦਂ ਕਾਰਣਂ. ਸਮੁਦ੍ਦਵਾਣਿਜਾਤਿ ਸਂਯਤ੍ਤਿਕਾ. ਖਿਤ੍ਤਸਰਵੇਗੇਨਾਤਿ ਜਿਯਾਮੁਤ੍ਤਸਰਸਦਿਸਵੇਗੇਨ, ਸੀਘਓਘੇਨਾਤਿ ਅਤ੍ਥੋ. ਉਪ੍ਪਤਤੀਤਿ ਉਪ੍ਪਾਤੋ. ਉਪ੍ਪਾਤੇ ਭਵਂ ਬ੍ਯਸਨਂ ਉਪ੍ਪਾਤਿਕਂ. ਪਤਿਟ੍ਠਾਤਿ ਹਿਤਪਤਿਟ੍ਠਾ. ਪਰਲੋਕੇ ਹਿਤਸੁਖਾਵਹਂ ਅਭਯਕਾਰਣਂ. ਜਙ੍ਘਸਤਨ੍ਤਿ ਮਨੁਸ੍ਸਸਤਂ. ਜਙ੍ਘਾਸੀਸੇਨ ਹਿ ਮਨੁਸ੍ਸੇ ਵਦਤਿ ਸਹਚਾਰਿਭਾਵਤੋ. ਅਗ੍ਗਹੇਸਿ ਪਞ੍ਚਸੀਲਾਨਿ. ਆਸਨ੍ਨਾਨਾਸਨ੍ਨੇਸੁ ਆਸਨ੍ਨਸ੍ਸੇਵ ਪਠਮਂ ਵਿਪਚ੍ਚਨਤੋ ‘‘ਆਸਨ੍ਨਕਾਲੇ ਗਹਿਤਸੀਲਂ ਨਿਸ੍ਸਾਯਾ’’ਤਿ ਵੁਤ੍ਤਂ. ਘਟਾਵਸੇਨਾਤਿ ਸਮੂਹਵਸੇਨ.

ਸਬ੍ਭੀਤਿ ਸਾਧੂਹਿ. ਤੇ ਹਿ ਸਪਰਹਿਤਸਾਧਨਤੋ ਪਾਸਂਸਤਾਯ ਸਨ੍ਤਗੁਣਤਾਯ ਚ ਸਨ੍ਤੋਤਿ ਵੁਚ੍ਚਤਿ. ਤੇ ਪਨ ਯਸ੍ਮਾ ਪਣ੍ਡਿਤਲਕ੍ਖਣੇਹਿ ਸਮਨ੍ਨਾਗਤਾ ਹੋਨ੍ਤਿ, ਤਸ੍ਮਾ ‘‘ਪਣ੍ਡਿਤੇਹੀ’’ਤਿ ਆਹ. ਸਮਾਸੇਥਾਤਿ ਸਂਵਸੇਥਾਤਿ ਅਯਮੇਤ੍ਥ ਅਧਿਪ੍ਪਾਯੋਤਿ ਆਹ ‘‘ਸਬ੍ਬਇਰਿਯਾਪਥੇ’’ਤਿਆਦਿ. ਮਿਤ੍ਤਸਨ੍ਥਵਨ੍ਤਿ ਮੇਤ੍ਤਿਸਨ੍ਧਾਨਂ. ਸਤ੍ਤਾਨਂ ਹਿਤੇਸਿਤਾਲਕ੍ਖਣਾ ਹਿ ਮੇਤ੍ਤਿ, ਸਾ ਚ ਞਾਣਸਹਿਤਾ ਞਾਣਪੁਬ੍ਬਙ੍ਗਮਾਵਾਤਿ ਮਿਤ੍ਤਸਨ੍ਥਵੋ ਅਸਂਕਿਲਿਟ੍ਠੋ, ਇਤਰੋ ਸਂਕਿਲਿਟ੍ਠੋਤਿ ਆਹ ‘‘ਨ ਕੇਨਚਿ ਸਦ੍ਧਿਂ ਕਾਤਬ੍ਬੋ’’ਤਿ. ਸਦ੍ਧਮ੍ਮਨ੍ਤਿ ਦਿਟ੍ਠਧਮ੍ਮਿਕਾਦਿਹਿਤਾਵਹਂ ਸੁਨ੍ਦਰਧਮ੍ਮਂ. ਸੇਯ੍ਯੋਤਿ ਹਿਤਵਡ੍ਢਨਤਾਦਿ ਵੁਤ੍ਤਨ੍ਤਿ ਆਹ ‘‘ਵਡ੍ਢੀ’’ਤਿ.

ਸਤਂ ਸਾਧੂਨਂ, ਪਣ੍ਡਿਤਾਨਨ੍ਤਿ ਅਯਮੇਤ੍ਥ ਅਤ੍ਥੋ. ਤਪ੍ਪਟਿਯੋਗਵਿਸਯਤ੍ਤਾ ਅਞ੍ਞ-ਸਦ੍ਦਸ੍ਸ ਵੁਤ੍ਤਂ ‘‘ਅਞ੍ਞਤੋ ਅਨ੍ਧਬਾਲਤੋ’’ਤਿ. ਸੋਕਨਿਮਿਤ੍ਤਂ ਸੋਕਕਾਰਣਂ ਉਤ੍ਤਰਪਦਲੋਪੇਨ ਇਧ ਸੋਕਸਦ੍ਦੇਨ ਗਹਿਤਨ੍ਤਿ ਆਹ ‘‘ਸੋਕਵਤ੍ਥੂਨ’’ਨ੍ਤਿਆਦਿ. ਸੋਕਵਤ੍ਥੂਨਿ ਨਾਮ ਚੋਰਾਦਯੋ ਅਚ੍ਛਿਨ੍ਦਨਾਦਿਵਸੇਨ ਪਰੇਸਂ ਸੋਕਕਰਣਤੋ. ਸੋਕਾਨੁਗਤਾ ਸੋਕਪ੍ਪਤ੍ਤਾ.

ਥੇਰਸ੍ਸਾਤਿ ਸਂਕਿਚ੍ਚਤ੍ਥੇਰਸ੍ਸ. ਅਤ੍ਤਨੋ ਭਗਿਨਿਯਾ ਜੇਟ੍ਠਤ੍ਤਾ ‘‘ਤੁਮ੍ਹੇ’’ਤਿ ਆਹ. ਅਯਂ ‘‘ਇਧ ਚੋਰਾ ਪਟਿਪਜ੍ਜਿਂਸੂ’’ਤਿ ਅਮ੍ਹੇ ਤਿਣਾਯਪਿ ਨ ਮਞ੍ਞਤੀਤਿ ਚਿਨ੍ਤੇਤ੍ਵਾ ਏਕਚ੍ਚੇ ‘‘ਮਾਰੇਮ ਨ’’ਨ੍ਤਿ ਆਹਂਸੁ. ਕਰੁਣਾਯ ਏਕਚ੍ਚੇ ‘‘ਵਿਸ੍ਸਜ੍ਜੇਮਾ’’ਤਿ ਆਹਂਸੁ. ਮਨ੍ਤੇਤ੍ਵਾਤਿ ਭਾਸੇਤ੍ਵਾ.

ਅਹੁ ਅਹੋਸਿ, ਭੂਤਪੁਬ੍ਬਨ੍ਤਿ ਅਤ੍ਥੋ. ਅਰਞ੍ਞਸ੍ਮਿਂ ਬ੍ਰਹਾਵਨੇਤਿ ਤਾਦਿਸੇ ਬ੍ਰਹਾਵਨੇ, ਮਹਾਰਞ੍ਞੇ ਨਿਵਾਸੀਤਿ ਅਤ੍ਥੋ ਚੇਤੋਤਿ ਬ੍ਯਾਧੋ. ਕੂਟਾਨੀਤਿ ਵਾਕੁਰਾਦਯੋ. ਓਡ੍ਡੇਤ੍ਵਾਤਿ ਸਜ੍ਜੇਤ੍ਵਾ. ਸਸਕਨ੍ਤਿ ਪੇਲਕਂ ਉਬ੍ਬਿਗ੍ਗਾਤਿ ਭੀਤਤਸਿਤਾ. ਏਕਰਤ੍ਤਿਨ੍ਤਿ ਏਕਰਤ੍ਤੇਨੇਵ. ਧਨਜਾਨੀਤਿ ਪਰਿਬ੍ਬਯਵਸੇਨ ਅਦ੍ਧਿਕੇਹਿ ਲਦ੍ਧਬ੍ਬਧਨਤੋ ਹਾਨਿ, ‘‘ਸਮਣਮ੍ਪਿ ਨਾਮ ਹਨ੍ਤਿ, ਕਿਂ ਅਮ੍ਹੇਸੁ ਲਜ੍ਜਿਸ੍ਸਤੀ’’ਤਿ ਅਦ੍ਧਿਕਾਨਂ ਅਨਾਗਮਨਤੋ ਏਕਦਿਵਸਂ ਲਦ੍ਧਬ੍ਬਪਰਿਬ੍ਬਯਮ੍ਪਿ ਨ ਲਭਿਸ੍ਸਨ੍ਤੀਤਿ ਅਧਿਪ੍ਪਾਯੋ.

ਞਾਤਯੋਪਿ ਮਾਤਾਪਿਤੁਭਾਤੁਭਗਿਨਿਆਦਿਕੇ ਞਾਤਕੇ. ਤੇ ਕਿਰ ਅਧਿਮੁਤ੍ਤਸ੍ਸ ਭਗਿਨਿਯਾ ਸਨ੍ਤਿਕਂ ਉਪਗਚ੍ਛਨ੍ਤਾ ਅਨ੍ਤਰਾਮਗ੍ਗੇ ਤੇਨ ਸਮਾਗਤਾ, ਅਧਿਮੁਤ੍ਤੋ ਸਚ੍ਚਵਾਚਂ ਅਨੁਰਕ੍ਖਨ੍ਤੋ ਚੋਰਭਯਂ ਤੇਸਂ ਨਾਰੋਚੇਸਿ. ਤੇਨ ਵੁਤ੍ਤਂ ‘‘ਤੇਸਮ੍ਪੀ’’ਤਿਆਦਿ. ਤਂ ਨਿਸ੍ਸਾਯ ਪਬ੍ਬਜਿਤਤ੍ਤਾ ‘‘ਅਧਿਮੁਤ੍ਤਸਾਮਣੇਰਸ੍ਸ ਸਨ੍ਤਿਕੇ’’ਤਿ ਵੁਤ੍ਤਂ, ਨ ਉਪਸਮ੍ਪਦਾਚਰਿਯੋ ਹੁਤ੍ਵਾ. ਤੇਨਾਹ ‘‘ਅਤ੍ਤਨੋ ਅਨ੍ਤੇਵਾਸਿਕੇ ਕਤ੍ਵਾ’’ਤਿ. ਸਚ੍ਚਾਨੁਰਕ੍ਖਣੇਨ ਅਨੁਤ੍ਤਰਗੁਣਾਧਿਗਮੇਨ ਚ ਞਾਤਿਮਜ੍ਝੇ ਵਿਰੋਚਤਿ.

ਸਾਤਤਨ੍ਤਿ ਸਤਤਂ. ਸ-ਸਦ੍ਦਸ੍ਸ ਹਿ ਇਧ ਸਾਭਾਵੋ ਯਥਾ ‘‘ਸਾਰਾਗੋ’’ਤਿਆਦੀਸੁ. ਸਾਤਭਾਵੋ ਵਾ ਸਾਤਤਨ੍ਤਿ ਆਹ ‘‘ਸੁਖਂ ਵਾ’’ਤਿ. ਕਾਰਣੇਨਾਤਿ ਤੇਨ ਤੇਨ ਕਾਰਣੇਨ. ਸਬ੍ਬਾਸਂ ਤਾਸਂ ਵਚਨਂ ਸੁਭਾਸਿਤਂ, ਭਗਵਤੋ ਪਨ ਉਕ੍ਕਂਸਗਤਂ ਸੁਭਾਸਿਤਮੇਵ. ਸ੍ਵਾਯਮਤ੍ਥੋ ਤਂਤਂਗਾਥਾਪਦੇਨੇਵ ਵਿਞ੍ਞਾਯਤੀਤਿ ਤਂ ਨੀਹਰਿਤ੍ਵਾ ਦਸ੍ਸੇਤੁਂ ‘‘ਨ ਕੇਵਲ’’ਨ੍ਤਿਆਦਿ ਵੁਤ੍ਤਂ. ਤੇਨ ਸਪ੍ਪੁਰਿਸੂਪਸਂਸੇਵਸਦ੍ਧਮ੍ਮਾਭਿਯੋਗੋ ਯਥਾ ਸਤ੍ਤਾਨਂ ਵਡ੍ਢਿਯਾ ਪਞ੍ਞਾਪਟਿਲਾਭਸ੍ਸ ਏਕਨ੍ਤਿਕਂ ਕਾਰਣਂ, ਏਵਂ ਸੋਕਪਚ੍ਚਯੇ ਸਤਿ ਵਿਸੋਕਭਾਵਸ੍ਸ, ਞਾਤਿਮਜ੍ਝੇ ਸੋਭਾਯ, ਸੁਗਤਿਗਮਨਸ੍ਸ, ਚਿਰਂ ਸੁਖਟ੍ਠਾਨਸ੍ਸ, ਵਟ੍ਟਦੁਕ੍ਖਮੋਚਨਸ੍ਸਪਿ ਅਞ੍ਞਾਸਾਧਾਰਣਂ ਹੋਤੀਤਿ ਵੁਤ੍ਤਮੇਵਾਤਿ ਦਟ੍ਠਬ੍ਬਂ.

ਸਬ੍ਭਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਮਚ੍ਛਰਿਸੁਤ੍ਤਵਣ੍ਣਨਾ

੩੨. ਪਮਜ੍ਜਨਾਕਾਰੇਨ ਪਵਤ੍ਤਾ ਅਨੁਪਲਦ੍ਧਿ ਪਮਾਦੋ. ਤੇਨ ਏਕਨ੍ਤਤੋ ਸਤਿਰਹਿਤਾ ਹੋਨ੍ਤੀਤਿ ਵੁਤ੍ਤਂ ‘‘ਸਤਿਵਿਪ੍ਪਵਾਸਲਕ੍ਖਣੇਨਾ’’ਤਿ. ਦਿਟ੍ਠਿਵਿਚਿਕਿਚ੍ਛਾਦਯੋ ਚੇਤ੍ਥ ਪਮਾਦੇਨੇਵ ਸਙ੍ਗਹਿਤਾ. ਇਦਾਨਿ ਯਥਾ ਮਚ੍ਛਰਿਯਨਿਮਿਤ੍ਤਞ੍ਚ ਪਮਾਦਨਿਮਿਤ੍ਤਞ੍ਚ ਦਾਨਂ ਨ ਦੀਯਤਿ, ਤਂ ਦਸ੍ਸੇਤੁਂ ‘‘ਏਕਚ੍ਚੋ ਹੀ’’ਤਿਆਦਿ ਵੁਤ੍ਤਂ. ਪਰਿਕ੍ਖਯਂ ਗਮਿਸ੍ਸਤੀਤਿ ਭੋਗਪਰਿਹਾਨਿਂ ਗਮਿਸ੍ਸਤਿ. ਖਿਡ੍ਡਾਦੀਤਿ ਆਦਿ-ਸਦ੍ਦੇਨ ਮਣ੍ਡਨਵਿਭੂਸਨਛਣਨਕ੍ਖਤ੍ਤਕਿਚ੍ਚਬ੍ਯਸਨਾਦਿਂ ਸਙ੍ਗਣ੍ਹਾਤਿ. ਯਸਦਾਯਕਨ੍ਤਿ ਕਿਤ੍ਤਿਯਸਸ੍ਸ ਪਰਿਵਾਰਯਸਸ੍ਸ ਚ ਦਾਯਕਂ. ਸਿਰੀਦਾਯਕਨ੍ਤਿ ਸੋਭਗ੍ਗਦਾਯਕਂ. ਸਮ੍ਪਤ੍ਤਿਦਾਯਕਨ੍ਤਿ ਕੁਲਭੋਗਰੂਪਭੋਗਸਮ੍ਪਦਾਹਿ ਸਮ੍ਪਤ੍ਤਿਦਾਯਕਂ. ਪੁਞ੍ਞਨ੍ਤਿ ਵਾ ਇਧ ਪੁਞ੍ਞਫਲਂ ਦਟ੍ਠਬ੍ਬਂ ‘‘ਏਵਮਿਦਂ ਪੁਞ੍ਞਂ ਪਵਡ੍ਢਤੀ’’ਤਿਆਦੀਸੁ (ਦੀ. ਨਿ. ੩.੮੦) ਵਿਯ. ਅਤ੍ਥਿ ਦਾਨਸ੍ਸ ਫਲਨ੍ਤਿ ਏਤ੍ਥ ਦੇਯ੍ਯਧਮ੍ਮਸ੍ਸ ਅਨਵਟ੍ਠਿਤਤਂ ਬਹੁਲਸਾਧਾਰਣਤਂ, ਤਂ ਪਹਾਯ ਗਮਨੀਯਤਂ, ਤਬ੍ਬਿਸਯਾਯ ਪੀਤਿਯਾ ਸਾਵਜ੍ਜਤਂ, ਦਾਨਧਮ੍ਮਸ੍ਸ ਅਨਞ੍ਞਸਾਧਾਰਣਤਂ ਅਨੁਗਾਮਿਕਤਂ, ਤਬ੍ਬਿਸਯਾਯ ਪੀਤਿਯਾ ਅਨਵਜ੍ਜਤਂ, ਲੋਭਾਦਿਪਾਪਧਮ੍ਮਾਨਂ ਵਿਨੋਦਨਂ, ਸੇਸਪੁਞ੍ਞਾਨਂ ਉਪਨਿਸ੍ਸਯਞ੍ਚ ਜਾਨਨ੍ਤੇਨਾਤਿ ਵਤ੍ਤਬ੍ਬਂ.

ਤਂਯੇਵ ਬਾਲਨ੍ਤਿ ਯੋ ਮਚ੍ਛਰੀ, ਤਮੇਵ. ਅਦਾਨਸੀਲਾ ਬਾਲਾ. ਏਕਚ੍ਚੋ ਧਨਸ੍ਸ ਪਰਿਭੋਗਪਰਿਕ੍ਖਯਭਯੇਨ ਅਤ੍ਤਨਾਪਿ ਨ ਪਰਿਭੁਞ੍ਜਤਿ ਅਤਿਲੋਭਸੇਟ੍ਠਿ ਵਿਯਾਤਿ ਆਹ ‘‘ਇਧਲੋਕਪਰਲੋਕੇਸੂ’’ਤਿ.

ਯਸ੍ਮਾ ਏਕਚ੍ਚੋ ਅਦਾਨਸੀਲੋ ਪੁਰਿਸੋ ਅਦ੍ਧਿਕੇ ਦਿਸ੍ਵਾ ਪਸ੍ਸਨ੍ਤੋਪਿ ਨ ਪਸ੍ਸਤਿ, ਤੇਸਂ ਕਥਂ ਸੁਣਨ੍ਤੋਪਿ ਨ ਸੁਣੋਤਿ, ਸਯਂ ਕਿਞ੍ਚਿ ਨ ਕਥੇਤਿ, ਅਦਾਤੁਕਮ੍ਯਤਾਥਮ੍ਭੇ ਬਦ੍ਧੋ ਹੋਤਿ, ਤਸ੍ਮਾ ਤਤ੍ਥ ਮਤਲਿਙ੍ਗਾਨਿ ਉਪਲਬ੍ਭਨ੍ਤਿਯੇਵਾਤਿ ਆਹ ‘‘ਅਦਾਨਸੀਲਤਾਯ ਮਰਣੇਨ ਮਤੇਸੂ’’ਤਿ. ਅਟ੍ਠਕਥਾਯਂ ਪਨ ਦਾਨਮਤ੍ਤਮੇਵ ਗਹੇਤ੍ਵਾ ਮਤੇਨਸ੍ਸ ਸਮਤਂ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਦਾਨਸੀਲਸ੍ਸ ਪਨ ਅਮਤਲਿਙ੍ਗਾਨਿ ਵੁਤ੍ਤਵਿਪਰਿਯਾਯਤੋ ਵੇਦਿਤਬ੍ਬਾਨਿ. ਵਜਨ੍ਤਿ ਪੁਥੁਤ੍ਤੇ ਏਕਵਚਨਂ, ਤਸ੍ਮਾ ਵਚਨਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਸਹ ਵਜਨ੍ਤਾ’’ਤਿ. ਦਾਨਸੀਲਾਦਿਧਮ੍ਮੋ ਪੁਰਾਤਨੋ, ਨ ਅਜ੍ਜਤਨੋਤਿ ਸਨਨ੍ਤਨੋ, ਸੋ ਏਤੇਸੁ ਅਤ੍ਥੀਤਿ ਸਨਨ੍ਤਨਾ, ਪਣ੍ਡਿਤਾ, ਤੇਸਂ ਧਮ੍ਮਾਤਿ ਤੇਸਂ ਵਸੇਨਪਿ ਧਮ੍ਮੋ ਸਨਨ੍ਤਨੋਤਿ ਆਹ ‘‘ਸਨਨ੍ਤਨਾਨਂ ਵਾ ਪਣ੍ਡਿਤਾਨਂ ਏਸ ਧਮ੍ਮੋ’’ਤਿ. ਅਪ੍ਪਸ੍ਮਿਮ੍ਪਿ ਦੇਯ੍ਯਧਮ੍ਮੇ ਸਤਿ ਏਕੇ ਦਾਨਂ ਦਦਨ੍ਤਿ, ਏਕੇ ਨ ਦਦਨ੍ਤਿ ਮਚ੍ਛਰਿਭਾਵਾ. ਸਹਸ੍ਸਦਾਨਸਦਿਸਾਤਿ ਏਕਾਪਿ ਦਕ੍ਖਿਣਾ ਪਰਿਚ੍ਚਾਗਚੇਤਨਾਯ ਉਲ਼ਾਰਭਾਵਤੋ ਸਹਸ੍ਸਦਾਨਸਦਿਸਾ ਹੋਤਿ.

ਦੁਰਨੁਗਮਨੋਤਿ ਅਸਮਙ੍ਗਿਨਾ ਅਨੁਗਨ੍ਤੁਂ ਦੁਕ੍ਕਰੋ. ਅਨਨੁਗਮਨਞ੍ਚਸ੍ਸ ਧਮ੍ਮਸ੍ਸ ਅਪੂਰਣਮੇਵਾਤਿ ਆਹ ‘‘ਦੁਪ੍ਪੂਰੋ’’ਤਿ. ‘‘ਧਮ੍ਮਂ ਚਰੇ’’ਤਿ ਅਯਂ ਧਮ੍ਮਚਰਿਯਾ ਗਹਟ੍ਠਸ੍ਸ ਵਸੇਨ ਆਰਦ੍ਧਾਤਿ ਆਹ ‘‘ਦਸਕੁਸਲਕਮ੍ਮਪਥਧਮ੍ਮਂ ਚਰਤੀ’’ਤਿ. ਤੇਨਾਹ ‘‘ਦਾਰਞ੍ਚ ਪੋਸ’’ਨ੍ਤਿ. ਸਮੁਞ੍ਜਕਨ੍ਤਿ ਕਸ੍ਸਕੇਹਿ ਅਤ੍ਤਨਾ ਕਾਤਬ੍ਬਂ ਕਤ੍ਵਾ ਵਿਸਟ੍ਠਧਞ੍ਞਕਰਣਤੋ ਖਲੇ ਉਞ੍ਛਾਚਰਿਯਵਸੇਨ ਸਮੁਞ੍ਜਨਿਆਦਿਨਾ ਛਡ੍ਡਿਤਧਞ੍ਞਸਂਹਰਣਂ. ਤੇਨਾਹ ‘‘ਯੋ ਅਪਿ…ਪੇ… ਸਮੁਞ੍ਜਕਂ ਚਰਤੀ’’ਤਿ. ਏਤੇਨਾਤਿ ਸਤਸਹਸ੍ਸਸਹਸ੍ਸਯਾਗਿਗ੍ਗਹਣੇਨ ਦਸਨ੍ਨਮ੍ਪਿ ਭਿਕ੍ਖੁਕੋਟੀਨਂ ਪਿਣ੍ਡਪਾਤੋ ਦਸ੍ਸਿਤੋ ਹੋਤਿ. ‘‘ਦਿਨ੍ਨੋ’’ਤਿ ਪਦਂ ਆਨੇਤ੍ਵਾ ਯੋਜਨਾ. ਦਸਨ੍ਨਂ ਵਾ ਕਹਾਪਣਕੋਟੀਨਂ ਪਿਣ੍ਡਪਾਤੋਤਿ ਦਸਨ੍ਨਂ ਕਹਾਪਣਕੋਟੀਨਂ ਵਿਨਿਯੁਞ੍ਜਨਵਸੇਨ ਸਮ੍ਪਾਦਿਤਪਿਣ੍ਡਪਾਤੋ. ਤਯਿਦਂ ਸਤਸਹਸ੍ਸਂ ਸਹਸ੍ਸਯਾਗੀਨਂ ਦਾਨਂ ਏਤ੍ਤਕਂ ਹੋਤੀਤਿ ਕਤ੍ਵਾ ਵੁਤ੍ਤਂ. ਸਮੁਞ੍ਜਕਂ ਚਰਨ੍ਤੋਪੀਤਿ ਸਮੁਞ੍ਜਕਂ ਚਰਿਤ੍ਵਾਪਿ, ਸਮੁਞ੍ਜਕਚਰਣਹੇਤੂਤਿ ਅਤ੍ਥੋ. ਸੇਸਪਦਦ੍ਵਯੇਪਿ ਏਸੇਵ ਨਯੋ. ਦਾਰਂ ਪੋਸੇਨ੍ਤੋਪਿ ਧਮ੍ਮਂ ਚਰਤਿ, ਅਪ੍ਪਕਸ੍ਮਿਂ ਦਦਨ੍ਤੋਪਿ ਧਮ੍ਮਂ ਚਰਤੀਤਿ ਯੋਜਨਾ. ਤਥਾਵਿਧਸ੍ਸਾਤਿ ਤਾਦਿਸਸ੍ਸ ਤਥਾਧਮ੍ਮਚਾਰਿਨੋ ਯਾ ਧਮ੍ਮਚਰਿਯਾ, ਤਸ੍ਸਾ ਕਲਮ੍ਪਿ ਨਗ੍ਘਨ੍ਤਿ ਏਤੇ ਸਹਸ੍ਸਯਾਗਿਨੋ ਅਤ੍ਤਨੋ ਸਹਸ੍ਸਯਾਗਿਤਾਯ. ਯਂ ਤੇਨ ਦਲਿਦ੍ਦੇਨਾਤਿਆਦਿ ਤਸ੍ਸੇਵਤ੍ਥਸ੍ਸ ਵਿਵਰਣਂ. ਸਬ੍ਬੇਸਮ੍ਪਿ ਤੇਸਨ੍ਤਿ ‘‘ਸਤਂਸਹਸ੍ਸਾਨਂ ਸਹਸ੍ਸਯਾਗਿਨ’’ਨ੍ਤਿ ਵੁਤ੍ਤਾਨਂ ਤੇਸਂ ਸਬ੍ਬੇਸਮ੍ਪਿ. ਇਤਰੇਸਨ੍ਤਿ ‘‘ਤਥਾਵਿਧਸ੍ਸਾ’’ਤਿ ਵੁਤ੍ਤਪੁਰਿਸਤੋ ਅਞ੍ਞੇਸਂ. ਦਸਕੋਟਿਸਹਸ੍ਸਦਾਨਨ੍ਤਿ ਦਸਕੋਟਿਸਙ੍ਖਾਤਂ ਤਤੋ ਅਨੇਕਸਹਸ੍ਸਭੇਦਤਾਯ ਸਹਸ੍ਸਦਾਨਂ.

‘‘ਕਲਂ ਨਗ੍ਘਤੀ’’ਤਿ ਇਦਂ ਤੇਸਂ ਦਾਨਤੋ ਇਮਸ੍ਸ ਦਾਨਸ੍ਸ ਉਲ਼ਾਰਤਰਭਾਵੇਨ ਵਿਪੁਲਤਰਭਾਵੇਨ ਵਿਪੁਲਤਰਫਲਤਾਯ ਵੁਤ੍ਤਨ੍ਤਿ ਆਹ ‘‘ਕਥਂ ਨੁ ਖੋ ਏਤਂ ਮਹਪ੍ਫਲਤਰਨ੍ਤਿ ਜਾਨਨਤ੍ਥ’’ਨ੍ਤਿ. ਪਚ੍ਚਯਵਿਸੇਸੇਨ ਮਹਤ੍ਤਂ ਗਤੋਤਿ ਮਹਗ੍ਗਤੋ, ਉਲ਼ਾਰੋਤਿ ਅਤ੍ਥੋ. ਤੇਨਾਹ ‘‘ਵਿਪੁਲਸ੍ਸੇਤਂ ਵੇਵਚਨ’’ਨ੍ਤਿ. ਸਮੇਨਾਤਿ ਞਾਯੇਨ, ਧਮ੍ਮੇਨਾਤਿ ਅਤ੍ਥੋ. ਵਿਸਮੇਤਿ ਨ ਸਮੇ ਮਚ੍ਛਰਿਯਲਕ੍ਖਣਪ੍ਪਤ੍ਤੇ. ਛੇਤ੍ਵਾਤਿ ਪੀਲ਼ੇਤ੍ਵਾ. ਤਂ ਪਨ ਪੀਲ਼ਨਂ ਪੋਥਨਨ੍ਤਿ ਦਸ੍ਸੇਨ੍ਤੋ ‘‘ਪੋਥੇਤ੍ਵਾ’’ਤਿ ਆਹ. ਅਸ੍ਸੁਮੁਖਾਤਿ ਤਿਨ੍ਤਅਸ੍ਸੁਮੁਖਸਮ੍ਮਿਸ੍ਸਾ ਪਰਂ ਰੋਦਾਪੇਤ੍ਵਾ. ਮਹਾਦਾਨਨ੍ਤਿ ਯਥਾਵੁਤ੍ਤਂ ਬਹੁਦੇਯ੍ਯਧਮ੍ਮਸ੍ਸ ਪਰਿਚ੍ਚਜਨੇਨ ਮਹਨ੍ਤਦਾਨਂ. ਉਪ੍ਪਤ੍ਤਿਯਾ ਅਪਰਿਸੁਦ੍ਧਤਾਯਾਤਿ ਅਜ੍ਝਾਸਯਸ੍ਸ ਦੇਯ੍ਯਧਮ੍ਮਗਵੇਸਨਾਯ ਚ ਸੁਦ੍ਧਤਾਯ ਮਲੀਨਤ੍ਤਾ. ਇਤਰਂ ਧਮ੍ਮਚਰਿਯਾਯ ਨਿਬ੍ਬਤ੍ਤਿਤਦਾਨਂ. ਪਰਿਤ੍ਤਦਾਨਨ੍ਤਿ ਪਰਿਤ੍ਤਸ੍ਸ ਦੇਯ੍ਯਧਮ੍ਮਸ੍ਸ ਵਸੇਨ ਪਰਿਤ੍ਤਦਾਨਂ. ਅਤ੍ਤਨੋ ਉਪ੍ਪਤ੍ਤਿਯਾ ਪਰਿਸੁਦ੍ਧਤਾਯਾਤਿ ਅਜ੍ਝਾਸਯਸ੍ਸ ਦੇਯ੍ਯਧਮ੍ਮਗਵੇਸਨਾਯ ਚ ਵਿਸੁਦ੍ਧਤਾਯ. ਏਵਨ੍ਤਿਆਦਿਮਾਹਾਤਿ ‘‘ਏਵਂ ਸਹਸ੍ਸਾਨਂ ਸਹਸ੍ਸਯਾਗਿਨ’’ਨ੍ਤਿ ਅਵੋਚ. ਤਤ੍ਥ ਸਹਸ੍ਸਾਨਨ੍ਤਿ ਸਤਂਸਹਸ੍ਸਾਨਂ. ਗਾਥਾਬਨ੍ਧਸੁਖਤ੍ਥਂ ਸਤਗ੍ਗਹਣਂ ਨ ਕਤਂ. ਸੇਸਂ ਵੁਤ੍ਤਨਯਮੇਵ.

ਮਚ੍ਛਰਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਸਾਧੁਸੁਤ੍ਤਵਣ੍ਣਨਾ

੩੩. ਉਦਾਨਂ ਉਦਾਨੇਸੀਤਿ ਪੀਤਿਵੇਗੇਨ ਉਗ੍ਗਿਰਿਤਬ੍ਬਤਾਯ ਉਦਾਨਂ ਉਗ੍ਗਿਰਿ ਉਚ੍ਚਾਰੇਸਿ. ਤਯਿਦਂ ਯਸ੍ਮਾ ਪੀਤਿਸਮੁਟ੍ਠਾਪਿਤਂ ਵਚਨਂ, ਤਸ੍ਮਾ ਵੁਤ੍ਤਂ ‘‘ਉਦਾਹਾਰਂ ਉਦਾਹਰੀ’’ਤਿ. ਯਥਾ ਪਨ ਤਂ ਵਚਨਂ ‘‘ਉਦਾਨ’’ਨ੍ਤਿ ਵੁਚ੍ਚਤਿ, ਤਂ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਸਦ੍ਧਾਯਾਤਿ ਏਤ੍ਥ ਯ-ਕਾਰੋ ਹੇਤੁਅਤ੍ਥੋ. ਪਰਿਚ੍ਚਾਗਚੇਤਨਾਯ ਹਿ ਸਦ੍ਧਾ ਵਿਸੇਸਪਚ੍ਚਯੋ ਅਸ੍ਸਦ੍ਧਸ੍ਸ ਤਦਭਾਵਤੋ. ਪਿ-ਸਦ੍ਦੋ ਵੁਤ੍ਤਤ੍ਥਸਮ੍ਪਿਣ੍ਡਨਤ੍ਥੋ. ‘‘ਸਾਹੂ’’ਤਿ ਪਦਂ ਸਾਧੁਸਦ੍ਦੇਨ ਸਮਾਨਤ੍ਥਂ ਦਟ੍ਠਬ੍ਬਂ. ਕਥਨ੍ਤਿ ਦਾਨਯੁਦ੍ਧਾਨਂ ਵਿਪਕ੍ਖਸਭਾਵਾਤਿ ਅਧਿਪ੍ਪਾਯੋ. ਏਤਂ ਉਭਯਨ੍ਤਿ ਦਾਨਂ ਯੁਦ੍ਧਨ੍ਤਿ ਇਦਂ ਦ੍ਵਯਂ. ਜੀਵਿਤਭੀਰੁਕੋਤਿ ਜੀਵਿਤਵਿਨਾਸਭੀਰੁਕੋ. ਖਯਭੀਰੁਕੋਤਿ ਭੋਗਕ੍ਖਯਸ੍ਸ ਭੀਰੁਕੋ. ਵਦਨ੍ਤੋਤਿ ਜੀਵਿਤੇ ਸਾਲਯਤਂ, ਤਤੋ ਏਵ ਯੁਜ੍ਝਨੇ ਅਸਮਤ੍ਥਤਂ ਪਵੇਦੇਨ੍ਤੋ. ਛੇਜ੍ਜਨ੍ਤਿ ਹਤ੍ਥਪਾਦਾਦਿਛੇਦੋ. ਉਸ੍ਸਹਨ੍ਤੋਤਿ ਵੀਰਿਯਂ ਕਰੋਨ੍ਤੋ. ਏਵਂ ਭੋਗੇ ਰਕ੍ਖਿਸ੍ਸਾਮੀਤਿ ਤਥਾ ਭੋਗੇ ਅਪਰਿਕ੍ਖੀਣੇ ਕਰਿਸ੍ਸਾਮੀਤਿ. ਵਦਨ੍ਤੋਤਿ ਇਧ ਭੋਗੇਸੁ ਲੋਭਂ, ਤਤੋ ਏਵ ਦਾਤੁਂ ਅਸਮਤ੍ਥਤਂ ਪਵੇਦੇਨ੍ਤੋ. ਏਵਨ੍ਤਿ ਏਵਂ ਜੀਵਿਤਭੋਗਨਿਰਪੇਕ੍ਖਤਾਯ ਦਾਨਞ੍ਚ ਯੁਦ੍ਧਞ੍ਚ ਸਮਂ ਹੋਤਿ. ਸਦ੍ਧਾਦਿਸਮ੍ਪਨ੍ਨੋਤਿ ਸਦ੍ਧਾਧਮ੍ਮਜੀਵਿਤਾਵੀਮਂਸਾਸੀਲਾਦਿਗੁਣਸਮਨ੍ਨਾਗਤੋ. ਸੋ ਹਿ ਦੇਯ੍ਯਵਤ੍ਥੁਨੋ ਪਰਿਤ੍ਤਕਤ੍ਤਾ ਅਪ੍ਪਕਮ੍ਪਿ ਦਦਨ੍ਤੋ ਅਤ੍ਤਨੋ ਪਨ ਚਿਤ੍ਤਸਮ੍ਪਤ੍ਤਿਯਾ ਖੇਤ੍ਤਸਮ੍ਪਤ੍ਤਿਯਾ ਚ ਬਹੁਂ ਉਲ਼ਾਰਪੁਞ੍ਞਂ ਪਵਡ੍ਢੇਨ੍ਤੋ ਬਹੁਵਿਧਂ ਲੋਭ-ਦੋਸ-ਇਸ੍ਸਾ-ਮਚ੍ਛਰਿਯ-ਦਿਟ੍ਠਿਵਿਚਿਕਿਚ੍ਛਾਦਿਭੇਦਂ ਤਪ੍ਪਟਿਪਕ੍ਖਂ ਅਭਿਭਵਤਿ, ਤਤੋ ਏਵ ਚ ਤਂ ਮਹਪ੍ਫਲਂ ਹੋਤਿ ਮਹਾਨਿਸਂਸਂ. ਅਟ੍ਠਕਥਾਯਂ ਪਨ ‘‘ਮਚ੍ਛੇਰਂ ਮਦ੍ਦਤਿ’’ਚ੍ਚੇਵ ਵੁਤ੍ਤਂ, ਤਸ੍ਸ ਪਨ ਉਜੁਵਿਪਚ੍ਚਨੀਕਭਾਵਤੋ.

ਪਰਤ੍ਥਾਤਿ ਪਰਲੋਕੇ. ਏਕਸਾਟਕਬ੍ਰਾਹ੍ਮਣਵਤ੍ਥੁ ਅਨ੍ਵਯਵਸੇਨ, ਅਙ੍ਕੁਰਵਤ੍ਥੁ ਬ੍ਯਤਿਰੇਕਵਸੇਨ ਵਿਤ੍ਥਾਰੇਤਬ੍ਬਂ.

ਧਮ੍ਮੋ ਲਦ੍ਧੋ ਏਤੇਨਾਤਿ ਧਮ੍ਮਲਦ੍ਧੋ, ਪੁਗ੍ਗਲੋ. ਅਗ੍ਗਿਆਹਿਤਪਦਸ੍ਸ ਵਿਯ ਸਦ੍ਦਸਿਦ੍ਧਿ ਦਟ੍ਠਬ੍ਬਾ. ‘‘ਉਟ੍ਠਾਨਨ੍ਤਿ ਕਾਯਿਕਂ ਵੀਰਿਯਂ, ਵੀਰਿਯਨ੍ਤਿ ਚੇਤਸਿਕ’’ਨ੍ਤਿ ਵਦਨ੍ਤਿ. ਉਟ੍ਠਾਨਨ੍ਤਿ ਭੋਗੁਪ੍ਪਾਦੇ ਯੁਤ੍ਤਪਯੁਤ੍ਤਤਾ. ਵੀਰਿਯਨ੍ਤਿ ਤਜ੍ਜੋ ਉਸ੍ਸਾਹੋ. ਯਮਸ੍ਸ ਆਣਾਪਵਤ੍ਤਿਟ੍ਠਾਨਂ. ਵੇਤਰਣਿਮ੍ਪਿ ਇਤਰੇ ਨਿਰਯੇ ਚ ਅਤਿਕ੍ਕਮ੍ਮ. ਤੇ ਪਨ ਅਬ੍ਬੁਦਾਦੀਨਂ ਵਸੇਨ ਅਵੀਚਿਂ ਦਸਧਾ ਕਤ੍ਵਾ ਅਵਸੇਸਮਹਾਨਿਰਯੇ ਸਤ੍ਤਪਿ ਆਯੁਪ੍ਪਮਾਣਭੇਦੇਨ ਤਯੋ ਤਯੋ ਕਤ੍ਵਾ ਏਕਤਿਂਸਾਤਿ ਵਦਨ੍ਤਿ. ਸਞ੍ਜੀਵਾਦਿਨਿਰਯਸਂਵਤ੍ਤਨਸ੍ਸ ਕਮ੍ਮਸ੍ਸ ਤਿਕ੍ਖਮਜ੍ਝਮੁਦੁਭਾਵੇਨ ਤਸ੍ਸ ਆਯੁਪ੍ਪਮਾਣਸ੍ਸ ਤਿਵਿਧਤਾ ਵਿਭਾਵੇਤਬ੍ਬਾ. ਅਪਰੇ ਪਨ ‘‘ਅਟ੍ਠ ਮਹਾਨਿਰਯਾ ਸੋਲ਼ਸ ਉਸ੍ਸਦਨਿਰਯਾ ਆਦਿਤੋ ਚਤ੍ਤਾਰੋ ਸਿਤਨਿਰਯੇ ਏਕਂ ਕਤ੍ਵਾ ਸਤ੍ਤ ਸਿਤਨਿਰਯਾਤਿ ਏਵਂ ਏਕਤਿਂਸ ਮਹਾਨਿਰਯਾ’’ਤਿ ਵਦਨ੍ਤਿ. ਮਹਾਨਿਰਯਗ੍ਗਹਣਤੋ ਆਦਿਤੋ ਚਤ੍ਤਾਰੋ ਸਿਤਨਿਰਯਾ ਏਕੋ ਨਿਰਯੋ ਕਤੋਤਿ.

ਤੇਸਨ੍ਤਿ ਵਿਚਿਨਿਤ੍ਵਾ ਗਹਿਤਪਚ੍ਚਯਾਨਂ. ਪਞ੍ਚਨਵੁਤਿਪਾਸਣ੍ਡਭੇਦਾ ਪਪਞ੍ਚਸੂਦਨਿਸਂਵਣ੍ਣਨਾਯਂ ਵੁਤ੍ਤਨਯੇਨ ਵੇਦਿਤਬ੍ਬਾ. ਤਤ੍ਥਾਤਿ ਤੇਸੁ ਦ੍ਵੀਸੁ ਵਿਚਿਨਨੇਸੁ. ਦਕ੍ਖਿਣਾਵਿਚਿਨਨਂ ਆਹ, ਉਪਮਾਨਾਨਿ ਹਿ ਨਾਮ ਯਾਵਦੇਵ ਉਪਮੇਯ੍ਯਤ੍ਥਵਿਭਾਵਨਤ੍ਥਾਨਿ. ਏਤੇਨ ਸੁਖੇਤ੍ਤਗਹਣਤੋਪਿ ਦਕ੍ਖਿਣੇਯ੍ਯਵਿਚਿਨਨਂ ਦਟ੍ਠਬ੍ਬਂ.

ਪਾਣੇਸੁ ਸਂਯਮੋਤਿ ਇਮਿਨਾ ਦਸਵਿਧਮ੍ਪਿ ਕੁਸਲਕਮ੍ਮਪਥਧਮ੍ਮਂ ਦਸ੍ਸੇਤਿ. ਯਥਾ ਹਿ ‘‘ਪਾਣੇਸੁ ਸਂਯਮੋ’’ਤਿ ਇਮਿਨਾ ਸਤ੍ਤਾਨਂ ਜੀਵਿਤਾਵੋਰੋਪਨਤੋ ਸਂਯਮੋ ਵੁਤ੍ਤੋ, ਏਵਂ ਤੇਸਂ ਸਾਪਤੇਯ੍ਯਾਵਹਾਰਤੋ ਪਰਦਾਰਾਮਸਨਤੋ ਵਿਸਂਵਾਦਨਤੋ ਅਞ੍ਞਮਞ੍ਞਭੇਦਨਤੋ ਫਰੁਸਵਚਨੇਨ ਸਙ੍ਘਟ੍ਟਨਤੋ ਨਿਰਤ੍ਥਕਵਿਪ੍ਪਲਪਨਤੋ ਪਰਸਨ੍ਤਕਾਭਿਜ੍ਝਾਨਤੋ ਉਚ੍ਛੇਦਚਿਨ੍ਤਨਤੋ ਮਿਚ੍ਛਾਭਿਨਿਵੇਸਨਤੋ ਚ ਸਂਯਮੋ ਹੋਤੀਤਿ. ਤੇਨਾਹ ‘‘ਸੀਲਾਨਿਸਂਸਂ ਕਥੇਤੁਮਾਰਦ੍ਧਾ’’ਤਿ. ਫਰੁਸਵਚਨਸਂਯਮੋ ਪਨੇਤ੍ਥ ਸਰੂਪੇਨੇਵ ਵੁਤ੍ਤੋ.

ਪਰਸ੍ਸ ਉਪਵਾਦਭਯੇਨਾਤਿ ਪਾਪਕਿਰਿਯਹੇਤੁ ਪਰੇਨ ਅਤ੍ਤਨੋ ਵਤ੍ਤਬ੍ਬਉਪਵਾਦਭਯੇਨ. ਉਪਵਾਦਭਯਾਤਿ ਉਪਵਾਦਭਯਨਿਮਿਤ੍ਤਂ. ‘‘ਕਥਂ ਨੁ ਖੋ ਅਮ੍ਹੇ ਪਰੇ ਨ ਉਪਵਦੇਯ੍ਯੁ’’ਨ੍ਤਿ ਆਸੀਸਨ੍ਤਾ ਪਾਪਂ ਨ ਕਰੋਨ੍ਤਿ. ਧਮ੍ਮਪਦਮੇਵਾਤਿ ਅਸਙ੍ਖਤਧਮ੍ਮਕੋਟ੍ਠਾਸੋ ਏਵ ਸੇਯ੍ਯੋ ਸੇਟ੍ਠੋ. ਯਸ੍ਮਾ ਸਬ੍ਬਸਙ੍ਖਤਂ ਅਨਿਚ੍ਚਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ, ਤਸ੍ਮਾ ਤਦਧਿਗਮਾਯ ਉਸ੍ਸਾਹੋ ਕਰਣੀਯੋਤਿ ਦਸ੍ਸੇਤਿ. ਪੁਬ੍ਬਸਦ੍ਦੋ ਕਾਲਵਿਸੇਸਵਿਸਯੋਤਿ ਆਹ ‘‘ਪੁਬ੍ਬੇ ਚ ਕਸ੍ਸਪਬੁਦ੍ਧਾਦਿਕਾਲੇਪੀ’’ਤਿਆਦਿ. ਪੁਨ ਅਕਾਲਵਿਸੇਸੋ ਅਪਾਟਿਯੇਕ੍ਕੋ ਭੁਮ੍ਮਤ੍ਥਵਿਸਯੋਵਾਤਿ ਆਹ ‘‘ਸਬ੍ਬੇਪਿ ਵਾ’’ਤਿਆਦਿ. ਤਤ੍ਥ ਸਬ੍ਬੇਪਿ ਵਾਤਿ ਏਤੇ ਸਬ੍ਬੇਪਿ ਕਸ੍ਸਪਬੁਦ੍ਧਾਦਯੋ ਲੋਕਨਾਥਾ ਸਨ੍ਤੋ ਨਾਮ ਵੂਪਸਨ੍ਤਸਬ੍ਬਕਿਲੇਸਸਨ੍ਤਾਪਾ ਸਨ੍ਤਸਬ੍ਭੂਤਗੁਣਤ੍ਤਾ.

ਸਾਧੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਨਸਨ੍ਤਿਸੁਤ੍ਤਵਣ੍ਣਨਾ

੩੪. ਕਮਨੀਯਾਨੀਤਿ ਕਨ੍ਤਾਨਿ. ਤਤੋ ਏਵ ਏਤਾਨਿ ਇਟ੍ਠਾਰਮ੍ਮਣਾਨਿ ਸੁਖਾਰਮ੍ਮਣਾਨਿ ਰੂਪਾਦੀਨਿ, ਤੇ ਪਨ ਵਤ੍ਥੁਕਾਮਾ, ਤਦਾਰਮ੍ਮਣਕਿਲੇਸਕਾਮਾ ਵਾ. ‘‘ਨ ਸਨ੍ਤਿ ਕਾਮਾ ਮਨੁਜੇਸੂ’’ਤਿ ਦੇਸਨਾਸੀਸਮੇਤਂ, ਨਿਚ੍ਛਯੇਨ ਕਾਮਾ ਅਨਿਚ੍ਚਾਯੇਵ. ਮਚ੍ਚੁ ਧੀਯਤਿ ਏਤ੍ਥਾਤਿ ਮਚ੍ਚੁਧੇਯ੍ਯਂ. ਨ ਪੁਨ ਆਗਚ੍ਛਤਿ ਏਤ੍ਥ ਤਂ ਅਪੁਨਾਗਮਨਂ. ਅਪੁਨਾਗਮਨਸਙ੍ਖਾਤਂ ਨਿਬ੍ਬਾਨਂ ਅਨੁਪਗਚ੍ਛਨਤੋ. ਨਿਬ੍ਬਾਨਂ ਹੀਤਿਆਦਿ ਵੁਤ੍ਤਸ੍ਸੇਵਤ੍ਥਸ੍ਸ ਵਿਵਰਣਂ. ਬਦ੍ਧੋਤਿ ਪਟਿਬਦ੍ਧਚਿਤ੍ਤੋ. ਪਮਤ੍ਤੋਤਿ ਵੋਸ੍ਸਗ੍ਗਪਮਾਦਂ ਆਪਨ੍ਨੋ.

ਤਣ੍ਹਾਛਨ੍ਦਤੋ ਜਾਤਂ ਤਸ੍ਸ ਵਿਸੇਸਪਚ੍ਚਯਤ੍ਤਾ. ਇਚ੍ਛਿਤਂ ਹਨਤੀਤਿ ਅਘਂ, ਦੁਕ੍ਖਂ. ਇਧ ਪਨ ਅਨਵਸੇਸਪਰਿਯਾਦਾਨਵਸੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਨ੍ਤਿ. ਛਨ੍ਦਵਿਨਯਾ ਅਘਵਿਨਯੋਤਿ ਹੇਤੁਨਿਰੋਧੇਨ ਹਿ ਫਲਨਿਰੋਧੋ, ਏਵਂ ਸਉਪਾਦਿਸੇਸਨਿਬ੍ਬਾਨਂ ਵਤ੍ਵਾ ਅਘਵਿਨਯਾ ਦੁਕ੍ਖਵਿਨਯੋਤਿ ਅਨੁਪਾਦਿਸੇਸਨਿਬ੍ਬਾਨਂ ਵਦਤਿ.

ਚਿਤ੍ਰਾਨੀਤਿ ਕਿਲੇਸਕਾਮਾਪਿ ਵੇਦਨਾਦਿਟ੍ਠਿਸਮ੍ਪਯੋਗਭੇਦੇਨ ਹੋਨ੍ਤਿ, ਆਕਾਰਭੇਦੇਨ ਚ ਅਤ੍ਥਿ ਸਵਿਘਾਤਾਵਿਘਾਤਾਤਿ ਤਤੋ ਵਿਸੇਸੇਤੁਂ ‘‘ਆਰਮ੍ਮਣਚਿਤ੍ਤਾਨੀ’’ਤਿ ਵੁਤ੍ਤਂ. ਸਙ੍ਕਪ੍ਪਿਤਰਾਗੋਤਿ ਸੁਭਾਦਿਵਸੇਨ ਸਙ੍ਕਪ੍ਪਿਤਵਤ੍ਥੁਮ੍ਹਿ ਰਾਗੋ. ਕਿਲੇਸਕਾਮੋ ਕਾਮੋਤਿ ਵੁਤ੍ਤੋ ਤਸ੍ਸੇਵਿਧ ਵਿਸੇਸਤੋ ਕਾਮਭਾਵਸਿਦ੍ਧਿਤੋ. ਪਸੂਰਸੁਤ੍ਤੇਨ ਵਿਭਾਵੇਤਬ੍ਬੋ ‘‘ਨ ਤੇ ਕਾਮਾ’’ਤਿਆਦਿਨਾ ਤਸ੍ਸ ਵਤ੍ਥੁਮ੍ਹਿ ਆਗਤਤ੍ਤਾ. ਇਦਾਨਿ ਤਮਤ੍ਥਂ ਸਙ੍ਖੇਪੇਨੇਵ ਵਿਭਾਵੇਨ੍ਤੋ ‘‘ਪਸੂਰਪਰਿਬ੍ਬਾਜਕੋ ਹੀ’’ਤਿਆਦਿਮਾਹ. ਨ ਤੇ ਕਾਮਾ ਯਾਨਿ ਚਿਤ੍ਰਾਨਿ ਲੋਕੇਤਿ ਤੇ ਚੇ ਕਾਮਾ ਨ ਹੋਨ੍ਤਿ, ਯਾਨਿ ਲੋਕੇ ਚਿਤ੍ਰਾਨਿ ਰੂਪਾਦਿਆਰਮ੍ਮਣਾਨਿ. ਵੇਦੇਸੀਤਿ ਕੇਵਲਂ ਸਙ੍ਕਪ੍ਪਰਾਗਞ੍ਚ ਕਾਮਂ ਕਤ੍ਵਾ ਵਦੇਸਿ ਚੇ. ਹੇਹਿਨ੍ਤੀਤਿ ਭਵੇਯ੍ਯੁਨ੍ਤਿ ਅਤ੍ਥੋ. ਸੁਣਨ੍ਤੋ ਸਦ੍ਦਾਨਿ ਮਨੋਰਮਾਨਿ, ਸਤ੍ਥਾਪਿ ਤੇ ਹੇਹਿਤਿ ਕਾਮਭੋਗੀਤਿ ਪਚ੍ਚੇਕਂ ਗਾਥਾ, ਇਧ ਪਨ ਸਂਖਿਪਿਤ੍ਵਾ ਦਸ੍ਸਿਤਾ. ਧੀਰਾ ਨਾਮ ਧਿਤਿਸਮ੍ਪਨ੍ਨਾਤਿ ਆਹ ‘‘ਪਣ੍ਡਿਤਾ’’ਤਿ.

ਤਸ੍ਸਾਤਿ ਯੋ ਪਹੀਨਕੋਧਮਾਨੋ ਸਬ੍ਬਸੋ ਸਂਯੋਜਨਾਤਿਗੋ ਨਾਮਰੂਪਸ੍ਮਿਂ ਅਸਜ੍ਜਨ੍ਤੋ ਰਾਗਾਦਿਕਿਞ੍ਚਨਰਹਿਤੋ, ਤਸ੍ਸ. ਮੋਘਰਾਜਾ ਨਾਮ ਥੇਰੋ ਬਾਵਰੀਬ੍ਰਾਹ੍ਮਣਸ੍ਸ ਪਰਿਚਾਰਕਾਨਂ ਸੋਲ਼ਸਨ੍ਨਂ ਅਞ੍ਞਤਰੋ. ਯਥਾਨੁਸਨ੍ਧਿਂ ਅਪ੍ਪਤ੍ਤੋ ਸਾਵਸੇਸ-ਅਤ੍ਥੋ, ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਧਿਪ੍ਪਾਯੋ. ਸਬ੍ਬਸੋ ਵਿਮੁਤ੍ਤਤ੍ਤਾਵ ਦੇਵਮਨੁਸ੍ਸਾ ਨਮਸ੍ਸਨ੍ਤਿ, ਯੇ ਤਂ ਪਟਿਪਜ੍ਜਨ੍ਤਿ. ਤੇਸਂ ਕਿਂ ਹੋਤਿ? ਕਿਞ੍ਚਿਪਿ ਨ ਸਿਯਾਤਿ ਅਯਮੇਤ੍ਥ ਅਤ੍ਥਵਿਸੇਸੋ? ਦਸਬਲਂ ਸਨ੍ਧਾਯੇਵਮਾਹ ਉਕ੍ਕਟ੍ਠਨਿਦ੍ਦੇਸੇਨ. ਅਨੁਪਟਿਪਤ੍ਤਿਯਾਤਿ ਪਟਿਪਤ੍ਤਿਂ ਅਨੁਗਨ੍ਤ੍ਵਾ ਪਟਿਪਜ੍ਜਨੇਨ. ਨਮਸ੍ਸਨ੍ਤਿ ਤਂ ਪੂਜੇਨ੍ਤਿ.

ਚਤੁਸਚ੍ਚਧਮ੍ਮਂ ਜਾਨਿਤ੍ਵਾਤਿ ਤੇਨ ਪਟਿਵਿਦ੍ਧਂ ਚਤੁਸਚ੍ਚਧਮ੍ਮਂ ਪਟਿਵਿਜ੍ਝਿਤ੍ਵਾ. ਤਥਾ ਚ ਬੁਦ੍ਧਸੁਬੁਦ੍ਧਤਾਯ ਨਿਬ੍ਬੇਮਤਿਕਾ ਹੋਨ੍ਤੀਤਿ ਆਹ ‘‘ਵਿਚਿਕਿਚ੍ਛਂ ਪਹਾਯਾ’’ਤਿ. ਤਤੋ ਪਰਂ ਪਨ ਅਨੁਕ੍ਕਮੇਨ ਅਗ੍ਗਮਗ੍ਗਾਧਿਗਮੇਨ ਸਙ੍ਗਾਤਿਗਾਪਿ ਹੋਨ੍ਤਿ. ਅਸੇਕ੍ਖਧਮ੍ਮਪਾਰਿਪੂਰਿਯਾ ਪਸਂਸਿਯਾ ਵਿਞ੍ਞੂਨਂ ਪਸਂਸਾਪਿ ਹੋਨ੍ਤੀਤਿ.

ਨਸਨ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਉਜ੍ਝਾਨਸਞ੍ਞਿਸੁਤ੍ਤਵਣ੍ਣਨਾ

੩੫. ਉਜ੍ਝਾਨਵਸੇਨ ਪਵਤ੍ਤਾ ਸਞ੍ਞਾ ਏਤੇਸਂ ਅਤ੍ਥਿ, ਉਜ੍ਝਾਨਵਸੇਨ ਵਾ ਸਞ੍ਜਾਨਨ੍ਤੀਤਿ ਉਜ੍ਝਾਨਸਞ੍ਞੀ. ਕਾਰਯੇਤਿ ਕਤਾਨਂ ਪਰਿਯਨ੍ਤਂ ਕਾਰਯੇਤਿ ਅਤ੍ਥੋ. ਪਰਿਯਨ੍ਤਕਾਰਿਤਨ੍ਤਿ ਪਰਿਚ੍ਛਿਨ੍ਨਕਾਰਿਤਂ ਪਰਿਮਿਤਵਚਨਨ੍ਤਿ ਅਤ੍ਥੋ. ਪਂਸੁਕੂਲਾਦਿਪਟਿਪਕ੍ਖਨਯੇਨ ਪਤ੍ਤੁਣ੍ਣਦੁਕੁਲਾਦਿ ਵੁਤ੍ਤਂ. ਨਾਮਂ ਗਹਿਤਨ੍ਤਿ ਏਤੇਨ ‘‘ਉਜ੍ਝਾਨਸਞ੍ਞਿਕਾ’’ਤਿ ਏਤ੍ਥ ਕ-ਸਦ੍ਦੋ ਸਞ੍ਞਾਯਨ੍ਤਿ ਦਸ੍ਸੇਤਿ.

ਅਞ੍ਞੇਨਾਕਾਰੇਨ ਭੂਤਨ੍ਤਿ ਅਤ੍ਤਨਾ ਪਵੇਦਿਯਮਾਨਾਕਾਰਤੋ ਅਞ੍ਞੇਨ ਅਸੁਦ੍ਧੇਨ ਆਕਾਰੇਨ ਵਿਜ੍ਜਮਾਨਂ ਉਪਲਬ੍ਭਮਾਨਂ ਅਤ੍ਤਾਨਂ. ਵਞ੍ਚੇਤ੍ਵਾਤਿ ਪਲਮ੍ਭੇਤ੍ਵਾ. ਤਸ੍ਸ ਕੁਹਕਸ੍ਸ. ਤਂ ਚਤੁਨ੍ਨਂ ਪਚ੍ਚਯਾਨਂ ਪਰਿਭੁਞ੍ਜਨਂ. ਪਰਿਜਾਨਨ੍ਤੀਤਿ ਤਸ੍ਸ ਪਟਿਪਤ੍ਤਿਂ ਪਰਿਚ੍ਛਿਜ੍ਜ ਜਾਨਨ੍ਤਿ. ਕਾਰਕੋਤਿ ਸਮ੍ਮਾਪਟਿਪਤ੍ਤਿਯਾ ਕਤ੍ਤਾ, ਸਮ੍ਮਾਪਟਿਪਜ੍ਜਿਤਾਤਿ ਅਤ੍ਥੋ.

ਇਦਨ੍ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ਅਯਨ੍ਤਿ ਅਤ੍ਥੋ. ਧਮ੍ਮਾਨੁਧਮ੍ਮਪਟਿਪਦਾਤਿ ਨਿਬ੍ਬਾਨਧਮ੍ਮਸ੍ਸ ਅਨੁਚ੍ਛਵਿਕਤਾਯ ਅਨੁਧਮ੍ਮਭੂਤਾ ਪਟਿਪਦਾ. ਪਟਿਪਕ੍ਖਵਿਧਮਨੇ ਅਸਿਥਿਲਤਾਯ ਦਲ਼੍ਹਾ. ਭਾਸਿਤਮਤ੍ਤੇਨ ਚ ਸਵਨਮਤ੍ਤੇਨ ਚਾਤਿ ਏਤ੍ਥ ਚ-ਸਦ੍ਦੋ ਵਿਸੇਸਨਿਵਤ੍ਤਿਅਤ੍ਥੋ. ਤੇਨ ਭਾਸਿਤਸ੍ਸ ਸੁਤਸ੍ਸ ਚ ਸਮ੍ਮਾਪਟਿਪਤ੍ਤਿਵਿਸੇਸਂ ਨਿਵਤ੍ਤੇਤਿ. ਲੋਕਪਰਿਯਾਯਨ੍ਤਿ ਲੋਕਸ੍ਸ ਪਰਿਵਿਧਮਨਂ ਉਪ੍ਪਾਦਨਿਰੋਧਵਸੇਨ ਸਙ੍ਖਾਰਾਨਂ ਪਰਾਵੁਤ੍ਤਿਂ. ਤੇਨਾਹ ‘‘ਸਙ੍ਖਾਰਲੋਕਸ੍ਸ ਉਦਯਬ੍ਬਯ’’ਨ੍ਤਿ. ਸ੍ਵਾਯਮਤ੍ਥੋ ਸਚ੍ਚਪਟਿਵੇਧੇਨੇਵ ਹੋਤੀਤਿ ਆਹ ‘‘ਚਤੁਸਚ੍ਚਧਮ੍ਮਞ੍ਚ ਅਞ੍ਞਾਯਾ’’ਤਿ. ਏਵਂ ਨ ਕੁਬ੍ਬਨ੍ਤੀਤਿ ਅਤ੍ਤਨਿ ਵਿਜ੍ਜਮਾਨਮ੍ਪਿ ਗੁਣਂ ਅਨਾਵੀਕਰੋਨ੍ਤੋ ‘‘ਯਥਾ ਤੁਮ੍ਹੇ ਵਦਥ, ਏਵਂ ਨ ਕੁਬ੍ਬਨ੍ਤੀ’’ਤਿ ਅਵਿਜ੍ਜਮਾਨਤਂ ਬ੍ਯਾਕਰੋਤੀਤਿ ਅਤ੍ਥੋ.

ਅਕਾਰਕਮੇਵਾਤਿ ਦੋਸਂ ਅਕਾਰਕਮੇਵ. ਅਚ੍ਚਯਸ੍ਸ ਪਟਿਗ੍ਗਣ੍ਹਨਂ ਨਾਮ ਅਧਿਵਾਸਨਂ, ਏਵਂ ਸੋ ਦੇਸਕੇਨ ਦੇਸਿਯਮਾਨੋ ਤਤੋ ਵਿਗਤੋ ਨਾਮ ਹੋਤਿ. ਤੇਨਾਹ ‘‘ਪਟਿਗ੍ਗਣ੍ਹਾਤੂਤਿ ਖਮਤੂ’’ਤਿ.

ਸਭਾਵੇਨਾਤਿ ਸਭਾਵਤੋ. ਏਕਸਦਿਸਨ੍ਤਿ ਪਰੇਸਂ ਚਿਤ੍ਤਾਚਾਰਂ ਜਾਨਨ੍ਤਮ੍ਪਿ ਅਜਾਨਨ੍ਤੇਹਿ ਸਹ ਏਕਸਦਿਸਂ ਕਰੋਨ੍ਤਾ. ਪਰਤੋਤਿ ਪਚ੍ਛਾ. ਕਥਾਯ ਉਪ੍ਪਨ੍ਨਾਯਾਤਿ ‘‘ਕਸ੍ਸਚ੍ਚਯਾ ਨ ਵਿਜ੍ਜਨ੍ਤੀ’’ਤਿਆਦਿਕਥਾਯ ਪਵਤ੍ਤਮਾਨਾਯ ‘‘ਤਥਾਗਤਸ੍ਸ ਬੁਦ੍ਧਸ੍ਸਾ’’ਤਿਆਦਿਨਾ ਬੁਦ੍ਧਬਲਂ ਬੁਦ੍ਧਾਨੁਭਾਵਂ ਦੀਪੇਤ੍ਵਾ. ਖਮਿਸ੍ਸਾਮੀਤਿ ਅਚ੍ਚਯਦੇਸਨਂ ਪਟਿਗ੍ਗਣ੍ਹਿਸ੍ਸਾਮਿ. ਤਪ੍ਪਟਿਗ੍ਗਹੋ ਹਿ ਇਧ ਖਮਨਨ੍ਤਿ ਅਧਿਪ੍ਪੇਤਂ, ਸਤ੍ਥਾ ਪਨ ਸਬ੍ਬਕਾਲਂ ਖਮੋ ਏਵ.

ਕੋਪੋ ਅਨ੍ਤਰੇ ਚਿਤ੍ਤੇ ਏਤਸ੍ਸਾਤਿ ਕੋਪਨ੍ਤਰੋ. ਦੋਸੋ ਗਰੁ ਗਰੁਕਾਤਬ੍ਬੋ ਅਸ੍ਸਾਤਿ ਦੋਸਗਰੁ. ‘‘ਪਟਿਮੁਚ੍ਚਤੀ’’ਤਿ ਵਾ ਪਾਠੋ, ਅਯਮੇਵ ਅਤ੍ਥੋ. ਅਚ੍ਚਾਯਿਕਕਮ੍ਮਨ੍ਤਿ ਸਹਸਾ ਅਨੁਪਧਾਰੇਤ੍ਵਾ ਕਿਰਿਯਾ. ਨੋ ਚਿਧਾਤਿ ਨੋ ਚੇ ਇਧ. ਇਧਾਤਿ ਨਿਪਾਤਮਤ੍ਤਂ. ਅਪਗਤਂ ਅਪਨੀਤਂ. ਦੋਸੋ ਨੋ ਚੇ ਸਿਯਾ, ਤੇਨ ਪਰਿਯਾਯੇਨ ਯਦਿ ਅਪਰਾਧੋ ਨਾਮ ਨ ਭਵੇਯ੍ਯਾਤਿ. ਨ ਸਮ੍ਮੇਯ੍ਯੁਂ ਨ ਵੂਪਸਮੇਯ੍ਯੁਂ. ਕੁਸਲੋਤਿ ਅਨਵਜ੍ਜੋ.

ਧੀਰੋ ਸਤੋਤਿ ਪਦਦ੍ਵਯੇਨ ਵਟ੍ਟਛਿਨ੍ਦਂ ਆਹ. ਕੋ ਨਿਚ੍ਚਮੇਵ ਪਣ੍ਡਿਤੋ ਨਾਮਾਤਿ ਅਤ੍ਥੋਤਿ ‘‘ਕਸ੍ਸਚ੍ਚਯਾ’’ਤਿਆਦਿਕਾਯ ਪੁਚ੍ਛਾਗਾਥਾਯ ਅਤ੍ਥੋ. ਦੀਘਮਜ੍ਝਿਮਸਂਵਣ੍ਣਨਾਸੁ ਤਥਾਗਤ-ਸਦ੍ਦੋ ਵਿਤ੍ਥਾਰਤੋ ਸਂਵਣ੍ਣਿਤੋਤਿ ਆਹ ‘‘ਏਵਮਾਦੀਹਿ ਕਾਰਣੇਹਿ ਤਥਾਗਤਸ੍ਸਾ’’ਤਿ. ਬੁਦ੍ਧਤ੍ਤਾਦੀਹੀਤਿ ਆਦਿ-ਸਦ੍ਦੇਨ ‘‘ਬੋਧੇਤਾ ਪਜਾਯਾ’’ਤਿਆਦਿਨਾ (ਮਹਾਨਿ. ੧੯੨; ਚੂਲ਼ਨਿ. ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸ ੯੭) ਨਿਦ੍ਦੇਸੇ ਆਗਤਕਾਰਣਾਨਿ ਸਙ੍ਗਯ੍ਹਨ੍ਤਿ. ਵਿਮੋਕ੍ਖਂ ਵੁਚ੍ਚਤਿ ਅਰਿਯਮਗ੍ਗੋ, ਤਸ੍ਸ ਅਨ੍ਤੋ ਅਗ੍ਗਫਲਂ, ਤਤ੍ਥ ਭਵਾ ਪਣ੍ਣਤ੍ਤਿ, ਤਸ੍ਸਾ ਵਸੇਨ. ਏਵਂ ਬੁਦ੍ਧਬਲਂ ਦੀਪੇਤਿ. ਇਦਾਨਿ ਖਿਤ੍ਤਂ ਸਙ੍ਖੇਪੇਨ ਸਂਹਰਾਪਿਤਂ ਹੋਤੀਤਿ ਦਸ੍ਸੇਤਿ.

ਉਜ੍ਝਾਨਸਞ੍ਞਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸਦ੍ਧਾਸੁਤ੍ਤਵਣ੍ਣਨਾ

੩੬. ਤਤ੍ਵਸ੍ਸਾਤਿ ਓ-ਕਾਰਸ੍ਸ ਵ-ਕਾਰਾਦੇਸਂ ਅ-ਕਾਰਸ੍ਸ ਚ ਲੋਪਂ ਕਤ੍ਵਾ ਨਿਦ੍ਦੇਸੋਤਿ ਆਹ ‘‘ਤਤੋ ਅਸ੍ਸਾ’’ਤਿ. ‘‘ਤਤਸ੍ਸਾ’’ਤਿ ਵਾ ਪਾਠੋ, ਤਤੋਤਿ ਚ ਸਦ੍ਧਾਹੇਤੂਤਿ ਅਤ੍ਥੋ. ਨਾਨੁਪਤਨ੍ਤੀਤਿ ਨ ਵਤ੍ਤਨ੍ਤਿ. ਪਮਾਦਂ ਕਰੋਨ੍ਤੀਤਿ ਪਮਜ੍ਜਨ੍ਤਿ, ਮਿਚ੍ਛਾ ਪਟਿਪਜ੍ਜਨ੍ਤੀਤਿ ਅਤ੍ਥੋ. ਲਕ੍ਖਣਾਨੀਤਿ ਅਨਿਚ੍ਚਾਦਿਲਕ੍ਖਣਾਨਿ. ਉਪਨਿਜ੍ਝਾਯਤੀਤਿ ਉਪੇਚ੍ਚ ਞਾਣਚਕ੍ਖੁਨਾ ਪੇਕ੍ਖਤਿ, ਅਨੁਪਸ੍ਸਤੀਤਿ ਅਤ੍ਥੋ. ਆਗਤਕਿਚ੍ਚਨ੍ਤਿ ਆਹਤਕਿਚ੍ਚਂ, ਅਯਮੇਵ ਵਾ ਪਾਠੋ. ਸਾਧੇਤੀਤਿ ਅਸਮ੍ਮੋਹਪਟਿਵੇਧਵਸੇਨ ਨਿਪ੍ਫਾਦੇਤਿ, ਤਥਲਕ੍ਖਣਂ ਨਿਰੋਧਸਚ੍ਚਂ ਉਪਨਿਜ੍ਝਾਯਤੀਤਿ ਅਯਮਤ੍ਥੋ ਮਗ੍ਗੇਪਿ ਵਤ੍ਤਬ੍ਬੋ ਤੇਨ ਵਿਨਾ ਅਸਮ੍ਮੋਹਪਟਿਵੇਧਸ੍ਸ ਅਸਮ੍ਭਵਤੋ. ਕਸਿਣਾਰਮ੍ਮਣਸ੍ਸਾਤਿ ਇਦਂ ਲਕ੍ਖਣਵਚਨਂ. ਅਕਸਿਣਾਰਮ੍ਮਣਸਮਾਪਤ੍ਤਿਯੋਪਿ ਹਿ ਸਨ੍ਤੀਤਿ. ਯਥਾ ਚ ਕਸਿਣਾਰਮ੍ਮਣਾਨਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਅਵਸੇਸਾਨਞ੍ਚ ਤਦਾਰਮ੍ਮਣਾਨਂ ਪਚ੍ਚਵੇਕ੍ਖਣਵਸੇਨ ਚਿਤ੍ਤਾਨਂ, ਏਵਂ ਤੇਨ ਤਾਨਿ ਆਰਮ੍ਮਣਾਨਿ ਗਹਿਤਾਨੀਤਿ ‘‘ਕਸਿਣਾਰਮ੍ਮਣਸ੍ਸ’’ਇਚ੍ਚੇਵ ਵੁਤ੍ਤਂ. ਪਰਮਂ ਉਤ੍ਤਮਂ ਸੁਖਨ੍ਤਿ ਵਤ੍ਤਬ੍ਬਤੋ ਪਰਮਸੁਖਂ ਅਰਹਤ੍ਤਂ.

ਸਦ੍ਧਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸਮਯਸੁਤ੍ਤਵਣ੍ਣਨਾ

੩੭. ਉਦਾਨਂ ਪਟਿਚ੍ਚਾਤਿ ਉਕ੍ਕਾਕਰਞ੍ਞਾ ਜਾਤਿਸਮ੍ਭੇਦਪਰਿਹਾਰਨਿਮਿਤ੍ਤਂ ਅਤ੍ਤਨੋ ਵਂਸਪਰਿਸੁਦ੍ਧਂ ਨਿਸ੍ਸਾਯ ਵੁਤ੍ਤਂ ਪੀਤਿਉਦਾਹਾਰਂ ਪਟਿਚ੍ਚ ਗੋਤ੍ਤਵਸੇਨ ‘‘ਸਕ੍ਕਾ’’ਤਿ ਲਦ੍ਧਨਾਮਾਨਂ. ਯਦਿ ਏਕੋਪਿ ਜਨਪਦੋ, ਕਥਂ ਬਹੁਵਚਨਨ੍ਤਿ ਆਹ ‘‘ਰੁਲ਼੍ਹੀਸਦ੍ਦੇਨਾ’’ਤਿ. ਅਕ੍ਖਰਚਿਨ੍ਤਿਕਾ ਹਿ ਈਦਿਸੇਸੁ ਠਾਨੇਸੁ ਯੁਤ੍ਤੇ ਵਿਯ ਸਲਿਙ੍ਗਵਚਨਾਨਿ ਇਚ੍ਛਨ੍ਤਿ, ਅਯਮੇਤ੍ਥ ਰੁਲ਼੍ਹੀ ਯਥਾ ‘‘ਅਵਨ੍ਤੀ ਕੁਰੂ’’ਤਿ, ਤਬ੍ਬਿਸੇਸਨੇ ਪਨ ਜਨਪਦਸਦ੍ਦੇ ਜਾਤਿਸਦ੍ਦਤਾਯ ਏਕਵਚਨਮੇਵ. ਅਰੋਪਿਮੇਤਿ ਕੇਨਚਿ ਨ ਰੋਪਿਮੇ.

ਆਵਰਣੇਨਾਤਿ ਸੇਤੁਨਾ. ਬਨ੍ਧਾਪੇਤ੍ਵਾਤਿ ਪਣ੍ਡੁਪਲਾਸਪਾਸਾਣਮਤ੍ਤਿਕਖਣ੍ਡਾਦੀਹਿ ਆਲਿਂ ਥਿਰਂ ਕਾਰਾਪੇਤ੍ਵਾ. ਸਸ੍ਸਾਨਿ ਕਾਰੇਨ੍ਤੀਤਿ ਜੇਟ੍ਠਮਾਸੇ ਕਿਰ ਘਮ੍ਮਸ੍ਸ ਬਲਵਭਾਵੇਨ ਹਿਮਵਨ੍ਤੇ ਹਿਮਂ ਵਿਲੀਯਿਤ੍ਵਾ ਸਨ੍ਦਿਤ੍ਵਾ ਅਨੁਕ੍ਕਮੇਨ ਰੋਹਿਣਿਂ ਨਦਿਂ ਪਵਿਸਤਿ, ਤਂ ਬਨ੍ਧਿਤ੍ਵਾ ਸਸ੍ਸਾਨਿ ਕਾਰੇਨ੍ਤਿ. ‘‘ਜਾਤਿਂ ਘਟ੍ਟੇਤ੍ਵਾ ਕਲਹਂ ਵਡ੍ਢਯਿਂਸੂ’’ਤਿ ਸਙ੍ਖੇਪੇਨ ਵੁਤ੍ਤਮਤ੍ਥਂ ਪਾਕਟਤਰਂ ਕਾਤੁਂ ‘‘ਕੋਲਿਯਕਮ੍ਮਕਰਾ ਵਦਨ੍ਤੀ’’ਤਿ ਆਹ. ਨਿਯੁਤ੍ਤਅਮਚ੍ਚਾਨਨ੍ਤਿ ਤਸ੍ਮਿਂ ਸਸ੍ਸਪਰਿਪਾਲਨਕਮ੍ਮੇ ਨਿਯੋਜਿਤਮਹਾਮਤ੍ਤਾਨਂ.

ਤੀਣਿ ਜਾਤਕਾਨੀਤਿ ‘‘ਕੁਠਾਰਿਹਤ੍ਥੋ ਪੁਰਿਸੋ’’ਤਿਆਦਿਨਾ ਫਨ੍ਦਨਜਾਤਕਂ (ਜਾ. ੧.੧੩.੧੪ ਆਦਯੋ) ‘‘ਦੁਦ੍ਦੁਭਾਯਤਿ ਭਦ੍ਦਨ੍ਤੇ’’ਤਿਆਦਿਨਾ ਦੁਦ੍ਦੁਭਜਾਤਕਂ, (ਜਾ. ੧.੪.੮੫ ਆਦਯੋ) ‘‘ਵਨ੍ਦਾਮਿ ਤਂ ਕੁਞ੍ਜਰਾ’’ਤਿਆਦਿਨਾ ਲਟੁਕਿਕਜਾਤਕਨ੍ਤਿ (ਜਾ. ੧.੫.੩੯ ਆਦਯੋ) ਇਮਾਨਿ ਤੀਣਿ ਜਾਤਕਾਨਿ. ਦ੍ਵੇ ਜਾਤਕਾਨੀਤਿ –

‘‘ਸਾਧੁ ਸਮ੍ਬਹੁਲਾ ਞਾਤੀ, ਅਪਿ ਰੁਕ੍ਖਾ ਅਰਞ੍ਞਜਾ;

ਵਾਤੋ ਵਹਤਿ ਏਕਟ੍ਠਂ, ਬ੍ਰਹਨ੍ਤਮ੍ਪਿ ਵਨਪ੍ਪਤਿ’’ਨ੍ਤਿ. –

ਆਦਿਨਾ ਰੁਕ੍ਖਧਮ੍ਮਜਾਤਕਂ (ਜਾ. ੧.੧.੭੪).

‘‘ਸਮ੍ਮੋਦਮਾਨਾ ਗਚ੍ਛਨ੍ਤਿ, ਜਾਲਮਾਦਾਯ ਪਕ੍ਖਿਨੋ;

ਯਦਾ ਤੇ ਵਿਵਦਿਸ੍ਸਨ੍ਤਿ, ਤਦਾ ਏਹਿਨ੍ਤਿ ਮੇ ਵਸ’’ਨ੍ਤਿ. (ਜਾ. ੧.੧.੩੩) –

ਆਦਿਨਾ ਸਮ੍ਮੋਦਮਾਨਜਾਤਕਨ੍ਤਿ ਇਮਾਨਿ ਦ੍ਵੇ ਜਾਤਕਾਨਿ.

‘‘ਅਤ੍ਤਦਣ੍ਡਾ ਭਯਂ ਜਾਤਂ, ਜਨਂ ਪਸ੍ਸਥ ਮੇਧਗਂ;

ਸਂਵੇਗਂ ਕਿਤ੍ਤਯਿਸ੍ਸਾਮਿ, ਯਥਾ ਸਂਵਿਜਿਤਂ ਮਯਾ’’ਤਿ. (ਸੁ. ਨਿ. ੯੪੧) –

ਆਦਿਨਾ ਅਤ੍ਤਦਣ੍ਡਸੁਤ੍ਤਂ.

ਤੇਨਾਤਿ ਭਗਵਤਾ. ਕਲਹਕਰਣਭਾਵੋਤਿ ਕਲਹਕਰਣਸ੍ਸ ਅਤ੍ਥਿਭਾਵੋ. ਮਹਾਪਥਵਿਯਾ ਮਹਗ੍ਘੇ ਖਤ੍ਤਿਯੇ ਕਸ੍ਮਾ ਨਾਸੇਥਾਤਿ ਦਸ੍ਸੇਤ੍ਵਾ ਕਲਹਂ ਵੂਪਸਮੇਤੁਕਾਮੋ ਭਗਵਾ ਪਥਵਿਂ ਨਿਦਸ੍ਸਨਭਾਵੇਨ ਗਣ੍ਹੀਤਿ ਦਸ੍ਸੇਨ੍ਤੋ ‘‘ਪਥਵੀ ਨਾਮ ਕਿਂ ਅਗ੍ਘਤੀ’’ਤਿਆਦਿਮਾਹ. ਅਟ੍ਠਾਨੇਤਿ ਅਕਾਰਣੇ. ਵੇਰਂ ਕਤ੍ਵਾਤਿ ਵਿਰੋਧਂ ਉਪ੍ਪਾਦੇਤ੍ਵਾ. ਤਂਤਂਪਲੋਭਨਕਿਰਿਯਾਯ ਪਰਕ੍ਕਮਨ੍ਤਿਯੋ ‘‘ਉਕ੍ਕਣ੍ਠਨ੍ਤੂ’’ਤਿ ਸਾਸਨਂ ਪੇਸੇਨ੍ਤਿ. ਕੁਣਾਲਦਹੇਤਿ ਕੁਣਾਲਦਹਤੀਰੇ ਪਤਿਟ੍ਠਾਯ. ਪੁਚ੍ਛਿਤਂ ਕਥੇਸਿ ਅਨੁਕ੍ਕਮੇਨ ਕੁਣਾਲਸਕੁਣਰਾਜਸ੍ਸ ਪੁਚ੍ਛਾਪਸਙ੍ਗੇਨ ਕੁਣਾਲਜਾਤਕਂ (ਜਾ. ੨.੨੧.ਕੁਣਾਲਜਾਤਕ) ਕਥੇਸ੍ਸਾਮੀਤਿ. ਅਨਭਿਰਤਿਂ ਵਿਨੋਦੇਸਿ ਇਤ੍ਥੀਨਂ ਦੋਸਦਸ੍ਸਨਮੁਖੇਨ ਕਾਮਾਨਂ ਆਦੀਨਵੋਕਾਰਸਂਕਿਲੇਸਵਿਭਾਵਨਵਸੇਨ. ਪੁਰਿਸਪੁਰਿਸੇਹੀਤਿ ਕੋਸਜ੍ਜਂ ਵਿਦ੍ਧਂਸੇਤ੍ਵਾ ਪੁਰਿਸਥਾਮਬ੍ਰੂਹਨੇਨ ਉਤ੍ਤਮਪੁਰਿਸੇਹਿ ਨੋ ਭਵਿਤੁਂ ਵਟ੍ਟਤੀਤਿ ਉਪ੍ਪਨ੍ਨਚਿਤ੍ਤਾ. ਅਵਿਸ੍ਸਟ੍ਠਸਮਣਕਮ੍ਮਨ੍ਤਾ ਅਪਰਿਚ੍ਚਤ੍ਤਕਮ੍ਮਟ੍ਠਾਨਾਭਿਯੋਗਾਤਿ ਅਤ੍ਥੋ. ਨਿਸੀਦਿਤੁਂ ਵਟ੍ਟਤੀਤਿ ਭਗਵਾ ਚਿਨ੍ਤੇਸੀਤਿ ਯੋਜਨਾ.

ਪਦੁਮਿਨਿਯਨ੍ਤਿ ਪਦੁਮਵਨੇ. ਵਿਕਸਿਂਸੁ ਗੁਣਗਣਵਿਬੋਧੇਨ. ਅਯਂਇਮਸ੍ਸ…ਪੇ… ਨ ਕਥੇਸੀਤਿ ਇਮਿਨਾ ਸਬ੍ਬੇਪਿ ਤੇ ਭਿਕ੍ਖੂ ਤਾਵਦੇਵ ਪਟਿਪਾਟਿਯਾ ਆਗਤਤ੍ਤਾ ਅਞ੍ਞਮਞ੍ਞਸ੍ਸ ਲਜ੍ਜਮਾਨਾ ਅਤ੍ਤਨਾ ਪਟਿਲਦ੍ਧਵਿਸੇਸਂ ਭਗਵਤੋ ਨਾਰੋਚੇਸੁਨ੍ਤਿ ਦਸ੍ਸੇਤਿ. ਖੀਣਾਸਵਾਨਨ੍ਤਿਆਦਿਨਾ ਤਤ੍ਥ ਕਾਰਣਮਾਹ.

ਓਸਟਮਤ੍ਤੇਤਿ ਭਗਵਤੋ ਸਨ੍ਤਿਕਂ ਉਪਗਤਮਤ੍ਤੇ. ਅਰਿਯਮਣ੍ਡਲੇਤਿ ਅਰਿਯਪੁਗ੍ਗਲਸਮੂਹੇ. ਪਾਚੀਨਯੁਗਨ੍ਧਰਪਰਿਕ੍ਖੇਪਤੋਤਿ ਯੁਗਨ੍ਧਰਪਬ੍ਬਤਸ੍ਸ ਪਾਚੀਨਪਰਿਕ੍ਖੇਪਤੋ, ਨ ਬਾਹਿਰਕੇਹਿ ਵੁਚ੍ਚਮਾਨਉਦਯਪਬ੍ਬਤਤੋ. ਰਾਮਣੇਯ੍ਯਕਦਸ੍ਸਨਤ੍ਥਨ੍ਤਿ ਬੁਦ੍ਧੁਪ੍ਪਾਦਪਟਿਮਣ੍ਡਿਤਤ੍ਤਾ ਵਿਸੇਸਤੋ ਰਮਣੀਯਸ੍ਸ ਲੋਕਸ੍ਸ ਰਮਣੀਯਭਾਵਦਸ੍ਸਨਤ੍ਥਂ. ਉਲ੍ਲਙ੍ਘਿਤ੍ਵਾਤਿ ਉਟ੍ਠਹਿਤ੍ਵਾ. ਏਵਰੂਪੇ ਖਣੇ ਲਯੇ ਮੁਹੁਤ੍ਤੇਤਿ ਯਥਾਵੁਤ੍ਤੇ ਚਨ੍ਦਮਣ੍ਡਲਸ੍ਸ ਉਟ੍ਠਿਤਕ੍ਖਣੇ ਉਟ੍ਠਿਤਵੇਲਾਯਂ ਉਟ੍ਠਿਤਮੁਹੁਤ੍ਤੇਤਿ ਉਪਰੂਪਰਿਕਾਲਸ੍ਸ ਵਡ੍ਢਿਤਭਾਵਦਸ੍ਸਨਤ੍ਥਂ ਵੁਤ੍ਤਂ.

ਤੇਸਂ ਭਿਕ੍ਖੂਨਂ ਜਾਤਿਆਦਿਵਸੇਨ ਭਗਵਤੋ ਅਨੁਰੂਪਪਰਿਵਾਰਭਾਵਂ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ਮਹਾਸਮ੍ਮਤਸ੍ਸ ਵਂਸੇ ਉਪ੍ਪਨ੍ਨੋਤਿਆਦਿ ਕੁਲਵਂਸਸੁਦ੍ਧਿਦਸ੍ਸਨਂ. ਖਤ੍ਤਿਯਗਬ੍ਭੇ ਜਾਤੋਤਿ ਇਦਂ ਸਤਿਪਿ ਜਾਤਿਵਿਸੁਦ੍ਧਿਯਂ ਮਾਤਾਪਿਤੂਨਂ ਵਸੇਨ ਅਵਿਸੁਦ੍ਧਤਾ ਸਿਯਾਤਿ ਤੇਸਮ੍ਪਿ ‘‘ਅਵਿਸੁਦ੍ਧਤਾ ਨਤ੍ਥਿ ਇਮੇਸ’’ਨ੍ਤਿ ਵਿਸੁਦ੍ਧਿਦਸ੍ਸਨਤ੍ਥਂ ਵੁਤ੍ਤਂ. ਸਤਿਪਿ ਚ ਗਬ੍ਭਵਿਸੁਦ੍ਧਿਯਂ ਕਤਦੋਸੇਨ ਮਿਸ੍ਸਕਤ੍ਤਾ ਅਰਜ੍ਜਾਰਹਤਾਪਿ ਸਿਯਾਤਿ ‘‘ਤਮ੍ਪਿ ਨਤ੍ਥਿ ਇਮੇਸ’’ਨ੍ਤਿ ਦਸ੍ਸਨਤ੍ਥਂ ‘‘ਰਾਜਪਬ੍ਬਜਿਤਾ’’ਤਿਆਦਿ ਵੁਤ੍ਤਂ.

ਸਾਮਨ੍ਤਾਤਿ ਸਮੀਪੇ. ਚਲਿਂਸੂਤਿ ਉਟ੍ਠਹਿਂਸੁ. ਕੋਸਮਤ੍ਤਂ ਠਾਨਂ ਸਦ੍ਦਨ੍ਤਰਂ, ‘‘ਸਦ੍ਦਸਵਨਟ੍ਠਾਨਮੇਵ ਸਦ੍ਦਨ੍ਤਰ’’ਨ੍ਤਿ ਅਪਰੇ. ਤਿਕ੍ਖਤ੍ਤੁਂ ਤੇਸਟ੍ਠਿਯਾ ਨਗਰਸਹਸ੍ਸੇਸੂਤਿ ਜਮ੍ਬੁਦੀਪੇ ਕਿਰ ਆਦਿਤੋ ਮਹਨ੍ਤਾਨਿ ਤੇਸਟ੍ਠਿ ਨਗਰਸਹਸ੍ਸਾਨਿ ਉਪ੍ਪਨ੍ਨਾਨਿ, ਤਥਾ ਦੁਤਿਯਂ, ਤਥਾ ਤਤਿਯਂ. ਤਂ ਸਨ੍ਧਾਯਾਹ ‘‘ਤਿਕ੍ਖਤ੍ਤੁਂ ਤੇਸਟ੍ਠਿਯਾ ਨਗਰਸਹਸ੍ਸੇਸੂ’’ਤਿ. ਤਾਨਿ ਪਨ ਸਮ੍ਪਿਣ੍ਡੇਤ੍ਵਾ ਸਤਸਹਸ੍ਸਤੋ ਪਰਂ ਨਵਸਹਸ੍ਸਾਧਿਕਾਨਿ ਅਸੀਤਿਸਹਸ੍ਸਾਨਿ. ਨਵਨਵੁਤਿਯਾ ਦੋਣਮੁਖਸਤਸਹਸ੍ਸੇਸੂਤਿ ਨਵਸਤਸਹਸ੍ਸਾਧਿਕੇਸੁ ਨਵੁਤਿਸਤਸਹਸ੍ਸੇਸੁ ਦੋਣਮੁਖੇਸੁ. ਦੋਣਮੁਖਨ੍ਤਿ ਚ ਮਹਾਨਗਰਸ੍ਸ ਆਯੁਪ੍ਪਤ੍ਤਿਟ੍ਠਾਨਭੂਤਂ ਪਾਦਨਗਰਂ ਵੁਚ੍ਚਤਿ. ਛਨਵੁਤਿਯਾ ਪਟ੍ਟਨਕੋਟਿਸਤਸਹਸ੍ਸੇਸੂਤਿ ਛਕੋਟਿਸਤਸਹਸ੍ਸਅਧਿਕੇਸੁ ਨਵੁਤਿਕੋਟਿਸਤਸਹਸ੍ਸਪਟ੍ਟਨੇਸੁ. ਤਮ੍ਬਪਣ੍ਣਿਦੀਪਾਦਿਛਪਣ੍ਣਾਸਾਯ ਰਤਨਾਕਰੇਸੁ. ਏਵਂ ਪਨ ਨਗਰ-ਦੋਣਮੁਖਪਟ੍ਟਨ-ਰਤਨਾਕਰਾਦਿਭਾਵੇਨ ਕਥਨਂ ਤਂਤਂਅਧਿਵਤ੍ਥਾਯ ਵਸਨ੍ਤੀਨਂ ਤਾਸਂ ਦੇਵਤਾਨਂ ਬਹੁਭਾਵਦਸ੍ਸਨਤ੍ਥਂ. ਯਦਿ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਨ੍ਨਿਪਤਿਤਾ. ਅਥ ਕਸ੍ਮਾ ਪਾਲ਼ਿਯਂ ‘‘ਦਸਹਿ ਚ ਲੋਕਧਾਤੂਹੀ’’ਤਿ? ਵੁਤ੍ਤਨ੍ਤਿ ਆਹ ‘‘ਦਸਸਹਸ੍ਸ…ਪੇ… ਅਧਿਪ੍ਪੇਤ’’ਨ੍ਤਿ. ਤੇਨ ਸਹਸ੍ਸਿਲੋਕਧਾਤੁ ਇਧ ‘‘ਏਕਾ ਲੋਕਧਾਤੂ’’ਤਿ ਵੇਦਿਤਬ੍ਬਾ.

ਲੋਹਪਾਸਾਦੇਤਿ ਸਬ੍ਬਪਠਮਕਤੇ ਲੋਹਪਾਸਾਦੇ. ਬ੍ਰਹ੍ਮਲੋਕੇਤਿ ਹੇਟ੍ਠਿਮੇ ਬ੍ਰਹ੍ਮਲੋਕੇ. ਯਦਿ ਤਾ ਦੇਵਤਾ ਏਵਂ ਨਿਰਨ੍ਤਰਾ ਹੁਤ੍ਵਾ ਸਨ੍ਨਿਪਤਿਤਾ, ਪਚ੍ਛਾ ਆਗਤਾਨਂ ਓਕਾਸੋ ਏਵ ਨ ਭਵੇਯ੍ਯਾਤਿ ਚੋਦਨਂ ਸਨ੍ਧਾਯਾਹ ‘‘ਯਥਾ ਖੋ ਪਨਾ’’ਤਿਆਦਿ.

ਸੁਦ੍ਧਾਵਾਸਕਾਯੇ ਉਪ੍ਪਨ੍ਨਾ ਸੁਦ੍ਧਾਵਾਸਕਾਯਿਕਾ. ਤਾਸਂ ਪਨ ਯਸ੍ਮਾ ਸੁਦ੍ਧਾਵਾਸਭੂਮਿ ਨਿਵਾਸਟ੍ਠਾਨਂ, ਤਸ੍ਮਾ ਵੁਤ੍ਤਂ ‘‘ਸੁਦ੍ਧਾਵਾਸਵਾਸੀਨ’’ਨ੍ਤਿ. ਆਵਾਸਾਤਿ ਆਵਾਸਟ੍ਠਾਨਭੂਤਾ. ਦੇਵਤਾ ਪਨ ਓਰਮ੍ਭਾਗਿਯਾਨਂ ਇਤਰੇਸਞ੍ਚ ਸਂਯੋਜਨਾਨਂ ਸਮੁਚ੍ਛਿਨ੍ਨਟ੍ਠੇਨ ਸੁਦ੍ਧੋ ਆਵਾਸੋ ਵਿਹਾਰੋ ਏਤੇਸਨ੍ਤਿ ਸੁਦ੍ਧਾਵਾਸਾ. ਮਹਾਸਮਾਗਮਂ ਞਤ੍ਵਾਤਿ ਮਹਾਸਮਾਗਮਂ ਗਤਾਤਿ ਞਤ੍ਵਾ.

ਪੁਰਤ੍ਥਿਮਚਕ੍ਕਵਾਲ਼ਮੁਖਵਟ੍ਟਿਯਂ ਓਤਰਿ ਅਞ੍ਞਤ੍ਥ ਓਕਾਸਂ ਅਲਭਮਾਨੋ. ਏਵਂ ਸੇਸਾਪਿ. ਮਣਿਵਮ੍ਮਨ੍ਤਿ ਇਨ੍ਦਨੀਲਮਣਿਮਯਂ ਕਵਚਂ. ਬੁਦ੍ਧਾਨਂ ਅਭਿਮੁਖਭਾਗੋ ਬੁਦ੍ਧਵੀਥਿ, ਸਾ ਯਾਵ ਚਕ੍ਕਵਾਲ਼ਾ ਉਤ੍ਤਰਿਤੁਂ ਨ ਸਕ੍ਕਾ. ਮਹਤਿਯਾ ਬੁਦ੍ਧਵੀਥਿਯਾਵਾਤਿ ਬੁਦ੍ਧਾਨਂ ਸਨ੍ਤਿਕਂ ਉਪਸਙ੍ਕਮਨ੍ਤੇਹਿ ਤੇਹਿ ਦੇਵਬ੍ਰਹ੍ਮੇਹਿ ਵਲਞ੍ਜਿਤਬੁਦ੍ਧਵੀਥਿਯਾਵ.

ਸਮਿਤਿ ਸਙ੍ਗਤਿ ਸਨ੍ਨਿਪਾਤੋ ਸਮਯੋ, ਮਹਨ੍ਤੋ ਸਮਯੋ ਮਹਾਸਮਯੋਤਿ ਆਹ ‘‘ਮਹਾਸਮੂਹੋ’’ਤਿ. ਪਵਦ੍ਧਂ ਵਨਂ ਪਵਨਨ੍ਤਿ ਆਹ ‘‘ਵਨਸਣ੍ਡੋ’’ਤਿ. ਦੇਵਘਟਾਤਿ ਦੇਵਸਮੂਹਾ. ਸਮਾਦਹਂਸੂਤਿ ਸਮਾਹਿਤਂ ਲੋਕੁਤ੍ਤਰਸਮਾਧਿਂ ਸੁਟ੍ਠੁ ਅਪ੍ਪਿਤਂ ਅਕਂਸੁ. ਤਥਾ ਸਮਾਹਿਤਂ ਪਨ ਸਮਾਧਿਨਾ ਨਿਯੋਜਿਤਂ ਨਾਮ ਹੋਤੀਤਿ ਵੁਤ੍ਤਂ ‘‘ਸਮਾਧਿਨਾ ਯੋਜੇਸੁ’’ਨ੍ਤਿ. ਸਬ੍ਬੇਸਂ ਗੋਮੁਤ੍ਤਵਙ੍ਕਾਦੀਨਂ ਦੂਰਸਮੁਸ੍ਸਾਰਿਤਤ੍ਤਾ ਅਤ੍ਤਨੋ…ਪੇ… ਅਕਰਿਂਸੁ. ਵਿਨਯਤਿ ਅਸ੍ਸੇ ਏਤੇਹੀਤਿ ਨੇਤ੍ਤਾਨਿ, ਯੋਤ੍ਤਾਨਿ. ਅਵੀਥਿਪਟਿਪਨ੍ਨਾਨਂ ਅਸ੍ਸਾਨਂ ਵੀਥਿਪਟਿਪਾਦਨਂ ਰਸ੍ਮਿਗ੍ਗਹਣੇਨ ਹੋਤੀਤਿ ‘‘ਯੋਤ੍ਤਾਨਿ ਗਹੇਤ੍ਵਾ ਅਚੋਦੇਨ੍ਤੋ’’ਤਿ ਵਤ੍ਵਾ ਤਂ ਪਨ ਅਚੋਦਨਂ ਅਵਾਰਣਮੇਵਾਤਿ ਆਹ ‘‘ਅਚੋਦੇਨ੍ਤੋ ਅਵਾਰੇਨ੍ਤੋ’’ਤਿ.

ਯਥਾ ਖੀਲਂ ਭਿਤ੍ਤਿਯਂ, ਭੂਮਿਯਂ ਵਾ ਆਕੋਟਿਤਂ ਦੁਨ੍ਨੀਹਰਣਂ, ਯਥਾ ਚ ਪਲਿਘਂ ਨਗਰਪ੍ਪਵੇਸਨਿਵਾਰਣਂ, ਯਥਾ ਚ ਇਨ੍ਦਖੀਲਂ ਗਮ੍ਭੀਰਨੇਮਿ ਸੁਨਿਖਾਤਂ ਦੁਨ੍ਨੀਹਰਣਂ, ਏਵਂ ਰਾਗਾਦਯੋ ਸਤ੍ਤਸਨ੍ਤਾਨਤੋ ਦੁਨ੍ਨੀਹਰਣਾ ਨਿਬ੍ਬਾਨਨਗਰਪ੍ਪਵੇਸਨਿਵਾਰਣਾ ਚਾਤਿ ਤੇ ‘‘ਖੀਲਂ ਪਲਿਘਂ ਇਨ੍ਦਖੀਲ’’ਨ੍ਤਿ ਚ ਵੁਤ੍ਤਾ. ਊਹਚ੍ਚਾਤਿ ਉਦ੍ਧਰਿਤ੍ਵਾ. ਤਣ੍ਹਾਏਜਾਯ ਅਭਾਵੇਨ ਅਨੇਜਾ. ਪਰਮਸਨ੍ਤੁਟ੍ਠਭਾਵੇਨ ਚਾਤੁਦ੍ਦਿਸਤ੍ਤਾ ਅਪ੍ਪਟਿਹਤਚਾਰਿਕਂ ਚਰਨ੍ਤਿ. ਬੁਦ੍ਧਚਕ੍ਖੁ-ਧਮ੍ਮਚਕ੍ਖੁ-ਦਿਬ੍ਬਚਕ੍ਖੁ-ਸਮਨ੍ਤਚਕ੍ਖੁ-ਪਕਤਿਚਕ੍ਖੂਨਂ ਵਸੇਨ ਪਞ੍ਚਹਿ ਚਕ੍ਖੂਹਿ. ਸੁਦਨ੍ਤਾ ਕੁਤੋਤਿ ਆਹ ‘‘ਚਕ੍ਖੁਤੋਪੀ’’ਤਿ. ਛਨ੍ਦਾਦੀਹੀਤਿ ਛਨ੍ਦਾਦੀਨਂ ਵਸੇਨ ਨ ਗਚ੍ਛਨ੍ਤਿ ਨ ਵਤ੍ਤਨ੍ਤਿ. ਨ ਆਗਚ੍ਛਨ੍ਤਿ ਅਨੁਪ੍ਪਾਦਨਤੋ. ਆਗੁਨ੍ਤਿ ਅਪਰਾਧਂ.

ਸਬ੍ਬਸਂਯੋਗਾਤਿ ਵਿਭਤ੍ਤਿਲੋਪੇਨ ਨਿਦ੍ਦੇਸੋ, ਸਬ੍ਬੇ ਸਂਯੋਗੇਤਿ ਅਤ੍ਥੋ. ਵਿਸਜ੍ਜਾਤਿ ਵਿਸਜ੍ਜਿਤ੍ਵਾ. ਏਵਮ੍ਪੀਤਿ ਇਮਾਯਪਿ ਗਾਥਾਯ ਵਸੇਨ ‘‘ਆਗੁਂ ਨ ਕਰੋਤੀ’’ਤਿ ਪਦੇ.

ਗਤਾਸੇਤਿ ਗਤਾ ਏਵ. ਨ ਗਮਿਸ੍ਸਨ੍ਤਿ ਪਰਿਨਿਟ੍ਠਿਤਸਰਣਗਮਨਤ੍ਤਾ. ਲੋਕੁਤ੍ਤਰਸਰਣਗਮਨਞ੍ਹੇਤ੍ਥ ਅਧਿਪ੍ਪੇਤਂ. ਤੇਨਾਹ ‘‘ਨਿਬ੍ਬੇਮਤਿਕਸਰਣਗਮਨੇਨ ਗਤਾ’’ਤਿ. ਤੇ ਹਿ ਨਿਯਮੇਨ ਅਪਾਯਂ ਨ ਗਮਿਸ੍ਸਨ੍ਤਿ, ਦੇਵਕਾਯਞ੍ਚ ਪਰਿਪੂਰੇਸ੍ਸਨ੍ਤਿ. ਯੇ ਪਨ ਲੋਕਿਯੇਨ ਸਰਣਗਮਨੇਨ ਬੁਦ੍ਧਂ ਸਰਣਂ ਗਤਾ, ਨ ਤੇ ਗਮਿਸ੍ਸਨ੍ਤਿ ਅਪਾਯਂ, ਸਤਿ ਚ ਪਚ੍ਚਯਨ੍ਤਰਸਮਵਾਯੇ ਪਹਾਯ ਮਾਨੁਸਂ ਦੇਹਂ ਦੇਵਕਾਯਂ ਪਰਿਪੂਰੇਸ੍ਸਨ੍ਤੀਤਿ. ਤੇਨਾਹ ਸੋ ਬ੍ਰਹ੍ਮਾ ‘‘ਯੇ ਕੇਚਿ ਬੁਦ੍ਧਂ…ਪੇ… ਪਰਿਪੂਰੇਸ੍ਸਨ੍ਤੀ’’ਤਿ.

ਸਮਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਸਕਲਿਕਸੁਤ੍ਤਵਣ੍ਣਨਾ

੩੮. ਤਨ੍ਤਿ ਉਯ੍ਯਾਨਂ ਸਙ੍ਖਂ ਗਤਨ੍ਤਿ ਸਮ੍ਬਨ੍ਧੋ. ਧਨੁਨਾ ਸਰੇਨ ਗਹਨ੍ਤਿ ਪੋਥਯਨ੍ਤਿ ਬਾਧੇਨ੍ਤੀਤਿ ਧਨੁਗ੍ਗਹਾ. ਤਂ ਸਮ੍ਪਟਿਚ੍ਛੀਤਿ ਤਸ੍ਸਾ ਸਿਲਾਯ ਹੇਟ੍ਠਾਭਾਗੇਨ ਉਗ੍ਗਨ੍ਤ੍ਵਾ ਸਮ੍ਪਟਿਚ੍ਛਿ. ਸਤ੍ਥੁ ਪੁਞ੍ਞਾਨੁਭਾਵੇਨ ਉਪਹਤਤ੍ਤਾ ਸਯਮ੍ਪਿ ਪਰਿਪਤਨ੍ਤੀ ਵਾਤਂ ਉਪਤ੍ਥਮ੍ਭੇਤਿ. ਅਭਿਹਨਿ ਸਤ੍ਥਾਰਾ ਅਨਾਵਜ੍ਜਿਤਤ੍ਤਾ. ਤਞ੍ਚ ਖੋ ਕਮ੍ਮਫਲਵਸੇਨਾਤਿ ਦਟ੍ਠਬ੍ਬਂ. ਤਤੋ ਏਵ ਤਤੋ ਪਟ੍ਠਾਯ ਭਗਵਤੋ ਅਫਾਸੁ ਜਾਤਨ੍ਤਿ ਏਤੇਨਪਿ ਉਪਾਦਿਣ੍ਣਕਸਰੀਰੇ ਨਾਮ ਅਨਿਟ੍ਠਾਪਿ ਸਮ੍ਫਸ੍ਸਕਾ ਪਤਨ੍ਤਿ ਏਵ ਤਥਾਰੂਪੇਨ ਕਮ੍ਮੁਨਾ ਕਤੋਕਾਸੇਤਿ ਦਸ੍ਸੇਤਿ. ਅਯਂ ਵਿਹਾਰੋਤਿ ਗਿਜ੍ਝਕੂਟਵਿਹਾਰੋ. ਉਜ੍ਜਙ੍ਗਲੋ ਨ ਕਤ੍ਤਬ੍ਬਪਰੋ. ਵਿਸਮੋਤਿ ਭੂਮਿਭਾਗਵਸੇਨ ਵਿਸਮੋ. ਸਿਵਿਕਾਕਾਰੇਨ ਸਜ੍ਜਿਤੋ ਮਞ੍ਚੋ ਏਵ ਮਞ੍ਚਸਿਵਿਕਾ.

ਭੁਸਾਤਿ ਦਲ਼੍ਹਾ. ਦੁਕ੍ਖਾਤਿ ਦੁਕ੍ਖਮਾ ਦੁਤ੍ਤਿਤਿਕ੍ਖਾ. ਖਰਾਤਿ ਕਕ੍ਕਸਾ. ਕਟੁਕਾਤਿ ਅਨਿਟ੍ਠਾ. ਅਸਾਤਾਤਿ ਨ ਸਾਤਾ ਅਪ੍ਪਿਯਾ. ਨ ਅਪ੍ਪੇਤੀਤਿ ਨ ਉਪੇਤਿ. ਨ ਅਪ੍ਪਾਯਨ੍ਤੀਤਿ ਨ ਖਮਨ੍ਤਿ. ਵੇਦਨਾਧਿਵਾਸਨਖਨ੍ਤਿਯਾ ਸਤਿਸਮ੍ਪਜਞ੍ਞਯੁਤ੍ਤਤ੍ਤਾ ਸਬ੍ਬਸਤ੍ਤਟ੍ਠਿਤਾਹਾਰਸਮੁਦਯਵਤ੍ਥੁਜਾਤਸ੍ਸ ਆਦੀਨਵਨਿਸ੍ਸਰਣਾਨਂ ਪਗੇਵ ਸੁਪ੍ਪਟਿਵਿਦਿਤਤ੍ਤਾ ਯਥਾ ਸਮੁਦਾਚਾਰੋ ਚਿਤ੍ਤਂ ਨਾਭਿਭਵਤਿ, ਏਵਂ ਸਮ੍ਮਦੇਵ ਉਪਟ੍ਠਾਪਿਤਸਤਿਸਮ੍ਪਜਞ੍ਞਤ੍ਤਾ ਵੁਤ੍ਤਂ ‘‘ਵੇਦਨਾਧਿਵਾਸਨ…ਪੇ… ਹੁਤ੍ਵਾ’’ਤਿ. ਅਪੀਲ਼ਿਯਮਾਨੋਤਿ ਅਬਾਧਿਯਮਾਨੋ. ਕਾਮਂ ਅਨਿਟ੍ਠਾਯ ਵੇਦਨਾਯ ਫੁਟ੍ਠੋ ਤਾਯ ਅਪੀਲ਼ਿਯਮਾਨੋ ਨਾਮ ਨਤ੍ਥਿ, ਪਰਿਞ੍ਞਾਤਵਤ੍ਥੁਕਤ੍ਤਾ ਪਨ ਤਸ੍ਸਾ ਵਸੇ ਅਵਤ੍ਤਮਾਨੋ ‘‘ਅਵਿਹਞ੍ਞਮਾਨੋ’’ਤਿ ਵੁਤ੍ਤੋ. ਤੇਨਾਹ ‘‘ਸਮ੍ਪਰਿਵਤ੍ਤਸਾਯਿਤਾਯ ਵੇਦਨਾਨਂ ਵਸਂ ਅਗਚ੍ਛਨ੍ਤੋ’’ਤਿ.

ਸੀਹਸੇਯ੍ਯਨ੍ਤਿ ਏਤ੍ਥ ਸਯਨਂ ਸੇਯ੍ਯਾ, ਸੀਹਸ੍ਸ ਵਿਯ ਸੇਯ੍ਯਾ ਸੀਹਸੇਯ੍ਯਾ, ਤਂ ਸੀਹਸੇਯ੍ਯਂ. ਅਥ ਵਾ ਸੀਹਸੇਯ੍ਯਨ੍ਤਿ ਸੇਟ੍ਠਸੇਯ੍ਯਂ ਉਤ੍ਤਮਸੇਯ੍ਯਂ. ਸ੍ਵਾਯਮਤ੍ਥੋ ਅਟ੍ਠਕਥਾਯਮੇਵ ਆਗਮਿਸ੍ਸਤਿ. ‘‘ਵਾਮੇਨ ਪਸ੍ਸੇਨ ਸੇਨ੍ਤੀ’’ਤਿ ਏਵਂ ਵੁਤ੍ਤਾ ਕਾਮਭੋਗਿਸੇਯ੍ਯਾ. ਦਕ੍ਖਿਣਪਸ੍ਸੇਨ ਸਯਾਨੋ ਨਾਮ ਨਤ੍ਥਿ ਦਕ੍ਖਿਣਹਤ੍ਥਸ੍ਸ ਸਰੀਰਗ੍ਗਹਣਾਦਿਯੋਗਕ੍ਖਮਤੋ. ਪੁਰਿਸਵਸੇਨ ਚੇਤਂ ਵੁਤ੍ਤਂ. ਏਕੇਨ ਪਸ੍ਸੇਨ ਸਯਿਤੁਂ ਨ ਸਕ੍ਕੋਨ੍ਤਿ ਦੁਕ੍ਖੁਪ੍ਪਤ੍ਤਿਤੋ. ਅਯਂ ਸੀਹਸੇਯ੍ਯਾਤਿ ਅਯਂ ਯਥਾਵੁਤ੍ਤਾ ਸੀਹਸੇਯ੍ਯਾ. ਤੇਜੁਸ੍ਸਦਤ੍ਤਾਤਿ ਇਮਿਨਾ ਸੀਹਸ੍ਸ ਅਭੀਤਭਾਵਂ ਦਸ੍ਸੇਤਿ. ਭੀਰੁਕਜਾਤਿਕਾ ਹਿ ਸੇਸਮਿਗਾ ਅਤ੍ਤਨੋ ਆਸਯਂ ਪਵਿਸਿਤ੍ਵਾ ਉਤ੍ਰਾਸਬਹੁਲਾ ਸਨ੍ਤਾਸਪੁਬ੍ਬਕਂ ਯਥਾ ਤਥਾ ਸਯਨ੍ਤਿ, ਸੀਹੋ ਪਨ ਅਭਿਰੁਕਭਾਵਤੋ ਸਤੋਕਾਰੀ ਭਿਕ੍ਖੁ ਵਿਯ ਸਤਿਂ ਉਪਟ੍ਠਪੇਤ੍ਵਾਵ ਸਯਤਿ. ਤੇਨਾਹ ‘‘ਦ੍ਵੇ ਪੁਰਿਮਪਾਦੇ’’ਤਿਆਦਿ. ਪੁਰਿਮਪਾਦੇਤਿ ਦਕ੍ਖਿਣਪੁਰਿਮਪਾਦੇ ਵਾਮਸ੍ਸ ਪੁਰਿਮਪਾਦਸ੍ਸ ਠਪਨਵਸੇਨ ਦ੍ਵੇ ਪੁਰਿਮਪਾਦੇ ਏਕਸ੍ਮਿਂ ਠਾਨੇ ਠਪੇਤ੍ਵਾ. ਪਚ੍ਛਿਮਪਾਦੇਤਿ ਦ੍ਵੇ ਪਚ੍ਛਿਮਪਾਦੇ. ਵੁਤ੍ਤਨਯੇਨੇਵ ਇਧਾਪਿ ਏਕਸ੍ਮਿਂ ਠਾਨੇ ਠਪਨਂ ਵੇਦਿਤਬ੍ਬਂ. ਠਿਤੋਕਾਸਸਲ੍ਲਕ੍ਖਣਂ ਅਭੀਰੁਕਭਾਵੇਨੇਵ. ਸੀਸਂ ਪਨ ਉਕ੍ਖਿਪਿਤ੍ਵਾਤਿਆਦਿਨਾ ਵੁਤ੍ਤਸੀਹਕਿਰਿਯਾ ਅਨੁਤ੍ਰਾਸਪਬੁਜ੍ਝਨਂ ਵਿਯ ਅਭੀਰੁਕਭਾਵਸਿਦ੍ਧਾ ਧਮ੍ਮਤਾਵਸੇਨੇਵਾਤਿ ਵੇਦਿਤਬ੍ਬਾ. ਸੀਹਵਿਜਮ੍ਭਿਤਵਿਜਮ੍ਭਨਂ ਅਤਿਵੇਲਂ ਏਕਾਕਾਰੇਨ ਠਪਿਤਾਨਂ ਸਰੀਰਾਵਯਵਾਨਂ ਗਮਨਾਦਿਕਿਰਿਯਾਸੁ ਯੋਗ੍ਗਭਾਵਾਪਾਦਨਤ੍ਥਂ. ਤਿਕ੍ਖਤ੍ਤੁਂ ਸੀਹਨਾਦਨਦਨਂ ਅਪ੍ਪੇਸਕ੍ਖਮਿਗਜਾਤਪਰਿਹਰਣਤ੍ਥਂ.

ਸੇਤਿ ਅਬ੍ਯਾਵਟਭਾਵੇਨ ਪਵਤ੍ਤਤਿ ਏਤ੍ਥਾਤਿ ਸੇਯ੍ਯਾ, ਚਤੁਤ੍ਥਜ੍ਝਾਨਮੇਵ ਸੇਯ੍ਯਾ ਚਤੁਤ੍ਥਜ੍ਝਾਨਸੇਯ੍ਯਾ. ਕਿਂ ਪਨੇਤ੍ਥ ਤਂ ਚਤੁਤ੍ਥਜ੍ਝਾਨਨ੍ਤਿ? ਆਨਾਪਾਨਚਤੁਤ੍ਥਜ੍ਝਾਨਂ. ਤਤੋ ਹਿ ਵੁਟ੍ਠਹਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਨੁਕ੍ਕਮੇਨ ਅਗ੍ਗਮਗ੍ਗਂ ਅਧਿਗਨ੍ਤ੍ਵਾ ਤਥਾਗਤੋ ਜਾਤੋਤਿ. ‘‘ਤਯਿਦਂ ਪਦਟ੍ਠਾਨਂ ਨਾਮ, ਨ ਸੇਯ੍ਯਾ, ਤਥਾਪਿ ਯਸ੍ਮਾ ‘ਚਤੁਤ੍ਥਜ੍ਝਾਨਾ ਵੁਟ੍ਠਹਿਤ੍ਵਾ ਸਮਨਨ੍ਤਰਂ ਭਗਵਾ ਪਰਿਨਿਬ੍ਬਾਯੀ’ਤਿ ਮਹਾਪਰਿਨਿਬ੍ਬਾਨੇ (ਦੀ. ਨਿ. ੨.੨੧੯) ਆਗਤਂ. ਤਸ੍ਮਾ ਲੋਕਿਯਚਤੁਤ੍ਥਜ੍ਝਾਨਸਮਾਪਤ੍ਤਿ ਏਵ ਤਥਾਗਤਸੇਯ੍ਯਾ’’ਤਿ ਕੇਚਿ. ਏਵਂ ਸਤਿ ਪਰਿਨਿਬ੍ਬਾਨਕਾਲਿਕਾਵ ਤਥਾਗਤਸੇਯ੍ਯਾਤਿ ਆਪਜ੍ਜਤਿ; ਨ ਚ ਤਥਾਗਤੋ ਲੋਕਿਯਚਤੁਤ੍ਥਜ੍ਝਾਨਸਮਾਪਜ੍ਜਨਬਹੁਲੋ ਵਿਹਾਸਿ. ਅਗ੍ਗਫਲਵਸੇਨ ਪਵਤ੍ਤਂ ਪਨੇਤ੍ਥ ਚਤੁਤ੍ਥਜ੍ਝਾਨਂ ਵੇਦਿਤਬ੍ਬਂ. ਤਤ੍ਥ ਯਥਾ ਸਤ੍ਤਾਨਂ ਨਿਦ੍ਦੁਪਗਮਲਕ੍ਖਣਾ ਸੇਯ੍ਯਾ ਭਵਙ੍ਗਚਿਤ੍ਤਵਸੇਨ ਹੋਤਿ, ਸਾ ਚ ਨੇਸਂ ਪਠਮਂ ਜਾਤਿਸਮਨ੍ਵਯਾ ਯੇਭੁਯ੍ਯਵੁਤ੍ਤਿਕਾ, ਏਵਂ ਭਗਵਤੋ ਅਰਿਯਜਾਤਿਸਮਨ੍ਵਯਂ ਯੇਭੁਯ੍ਯਵੁਤ੍ਤਿਕਂ ਅਗ੍ਗਫਲਭੂਤਂ ਚਤੁਤ੍ਥਜ੍ਝਾਨਂ ਤਥਾਗਤਸੇਯ੍ਯਾਤਿ ਵੇਦਿਤਬ੍ਬਾ. ਸੀਹਸੇਯ੍ਯਾ ਨਾਮ ਸੇਟ੍ਠਸੇਯ੍ਯਾਤਿ ਆਹ ‘‘ਉਤ੍ਤਮਸੇਯ੍ਯਾ’’ਤਿ.

‘‘ਕਾਲਪਰਿਚ੍ਛੇਦਂ ਕਤ੍ਵਾ ਯਥਾਪਰਿਚ੍ਛੇਦਂ ਉਟ੍ਠਹਿਸ੍ਸਾਮੀ’’ਤਿ ਏਵਂ ਤਦਾ ਮਨਸਿਕਾਰਸ੍ਸ ਅਕਤਤ੍ਤਾ ਪਾਲ਼ਿਯਂ ‘‘ਉਟ੍ਠਾਨਸਞ੍ਞਂ ਮਨਸਿਕਰਿਤ੍ਵਾ’’ਤਿ ਨ ਵੁਤ੍ਤਨ੍ਤਿ ਆਹ ‘‘ਉਟ੍ਠਾਨਸਞ੍ਞਨ੍ਤਿ ਪਨੇਤ੍ਥ ਨ ਵੁਤ੍ਤ’’ਨ੍ਤਿ. ਤਤ੍ਥ ਕਾਰਣਮਾਹ ‘‘ਗਿਲਾਨਸੇਯ੍ਯਾ ਹੇਸਾ’’ਤਿ. ਸਾ ਹਿ ਚਿਰਕਾਲਪ੍ਪਵਤ੍ਤਿਕਾ ਹੋਤਿ.

ਵਿਸੁਂ ਵਿਸੁਂ ਰਾਸਿਵਸੇਨ ਅਨਾਗਨ੍ਤ੍ਵਾ ਏਕਜ੍ਝਂ ਪੁਞ੍ਜਵਸੇਨ ਆਗਤਤ੍ਤਾ ਵੁਤ੍ਤਂ ‘‘ਸਬ੍ਬਾਪਿ ਤਾ’’ਤਿ. ਤੇਨਾਹ ‘‘ਸਤ੍ਤਸਤਾ’’ਤਿ. ਵਿਕਾਰਮਤ੍ਤਮ੍ਪੀਤਿ ਵੇਦਨਾਯ ਅਸਹਨਵਸੇਨ ਪਵਤ੍ਤਨਾਕਾਰਮਤ੍ਤਮ੍ਪਿ. ਸੁਸਮ੍ਮਟ੍ਠਕਞ੍ਚਨਂ ਵਿਯਾਤਿ ਸਮ੍ਮਟ੍ਠਸੁਸਜ੍ਜਿਤਸੁਵਣ੍ਣਂ ਵਿਯ.

ਧਮ੍ਮਾਲਪਨਨ੍ਤਿ ਅਸਙ੍ਖਾਰਿਕਸਮੁਪ੍ਪਨ੍ਨਸਭਾਵਾਲਪਨਂ. ਸਮੁਲ੍ਲਪਿਤਞ੍ਹਿ ਆਕਾਰਸਮਾਨਵਚਨਮੇਤਂ. ਨਾਗੋ ਵਿਯ ਵਾਤਿ ਪਵਤ੍ਤਤੀਤਿ ਨਾਗਵੋ. ਤਸ੍ਸ ਭਾਵੋ ਨਾਗਵਤਾ. ਵਿਭਤ੍ਤਿਲੋਪੇਨ ਹੇਸ ਨਿਦ੍ਦੇਸੋ, ਮਹਾਨਾਗਹਤ੍ਥਿਸਦਿਸਤਾਯਾਤਿ ਅਤ੍ਥੋ. ਬ੍ਯਤ੍ਤੁਪਰਿਚਰਣਟ੍ਠੇਨਾਤਿ ਬ੍ਯਤ੍ਤਂ ਉਪਰੂਪਰਿ ਅਤ੍ਤਨੋ ਕਿਰਿਯਾਚਰਣੇਨ. ਆਜਾਨੀਯੋਤਿ ਸਮ੍ਮਾਪਤਿਤਂ ਦੁਕ੍ਖਂ ਸਹਨ੍ਤੋ ਅਤ੍ਤਨਾ ਕਾਤਬ੍ਬਕਿਰਿਯਂ ਧੀਰੋ ਹੁਤ੍ਵਾ ਨਿਤ੍ਥਾਰਕੋ. ਕਾਰਣਾਕਾਰਣਜਾਨਨੇਨਾਤਿ ਨਿਯ੍ਯਾਨਿਕਾਨਿਯ੍ਯਾਨਿਕਕਰਣਞਾਤਤਾਯ. ਤੇਨੇਵਟ੍ਠੇਨਾਤਿ ਅਪ੍ਪਟਿਸਮਟ੍ਠੇਨੇਵ. ‘‘ਮੁਤ੍ਤੋ ਮੋਚੇਯ੍ਯ’’ਨ੍ਤਿਆਦਿ ਧੁਰਵਾਹਟ੍ਠੇਨ. ਨਿਬ੍ਬਿਸੇਵਨਟ੍ਠੇਨਾਤਿ ਰਾਗਾਦਿਵਿਸਵਿਗਤਭਾਵੇਨ.

ਅਨਿਯਮਿਤਾਣਤ੍ਤੀਤਿ ਅਨੁਦ੍ਦੇਸਿਕਂ ਆਣਾਪਨਂ. ਸਾਮਞ੍ਞਕਤੋਪਿ ਸਮਾਧਿਸਦ੍ਦੋ ਪਕਰਣਤੋ ਇਧ ਵਿਸੇਸਤ੍ਥੋਤਿ ਆਹ ‘‘ਸਮਾਧਿਨ੍ਤਿ ਅਰਹਤ੍ਤਫਲਸਮਾਧਿ’’ਨ੍ਤਿ. ਪਟਿਪ੍ਪਸ੍ਸਦ੍ਧਿਵਸੇਨ ਸਬ੍ਬਕਿਲੇਸੇਹਿ ਸੁਟ੍ਠੁ ਵਿਮੁਤ੍ਤਨ੍ਤਿ ਸੁਵਿਮੁਤ੍ਤਂ. ਅਭਿਨਤਂ ਨਾਮ ਆਰਮ੍ਮਣੇ ਅਭਿਮੁਖਭਾਵੇਨ ਪਵਤ੍ਤਿਯਾ. ਅਪਨਤਂ ਅਪਗਮਨਵਸੇਨ ਪਵਤ੍ਤਿਯਾ, ਵਿਮੁਖਤਾਯਾਤਿ ਅਤ੍ਥੋ. ਲੋਕਿਯਜ੍ਝਾਨਚਿਤ੍ਤਂ ਵਿਯ ਵਿਪਸ੍ਸਨਾ ਵਿਯ ਚ ਸਸਙ੍ਖਾਰੇਨ ਸਪ੍ਪਯੋਗੇਨ ਤਦਙ੍ਗਪ੍ਪਹਾਨਵਿਕ੍ਖਮ੍ਭਨਪਹਾਨਵਸੇਨ ਚ ਵਿਕ੍ਖਮ੍ਭੇਤ੍ਵਾ ਨ ਅਧਿਗਤਂ ਨ ਠਪਿਤਂ, ਕਿਞ੍ਚਰਹਿ ਕਿਲੇਸਾਨਂ ਸਬ੍ਬਸੋ ਛਿਨ੍ਨਤਾਯਾਤਿ ਆਹ ‘‘ਛਿਨ੍ਨਤ੍ਤਾ ਵਤਂ ਫਲਸਮਾਧਿਨਾ ਸਮਾਹਿਤ’’ਨ੍ਤਿ. ਅਤਿਕ੍ਕਮਿਤਬ੍ਬਨ੍ਤਿ ਆਚਾਰਾਤਿਕ੍ਕਮਵਸੇਨ ਲਙ੍ਘਿਤਬ੍ਬਂ. ਸਾ ਪਨ ਲਙ੍ਘਨਾ ਆਸਾਦਨਾ ਘਟ੍ਟਨਾਤਿ ਆਹ ‘‘ਘਟ੍ਟੇਤਬ੍ਬ’’ਨ੍ਤਿ.

ਪਞ੍ਚਵੇਦਾ ਨਾਮ – ਇਰੁਵੇਦੋ, ਯਜੁਵੇਦੋ, ਸਾਮਵੇਦੋ, ਆਥਬ੍ਬਣਵੇਦੋ, ਇਤਿਹਾਸੋ ਚਾਤਿ ਏਵਂ ਇਤਿਹਾਸਪਞ੍ਚਮਾਨਂ ਵੇਦਾਨਂ. ‘‘ਚਰ’’ਨ੍ਤਿ ਵਚਨਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਚਰਨ੍ਤਾ’’ਤਿ, ਤਪਨ੍ਤਾਤਿ ਅਤ੍ਥੋ. ਹੀਨਤ੍ਤਰੂਪਾਤਿ ਹੀਨਾਧਿਮੁਤ੍ਤਿਕਤਾਯ ਨਿਹੀਨਚਿਤ੍ਤਸਭਾਵਾ. ਵਿਮੁਤ੍ਤਿਕਤਾਯ ਅਭਾਵਤੋ ਨਿਬ੍ਬਾਨਙ੍ਗਮਾ ਨ ਹੋਨ੍ਤਿ. ਅਰਹਤ੍ਤਾਧਿਗਮਕਮ੍ਮਸ੍ਸ ਅਭਬ੍ਬਤਾਯ ਪਰਿਹੀਨਤ੍ਥਾ. ਅਜ੍ਝੋਤ੍ਥਟਾਤਿ ਅਭਿਭੂਤਾ. ਤਾਦਿਸੇਹੇਵ ਸੀਲੇਹੀਤਿ ਗੋਸੀਲਾਦੀਹਿ. ਬਦ੍ਧਾਤਿ ਸਮਾਦਪੇਤ੍ਵਾ ਪਵਤ੍ਤਨਵਸੇਨ ਅਨੁਬਦ੍ਧਾ. ਲੂਖਂ ਤਪਨ੍ਤਿ ਅਤ੍ਤਕਿਲਮਥਾਨੁਯੋਗਂ. ਤਂ ਪਨ ਏਕਦੇਸੇਨ ਦਸ੍ਸੇਨ੍ਤੋ ‘‘ਪਞ੍ਚਾਤਪਤਾਪਨ’’ਨ੍ਤਿਆਦਿਮਾਹ. ‘‘ਏਵਂ ਪਟਿਪਨ੍ਨਸ੍ਸ ਮੋਕ੍ਖੋ ਨਤ੍ਥਿ, ਏਵਂ ਪਟਿਪਨ੍ਨਸ੍ਸ ਵਟ੍ਟਤੋ ਮੁਤ੍ਤਿ ਅਤ੍ਥੀ’’ਤਿ ਵਦਨ੍ਤੀ ਸਾ ਅਤ੍ਤਤੋ ਸਾਸਨਸ੍ਸ ਨਿਯ੍ਯਾਨਭਾਵੋ ਕਥਿਤੋ ਨਾਮ ਹੋਤੀਤਿ ਆਹ ‘‘ਸਾਸਨਸ੍ਸ ਨਿਯ੍ਯਾਨਿਕਭਾਵਂ ਕਥੇਨ੍ਤੀ’’ਤਿ. ਆਦਿਨ੍ਤਿ ਗਾਥਾਦ੍ਵਯਂ.

ਸਕਲਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਪਠਮਪਜ੍ਜੁਨ੍ਨਧੀਤੁਸੁਤ੍ਤਵਣ੍ਣਨਾ

੩੯. ਚਾਤੁਮਹਾਰਾਜਿਕਸ੍ਸਾਤਿ ਚਾਤੁਮਹਾਰਾਜਿਕਕਾਯਿਕਸ੍ਸ. ਧਮ੍ਮੋ ਅਨੁਬੁਦ੍ਧੋਤਿ ਚਤੁਸਚ੍ਚਧਮ੍ਮੋ ਪਰਿਞ੍ਞੇਯ੍ਯਾਦਿਭਾਵਸ੍ਸ ਅਨੁਰੂਪਤੋ ਬੁਦ੍ਧੋ. ਪਚ੍ਚਕ੍ਖਮੇਵਾਤਿ ਪਰਪਤ੍ਤਿਯਾ ਅਹੁਤ੍ਵਾ ਅਤ੍ਤਪਚ੍ਚਕ੍ਖਮੇਵ ਕਤ੍ਵਾ ਜਾਨਾਮਿ. ਧਮ੍ਮਂ ਗਰਹਨ੍ਤਾ ਨਾਮ ਸਦ੍ਦਦੋਸਵਸੇਨ ਵਾ ਅਤ੍ਥਦੋਸਵਸੇਨ ਵਾ ਗਰਹੇਯ੍ਯੁਨ੍ਤਿ ਤਂ ਦਸ੍ਸੇਨ੍ਤੋ ‘‘ਹੀਨਕ੍ਖਰ…ਪੇ… ਕੋਤਿਵਾ’’ਤਿ ਆਹ. ਸਾ ਪਨ ‘‘ਤੇਸਂ ਵਿਗਰਹਾ ਦੁਮ੍ਮੇਧਤਾਯ ਮਹਾਨਤ੍ਥਾਵਹਾਵਾ’’ਤਿ ਦਸ੍ਸੇਨ੍ਤੀ ਦੇਵਤਾ ਆਹ ‘‘ਦੁਮ੍ਮੇਧਾ ਉਪੇਨ੍ਤਿ ਰੋਰੁਵ’’ਨ੍ਤਿ. ਵਿਸੁਂ ਹੋਤੀਤਿ ਅਵੀਚਿਮਹਾਨਿਰਯਤੋ ਵਿਸੁਂ ਏਵ ਹੋਤਿ. ਖਨ੍ਤਿਯਾਤਿ ਞਾਣਖਨ੍ਤਿਯਾ. ਉਪਸਮੇਨਾਤਿ ਰਾਗਾਦੀਨਂ ਸਬ੍ਬਸੋ ਵੂਪਸਮੇਨ. ਤੇਨਾਹ ‘‘ਰੁਚ੍ਚਿਤ੍ਵਾ’’ਤਿਆਦਿ.

ਪਠਮਪਜ੍ਜੁਨ੍ਨਧੀਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਦੁਤਿਯਪਜ੍ਜੁਨ੍ਨਧੀਤੁਸੁਤ੍ਤਵਣ੍ਣਨਾ

੪੦. ਬੁਦ੍ਧਞ੍ਚ ਧਮ੍ਮਞ੍ਚ ਨਮਸ੍ਸਮਾਨਾਤਿ ਬੁਦ੍ਧਸੁਬੁਦ੍ਧਤਂ ਧਮ੍ਮਸੁਧਮ੍ਮਤਞ੍ਚ ਞਤ੍ਵਾ ਤਦੁਭਯਂ ਨਮਸ੍ਸਮਾਨਾ. ਯਸ੍ਮਾ ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨੋ ਸਙ੍ਘੇ ਚ ਪਸਨ੍ਨੋ ਏਵ ਹੋਤਿ ਤਸ੍ਸ ਸੁਪ੍ਪਟਿਪਤ੍ਤਿਯਾ ਵਿਜਾਨਨਤੋ, ਤਸ੍ਮਾ ਸੋ ਅਤ੍ਥੋ ਗਾਥਾਯ ਚ-ਸਦ੍ਦਸਙ੍ਗਹਿਤੋਤਿ ਦਸ੍ਸੇਨ੍ਤੋ ‘‘ਚ-ਸਦ੍ਦੇਨ ਸਙ੍ਘਞ੍ਚਾ’’ਤਿ ਆਹ ਅਤ੍ਥਵਤਿਯੋਤਿ ਲੋਕਿਯਲੋਕੁਤ੍ਤਰਅਤ੍ਥਸਙ੍ਗਹਿਤਾ ਲੋਕਿਯਕੁਸਲਲੋਕੁਤ੍ਤਰਮਗ੍ਗਸਙ੍ਗਣ੍ਹਨਤੋ. ਯਂ ਧਮ੍ਮਂ ਸਾ ਅਭਾਸੀਤਿ ਯਂ ਤੁਮ੍ਹਾਕਂ ਧਮ੍ਮਂ ਪਟਿਵਿਜ੍ਝਿਤ੍ਵਾ ਠਿਤਾ, ਸਾ ਮਹਾਕੋਕਨਦਾ ਅਤ੍ਤਨੋ ਬਲਾਨੁਰੂਪਂ ਅਭਾਸਿ. ਬਹੁਨਾਤਿ ਨਾਨਪ੍ਪਕਾਰੇਨ. ਪਰਿਯਾਯੇਨਾਤਿ ਕਾਰਣੇਨ. ਤਾਦਿਸੋਤਿ ਤਥਾਰੂਪੋ ਤਥਾਪਟਿਵਿਦ੍ਧਸਚ੍ਚੋ ਅਤ੍ਥਧਮ੍ਮਾਦੀਸੁ ਕੁਸਲੋ ਏਕੇਕਂ ਪਦਮ੍ਪਿ ਉਦਾਹਰਣਹੇਤੁਨਿਗਮਨਾਨਿ ਨੀਹਰਨ੍ਤੋ ਆਚਿਕ੍ਖਤਿ ਦੇਸੇਤਿ ਪਞ੍ਞਪੇਤਿ ਪਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨੀਕਰੋਤਿ. ਤੇਨਾਹ ‘‘ਅਯਂ ਭਗਵਾ’’ਤਿਆਦਿ. ਏਤੇਨ ਅਤਿਵਿਯ ਵਿਤ੍ਥਾਰਕ੍ਖਮੋ ਸੁਗਤਧਮ੍ਮੋਤਿ ਦਸ੍ਸੇਤਿ. ਪਰਿਯਾਪੁਟਨ੍ਤਿ ਪਰਿਵਤ੍ਤਿਤਂ. ਏਵਂ ਵਿਤ੍ਥਾਰਕ੍ਖਮਂ ਧਮ੍ਮਂ ਯਸ੍ਮਾ ਦੇਵਧੀਤਾ ‘‘ਸਂਖਿਤ੍ਤਮਤ੍ਥਂ ਲਪਯਿਸ੍ਸਾਮੀ’’ਤਿ ਅਵੋਚ, ਤਸ੍ਮਾ ਵੁਤ੍ਤਂ ‘‘ਤਸ੍ਸਤ੍ਥ’’ਨ੍ਤਿਆਦਿ.

ਦੁਤਿਯਪਜ੍ਜੁਨ੍ਨਧੀਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਤੁਲ੍ਲਪਕਾਯਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.