੧੦. ਏਣਿਜਙ੍ਘਸੁਤ੍ਤਵਣ੍ਣਨਾ

੩੦. ਏਣਿਮਿਗਸ੍ਸ ਵਿਯਾਤਿ ਏਣਿਮਿਗਸ੍ਸ ਜਙ੍ਘਾ ਵਿਯ. ਅਵਯਵੀਸਮ੍ਬਨ੍ਧੇ ਹਿ ਇਦਂ ਸਾਮਿਵਚਨਂ. ਪਿਣ੍ਡਿਮਂਸਸ੍ਸ ਪਰਿਤੋ ਸਮਸਣ੍ਠਿਤਤ੍ਤਾ ਸੁਵਟ੍ਟੀਤਜਙ੍ਘੋ. ਕਿਸਨ੍ਤਿ ਥੂਲਭਾਵਪਟਿਕ੍ਖੇਪਪਰਾਜੋਤਨਾ, ਨ ਸੁਟ੍ਠੁ ਕਿਸਭਾਵਦੀਪਨਪਰਾਤਿ ਆਹ ‘‘ਅਥੂਲਂ ਸਮਸਰੀਰ’’ਨ੍ਤਿ. ਆਤਪੇਨ ਮਿਲਾਤਨ੍ਤਿ ਤਪਸਾ ਮਿਲਾਤਕਾਯਂ ਇਨ੍ਦ੍ਰਿਯਸਨ੍ਤਾਪਨਭਾਵਤੋ. ਤੇਨੇਵਾਹ – ‘‘ਤਪੋ ਮਿਲਾਤ’’ਨ੍ਤਿਆਦਿ, ਤਥਾ ਚਾਹ ਪਾਲ਼ਿਯਂ ‘‘ਅਪ੍ਪਾਹਾਰਂ ਅਲੋਲੁਪ’’ਨ੍ਤਿ. ਯਥਾ ‘‘ਵੀਰਸ੍ਸ ਭਾਵੋ ਵੀਰਿਯ’’ਨ੍ਤਿ ਵੀਰਭਾਵੇਨ ਵੀਰਿਯਂ ਲਕ੍ਖੀਯਤਿ, ਏਵਂ ਵੀਰਿਯਸਮ੍ਭਵੇਨ ਵੀਰਭਾਵੋਤਿ ਆਹ ‘‘ਵੀਰਨ੍ਤਿ ਵੀਰਿਯਵਨ੍ਤ’’ਨ੍ਤਿ. ‘‘ਚਤ੍ਤਾਰੋ ਪਞ੍ਚ ਆਲੋਪੇ, ਅਭੁਤ੍ਵਾ ਉਦਕਂ ਪਿਵੇ’’ਤਿ (ਥੇਰਗਾ. ੯੮੩; ਮਿ. ਪ. ੬.੫.੧੦) ਧਮ੍ਮਸੇਨਾਪਤਿਵੁਤ੍ਤਨਿਯਾਮੇਨ ਪਰਿਮਿਤਭੋਜਿਤਾਯ ਅਪ੍ਪਾਹਾਰਤਾ ਭੋਜਨੇ ਮਤ੍ਤਞ੍ਞੁਤਾ. ‘‘ਮਿਤਾਹਾਰ’’ਨ੍ਤਿ ਵਤ੍ਵਾ ਪੁਨ ਪਰਿਚ੍ਛਿਨ੍ਨਕਾਲਭੋਜਿਤਾਯਪਿ ਅਪ੍ਪਾਹਾਰਤਂ ਦਸ੍ਸੇਨ੍ਤੋ ‘‘ਵਿਕਾਲ…ਪੇ… ਪਰਿਤ੍ਤਾਹਾਰ’’ਨ੍ਤਿ ਆਹ. ਚਤੂਸੁ ਪਚ੍ਚਯੇਸੁ ਲੋਲੁਪ੍ਪਵਿਰਹਿਤਂ ਬੋਧਿਮੂਲੇ ਏਵ ਸਬ੍ਬਸੋ ਲੋਲੁਪ੍ਪਸ੍ਸ ਪਹੀਨਤ੍ਤਾ. ‘‘ਚਤੂਸੁ ਪਚ੍ਚਯੇਸੂ’’ਤਿ ਹਿ ਇਮਿਨਾਵ ਸਬ੍ਬਤ੍ਥ ਲੋਲੁਪ੍ਪਵਿਗਮੋ ਦੀਪਿਤੋਵਾਤਿ. ਰਸਤਣ੍ਹਾਪਟਿਕ੍ਖੇਪੋ ਵਾ ਏਸ ‘‘ਅਪ੍ਪਾਹਾਰ’’ਨ੍ਤਿ ਵਤ੍ਵਾ ‘‘ਅਲੋਲੁਪ’’ਨ੍ਤਿ ਵੁਤ੍ਤਤ੍ਤਾ. ‘‘ਸੀਹਂ ਵਾ’’ਤਿ ਏਤ੍ਥ ਏਕਚਰਸਦ੍ਦੋ ਵਿਯ ਇਵ-ਸਦ੍ਦੋ ਅਤ੍ਥਤੋ ‘‘ਨਾਗ’’ਨ੍ਤਿ ਏਤ੍ਥਾਪਿ ਆਨੇਤ੍ਵਾ, ਸਮ੍ਬਨ੍ਧਿਤਬ੍ਬੋਤਿ ਆਹ – ‘‘ਏਕਚਰਂ ਸੀਹਂ ਵਿਯ, ਏਕਚਰਂ ਨਾਗਂ ਵਿਯਾ’’ਤਿ. ਏਕਚਰਾ ਅਪ੍ਪਮਤ੍ਤਾ ਏਕੀਕਤਾਯ.

ਪਞ੍ਚਕਾਮਗੁਣਵਸੇਨ ਰੂਪਂ ਗਹਿਤਂ ਤੇਸਂ ਰੂਪਸਭਾਵਤ੍ਤਾ. ਮਨੇਨ ਨਾਮਂ ਗਹਿਤਂ ਮਨਸ੍ਸ ਨਾਮਸਭਾਵਤ੍ਤਾ. ਅਵਿਨਿਭੁਤ੍ਤਧਮ੍ਮੇਤਿ ਅਵਿਨਾਭਾਵਧਮ੍ਮੇ ਗਹੇਤ੍ਵਾ. ਆਦਿ-ਸਦ੍ਦੇਨ ਆਯਤਨਧਾਤੁਆਦਯੋ ਗਹਿਤਾ. ਕਾਮਗੁਣਗ੍ਗਹਣੇਨ ਹੇਤ੍ਥ ਰੂਪਭਾਵਸਾਮਞ੍ਞੇਨ ਪਞ੍ਚ ਵਤ੍ਥੂਨਿ ਗਹਿਤਾਨੇਵ ਹੋਨ੍ਤਿ, ਮਨੋਗਹਣੇਨ ਧਮ੍ਮਾਯਤਨਂ, ਏਵਂ ਦ੍ਵਾਦਸਾਯਤਨਾਨਿ ਗਹਿਤਾਨਿ ਹੋਨ੍ਤਿ. ਇਮਿਨਾ ਨਯੇਨ ਧਾਤੁਆਦੀਨਮ੍ਪਿ ਗਹਿਤਤਾ ਯੋਜੇਤਬ੍ਬਾ. ਤੇਨਾਹ ‘‘ਪਞ੍ਚਕ੍ਖਨ੍ਧਾਦਿਵਸੇਨਪੇਤ੍ਥ ਭੁਮ੍ਮਂ ਯੋਜੇਤਬ੍ਬ’’ਨ੍ਤਿ. ਏਤ੍ਥਾਤਿ ਪਾਲ਼ਿਯਂ. ਕਾਮਵਤ੍ਥੁ ਭੁਮ੍ਮਂ.

ਏਣਿਜਙ੍ਘਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਤ੍ਤਿਵਗ੍ਗਵਣ੍ਣਨਾ ਨਿਟ੍ਠਿਤਾ.