ਅਧਿਕਰਣਭੇਦਂ

ਉਕ੍ਕੋਟਨਭੇਦਾਦਿਵਣ੍ਣਨਾ

੩੪੦. ਅਧਿਕਰਣਭੇਦੇ ਏਵਮਤ੍ਥੋ ਵੇਦਿਤਬ੍ਬੋਤਿ ਯੋਜਨਾ. ਦਸ੍ਸੇਤੁਂ ਆਹਾਤਿ ਸਮ੍ਬਨ੍ਧੋ. ਦ੍ਵੇ ਸਮਥੇਤਿ ਏਤ੍ਥ ਦ੍ਵਿਨ੍ਨਂ ਸਮਥਾਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਸਮ੍ਮੁਖਾਵਿਨਯਞ੍ਚ ਯੇਭੁਯ੍ਯਸਿਕਞ੍ਚਾ’’ਤਿ. ‘‘ਪਟਿਸੇਧੇਤੀ’’ਤਿ ਇਮਿਨਾ ਉਕ੍ਕੋਟੇਤੀਤਿ ਏਤ੍ਥ ਕੁਟਧਾਤੁਯਾ ਛੇਦਨਤ੍ਥਂ ਅਤ੍ਥਤੋ ਦਸ੍ਸੇਤਿ. ਛੇਦਨਂ ਨਾਮ ਅਤ੍ਥਤੋ ਸਮਥਪਟਿਸੇਧਨਨ੍ਤਿ ਅਤ੍ਥੋ.

੩੪੧. ਦ੍ਵਾਦਸਸੁ ਉਕ੍ਕੋਟੇਸੂਤਿ ਨਿਦ੍ਧਾਰਣੇ ਭੁਮ੍ਮਂ. ਅਕਤਂ ਕਮ੍ਮਨ੍ਤਿਆਦਯੋਤਿ ਏਤ੍ਥ ਆਦਿਸਦ੍ਦੇਨ ‘‘ਦੁਕ੍ਕਟਂ ਕਮ੍ਮਂ, ਪੁਨ ਕਾਤਬ੍ਬਂ ਕਮ੍ਮ’’ਨ੍ਤਿ ਦ੍ਵੇ ਉਕ੍ਕੋਟਾ ਸਙ੍ਗਹੇਤਬ੍ਬਾ. ਅਨਿਹਤਂ ਕਮ੍ਮਨ੍ਤਿਆਦਯੋਤਿ ਏਤ੍ਥ ਆਦਿਸਦ੍ਦੇਨ ‘‘ਦੁਨ੍ਨਿਹਤਂ, ਪੁਨ ਨਿਹਨਿਤਬ੍ਬ’’ਨ੍ਤਿ ਦ੍ਵੇ ਉਕ੍ਕੋਟਾ ਸਙ੍ਗਹੇਤਬ੍ਬਾ. ਅਵਿਨਿਚ੍ਛਿਤਨ੍ਤਿਆਦਯੋਤਿ ਏਤ੍ਥ ਆਦਿਸਦ੍ਦੇਨ ‘‘ਦੁਵਿਨਿਚ੍ਛਿਤਂ, ਪੁਨ ਵਿਨਿਚ੍ਛਿਤਬ੍ਬ’’ਨ੍ਤਿ ਦ੍ਵੇ ਉਕ੍ਕੋਟਾ ਸਙ੍ਗਹੇਤਬ੍ਬਾ. ਅਵੂਪਸਨ੍ਤਨ੍ਤਿਆਦਯੋਤਿ ਏਤ੍ਥ ਆਦਿਸਦ੍ਦੇਨ ‘‘ਦੁਵੂਪਸਨ੍ਤਂ, ਪੁਨ ਵੂਪਸਮੇਤਬ੍ਬ’’ਨ੍ਤਿ ਦ੍ਵੇ ਉਕ੍ਕੋਟਾ ਸਙ੍ਗਹੇਤਬ੍ਬਾ. ਅਪਿਚਾਤਿ ਸਾਮਞ੍ਞਤੋ ਪਨ.

ਤਤ੍ਥ ਜਾਤਕਨ੍ਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਿਂਵਿਹਾਰੇ’’ਤਿ. ਯਸ੍ਮਿਂਵਿਹਾਰੇ ਉਪ੍ਪਨ੍ਨਂ ਹੋਤੀਤਿ ਸਮ੍ਬਨ੍ਧੋ. ਅਞ੍ਞਮਞ੍ਞਸ੍ਸ ਅਤ੍ਤੇਸੁ, ਅਤ੍ਤਾਨਂ ਵਾ ਪਟਿਪਕ੍ਖਂ ਅਤ੍ਥਯਨ੍ਤਿ ਇਚ੍ਛਨ੍ਤੀਤਿ ਅਤ੍ਤਪਚ੍ਚਤ੍ਥਿਕਾ. ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵਾਤਿ ਪਾਲ਼ਿਯਂ ਆਗਤੇਹਿ ਸਮਥੇਹਿ ਮੁਤ੍ਤਕੇਨ ਧਮ੍ਮਦੇਸਨਾਮਤ੍ਤਵਿਨਿਚ੍ਛਯੇਨੇਵ. ਇਦਨ੍ਤਿ ਅਧਿਕਰਣਂ. ਯੇਨਾਪਿ ਵਿਨਿਚ੍ਛਯੇਨਾਤਿ ਪਾਲ਼ਿਮੁਤ੍ਤਕੇਨ ਯੇਨਾਪਿ ਵਿਨਿਚ੍ਛਯੇਨ.

ਅਞ੍ਞੋਤਿ ਨੇਵਾਸਿਕੇਹਿ ਅਞ੍ਞੋ ਵਿਨਯਧਰੋ ਪੁਚ੍ਛਤੀਤਿ ਸਮ੍ਬਨ੍ਧੋ. ਤੇਹਿ ਚਾਤਿ ਨੇਵਾਸਿਕੇਹਿ ਚ.

ਏਤਸ੍ਸਾਤਿ ਵਿਨਯਧਰਸ੍ਸ. ਅਯਨ੍ਤਿ ਵਿਨਯਧਰੋ. ਤਤ੍ਥਾਤਿ ਤਂ ਗਾਮਂ. ਅਞ੍ਞਮਞ੍ਞਂ ਵਾ ਸਞ੍ਞਾਪੇਨ੍ਤੀਤਿ ਅਤ੍ਤਪਚ੍ਚਤ੍ਥਿਕਾ ਅਞ੍ਞਮਞ੍ਞਂ ਵਾ ਸਞ੍ਞਾਪੇਨ੍ਤਿ. ਤੇ ਭਿਕ੍ਖੂਤਿ ਤੇ ਅਤ੍ਤਪਚ੍ਚਤ੍ਥਿਕਾ ਭਿਕ੍ਖੂ. ਨਿਜ੍ਝਾਪੇਨ੍ਤੀਤਿ ਸਞ੍ਞਾਪੇਨ੍ਤਿ. ਉਕ੍ਕੋਟੇਤਿ ਯੋਤਿ ਯੋ ਉਕ੍ਕੋਟੇਤਿ. ਏਤੇਤਿ ਅਤ੍ਤਪਚ੍ਚਤ੍ਥਿਕੇ ਭਿਕ੍ਖੂ, ਦਿਸ੍ਵਾਤਿ ਸਮ੍ਬਨ੍ਧੋ. ਤਤ੍ਥਾਤਿ ਗਾਮਂ. ਤਤ੍ਥੇਵਾਤਿ ਅਨ੍ਤਰਾਮਗ੍ਗੇ ਏਵ.

ਤਤ੍ਥੇਵਾਤਿ ਗਾਮਮੇਵ. ਤਤ੍ਥੇਵਾਤਿ ਤਸ੍ਮਿਂਯੇਵ ਠਾਨੇ. ਤਤ੍ਥ ਗਤਨ੍ਤਿ ਤਂ ਗਾਮਂ ਗਤਂ.

‘‘ਏਸੇਵ ਨਯੋ’’ਤਿ ਇਮਿਨਾ ਪਾਚਿਤ੍ਤਿਯਮੇਵ ਅਤਿਦਿਸਤਿ.

ਸਙ੍ਘੇਨ…ਪੇ… ਅਧਿਕਰਣੇ ਵਦਨ੍ਤੋਪੀਤਿ ਸਮ੍ਬਨ੍ਧੋ. ਯਂ ਪਨੇਤਂ ਆਪਤ੍ਤਿਵੁਟ੍ਠਾਨਂ ਨਾਮ ਹੋਤੀਤਿ ਯੋਜਨਾ. ਏਤਨ੍ਤਿ ਆਪਤ੍ਤਿਵੁਟ੍ਠਾਨਂ. ਵਦਨ੍ਤੋਪੀਤਿ ਪਿਸਦ੍ਦੋ ਨ ਕੇਵਲਂ ਤਿਣਵਤ੍ਥਾਰਕਂ ਉਕ੍ਕੋਟੇਨ੍ਤੋਯੇਵ ਉਕ੍ਕੋਟੇਤਿ ਨਾਮ, ਅਥ ਖੋ ਵਦਨ੍ਤੋਪੀਤਿ ਦਸ੍ਸੇਤਿ.

ਛਨ੍ਦਾਗਤਿਂ ਗਚ੍ਛਨ੍ਤੋਤਿਆਦੀਸੁ ਅਗਤਿਗਮਨਾਕਾਰਂ ਦਸ੍ਸੇਨ੍ਤੋ ਆਹ ‘‘ਵਿਨਯਧਰੋ ਹੁਤ੍ਵਾ’’ਤਿਆਦਿ. ਅਤ੍ਥਾਯ ਉਕ੍ਕੋਟੇਨ੍ਤੋਤਿ ਸਮ੍ਬਨ੍ਧੋ. ਤਸ੍ਸਾਤਿ ਅਨਤ੍ਥਂ ਚਰਨ੍ਤਸ੍ਸ. ਮਨ੍ਦੋ ਪਨ ਉਕ੍ਕੋਟੇਤਿ ਨਾਮਾਤਿ ਸਮ੍ਬਨ੍ਧੋ. ਏਕੋ ਬਲਵਨਿਸ੍ਸਿਤੋ ਚ ਹੋਤੀਤਿ ਸਮ੍ਬਨ੍ਧੋ. ਗਹਨਮਿਚ੍ਛਾਦਿਟ੍ਠਿਨ੍ਤਿ ਗਹਨਸਦਿਸਂ ਮਿਚ੍ਛਾਦਿਟ੍ਠਿਂ ਪਵਨਸਦਿਸਂ ਮਿਚ੍ਛਾਦਿਟ੍ਠਿਨ੍ਤਿ ਅਤ੍ਥੋ. ਬਲਵਨ੍ਤੇ ਚਾਤਿ ਏਤ੍ਥ ਚਸਦ੍ਦੋ ਸਬ੍ਬਕਮ੍ਮੇਸੁ ਯੋਜੇਤਬ੍ਬੋ. ਨਿਸ੍ਸਿਤਤ੍ਤਾਤਿ ਏਕਸ੍ਸ ਨਿਸ੍ਸਿਤਤ੍ਤਾ. ਬਲਵਨਿਸ੍ਸਿਤੋ ਚਾਤਿ ਏਤ੍ਥਾਪਿ ਚ ਸਦ੍ਦੋ ਸਬ੍ਬਕਤ੍ਤੂਸੁ ਯੋਜੇਤਬ੍ਬੋ. ਤਸ੍ਸਾਤਿ ਵਿਸਮਾਦਿਨਿਸ੍ਸਿਤਸ੍ਸ.

ਸੋਤਿ ਸਾਮਣੇਰੋ. ਮਙ੍ਕੁਭੂਤਾਤ੍ਥਾਤਿ ਮਙ੍ਕੂ ਹੁਤ੍ਵਾ ਭੂਤਾ, ਮਙ੍ਕੁਂ ਵਾ ਪਤ੍ਤਾ ਅਤ੍ਥ ਭਵਥਾਤਿ ਅਤ੍ਥੋ. ਤੇਤਿ ਪਰਾਜਯਭਿਕ੍ਖੂ. ਤਸ੍ਸਾਤਿ ਸਾਮਣੇਰਸ੍ਸ. ਸੋਤਿ ਸਾਮਣੇਰੋ. ਤੇਤਿ ਪਰਾਜਯਭਿਕ੍ਖੂ. ਤਨ੍ਤਿ ਸਾਮਣੇਰਂ. ਸੋਤਿ ਦਹਰੋ. ਤਤੋਤਿ ਸਨ੍ਨਿਪਾਤਕਾਰਣਾ. ਹਿਯ੍ਯੋਤਿ ਅਨਨ੍ਤਰਾਤੀਤਾਹੇ. ਇਤੀਤਿ ਏਵਂ ਵਦੇਤਿ. ਸੋਤਿ ਦਹਰੋ. ਇਦਂ ਸਿਕ੍ਖਾਪਦਂ ਪਞ੍ਞਤ੍ਤਨ੍ਤਿ ਯੋਜਨਾ. ਗਚ੍ਛਾਤਿ ਗਚ੍ਛਾਹਿ. ਇਤੀਤਿ ਏਵਂ ਵਤ੍ਤਬ੍ਬੋਤਿ ਯੋਜਨਾ.

ਸਙ੍ਘੇਨ ਸਦ੍ਧਿਂ ਅਧਿਕਰਣਂ ਵਿਨਿਚ੍ਛਿਨਿਤ੍ਵਾ ਪਰਿਵੇਣਗਤਂ ਏਕਂ ਭਿਕ੍ਖੁਨ੍ਤਿ ਯੋਜਨਾ. ਕਿਸ੍ਸਾਤਿ ਕੇਨ ਕਾਰਣੇਨ. ਏਵਂ ਇਮਿਨਾਕਾਰੇਨ ਵਿਨਿਚ੍ਛਿਤਬ੍ਬਂ ਨਨੂਤਿ ਯੋਜਨਾ. ਸੋਤਿ ਵਿਨਿਚ੍ਛਯਕਾਰਕੋ ਭਿਕ੍ਖੁ. ਛਨ੍ਦਦਾਯਕੋ ਸੁਵਿਞ੍ਞੇਯ੍ਯੋਯੇਵ.

ਅਧਿਕਰਣਨਿਦਾਨਾਦਿਵਣ੍ਣਨਾ

੩੪੨. ਕਿਂਨਿਦਾਨਨ੍ਤਿਆਦੀਸੁ ਛਸੁ ਪਦੇਸੁ ਸਮਾਸਭਾਵਂ ਦਸ੍ਸੇਨ੍ਤੋ ਆਹ ‘‘ਕਿਂਨਿਦਾਨਮਸ੍ਸਾ’’ਤਿਆਦਿ. ਅਸ੍ਸਾਤਿ ਵਿਵਾਦਾਧਿਕਰਣਸ੍ਸ. ‘‘ਕਿਂਨਿਦਾਨ’’ਨ੍ਤਿ ਪਦਾਨਂ ਸਤਿਪਿ ਸਮਾਸਭਾਵੇ ਬ੍ਯਞ੍ਜਨਨ੍ਤਪਕਤਿਕਤ੍ਤਾ ‘‘ਕਿ’’ਨ੍ਤਿ ਨਿਗ੍ਗਹਿਤਨ੍ਤਭਾਵੇਨ ਉਚ੍ਚਾਰਣਂ ਕਾਤਬ੍ਬਂ. ਸਬ੍ਬਾਨੇਤਾਨੀਤਿ ਸਬ੍ਬਾਨਿ ਨਿਦਾਨਨ੍ਤਿਆਦੀਨਿ ਏਤਾਨਿ ਪਦਾਨਿ. ਵੇਵਚਨਾਨੀਤਿ ਏਕਸ੍ਮਿਂਯੇਵ ‘‘ਕਾਰਣ’’ਨ੍ਤਿ ਅਤ੍ਥੇ ਵਿਵਿਧਾਨਿ ਵਚਨਾਨਿ ਵਿਵਚਨਾਨਿ, ਤਾਨਿਯੇਵ ਵੇਵਚਨਾਨਿ. ਅਥ ਵਾ ਵਿਵਿਧਂ ਵਚਨਮੇਤਸ੍ਸਤ੍ਥਸ੍ਸਾਤਿ ਵਿਵਚਨਂ, ਕਾਰਣਸਙ੍ਖਾਤੋ ਅਤ੍ਥੋ, ਅਭਿਧੇਯ੍ਯਅਭਿਧਾਨਭਾਵੇਨ ਸਮ੍ਬਨ੍ਧਤ੍ਤਾ ਵਿਵਚਨਸ੍ਸ ਏਤਾਨਿ ਵੇਵਚਨਾਨਿ, ਪਦਾਨਿ.

‘‘ਅਟ੍ਠਾਰਸਭੇਦਕਰਵਤ੍ਥੁਸਙ੍ਖਾਤੋ’’ਤਿ ਇਮਿਨਾ ਵਿਵਾਦਸਰੂਪਂ ਦਸ੍ਸੇਤਿ. ਵਿਵਾਦਨ੍ਤਿ ਅਟ੍ਠਾਰਸਭੇਦਕਰਵਤ੍ਥੁਸਙ੍ਖਾਤਂ ਵਿਵਾਦਂ. ਏਤਨ੍ਤਿ ‘‘ਵਿਵਾਦਨਿਦਾਨ’’ਨ੍ਤਿ ਏਤਂ ਵਚਨਂ. ਅਸ੍ਸਾਤਿ ਅਨੁਵਾਦਾਧਿਕਰਣਸ੍ਸ. ਇਦਮ੍ਪੀਤਿ ‘‘ਅਨੁਵਾਦਨਿਦਾਨ’’ਨ੍ਤਿ ਵਚਨਮ੍ਪਿ. ਅਸ੍ਸਾਤਿ ਆਪਤ੍ਤਾਧਿਕਰਣਸ੍ਸ. ਏਤਨ੍ਤਿ ‘‘ਆਪਤ੍ਤਿਨਿਦਾਨ’’ਨ੍ਤਿ ਵਚਨਂ. ਕਿਚ੍ਚਮੇਵ ਬ੍ਯਞ੍ਜਨਵਡ੍ਢਨਵਸੇਨ ਕਿਚ੍ਚਯਨ੍ਤਿ ਵੁਤ੍ਤਂ. ਅਸ੍ਸਾਤਿ ਕਿਚ੍ਚਾਧਿਕਰਣਸ੍ਸ. ਸਮਨੁਭਾਸਨਾਦੀਨਂ ਉਪ੍ਪਜ੍ਜਨਕਕਿਚ੍ਚਾਨਨ੍ਤਿ ਸਮ੍ਬਨ੍ਧੋ. ਏਤਨ੍ਤਿ ‘‘ਕਿਚ੍ਚਯਨਿਦਾਨ’’ਨ੍ਤਿ ਵਚਨਂ. ਏਕਪਦਯੋਜਨਾਤਿ ਏਕੇਨ ‘‘ਨਿਦਾਨ’’ਨ੍ਤਿ ਪਦੇਨ ਯੋਜਨਾ. ਸਬ੍ਬਪਦਾਨੀਤਿ ਸਬ੍ਬਾਨਿ ਸਮੁਦਯਾਦੀਨਿ ਪਦਾਨਿ.

ਨਵਨ੍ਨਨ੍ਤਿ ਜਾਤਿਵਸੇਨ ਛਨ੍ਨਂ ਹੇਤੂਨਂ ਨਵਸੁ ਅਨ੍ਤੋਗਧਤ੍ਤਾ ਤਿਕਵਸੇਨੇਤਂ ਵੁਤ੍ਤਂ. ਬ੍ਯਞ੍ਜਨਮਤ੍ਤਨ੍ਤਿ ਹੇਤੁਪਚ੍ਚਯਵਸੇਨ ਬ੍ਯਞ੍ਜਨਮੇਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤ੍ਥਾਤਿ ਤਤਿਯਪੁਚ੍ਛਾਵਿਸ੍ਸਜ੍ਜਨੇ.

੩੪੩. ਦ੍ਵਾਦਸ ਮੂਲਾਨੀਤਿ ਏਤ੍ਥ ਦ੍ਵਾਦਸਨ੍ਨਂ ਮੂਲਾਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਕੋਧਉਪਨਾਹਯੁਗਲ਼ਕਾਦੀਨੀ’’ਤਿਆਦਿ. ਏਤ੍ਥ (ਵਿਭ. ੮੩੩, ੯੪੪) ਆਦਿਸਦ੍ਦੇਨ ਮਕ੍ਖਪਲ਼ਾਸਯੁਗਲ਼ ਇਸ੍ਸਾਮਚ੍ਛਰਿਯਯੁਗਲ਼ ਮਾਯਾਸਾਠੇਯ੍ਯਯੁਗਲ਼ ਪਾਪਿਚ੍ਛਮਿਚ੍ਛਾਦਿਟ੍ਠਿਯੁਗਲ਼ ਸਨ੍ਦਿਟ੍ਠਿਪਰਾਮਾਸਿਆਧਾਨਗ੍ਗਾਹਿਦੁਪ੍ਪਟਿਨਿਸ੍ਸਗ੍ਗਿਯੁਗਲ਼ਵਸੇਨ ਪਞ੍ਚ ਯੁਗਲ਼ਾਨਿ ਸਙ੍ਗਣ੍ਹਾਤਿ. ਅਜ੍ਝਤ੍ਤਸਨ੍ਤਾਨਪ੍ਪਵਤ੍ਤਾਨੀਤਿ ਨਿਯਕਜ੍ਝਤ੍ਤਸਨ੍ਤਾਨੇ ਪਵਤ੍ਤਾਨਿ.

ਅਟ੍ਠਾਰਸਭੇਦਕਰਵਤ੍ਥੂਨਂ ਸਮੁਟ੍ਠਾਨਭਾਵਂ ਨਿਬ੍ਬਚਨੇਨ ਪਕਾਸੇਨ੍ਤੋ ਆਹ ‘‘ਤਂ ਹੀ’’ਤਿਆਦਿ. ਤਨ੍ਤਿ ਅਨੁਵਾਦਾਧਿਕਰਣਂ, ਸਮੁਟ੍ਠਾਤੀਤਿ ਸਮ੍ਬਨ੍ਧੋ. ਏਤ੍ਥ ਚ ‘‘ਏਤੇਸੂ’’ਤਿ ਇਮਿਨਾ ਅਧਿਕਰਣਭਾਵਂ ਦਸ੍ਸੇਤਿ. ‘‘ਏਤੇਹੀ’’ਤਿ ਇਮਿਨਾ ਕਰਣਭਾਵਂ ਦਸ੍ਸੇਤਿ. ਤੇਨਾਤਿ ਕਾਰਣੇਨ. ਅਸ੍ਸਾਤਿ ਵਿਵਾਦਾਧਿਕਰਣਸ੍ਸ. ਏਤਾਨੀਤਿ ਅਟ੍ਠਾਰਸਭੇਦਕਰਵਤ੍ਥੂਨਿ. ਸਬ੍ਬਤ੍ਥਾਤਿ ਸਬ੍ਬੇਸਂ ਅਧਿਕਰਣਾਨਂ ਸਬ੍ਬੇਸੁ ਸਮੁਟ੍ਠਾਨੇਸੁ.

੩੪੪. ਏਕੇਨ ਅਧਿਕਰਣੇਨ ਕਿਚ੍ਚਾਧਿਕਰਣੇਨਾਤਿ ਇਦਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਤਾਨੀਤਿ ਅਧਿਕਰਣਾਨਿ. ਏਕਂਸਤੋਤਿ ਏਕਂਸੇਨ, ਏਕਕੋਟ੍ਠਾਸੇਨਾਤਿ ਅਤ੍ਥੋ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਸਾਵਸੇਸਾਪਤ੍ਤਿ ਸਮ੍ਮਤਿ ਵਿਯ ਅਨਵਸੇਸਾਪਤ੍ਤਿ ਨ ਸਮ੍ਮਤੀਤਿ ਯੋਜਨਾ. ਕਸ੍ਮਾ ਨ ਸਮ੍ਮਤੀਤਿ ਆਹ ‘‘ਨ ਹੀ’’ਤਿਆਦਿ. ਹੀਤਿ ਯਸ੍ਮਾ. ਸਾਤਿ ਅਨਵਸੇਸਾ ਆਪਤ੍ਤਿ. ਤਤੋਤਿ ਅਨਵਸੇਸਾਪਤ੍ਤਿਤੋ. ਏਤ੍ਥ ਚ ‘‘ਨ ਸਕ੍ਕਾ ਦੇਸੇਤੁ’’ਨ੍ਤਿ ਇਮਿਨਾ ਦੇਸਨਾਗਾਮਿਨਿਯਾ ਅਭਾਵਂ ਦੀਪੇਤਿ. ‘‘ਨ ਸਕ੍ਕਾ…ਪੇ… ਪਤਿਟ੍ਠਾਤੁ’’ਨ੍ਤਿ ਇਮਿਨਾ ਵੁਟ੍ਠਾਨਗਾਮਿਨਿਯਾ ਅਭਾਵਂ ਦੀਪੇਤਿ.

੩੪੯. ਤਤੋਤਿ ਨਯਤੋ. ਯਤ੍ਥ ਸਤਿਵਿਨਯੋਤਿਆਦਿਕਾ ਛ ਯਮਕਪੁਚ੍ਛਾਤਿ ਸਮ੍ਬਨ੍ਧੋ. ਤਾਸਨ੍ਤਿ ਪੁਚ੍ਛਾਨਂ. ਪਕਾਸਿਤੋਤਿ ਪਾਕਟੋ.

੩੫੧. ਦ੍ਵਿਨ੍ਨਮ੍ਪਿ ਸਮਥਾਨਨ੍ਤਿ ਸਮ੍ਮੁਖਾਵਿਨਯਸਤਿਵਿਨਯਵਸੇਨ ਦ੍ਵਿਨ੍ਨਮ੍ਪਿ ਸਮਥਾਨਂ. ਯਸ੍ਮਾਤਿ ਯੇਨ ਕਾਰਣੇਨ ਨ ਸਕ੍ਕਾਤਿ ਸਮ੍ਬਨ੍ਧੋ. ਪਤ੍ਤਵਟ੍ਟੀਨਂ ਨਾਨਾਕਰਣਨ੍ਤਿ ਸਮ੍ਬਨ੍ਧੋ. ਤੇਸਨ੍ਤਿ ਸਮ੍ਮੁਖਾਵਿਨਯਸਤਿਵਿਨਯਾਨਂ ਨਾਨਾਕਰਣਨ੍ਤਿ ਸਮ੍ਬਨ੍ਧੋ. ਅਯਂ ਪਨੇਤ੍ਥ ਯੋਜਨਾ – ਯਸ੍ਮਾ ਕਦਲਿਕ੍ਖਨ੍ਧੇ ਪਤ੍ਤਵਟ੍ਟੀਨਂ ਨਾਨਾਕਰਣਂ ਵਿਨਿਬ੍ਭੁਜ੍ਜਿਤ੍ਵਾ ਦਸ੍ਸੇਤੁਂ ਨ ਸਕ੍ਕਾ ਵਿਯ ਤੇਸਂ ਨਾਨਾਕਰਣਂ ਵਿਨਿਬ੍ਭੁਜ੍ਜਿਤ੍ਵਾ ਦਸ੍ਸੇਤੁਂ ਨ ਸਕ੍ਕਾਤਿ. ਤੇਨਾਤਿ ਕਾਰਣੇਨ. ਸਬ੍ਬਤ੍ਥਾਤਿ ਸਬ੍ਬੇਸੁ ਵਿਸ੍ਸਜ੍ਜਨੇਸੁ.

ਸਤ੍ਤਸਮਥਨਿਦਾਨਵਣ੍ਣਨਾ

੩੫੨. ਅਸ੍ਸਾਤਿ ਸਮ੍ਮੁਖਾਵਿਨਯਸ੍ਸ. ਤਤ੍ਥਾਤਿ ‘‘ਨਿਦਾਨਨਿਦਾਨੋ’’ਤਿ ਪਾਠੇ. ਇਦਨ੍ਤਿ ਸਮ੍ਮੁਖਾਚਤੁਕ੍ਕਂ. ਲਦ੍ਧੁਪਵਾਦੋਤਿ ਲਦ੍ਧੋ ਪਰੇਸਂ ਉਪਵਾਦੋ ਯੇਨਾਤਿ ਲਦ੍ਧੁਪਵਾਦੋ, ਖੀਣਾਸਵੋ. ਯਸ੍ਸ ਚਾਤਿ ਯਸ੍ਸ ਚ ਸਨ੍ਤਿਕੇਤਿ ਸਮ੍ਬਨ੍ਧੋ. ਉਭਿਨ੍ਨਨ੍ਤਿ ਦੇਸਕਪਟਿਗ੍ਗਾਹਕਾਨਂ ਦ੍ਵਿਨ੍ਨਂ.

੩੫੩. ਨਨੁ ਪੁਚ੍ਛਾਯਂ ‘‘ਸਤ੍ਤਨ੍ਨਂ ਸਮਥਾਨ’’ਨ੍ਤਿ ਵੁਤ੍ਤਂ, ਕਸ੍ਮਾ ਪਨ ਵਿਸ੍ਸਜ੍ਜਨਾਯਂ ਸਮ੍ਮੁਖਾਵਿਨਯਸ੍ਸ ਸਮੁਟ੍ਠਾਨਂ ਨ ਵੁਤ੍ਤਨ੍ਤਿ ਆਹ ‘‘ਕਿਞ੍ਚਾਪੀ’’ਤਿਆਦਿ. ਤਤ੍ਥ ਕਿਞ੍ਚਾਪਿ ਵੁਤ੍ਤਨ੍ਤਿ ਯੋਜਨਾ. ਏਤ੍ਥ ਕਿਞ੍ਚਾਪਿਸਦ੍ਦੋ ਸਮ੍ਭਾਵਨਤ੍ਥੋ, ਪਨਸਦ੍ਦੋ ਗਰਹਤ੍ਥੋ. ਤਥਾ ਵੁਤ੍ਤਮ੍ਪੀਤਿ ਯੋਜਨਾ. ਕਮ੍ਮਸਙ੍ਗਹਾਭਾਵੇਨਾਤਿ ਕਮ੍ਮੇ ਸਙ੍ਗਹਸ੍ਸ ਅਭਾਵੇਨ. ਤਤ੍ਥਾਤਿ ਤਸ੍ਮਿਂ ‘‘ਕਮ੍ਮਸ੍ਸ ਕਿਰਿਯਾ’’ਤਿਆਦਿਪਾਠੇ. ਕਮ੍ਮਂ ਕਰੀਯਤਿ ਇਮਾਯਾਤਿ ਕਿਰਿਯਾ, ਞਤ੍ਤਿ. ਤੇਨ ਵੁਤ੍ਤਂ ‘‘ਕਮ੍ਮਸ੍ਸ ਕਿਰਿਯਾਤਿ ਞਤ੍ਤਿ ਵੇਦਿਤਬ੍ਬਾ’’ਤਿ. ਕਰਿਯਤੇ ਠਪਿਯਤੇ ਕਰਣਂ. ਸਯਂ ਉਪਗਮਿਯਤੇ ਉਪਗਮਨਂ. ਅਜ੍ਝੇਸਨੇਨ ਪਰਂ ਉਪਗਮਾਪਿਯਤੇ ਅਜ੍ਝੁਪਗਮਨਂ. ਅਧਿਵਾਸਿਯਤੇ ਅਧਿਵਾਸਨਾ. ਅਪ੍ਪਟਿਕ੍ਕੋਸਿਯਤੇ ਅਪਟਿਕ੍ਕੋਸਨਾ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਕਰਣਨ੍ਤਿ ਤਸ੍ਸਾਯੇਵਾ’’ਤਿਆਦਿ. ਏਤਨ੍ਤਿ ਕਮ੍ਮਂ. ਮੇਤਿ ਮਯ੍ਹਂ. ਖਮੁਧਾਤੁਪਯੋਗੇ ਸਮ੍ਪਦਾਨਤ੍ਥੇ ਸਮ੍ਪਦਾਨਵਚਨਂ. ਅਥ ਵਾ ਮੇਤਿ ਮਯਾ. ਕਤ੍ਵਤ੍ਥੇ ਕਰਣਵਚਨਂ, ਸਾਮਿਵਚਨਂ ਵਾ. ਖਮਤੀਤਿ ਕਤ੍ਤੁਰੂਪਸਦਿਸਂ ਕਮ੍ਮਰੂਪਂ. ਰੂਪਞ੍ਹਿ ਕਤ੍ਤੁਰੂਪਸਦਿਸਂ ਕਮ੍ਮਰੂਪਂ ‘‘ਖਮਤਿ ਸਙ੍ਘਸ੍ਸਾ’’ਤਿਆਦੀਸੁ (ਮਹਾਵ. ੧੨੭) ਵਿਯ. ਕਮ੍ਮਰੂਪਸਦਿਸਂ ਕਤ੍ਤੁਰੂਪਂ ‘‘ਉਪਾਸਕੋ ਸੀਲਂ ਸਮਾਦਿਯਤੀ’’ਤਿਆਦੀਸੁ (ਪਟ੍ਠਾ. ੧.੧.੪੨੩) ਵਿਯ. ਏਤ੍ਥ ਕਮ੍ਮਤ੍ਥੇ ਪਵਤ੍ਤੋ ਯਪਚ੍ਚਯੋ ਲੋਪੋਤਿ ਦਟ੍ਠਬ੍ਬਂ.

ਸਤ੍ਤਸਮਥਨਾਨਾਤ੍ਥਾਦਿਵਣ੍ਣਨਾ

੩੫੪. ਮਾਤਾਪੁਤ੍ਤਾਦੀਨਂ ਅਯਂ ਵਿਵਾਦੋਤਿ ਯੋਜਨਾ. ‘‘ਵਿਰੁਦ੍ਧਵਾਦਤ੍ਤਾ’’ਤਿ ਇਮਿਨਾ ਵਦਨਂ ਵਾਦੋ, ਵਿਰੁਦ੍ਧੋ ਵਾਦੋ ਵਿਵਾਦੋਤਿ ਨਿਬ੍ਬਚਨਂ ਦਸ੍ਸੇਤਿ. ਅਧਿਕਰਣੀਯਤਾਯਾਤਿ ਵੂਪਸਮਿਤਤਾਯ. ਇਮਿਨਾ ਅਧਿਕਰਿਯਤਿ ਸਮਥੇਹਿ ਵੂਪਸਮਿਯਤੀਤਿ ਅਧਿਕਰਣਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਅਧਿਕਰਣਭੇਦੇਸੁ.

ਇਤਿ ਅਧਿਕਰਣਭੇਦਵਣ੍ਣਨਾਯ ਯੋਜਨਾ ਸਮਤ੍ਤਾ.