ਦੁਤਿਯਗਾਥਾਸਙ੍ਗਣਿਕਂ

ਚੋਦਨਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ

੩੫੯. ਦੁਤਿਯਗਾਥਾਸਙ੍ਗਣਿਯਂ ਚੋਦਨਾ ਨਾਮ ਕਿਂ ਦਸ੍ਸੇਤ੍ਵਾ ਚੋਦਨਾਤਿ ਆਹ ‘‘ਵਤ੍ਥੁਞ੍ਚ ਆਪਤ੍ਤਿਞ੍ਚ ਦਸ੍ਸੇਤ੍ਵਾ ਚੋਦਨਾ’’ਤਿ. ਦੋਸਂ ਸਰਾਪੇਤੀਤਿ ਦੋਸਸਾਰਣਾ. ਸਙ੍ਘਸਨ੍ਨਿਪਾਤੋਤਿ ਸਙ੍ਘਸ੍ਸ ਸਨ੍ਨਿਪਤਨਂ. ਇਮਿਨਾ ਸਙ੍ਘੋਤਿ ਏਤ੍ਥ ਉਤ੍ਤਰਪਦਲੋਪਂ ਦਸ੍ਸੇਤਿ. ਮਤਿਕਮ੍ਮਨ੍ਤਿ ਏਤ੍ਥ ਮਤਿਸਦ੍ਦੋ ਇਚ੍ਛਤ੍ਥੋਤਿ ਆਹ ‘‘ਵੁਚ੍ਚਤਿ ਮਨ੍ਤਗ੍ਗਹਣ’’ਨ੍ਤਿ. ਤਨ੍ਤਿ ਮਤਿਕਮ੍ਮਂ.

‘‘ਤੇਨ ਚੁਦਿਤਕਪੁਗ੍ਗਲੇਨਾ’’ਤਿ ਪਦਂ ‘‘ਸਾਰਣਤ੍ਥਾਯਾ’’ਤਿ ਪਦੇ ਕਾਰਿਤਕਮ੍ਮਂ. ਤਸ੍ਸ ਪੁਗ੍ਗਲਸ੍ਸਾਤਿ ਤਸ੍ਸ ਚੁਦਿਤਕਸ੍ਸ ਪੁਗ੍ਗਲਸ੍ਸ, ਇਮਿਨਾ ‘‘ਨਿਗ੍ਗਹਤ੍ਥਾਯਾ’’ਤਿ ਪਦਸ੍ਸ ਕਮ੍ਮਂ ਦਸ੍ਸੇਤਿ. ਤਤ੍ਥਾਤਿ ਤਸ੍ਮਿਂ ਅਧਿਕਰਣਵਿਨਿਚ੍ਛਯਟ੍ਠਾਨੇ. ਪਰਿਗ੍ਗਹਣਤ੍ਥਾਯਾਤਿ ਪਰਿ ਵੀਮਂਸਿਤ੍ਵਾ ਗਹਣਤ੍ਥਾਯ. ਧਮ੍ਮਾ-ਧਮ੍ਮਨ੍ਤਿ ਭੂਤਾਭੂਤਂ. ‘‘ਵਿਨਿਚ੍ਛਯਸਨ੍ਨਿਟ੍ਠਾਪਨਤ੍ਥ’’ਨ੍ਤਿ ਇਮਿਨਾ ਪਾਲ਼ਿਯਂ ਪਾਠਸੇਸਂ ਦਸ੍ਸੇਤਿ.

ਮਾ ਖੋ ਪਟਿਘਨ੍ਤਿ ਏਤ੍ਥ ਪਟਿਘਸਦ੍ਦੋ ਕੋਪਪਰਿਯਾਯੋਤਿ ਆਹ ‘‘ਕੋਪਂ ਮਾ ਜਨਯੀ’’ਤਿ. ‘‘ਚੁਦਿਤਕੇ ਵਾ ਚੋਦਕੇ ਵਾ’’ਤਿ ਇਮਿਨਾ ‘‘ਸਙ੍ਘੇ’’ਤਿ ਆਧਾਰਂ ਪਟਿਕ੍ਖਿਪਤਿ. ਸਚੇ ਅਨੁਵਿਜ੍ਜਕੋ ਤੁਵਨ੍ਤਿ ਏਤ੍ਥ ਅਨੁਵਿਜ੍ਜਕਸਦ੍ਦੋ ਵਿਨਯਧਰਪਰਿਯਾਯੋਤਿ ਆਹ ‘‘ਵਿਨਯਧਰੋ’’ਤਿ. ਵਿਨਯਧਰੋ ਹਿ ਯਸ੍ਮਾ ਚੋਦਕਚੁਦਿਤਕਾਨਂ ਵਚਨਂ ਅਨੁਮਿਨਿਤ੍ਵਾ ਵਤ੍ਥੁਆਪਤ੍ਤਾਦਿਵਸੇਨ ਵਿਦਤਿ, ਤਸ੍ਮਾ ਅਨੁਵਿਜ੍ਜਕੋਤਿ ਵੁਚ੍ਚਤਿ.

ਵਿਰੁਦ੍ਧਂ ਗਾਹਂ ਸਂਵਤ੍ਤੇਤੀਤਿ ਵਿਗ੍ਗਾਹਿਕਂ. ‘‘ਨ ਤ੍ਵ’’ਨ੍ਤਿਆਦਿਨਾ ਣਿਕਪਚ੍ਚਯਸ੍ਸ ਸਰੂਪਂ ਦਸ੍ਸੇਤਿ. ਯਾਯਾਤਿ ਕਥਾਯ. ਸੁਤ੍ਤਾਦੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਸੁਤ੍ਤਂ ਨਾਮਾ’’ਤਿਆਦਿ.

ਅਨੁਯੁਞ੍ਜਨਵਤ੍ਤਨ੍ਤਿ ਅਨੁਯੁਞ੍ਜਨਸ੍ਸ, ਅਨੁਯੁਞ੍ਜਨੇ ਵਾ ਵਤ੍ਤਂ. ਕੁਸਲੇਨ ਬੁਦ੍ਧਿਮਤਾਤਿ ਏਤ੍ਥ ਕੁਸਲਸਦ੍ਦੋ ਛੇਕਪਰਿਯਾਯੋ, ਬੁਦ੍ਧਿਮਨ੍ਤੁਸਦ੍ਦੋ ਪਣ੍ਡਿਤਪਰਿਯਾਯੋਤਿ ਆਹ ‘‘ਛੇਕੇਨ ਪਣ੍ਡਿਤੇਨਾ’’ਤਿ. ‘‘ਞਾਣਪਾਰਮਿਪ੍ਪਤ੍ਤੇਨਾ’’ਤਿ ਇਮਿਨਾ ਬੁਦ੍ਧਿਮਤਾਤਿ ਏਤ੍ਥ ਨ ਕੇਵਲਂ ਞਾਣਸਾਮਞ੍ਞਂ, ਅਥ ਖੋ ਸਬ੍ਬਞ੍ਞੁਤਞ੍ਞਾਣਨ੍ਤਿ ਦਸ੍ਸੇਤਿ. ਅਯਨ੍ਤਿ ਏਸੋ ਯਥਾਵੁਤ੍ਤੋ ਅਤ੍ਥੋ. ਅਯਂ ਪਨਾਤਿ ਏਸੋ ਵਕ੍ਖਮਾਨੋ ਪਨ. ਏਤ੍ਥਾਤਿ ਇਮਾਸੁ ਗਾਥਾਸੁ. ਸਚੇ ਤ੍ਵਂ ਅਨੁਵਿਜ੍ਜਕੋ ਹੋਸੀਤਿ ਯੋਜਨਾ. ਯਂ ਪਨ ਅਨੁਯੋਗਵਤ੍ਤਂ ਕਤਂ ਸੁਪਞ੍ਞਤ੍ਤਂ ਸਬ੍ਬਸਿਕ੍ਖਾਪਦਾਨਂ ਅਨੁਲੋਮਨ੍ਤਿ ਯੋਜਨਾ. ਤਨ੍ਤਿ ਅਨੁਯੋਗਵਤ੍ਤਂ. ਇਤੀਤਿ ਅਯਂ ਸਾਧਿਪ੍ਪਾਯਸਙ੍ਖੇਪਵਣ੍ਣਨਾ. ਅਤ੍ਤਨੋਤਿ ਅਨੁਵਿਜ੍ਜਕਸ੍ਸ. ਸਮ੍ਪਰਾਯੇਤਿ ਪਰਲੋਕੇ. ਯੋਤਿ ਅਨੁਵਿਜ੍ਜਕੋ. ਤਨ੍ਤਿ ਅਨੁਯੋਗਵਤ੍ਤਂ. ਗਤਿਨ੍ਤਿ ਸੁਗਤਿਂ. ਹਿਤਨ੍ਤਿ ਚੋਦਕਚੁਦਿਤਕਾਨਂ ਹਿਤਂ. ਗਵੇਸਨ੍ਤੋਤਿ ਞਾਣੇਨ ਏਸਨ੍ਤੋ. ਇਮਿਨਾ ਹਿਤਂ ਏਸਨ੍ਤੋਤਿ ਹਿਤੇਸੀਤਿ ਵਚਨਤ੍ਥਂ ਦਸ੍ਸੇਤਿ. ਮੇਤ੍ਤਞ੍ਚਾਤਿ ਅਪ੍ਪਨਾਪਤ੍ਤਂ ਮੇਤ੍ਤਞ੍ਚ. ਮੇਤ੍ਤਾਪੁਬ੍ਬਭਾਗਞ੍ਚਾਤਿ ਅਪ੍ਪਨਾਮੇਤ੍ਤਾਯ ਪੁਬ੍ਬਭਾਗੇ ਪਵਤ੍ਤਂ ਪਰਿਕਮ੍ਮਉਪਚਾਰਮੇਤ੍ਤਞ੍ਚ. ਤਵ ਭਾਰੇ ਸਙ੍ਘੇਨ ਕਤੇ ਏਵਾਤਿ ਯੋਜਨਾ.

ਯੋਤਿ ਅਨੁਵਿਜ੍ਜਕੋ. ਏਤੇਸਨ੍ਤਿ ਚੋਦਕਚੁਦਿਤਕਾਨਂ. ‘‘ਭਾਸਿਤ’’ਨ੍ਤਿ ਇਮਿਨਾ ਵੋਹਾਰਸਦ੍ਦੋ ਭਾਸਿਤਪਰਿਯਾਯੋਤਿ ਦਸ੍ਸੇਤਿ. ਤਨ੍ਤਿ ਸਹਸਾ ਵੋਹਾਰਂ.

ਅਨੁਸਨ੍ਧਿਤਨ੍ਤਿ ਏਤ੍ਥ ਵਿਨਿਚ੍ਛਯਾਨੁਸਨ੍ਧਿਂ ਪਟਿਕ੍ਖਿਪਨ੍ਤੋ ਆਹ ‘‘ਕਥਾਨੁਸਨ੍ਧਿ ਵੁਚ੍ਚਤੀ’’ਤਿ. ਕਥਾਯ ਅਨੁਰੂਪਂ ਸਨ੍ਦਹਨਂ ਕਥਾਨੁਸਨ੍ਧਿ. ਪਟਿਞ੍ਞਾਨੁਸਨ੍ਧਿਤੇਨਾਤਿ ਏਤ੍ਥ ਪਟਿਞ੍ਞਾਸਦ੍ਦਅਨੁਸਨ੍ਧਿਸਦ੍ਦਾਨਂ ਤੁਲ੍ਯਾਧਿਕਰਣਤੋ ਅਞ੍ਞਂ ਭਿਨ੍ਨਾਧਿਕਰਣਂ ਦਸ੍ਸੇਨ੍ਤੋ ਆਹ ‘‘ਅਥਵਾ’’ਤਿਆਦਿ. ਲਜ੍ਜਿਂ ਪੁਗ੍ਗਲਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਗਾਥਾਯਂ. ਵਤ੍ਤਾਨੁਸਨ੍ਧਿਨਾਤਿ ਆਚਾਰਸਙ੍ਖਾਤੇਨ ਵਤ੍ਤੇਨ ਅਨੁਸਨ੍ਧਿਨਾ ਅਸ੍ਸ ਅਲਜ੍ਜੀਸ੍ਸ ਵਤ੍ਤੇਨ ਸਦ੍ਧਿਂ ਯਾ ਪਟਿਞ੍ਞਾ ਸਨ੍ਧਿਯਤੀਤਿ ਯੋਜਨਾ.

ਜਾਨਨ੍ਤੋ ਆਪਜ੍ਜਤੀਤਿ ਜਾਨਨ੍ਤੋ ਹੁਤ੍ਵਾ ਆਪਜ੍ਜਤਿ. ਇਮਿਨਾ ਸਞ੍ਚਿਚ੍ਚਾਤਿ ਪਦਸ੍ਸ ਸਞ੍ਚੇਤੇਤ੍ਵਾਤਿ ਅਤ੍ਥਂ ਦਸ੍ਸੇਤਿ. ਵੀਤਿਕ੍ਕਮਚੇਤਨਾਯ ਸਦ੍ਧਿਂ ਚੇਤੇਤ੍ਵਾਤਿ ਅਤ੍ਥੋ. ‘‘ਨ ਦੇਸੇਤਿ ਨ ਵੁਟ੍ਠਾਤੀ’’ਤਿ ਇਮਿਨਾ ਪਰਿਗੂਹਤੀਤਿ ਏਤ੍ਥ ਪਰਿਗੂਹਨਂ ਨਾਮ ਅਤ੍ਥਤੋ ਨ ਦੇਸਨਂ ਨ ਵੁਟ੍ਠਾਨਨ੍ਤਿ ਦਸ੍ਸੇਤਿ.

ਯਨ੍ਤਿ ‘‘ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤੀ’’ਤਿ ਵਚਨਂ. ਤੁਮ੍ਹੇਹੀਤਿ ਪਰਿਹਾਰਕਾਰਕੇਹਿ. ਸਚ੍ਚਨ੍ਤਿ ਤਥਂ ਅਵਿਤਥਂ. ਅਹਮ੍ਪੀਤਿ ਚੋਦਕੋਪਿ. ਪਿਸਦ੍ਦੇਨ ਪਰਿਹਾਰਕਂ ਸਮ੍ਪਿਣ੍ਡੇਤਿ. ਨਨ੍ਤਿ ‘‘ਸਞ੍ਚਿਚ੍ਚਾ’’ਤਿਆਦਿਵਚਨਂ. ਤਨ੍ਤਿ ਤੁਵਂ, ਤ੍ਵਂ ਵਾ.

ਪੁਬ੍ਬਾਪਰਨ੍ਤਿ ਏਤ੍ਥ ਪੁਬ੍ਬੇ ਕਥੇਤਬ੍ਬਂ ਪੁਬ੍ਬਂ, ਅਪਰਮ੍ਹਿ ਕਥੇਤਬ੍ਬਂ ਅਪਰਂ, ਪੁਬ੍ਬਞ੍ਚ ਅਪਰਞ੍ਚ ਪੁਬ੍ਬਾਪਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਪੁਰੇ’’ਤਿਆਦਿ. ‘‘ਤਸ੍ਮਿਂ ਪੁਬ੍ਬਾਪਰੇ’’ਤਿ ਇਮਿਨਾ ਪਾਲ਼ਿਯਂ ਪੁਬ੍ਬਪਰਸ੍ਸਾਤਿ ਏਤ੍ਥ ਭੁਮ੍ਮਤ੍ਥੇ ਸਾਮਿਵਚਨਨ੍ਤਿ ਦਸ੍ਸੇਤਿ.

ਦ੍ਵੀਹੀਤਿ ਪਾਰਾਜਿਕਸਙ੍ਘਾਦਿਸੇਸਵਸੇਨ ਦ੍ਵੀਹਿ. ਪਞ੍ਚਹੀਤਿ ਥੁਲ੍ਲਚ੍ਚਯਾਦਿਵਸੇਨ ਪਞ੍ਚਹਿ. ਮਿਚ੍ਛਾਦਿਟ੍ਠਿਯਾਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਾ (ਧ. ਸ. ੧੨੨੧) ਦਸਵਤ੍ਥੁਕਾਯ ਮਿਚ੍ਛਾਦਿਟ੍ਠਿਯਾ. ਅਨ੍ਤਗ੍ਗਾਹਿਕਦਿਟ੍ਠਿਯਾਤਿ ‘‘ਸਸ੍ਸਤੋ ਲੋਕੋ’’ਤਿਆਦਿਨਾ (ਦੀ. ਨਿ. ੧.੩੧; ਮ. ਨਿ. ੧.੨੬੯) ਦਸਵਤ੍ਥੁਕਾਯ ਅਨ੍ਤਗ੍ਗਾਹਿਕਦਿਟ੍ਠਿਯਾ. ਸਬ੍ਬਤ੍ਥਾਤਿ ਸਬ੍ਬੇਸੁ ਦੁਤਿਯਗਾਥਾਸਙ੍ਗਣਿਕੇਸੁ.

ਇਤਿ ਦੁਤਿਯਗਾਥਾਸਙ੍ਗਣਿਕਵਣ੍ਣਨਾਯ ਯੋਜਨਾ ਸਮਤ੍ਤਾ.