ਚੋਦਨਾਕਣ੍ਡਂ

ਅਨੁਵਿਜ੍ਜਕਕਿਚ੍ਚਵਣ੍ਣਨਾ

੩੬੦-੧. ਇਦਾਨਿ ਆਰਦ੍ਧਨ੍ਤਿ ਸਮ੍ਬਨ੍ਧੋ. ਏਕੋ ਭਿਕ੍ਖੁ ਏਕੇਨ ਮਾਤੁਗਾਮੇਨਾਤਿ ਯੋਜਨਾ. ਸੋਤਿ ਪਸ੍ਸਨ੍ਤੋ ਭਿਕ੍ਖੁ. ਤਨ੍ਤਿ ਨਿਕ੍ਖਮਨ੍ਤਂ ਪਵਿਸਨ੍ਤਂ ਵਾ ਭਿਕ੍ਖੁਂ. ਇਤਰੋਤਿ ਚੁਦਿਤਕੋ. ਤਸ੍ਸਾਤਿ ਚੋਦਕਸ੍ਸ. ਨ ਉਪੇਤੀਤਿ ਨ ਉਪਗਚ੍ਛਤਿ. ਨ ਪਟਿਜਾਨਾਤੀਤਿ ਨ ਪਟਿਸ੍ਸਵਂ ਕਰੋਤਿ. ਏਤ੍ਥਾਤਿ ਮਾਤੁਗਾਮੇਨ ਨਿਕ੍ਖਮਨ੍ਤਪਵਿਸਨ੍ਤਟ੍ਠਾਨੇ. ਯਨ੍ਤਿ ਕਮ੍ਮਂ. ਤੇਨਾਤਿ ਚੋਦਕੇਨ. ਤਸ੍ਸਾਤਿ ਚੋਦਕਸ੍ਸ ਵਚਨੇਨਾਤਿ ਸਮ੍ਬਨ੍ਧੋ. ਇਤਰੋਤਿ ਚੁਦਿਤਕੋ. ਅਸੁਦ੍ਧਪਰਿਸਙ੍ਕਿਤੋਤਿ ਅਸੁਦ੍ਧਾਯ ਅਟ੍ਠਾਨੇ ਉਪ੍ਪਨ੍ਨਾਯ ਪਰਿਸਙ੍ਕਾਯ ਪਰਿਸਙ੍ਕਿਤੋ. ਤਦਤ੍ਥਂ ਦਸ੍ਸੇਤਿ ‘‘ਅਮੂਲਕਪਰਿਸਙ੍ਕਿਤੋ’’ਤਿ ਇਮਿਨਾ. ਤਸ੍ਸ ਪੁਗ੍ਗਲਸ੍ਸਾਤਿ ਚੁਦਿਤਕਸ੍ਸ ਪਟਿਞ੍ਞਾਯਾਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਅਨੁਵਿਜ੍ਜਕਕਿਚ੍ਚੇਸੁ.

ਇਤਿ ਅਨੁਵਿਜ੍ਜਕਕਿਚ੍ਚਵਣ੍ਣਨਾਯ ਯੋਜਨਾ ਸਮਤ੍ਤਾ.

ਚੋਦਕਪੁਚ੍ਛਾਵਿਸ੍ਸਜ੍ਜਨਾ

੩੬੨-੩. ਸਚ੍ਚੇ ਚ ਅਕੁਪ੍ਪੇ ਚਾਤਿ ਪਧਾਨਂ ਸਮ੍ਬਨ੍ਧਟ੍ਠਾਨਂ ਦਸ੍ਸੇਨ੍ਤੋ ਆਹ ‘‘ਪਤਿਟ੍ਠਾਤਬ੍ਬ’’ਨ੍ਤਿ. ‘‘ਯ’’ਨ੍ਤਿਆਦਿਨਾ ਸਚ੍ਚੇ ਪਤਿਟ੍ਠਾਤਬ੍ਬਭਾਵਂ ਦਸ੍ਸੇਤਿ. ਯਨ੍ਤਿ ਕਮ੍ਮਂ. ‘‘ਨ ਚਾ’’ਤਿਆਦਿਨਾ ਅਕੁਪ੍ਪੇ ਪਤਿਟ੍ਠਾਤਬ੍ਬਭਾਵਂ ਦਸ੍ਸੇਤਿ. ਓਤਿਣ੍ਣਞ੍ਚਾਤਿ ਵਿਨਿਚ੍ਛਯਂ ਓਤਿਣ੍ਣਞ੍ਚ. ‘‘ਵਚਨ’’ਨ੍ਤਿ ਇਮਿਨਾ ਓਤਿਣ੍ਣਾਨੋਤਿਣ੍ਣਸਰੂਪਂ ਦਸ੍ਸੇਤਿ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ. ‘‘ਓਤਿਣ੍ਣਾਨੋਤਿਣ੍ਣਂ ਜਾਨਿਤਬ੍ਬ’’ਨ੍ਤਿ ਵਚਨੇਤਿ ਹਿ ਅਤ੍ਥੋ. ਚੋਦਕਸ੍ਸ ਪਮਾਣਨ੍ਤਿ ‘‘ਧਮ੍ਮੋ’’ਤਿ ਵਾ ‘‘ਅਧਮ੍ਮੋ’’ਤਿ ਵਾ ‘‘ਬਾਲੋ’’ਤਿ ਵਾ ‘‘ਪਣ੍ਡਿਤੋ’’ਤਿ ਵਾ ਚੋਦਕਸ੍ਸ ਪਮਾਣਂ. ਚੁਦਿਤਕਸ੍ਸ ਪਮਾਣਨ੍ਤਿ ਧਮ੍ਮਚੁਦਿਤਕੋ ਨੁ ਖੋ, ਨੋਤਿ ਚੁਦਿਤਕਸ੍ਸ ਪਮਾਣਂ. ਅਨੁਵਿਜ੍ਜਕਸ੍ਸ ਪਮਾਣਨ੍ਤਿ ਸਕ੍ਕਾ ਨੁ ਖੋ ਵਿਨਿਚ੍ਛਿਤੁਂ, ਨੋਤਿ ਅਨੁਵਿਜ੍ਜਕਸ੍ਸ ਪਮਾਣਂ. ਅਨੁਵਿਜ੍ਜਕੋ ਵਤ੍ਤਬ੍ਬੋਤਿ ਸਮ੍ਬਨ੍ਧੋ. ਯੇਨ ਧਮ੍ਮੇਨਾਤਿਆਦੀਸੁ ਧਮ੍ਮਾਦੀਨਂ ਸਰੂਪਂ ਦਸ੍ਸੇਨ੍ਤੋ ਆਹ ‘‘ਧਮ੍ਮੋਤਿ ਭੂਤਂ ਵਤ੍ਥੂ’’ਤਿਆਦਿ. ਏਤੇਨ ਧਮ੍ਮੇਨ ਚ ਏਤੇਨ ਵਿਨਯੇਨ ਚ ਏਤੇਨ ਸਤ੍ਥੁਸਾਸਨੇਨ ਚਾਤਿ ਯੋਜਨਾ. ਤਸ੍ਮਾ ਅਨੁਵਿਜ੍ਜਕੇਨ ਵੂਪਸਮੇਤਬ੍ਬਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਅਨੁਵਿਜ੍ਜਕਸ੍ਸ ਪਟਿਪਜ੍ਜਿਤਬ੍ਬਟ੍ਠਾਨੇ.

ਅਵਞ੍ਞਨ੍ਤਿ ਅਵਜਾਨਨਂ. ਇਮੇਤਿ ਥੇਰਾ. ‘‘ਖਤਤ੍ਤਾ’’ਤਿ ਇਮਿਨਾ ਅਤ੍ਤਨਾਵ ਅਤ੍ਤਾ ਖਞ੍ਞਤੀਤਿ ਖਤੋਤਿ ਵਚਨਤ੍ਥਂ ਦਸ੍ਸੇਤਿ. ਉਪਹਨਿਯਨ੍ਤੀਤਿ ਉਪਹਤਾਨਿ, ਉਪਹਤਾਨਿ ਇਨ੍ਦ੍ਰਿਯਾਨਿ ਅਨੇਨਾਤਿ ਉਪਹਤਿਨ੍ਦ੍ਰਿਯੋ. ‘‘ਪਞ੍ਞਾਯ ਅਭਾਵਤੋ’’ਤਿ ਇਮਿਨਾ ਦੁਮ੍ਮੇਧੋਤਿ ਏਤ੍ਥ ਦੁਸਦ੍ਦੋ ਅਭਾਵਤ੍ਥੋ, ਮੇਧਾਸਦ੍ਦੋ ਪਞ੍ਞਾਪਰਿਯਾਯੋਤਿ ਦਸ੍ਸੇਤਿ. ਨਤ੍ਥਿ ਮੇਧਾ ਏਤਸ੍ਸਾਤਿ ਦੁਮ੍ਮੇਧੋਤਿ ਨਿਬ੍ਬਚਨਂ ਕਾਤਬ੍ਬਂ. ਖਤੋ…ਪੇ… ਦੁਮ੍ਮੇਧੋ ਸੋ ਅਨੁਵਿਜ੍ਜਕੋ ਉਪਗਚ੍ਛਤੀਤਿ ਯੋਜਨਾ. ਤਸ੍ਮਾਤਿ ਯਸ੍ਮਾ ਉਪਗਚ੍ਛਤਿ, ਤਸ੍ਮਾ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਸ੍ਸਾਤਿ ਪਾਠਸ੍ਸ, ਗਾਥਾਯ ਵਾ. ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਚੁਦਿਤਕਚੋਦਕੇਸੁ ਹੀ’’ਤਿਆਦਿ. ਉਭੋਪੇਤੇਤਿ ਉਭੋਪਿ ਏਤੇ ਆਮਿਸਪੁਗ੍ਗਲਨਿਸ੍ਸਯੇ. ਧਮ੍ਮੋਤਿ ਸਾਸਨਧਮ੍ਮੋ. ਇਤੀਤਿ ਅਯਮਤ੍ਥੋ.

ਉਪਕਣ੍ਣਕਂ ਜਪ੍ਪਤੀਤਿ ਏਤ੍ਥ ਕਣ੍ਣਸ੍ਸ ਸਮੀਪਂ ਉਪਕਣ੍ਣਂ, ਤਦੇਵ ਉਪਕਣ੍ਣਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਏਵਂ ਕਥੇਹੀ’’ਤਿਆਦਿ. ‘‘ਕਣ੍ਣਮੂਲੇ’’ਤਿ ਇਮਿਨਾ ਉਪਕਣ੍ਣਕਨ੍ਤਿ ਏਤ੍ਥ ਉਪਸਦ੍ਦਸ੍ਸ ਸਮੀਪਤ੍ਥਂ ਦਸ੍ਸੇਤਿ. ਮਨ੍ਤੇਤੀਤਿ ਕਥੇਤਿ. ਇਮਿਨਾ ਜਪ੍ਪਧਾਤੁਯਾ ਕਥਨਤ੍ਥਂ ਦਸ੍ਸੇਤਿ. ਜਿਮ੍ਹਂ ਪੇਕ੍ਖਤੀਤਿ ਏਤ੍ਥ ਜਿਮ੍ਹਸਦ੍ਦੋ ਕੁਟਿਲਵਾਚਕੋ, ਕੁਟਿਲਂ ਨਾਮ ਅਤ੍ਥਤੋ ਇਧ ਦੋਸੋਤਿ ਆਹ ‘‘ਦੋਸਮੇਵਾ’’ਤਿ.

ਕਥਾਨੁਸਨ੍ਧੀਤਿ ਚੁਦਿਤਕਅਨੁਵਿਜ੍ਜਕਾਨਂ ਕਥਾਯ ਅਨੁਸਨ੍ਧਿ. ਵਿਨਿਚ੍ਛਯਾਨੁਸਨ੍ਧੀਤਿ ਅਨੁਵਿਜ੍ਜਕੇਨ ਕਤਸ੍ਸ ਆਪਤ੍ਤਾਨਾਪਤ੍ਤਿਵਿਨਿਚ੍ਛਯਸ੍ਸ ਅਨੁਸਨ੍ਧਿ. ਸਬ੍ਬਤ੍ਥਾਤਿ ਚੋਦਨਾਕਣ੍ਡੇ.

ਇਤਿ ਚੋਦਨਾਕਣ੍ਡਵਣ੍ਣਨਾਯ ਯੋਜਨਾ ਸਮਤ੍ਤਾ.