ਚੂਲ਼ਸਙ੍ਗਾਮਂ

ਅਨੁਵਿਜ੍ਜਕਸ੍ਸ ਪਟਿਪਤ੍ਤਿਵਣ੍ਣਨਾ

੩੬੫. ਚੂਲ਼ਸਙ੍ਗਾਮੇ ਸਮਾਗਮਨਂ ਸਙ੍ਗਾਮੋ, ਸਮਾਗਮੇਨ੍ਤਿ ਸਨ੍ਨਿਪਤਨ੍ਤਿ ਏਤ੍ਥਾਤਿ ਵਾ ਸਙ੍ਗਾਮੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਙ੍ਗਾਮੋ ਵੁਚ੍ਚਤਿ…ਪੇ… ਸਙ੍ਘਸਨ੍ਨਿਪਾਤੋ’’ਤਿ. ਸਨ੍ਨਿਪਤਨਂ ਸਨ੍ਨਿਪਾਤੋ, ਸਨ੍ਨਿਪਤਨ੍ਤਿ ਏਤ੍ਥ ਦੇਸੇਤਿ ਵਾ ਸਨ੍ਨਿਪਾਤੋ, ਸਙ੍ਘਸ੍ਸ ਸਨ੍ਨਿਪਾਤੋ ਸਙ੍ਘਸਨ੍ਨਿਪਾਤੋ. ਸਙ੍ਗਾਮ ਯੁਦ੍ਧੇਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੮ ਮਕਾਰਨ੍ਤਧਾਤੁ) ਵੁਤ੍ਤਂ. ਤਤ੍ਥ ਯੁਦ੍ਧਂ ਨਾਮ ਅਤ੍ਥਤੋ ਅਧਿਕਰਣਵਿਨਿਚ੍ਛਯੋਤਿ ਗਹੇਤਬ੍ਬਂ. ਤਦਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਤਤ੍ਰ ਹੀ’’ਤਿਆਦਿ. ਤਤ੍ਥ ਤਤ੍ਰਾਤਿ ਤਸ੍ਮਿਂ ਸਙ੍ਗਾਮੇ, ਸਮੋਸਰਨ੍ਤੀਤਿ ਸਮ੍ਬਨ੍ਧੋ. ਅਤ੍ਤਪਚ੍ਚਤ੍ਥਿਕਾਤਿ ਅਤ੍ਤਨੋ ਪਟਿਪਕ੍ਖਂ ਅਤ੍ਥਯਨ੍ਤਿ. ਉਦ੍ਧਮ੍ਮਨ੍ਤਿ ਧਮ੍ਮਤੋ ਵਿਯੋਗਂ. ਦੀਪੇਨ੍ਤਾ ਹੁਤ੍ਵਾਤਿ ਯੋਜਨਾ. ਕੇ ਵਿਯਾਤਿ ਆਹ ‘‘ਵਜ੍ਜਿਪੁਤ੍ਤਕਾ ਵਿਯਾ’’ਤਿ. ਸੋ ਭਿਕ੍ਖੁ ਪਵਤ੍ਤੇਤੀਤਿ ਸਮ੍ਬਨ੍ਧੋ. ਲਦ੍ਧਿਨ੍ਤਿ ਉਦ੍ਧਮ੍ਮਾਦਿਵਾਦਂ. ਤਤ੍ਥਾਤਿ ਸਙ੍ਗਾਮੇ. ਅਵਚਰਤੀਤਿ ਓਗਾਹੇਤ੍ਵਾ ਚਾਰੇਤਿ ਪਵਤ੍ਤੇਤਿ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਜ੍ਝੋਗਾਹੇਤ੍ਵਾ ਵਿਨਿਚ੍ਛਯਂ ਪਵਤ੍ਤੇਤੀ’’ਤਿ. ਏਤ੍ਥ ‘‘ਅਜ੍ਝੋਗਾਹੇਤ੍ਵਾ’’ਤਿ ਇਮਿਨਾ ਅਵਤ੍ਯੂਪਸਗ੍ਗਸ੍ਸ ਓਗਾਹਤ੍ਥਂ ਦਸ੍ਸੇਤਿ. ‘‘ਵਿਨਿਚ੍ਛਯਂ ਪਵਤ੍ਤੇਤੀ’’ਤਿ ਇਮਿਨਾ ਚਰਧਾਤੁਸ੍ਸ ਕਾਰਿਤਨ੍ਤੋਗਧਤ੍ਤਾ ਸਹਕਾਰਿਤਕਮ੍ਮੇਨ ਪਵਤ੍ਤਨਤ੍ਥਂ ਦਸ੍ਸੇਤਿ. ਇਮਿਨਾ ਸਙ੍ਗਾਮੇ ਅਵਚਰਤੀਤਿ ਸਙ੍ਗਾਮਾਵਚਰੋਤਿ ਨਿਬ੍ਬਚਨਂ ਦਸ੍ਸੇਤਿ. ਕੋ ਵਿਯਾਤਿ ਆਹ ‘‘ਯਸਤ੍ਥੇਰੋ ਵਿਯਾ’’ਤਿ. ਮਾਨਦ੍ਧਜਨ੍ਤਿ ਕੇਤੁਕਮ੍ਯਤਾਪਚ੍ਚੁਪਟ੍ਠਾਨਮਾਨਸਙ੍ਖਾਤਂ ਧਜਂ. ਰਜੋਹਰਣਸਮੇਨਾਤਿ ਏਤ੍ਥ ਰਜਂ ਹਰਤਿ ਅਪਨੇਤਿ ਅਨੇਨਾਤਿ ਰਜੋਹਰਣਂ, ਪਾਦਪੁਞ੍ਜਨਂ, ਤੇਨ ਸਮੇਨਾਤਿ ਦਸ੍ਸੇਨ੍ਤੋ ਆਹ ‘‘ਪਾਦਪੁਞ੍ਜਨਸਮੇਨਾ’’ਤਿ. ਪਾਦਂ ਪੁਞ੍ਜਤਿ ਸੋਧੇਤਿ ਅਨੇਨਾਤਿ ਪਾਦਪੁਞ੍ਜਨਂ, ਤੇਨ ਸਮੋ ਪਾਦਪੁਞ੍ਜਨਸਮੋ, ਤੇਨ. ਸਮਾਕਾਰਂ ਦਸ੍ਸੇਨ੍ਤੋ ਆਹ ‘‘ਯਥਾ’’ਤਿਆਦਿ. ਰਜੋਹਰਣਸ੍ਸ ਨੇਵ ਰਾਗੋ ਹੋਤੀਤਿ ਸਮ੍ਬਨ੍ਧੋ. ਯਥਾਪਤਿਰੂਪਨ੍ਤਿ ਪਤਿਰੂਪਸ੍ਸ ਅਨੁਲੋਮਂ, ਪਤਿਰੂਪਾਨਤਿਕ੍ਕਨ੍ਤਨ੍ਤਿ ਅਤ੍ਥੋ. ਅਕਥੇਨ੍ਤੇਨ ਨਿਸੀਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਸਾਮਂ ਵਾ ਧਮ੍ਮੋਤਿ ਏਤ੍ਥ ਧਮ੍ਮੋ ਨਾਮ ਕੋਤਿ ਆਹ ‘‘ਕਪ੍ਪਿਯਾਕਪ੍ਪਿਯਨਿਸ੍ਸਿਤਾ ਵਾ’’ਤਿਆਦਿ. ਰੂਪਾਰੂਪਪਰਿਚ੍ਛੇਦੋ ਚ ਸਮਥਾਚਾਰੋ ਚ ਵਿਪਸ੍ਸਾਨਾਚਾਰੋ ਚ ਠਾਨਵਤ੍ਤਞ੍ਚ ਨਿਸਜ੍ਜਵਤ੍ਤਞ੍ਚ, ਆਦਿਸਦ੍ਦੇਨ ਚਙ੍ਕਮਵਤ੍ਤਾਦੀਨਿ ਸਙ੍ਗਣ੍ਹਾਤਿ. ਚੁਦ੍ਦਸਮਹਾਵਤ੍ਤਾਦੀਨਂ ‘‘ਕਪ੍ਪਿਯਾਕਪ੍ਪਿਯਨਿਸ੍ਸਿਤਾ’’ਤਿ ਪਦੇਨ ਗਹਿਤਤ੍ਤਾ ਵਤ੍ਤਸਦ੍ਦੇਨ ਠਾਨਵਤ੍ਤਾਦੀਨਿ ਏਵ ਗਹੇਤਬ੍ਬਾਨਿ, ਆਦਿਸਦ੍ਦੇਨ ਚਙ੍ਕਮਵਤ੍ਤਾਦੀਨਿ ਗਹੇਤਬ੍ਬਾਨਿ. ਪਰੋ ਵਾ ਅਜ੍ਝੇਸਿਤਬ੍ਬੋਤਿ ਯੋਵਾ ਸੋ ਵਾ ਕੋਚਿ ਅਜ੍ਝੇਸਿਤਬ੍ਬੋਤਿ ਆਹ ‘‘ਯੋ’’ਤਿਆਦਿ. ਇਮਿਨਾ ਨ ਯੋ ਵਾ ਸੋ ਵਾ ਕੋਚਿ ਅਜ੍ਝੇਸਿਤਬ੍ਬੋ, ਸਮਤ੍ਥੋਯੇਵ ਪਨ ਅਜ੍ਝੇਸਿਤਬ੍ਬੋਤਿ ਵਾ ਦਸ੍ਸੇਤਿ. ‘‘ਆਵੁਸੋ’’ਤਿਆਦਿਨਾ ਵਤ੍ਤਬ੍ਬਾਕਾਰਂ ਦਸ੍ਸੇਤਿ. ਅਰਿਯੋ ਵਾ ਤੁਣ੍ਹੀਭਾਵੋਤਿ ਏਤ੍ਥ ਨ ਕੇਵਲਂ ਕਥੇਤੁਂ ਅਸਮਤ੍ਥਵਸੇਨ ਤੁਣ੍ਹੀਭਾਵੋ, ਕਮ੍ਮਟ੍ਠਾਨਮਨਸਿਕਾਰਵਸੇਨ ਪਨਾਤਿ ਆਹ ‘‘ਕਮ੍ਮਟ੍ਠਾਨਮਨਸਿਕਾਰਵਸੇਨ ਤੁਣ੍ਹੀਭਾਵੋ’’ਤਿ. ਅਰਿਯਾਨਂ ਏਸੋ ਅਰਿਯੋ, ਤੁਣ੍ਹੀਭਾਵੋ. ‘‘ਨਾਵਜਾਨਿਤਬ੍ਬੋ’’ਤਿ ਇਮਿਨਾ ਨਾਤਿਮਞ੍ਞਿਤਬ੍ਬੋਤਿ ਪਦਸ੍ਸ ਅਤਿਕ੍ਕਮ੍ਮ ਨ ਮਞ੍ਞਿਤਬ੍ਬੋਤਿ ਦਸ੍ਸੇਤਿ.

ਉਪਜ੍ਝਾਯੋਤਿ ਚੋਦਕਚੁਦਿਤਕਾਨਂ ਉਪਜ੍ਝਾਯੋ. ਸਬ੍ਬਤ੍ਥਾਤਿ ਸਬ੍ਬੇਸੁ ‘‘ਨ ਆਚਰਿਯੋ ਪੁਚ੍ਛਿਤਬ੍ਬੋ’’ਤਿਆਦਿਪਦੇਸੁ. ਕੁਲਮੇਵ ਜਾਤਿਨਾਮਗੋਤ੍ਤਵਸੇਨ ਅਯਨ੍ਤਿ ਅਪਦਿਸਿਯਤੀਤਿ ਕੁਲਪਦੇਸੋ. ਅਤ੍ਰਸ੍ਸਾਤਿ ਏਤ੍ਥ ਅਤ੍ਰ ਅਸ੍ਸਾਤਿ ਪਦਚ੍ਛੇਦਂ ਕਤ੍ਵਾ ਅਤ੍ਰਸਦ੍ਦੋ ਪੁਗ੍ਗਲਵਿਸਯੋ, ਅਸ੍ਸਸਦ੍ਦੋ ਆਖ੍ਯਾਤਿਕੋਤਿ ਆਹ ‘‘ਅਤ੍ਰ ਪੁਗ੍ਗਲੇ’’ਤਿਆਦਿ. ਤਤ੍ਥ ‘‘ਭਵੇਯ੍ਯਾ’’ਤਿ ਇਮਿਨਾ ਅਸ੍ਸਸਦ੍ਦਸ੍ਸ ਸਬ੍ਬਨਾਮਤ੍ਤਞ੍ਚ ‘‘ਭਵਤੀ’’ਤਿ ਵਤ੍ਤਮਾਨਿਕਭਾਵਞ੍ਚ ਪਟਿਕ੍ਖਿਪਤਿ. ਪਰਿਸਾਨੁਵਿਧਾਯਕੇਨਾਤਿ ਪਰਿਸਾਯ ਅਨੁਮਤਂ ਕਰੋਨ੍ਤੇਨ. ਇਮਿਨਾ ਨੋ ਪਰਿਸਕਪ੍ਪਿਕੇਨਾਤਿ ਏਤ੍ਥ ਕਪ੍ਪਸਦ੍ਦੋ ਵਿਝਤ੍ਥੋਤਿ ਦਸ੍ਸੇਤਿ. ਯਨ੍ਤਿ ਵਚਨਂ. ਨ ਹਤ੍ਥਮੁਦ੍ਦਾਤਿ ਮੁਦਨ੍ਤਿ ਏਤਾਯਾਤਿ ਮੁਦ੍ਦਾ, ਸਕ੍ਖਰਮਙ੍ਗੁਲਿਯਂ ਹਤ੍ਥਸ੍ਸ ਮੁਦ੍ਦਾ ਅਵਯਵਿਅਵਯਵਵਸੇਨ ਸਮ੍ਬਨ੍ਧਤ੍ਤਾਤਿ ਹਤ੍ਥਮੁਦ੍ਦਾ. ਤਸ੍ਸਾ ਵਿਕਾਰੋ ‘‘ਹਤ੍ਥਮੁਦ੍ਦਾ’’ਤਿ ਗਹੇਤਬ੍ਬੋਤਿ ਆਹ ‘‘ਹਤ੍ਥਵਿਕਾਰੋ’’ਤਿ.

‘‘ਅਤ੍ਥਂ ਅਨੁਵਿਧਿਯਨ੍ਤੇਨਾ’’ਤਿ ਏਤ੍ਥ ਅਤ੍ਥਨ੍ਤਿ ਵਿਨਿਚ੍ਛਯਤ੍ਥਂ. ਅਨੁਵਿਧਿਯਨ੍ਤੇਨਾਤਿ ਸਲ੍ਲਕ੍ਖੇਨ੍ਤੇਨ. ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਵਿਨਿਚ੍ਛਯਪਟਿਵੇਧਮੇਵ ਸਲ੍ਲਕ੍ਖੇਨ੍ਤੇਨਾ’’ਤਿ. ਸਨ੍ਨਿਪਾਤਮਣ੍ਡਲੇਤਿ ਸਨ੍ਨਿਪਾਤਾਯ ਪਰਿਸਾਯ ਸਮੂਹੇ, ਸਨ੍ਨਿਪਾਤਮਣ੍ਡਲਸ੍ਸ ਮਜ੍ਝੇਤਿ ਅਤ੍ਥੋ. ਨ ਵੀਤਿਹਾਤਬ੍ਬਨ੍ਤਿ ਏਤ੍ਥ ਵੀਤਿਹਰਣਂ ਨਾਮ ਅਤ੍ਥਤੋ ਹਾਪਨਨ੍ਤਿ ਆਹ ‘‘ਨ ਵਿਨਿਚ੍ਛਯੋ ਹਾਪੇਤਬ੍ਬੋ’’ਤਿ. ਦੁਰੁਤ੍ਤਵਾਚਨ੍ਤਿ ਚੋਦਕਚੁਦਿਤਕਾਨਂ ਦੁਰੁਤ੍ਤਵਾਚਂ. ਹਿਤਪਰਿਸਕਿਨਾਤਿ ਏਤ੍ਥ ਹਿਤਂ ਪਰਿ ਏਸਤੀਤਿ ਹਿਤਪਰਿਸਕੋ, ਕਰੁਣਾ ਚ ਕਰੁਣਾਪੁਬ੍ਬਭਾਗੋ ਚ, ਸੋ ਏਤਸ੍ਸਤ੍ਥੀਤਿ ਹਿਤਪਰਿਸਕੀ, ਪੁਗ੍ਗਲੋ, ਤੇਨ ਹਿਤਪਰਿਸਕਿਨਾ. ਤਮੇਵਤ੍ਥਂ ਦਸ੍ਸੇਨ੍ਤੋ ਆਹ ‘‘ਹਿਤੇਸਿਨਾ ਹਿਤਗਵੇਸਿਨਾ’’ਤਿ. ਕਰੁਣਾਤਿ ਅਪ੍ਪਨਾਪਤ੍ਤਾ ਕਰੁਣਾ. ਕਰੁਣਾਪੁਬ੍ਬਭਾਗੋਤਿ ਅਪ੍ਪਨਾਪਤ੍ਤਾਯ ਕਰੁਣਾਯ ਪੁਬ੍ਬਭਾਗੇ ਪਵਤ੍ਤਾ ਪਰਿਕਮ੍ਮਉਪਚਾਰਕਰੁਣਾ. ਪਦਦ੍ਵਯੇਪੀਤਿ ‘‘ਹਿਤਾਨੁਕਮ੍ਪਿਨਾ ਕਾਰੁਣਿਕੇਨ ਭਵਿਤਬ੍ਬਂ. ਹਿਤਪਰਿਸਕਿਨਾ ਅਸਮ੍ਫਪ੍ਪਲਾਪਿਨਾ ਭਵਿਤਬ੍ਬ’’ਨ੍ਤਿ ਪਦਦ੍ਵਯੇਪਿ. ਅਯਂ ਅਧਿਪ੍ਪਾਯੋ ਵੇਦਿਤਬ੍ਬੋਤਿ ਯੋਜਨਾ. ‘‘ਅਸੁਨ੍ਦਰਵਚਨ’’ਨ੍ਤਿ ਇਮਿਨਾ ਅਸੁਰੁਤ੍ਤਨ੍ਤਿ ਏਤ੍ਥ ਸੁਨ੍ਦਰਂ ਉਤ੍ਤਂ ਸੁਰੁਤ੍ਤਂ, ਨ ਸੁਰੁਤ੍ਤਂ ਅਸੁਰੁਤ੍ਤਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਪਰਿਗ੍ਗਹੇਤਬ੍ਬੋਤਿ ਪਰਿਵੀਮਂਸਿਤ੍ਵਾ ਗਹੇਤਬ੍ਬੋ.

ਤਸ੍ਸਾਤਿ ਅਧਮ੍ਮਚੋਦਕਸ੍ਸ. ਅਨੋਸਟਂ ਵਤ੍ਥੁਨ੍ਤਿ ਏਤ੍ਥ ‘‘ਚੋਦਕਚੁਦਿਤਕੇਹਿ ਵੁਤ੍ਤ’’ਨ੍ਤਿ ਪਦਂ ਅਧਿਕਾਰਵਸੇਨ ਵੇਦਿਤਬ੍ਬਂ. ਏਤ੍ਥ ਚ ਅਨੋਸਟਨ੍ਤਿ ਵਿਨਿਚ੍ਛਯਂ ਅਨੋਸਟਨ੍ਤਿ ਅਤ੍ਥੋ. ਕਿਂ ਪਗ੍ਗਣ੍ਹਿਤਬ੍ਬੋਤਿ ਆਹ ‘‘ਨਨੁ ਤ੍ਵ’’ਨ੍ਤਿਆਦਿ. ਅਨੁਯੋਗਵਤ੍ਤਨ੍ਤਿ ‘‘ਕਾਲੇਨ ਵਕ੍ਖਾਮੀ’’ਤਿਆਦਿਨਾ (ਚੂਲ਼ਵ. ੩੯੯; ਪਰਿ. ੩੬੨, ੪੩੭) ਵੁਤ੍ਤਂ, ‘‘ਸਚ੍ਚੇ ਚ ਅਕੁਪ੍ਪੇ ਚਾ’’ਤਿ (ਚੂਲ਼ਵ. ੪੦੧) ਚ ਵੁਤ੍ਤਂ ਅਨੁਯੁਞ੍ਜਨਵਤ੍ਤਂ. ਤਞ੍ਹਿ ਯਸ੍ਮਾ ਅਨੇਨ ਵਤ੍ਤੇਨ ਚੋਦਕੋ ਚੁਦਿਤਕਂ, ਚੁਦਿਤਕੋ ਵਾ ਚੋਦਕਂ ਅਨੁਯੁਞ੍ਜਤਿ, ਚੋਦਕੇਨ ਚੁਦਿਤਕੋ, ਚੁਦਿਤਕੇਨ ਵਾ ਚੋਦਕੋ ਅਨੁਯੁਞ੍ਜਿਯਤਿ, ਤਸ੍ਮਾ ਅਨੁਯੋਗਵਤ੍ਤਨ੍ਤਿ ਵੁਚ੍ਚਤਿ. ਕਥਾਪੇਤ੍ਵਾਤਿ ਚੋਦਕਚੁਦਿਤਕੇਹੇਵ ਕਥਾਪੇਤ੍ਵਾ. ਤਸ੍ਸਾਤਿ ਚੋਦਕਸ੍ਸ ਵਾ ਚੁਦਿਤਕਸ੍ਸ ਵਾ, ਸਾਰਜ੍ਜਨ੍ਤਿ ਭਯਂ. ਤੇਤਿ ਤਵ. ਵਤ੍ਵਾਪੀਤਿ ਮੁਖੇਨ ਵਤ੍ਵਾਪਿ. ਪਿਸਦ੍ਦੇਨ ਕਾਯਵਿਕਾਰਂ ਦਸ੍ਸੇਤ੍ਵਾਪੀਤਿ ਸਮ੍ਪਿਣ੍ਡੇਤਿ. ‘‘ਅਨੁਯੋਗਵਤ੍ਤ’’ਨ੍ਤਿ ਧਾਤੁਕਮ੍ਮਂ, ‘‘ਸੋ ਭਿਕ੍ਖੂ’’ਤਿ ਕਾਰਿਤਕਮ੍ਮਂ ਅਜ੍ਝਾਹਰਿਤਬ੍ਬਂ, ਤਂ ਕਮ੍ਮਂ ਤਬ੍ਬਪਚ੍ਚਯੋ ਵਦਤਿ. ਅਸੁਚਿ ਵਿਭਾਵੇਤਬ੍ਬੋਤਿ ਏਤ੍ਥ ਨਤ੍ਥਿ ਸੁਚਿ ਸੀਲਮੇਤਸ੍ਸਾਤਿ ਅਸੁਚੀਤਿ ਵੁਤ੍ਤੇ ਅਲਜ੍ਜੀਤਿ ਆਹ ‘‘ਅਲਜ੍ਜਿ’’ਨ੍ਤਿ. ਉਜੁ ਸੀਲਵਾ ਕਾਯਵਙ੍ਕਾਦਿਰਹਿਤੋ ਹੋਤੀਤਿ ਯੋਜਨਾ. ਏਤ੍ਥ ਚ ਕਾਯਵਙ੍ਕਾਦਿਰਹਿਤੋ ਹੋਤੀਤਿ ਇਮਿਨਾ ਉਜੁਨੋ ਕਾਰਣਂ ਦਸ੍ਸੇਤਿ. ਕਾਯਵਙ੍ਕਾਦਿਰਹਿਤਤ੍ਤਾ ਉਜੁ ਹੋਤੀਤਿ ਅਧਿਪ੍ਪਾਯੋ. ਸੋਤਿ ਭਿਕ੍ਖੁ. ਮਦ੍ਦਵੇਨੇਵਾਤਿ ਮੁਦੁਭਾਵੇਨੇਵ. ਉਪਚਰਿਤਬ੍ਬੋਤਿ ਕਥੇਤਬ੍ਬੋ. ਇਮਿਨਾ ਉਜੁਮਦ੍ਦਵੇਨਾਤਿ ਪਦਸ੍ਸ ਸਮ੍ਬਨ੍ਧਟ੍ਠਾਨਂ ਪਾਠਸੇਸਂ ਦਸ੍ਸੇਤਿ. ਯੋਤਿ ਭਿਕ੍ਖੁ. ਅਯਮੇਵਾਤਿ ਏਵਸਦ੍ਦੇਨ ਨ ਧਮ੍ਮਗਰੁਕੋ, ਪੁਗ੍ਗਲਗਰੁਕੋ, ਧਮ੍ਮੇਸੁ ਚ ਪੁਗ੍ਗਲੇਸੁ ਚ ਨ ਮਜ੍ਝਤ੍ਤੋਤਿ ਵੇਦਿਤਬ੍ਬੋਤਿ ਦਸ੍ਸੇਤਿ.

੩੬੬. ਤੇਨ ਚ ਪਨ ਅਨੁਵਿਜ੍ਜਕੇਨਾਤਿ ਯੋਜਨਾ. ਸੁਤ੍ਤਾਦੀਸੂਤਿ ਆਦਿਸਦ੍ਦੇਨ ਵਿਨਯਅਨੁਲੋਮ ਪਞ੍ਞਤ੍ਤਅਨੁਲੋਮਿਕਾਨਿ ਸਙ੍ਗਹੇਤਬ੍ਬਾਨਿ. ਸੁਤ੍ਤਂ ਸਂਸਨ੍ਦਨਤ੍ਥਾਯ ਹੋਤੀਤਿ ਯੋਜਨਾ. ਕੇਸਂ ਸਂਸਨ੍ਦਨਤ੍ਥਾਯਾਤਿ ਆਹ ‘‘ਆਪਤ੍ਤਾਨਾਪਤ੍ਤੀਨਂ ਸਂਸਨ੍ਦਨਤ੍ਥ’’ਨ੍ਤਿ. ਓਪਮ੍ਮਂ ਅਤ੍ਥਦਸ੍ਸਨਤ੍ਥਾਯ ਹੋਤੀਤਿ ਯੋਜਨਾ. ਏਸੇਵ ਨਯੋ ਸੇਸੇਸੁਪਿ. ਪਚ੍ਚੇਕਟ੍ਠਾਯਿਨੋ ਅਵਿਸਂਵਾਦਕਟ੍ਠਾਯਿਨੋਤਿ ਏਤ੍ਥ ਪਚ੍ਚੇਕਸ੍ਮਿਂ ਤਿਟ੍ਠਨ੍ਤਿ ਸੀਲੇਨਾਤਿ ਪਚ੍ਚੇਕਟ੍ਠਾਯਿਨੋ, ਅਵਿਸਂਵਾਦਕੇ ਤਿਟ੍ਠਨ੍ਤਿ ਸੀਲੇਨਾਤਿ ਅਵਿਸਂਵਾਦਕਟ੍ਠਾਯਿਨੋਤਿ ਦਸ੍ਸੇਨ੍ਤੋ ਆਹ ‘‘ਇਸ੍ਸ…ਪੇ… ਠਿਤਾ’’ਤਿ. ‘‘ਇਸ੍ਸਰਿਯਾਧਿਪਚ੍ਚਜੇਟ੍ਠਕਟ੍ਠਾਨੇ’’ਤਿ ਇਮਿਨਾ ਪਚ੍ਚੇਕਸਰੂਪਂ ਦਸ੍ਸੇਤਿ. ਤੇਤਿ ਸਙ੍ਘੇਨ ਅਨੁਮਤਾ ਪੁਗ੍ਗਲਾ.

ਕਿਮਤ੍ਥਂ ‘‘ਵਿਨਯੋ ਸਂਵਰਤ੍ਥਾਯਾ’’ਤਿਆਦਿ ਵੁਤ੍ਤਨ੍ਤਿ ਆਹ ‘‘ਇਦਾਨੀ’’ਤਿਆਦਿ. ਇਦਾਨਿ ਦਸ੍ਸੇਤੁਂ ਆਹਾਤਿ ਸਮ੍ਬਨ੍ਧੋ. ਯੇ ਮਨ੍ਦਾ ਮਨ੍ਦਬੁਦ੍ਧਿਨੋ ਹੁਤ੍ਵਾ ਏਵਂ ਵਦੇਯ੍ਯੁਨ੍ਤਿ ਯੋਜਨਾ. ਅਥ ਵਾ ਮਨ੍ਦਾ ਮਨ੍ਦਬੁਦ੍ਧਿਨੋ ਯੇ ਪੁਗ੍ਗਲਾ ਏਵਂ ਵਦੇਯ੍ਯੁਨ੍ਤਿ ਯੋਜਨਾ. ਸਕਲਾਪਿ ਵਿਨਯਪਞ੍ਞਤ੍ਤਿ ਉਪਨਿਸ੍ਸਯੋ ਹੋਤੀਤਿ ਸਮ੍ਬਨ੍ਧੋ. ਇਮਿਨਾ ‘‘ਸਂਵਰਤ੍ਥਾਯਾ’’ਤਿਆਦੀਸੁ ‘‘ਅਨੁਪਾਦਾਪਰਿਨਿਬ੍ਬਾਨਤ੍ਥਾਯਾ’’ਤਿਪਰਿਯੋਸਾਨੇਸੁ ਤੇਰਸਵਾਕ੍ਯੇਸੁ ‘‘ਉਪਨਿਸ੍ਸਯੋ ਹੋਤੀ’’ਤਿ ਪਾਠਸੇਸੋ ਅਜ੍ਝਾਹਰਿਤਬ੍ਬੋਤਿ ਦਸ੍ਸੇਤਿ. ‘‘ਪਚ੍ਚਯੋ’’ਤਿ ਇਮਿਨਾ ‘‘ਉਪਨਿਸ੍ਸਯੋ’’ਤਿ ਪਦਸ੍ਸ ਉਪਨਿਸ੍ਸਯਪਚ੍ਚਯੋਤਿ ਅਤ੍ਥਂ ਦਸ੍ਸੇਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਦ੍ਵਾਦਸਵਾਕ੍ਯੇਸੁ. ਵਿਸੇਸਂ ਦਸ੍ਸੇਨ੍ਤੋ ਆਹ ‘‘ਅਪਿਚੇਤ੍ਥਾ’’ਤਿਆਦਿ. ਤਤ੍ਥ ਅਪਿਚ ਵਿਸੇਸਂ ਵਕ੍ਖਾਮੀਤਿ ਯੋਜਨਾ. ਏਤ੍ਥਾਤਿ ‘‘ਅਵਿਪ੍ਪਟਿਸਾਰਤ੍ਥਾਯਾ’’ਤਿਆਦੀਸੁ. ਤਨ੍ਤਿ ਸੁਖਂ. ਤਰੁਣਵਿਪਸ੍ਸਨਾ ਨਾਮ ਕਸ੍ਸ ਅਧਿਵਚਨਨ੍ਤਿ ਆਹ ‘‘ਉਦਯਬ੍ਬਯਞਾਣਸ੍ਸੇਤਮਧਿਵਚਨ’’ਨ੍ਤਿ. ਨਨੁ ‘‘ਵਿਰਾਗੋ’’ਤਿ ਏਤ੍ਥ ਚਤੁਬ੍ਬਿਧਸ੍ਸ ਅਰਿਯਮਗ੍ਗਸ੍ਸ ਗਹਿਤਤ੍ਤਾ ‘‘ਵਿਮੁਤ੍ਤੀ’’ਤਿ ਏਤ੍ਥਾਪਿ ਚਤੁਬ੍ਬਿਧਂ ਫਲਂ ਗਹੇਤਬ੍ਬਂ, ਕਸ੍ਮਾ ਪਨ ‘‘ਵਿਮੁਤ੍ਤੀਤਿ ਅਰਹਤ੍ਤਫਲ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਚਤੁਬ੍ਬਿਧੋਪਿ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਪਚ੍ਚਯਪਰਿਨਿਬ੍ਬਾਨਤ੍ਥਾਯਾਤਿ ਅਸਙ੍ਖਤਪਰਿਨਿਬ੍ਬਾਨਤ੍ਥਾਯ. ਨਤ੍ਥੇਤ੍ਥ ਹਿ ਪਰਿਨਿਬ੍ਬਾਨੇ ਕੋਚਿ ਪਚ੍ਚਯੋ, ਤਸ੍ਮਾ ਅਪਚ੍ਚਯਪਰਿਨਿਬ੍ਬਾਨਨ੍ਤਿ ਵੁਚ੍ਚਤਿ. ਤਨ੍ਤਿ ਵਿਮੁਤ੍ਤਿਞਾਣਦਸ੍ਸਨਂ. ਤਸ੍ਮਿਂਅਨੁਪ੍ਪਤ੍ਤੇਤਿ ਤਸ੍ਮਿਂ ਵਿਮੁਤ੍ਤਿਞਾਣਦਸ੍ਸਨੇ ਅਨੁਕ੍ਕਮੇਨ ਪਤ੍ਤੇ. ਅਵਸ੍ਸਨ੍ਤਿ ਧੁਵਂ ਏਕਨ੍ਤੇਨਾਤਿ ਅਤ੍ਥੋ. ਏਤਦਤ੍ਥਾਤਿ ਏਸੋ ਅਨੁਪਾਦਾ ਪਰਿਨਿਬ੍ਬਾਨਸਙ੍ਖਾਤੋ ਅਤ੍ਥੋ ਪਯੋਜਨਂ ਇਮਿਸ੍ਸਾ ਕਥਾਯਾਤਿ ਏਤਦਤ੍ਥਾ. ਕਥਾਤਿ ਅਤ੍ਥਸ੍ਸ ਕਥਾ. ਮਨ੍ਤਨਾਤਿ ਧਮ੍ਮਸ੍ਸ ਮਨ੍ਤਨਾ. ਏਤਦਤ੍ਥਾ ਉਪਨਿਸਾਤਿ ਏਤ੍ਥ ਉਪਨਿਸਾਸਦ੍ਦੋ ਪਚ੍ਚਯਵਾਚਕੋਤਿ ਆਹ ‘‘ਪਰਂਪਰਪਚ੍ਚਯਤਾਪੀ’’ਤਿ. ਪਰਂਪਰਪਚ੍ਚਯੋ ਹਿ ਯਸ੍ਮਾ ਏਤ੍ਥ ਪਰਂਪਰਫਲਂ ਉਪਗਨ੍ਤ੍ਵਾ ਨਿਸੀਦਤਿ, ਤਸ੍ਮਾ ਉਪਨਿਸਾਤਿ ਵੁਚ੍ਚਤਿ. ‘‘ਵਿਨਯੋ ਸਂਵਰਤ੍ਥਾਯਾ’’ਤਿਆਦਿਕਾ ਅਯਂ ਪਰਂਪਰਪਚ੍ਚਯਤਾਪੀਤਿ ਯੋਜਨਾ. ਸੋਤਾਵਧਾਨਨ੍ਤਿ ਓਗਾਹੇਤ੍ਵਾ ਧਿਯਤੇ ਠਪਿਯਤੇ ਅਵਧਾਨਂ, ਸੋਤਸ੍ਸ ਅਵਧਾਨਂ ਸੋਤਾਵਧਾਨਂ. ਇਮਂ ਕਥਨ੍ਤਿ ‘‘ਵਿਨਯੋ ਸਂਵਰਤ੍ਥਾਯਾ’’ਤਿਆਦਿਂ ਇਮਂ ਕਥਂ. ਯਂ ਞਾਣਂ ਉਪ੍ਪਜ੍ਜਤਿ, ਤਮ੍ਪਿ ਏਤਦਤ੍ਥਨ੍ਤਿ ਯੋਜਨਾ. ਯਦਿਦਂ ਅਨੁਪਾਦਾ ਚਿਤ੍ਤਸ੍ਸਾਤਿ ਏਤ੍ਥ ‘‘ਯਦਿਦ’’ਨ੍ਤਿ ਨਿਪਾਤੋ ‘‘ਵਿਮੋਕ੍ਖੋ’’ਤਿ ਪਦਮਪੇਕ੍ਖਿਤ੍ਵਾ ਯੋ ਅਯਨ੍ਤਿ ਅਤ੍ਥਂ ਵਦਤਿ. ਅਨੁਪਾਦਾਤਿ ਏਤ੍ਥ ‘‘ਸਯਂ ਅਭਿਞ੍ਞਾ’’ਤਿਆਦੀਸੁ (ਮਹਾਵ. ੧੧) ਵਿਯ ਯਕਾਰਲੋਪੋ ਹੋਤਿ, ਤਸ੍ਸ ਪਦਸ੍ਸ ਕਰਣਂ ਪਨ ‘‘ਚਤੂਹਿ ਉਪਾਦਾਨੇਹੀ’’ਤਿ ਵੇਦਿਤਬ੍ਬਂ. ਇਤਿ ਇਮ ਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਯੋ ਅਯਂ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ’’ਤਿ. ਏਤ੍ਥ ਚਤੂਹਿ ਉਪਾਦਾਨੇਹਿ ਅਨੁਪਾਦਿਯਿਤ੍ਵਾ ਚਿਤ੍ਤਸ੍ਸ ਅਰਹਤ੍ਤਫਲਸਙ੍ਖਾਤੋ ਯੋ ਅਯਂ ਵਿਮੋਕ੍ਖੋ ਅਤ੍ਥਿ, ਸੋਪਿ ਏਤਦਤ੍ਥਾਯ ਹੋਤੀਤਿ ਯੋਜਨਾ. ‘‘ਅਰਹਤ੍ਤਫਲਸਙ੍ਖਾਤੋ’’ਤਿ ਇਮਿਨਾ ‘‘ਵਿਮੋਕ੍ਖੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਅਰਹਤ੍ਤਫਲਞ੍ਹਿ ਯਸ੍ਮਾ ਵਿਰੁਦ੍ਧੇਹਿ, ਵਿਸੇਸੇਨ ਵਾ ਸਬ੍ਬਕਿਲੇਸੇਹਿ ਮੁਚ੍ਚਿਤ੍ਥ, ਤਸ੍ਮਾ ਵਿਮੋਕ੍ਖੋਤਿ ਵੁਚ੍ਚਤਿ. ‘‘ਅਪਚ੍ਚਯਪਰਿਨਿਬ੍ਬਾਨਤ੍ਥਾਯ ਏਵਾ’’ਤਿ ਇਮਿਨਾ ਏਤਦਤ੍ਥਾਯਾਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ.

੩੬੭. ਵਤ੍ਥੁਂ…ਪੇ… ਨ ਜਾਨਾਤੀਤਿ ਏਤ੍ਥਾਤਿ ਯੋਜਨਾ ਕਾਤਬ੍ਬਾ. ਤਸ੍ਮਾਤਿ ਯਸ੍ਮਾ ਸਮ੍ਬਨ੍ਧੋ, ਤਸ੍ਮਾ. ਏਤ੍ਥਾਤਿ ਇਮਾਸੁ ਗਾਥਾਸੁ. ਸਮੇਨ ਚਾਤਿ ਏਤ੍ਥ ‘‘ਸਮੇਨਾ’’ਤਿ ਪਦਂ ‘‘ਅਞ੍ਞਾਣੇਨਾ’’ਤਿ ਅਤ੍ਥਸ੍ਸ ਵਾਚਕਂ ਰੂਲ਼੍ਹੀਪਦਨ੍ਤਿ ਦਸ੍ਸੇਨ੍ਤੋ ਆਹ ‘‘ਤੇਨੇਵ ਪੁਬ੍ਬਾਪਰਂ ਅਜਾਨਨਸ੍ਸ ਸਮੇਨ ਅਞ੍ਞਾਣੇਨਾ’’ਤਿ. ਪਾਲ਼ਿਯਂ ਕੇਨ ਕਾਰਣੇਨ ਕਤਾਕਤਂ ਨ ਜਾਨਾਤੀਤਿ ਆਹ ‘‘ਸਮੇਨਾ’’ਤਿ. ਸਮੇਨ ਪੁਬ੍ਬਾਪਰਸ੍ਸ ਅਞ੍ਞਾਣੇਨ ਕਤਾਕਤਂ ਨ ਜਾਨਾਤੀਤਿ ਅਤ੍ਥੋ. ਏਵਨ੍ਤਿਆਦਿ ਨਿਗਮਨਂ. ਯਂ ਪਨੇਤਂ ਵਚਨਂ ਵੁਤ੍ਤਨ੍ਤਿ ਯੋਜਨਾ. ‘‘ਤਤ੍ਥਾ’’ਤਿ ਚ ‘‘ਆਕਾਰਅਕੋਵਿਦੋ’’ਤਿ ਚ ਆਧਾਰਾਧੇਯ੍ਯਾਨਮਭੇਦੋ ਹੋਤਿ, ਤਸ੍ਮਾ ਅਵਯਵੀ ਆਧਾਰੋ, ਅਵਯਵੋ ਆਧੇਯ੍ਯੋਤਿ ਦਟ੍ਠਬ੍ਬਂ. ਆਕਾਰਸਦ੍ਦੋ ਇਙ੍ਗਿਤਤ੍ਥੋਤਿ ਆਹ ‘‘ਕਾਰਣਾਕਾਰਣੇ’’ਤਿ. ਕਾਰਣਅਕਾਰਣਸਙ੍ਖਾਤੇ ਇਙ੍ਗਿਤੇਤਿ ਅਤ੍ਥੋ. ਆਕਾਰਸ੍ਸਾਤਿ ਭੁਮ੍ਮਤ੍ਥੇ ਸਾਮਿਵਚਨਂ. ਆਕਾਰਸ੍ਮਿਨ੍ਤਿ ਹਿ ਅਤ੍ਥੋ.

ਤਥੇਵਾਤਿ ਯਥਾ ਵਤ੍ਥੁਆਦੀਨਿ ਨ ਜਾਨਾਤਿ, ਤਥੇਵ. ਇਤੀਤਿ ਏਵਂ. ਯ੍ਵਾਯਨ੍ਤਿ ਯੋ ਅਯਂ ਭਿਕ੍ਖੁ. ‘‘ਭਯੇਨਾ’’ਤਿ ਇਮਿਨਾ ਭਯਾਤਿ ਏਤ੍ਥ ਕਾਰਣਤ੍ਥੇ ਨਿਸ੍ਸਕ੍ਕਵਚਨਨ੍ਤਿ ਦਸ੍ਸੇਤਿ. ਭਯਾ ਭਯੇਨ ਗਚ੍ਛਤੀਤਿ ਯੋਜਨਾ. ਏਸੇਵ ਨਯੋ ਸਮ੍ਮੋਹੇਨ ਮੋਹਾ ਗਚ੍ਛਤੀਤਿ ਏਤ੍ਥਾਪਿ. ਛਨ੍ਦਾਤਿ ਛਨ੍ਦੇਨ. ਦੋਸਾਤਿ ਦੋਸੇਨ. ਅਤ੍ਤਨਾ ਞਾਤੁਂ ਅਸਮਤ੍ਥਤਾਯ ਨ ਸਞ੍ਞਤ੍ਤਿਯਾ ਕੁਸਲੋਤਿ ਆਹ ‘‘ਪਰਂ ਸਞ੍ਞਾਪੇਤੁਂ ਅਸਮਤ੍ਥਤਾਯਾ’’ਤਿ. ਕਸ੍ਮਾ ਨਿਜ੍ਝਤ੍ਤਿਯਾ ਚ ਅਕੋਵਿਦੋਤਿ ਆਹ ‘‘ਕਾਰਣਾ…ਪੇ… ਤਾਯਾ’’ਤਿ. ‘‘ਪਰਿਸਾਯ ਲਦ੍ਧਤ੍ਤਾ’’ਤਿ ਇਮਿਨਾ ਲਦ੍ਧੋ ਪਰਿਸਸਙ੍ਖਾਤੋ ਪਕ੍ਖੋ ਯੇਨਾਤਿ ਲਦ੍ਧਪਕ੍ਖੋਤਿ ਵਚਨਤ੍ਥਂ ਦਸ੍ਸੇਤਿ. ਸਚੇ ਤਾਦਿਸਕੋ ਭਿਕ੍ਖੁ ਹੋਤਿ, ਸੋ ਭਿਕ੍ਖੁ ‘‘ਅਪਟਿਕ੍ਖੋ’’ਤਿ ਵੁਚ੍ਚਤੀਤਿ ਯੋਜਨਾ. ਏਸੇਵ ਨਯੋ ਹੇਟ੍ਠਾਪਿ. ‘‘ਨ ਪਟਿਕ੍ਖਿਤਬ੍ਬੋ’’ਤਿ ਇਮਿਨਾ ਪਟਿਮੁਖਂ ਨ ਇਕ੍ਖਿਤਬ੍ਬੋਤਿ ਅਪਟਿਕ੍ਖੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਨ ਓਲੋਕੇਤਬ੍ਬੋ’’ਤਿ ਇਮਿਨਾ ਇਕ੍ਖਧਾਤੁਯਾ ਦਸ੍ਸਨਤ੍ਥਂ ਦਸ੍ਸੇਤਿ.

ਇਤਿ ਚੂਲ਼ਸਙ੍ਗਾਮਵਣ੍ਣਨਾਯ ਯੋਜਨਾ ਸਮਤ੍ਤਾ.